بنت شمعتها قايده

هي ..فتاه في العشرين من العمر جميلة وجذابه وكما تصفها والدتها ( أنا ماما بتقولي إن شمعتي قايدة ) يعني كل يومين تحكيلي ان عريس متقدملها معرفش بتشتغلني البنت دي ولا ايه حكم انا من زماااان كنت اتعرفت على بنت ولما حست اني معجب بيها حبت تستفزني او ...الله اعلم بحركات البنات كانت كل يوم تقولي

هي : انا فيه تلاته اتقدمولي

انا : يا سلااااااام تلاته مره واحده

هي : أه ..لعلمك انا مفيش مره اخرج فيها من البيت غير لما اتنين او تلاته يمشوا ورايا ويجوا يتقدمولي في نفس اليوم

!!!!!!!!!!!!

............

نرجع لموضوعنا

سألتني انا عايزه اخد رأيك يا استاذ أحمد

اتفضلي

فيه واحد عايز يتقدملي هو اكبر مني بسبعتاشر سنه وشكله وحش

- طيب وانتى موافقة وهتتجوزيه ؟

- أيوه

- ليه؟

- علشان هو هيكتبلي بيت تلات ادوار في اكتوبر وكمان عنده عربيه حلوه اوي

- وهو بيحبك ؟

- ده بيموت فيه

شوية موبايلها رن

- ييييييييه ..كنا لسه في سيرته

- طيب اسيبك تردي عليه

- لا مش هرد عليه

- اشمعنى ؟

- اصل صوته وحش مش بحب صوته ولا كلامه

!!!!!!!!!!!!!!

فأبتسمت ابتسامه خفيفة وقولت

- مش ملاحظة حاجه ؟

- فرفعت إحدى حاجبيها وقالت - ايه هي ؟

- ان هو بيضحي بممتلكاته علشان سعادته وانتى بتضحي بسعادتك علشان ممتلكاته

وهو ده السؤال اللى لازم تجاوبي عليه الواحد يضحي بإيه علشان إيه؟ وعن اذنك انا عندى جلسة

فنظرت لي تلك النظرة التي تدل على ذكاء خبيث وهى نظرة اعتادت عليها كلما فكرت في مراجعة حساباتها

بس اطمنوا هتكمل للاخر

..........

طبعا دي مش قاعده ان بس حبيت احكيلكم قصة من الواقع

ملحوظة : كنت بتوقع ان اللي متجوزه واحد مرتاح اوي ماديا انها هتكون سعيده إلى أن وجدت ان معظم اسباب الطلاق في هذه الحالات يرجع الى عنف الزوج وقيامه بضرب زوجته بشكل هيستيري

وينتهي الزواج بانها مستعدة تتنازل عن كل شئ علشان ..سعادتها

طب ما كان من الاول

الرجال لا يتزوجون الجميلات

قال : عارف يابو حميد أوعى تتجوز واحده حلوة

أبو حميد : ( مازحا ) يعني قصدك اتفرج عليهم من بعيد ولا ايه؟

قال : انا مثلا اتجوزت ست مرات ..كنت كل ما أشوف واحده حلوه اتجوزها بس حصل ايه بعد كده

واحده ما بتعرفش تطبخ ..طلقتها

التانية طول اليوم مهتمه بس باللبس والمكياج وعايزه فسح على طول ومكنتش بتصحيني الصبح طبعا علشان طول الليل عايزه تسهر فكانت بتضرني في شغلي ..فطلقتها

وواحده كنت اديها تلاتين جنية تنزل علشان تشتري اكل وما تعرفش وتبوظ الاكل كمان

انما مثلا عندك مراتي الاخيرة دي أهي وحشه مثلا ومش حلوه ولا حاجه بس تفتح التلاجه تلاقي فيها كل حاجه

اديها عشرة جنية تنزل السوق تشتري كل اللي البيت محتاجه

اقولها عايز اصحى الصبح تصحيني رغم انها بتنزل شغلها متأخر بعد ما انا بنزل

وفي المكتب مظبطه المكتب عارفه شغلي وعارفه بتعامل مع مين وعارفه اخر الشهر عليا ألتزامات ايه ودفعت لمين ومين لسه ما دفعتلوش

يعني مرياحني وظابطه شغلي

علشان كده استمرت معايا خمس سنين ولسه

..............

الكلام ده فكرني بصديقي الانتيم المشمهندس صالح

قولتله : ايه رأيك في فلانة؟

قلي : يا عم انت عايزني اتجوز واحدة طول ماهي ماشية في الشارع حد يعاكسها لا يا عم انا هتجوز واحدة وحشه

يعني م الاخر جواز عتريس من فؤادة باطل

أحمر شفايف .. عيش وسيبني أعيش

قال : فاكر في فيلم الباشا تلميذ لما كريم ظبط البنت اللي بتسرق فهي كمان بينت له انها عارفه حقيقته ايه وقالتله عيش يا باشا وسيبني أعيش

سيبني اسرق واقلب مصلحتي علشان اسيبك تقلب مصلحتك

اهو ده حال البلد

اللي عايز يعيش فيها لازم يفهمها ويتعامل معاها زي ما هي كده علشان لو حاولت تعدلها راحت تنصدم معها ومش هتعرف تعيش

انا مثلا اتجوزت خمس مرات قبل كده كنت كل سنة اتجوز واحده ما عدا الاخيرة دي رغم انها مش حلوة وقصيرة بس قاعدة معايا بقالها خمس سنين ليه؟ علشان عارفه اني بخونها واني بعرف ستات ..خلاص هي اتعودت على كده اخر ما هتعمله زي ما شفت امبارح لما لقت احمر الشفايف في الحمام كلمتين وخلاص كبرت دماغها

هي البلد دي كده تفهما صح , تكبر دماغك صح , هتعرف تعيش فيها

شوف مثلا احمد عز علشان بينفع وبيستنفع وبياكل وبيأكل غيره عارف يعيش

شوف هم خطين حمر في البلد دي يابو حميد اوعى تعديهم

الاول انك تهاجم سياسة البلد او تحاول تنازعهم فيها وإلا هتترمي رمية ايمن نور اللي هو ياما هنا ياما هناك ورغم علاقاته بامريكا

وبحاجه هايفه قال ايه تزوير توكيلات تأسيس الحزب ..طب واي حزب في مصر توكيلاته مفيهاش تزوير؟؟

كلها تلاكيك ..ليه ؟ علشان حب يعدي الخط الاحمر في السياسة

الخط التاني يابو حميد ..الظهور والشهرة

يعني ايه؟ يعني اشتغل براحتك واكسب كتير مش مهم بس اوعى تعديني وتبقى اكبر مني في السوق من غير ما تكسبني معاك او تكون اكتر شهرة مني في المجتمع خليك كده اكسب مليارات بس من تحت لتحت يوم ما تفكر تظهر هنوقعك

يعني مثلا واحد غرق عبارة وموت اكتر من ألف نفس ..فين؟؟

من قبل المحاكمة وهو بره ..وكمان خد براءة

انما واحد زي هشام طلعت مصطفى لان نجمه طالع وفي ظهور وبدأ يعلى جابوه

تفتكر يعني هشام طلعت ده مكنش يقدر يخلع بره مصر

ده لو عايز يقتل سوزان تميم كان يقدر يقتلها في مصر وبكل سهوله

انما هم حبوا يوقعوه علشان مش عايزينه يظهر ويشتهر

لا انت كفاية عليك كده

وعندك مرتضى منصور اللي هو اشهر محامي في مصر ..مرتضى نفسه اتحبس

مش لشئ غير ان نجمه كان ظاهر وبياخد شهرة اكتر وإلا مرتضى كان يقدر يظبط نفسه وياخد البراءة زي ماهو عايز

شوف يابو حميد هو المبدأ كده عيش وسيبني اعيش

عندك المحكمة الرشوه في كل مكان علشان تعرف معلومة او تاخد شهادة او صورة حكم لازم تدفع والقضاة عارفين كده كويس ..وهنروح بعيد ليه هو مش فيه قضاة محبوسين في جرائم رشوة؟

شوف مثلا دلوقتي جريمة قتل نادين وهبه بنت ليلى غفران ..خلاص القصة بقت مكشوفه وكل مصر عارفه مين هو القاتل وفي الاخر رجال المباحث يجيبولنا عامل غلبان علشان يهدوا الرأي العام وبعد سنه ولا اتنين محاكمة يطلع براءة بس تكون الحكاية اتنست زي حادثة المنيا لما القاتل طلع مختل عقليا

كله بيضحك على كله

شوف يابو حميد دايما في حياتك كده وتعملاتك مع الناس

افهم الناس وعاملهم زي ماهم عايزين

علشان ترتاح وتكسبهم

وإلا مش هتعرف تشتغل ومش هتعرف تعيش وخلي بالك مش مهنتنا بس اللي كده

كل الناس

فهمتني يابو حميد؟؟؟؟؟؟؟

....................................................

دي كانت وجهة نظر احد الزملاء المحامين اللي كان بيشرحلي ازاي اعيش في مصر من غير ما اتصادم مع الاخرين

وفق مبدأ عيش وسيبني أعيش

والمثال: احمر شفايف

إيه رأيكم في الكلام ده؟؟؟

يا بنات الحور ..سيّبوا القمر

حين ارمي بصري بعيدا في اطراف ذاكرتي الاولى , اتذكر تلك الساحة الممتدة من مسجد الشيخ نجيب البحري الذي هو موطني الروحي الى طلمبة الماء حيث تبتدي الجهة التي كنا نسميها " شرق" كانت هذه المساحة الكبيرة ماتين متر هي ملعبنا الكبير التي احتوت عظام طفولتنا حتى قويت فيها

كنا نلعب لعبة اسمها النكيسه حيث ننقسم الى فريقين الفريق الاول ينطلق حرا يفر من افراد الفريق الاخر الذي يتخذ من حائط موطن نسميه " الميس" وحسبما يقضي الاتفاق قد يكون على الميس حارسان من افراد الفريق الثاني او اكثر واحيانا يكون الميس طليقا بلا حراسه فاذا نجح افراد الفريق الاول في احتلال الميس قبل ان يمسك بهم احد فانهم يعاودون الانطلاق مرة اخرى وافراد الفريق الثاني يلاحقونهم

تشبهها لعبة اخرى نسميها ثابت واحد واربعين حيث يتم إلقاء القبض على افراد الفريق الحر بمجرد القول ثابت واحد واربعين فلان وينطق اسم من اكتشفه

لعبة اشبه بالعسكر والحرامية .. واتذكر يحي الذي كان يتخفى في ثياب امه لينجح في " التحليل" كان الفائز ما ان يلامس الميس حتى يصيح " حلّلت" وكان اخيه يلف المنطقة ويقفذ من نافذه صغيرة بكنيسة الملاك ليأتي من الجانب الاخر دون ان يلاحظه احد فكنا نطارده من نافذة باب الكنيسة الحديدية حيث يرانا قسيس ملوحا لنا : إلعبوا بعيد

ولعبة اخرى تدعى خارطة الجبنة القديمة وكانت من الالعاب المؤلمة حيث نقف في مربع في كل جهة يقف واحد والخامس يقف في المنتصف ينادي خارطة الجبنة القديمة فمن يفشل في الفوز باحد الاركان الاربعة يتلقى شلوطا على مؤخرته من الاربعة الباقين

ألعاب كثيرة ومنها مثلا الحنجيلة والسبيعة والسقوفة والطرة والوزير

وكان لي عظيم الفخر اني كنت عضو في اخر اجيال العصابات في المنطقة حيث كانت هناك عصابتان من الصبيه عصابة الشيخ نجيب البحري وعصابة الشيخ نجيب القبلي وكانت بيننا الصولات والجولات

ولازلت اذكر يوم الصلح الذي خدعونا فيه عصابة الشيخ نجيب القبلي فما ان حضرنا الى " كامب " المفاوضات حتى انهالت علينا قذائف الاحجار وقنابل التراب المسيلة للدموع والعمى الوقتي

كل هذا لم يكن عمري تجاوز الثامنة او التاسعة حتى ضاعت العصابتان التاريخيتان في مهب ريح الزمان

كان اليوم الذي اقدمت فيه الوحدة المحلية على رصف هذه المنطقة بالأسفلت هو اليوم الذي قضى على ابداعاتنا الطينية حيث كنا ننحت العرائس والتماثيل من الطين والطاحونة

وعلى ذكر الالعاب التي كنا نصنعها بأنفسنا كنا ايضا نصنع السيارات من البوص "اعواد الذرة الرفيعة " والالعاب الورقية

ان جيلي يتفوق على جيل البلاي استيشن بقدرته على الابداع والتخيل وانه كان يصنع ألعابه بيديه ولا يشتريها له احد

ومع ذلك لم يسلم الاسلفت من ابداعات عقولنا الصغيرة فكنا نمزقه الى قطع صغيرة ونحشو بها غطاء زجاجات المياة الغازية ونلعب لعبة المثلث التي يلعبها الاطفال اليوم بالبلي ..وكنا قديما قبل الاسفلت ان نحفر حفرة صغيرة في الارض ونلعب لعبة النواة مستخدمين نوى البلح

لم يمنعنا الاسلفت من الانطلاق ولم يمنعنا من الابتكار ولم يحجب عنا ابو رجل مسلوخة

حيث كنا نجتمع للاغارة ليلا على احد الشوارع وفي مكان ضيق بين منزلين يرمى الناس فيه قمامتهم ويحرقونها فيه كنا نظن ان ابو رجل مسلوخة وكنا نسميه ابو رجل محروقة انه يقطن في هذا المكان الضيق فنرمي بالحجارة وقذائف التراب رمية رجل واحد ونفر صائحين: اجري ياد قبل ما يطلع بوععععع بوععععع اجري اجري

ولم يكن ينتهي العام قبل ان يأتينا في اول كل سبتمر مولد الشيخ نجيب حيث تنتشر الالعاب ويأتي الغجر وبتوع المراجيح وحلقات الذكر..كنت اجلس الى حلقات الذكر بعيدا عن الزحام كي استمع ماذا يقول المداح؟

وكنا نندس وقت توزيع القرفة بين الصفوف لننال كوب القرفة

وينتهي المولد بليلة تسمى "الشيبيتي " حيث يأتي الزوار من كل القرى المجاورة لزيارة قبر الشيخ نجيب

ومن الاساطير التي قيلت في حق الشيخ نجيب انه ظل يحارب اعداءه اربعين يوما بدون رأس

وهي خرافات كانت تتناقلها ألسنة العجائز والمسنين ولكن لم يكن يعنينا صدق هذا من عدمه بقدر ما يعنينا البريزة اللي هنركب بيها المراجيح

وما زال الشاطئ يمتلئ بكثير من الذكريات منها هذه الانشودة حين كنا نلمح في وجه القمر حمرة فنظنه مخنوقا فكنا نجتمع وكل منا يحمل علبة فارغة او صفيحة كبيرة او يصفق على يديه بكل قوة وننشد

يا بنات الحور.. سيّبوا القمر

ده القمر مخنوق ..ومعندناش خبر

ملحوظة : الفقرة دي اتصورت لو تحبوا نذيع قولوا نذيع

:)

يلا اشرب يا منيل ..هتحس انك عيل

يوجد تحديث فى نهاية البوست
--------
دماغي هتنفجر

بجد

بقى هي دي مصر يا عبله

عبلة اللي هي مديحة كامل في فيلم السقوط في الهاوية

هي دي مصر يا باحث

امبارح ..قابلت شاب اسمه محمد واد زي الفل ودمه خفيف

مشيت معاه اتعرفنا وقعدنا نرغي

واعترفلي انه لسه محشش من شوية ولولا كده كان زمانه اتخانق كالعاده مع بتوع الميني باصات اللي بيحشروها بالناس في الطرقة

السؤال : ومحشش ليه يا محمد بيه؟

اجاب : علشان اقدر اعيش ..انا لو محششتش هنتحر وكل الناس اللي بتحشش بتحشش علشان تقدر تعيش ومش تخرج عن اعصابها

وبعدين يا عم الحشيش بقى عادي

انا : معاك حق ده بقى عامل زي السجاير من كتر اللي بيشربوه بدون اي حرج

انت بتشتغل ايه؟

هو : فني تبريد وتكييف ..ورحت اشتغل في شركة دعاية واعلان وادوني ادوية وقالولي هتنزل توزع وتبيع ومرتبك هيوصل لألف وخمسماية جنية في الشهر اذا بعت بتمان الاف جنية ..تصور بقالي اسبوع اهو ما بعتش غير بتلتماية جنية بس ورغم اني الوحيد اللي استمر معاهم لما رحت اقولهم انا همشي واسيب الشغلانه ديه محدش قلي لا او خليك رغم اني كنت متحمس اوي وبسهر معاهم اقولهم في افكار للدعاية وكده

انا : معلش الناس هنا اتعودت على كده انك ممكن تسيب في اي وقت

............................

في المكتب الاستاذ سمير بيقولي بلاش تثق في الناس كده

اصل انا اتنصب عليا وانسرقت بدون داعي للدخول في تفاصيل

.............................

كنت ماشي وام احمد بنت خالتي وسمعنا كاسيت خطبة دينية صوته عالي في الشارع قولتلها اييييييه مش بحب الناس دي

قالت : ولا انا ..بحس انهم بيعملوا كده علشان الفلوس

قولت: يا بنتي اصلا الناس هنا لها اكثر من وجه وبالتالي انا لا اثق في اي حد ..ده انا مانضحكش عليا في مصر غير من اللي شكلهم متدين

.............................

كنا اربعة ولسه خارجين من صلاة الجمعة وعايز اقولكم اني اتهزأت علشان رفضت اشارك المجرمن دول في جريمة الاتجار في الحشيش

ملحوظة : المجرمين دول هم اللي انا ساكن معاهم حاليا وساكن معاهم تخليص حق ..ابقى عسقول يحكيلكم

.............................

الاول كان ممكن اثق في اي بنت لكن بعد الحوار ده وغيره خلاص كان زمان

هي : ( فتاة سيئة السلوك ) على فكرة انا اختي منقبة واجمل واحده فينا بس حاليا قلعت النقاب بس بتلبس حجاب محافظ زي اللي انا لابساه ده

انا : طب والله كويس هي دارسة ايه؟

هي : معاها ثانوية وعايزه تدخل معهد تحفيظ قرآن

انا : طب جميل ما شاء الله

هي : بس فعلا جميلة حتى اسأل حسن معلق معاها وبيكلمها دايما في التليفون من الغردقة

أنا : حسن !!!!! شكرا

مش عارف ليه وقتها افتكرت مجدي وهو بيقلي انه كان بيقعد مع خطيبته في ش جامعة الدول ويمد ايده من تحت الخمار اللي جايب لغاية ركبتها ..وفي شهر رمضان ..بس للامانه يا جماعة الكلام ده بعد العشاء كانت بتقولهم انها رايحة تصلي تراويح وهي اصلا رايحه ..عيييب ..الرقابة قصت الكلام

..............................

خدوا بقى دي بناء على طلب بإلحاح من بطلة الحوار

هي : هسألك سؤال .القرآن مخلوق ام غير مخلوق؟

انا : نعم؟

......

هي : احنا اصلا ما ننفعش مع بعض علشان مختلفين

انا : ليه ؟

هي : علشان انا سلفية وانت اشعري ..ازاي تقبل تتجوز واحده سلفية وتآمن لاطفالك معاها

انا : يعني لو اتقدمتلك ترفضي

هي : اه ..لاننا مختلفين في العقائد

!!!!!!!!!!

بقيت اقول : أصلي خلفهم ..ولا يزوجني بنتهم

وده لاني بصلي في مسجد سلفي خلف امام سلفي لان هو ده اقرب مسجد ليا

اعتقد يا جماعة انها ممكن تكون مش بتصلي في مسجد اشعري

طبعا ناس كتير مش فاهمه يعني ايه اشعري وايه سلفي وايه ده

ولا انا

عموما انا حذفت ايميلها من الهوت ميل بس مش عارف احذفه من الياهو ..ما اهتمتش اصلا علشان مش هيفرق

ملحوظة : هي هتقرأ البوست وتعليقاتكم وكانت عايزه تعرف رأيكم في موقفها

.............

نسيت اقولكم ..المحشش قلي : إلحق نفسك وارجع بلدكم احسنلك

بفكر فعلا

طبعا البوست ده كله عك وحوارات كده مش مفهومه او مفهومه الله اعلم بس انا دماغي مزنوقه بكلام وحواديت كتير مشتته دماغي

البوست ده ما يحسبش يا جماعة اعتبروني داخل اسلم عليكم

واخص بالذكر الاستاذ جني اللي معزته كبيرة عندي بس اعمل ايه يا استاذي انا بقيت دايخ وبلاش عتاب يا حبيبي بلاش عتاب

بفكر في بوست للصحيفة انتظرني قريبا

بس بجد اكتشفت ان الحشيش مهم جدا

اقولكم حاجه تضحك ..قال ايه انا رايح قسم الهرم علشان اخرج واحده مقبوض عليها ..رحت وقعدت اسأل عليها لغاية ما لقيتها قدامي خارجه لوحدها اخدتها معايا وخرجت

انا : هو انتي يا بنتي قبضوا عليكي ليه؟

هي : انا كنت راكبه تاكسي وحصل ..............., واكتشفت في النهاية انها اتقبض عليها بتهمة تسهيل دعارة

ههههههههههههههههههههههههههههه
--------------------
يا جماعة .. أنا عسقول ... و الباحث موصينى أزف لكم خبر إنه ساب المكتب اللى هو شغال فيه .. و هو مش عارف يدخل النت عشان كان يقول لكم الخبر دة بنفسه .. هو اتصل بى و بلغنى الخبر دة ... و العجيب إنه كان بيضحك .. الواد شكله فوت و لا إيه
الله يكون فى عونك يا باحث
بدل ما تبقى الباحث عن الحقيقة .. هاتبقى الباحث عن العمل

أهو ده اللي مكنتش عامل حسابه

كنت لسه هكتب بوست جديد دوست بالخطا على مفتاح انتر فحصل انه بقى فيه بوست فاضي

بدون عنوان او كلمات

:)

ودلوقتي مضطر اكتب بوست بسرعه لتدارك الخطأ ده

تجربة جديدة متهيألي محصلتش مع حد قبل كده

طبعا لو حذفته هعمل مشكلة في الريدرات بتاعة الزملاء هيلاقوا عنوان فاضي ومفيش اي حاجه

المهم نقول ايه نقول ايه

طب انا كنت اصلا عايز اتكلم عن موضوع المسابقات بتاعة 0900 واتصل يا عم واتصل يا ذكي واتصل يا فالح واتصل وادي دقني لو كسبت ..الخ

بصراحه لما بشوف المسابقات دي بحس انهم بيستغفلونا علني ..بيستعبطونا .. بيسرقونا بمزاجنا

حاجه كده يعني

ماهو في الاخر سؤال تافه

لانه اصلا غرضه الوحيد انه يلم فلوس والسلام من اكبر عدد

فيروح طارح سؤال ساذج ..وما اكثر السذج في مصر ممن يحملون الزفت الموبايل وما اكثر الجعانين الذين يحلمون بسوق العيش

والامر بالظبط اشبه باليانصيب ومسابقات اللوتاري اللي اتلغت بعد ما ظهرت فتاوي بتحريمها

فرجعت لنا في العصر الحديث باسلوب ألكتروني

والمصيبة ان محدش بيتكلم وكل يوم الاستهبال والنصب والاحتيال بيزيد

والغريب ان اول من ابتدع المسابقات دي داخل مصرهو التلفزيون المصري القومي العربي المتحد

ما علينا وبسرعة علشان فيه بوست فاضي يا جماعة ظاهر في الريدرات

ازاي افرق بين مسابقة بتعتبر قمار ..وبين مسابقة عادية

الشيخ عبد الله المصلح الله يكرمه كان شرحها زمان بشكل مبسط جدا وواضح وسهل

شوفوا يا جماعة والحاضر يعلم الغايب

انت في المسابقة لك حالتين

حالة بتكون فيها : سالم -غانم

وحالة تانية : غانم - غارم

يعني ايه الكلام ده ؟

الحالة الاولى : سالم - غانم

يعني انت كان لزمك سجاده مثلا رحت تشتري سجادة من محل كبير وبعد ما اشتريتها لقيتهم بيقولك احتفظ برقم القسيمة علشان فيه سحب بعد اسبوع والرقم الفائز له جايزه شبشب هديه

انت هنا ما خسرتش فلوس

ولما كسبت جاتلك جايزه انت ما غامرتش علشان تكسبها

وان مكسبتش فأنت ماخسرتش

يعني مفيش مقامرة

الحالة نمبر تو 2

غانم - غارم

في الحالة دي انت بتدفع مقابل لشئ ليس سلعة وانما هو الجايزه

هذه الجائزة محتملة قد تأتي او لا تأتي

يعني انت معرض اما تخرج غانم يعني غنمت وفزت بالجايزه

او تخرج منها غارم يعني غرمت تمن المشاركة ع الفاضي

دي هي المقامرة

يعني حرام

طب فيه مسابقات بتكون جوايزها حج او عمرة؟

حرام طبعا يا ذكي

ودلوقتي

ليه المسابقات دي كترت اوي

واحد : علشان احنا شبابنا هايف وبتوع المسابقات عارفين كده اننا عالم فاضيه وبتصرف فلوسها في الفاضي

شوف مثلا بتشحن كام مرة وبتتصل وترغي ع الفاضي كام مره

ونسب التصويت على برنامج ستار اكاديمي وغيره تشهد على الهيافة

اتنين :شعب عاطل ..والعاطل بيحلم ..بيحلم بإيه ؟ ..بضربة حظ

ثلاثة: معندناش ثقافة الادخار ..يعني الناس في مصر بتحوش علشان تصرف فلوسها في الفاضية

اربعة : المسابقات دي بتستغل الكيف ( المزاج ) واحنا مدمنين كورة او عايزين نخس ومش عارفين او غاويين مسلسلات

وما شاء الله الموبايلات مع العيال من ثالته اعدادي يعني العالم الهايفه اللي غاوية مسلسلات وكورة ودول مالهمش سن .ورزق الهبل ع المجانين

خمسة : هي برضه رزق الهبل ع المجانين

كفاية كده انا عملت البوست ده ع السريع فك زنقه

قصدي يعني علشان نملا الفراغ

يووووه برضه خيخه هتفهمنا غلط

شوفوا انتم حل فيها بقى

ده ان رجعت من الخانكة اصلا

وانت يا هذا قولي لماذا ؟؟

تحديث
الإجابة فى الآخر
------------------

لماذا ؟

Why ?i

أيوة .. هو السؤال كدة بس .. مجرد أداة استفهام

السؤال اللى فات دة سأله أحد الأساتذة لطلبته فى الجامعة فى أحد الامتحانات ..بعض الطلبة حصل على امتياز .. و بعضهم حصل على جيد .. و بعضهم حصل على مقبول .. هل حد يحب يجاوب ؟؟؟ .. و هل هاتحصل على امتياز و لا مقبول ؟؟

ملاحظات

ا- اللى يحب يجاوب .. ياريت يجاوب السؤال فى ذهنه الأول قبل ما يقرا تعليقات الآخرين عشان ما يتأثرش بإجاباتهم (دة لو حد علق أصلا)

ب- النتيجة هاكتبها ان شاء الله بعد تلات أيام مثلا دة لو التعليقات قليلة فى الأول .. لو التعليقات كتيرة هاكتب النتيجة بعد أسبوع عشان اللى يحب يجاوب يلاقى فرصة

ج- اللى عارف الإجابات مسبقا يا ريت ما يجاوبش .. لأنه هايبوظ اللعبة .. ممكن يكتب فقط إنه عارف الإجابة

د- السؤال فى الأصل بالانجليزى .. اللى يحب يجاوب بالعربى أو الانجليزى .. يجاوب

-------------------

الإجابة
-----
السؤال دة سأله أحد أساتذة الفلسفة لطلبته .. بجد يا جماعة و مش هزار
بعض الطلبة كتبوا أى أسئلة بس بتبتدى بـ"لماذا؟" و راحوا مجاوبين عليها .. و دول أخدوا أقل تقدير .. مقبول

إيييه .. فكرتونى بالمقبول اللى كان لازق فيا أيام الكلية
.
.
.
البعض الآخر من الطلبة لما شافوا السؤال مجرد كلمة
ًلماذا؟
Why?i
جاوبوا بكلمة واحدة .. هى
لأن
Because
و دول أخدوا تقدير جيد

إيييييه فكرتونى بالجيد اللى كنت باشبرق نفسى لما باجيبها
.
.
.
واحد فقط من الطلبة لما شاف السؤال مجرد كلمة
لماذا؟
Why?i

جاوب و قال
لماذا لا!
Why not!i
و دة أخد تقدير امتياز

إييييه .. فكرتونى بالامتياز اللى كان أعز من لبن العصفور

الكلام اللى فات دة كله ليه ؟؟
نلاحظ من الإجابتين الأولانيين إن الطلبة كلهم اتعاملوا مع السؤال بخوف .. و جاوبوا و هم خايفين من الدكتور

أما الإجابة الأخرانية .. فالطالب اتعامل بندية مع الدكتور .. و من الآخر .. رمى الكورة فى ملعب الدكتور و قلب الترابيزة عليه

الطالب دة الوحيد اللى تخلص من قيد الإجابات النمطية .. و شغل قدرته على الإبداع و بالفعل كسب الموقف كله .. و النوعية دى من الناس قليلة جدا .. إييييييه .. كان نفسى أبقى منهم .. أصل أنا جاوبت الإجابة بتاعة الجيد

كدة بعد ما جاوبت على السؤال .. يبقى كدة أنا فى حل من الرد على تعليقاتكم .. نيهاهاهاهاها

ياللا يا جماعة .. أشوفكم أمس
--------

ملاحظة: أنا أخدت بالى إنى فكرت فى التدوينة العجيبة دى بعد رجوعى من زيارة دار المسنين اللى فى الخانكة .. و كمان خيخة عملت تدوينة كاتبة فيها "ريان يا فجل" برضه بعد ما رجعت من زيارة دار المسنين اللى فى الخانكة

أنا مش عارف اللى بيروح هناك بيحصل له إيه ؟؟ المشكلة إن خيخة المرة الجاية .. رايحةالدار و معاها حوالى خمستاشر بنت .. يا رب يرجعن بالسلامة و بكامل عقلهن