Wednesday, March 4, 2009

حلبة حصى ..حصى بجد

مره سألت الواد عسقول
خدوا بالكم سألت مين؟؟
عسقوووول
يعني أنا مين؟؟
الباحث
نقطة ومن اول السطر
تفتكر يا عسقول الدين بيشكل نسبة كام في تصرفات الشخص العادي وهل يمكن القول أننا شعب متدين؟
أجاب : ان النسبة كبيرة اوي يكفي مرة مثلا سواق ميكروباص بيشتم واحد وبعد ما شتمه قعد يستغفر ربنا
يا سلام ..طب وليه يشتمه اصلا
يعني تلاقيه يشتم شتيمة قبيحة وبعد ما ينفش في الراجل يرجع يقول استغفر الله العظيم خليتوا الواحد يغلط والعربية كمان فيها حريم
بصراحة
بصراحة بصراحه يعني
انا شايف اننا بنمارس أو بنشوف النفاق الديني بشكل معتاد ومتكرر في حياتنا اليومية
صحيح بنستغفر بعد ما نغلط
لكن التدين ده مش بيمنعنا من البداية اننا نغلط
نقدر نقول أن احنا الاحساس الديني عندنا عالي ..لكن مظهري أكتر منه حقيقي
ومش بعمم يا جماعة فيه ناس طيبين وحلوين وزي الفل
بس برضه ارجع واقول رغم الاذان اللي بنسمعه في كل شارع خمس مرات
وجوه البيوت على شاشات التليفزيونات
لكن ..بنغلط
بنغش
بنكدب
ونرتشي
ونرجع نستغفر
!!!!!
بنتعاطف مع مشكلة ونقول يا حراااام ..بس بطلنا نمد إيدينا ونساعد زي زمان
ليه الدنيا مابقتش حلوه زي الاول
اكيد طبعا الظروف الاقتصادية والكفاح في سبيل لقمة العيش
على ذكر الكفاح ..زمان كانت الناس بتجاهد علشان تاكل عيش
دلوقتي الواحد بيطلع عينه علشان يقدر يسدد ايجار الشقة وان شاء الله عنه ما اكل وربنا يخلي قانون الايجار الجديد
ده حتى صلة الرحم ماعادتش زي الاول
وكلنا عارفين ليه؟
لازم يتوجدلها فائض في الميزانية يسمح بصلة الرحم
ثم بعد كده نحدد هنتقابل امتى؟
واية الميعاد المناسب لطرفين بيشتغلوا أغلب الوقت
امبارح رحت ازور واحد زميلي في الزاوية الحمراء
محمود بتاع الاسئلة اللي في الصحيفة
المهم انا وصلت لغاية عنده الساعة اتناشر
كان فاكر نفسه اجازة لكن اتصلوا بيه وقالوله ييجي بكره وياخد بعده اجازه
فكان لازم يصحى الساعة خمسة ونص صباحا علشان يلحق يوصل شغلة
وعلشان يقعد معايا فضلنا سهرانين لغاية الساعة تلاته مش عايز ينام علشان نلاقي وقت نقعد سوا
قولته نام انا مش قادر اسهر ..ونمنا
صحي الساعة خمسة ونص نزل راح شغله وقعدت انا وحدي زي القرد لغاية الساعة اربعة بعد العصر هو رجع من شغله لقاني بلبس ونازل
يا دوب قعدنا ساعة كمان سوا
ونزلنا علشان نخطبله لكن لقينا الولية ام البت قافله المحل
اه كنا رايحين نخطبله البنت من امها وهي شغاله في المحل
ماهو مفيش وقت يا جماعة
:))))
على ذكر التدين
في بلدنا كنا كلنا في الجامع نعرف بعض وقبل الصلاة وبعدها بنقعد ندردش
هنا بلاقي محدش يعرف حد
يبقى البقال بتاع المطعم بيصلي جنبي واطلع اشتري منه ألاقيه بيضحك عليا ويديني ابو جنية فول اد ابو خمسة وسبعين
:)
وماتلاقيش اتنين اصحاب خارجين من الجامع سوا إلا اذا كانوا رايحين مشوار وطالعين يمدوا
الله يرحم زماااان قدام جامع الشيخ نجيب كنا نقعد خاصة بعد صلاة العصر والعشاء ..نعمل ندوااات قدام الجامع
م الاخر ارجع واقول احنا مش شعب متدين يا جماعة
احما شعب بيخاف من الاخرة
طول عمر قدماء المصريين بيعملوا حساب للاخرة وبيخافوا منها
وانعكاس ده على سلوكنا ايييييه؟؟؟؟
اننا بعد ما نغلط ..نستغفر
يعنى اوكي اغلط بس ما تنساش تستغفر ربنا واغلط برضه مش تبطل غلط يعني
لا عادي وكرر نفس الغلطه بس إلزق الاستغفار في نفس جملة الشتيمة مثلا
يعني : يا راجل يا بن ال..... استغفر الله اصلك راجل وا ...معندكش دم
كده يعني
ودمتم
ايوه جااااي وعندك واحد حلبة حصى مغلية قبل كده مرتين
:)
استغفر الله سامحني يا رب
قصدي مرة واحده بس
:)))))))))))