Wednesday, April 30, 2008

دعاة الإضراب .. دعاة الخراب

مبدأيا كدة سيبوكو من العنوان اللى فوق دلوقتى .. هانعرف دة إيه كمان شوية ..أولا أحب أرحب بالزميلة الفراشة زميلتنا الجديدة فى المدونتين و أرجو لها كل توفيق و سداد
ثانيا أنا أعتذر عن انقطاعى عنكم بس و الله مشغول بعنف ورجعت بالموضوع ده لما اخويا الباحث قاللى الناس منتظره عسقول في موضوع جديد
المهم



الجماعة اللى قاموا بالإضراب دول شوية مخربين مفسدين ..و بيعطلوا مصالح البلد .. و بيوقفوا المواصلات .. و بيكسروا المرافق .. و بيعتدوا على الممتلكات .. و بيوقفوا الإنتاج .. و بيحركهم حقد طبقى (لاحظوا إن الكثير من المشاركين فى الإضراب بجانب العمال هم مدرسون و موظفون و مهندسون و محامون و أطباء و طلبة جامعة و طلبة مدارس و ما إلى ذلك .. يعنى طبقة متوسطة .. ماعرفش الحقد الطبقى هاييجى منين) .. و دول (المضربين يعنى) يعدون طليعة ما يسمى بـ "الشيوعيين الجدد" .. و بينفذوا مخططات الغرب الليبرالى العلمانى الملحد الكافر .. و بيحاولوا يطبقوا الديموقراطية اللى هى بتعادى الإسلام (معلش يا جماعة اسمعوا منى للآخر).. إلى جانب إن اللى بيعملوه دة يعد "خروجا على الإمام" .. و كل دة ليه ؟؟؟؟؟ قال عشان عايزين شوية مطالب ثانوية زى إيقاف حالة الغلاء و كمان رفع الأجور .. مش معقول يعنى عشان شوية مطالب زى اللى فاتت دى اللى هى بتعد من الرفاهية فى الحياة (إن الواحد لما تتبعزق كرامته عشان يشترى رغيف عيش غاية فى السوء و بربع جنيه فيطلب إن الوضع دة يتوقف فدة يعد رفاهية) نقوم نعمل إضراب و نخرب البلاد و نبقى عملاء للغرب و نغضب ربنا .. مايصحش طبعا .. دة حتى أيام سيدنا عمر المجاعة استمرت لمدة تسعة أشهر و ماحدش فكر يعمل إضراب (ماعرفش إيه وجه الشبه بين المجاعة أيام سيدنا عمر و بين الأحداث الحالية .. شروط القياس غير متحققة) نقوم احنا نطلع نعمل إضراب ؟؟ لأ .. لازم نصبر .. دى الحالة اللى احنا فيها لسة ماوصلتش لمجاعة .. اصبروا .. تحملوا (مش عارف لحد إمتى هانصبر و هانتحمل .. يمكن لغاية ما تضيق بينا الدنيا و يبقى حلال لينا ناكل لحوم الميتة .. شراء هياكل الفراخ بعد ما كانت رائجة بين الفقرا بقت صعبة هى كمان)ا







الكلام اللى بالأحمر اللى فات دة مجرد مقتطفات بالمعنى من خطب لبعض الدعاة و الشيوخ عن موضوع الإضراب .. يا ريت يا جماعة تسمعوا الكام خطبة دول عشان ماحدش يظن إنى باتجنى على حد و عشان تكونوا على بينة من رأى كبار الدعاة حول أمور الإضرابات و الاعتصامات .. و الكلام السابق كان عينة من كلام كتير جدا .. العنوان اللى فات دة هو جملة قالها الشيخ رسلان بنفسه






الدرس الأول للشيخ محمد سعيد رسلان








الدرس الثانى للشيخ محمد سعيد رسلان









درس للشيخ مصطفى العدوى






درس للشيخ سعيد عبد العظيم






درس للشيخ ياسر برهامى








أنا سمعت الخطب دى بالكامل .. و كان نتيجتها إن أعصابى اتحرقت .. خلط .. خلط شديد شديد جدا بين المفاهيم و بعضها .. خصوصا موضوع "الشيوعيين الجدد" و "الحقد الطبقى" دة .. بصراحة حسسنى بالإهانة فضلا عن إنه كلام فى رأيى يعد ضربا من الوهم .. كل من لدغه الفقر أو عضه الجوع أو أهانه الفساد أو قهرته المحسوبية يعد شيوعيا يحركه الحقد الطبقى




هم مفترضين أصلا إن "إضراب" يعنى "اعتداء على ممتلكات" .. و مصرين إن "اعتصام" يعنى "تعطيل مصالح" .. فى حين إن الدعوة للإضراب اللى فات كانت بهدف لا الإضراب و لا الإعتصام .. الهدف منه كان الانقطاع عن نشاط الشراء بوجه عام .. و دة سلوك دعى إلى مثله سيدنا عمر فى فترة من فترات حكمه .. لكن هؤلاء الدعاة مش شايفين الكلام دة .. لا موقف سيدنا عمر و لا المعانى الحقيقية للمفاهيم




و أى حد متابع النشرات و الأخبار هايقدر يدرك إن لو كان هناك بعض أعمال عنف فإنها من عناصر مدسوسة من اللى عايزين يبوظوا الإضراب .. لو حد عنده قدر بسيط من الفطنة و الكياسة هايقدر يدرك دة و كما نعلم فإن المؤمن كيس فطن




و حتى لو الدعوة كانت إلى "إضراب" أو "اعتصام" .. كل دى وسائل سلمية يقوم بها الناس بهدف توصيل مجموعة مطالب لأولى الأمر .. يعنى مش بهدف لا خروج على حد .. و لا تكسير مرافق حد .. لكن كما هو معروف إن دى وسائل ديموقراطية .. و الديموقراطية فى رأى هؤلاء الدعاة حرام شرعا.. إذا كانت الوطنية حرام من وجهة نظرهم .. هاتيجى على الديموقراطية هى اللى هاتبقى حلال




ملاحظ إن هؤلاء الشيوخ و الدعاة قاموا بتعريف "الإضراب" و "الاعتصام" بتعريفات مالهاش علاقة بحقيقتها عند أهل التخصص (اللى هم الناس اللى عارفة يعنى إيه ديموقراطية) .. و من خلال هذا التعريف الجديد و الغريب و المرفوض أصلا من أى شخص عادى نلاقيهم هاجموا المفاهيم الأصلية .. فتضيع الحقيقة




نفس الطريقة دى تم التعامل بيها مع "الوطنية" و "المواطنة" و "الوطن" و "القومية" و "الهوية" و "علم الكلام" و "التصوف" و "الفلسفة" و "المنطق" و "التأويل" و "العقلانية" و "الفرقة الناجية" و طبعا معاهم "الديموقراطية" و ما يندرج تحتها من "إضراب" و "اعتصام" و "انتخابات" و "مجالس نيابية" .. المفاهيم دى بعضها وضحناه فى تدوينات سابقة عشان ماحدش يقول إننا بنتجنى على حد .. زى التدوينة دى و دى و دى و دى




أنا بجد مش عارف هذه الطريقة الجديدة فى التعامل مع شئون و قضايا الأمة هم بيتبعوها ليه ؟؟ يعنى إيه إنى أجيب المفاهيم دى و أطلق عليها معانى سيئة مالهاش علاقة بيها و ابتدى أهاجمها .. هل دة عن عمد ؟؟ و لا عن عدم علم ؟؟ لو كان عن عدم علم فكان يجب أن يسألوا أهل الذكر إن كانوا لا يعلمون .. أما إن كان عن عمد فلا تعليق




لو كان دة هو منهج هؤلاء الشيوخ و الدعاة فى التعامل مع قضايا الأمة و شئونها .. فأكاد أقسم أن ما هذه بسلفية ترضى الله و رسوله .. بل ما هذه بسلفية أصلا

أعتقد إنى لو أعطيت نفسى الحق إنى أستخدم نفس المنهج بتاعهم فى الحكم على الأشياء فهايبقى عادى جدا إنى أقول إن السلفية يعنى سلبية (يا جماعة أنا عارف يعنى إيه سلفية لكن الجملة اللى فاتت دى من قبيل توضيح تأثير المنهج الغريب)ا



هؤلاء الشيوخ و الدعاة ربما هم مهرة و متمكنون و لا يشق لهم غبار فى أمور العبادات و أمور العقائد و أصول الدين و علوم الحديث و ما إلى ذلك .. نعرف فضلهم فى ذلك و نقدرهم و نجلهم لأجله بل و نرجو لهم التوفيق و السداد .. أما قضايا الأمة الراهنة الكبرى فلها وسائلها فى التعامل معها و التى يجب إجادتها قبل أن نخرج برأى له وزن فضلا عن أن يكون رأيا مخالفا لجمهور أهل الفهم و الرأى و الخبرة




طب أنا هاحكيلكم حكاية .. أبو حامد الغزالى لما حب يواجه هجوم الزنادقة و الباطنية فى القرن الخامس الهجرى و كانوا متسلحين بسلاح الفلسفة و المنطق .. فضل سنوات و سنوات يدرس فلسفة و منطق لغاية ما امتلك زمامهما و كان فارسا من فرسانهما إلى أن تغلب على كل زنادقة و ملاحدة عصره فأطلق العلماء عليه "حجة الإسلام".. و قسم علوم الفلسفة تقسيم غاية فى الدقة .. يعنى قبل ما يحكم على الفلسفة درسها صح .. و لم يمنعه مانع فى سبيل طلب الحق .. و برغم كدة كان ضعيفا فى علوم الحديث و هو كان عارف كدة و كان بيقول على نفسه إن بضاعته فى علم الحديث مزجاة .. يعنى لم يدع المعرفة و لم يطلق على مصطلحات و مفاهيم علوم الحديث تعاريف جديدة .. لو جينا شوفنا هؤلاء الدعاة بيقولوا إيه .. بيقولوا إن الديموقراطية حرام .. طب درستوها بالتفصيل ؟؟ يقولوا إنها بتخالف الإسلام و ماينفعش نتعامل مع ما يخالف الإسلام !!!!!! فلم يتبق لهم إلا إطلاق معانى جديدة على المفاهيم لا عن علم و يقين .. و لكن إن هم إلا يظنون




فيه قاعدة منطقية بتقول "الحكم على الشىء فرع عن تخيله" .. طب إزاى هايتخيلوا الشىء من غير ما يعرفوا عنه حاجة .. دى أبسط قواعد المنطق .. لكن بما إن علم المنطق عند هؤلاء الدعاة هو علم محرم أو على أفضل تقدير علم لا طائل من وراءه .. فطبيعى إننا نجد هذا المنهج الغريب فى التفكير




يعلم الله أنى راجعت نفسى و نويت أن أتوقف عن مثل هذا النوع من الكتابات و كنت هاسيب الدعاة يقولوا اللى هم عايزينه .. و كنت سأهتم بمواضيع أخرى لما ارجع للتدوين تانى بإذن الله .. كنت هاتكلم عن أحداث تاريخية أو شخصيات إسلامية أو عن آرائى الخاصة فى شوية مواضيع .. و يشهد على ذلك دكتور حر فقد صارحته بما فى نفسى من مراجعة .. مراجعتى لنفسى (بجانب انشغالى) هى اللى خلتنى لا أنشر آخر حلقة من موضوع الوطنية اللى كنت باناقش فيها رأى الشيخ الطبيب محمد اسماعيل المقدم و اللى اكتفيت بإنى أبعته للناس على إيميلاتهم للى طلب منى أو علق على الموضوع أو اهتميت بإنهم يقرأوه (اللى عايزنى أبعته ليه يقول لى يا جماعة) .. لكن اللى سمعته فى الدروس دى أطار صوابى و فضلت أيام أحاول السيطرة على الكلمات لأتمكن من الكتابة بشكل هادئ و دة اللى خلانى أتأخر فى عرض الموضوع بعد أحداث الإضراب مباشرة بجانب إنى مشغول جدا




بصوا يا جماعة .. الله يخليكم .. كل واحد فينا ربنا رزقه بعقل .. بواسطته نقدر ناخد قراراتنا .. و على أساسه ربنا هايحاسبنا .. و المفروض إننا على قدر جيد من الوعى .. فإما أن نرضى أن نسلم عقولنا و إراداتنا و آذاننا لغيرنا لكى يختاروا لنا و إحنا اللى هانتحاسب فى الآخر .. يا إما نشغل عقلنا و إحنا اللى نقرر من غير سلطان حد علينا أو واسطة بينا و بين الدنيا .. و برضه إحنا إللى هانتحاسب فى الآخر .. فخد قرارك بنفسك و اتحاسب عليه بدل ما تخلى غيرك ياخد لك قرارك و برضه هاتتحاسب عليه

Sunday, April 27, 2008

اللقاء الحجري الاول والثاني

تحديث اخر: الاخت الفراشة مش هتجيبها لبر ونزلت توضيح حول الناسخ والمنسوخ في الصحيفة بعنوان
.............................
اول لقاء حجري تم بينى وبين ابن حجر كان من 4 شهور تقريبا
اتفقنا في التليفون على المكان والزمان
الساعة 6ونص
امام محطة رمسيس
ابن حجر : هتلاقيني لابس بلوفر ازرق
الباحث : قعدت اضحك طبعا لاني اولا كنت شفت صورته من زمان ثانيا ..مفيش حد بيحلق اقرع في عز الشتاء غيره
وده مش بخل يا جماعة ..دي ضريبة العبقرية ..ربنا سلطه على شعره مش بيطيقه على طول جايبه نمره واحد
رحت لقيته منتظر امام سلم المترو اللى في وش محطة رمسيس
كان اول مره نلتقي فيها حضنين كده ع السريع على بوستين تقريبا ..في خدوده طبعا ولا اييييه
ابن حجر : ايه ده تصور انا كنت فاكرك اطول من كده
الباحث : يا عم انت اللى طويل..يا جماعة 170 سم اعمله ايه تاني مش يحمد ربنا
هنروح فين يا عم الحج
بصيت لقيته جاهز وراح مطلع تذكرتين مترو ..ونزلنا فين مش فاكر المهم رحنا مكتبة دار السلام اشترى هو كتاب اصول الفقه للمبتدئين
وبعدين رحنا الحسين
ابن حجر مغرم جدا بالاحياء القديمة ونفسه يعيش هناك في الحسين المهم حسيت اني سايح وهو قعد يلف بيا في مغارة على بابا دي لغاية ما وصلنا الى قهوة زبيده
وعند زبيده الخبر اليقين
دى الوكر الرئيسى لابن حجر وشلته..طلبنا شاي
بس انا انضحك عليا بصراحة الشاى ده معدلش دماغي معلش بقى يروح فين ده جنب الشاي الصعيدى
اها ..نسيت احنا كنا دخلنا قبلها محل فطاطري وطلبنا فطير محشى ....مش فاكر
المهم قعد قبالنا جماعة فرنساويين ..بس بجد مش فرنساويين بتوع السويس زى خالتكم فرنسا هانم كده
وكانت الفضيحة الدوليه قعدنا ناكل بادينا والراجل الفرنساوى يبص علينا ويتنح
وشوية ويضحكوا ويظهر والله اعلم كانوا بيضحكوا علينا
وانا خفت بصراحة الراجل الفرنساوي يطلع موبايله ويصورنا فيديو وتاني يوم نشوفها على اليوتيوب..صعايده في الحسين
ابن حجر فيه عرق منياوي
وعلى قهوة زبيده اتكلمنا كتييير في كل حاجه عن التدوين وعن حياتنا الشخصية
وكنت لسه جاي من استدعاء قعدنا ندرش واتضح انى ماشى مع واحد له تاريخ في المظاهرات
صحيح نصها كان بالصدفه انما اهو ..اللى حصل بقى
وطول ماحنا قاعدين في قهوة زبيده شباب وبنات رايحة جايه من قدامنا
ايه يا جماعة ما ينفعش كده ..اتنين عذاب واحد عايز في قوقعة هاردوير والتاني صعيدي
انما اللى لفت نظري في الموضوع ده كله قلة الادب اللى في الشارع المصري
ازاى؟
ألاقي الشاب ماشي جنب البت وحاطط ايده على كتفها ودماغه هتلزق في دماغها وماشيين في الشارع عادي
المشهد ده شفته كتير ..وطبعا في الكورنيش حدث ولا حرج
بقول لابن حجر : ايه ده يا عم هو الناس دي مالها عيب ده احنا مسلمين في بلد مسلم برضه
قال ابن حجر مقولته اللى لفتت نظري: الشباب عندهم كبت عاطفي مش عارفين يعملوا ايه
بالظبط كل بنت وولد يمشوا مع بعض شويه هم عارفين ان دي علاقه مؤقته انما اهو بيفرغوا الكبت العاطفي وخلاص
..................
اللقاء الثاني
كان من كام يوم كده
الباحث : ألو انا منتظرك في نفس المكان القديم بتاعنا .
بين الاطلال هههههه
بعد ربع ساعة لقيته قدامي.. يلا بقى كده شوفلنا قهوه قريبه على السريع علشان عايز اروح البلد
ركبنا المترو ..وكان قاطع لى تذكرة مضروبه وكان شكله هيحبسني كل ما ادخلها الجهاز يصفر وما يشتغلش
جدير بالذكر اننا ألتقينا بالمترو بصحفي شاب في جريدة الحياة ..واد يابن حجر ما فكرتناش ناخد تليفونه ليه ؟ المهم ..عمل مدخله بين كلامنا خاصة ابن حجر كان بيتكلم عن خطبة للشيخ سعيد رسلان بيتكلم فيها عن الاضراب فأتكلم الصحفي الشاب ده عن مستوى الخطباء بشكل عام لدرجة ان فيه ناس بطلت تروح تصلى الجمعة بسبب الخطيب اللى بيقول كلمتين مملين مش بيغيرهم ..واتكلمنا عن الموضوعات الجديدة ..بقوله اني عايز احضر موضوع جديد عن السلفية ..بصيت لقيته مخنوق من بعض السلفيين دول وموقفهم من اضراب ابريل..هو بقى ابقى يحكيلكم
وطلعلى كتاب عن شم النسيم وفتوى المرحوم عطية صقر ..
وطلع كتاب عن السلفية للدكتور رمضان البوطي الكتاب يبحث في السلفيه ومعناها وينتهي الى انها حركة زمنية مباركة لا مذهب اسلامي
ما علينا ده مش موضوعنا
انما احب اوضح حاجه انا وابن حجر مش معادين للسلفية رغم اقتناعي انا ببطلانها كمذهب فكري ولكن كل شخص حر احنا بس ضد ان حد يطلع علينا ويحتكر لنفسه الصواب ..بل ويحتكر لنفسه الاسلام والصلاح والتقوى واتباع الرسول والصحابه وبالتالي هم الفرقه الناجية وغيرهم ضالين عن هذا الطريق
ان شاء الله هوضح وجهة نظري دي اكتر في موضوع مستقل واعطيكم الفرصة تشاركوا بس علشان ما ننشغلش بحوار جانبي
بالمناسبة دي اقول ان طبعا عصفور المدينة هو الغائب الحاضرفي لقاءاتنا وفي كتابتنا لموضوعاتنا
وهو شخصية مثيرة بالنسبالنا ومحل نقاش وازاى مثلا انه يكون صديق لصاحب مدونة يوميات عيل مصري
رغم التباين السلوكي او التربوي كمان لكل واحد فيهم مع ابناءه
واقوله ايوه يا عم عصفور بيحبك انت اكتر مني ..ده حتى بطل يعلق على موضوعاتي ههههه
يضحك ويقولي لا بس هو اللى مشغول
اه نسيت اقولك يابن حجر ان عامل مشاكل لعمك عصفور من كام اسبوع كده بسبب موضوع قديم واحده راحت اشتكتني لعصفور المدينة والراجل كتر خيره تعب جدا وسط الموضوع ده
بالمناسبة يا عم عصفور الموضوع انتهى نهائيا والحقيقة ظهرت وبقت علنية وربك اخدلي حقي بايد واحد منهم
اعلنها حرب عليهم وقالى يا باحث شوف رغم انى متضايق منك بسبب مشاكلك الكتير ..بس انا مرضاش بالظلم ويانا يا هم ان شاء الله حتى يوقفوا عضويتى ..وده يبقى المدير التقني اللى صمم المنتدى اياه
المهم
قعدنا برضه في كوفي شوب مش فاكر اسمه
وأفاجئ بالعنتيل ..التمنياوي طه
شخصية ظريفة جدا لا تمل منها طول ماهو قاعد يهزر ويقلد الاعلانات ويسخر من اساليب الاعلانات
ومن اظرف مواقفه كان ماشى وراء مظاهره في الكلية في الااااخر من باب الفضول وفجأة
واحد من اللى بيقودوا المظاهره جوه الجامعة قال : لف وارجع تاني
ويلاقي التمنياوى طه نفسه فى اول صف في المظاهره
هههههههههههههههه
اتكلمنا كتير انا والباشمهندس عسقلاني
واكتشفنا اننا احنا الاتين معجبين بمدونة الاخت ال جي
وغزارة الانتاج اللى عندها لدرجة انها ممكن تعمل 4 بوست في يوم واحد
وبتكتب فعلا موضوعات جميله جدا .من ضمن الموضوعات اللى بتضحكني وبتضحك زمايلي
عامله بوست بعنوان المسابقة الكبرى
كم عدد الوزراء في مصر؟
بس انتهى البوست
متهيألي حتى فرنسا هانم نفسها ما فكرتش تعدهم
واتكلمنا عن فرنسا ودمها الخفيف جدا ..وازاى قدرت تحقق نجاج في فتره صغيره
يعني قعدنا نقر عليها شويه
والست ام شريف خيخة هانم ..يا ساااااتر ايه ده
حاجه كده مصرية ع الاخر ..ماركة مسجله متميزه كشخصية طبعا
بتمثل امهات مصر ..وشابات مصر ..وعيال مصر.. وبلطجية مصر
حاجة كده زى كوكتيل غريب .وكل ما افتكر اللى عايزه تعمله في رانيا ابقى عايز ارجّع
ههههههههههه
واموله طبعا وخفة دمها الل بتفطسنا من الضحك
م الاخر احنا بتعجبنا المدونات اللى دمها خفيف
واتكلمنا عنكم كلكم
واقوله فينك فيه ناس زى مجداوية وصبرني يا رب جايين المدونة على حس موضوعاتك
ولغاية دلوقتي ما شوفش جديد منك
اه صحيح الواد المنحوس ده كل ما احطله عيني على مدونة تطلع مخطوبه
اصل انا كنت وعدته ادورله على زلطه ..قصدي عروسه لابن حجر
لانه وحده مش هيعرف يتصرف
سعادة البيه اللى قدامكم ده لما بيقف يتكلم مع بنت فجأة بيقلب ويبقى سيبويه ويقعد يتكلم باللغة العربية الفصحى
والنتيجة اول سؤال يتوجه له : أنت مصري
هههههههههههههه
عموما هو صرف نظر خلاص ..خسارة كنا عايزين نفرح فيه انما قرر يأجل الموضوع ده للخطة الخمسية الجاية
اتكلمنا عن لقاء المدونين اللى بيعمله احمد الصباغ ..ولقاءه بالفاتحين الجعفري واليعقوبي
كلام كتير واتكلمنا مؤخرا عن اضافة شريك ثالث في المدونة
زمان كنت عرضت على الاخت سلوى طوق الحرية انها تشارك معنا كعنصر نسائي في المدونة وهي للاسف رفضت لانها كانت لسه جديده في التدوين وحبت تحقق نجاحها بنفسها باستقلالية بعيد عن استغلال نجاح الاخرين ..ده كان ردها
واحنا احترمنا رغبتها في انها عايزه توجه اهتمامها لمدونتها ..ورجعت مؤاخرا عرضت عليها الفكره برضه لكن رفضت كمان مره لان دلوقتى اصبح عندها ثلاث مدونات وشريكة في مدونة رابعة مع ال جي
ونظرا لظروف انشغال ابن حجر ..وتوقفاتي المفاجأة لفترات طويله وعلشان المدونة ما تقفش
فكرنا في شريك ثالث وفضلنا انه يكون اخت من الاخوات حتى يمكنها طرح موضوعات هي هتفكر فيها احنا مش هنفكر فيها او نطرحها بنفس الاسلوب
واتفقنا انه من الافضل ان الشريك الثالث مايكونش عنده مدونة ففكرنا نعمل اعلان مطلوب مدونة للمشاركة معنا بشرط مايكونش عندها مدونة شخصية علشان اضمن انها بقلبها تكون في مدونة واحده ومش تقعد تفاضل لو عندها موضوع حلو تكتبه هنا ولا عندها في مدونتها
وأخيراااااااا ..وبمحض الصدفة
وجدت الطرف الشريك الثالث ..الفراشة ده اسمها
اتعرفت عليها في الشات اول مره ألتقيت بها كنا مختلفين في الرأي تماما وقعدنا نتناقش على العام وطبعا رأيها مكنش عاجب حد لانها بالفعل كانت داخله بنقد في الفكر الاسلامي
تاني مره كان تعارف بسيط ..ثالث مره طلبت منها تشاركنا في المدونة
ان شاء الله هتشارك معنا
وانا شخصيا بقولكم انتظروا كاتبة من العيار الثقيل جدا
ومبدئيا انا اخترتها وانا عارف اننا مختلفين في الاراء ..لذلك احب اقول ان رأيها هيعبر عن وجهة نظرها الشخصية
وانا اتوقع وجود حوار رائع بيننا ابن حجر والباحث والفراشة .حوار علمي وواعي يخاطب العقل وهيكون حوار قوى عموما ربنا يستر
وهتلاقونا بنختلف كتير والاستثناء اننا نتفق
انما هي شخصية مفكره على مستوى مثير للفكر ومحرك للمياه الراكده
وانا شخصيا افخر بمشاركتها معنا مهما اختلفنا في الاراء

Friday, April 4, 2008

الدنيا ربيع..والجو بديع ..قفلي على كل المواضيع

قفل قفل
مفيناش كاني ومفيناش ماني
كاني ماني ايه ..دي الدنيا ربيع
الدنيا ربيع الدنيا ربيــــع
...................
اعلان مدفوع الاجر:على كل من يجد ابو العساقيل ان يحضره فورا للاستراحه وله نص كوب شاي مجاني
مع تحيات المعلم الباحث عن الحقيقة
نبدأ بقى
فاتني الدفاع عن الاحتفال بالمولد النبوي ..وكمان الاحتفال بيوم الام
ولأجل حظي وقعت في الكبير ..: يوم شم النسيم
فقلت ألحق أقول كلمتين ..هم بدري شوية ..انما قلت احجز بيهم
هيطلع علينا كالعادة ناس تقولنا شم النسيم بدعة
زى ما قالوا عن الاحتفال بمولد النبي وكمان يوم الام
وهيقولوا ان شم النسيم ده اصلا اسمه عيد النيروز بتاع المجوس
زى عيد الحب بتاع القسيس فلان والاصل التاريخي التفسيقي التبديعي له
وبناء عليه اصبح كل فرحة او احتفال او حاجة تبسط الناس بقت بدعة
حرام
ليه؟
لان رسول الله والصحابة مكنوش بيعملوها ..يبقى دى بدعة يعنى مخترعة يبقى ليه نعملها طالما لا النبي ولا الصحابة فعلوها
فيه واحد دلوقتى هيشوح بايدي ويلوي بوزه ويقول ده مين ده اللى بيتكلم ده حتى قال النبي وما قالش عليه الصلاة والسلام
انا تعمدت ذلك اولا علشان اوريكم سخافة التفكير ..مره واحد شافنى بنقل كلام عن الامام ابن حزم وكل ما يأتي ذكر الرسول يكتب جنبه "ص" فراحواحد متهجم عليا وقال يا عم انت بتنقل عن واحد لا يعتد به ده مستخسر يكتب صلى الله عليه وسلم وحاطط حرف صاد
ما يعرفش انى بنقل ان الامام ابن حزم من كتاب الاحكام احد اشهر كتب الاصول
ما علينا نرجع لموضوعنا
ايه حكاية البدعة؟
البدعة هي الطريقة المخترعة ..ولها حالتين
اما توافق الشرع ..او تخالف الشرع
طيب خلونا نسأل : هل الاحتفال وادخال البهجة والسرور على النفس ..موافق للشرع ام مخالف له؟
بالطبع موافق للشرع
سؤال من واحد مفلحط : بس فيه احتفالات اصلها وثني زي يوم شم النسيم او عيد الحب والمسخرة؟
اولا عيد الحب والمسخرة ..لو شلنا كلمة المسخرة هيفضل الحب والاحتفال بالحب شئ يستحسنه الشرع ويحس عليه ..يقول رسول الله "ص" تهادوا تحابوا " وحديث اخر ألا ادلكم على شئ اذا فعلتموه تحاببتم ؟؟
الكلام بصيغة الاستفاهم لجذب المستمع ..وكمان دليل انهم متلهفين علشان يعرفوا ايه اللى ينشر الحب بينهم
قال صلى الله عليه وسلم : أفشوا السلام بينكم
وزى ما رسول الله دخل مكة ولقى الكعبة حولها اصنام ..شال الاصنام ..حطمها يعني ..وطاف بالكعبة
احنا كمان نشيل كلمة والمسخرة ..يفضل الحب
طيب ده اقتراح قسيس ..وايه المشكلة طالما اننا هنحتفل به على الطريقة المحمدية
التهادي والسلام وقول الرجل لاخية احبك في الله
وقول المرأة لاختها احبك في الله
وخلاف ذلك من المنكرات فهي حرام
نيجي ليوم شم النسيم
الفكرة فرعونية او فارسية ....ماشى مش مختلفين
انما طريقة الاحتفال ..شكلها ايه؟
هو ده السؤال
تلوين البيض باعتقاد ان هذا ينفع او يضر ..حرام
تلوينه علشان الاطفال يفرحوا وياكلوه بعد كده ..ليس فيه شئ
ملحوظة : ممنوع استخدام ألوان فلوماستر علشان بتطبع جوه ..وتلونوا على البيض وهو بارد مش سخن
اللى عايز اقوله
الاحتفال في حد نفسه ..هو من قبيل ادخال البهجة والسرور ..وليس فيه تعظيم لغير الله
ولا معارضة لله فى انه جعل عيدين ..طب احنا كمان هنعمل اعياد مش عيدين
انما هو استعمال للطيبات اللى احلها الله
النبي والصحابة لم يحتفلوا بمولده صلى الله عليه وسلم
رغم ان النبي تكريما ليوم الاتنين كان يصومه من كل اسبوع وقال هذا يوم ولدت فيه
انما ايه المانع اننا نحتفل بمولد النبي عليه الصلاة والسلام طالما مفيش منكرات وثنية ولا مخالفة للشرع
فالعقيدة سليمة وهى الوحدانية بل هذا تعظيم لرسول ارسله الله فهو تعظيم لله ..واعلان لمحبته
والعبادات والمعاملات سليمة فلا عبادة تخالف الشرع ..ولا معاملة مخالفة للشرع
يوم الام ..او عيد الام ..كان فكره من على امين ومصطفى امين وعملوا استفتاء ايه رأيكم يا جماعة نحتفل كلنا بالام ونتفق على يوم نحتفل به جماعة كلنا
زى كده ما تقول لاصاحبك او الفصل بتاعك فى المدرسة ايه رأيكم نعمل رحله كل سنه لأسوان
اصحابي وافقوا او الفصل وافق او المدرسة وافقت ..هل ده يبقى حرام؟
وابقى كده بفرح فى يوم معين من السنه رسول الله وصحابته مكنوش بيفرحوا فيه؟
؟؟؟؟؟؟؟؟؟
المهم اهو عيد الام زى كده
الناس وافقت واقترحت يوم 21 مارس علشان بداية فصل الربيع
مش معنى كده اننا نعق امهاتنا طول السنه ما عدا يوم واحد
اللى يقول كده يبقى متخلف
زى ما حصل بالنسبة ليوم الارض ويوم نكبة فلسطين ..ويوم اليتيم ..ويوم عيد العمال
ويوم عيد الطفوله ..الخ
ايه اللى يمنع اننا نخلى كل ايام السنة اعياد ..ده يضايق في ايه؟
فرق كبير بين عيد الفطر والاضحى وبين اى يوم او عيد اخر بنحتفل بيه
اولا عيدى الفطر والاضحى الاحتفال بهما واجب شرعا..لذلك يحرم الصيام فيهما
ثانيا : انكارهما انكار معلوم من الدين بالضرورة ..يخرج المنكر عن الملة
اما الاعياد الاخرى او الاحتفالات الاخرى
لا يعتقد مسلم بوجوبها على الناس وإلا كان ذلك عبادة لغير الله
وانما الناس يحتفلون بها من باب الاباحة وعدم ورود نص بتحريمها
هذه الايام ايام عادية ..فلا يجوز تشريع عبادة مخصوصة بها ولا معاملة مخصوصة مخالفة لاى عبادة او معاملة فى الاسلام يأتيها المسلم فى اى يوم اخر..ولا يباح فيه ما حظره الشرع بنص عرف تحريمه او منعه الشئ..يوم عادي يعني
العقيدة سليمة
العبادة والمعاملة سليمه لا تعدي على حرمات الله
يبقى نسيب الناس تفرح
وموضوع فكرة الاحتفال او اليوم كان فكرة فرعونية او مجوسية او لزيد او عبيد ..فلا يجب ان ننسى ان الاسلام اقر امور كانت موجودة فى الجاهلية ولم يغيرها لتوافقها مع الشرع رغم اصلها الوثني نسبة الى مصدرها
منها الاشهر الحرم ..رغم ان منها اشهر ليس فيها شئ من اعمال الحج مثل محرم ورجب
وفي المعاملات هناك الرهن وبيع السلم والقسامة ومراعاة الكفاءة بين الزوجين، وفرض الدية على عاقلة القاتل وبناء الإرث والولاية في الزواج على العصبة
نقول كمان ..الدنيا ربيع والجو بديع
قفلي على كل المواضيع
قفل قفل
الله يرحمك يا سعاد حسني وصلاح جاهين ..وتقريبا الملحن مات برضه الله يرحمه
ملحوظه لذوي العقول المزنقوه : مش معنى اني بترحم على حد ان كل حاجة عملها بتعجبني ..ولا ايه؟
كل سنة وانتم طيبين بمناسبة الربيع
والمتشددين كل سنه وهم طيبين بمناسبة يوم اليتيم 4 ابريل
التوقيع : الباحث عن الحقيقة