Monday, January 14, 2008

القانون الأول لنيوتن

طلعت فوق السطوح هز الهوا كمى .... يوميها العشوة باظت و كلت علقة من أمى
_________
ا
طبعا كلنا فاكرين العالم الكبير إسحق نيوتن لما كان قاعد تحت شجرة تفاح و راحت سقطت عليه تفاحة سقوطا حرا .. فراح بعدها ضارب التلات قوانين المشهورين بتوع الحركة .. الحكاية اللى جاية دى بقى أنا كنت أتمنى إن السيد نيوتن يكون عايش عشان يشهد بعينيه و يسمع بأذنيه الدليل العملى لفشل القوانين بتاعته


------------------


كان يا مكان .. من سالف العصر و الأوان .. كان فيه زمان واحد اسمه ابو العساقيل .. و كان لسة فى سنة خمسة ابتدائى


أبو العساقيل دة فى مرة أمه بعتته يجيب شنطة فيها شوية حاجات من عند جارتهم "أم خالد" .. أم خالد دى كانت ساكنة فى البيت اللى جنبهم .. و كان أبو العساقيل بيروح لأم خالد عن طريق سطح البيت .. يعنى كان بيطلع الدور الأخير فى بيتهم المكون من ثلاثة أدوار .. و بعد كدة يطلع على سطح البيت عن طريق سلم خشب متهالك شبه السلالم اللى فى لعبة "السلم و التعبان" بالظبط زى دة
و اللى الواحد بيستخدم أطرافه الأربعة فى الصعود و النزول من عليه.. بعد كدة يخبط على شباك "أم خالد" عشان ياخد منها الحاجة اللى أمه بعتته عشانها


و بالفعل.. أبو العساقيل طلع الدور الأخير و بعد كدة طلع على السلم الخشب مستخدما كل أطرافه الأربعة أثناء عملية الصعود .. لغاية ما وصل للسطح و مشى لغاية شباك "أم خالد" و خبط عليه


أبو العساقيل: تك تك تك

أم خالد: أيوة يا أبو العساقيل .. استنى أجيبلك الشنطة

أبو العساقيل: حاضر

أم خالد: خد الشنطة أهى و سلم لى على ماما

أبو العساقيل: حاضر

أم خالد: خد بالك و انت نازل.. أوعى تقع

أبو العساقيل: حاضر


الشنطة كانت شنطة بلاستيك قوية شبه السبت الخوص .. و كان جواها كيس من بتوع الفاكهة القديم اللى شبه شكاير الأسمنت و مش باين فيه إيه جوة الكيس


المهم أبو العساقيل راح لغاية حافة السطح اللى عندها السلم الخشب .. و بدأ ينزل .. ماعرفش .. يبدأ ينزل رجله .. يبقى عايز يسند بإيديه الاتنين على الأرض .. طب يسند ازاى و معاه شنطة ناشفة و حجمها كبير؟؟ و لو ساب الشنطة لغاية ما يسند و ينزل رجليه الاتنين .. هايلاقى نفسه نزل درجتين على السلم و الشنطة ما بقيتش فى متناول إيديه ... طب الحل إيه ؟؟


الحل إنه يسقط الشنطة من السطح على الأرض .. و لما ينزل من على السلم الخشب يبقى ياخدها .. عجبته الفكرة .. راح مسقط الشنطة من على ارتفاع تلاتة متر و عشرين سنتى .. فسقطت الشنطة سقوطا حرا .. و ارتطمت بالأرض بلا ارتداد و لا إزعاج على غير المتوقع .. ما أخدش فى باله .. و راح نازل على السلم الخشب بسهولة مستخدما أطرافه الأربعة كلهم .. و راح التقط الشنطة و نزل بيها شقتهم .. و راح داخل المطبخ .. و ركن الشنطة على جنب .. و خرج ينادى على أمه: يا أمىىىىىىىىى .. أنا جبت الشنطاااااااااااااة .. و حطيتها فى المطبااااااااااااخ


و بعد كدة قعد يكمل مذاكرة على الترابيزة مستنى أمه تجهز العشا للأسرة


قامت أمه بالتوجه للمطبخ لإعداد العشاء .. صوت أدوات المطبخ و تجهيزاتها مسموع كالمعتاد إيذانا فى إعداد العشاء .. و خروشات الكيس اللى شبه شيكارة الأسمنت مسموعة .. و فجأة سكوووووون غريب ... ثم........ العاصفة


صوت من داخل المطبخ: يا لهووووووووووىىىىىىىى .. إيه ده ؟؟ البيض بقى عجة


أبو العساقيل محادثا نفسه: بيض إيه اللى بقى عجة؟؟ .. ثم أنا مابحبش العجة و أمى ما قالتش إنها هاتعشينا عجة النهاردة .. طب هى مخضوضة ليه؟؟ .. و إيه المشكلة إن البيض يبقى عجة؟؟ مش البيض بيتعمل عجة برضه ؟؟


ثم خرجت أمه من المطبخ و علائم الشر و الانتقام على وجهها قائلة: إنت عملت إيه فى البيض يا وااااااااااااد ؟؟
أبو العساقيل: بيض إيه يا أمى ؟؟

أم أبو العساقيل (ما حدش يضحك على المصطلح اللى فات دة): البيض اللى فى الشنطة .. تلاتين بيضة .. بيضة تنطح بيضة

أبو العساقيل: هو كان فيه بيض فى الشنطة ؟؟

أم أبو العساقيل (قلنا ما حدش يضحك):أمال كان فيها إيه ؟؟ انت ما بتشوفش يا أعمى

أبو العساقيل: طب والله ما اعرف إنها كان فيها بيض

أم أبو العساقيل (هازعل أنا من الضحك دة): ا"783خه4لاخهلربهلبعغا9898-34فب8ابعاjiحي983ب "ا

اأبو العساقيل: -----------ا


و توتة توتة .. خلصت الحدوتة


و نستفيد إيه يا أولاد من الحكاية دى ؟؟ نستفيد إنه "يظل الجسم على حالته من السكون أو التحرك بسرعة منتظمة مالم تؤثر عليه قوة خارجية تغير من حالته" و هو القانون الأول للباشمهندس نيوتن


ملحوظة مهمة.. للأمانة العلمية.. التلاتين بيضة مش كلهم اتكسروا .. تسعة و عشرين بيضة بس هم اللى اتكسروا .. و فضلت بيضة واحدة سليمة .. و دى ظاهرة فيزيائية فشل قانون نيوتن إنه يفسرها .. عشان كدة بدأت تظهر نظريات فيزيائية أخرى زى "النسبية " لأينيشتاين .. و "ميكانيكا الكم" اللى أسسها "ماكس بلانك" .. و مازالت حتى الآن الأبحاث دائرة على قدم و ساق لتفسير الظاهرة الغريبة


ــــــــــــــــــــــــــــــــــــــــــــــ


أود أن أتوجه فى النهاية بالشكر للأخت خيخة مش عشان بس هى كانت الزائرة رقم ألف لصفحة البروفايل بتاعتى .. لأ .. كمان عشان هى نبهتنى إن صفحة البروفايل اتفتحت ألف مرة .. يااااااااه يا جدعاااااااان .. مين كان يصدق إن صفحة البروفايل بتاعة بن حجر العسقلانى تتفتح ألف مرة .. و أنا اللى كنت بارقص لما من كام شهر كدة عدد فاتحى صفحتى تجاوز المائة.... إيييييييه .. دنيا


و رئيس مجلس إدارة رابطة العساقيل يود أن يسلم بنفسه هذه الكؤوس للأخت خيخة نظيرا لمجهوداتها الجبارة فى دعم العساقلة فى أنحاء المعمورة



و كل سنة و انتى طيبة يا خيخة .. و عقبال ما تشوفى شريف عريس فى الكوشة
يا جماعة ..يا ريت نروح نهنى خيخة بعيد ميلادها .. و ادعوا لها دعوة حلوة من اللى بتحبوها لنفسكم