أنا عندي برد

السلام عليكم ورحمة الله وبركاته
أنا عندي نزلة برد
الغريب انى عمرى ما اخدت برد طوال حياتي غير مرتين
والاتنين في الصيف
امبارح قاعد لافف بشكير فوق دماغي زي واحد لابس عمامه كبيرة ..اخويا محمد شافني وقعد يضحك ويقولى مالك كده شبه حاكم الخرطوم
المهم بقالي كتير مش دردشنا سوى ..قلت ندردش
على فكره لسه لافف البشكير ..فاذا خرفنا شويه فأستحملونا
زمان وانا صغير
ايه مستغربين ليه مش اتفقنا اننا هنخرف شوية
ولا كده يبقى خرفنا اوي
ما علينا
زمان وانا صغير.. الكلب بتاع ام اشرف جارتنا عضني في ايدي
بصيت لقيت ام اشرف جابت المقص وقصت شوية من شعر الكلب وحرقتهم في غطا علبه صغيره وراحت حطتهم مكان العضة ..والحمد لله بقيت بخير من غير مستشفى ولا حقن
الكلب بقى ..مات
اه والله مات
لالالالالا ذهنكم راح بعيد مش انا ده مات بعدها بكذا سنة
واحد كان متغاظ منه حطله سم في حتة عضمة وقتله وقيدت الجريمة ضد مجهول
يعني انا برئ الحمد لله
على فكره مجهول ده شايل قضايا كتير عن ناس ياما منهم ناس كبار ..انا بدأت اشك ان مجهول ده بيقبض فلوس مقابل تقييد القضايا ضده
يلا اهي ارزاق احنا هنق على الراجل كمان
وزمان برضه لما كان صابع رجلي الكبير يتعور ويقيح " يعععع بقرف كل ما افتكر " كانت ستي ام فوزي برضه في علبه صغيره بتاعة سالمون وتحط شوية ملوخيه على شوية لبن وتعجنهم وتربطهم على صباعي
انما اللي مش قادر افتكره ..ايه الحاجه اللي بسببها كانت بترقدني وتوقف معزه فوق وشي وتقعد تحلبها على وشي
انا بقول يمكن علشان الخضة مثلا
اصل انا كنت اخاف من العنكبوت اوي
........................
ثواني الواد صالح معايا على الماسنجر بيقولي قلبظ خطب
قلبظ عباره عن تلاجة متحركة
كنا مره في الفصل في ثانوي ونفاجئ بيه في حصة الرسم بيطلع ازازة ساقع من جيب الجاكت
كان شايلها ازاي معرفش
طبعا ابلة الرسم كانت غلبانه اوي ..حتى مكنتش بتعرف تاخد الغياب ولما تيجي تحلف تحلف بالنعمه ..نقولها يا ابله انتي مش عارفه تعديهم كويس جايز غلطي ..تقول والنعمة عديتهم بقولك والنعمه
افتكرت ابلة تانية كانت صغيرة كده وقصيرة وجت قعدت قدامنا تحس انها عيلة صغيره ..كانت بنت وكيل المدرسة
اه كوسه طبعا علشان يعينوها في مدرسة ثانوي ..بس مش مهم اهي كانت بتدرسلنا تربية وطنية
فطبعا كنا عاملين دوشة ..فقالت : سكوووت اللي هيتكلم هجيبله بابا
طبعا الفصل كله فطس من الضحك ..تاني يوم اختفت من المدرسة في ظروف غامضه
الابلة بتاعة الاحياء بقى كانت مدرسة كبيرة وكان ميهماش
فمره سألت الواد ابراهيم تختخ سؤال : الكروموسومات موجوده فين ؟
فابراهيم راح مبتسم ابتسامه خبيثة مع كسوف..الفصل فهم قصده فكلنا ضحكنا
فراحت وقفت جنبه ومصممة تعرف منه الكروموسومات فين
والواد ابراهيم بصراحة كان جبل مقدرتش تعرف منه حاجه
كل اللى كان بيعمله ان يبتسم وخدوده تتنفخ اكمنه طخين
فراحت مسكته من خدوده وقرصته وقالتله الكروموسومات هنا ولا هنا وراحت ضربته على بطنه
كنا نفتكر الموقف ده ونقوله : عارف ياد يا ابراهيم انت انكتبلك عمر جديد ..لو كانت ضربتك تحت شويه كانت ضيعت مستقبلك
ههههههههههههه
الكلام ده كنا في سنة اولى ثانوى ..علشان كده كلنا دخلنا ادبي
طالما العلم قليل الحياء كده يبقى نخش ادبي احسن ولا تجيلنا واحده تقولنا الكروموسومات فين
نرجع لموضوعنا علشان شكلنا بعدنا اوي
ايه التخاريف دي ..وايه اصلا سبب الحكاوى دي
وايه الموضوع
انا مش فاكر حاجه خالص
ده عيل تايه ده ياخويا ولا ماله
هو انا مش سخن ..بس عرقان معرفش ازاي
بمناسبة ماله ده يا خويا وشغل المسرحيات وكده
انا كنت كاتب مسرحية زمان اسمها الواد هاملت العربجي
نفس الخطوط العريضة او التفاصيل العامه لمسرحية هاملت بس مع تمصيرها
أو بمعنى ادق ..تبحيثها نسبة الى الباحث
باختصار كده علشان عيانين ..وكمان عايز اقوم اعمل شوية آيسون
اتهريت ليمون اتهرييييت
المشهد : هاملت شاب في اوائل العشرينات يرتدي لبس عربجية كلكم عارفينه ويجلس على مقهى ولا يوجد غيره من الزبائن حيث ان الوكت قد تأخر, ويدخن سيجارة بانجو وفي غاية الانسطال ابن المساطيل
عامل المقهى : القهوجي يعني -واد يا هاملت اطفي السيجارة دي ياله انت عايز تودينا في داهية
هاملت : ياعم اجري انت بس انت فكرك يعني الحكومة ما تعرفش اننا بنشرب.. طب ده بكره يفرقوه على بطايق التموين بس اصبر انت بس
القهوجي :( في غضب ) طب يلا قوم روح عايزين نقفل
هاملت :(مسطول طول الوقت) اروح ازاي دلوقتي انت عايز جوز امي يهزأني اجري اعملي قهوة خلينى افوق واركز شوية
القهوجي : ( مستفهما ) صحيح ياله يا هاملت - انت ازاي وافقت ان عمك يتجوز امك؟
هاملت : انت حمار ياله - مش احسن ما يتجوزها حد غريب
القهوجي : يا واد افهم ..وليه ما يكونش عمك اتجوزها علشان طمعان في ثروتكم
هاملت : ( يضحك في هستيريا) ثروة ايه يا هبل انت هو احنا حيلتنا حاجه ده هو بيت قديم مفيش غيره
القهوجي : ( هامسا ) ياله دول بيقولوا ان بيتكم ده في كنز تحت الارض ..فيه دهب كتير
هاملت : بص ..طالما عمي شايف مزاجي وبيروشني ..حلال عليه يا عم
القهوجى ( بغيظ ) عليا النعمة انت واد اهبل ..ويتركه ويغادر المسرح
في هذه اللحظة ينشد هاملت ويدندن مع نفسه اغنية هابطة : بحبك يا حمار
دخان كثيف يظهر من جانب المسرح المقابل للجهة التى يجلس بها هاملت ثم يظهر من خلاله رجل في زي عربجي ملامحه تدل على انه جاوز الخمسين من عمره ويختفي الدخان تدريجيا فيما هو يتقدم خطوات قليلة تجاه هاملت ثم يتوقف وينظر ناحية هاملت بإشمئزاز
هاملت : يا ساتر ايه الدخان ده كله ..ولا انا عينيه زغللت ولا ايه
ومين ده اللى واقف هناك ..ده يظهر عليه زبون .. ينظر ناحية داخل المقهى الذي لا يظهر للجمهور - تعالى ياله زبون تانى اهو يابن الفقرية وكنت قال عايز تقفل
أبو هاملت : إزيك يا هاملت
هاملت : الله ..ده باين عليه يعرفني ولا ايه ..ازيك ياعم الحاج
ابو هاملت : عم الحاج !!!!!!!!!!!؟
هاملت : وكمان مش عاجبك عم الحاج ..اقولك.. ينفع عمتي الحاجه ..هاهاهاهاهاهاااا
ابو هاملت : وكمان بتتريق ومش عارفني ..فوق ياله احسن اكلك قلمين على وشك
هاملت ( معترضا غاضبا ) لااااا يا عم الحاج ..فوق شوية انا اللي كان بيضربني واحد بس ..ابويا واتنيل مات خلاص ..وما يستجريش حد يمد ايده عليا
ابو هاملت : ماهو انا ابوك ياهبل يا مسطول
هاملت: ( باستغراب ) يا عم انت ما سمعتنيش كويس ولا ايه ..مش بقولك ابويا مات
ابو هاملت : ابوك ما متش يا غبي ..ابوك انقتل
هاملت : لا مات موتة ربنا وشبع موت كمان ..واذا كان هو هيرجع في كلامه ..فانا مش هرجع ..ده انا ماصدقت يا عم ده كان كاتم على نفسي
ابو هاملت : اصحى وركز معايا بقولك انا ابوك ..بص في وشي كويس
هاملت : عايزني اصدق انك ابويا ؟
أبو هاملت : ايوه طبعا لاني ابوك
هاملت : خلاص انا همشي وانت حاسب القهوة .. ويهم بالانصراف مارا من امامه فيتناوله أبوه بقوه ممسكا به من قفاه ويجذبه نحوه فيصيح هاملت وكأنه يشاهده اول مره ..مين أبويا ازيك يابا بالحضن
أبو هاملت : ( يدفعه ناحية المقهى ليجلس مره اخرى ) دلوقتي بس بتقول ابويا ..لما حسيت خلاص انك هتنضرب ..اه يا جبان ..اقعد عندك واسمعني كويس
يجلس هاملت في مكانه الاول وفي هذه اللحظة يدخل عامل المقهى موجها حديثه لهاملت بالانصراف ثم يفاجأ بوالد هاملت امامه
القهوجي : يلا بقى يا عم هاملت علشان تمشي احنا هنقفل خلاص ..الله مين عم ابو هاملت ازيك يا حاج انت جيت امتى حمد لله على السلامه- ثم موجها حديثه لهاملت- إلحق ياله يا هاملت ابوك رجع
هاملت : ( بقرف ) آه رجع
القهوجي : بس ياله هو مش كان مات وطلع فوق خلاص في العالم الاخر
هاملت : ماهو مسكوه فوق في المطار يظهر التأشيرة طلعت مضروبة فرجعوه تاني
القهوجي : عملها الحانوتي النصاب - ثم يخبط كف يده في رأسه وفي ذهول - لالالا انا اكيد انسطلت ميت ايه ده اللي يرجع ..اكيد دخان الهباب اللي بتشربه ده هو اللي اثر عليا ..منك لله انت تشرب وتنفخ وانا اشم وانسطل ..اروح اطس وشي بشوية ميه - وينصرف داخلا الى المقهى
...................................
وكفاية كده علشان العرق خنقني ومش قادر اشغل المروحة هروح اعمل ايسون

الأشارب

.
.
.
.
.
.
.
و أحب أقول لكم إن الحصول على اتنين كيلو لبن عصفور كناريا استرالى يعد أيسر بكثير من الحصول على الأشارب اللى فى خيالها .. و بصراحة أنا كل رجائى فى الدنيا إنها تدرك هذه الحقيقة لأنها لو أدركتها يا إما هاترضى تتنازل شوية عن بعض شروطها فى الأشارب .. أو ماننزلش أصلا من البيت بغرض البحث عن شىء لا يوجد إلا فيما وراء الطبيعة .. أو نبحث عن الأشارب المطلوب فى كتب الخيال العلمى .. أو نحاول استخراج الأشارب من أساطير الأولين . . . . . .
.
.
.
عايزين تعرفوا هى إيه حكاية الأشارب ؟؟؟؟؟ شدوا الرحال على فرنسا و الرايق و الضاحكون

و ياللا ..... أشوفكم أمس

_____________

الميكروفون ينتقل الان الى الباحث

مستعجل اوي أصبر خلينا نحط فيديو للناس بمناسبة اني اتعلمت ازاي انزل فيديو

وشكرا للطاغية سكايار هو اللى علملني

ده عسقول في اولى رحلاته داخل المولات للبحث عن "الأشارب" اللي هو الايشارب

بس هو من ساعة ما تاه والحروف لخبطت عنده

اتفرجوا على عسقول لما تاه من اخته ولقيته ليلى نظمي..ومحدش يسألني ايه وداه جنينة الحيوانات

عام من التدوين

السلام عليكم ورحمة الله وبركاته

ممكن ادردش معاكم شوية من غير زعل
بتاريخ 20 يوليو 2007 بدأت رحلتي التدوينية
اول مره سمعت فيها عن المدونات كان من تلات سنين
احدى الاخوات في احد المنتديات قالتلي انت ممكن تعمل مدونة وتتكتب فيها براحتك ان شاء الله حتى تشتم انت حر
فدخلت على مدونة بنت مصرية وعملت مدونة
ومش فاكر اسمها ايه ولا الباسورد ايه
بعدها عملت مدونة اسمها شيكا بيكا وغير اسمها وبقى اسمها الحالي يا مسافر وحدك
وطبعا مكنتش بعرف اسجل دخول في المدونة فكنت فاكر ان المشكلة في الباسورد
.............
ثم كنت قرأت رسالة محققه لابن حزم الاندلسي في الموسيقى والغناء المباح
ورأيته يرد على جميع ادلة من قالوا بتحريم الغناء
والاخطاء اللي وقع فيها ابن حزم وجدت المحقق عباس احسان بيرد عليه فيها لكنها اشياء بسيطة بحيث ننتهي الى نفس النتيجة التي انتهى اليها ابن حزم
فأنا اتضايقت بصراحة
اتضايقت من العلماء الكبار اللي انتقدهم ابن حزم وعلى فكره ابن حزم بطبيعته حاد اللسان جدا في نقد العلماء بطريقة جامدة
حسيت انهم ( بيستغفلونا ) ايوه اولا: بيخفوا ادلة التضعيف , ثانيا : يلوون اعناق النصوص يعني بيفسروها حسب مزاجهم
وده شفته كمان في موضوع النقاب ..كنت اقرأ في كتاب رسائل ابن عثيمين في فتاوى النساء ( تقريبا الاسم كده صح) ولقيته ذكر اربعتاشر دليل على وجوب النقاب
فسحبت ورقه فلوسكاب وبدأت اكتب الرد على هذه الفكر الذي يستشهد به فوجدت ان نفس الادلة التى يستشهد بها كحجة على وجوب النقاب هي نفس الادلة التى تثبت عدم وجوبه وفرضيته فرميت الورقة وقلت لا ..كده ما ينفعش
الدين مش كده
الدين مش اني اعصر النصوص وألويها علشان تمشي على مزاجي
المفكر المحترم هو الذي يعرض كلا الرأيين ويترك للقارئ حرية الاختيار مش يفرض عليه رأيه ويعرض وجه واحد من وجوه المسألة
نشرت موضوع ابن حزم في المنتدى تاني يوم مش لاقيته ..ولان المشرف كان ولد سلفي وكان مخنوق من كتاباتي خاصة اني مش بحب شيخه المفضل محمد حسان
فا مفكرتش اسأله فين الموضوع لغاية ما عرفت بالصدفه ومنه انه هو دمج موضوعي في موضوع قديم واصبح موضوع عباره عن رد في الصفحة ما بعد السادسة في موضوع قديم في اخر صفحة المنتدى من تحت
فقلت ما بدهاش انا اعمل مدونتي
وكان الهدف هي عرض المسائل المشهورة ذات الوجهين وعرض الوجه الاخر الذي يريدون اخفاءه او تشويهه .. ومش بالضرورة اكون متفق معاه
لكن امانة البحث وامانة العرض تستوجب ذكر الرأيين في كل مسألة
وعيب لما يكون عالم كبير من القدماء وتكتشف انه مدلس
فأنشئت مدونتى وسميتها الصحيفة الكاشفة
وطبعا معرفتش برضه ازاى اسجل دخول وكل ما اكتب الباسورد مش بيدخل
لغاية ما لقيت بالصدفه موضوع بالمنتدى عن التدوين وعرفت ان اسم الدخول هو الايميل نفسه
وانطلقت
وكان موضوع ابن حزم في الغناء هو اول موضوعاتي في عالم التدوين
وكان لازم بقى اروح واجي في المدونات علشان الناس تعرفني افتكر من اوائل المدونات اللى دخلتها مدونة بينو ورفقة عمر وفتاة الجنة ودوبا اللي جت قالت تعليق فهمت منه انها زي ناس كتير بتستتقل الموضوعات الدينية
في الوقت ده في المدونات دي لقيت الباشمهندس عصفور المدينة رجل مفكر محترم قلت خلاص هييجي يزورني خلينا احنا نكمل لف على المدونات لكن عصفور المدينة مجاش غير لما رحت وجهتله دعوة لزيارة مدونتى :) احم احم
ومنذ زيارة عصفور المدينة لمدونتى وانا حسيت بأني مدون بجد لاني لقيت شخص اتحاور معاه شخص بيقرا صح وبيتابع صح
فكنت مكتفي به وكنت بطبعي قليل النشاط لانى لفيت كتير ومحدش من اللى رحتلهم جه غير بينو ورفقة وفتاة الجنه وعصفور المدينة ..اللى لسه فاكرها ومتضايق انها ما جاتش هى الاخت مناجاة..كنت فاكرها هتيجي لكن حتى تاريخه لم تشرفنا بتعليق يثبت قيامها بزيارتنا
وفيه بعض الاخوة افتكروا اني علماني خاصة السلفيين ووجدت تريقه عند الاخ مسلم والاخت كارميلا كان لها تعلق ساخر من مدونتى برضه واخ بيعلق باسم مجهول وافتكر حد فيهم قال عنى انه مسمي مدونته الصحيفة الكاشفة وكأنه بيحتكر الحقيقة لنفسه
اما الاستاذ عصفور فكان افضل منهم كلهم لانه ما سبنيش حتى غاص في اعماقي حتى يستكشف حقيقة هذا المدون الجديد
خاصة بعد انضمام ابن حجر العسقلاني اللي للاسف بعض هذه المدونات اعطته سمعة قشطه
سبب اختياري لابن حجر كشريك في المدونة اني شعرت انه عنده فكر عنده وجهة نظر
وكان ولا زال طبعا شخص في قمة الاخلاق والادب والذوق
بس الغريب والعجيب ان المدونات ذات الطابع الديني اصحابها مش بيترددوا كتير على بعض
وانا واحد من دول يعني ..فمثلا زي ما انا مقصر مع اخوة محترمين جدا هم اساتذة مدرسة العلوم الشرعية مضافا إليهم بعض الاسماء المحترمه زي ضاكتور خالد ..او حتى بينو اللى اختفى عنا واختفينا عنه ..او حتى الاخ مسلم اللي من البداية مش طايقنا رغم اني رحتله اكتر من مرة وتعليقاتي في منتهى الهدوء
لكن يظهر ان المدونات الفكرية الدينية روادها مش كتير بشكل عام
ما عدا الصحيفة الكاشفة الحقيقة واعتقد سبب كسرها لهذه القاعدة معروف وهي بساطة الاسلوب الذي اتبعناه منذ البداية

فيه مدونات تانية كانت صديقة زي مدونة داعية المستقبل ..حتى الاخت كراميلا جات في كام زيارة استكشافية تفتيشية كده

وبجد مدونات كراميلا كانت جميلة جدا كان اسم مدونتها الرئيسية عباد الرحمن

وفيه الاخت سلوى صاحبة مدونة طوق الحرية ..اللى عرضت عليها تشاركنا واعتذرت
ودلوقتي احكيلكم قصة مدونة الاستراحه
كانت طلعت مدونة كده على شكل مجلة وكان شكلها جميل جدا اسمها تقريبا طراطيش كلام او حاجة زي كده يعني
وكان عسقول معجب بالمدونة دي ..وتقريبا عرضوا عليه المشاركة بس هو رفض
فأنا فكرت نعمل مدونة تانية عامة بحيث نقدر نكتب فيها موضوعات عامه واجتماعية ومتنوعة بحيث نحافظ على الطابع العلمي للصحيفة الكاشفة
وبعد حيرة كبيره في اختيار الاسم وكان احد الاقتراحات نسميها ( يا إلهي الملكة حامل من فعلها ) وكتبت بوست هو تاني بوست في الاستراحة وكان يحمل عنوان اقرا الحادثه وعنوان داخلي باسم يا الهي الملكة حامل ..الخ
لكن قلت لعسقول كلمة تحققت فعلا : قولت له انا خايف المدونة الجديدة تخطف الاضواء من الصحيفة علشان كده فكرت نسميها استراحة الكاشفة علشان يفضل القارئ حاسس ان مش دي المدونة الرئيسية وبالتالي مش تأثر على الصحيفة
لكن يا حبيبي كل شئ بقضاء
فأصبح للاستراحة جمهور عمره ما خطى ناحية الصحيفة الكاشفة
حتى الجدد ما هوبوش ناحيتها
ولما رحت للاخ الربان مثلا ووجهتله دعوه جه لغاية هنا ووقف
يبدو زي ما قلت ان المدونات ذات الطابع الديني جمهورها قليل
بصوا انا بتكلم بصراحة وبندرش سوا الموضوع مش رسمي اوى يعني
فكوا الحزام فكوا الحزام
ولا بحمل ضيق من اى حد ..الحمد لله كبرنا واتعلمنا
المهم
لقيت المدونات المشهورة وصاحبة اكثر تعليقات هى مدونة عايزه اتجوز..ومدونة ازميرالدا
كنت بتابعهم خاصة ازميرالدا لانى حصل موقف بينى وبين مدونة عايزه اتجوز كنت لسه في البدايات وقولتها عندك موهبة جميلة ليه مش تستغليها في كتابة موضوعات اجتماعية
ويبدو اني قلت تعليقي بشكل فج شويه لاني فاكر في ردها عليا انها اتضايقت شويه فانا اخدتها من قصيرها
مش عارف ليه لقيت المدونات اللى بتتكلم على الجواز والخطوبة والعنوسه ومواقف المتزوجين زي مدونة طهقانه لهم جمهور كبير جدا اكتر من غيرهم
طبعا انا مش قصدي انتقد اصحاب المدونات دي بالعكس اسلوبهم جميعا ممتع جدا ويستحقوا بالفعل هذا النجاح
بس مش الاسلوب وحده هو سبب نجاحهم لان ناس كتير اسلوبهم رائع جدا وبيبذلوا مجهود في التعليقات وزيارة مدونات الاخرين بشكل اكبر لكن جمهور اقل
واكتشفت ان السبب المهم برضه هو انهم اختاروا موضوعات رائجة جدا خاصة ان معظم المدونين بنات وشباب وبيدخلوا للتنفيس او للحقد او للقر او للهزار
وخلوني انفس عن نفسي شوية واقول ان سبب اختيار بعض المدونات للطباعة كان السبب الربحي سبب اعتقد هو المهم
علشان كده كنت سعيد بمدونات مصرية للجيب لانه بغض النظر عن نوعية موضوعاتها إلا ان السمة الابرز فيها وسبب اصدارها هو اخراج صوت شباب مصر على هيئة كتاب مطبوع ..وبالتالى ( على فكره مش مشاركين فيها لسه بس عسقول هيشارك العدد القادم ان شاء الله) وبالتالى ده مش عمل فردي وانما ده عمل جماعي
وعلشان فيه ناس حذرتني من الحديث في هذه النقطة فأحب اكرر انى احترم كتابات الاخوات الثلاثة وانا اضعهم في القمة الى جوار كتّاب أحب اقرالهم
الموضوع مش نفسنه يعني الموضوع ان التدوين يا دور النشر والطباعة مش ظاهره تستربحوا منها ..التدوين عمل في حب مصر فياريت يكون النشر من اجل مصر برضه

وجهة نظر ..وزي ما بيقولوا الناس اذواق
........
نرجع الي قصتي التدوينية
وتكلم عن المدونات
مدونة عصفور المدينة ..مدونة الاخ الاكبر او مدونة رب الاسرة التدوينية
مدونة رفقة عمر ..برتاح فيها
مدونة آبي ..اتاريها بنت جدعه خسارة اني اتعرفت عليها متأخر رغم انه زبونه قديمه
مدونة فرنسا ..من ساعة العملية وهي مش هي
مدونة خيخة ..بنت جدعه جدعه يعني
مدونة مجداوية ..الام

مش عارف ليه حسيت ان الاسرة التدوينية محتاج فيها لشخصية احس انها امي في هذا العالم التدويني

لغاية ما ربنا كرمني بمجداويه
مدونة نيجرو ..اخويا اللي بحبه
مدونة مع اصراري ..صديق احترمه
مدونة جني ..حبيب قلبي
مدونة عاشقة الفردوس ..بنت مثالية
مدونة الساحرة ..ههههههه قصدكم طنط !!!؟
مدونة بنات افكاري ..اخت يعتمد عليها
مدونة صبرني يا رب ..ابهرتني بمدونتها التانية رؤية اسلامية
مدونة اصرار امل ..استاذتي وحزين لغيابها
مدونة همسة قلم ..اول مدونة اضافتنا في قائمة المفضلة
مدونة محمد المؤرخ ..بكيت لما شوفت اسم مدونتى عنده في قائمة المدونات العلمية مع مدرسة العلوم الشرعية وعصفور المدينة وكان اسمنا قبل عصفور المدينة ..وسبب بكائي ان الراجل ده معرفوش ولا عمري علقت عنده وتقريبا هو جه عندنا مره وحيده
وده كان زمان في البدايات فكنت فرحان اوى ودمعت كمان
بالمناسبة مره لقيت واحد اسمه ياسر جاي يقول فين دروس اصول الفقه ..واحنا بقالنا فترة متوقفين ففرحت انه جاي يسأل على موضوعات قديمه علشان يقراها او يتعلم منها, حسيت ان دي مكافأة عظيمة جدا على الدروس دي
مدونة راجي ..رجل محترم جدا واخلاق واكيد جدع

مدونة ال جي ..المدونة المفضلة عندى انا وعسقول ولا يخلو لقاء من الحديث عنها كحالة تدوينية متفرده

مدونة فارس عربي قومي ..أبو عمو ..اصله بلدياتي اول مره ألاقي مدون من نفس مدينتي وحشتنا يابو الفوارس

مدونة سووو ..تحس وانت بتقرأ انك قاعد مع واحد صاحبك ع القهوة

مدونة شيماء الجارحي ..بتفكرني بنفسي وانا في الاعدادية

مدونة لعلها خير ..اختي يا جماعة اختي

مدونة قطة الصحراء ..معرفش اذا كنت بكرهها ولا ده لاني صعبان عليا اني اكتشفت فيها شخصية مكنتش اعرفها

مدونة دكتور ضياء ..الخصم الذي تعلمت منه

مدونة طهقانة ..ابن حجر بيحسدني عليها علشان بتعلق في موضوعاتي وهو لا

مدونة احمد الصباغ ..ده اللى بيبعت رسايل لعسقول في موضوعاتي :) لسه كان معايا على الماسنجر من شوية

مدونة شيكو اون لاين ..الحمد لله اني معرفتهاش وإلا كنت بكيت اكتر مما بكيت لما عرفت بوفاتها وما زالت عيني تدمع كلما تذكرتها

مدونة فتاة الجنة .. أفكار جميلة

مدونة اموله ..ذكريات جميلة اعلى ضحكة ضحتها كان من تعليقات اموله

مدونة هذا صوتي ايمان حسن ..احساسي وانا بقرالها زي احساسي وانا بسمع باهتمام

يا جماعة اللي بنساهم يعذروني انا مخي مش دفتر واكيد بنسى

وعموما انا رحت مدونة عصفور المدينة وشوفت قائمة المدونات عنده علشان افتكر اللي نسيتهم

معلش ماهو انا لو كنت اتغديت كويس مكنش حصل كده

مدونة واحدة مفروسة ..مدونة (عشرية ) من الناس اللي تحب انهم يكونوا جيرانك في الحياة

مدونة سمباتيك ..دي من الناس الاعلام في التدوين

مدونة أبو خالد ..ان جه سلمولي عليه

مدونة افاق الحرية ..شخص مؤدب ومتواضع ..ومتابع (كله حرف ميم) 1

مدونة ابن همام ..محاور احترمه

مدونة البنت الشلبية ..صاحبة الخطوة العزيزة كتر خيرها كانت بتيجي تسأل علينا في الشات بوكس

كنت بقدر ده لان فيه ناس مش عندها طول بال لقراءة موضوعات دينية فبتبص وتمشي هي كانت بتسيب رد بقى في الشات بوكس فانا بشكرها بجد مش هزار وبقدرها جدا

مدونة صاحب المضيفة ..وجدنا قبل ان نجده لذا فهو صاحب فضل علينا

مدونة امام الجيل ..كان عامل جو حلو في رمضان اللي فات

مدونة بنت الجنوب .. فعلا مسير الحي يتلاقي ..دفعتي في الكلية

مدونة بهلوله ..مدام هدى الله يرحمها كانت نشيطة اوى ومحبوبه من الجميع

مدونة جنى الجنتين دان ..من الناس القليلة اللى بحب اقرا تعليقاتها عند الاخرين

مدونة حراس الحقيقة ..وجهتلها دعوة لزيارتنا وانا مش بوجه دعوة صريحة لحد إلا اذا كنت احب انه ييجي ويعلق

جت ومعرفتش تعلق..قالت ان مدونتي محتاجه وقت تكون رايقه فيه

مدونة صيد الخاطر ..شهادة لله وحده ..حائر في دنيا الله ..محمد عبد المنعم ..هكذا علمتني الحياة

عمالقة تدوين محترم ناس قصرنا معاهم رغم حبنا لكتابتهم

مدونة ظبط دماغك ..فتامينات سريعة وكانت في رمضان اللى فات مميزة جدا

مدونة عصفور بلا اجنحة ..فكرتني يا عم عصفور هي فينها دلوقتي

ربنا يكرمها من الناس اللي شجعونا في البدايات

مدونة دكتور حر... ده من فئة العمالقة في التدوين

اصل فيه مدونين لما ييجي يزوروك كأنك اخدت ختم النسر على البوست

مدونة سومة مجنونه في بلد عاقل ..مدونتها اجمل وأرقى من اسمها المتواضع

اللي هيزعل علشان نسيت اسمه ..والله انا هزعل اكتر منك

فياريت المعاتبة تكون بالراحه علشان انا لما بتكسف بزعل من نفسي وبعاقب نفسي احيانا

مدونة نونو عاشقة النقاب

شايفين كنت هنسى ازاي

يا ريت يا عاشقة الفردوس تبلغيها ان احدى امنياتي كانت انها تشرفنا من زمان في الصحيفة الكاشفة

لكن زى مانتم عارفين سحر الاستراحة حرمنا منها في الصحيفة

مدونة محبط افندي ..معرفوش لسه ضايفني على الايميل وانا بكتب بقوله انت مين قلي لسه بعمل مدونة

جبت ايميلي منين ؟ قال واحد عطاه ايميلات المدونين علشان يساندوه

على فكره دمه خفيف

الموضوع ده كتبته قبل ميعاده لاني مش عارف لما ييجي ميعاده هنكون موجودين ولا لا

بعتذرلكم لاني راح اكون مشغول الفترة القادمة ..وجايز اقابل كتير منكم على ارض الواقع قريبا ان شاء الله

وجايز تلاقوني يومين تلاته وكاتب موضوع جديد

بس نفسيا ..محتاج لاجازة

واتمنى محدش يكون زعل من اي كلام في البوست ..دي حاجه كده زي ما نكون قاعدين بينا وبين بعض وبندردش يعني وواخدين راحتنا شوية في الكلام

رسول الله ..تسمحلي اكون من أحبابك؟

مالكم فيه ايه؟

مستغربين العنوان ولا ايه؟.. بلاش الري اكشنات الغريبة اللي على وشوشكم دي

بصوا بقى ..معادش فيه وقت للهزار ولا للشعارات

يعني مش هنقول بنحب النبي عليه الصلاة والسلام ونسكت

وبنتعامل مع ذكر اسمه زي الماكينات لو حد داس على زرار تشتغل

ناس كل علاقتها بالنبي انه لما يذكر اسمه تقول عليه الصلاة والسلام

من اليوم يا شباب ..لازم النبي يدخل حياتنا بشكل فعليييييي..اتكا اوي على الياء

اجعل النبي يدخل حياتك خليه صديقك , ابوك , اخوك , جارك , شخص معدي جنبك في الشارع , شخص ركبت جنبه في مواصلات

ازاي ؟؟؟؟؟

خلي كل معاملتك مع الناس دي حط النبي في ذهنك

يعني عامل صديقك زي ما النبي قال ..بكده تبقى انت من احباب النبي

يقول النبي فيما معناه

اشتقت الى احبابي

قال الصحابة : أولسنا احبابك يا رسول الله ؟ قال : بل انتم أصحابي

احبابي هم قوم يأتون بعدي يؤمنوا بي ويصدقوا بي ولم يروني

وهذا الحديث او ما معناه اشتهر على الالسنه ولكني لم اجده في كتب السنة

وهذا الحديث التالي اكثر تثبيتا في كتب السنة
عن أنس بن مالك قال
قال رسول الله صلى الله عليه وسلم

وددت أني لقيت إخواني قال فقال أصحاب النبي صلى الله عليه وسلم

أوليس نحن إخوانك قال أنتم أصحابي ولكن إخواني الذين آمنوا بي ولم يروني

مسند احمد بن حنبل

عامل اخوك زي ما النبي قال وحط في ذهنك انك بتتعامل بسنة النبي وكما فعل النبي

عامل ابوك , جارك , عابر سبيل ..خلي ذهنك كله وحياتك وتفكيرك هو النبي عليه الصلاة والسلام

ادخل بيتك .وقلد النبي شوف النبي في بيته كان بيعمل ايه ..كان بيساعد اهل بيته ازاي

هتقولي صعب

هقولك لانك مش بتطبق منهج كامل ..يعنى لما تبقى في بيتك بتقتدي برسول الله ..وفى عملك بتقتدي بالمنافقين شئ طبيعي انك مش هترتاح لان شخصيتك مزدوجه

لما تقلد النبي في جزء وجزء لا ..هتتعب ويبقى صعب فعلا

ما جعل الله لرجل من قلبين في جوفه

يبقى لما تلتزم تلتزم صح

حد يكره انه يكون عايش حياته وبيتصرف تصرفات نبي

طيب ساكت ليه؟

هتقولي يعني هبقى انا لوحدي وسط المجتمع اكيد هضعف

هقولك على حاجه ..لما تكون انت كويس ..هتجبر الناس تعاملك كويس

يعني انت مثلا قاعد في مكان دلوقتي مع صحابك وقاعد تقول نكته قبيحه

لو جه صاحب لكم زيه زيكم كده فريش وكول هتكمل عادي كلامك

لو اللى جه ده شخص محترم مش هقولك متدين ودقنه مترين ..شخص بس محترم هتسكت زي التلميذ الخايب

ايه اللى خلاك تسكت ..احترام الشخص ده لذاته وعدم ضعفه للاخرين

بيبقى عندك جار ..راجل طيب كده وامير ومحترم وحاطط كرسي في الشارع قدام بيته ولا صاحب دكان وقاعد قدام دكانته وماسك سبحه ولا مصحف وقاعد يقرا في حاله

لو انت معدي وبتتريق وصوتك عالي في الشارع وماشي تضحك زي الراقصات اول ما تلحمه وقبل المسافه بينك وبينه تقرب .. بتروح معدل نفسك ومبطل ضحك وان كنت بتتكلم مع حد بتسكت او بتوطي صوتك لغاية ما تعديه

يبقى ما تقولش اخاف ألتزم احسن مقدرش وهبقى انا وحدي وسط الناس اكيد هضعف

لا ياخويا بطل حجج ..شوف انت سلوكك مع المحترمين والملتزمين ازاي .. هم برضه اللي زيك حاليا هيعملوا معاك لما تلتزم زي مانت بتعمل مع الملتزمين

يلا بينا ندخل على رسول الله ونقوله يا رسول الله محتاجينلك في حياتنا

رسول الله ..ممكن نكون من احبابك؟

طبعا ممكن ..بأننا نكون محبين لسنته صلى الله عليه وسلم ومتبعين لها

والحياة مع رسول الله مش هتكون خنقه ولا تزمت ولا ...زي ما كتير بيتصور

دي حياة عادية جدا

اه عاديه جدا

طبعا انت بتصلي ..طيب مش مطلوب منك غير المعاملة الصادقة والكلمة الطيبة مع كل شخص تقابله

فاكرين قصة التلاته اللى راحو سألوا عن اخلاق النبي فواحد فيهم قال انا اصوم الدهر ولا افطر والتاني قال وانا اقوم الليل ولا انام ..والتالت كان بيتلكك باين قال وانا لا اتزوج النساء

النبي اول ما عرف بكده .. قال دي مش سنتي واللى يعمل كده يبقى خرج عنها

انا بصوم وبفطر واقوم الليل وانام واتزوج النساء

حياة عادية طبيعيه لشخص بيعمل عبادته مش منظره ولا لمجرد انه يقلد حد ..ده عايز يقرب من ربنا

طبعا القصة فيما معناه وكلنا عارفينها

تعالوا بقى ندخل حياة رسول الله

تعالوا نضحك معاه , ونبكي معاه , ونتعلم الجد منه , ونشوف الحب في حياته كان ازاي

موقف مضحك

الموقف ده خلاني ضحكت ضحكت يعني بصوت عالي وقمت من مكاني وانا بضحك

مشهد ضحك خرافي بصراحه ولا السينما

لما كان رسول الله صلى الله عليه وسلم بالطائف قال إنا قافلون غدا( يلا بينا يا رجاله ونرجع بكره) إن شاء الله

فقال ناس من أصحاب رسول الله صلى الله عليه وسلم لا نبرح ( لا يا رسول الله مش هنمشي غير لما نعلم الناس دول الادب ) أو نفتحها

فقال النبي صلى الله عليه وسلم فاغدوا على القتال قال فغدوا فقاتلوهم قتالا شديدا وكثر فيهم الجراحات

فقال رسول الله صلى الله عليه وسلم إنا قافلون غدا ( شكلكم تعبتم يلا بينا يا رجاله ونرجع بكره) إن شاء الله

قال ( الرجاله محطتش منطق ..الناس اتعورت وانجرحت) فسكتوا

فضحك رسول الله صلى الله عليه وسلم

صحيح البخاري - كتاب الادب باب الضحك والتبسم

الابتسامه مش بتفارق وجه النبي

ما رأيت أحدا أكثر تبسما من رسول الله صلى الله عليه وسلم

صححه الالباني - مختصر الشمائل المحمدية

رسول الله يسلم على الاطفال

عن أنس بن مالك أن رسول الله صلى الله عليه وسلم مر على غلمان فسلم عليهم

صحيح مسلم - باب استحسان السلام على الصبيان

ويهرز مع الاطفال

عن أنس بن مالك يقول
كان رسول الله صلى الله عليه وسلم يخالطنا حتى يقول لأخ لي صغير يا أبا عمير ما فعل
النُّغَيْرُ
قال وكيع يعني طيرا كان يلعب به

سنن ابن ماجه

بيشيل العيال الصغيره

عن عائشة أم المؤمنين أنها قالت
أتي رسول الله صلى الله عليه وسلم بصبي فبال على ثوبه فدعا بماء فأتبعه إياه

صحيح البخاري

ما تقومش حد وتقعد مطرحه

عن النبي صلى الله عليه وسلم قال لا يقيمن أحدكم الرجل من مجلسه ثم يجلس فيه

صحيح مسلم - كتاب السلام

خجل النبي

كان رسول الله صلى الله عليه وسلم أشد حياء من العذراء في خدرها وكان إذا كره شيئا عرفناه في وجهه

صحيح مسلم

كان يقعد مع اصحابه يدردشوا ويهزروا

عن سماك بن حرب قال
قلت لجابر بن سمرة أكنت تجالس رسول الله صلى الله عليه وسلم قال نعم كثيرا كان لا يقوم من مصلاه الذي يصلي فيه الصبح حتى تطلع الشمس فإذا طلعت قام وكانوا يتحدثون فيأخذون في أمر الجاهلية فيضحكون ويتبسم صلى الله عليه وسلم

صحيح مسلم

ما بيحبش التشدد

صنع النبي صلى الله عليه وسلم شيئا فرخص فيه فتنزه عنه قوم فبلغ ذلك النبي صلى الله عليه وسلم فخطب فحمد الله ثم قال ما بال أقوام يتنزهون عن الشيء أصنعه فوالله إني لأعلمهم بالله وأشدهم له خشية

صحيح البخاري

بيحترم كل الناس
بحسب امرئ من الشر أن يحقر أخاه المسلم
صحيح مسلم

مش بيحب ابو وشين

عن أبي هريرة أن رسول الله صلى الله عليه وسلم قال إن من شر الناس ذا الوجهين الذي يأتي هؤلاء بوجه وهؤلاء بوجه

صحيح مسلم

مش بيحب يدعي على حد

عن أبي هريرة قال
قيل يا رسول الله ادع على المشركين قال إني لم أبعث لعانا وإنما بعثت رحمة

صحيح مسلم

بيحب تربية البنات

قال رسول الله صلى الله عليه وسلم من عال جاريتين حتى تبلغا جاء يوم القيامة أنا وهو وضم أصابعه

صحيح مسلم

بيساعد زوجته

عن الأسود قال سألت عائشة
ما كان النبي صلى الله عليه وسلم يصنع في بيته قالت كان يكون في مهنة أهله تعني خدمة أهله فإذا حضرت الصلاة خرج إلى الصلاة

صحيح البخاري

بيعزم جيرانه ويدوقهم من اللي طابخينه

عن أبي ذر قال
قال رسول الله صلى الله عليه وسلم يا أبا ذر إذا طبخت مرقة فأكثر ماءها وتعاهد جيرانك

صحيح مسلم

بيهزر مع اصحابه

عن أنس بن مالك : أن النبي صلى الله عليه وسلم قال له : يا ذا الأذنين
قال أبو أسامة : يعني يمازحه

صححه الألباني - مختصر الشمائل

ها يا شباب ويا بنات .. قلتم ايه؟

فيه حاجه صعبة؟

يلا بينا نجعل رسول الله في حياتنا ونكون من احبابه..بأننا نتبع سنته

تعالى في كل موقف في حياتك وافتكر رسول الله كان بيعمل ايه؟

جرب الموضوع ده مع نفسك كده اسبوع .. كل موقف ..كل فعل اسأل نفسك رسول الله كان بيعمل ايه في نفس الموقف ؟ هتلاقي نفسك اتعودت بعد كده

أبتسم في وجه الناس ..حبا في رسول الله

ساعد زوجتك ..حبا في رسول الله

اشترك معنا في حملة ..حبا في رسول الله

اضغط على اللينك وشارك معانا بنحاول نكون اخوان لرسول الله باحياء سنته في حياتنا

http://la3lahakhier-2.blogspot.com/

ودي الحملة على الفيس بوك

http://www.facebook.com/group.php?gid=18625528460

ودي حملة مجداوية ضد افلام العري والشذوذ

http://www.facebook.com/group.php?gid=18413166937

أضغط لتحميل كتاب الرحيق المختوم ..في السيرة النبوية

طلعنا الكراريس وحلينا الواجب

واجب

وفي رواية قديمة كان يقال له : تاج

معلش يا جماعة استحملوني ده رابع مرة يجيلي تاج واهرب منه

بس المرة دي اللي بعتت التاج مصمصمة على اني احل هذا الواجب او التاج

لخبطونا كل شوية يطلعوله اسمه بكرة يسموه جريب فروت ويقولوا عليه بيض

اقدم تاج كان من الاخت العزيزة ال جي

اللي رجعت برضه بعتت تاج تاني

بس لاني مش بحب التاجات زوغت منه

وبعدين جنى الجنتين دان بعتتلي تاج الاحلام

فاكرينة ؟؟

كان وقتها موضه منتشرة في المدونات زي مناطيل الاسترتش

وطبعا زوغت

ولكن الاخت لعلها بخير ألحت وجايه تطاردنى وتقولى فين الواجب

وهى الحقيقة مش ألحت لا دي أصرت

أصرت ..تصر .. إلحاحا

بالمناسبة الجميع مدعو عند لعلها بخير للضرورة وعاجل جدا اضغط على اسمها ده مش لون ده لينك يا فالح

لغاية ما سيد جني بعتلي نفس التاج رغم انه كان مبعوتلى انا وهو من لعلها بخير في بق واحد

فالواحد محتار يجاوب اي تاج فيهم وكلهم من اخوة واخوات لهم معزة مربوطة فوق السطح

قصدي جوه القلب ..ومحبش اكسف حد

وبمناسبة المعزة كنت وانا في رابعة حقوق ماسك كتاب اصول الفقة وقاعد ازاكر فوق السطح تحت طبق الدش

اللي هيضحك هطلعه بره الفصل

وحطيت الكتاب جنبي علشان الديك ابن الرزله واقف قدامي وكاك كاك كاك

عايز يطفح طب يابن الفرخة هو انا حوشتك ..امال انا مطلع لجنابك وما ملكت يمينك من الفراخ اكل ليه؟

ويادوب عيني غفلت عن الكتاب ثانية ..بصيت لقيته معزاية راحت متناولة كتاب اصول الفقة من جنبي وهتجري بيه

أوبا ..كده بقى الجنونه طلعت يا ولاد ال .. وشديت الكتاب من بوزها وكنت متغاظ اوي ..يعني حبكت مالقتيش غير كتاب اصول الفقة ..طب قوليلى وانا اجيبلك القانون الدستوري مالهوش لازمه

واكلت حته من اخر صفحة الفهرس ولسه اثار العدوان المعزواي على الكتاب موجودة لغاية دلوقتي

المهم

خلونا مع التاج الاخير

اللي بقى اسمه ايه ياولاد دلوقتى ؟ الواجب

صح يا عسقول

اضربوه بالنار ده لسه صاحي

الواجب

اخر مرة حليت فيها واجب كنت في تانية ثانوي

وكان واجب الجغرافيا كنت اروح اصحح كشكول الواجب ألاقي المدرسة تستغرب

واكتشفت اني الوحيد اللى كان بيحل الواجب في المدرسة من بعد ما أتلغت اعمال السنة ..فرحت موفر باقي الكشكول وقعدت اشخبط فيه شوية خواطر على شوية نثر على قصة على مسرحية

اولا : أذكر اسم من طلب منك حل هذا الواجب

محدش يفكرني انها اختي لعلها بخير وأكد عليه سيد جني علشان لما بفتكرهم اسناني بتخبط في بعضها وبتبقى عايزه تقطع اي حد

ثانيا : أذكر القوانين المتعلقة بهذا الواجب

مخنوق يا جماعة مخنوق حد يرد بدالي

اه هو اللى بعمله دلوقتي هو قانون الواجب ..ارتحت ولا نقول كمان

ثالثا : تحدث عن ستة أسرار قد لا يكتشفها من يقابلك للمرة الأولى

سته مرة واحده ده كده بقى الواحد يعوز يشمر ..ويستربع كده زي ما كنا زمان في ابتدائي نقعد نذاكر على الطبلية

كانوا يقعدونا زمان نذاكر على الطبلية ويقولولنا عايزينكم تاكلوا الكتب اكل

مش عرف كانوا فاكرين اننا معزه ولا ايه

معلش دايما كده الفلاحين كاسقينا ..بس بينجحوا وبيجيبوا مجاميع ..مش زي الساحرة الشريرة

احم احم

الصفة الاولى

اجتماعي ..يعني انسان بقابله لاول مره زي انسان بعرفه من زمان ..مفيش فرق

مرة قعد جنبي واحد معرفوش فبقوله ايه يا عم فينك مش باين

قلى : معلش كنت بستحمه

وقعدنا نرغي شوية وبعدين راح مشي

بصيت بعد شوية ولقيته رجع وبيقولي لو سمحت انا اسف جدا بس مش قادر افتكرك

قلت له : انا اول مره اصلا اشوفك دلوقتي بس انا باخد على الناس بسرعة

افتكرته هينبسط ..لكن بصراحة النظرة مكنتش نظرة انبساط ابدا ..كانت نظرة صدمة مشوبة بالاستغراب باستفهام عن كنه الشخص الغريب ده اللى هو انا

الصفة التانية

عفوي وتلقائي.. واللى بيطلع في دماغي اقوله والى ييجى على بالي اعمله

الصفة الثالته

عصبي جدا .. وده عيب خطير اوي والخطورة فيه على رأي ابن حجر اللى بيستغرب جدا من المسألة دى كان بيقولي الغريب انك لما بتتعصب جدا مش بتحاول تهدي نفسك وبتتخذ قرارات وانت في حالة العصبية دي

ودى حقيقة فعلا لما بكون عصبي بكون زي الاعصار المدمر وصعب الارضاء جدا ..وبامانة محاولة استرضائي بتكون مرحلة خطيرة لانها احيانا بتقلب لنتيجة عكسيه

انما الغريب اني لما بهدا لوحدي ولو بعد حين ..برجع اقيم كل الجسور التي تكسرت وبتعامل بشكل طبيعي حتى لو مكنتش نسيت ..لكن ده مش يخلينى اغير معاملتي طالما قبلت اني اتعامل مع نفس الشخص مرة اخرى

وده شئ مش سهل علشان كده بحاول اقلل من اثار عصبيتي بأني لما اتعصب.. ابتعد لغاية ما اهدا

الصفة الرابعة

أبوي ..أبوووييييي

انا عارف جديدة عليكم دي

قول ورايا ..أبويييي

يعني بتصرف بأبويه في المحيط اللى حواليا وببقى عامل زي كبار السن والعواجيز في تعاملهم مع الناس اللي من سنهم او اصغر منهم

وبيبقى طريقة كلامي نفسها احيانا تفطس من الضحك

خاصة لما يكون واحد لابس بدلة او قميص وبنطلون وبيتكلم زي الفلاحين الاميين بكل تلقائية ومحبه وتواضع مع الاخرين

فتلاقيني مثلا استخدم جملة : ايوه يا بابا ..او ايوه يا بويا لما حد صغير يندهلي

عندنا في الصعيد كده او المجتمعات الريفية او المدن البسيطة

حتى اختى المتجوزة اصغر مني لما تندهلي اقولها : ايوه يا بويا ..ايوه يا بوي ..ايوه يا بابا

وطبعا هي بتتغاظ اوي ..لانها بتحس اني بعاملها زي عيلة صغيرة

دايما بحب اكون محتضن للي قدامي ..بس جايز الصفة دى مبتظهرش كتير لان محدش هيفهمها صح

خاصة لما بكون في القاهرة

انما بستخدمها وبحسها كتير يعني

الصفة الخامسة

محبش اطلب حاجه من حد.. او أحس اني بلقح جتتي على حد

لما بحس اني غير مرغوب في وجودي بخلع على طول واحيانا من سكات وفي ثواني اكون اختفيت واحيانا بفجاجه بس في صورة دعابة

الصفة السادسه

صريح..يعني مرة واحد زميلى بيسأل واحد زميلنا برضه كنا طلبه وساكنين سوا

بيقوله ايه رأيك في صراحة أحمد ؟

جاوب بغيظ : ده صريح لدرجه يستحق عليها الضرب

وفعلا قللت موضوع اني اكون مباشر وفج في صراحتى ..وحاولت ازوق الصراحة شوية علشان ما تألمش حد

خلصوا كده ..اخيرا

يا ساتر

بس على فكرة معظمهم بيتم اكتشافهم في اول مره ..والله اعلم

بس يعني كنت هجيبلكم منين صفات ..وكل البقالات قافله دلوقت

رابعا : حول هذا الواجب إلى ستة مدونين وأذكر أسماءهم وروابط مدوناتهم

ماشي يا سيدي..عد ورايا

مجداوية , عاشقة الفردوس , نيجرو , مع إصراري , الساحرة , بت خيخة واي كلام

على فكرة كتبت ناس تانية كتير بس لقيت نفسي هنسى ناس فقلت كفاية سته قال يعني غصب عني الواجب قال سته وانا مقدرش اكمل اكتر من كده

ملحوظة : اوعى حد يفتح اللينكات ويلاقيهم كاتبين مواضيع حلوه كالعاده فيروح عندهم وينسانا

تعلق الاول يا جميل قبل ما تخلع

على فكرة هتلاقي عند مجداوية موضوع جديد وبنتها نسمة نجحت في الاعدادية , وعاشقة هتلاقوا موضوع احساس لسه طازه شوفته وانا بجيب اللينك , ونيجرو كاتب شوية رباعيات مستوى عالي جدا والله , مع اصراري عامل مدونتين حلوين ابقى تابعوهم , والساحرة منزلة بوست جديد فيه صورتها وهي صغيرة , بت خيخة بقى اللى هيروح هناك دلوقتي يحاول ياخد باله من بوز التربيزه

خامسا : اترك تعليقا في مدونة من حولت الواجب عليهم، ليعلموا عن هذا الواجب

وانت مالك يا غلس وانتى يا غلسة ..هم هييجيوا وكل واحد له تاج هياخده كده زي التلميذ الشاطر ما يجاوب الامتحان

..............................

خلصنا من الواجب

فضفضاية صغيرة

على طول الحياة نقابل مدونين ونعرف مدونين ونرتاح ويا مدونين عن مدونين

وهي دي الحياة وهو ده التدوين

التدوين زي الحياة ..لانه صوره من صور الحياة

فيها الناس الحلوه , وفيها الناس اللي مش حلوه

وفيها ناس بأقنعة , وناس من غير أقنعة

فيها الملايكة , وفيها الشياطين

وفيه مدونات بكرهها بس من قبل التدوين ..وفيه مدونات كرهتها بعد التدوين وانا قلبي بياكلني عليهم بس اعمل ايه لازم اكون قاسي زي قسوتهم

وفيه ناس حبيناهم ..وناس حبونا ولا احنا شفناهم ولا هم شافونا

وناس بنحبهم من بعيد ومجاتش الفرصة المناسبة علشان نعبر لهم عن حبنا او هم يعبروا عن حبهم لنا

وفيه مدونات بنحبها وبنسعد بزيارتها كأن سيادة وزير المدونات هو اللي زارنا ..وللاسف مش بيكونوا حاسين بسعادتنا دي وإلا ماكنوش يغيبوا علينا

بس اكيد غصب عنهم ..زي ماهو غصب عننا

والتدوين ده عالم ..اجمل ما فيه القلوب الصادقة كتير

تحياتي

الزوج المصري ابو عين فارغة

الصورة من مدونة خيخة واي كلام

فاكرين الاعلان بتاع

طلب رز ..عملت له رز

طلب مكرونه ..برضه عملت له مكرونة

وبصلي من فوق لتحت ..وسابلي البيت

مع انها كانت حلوة ..وكانت لابسه احمر

ولا يكونش هو زملكاوي

سوري يابن حجر معلش بنسى انك زملكاوي

كنت مره قاعد بندرش انا وخالي اللي عاش فترة بالكويت وشاف جنسيات كتير

بيقول ان افضل زوجة عربية هي الزوجة السورية

تدخل البيت تحس ان انت قاعد مع راجل وتلاقيها هي اللى بتقوم بواجب الضيافه وتعزم عليك ومثقفه جدا ومدبرة واقتصادية ومحافظة على قوامها ورشاقتها

وقعد يوصف كتير وانا جاء في ذهني مسلسل يوميات هناء وجميل وبقيت عايز اقوله وكمان دمهم خفيف

واتضح ان الست المصرية دي ولا تساوي حاجه ..وانها عالة على زوجها وكتر خيرنا اننا متحملينها

وانها فعلا لا تستحق غير اننا نبصلها من فوق لتحت ونقولها هي اللى تسيب البيت وتمشي

نيهاهاهاها (ضحكة عسقلانية) هاها

وآن الاوان كي يظهر الحق

الزوجة المصرية مظلومه معانا جدا جدا وهقولكم ليه

الزوجة المصرية ام لخمسة او سبعة اطفال

الزوجة المصرية بتشتغل علشان تساعد زوجها في مصروف البيت

الزوجة المصرية هي اللى بتقدر تخلى مرتب جوزها على مرتبها يقضيهم طول الشهر

الزوجة المصرية بتقف في طابور العيش وما ادراك ما طابور العيش

الزوجة المصرية هي المسئولة بمفردها عن مرحلة تجهيز الطعام ووضعة على السفرة ومرحلة ما بعد الطعام

لان الزوج الصبح فطر وعايز يلحق شغله وهي مش مهم تتأخر ..وبعد الغداء عايز يستريح من تعب الشغل ولو سمع صوت عيل من عيال الجيران يزعق عليها وهي في المطبخ

هو: سكتى عيالك مش عارف انام

هي : ده مش عندنا ياهبل (بس اهبل دي غالبا في سرها ) ده عند الجيران

برضه هو تلاقيه مصمم ويقولها طيب سكتي العيال مش عايز دوشة

وتبقى واقفه في المطبخ وبتربي العيال بصوتها في الصالة

وبعدين تقعد تذاكرلهم علشان توفر تمن الدروس الخصوصية اللى حضرته بيطفح بيها سجاير

وبعد العشاء ياما هيتعشى ويخرج يأما جاي من بره عايز يتعشى ويتخمد

وهي تنيم العيال اللى عندهم مدرسة الصبح واللى معندوش مدرسة يقعد طول الليل لاهو نايم ولاهو صاحي علشان يفضل مطير النوم من

عين اللى جابوها

وبعد ده كله تلاقي ان

الزوجه المصرية هي اكثر الزوجات العربيات تعرضا للضرب من ازواجهم

خالي اللى قاعد يمدح في الزوجة السورية مخلف سبعة عيال ومراته طول اليوم زي النحلة في البيت ورغم انها مش بتشتغل لكن برضه مش بتلاقي وقت علشان تعمل اي حاجه في اي حاجه

ولانه محامي برضه فتلاقيها لازم تكون حافظة جميع العملاء وقضاياهم علشان تعرف مين لما يتصل بيه تقولهم مش موجود ومين ترد عليهم وتقولهم موجود

واغلب الزوجات المصريات يعملن ويكافحن في صمت رغم حتى عدم سماعهم لكلمة حلوة لكنها بتضحي دايما علشان خاطر ابنائها

متهيألى عمرنا ما شوفنا واحده تطلب الخلع من زوجها بعد ستة وعشرين سنة زواج لانها مش مرتاحة مع زوجها

ولما نسألها ليه فضلتي ساكته العمر ده كله تقول علشان خاطر اولادي وهم خلاص كبروا واتجوزوا

النموذج ده لا يوجد غير في مصر تقريبا ..وفيه اللى بتفضل مستحمله ومش بتطلب خلع ولا طلاق

يعنى الزوجة المصرية بتقيد لزوجها صوابعها العشرة شمع وبرضه مش بيعجب حضرتنا

طبعا البنات هيفرحوا اوي بالبوست ده

بس استنوا ما تفرحوش اوي

يا شباب اعزيكم في وفاة الزوجة المصرية اللى هي النموذج اللى كنت بتكلم عليه

ومن هنا ورايح هيطلع عين اهلك وانت اللى هتقوم بشغل البيت وتذاكر للعيال والمدام هتلاقيها بتحشش ولا بتشرب شيشه في قهوة زبيدة وتضطر تبطل سجاير علشان حضرتها تشرب ببسي دايت ..زي واحد صاحبنا

هابي بيرث داي تمنياوي طه

تمنياوي ده واحد صاحبنا عيد ميلاده كان امبارح

بس ما تقلقوش ..افسحوا الطريق الزوجة المغربية قادمة وبقوة وهتقعد بنات مصر في البيوت

واحد صاحبي دكتور اتجوز مغربية اتعرف عليها من النت شهر وكانوا متجوزين

من ساعتها وهو ماشي في الشارع شايل قفص عصافير

نيهاها ها (قلنا دي ضحكة عسقلانية ) هاهاها

بنت مزه ..ولد كول.. للكبار فقط

تحذير : هذا الموضوع ممنوع لاقل من 9 سنوات

لان من بعد تسع سنين كله بيفكر في الموضوع ده

احم احم

هل الجنس هو ما يشغل تفكيرنا في مصر والعالم العربي ؟

سؤال قد يراه البعض جريئا ..وذلك لاني قررت اليوم أن اتحدث في الموضوع الغائب الحاضر

الغائب عن أقلامنا الحاضر في افكارنا

وأعلم مسبقا ان هذا الموضوع قد لا يجد ما تعودناه من عدد التعليقات ..لكن لا بأس

سأقبل بذلك في مقابل ..كشف الحقائق النفسية الكامنة في تفكيرنا واخلاقياتنا المزدوجة

لان هذا الموضوع اصبح شئ ملفت ومقزز ويحتاج الى وقفة

سأطرح عليكم الان اسئلة واريد ان تشعروا انتم بحقيقة اجابتها

كم مرة في اليوم يفكر الشاب او الفتاة في الجنس؟

شاب ينظر الى فتاة - فتاة تنظر الى شاب - ترى كم نسبة الفكرة الجنسية في هذه النظرة؟

حين تقترب من بائع الصحف والمجلات - هل تلاحظ الى اي نوع من الصحف والمجلات ينظر الواقفون؟

حين يسير الشاب في الشارع أليس شئ يبعث على سعادته ان يرى فتاة جميلة القوام؟

ويتأملها في حسرة قائلا : يابخته اللى راح يتجوزها

فيرد عليه صاحبه (واحد كده زي التمنياوي طه) بحسرة اكبر : اكيد واحد ابن محظوظه

مره واحد صاحبي قالى : انه لما ييجي يركب ميكروباص لو مالقيش فيه بنت مش بيركب

مش مهم تكون قاعده جنبه المهم الميكروباص يكون فيه بنت على الاقل وخلاص

طبعا مش كل الشباب او البنات كده

لكن ومن غير ما اعمل بحث في جوجل عن ارقام الاحصائيات اكيد كلنا سمعنا الاحصائية اللى بتقول ان الشعوب العربية هي اكثر الشعوب دخولا على المواقع الاباحية ..وخاصة في مصر

حتى الافلام السينمائية ..بعد ان كانت الموضة هي الافلام الكوميدية ..اصبحت الموضه هي الافلام الساخنة

بنات وموتسيكلات , الريس عمر حرب , كبارية , حين ميسرة

وبمناسبة الموضه

كنت واقف انا وواحد صاحبي بنتكلم في الشارع وعدتت جنبنا واحده قصيرة ولابسه من غير اكتاف

فبيقولى ايه ده ؟

فرحت شايطها برجلي (طبعا ما لمستهاش) وقلت : انا عارف .البنت زمان كانت لما تحب تخرج بتلبس ..دلوقتى لما تحب تخرج بتقلع

السؤال بقى : ليييييييه؟

علشان تعجب

س: يعني نازلة علشان تقول للناس انا جسمي حلو ..ولا غايرة تقضي مشوارها وترجع؟؟

زمان برضه كنت تبص للبنت تلاقيها بتتكسف وتودي وشها بعيد

دلوقتي تبص للبنت تلاقيها انها هي اللى كانت بتبوصلك الاول وياريت بتنزل عنيها لما تشوفك انك شوفتها

ايه البجاحة دي!!!!؟

نيجي بقى للازدواجية الاخلاقية

اخوكم مشرف في منتدى ..ومعنا عضو بالمنتدى ملحد

وطبعا بيكتب موضوعات جريئة

فتلاقي الشباب والبنات داخلين يدافعوا عن الاسلام ويلعنوا سلسفين اللى جابوه

وابص في توقيعاتهم ألاقي صور لتامر حسني وأليسا وما ادراك ما أليسا والكينج شاروخان

وطبعا محدش يقولى مين شاروخان ده ..لاني اكتشفت انه معبود الجماهير في الخليج

للجاهل اللى زي حالاتي ومايعرفش مين شاروخان ده ..اتاريه ياخويا ممثل هندي

يعني احنا بنعيش حياة مزدوجه في رأيي

نبقى معلقين صور أليسا على الحيطان او عاملينها خلفية على الجهاز وييجي وقت الصلاة نقوم نصلي

كنت مره ماشي مع زميل لي بالقاهرة ..وانا صعيدي بقى وقاعد اتفرج وابحلق

هي الناس دي ابهاتها فين؟

جاوبني وقال : محدش فاضي علشان يربي

وبعدين الاب هيعمل ايه ..هيلاقيها من الدش ولا النت ولا السينما ولا الكورنيش ولا هييجي يمشى مع ابنه او بنته وهم ماشيين مع اصحابهم

ماهو يا يربي..ياما يموت من الجوع

وتلاقي البنت محجبة ولابسه الجينز الضيق طبعا وماشيه مع شاب في الشارع او واقفين على الكورنيش وهو حاطط ايده على كتفها وحوالين رقبتها ومميل راسه بيعملوا ايه او بيقولوا ايه ..ما علينا مش مهم

نفسي بس اعرف متحجبة ليه؟

انا بس عايز الزميل ياخد راحته يعني احنا رجالة زي بعض ولازمن نفكر في بعض

فيه ملحوظة كمان

زمان كان التعبير عن البنت الجميلة تعبير جمالي راقي شويه

يعني مثلا حلوه , جميلة , اموره

دلوقتي التعبير عن الفتاة الجميلة بقى بألفاظ تحمل معاني جسدية

البنت دي مزه

الشاب ده كوول روش طحن

ولما تدور عن المعنى الاجمالى لمصطلحات كول روش طحن هتلاقيها ذات دلالات جسدية في الغالب اضافة الى فساد اخلاقي بمعني انه مقطع السمكة وديلها

وطبعا حاجات كتيره في حياتنا تحس ان تفكيرنا الحقيقي تفكير جنسي

يعنى مثلا عمرك ما تلاقي اعلان : مطلوب سكرتيرة حسنة الثقافة

اصحاب المحلات بيفضلوا غالبا يشغلوا بنات

تدخل الموظفة على المدير تقوله بعد اذنك انا هروح بدري ساعة او ساعتين النهاردة يقولها ماشي وما يتكلمش

انما يقدر موظف يروح بدري نص ساعة

!!!

لا و الغريب تلاقيهم بياخدوا علاوات اكتر من الموظفين

الكلام ده على لسان موظف متغاظ اوي في شركة بترول

فيه تعليق من المفقوعة مرارتها فكرني بالجامعات

اه ده تحديث للتدوينة

طبعا كلنا عارفين ان فيه شباب وبنات بيروحوا الجامعة مش علشان يتعلموا

خاصة بتوع الاداب والتجارة والحقوق

تروح كلية الاداب تلاقي طلبة من تجارة

تروح كلية التجارة تلاقي طلبة من حقوق

تروح كلية الحقوق تلاقي طلبة من دبلوم زراعة دخلوا الكلية والمدرجات ازاي الله اعلم

للاسف فيه نسبة من الشباب ملحوظة (لان مبقاش فيه حياء خالص) فاكرين ان الجامعة دي يعنى انطلاق لرغباتهم الجنسية المكبوته

وكله يتجه بحثا عن اقامة العلاقات تحت شعار ادينا بنتسلى

وتشجيعا من الدولة لهذه العلاقات وعلشان الشاب مش يروح الجامعة يفرغ طاقته المكبوته

عملوا حفلات تخرج لطلبة الثانوي وجابوا فيها دينا الرقاصة

اسكتوا لقيت صورة من الحفلة على النت..بس لا ياعم انا اتكسف احطها في المدونة

انا هتفرج عليها لوحدىىىىىىى

وكفاية عليكم كده النهارده