Saturday, September 27, 2008

أهي ختمت بحادثة يا مينز ..رداله بالعنجليزي

كله يوسع وياخد جنب
وقال ايه بيقولولي اكتب عن محاسن القاهره
اهي ختمت بحادثة يا رداله
كان يوم ظريف جدا وجميل ومروح بدري ومبسوط علشان خلصت شغل واجازتي هتبدأ وراجع بلدنا افطر مع امي
ونازل من ميني باص الهيئة الاخضر الجميل
وفي عز الهنا ضاع مني الهنا ..واتاريني حاطط رجلي في الهوا يا حبيبي رجلي في الهوا
ووقعت من الميني باص وقبل ما اتنيل اقوم كان المينى باص على مشط رجلي داس
أأن أن آااااااان أأن أن
مين ده اللى كاره دنيتك وبيشتهي موتك ..مين ده اللي موته في كلمتك وحياته في سكوتك
وفي اللحظة دي ظهر سوليمان وقالي مش هتروح يا دالي ..قصدي يا باحث
والنتيجة
الباحث تحت العجل = حقنتين في العضل
انا بإمانه مكنتش اعرف الحقن هاخدها فين بالظبط
لان كان معايا واحد صاحبي هو اللى راح معايا لما كشفت واخد الروشته وسمعت الدكتور بيقوله حقن
رحنا الصيدلية صرفنا الروشته وحاااان موعد الحقن
الباحث : مجدي ..هي الحقن دي فين بالظبط
رمضان : يا عم ماتخافش انت خايف كده ليه
الباحث : استنى انت يا رمضان ..الحقن دي في دراعي يا جماعة صح
مجدي : يا عم قلقان ليه دي الحقن احسن من البرشام
قال يعني الحقن دي بطعم التفاح
المهم وبصيت لقيت الولد اللى هيديني الحقنه بيقولي تعالى جوه
الباحث : طب ما تخلينا هنا واهي اللمة تشجع الواحد
مجدي : يا عم روح مع الراجل
الباحث : مجدي ..هي الحقنة دي بتتاخد فين بالظبط
مجدي : في دراعك بس روح يلا خلينا نمشي
رحت مع اخينا ده وفي حته مدارية ولقيته بيقولي : اقلع
الباحث : اقلع ايه يا عم مانا لابس بنص كم اهو
الولد الممرض : نزل البنطلون
الباحث : بنطلون مين
الولد : خلص بس ما تخافش
وماسك حقنه في ايده سبعة سنتمتر
الباحث : ايه ده كله انت هتديني الحقنة دي كلها
الولد : لا تلاته سنتمتر بس.. ما تخافش انت مش صعيدي ؟
الباحث : وانا علشان صعيدي اعملها غربال يعني ولا ايه
ما علينا وباختصار جزع في مشط الرجل ادى الى تورم
......................
المهم
اشكر كل من علق في بوست ملاحظات قاهرية
قريت تعليقاتكم الجميلة كلها وقلت اعلق سريعا هنا ..ايه رأيكم في الفكرة دي
اولا البوست اللى فات كتبته وتاني يوم ألتقيت بالمدونين في مستشفى ابو الريش
فجايز حصل خلط عند البعض وافتكروني بتكلم عن لقائي معاهم واني نسيت كم كبير من الاخوة المدونين
وانا من موقعي هذا وانا حاطط رجل على رجل لظروف صحية بقول : لا يا جماعة لاااا
ألتقيت بعدد كبير واخوة كتير والفطار الجماعي كان اكتر من ممتاز
اللى لاحظته في لقاءات المدونين انه رغم اننا بنكون بنتقابل لاول مره لكن بيكون فيه ألفة جميلة جدا وكأننا نعرف بعض شخصيا من زمان يعني اللقاءات لم تضف شئ اكتر من معرفة الوجوه
...................
نرجع للقاهرة في بعض المواقف اللي حصلت معايا
موقف ما يعلم به إلا ربنا
أكتشفت اني بعد الضهر لما بيكون عملى وشك على الانتهاء وفي حالة الارهاق اني بكلم نفسي بصوت عالي في الشارع وان ده لفت نظر بعض الناس اللي ماشية في الشارع لاني لاحظت انهم بيعدوا جنبي بسرعة ووشهم في الارض وزي ما يكونوا بيهربوا من حاجه او خايفين من حاجه
ما علينا
كنت مره في المواصلات وقاعد قدامي راجل كده بشوش كده فرحت مفاجئه بالكلام : تتصور حضرتك ان الواحد بقى بيكلم نفسه اه والله
الراجل انفجر من الضحك
..............................
موقف تلقائي
واحدة ست واقفه في الميني باص الهرم وركبت هي وبناتها اطفال صغيرين ووقالت للبنات تدخل جوه وطبعا زحمة فسمعتها بتقول للبنات :لو فيه حد مضايقكم قولولي وانا انزله
بصراحة انا ضحكت للموقف وحسيت ان هي دي الناس الشعبية الجميلة
شوية كده واللى جنبي نزل بصيت لقيتها قعدت في الكرسي جنبي وواحد من قدام امال يناولها في اكياس تحطها على رجلها
فرحت قولتلها بكل عفوية : هو فيه ايه ؟..هو انتى حاطه البنات في ناحية وانتى واقفه في ناحية وكنتى حاطه الاكياس في ناحية تانية انتى اخدتى العربية لحسابك ولا ايه؟
هي : قعدت تضحك وقالت امال لو كنت جبت العيال كلهم دول نصهم بص
انا : والاكياس دي ايه ان شاء الله الله دي حاجة المدارس ولا العيد
وقعدنا نرغي تقولش قاعد بكلم خالتي محاسن
.........................
موقف محرج
في البنك ومعايا ست مواليد سنة 33
جايه علشان تصرف شيك من البنك من حساب احدى المحاكم
المشكلة الاولى : الشيك باسمها الحقيقي الذي يحمل لقب هانم يتفق مع البطاقة الورقية ومخالف للبطاقة الرقم القومي
مديرالبنك بصلي
الباحث : اصل حضرتك ده اسم مركب ولقب والالقاب اتلغت وكده بس انا ممكن اضمنها
وتجاوزنا المشكلة دي باني اوقع ضامن لها
المشكلة التانية : وهى بتمضي كتبت اسمها الاول صح ونسيت اسم ابوها
مدير البنك بصلي وكأنه بيقولي هااا وبعدييين هي ولا مش هي
الباحث : اصل حضرتك دي مواليد 33 يعني لو سألتها انا مين مش هتعرفني..انا مين يا ماما
هي : انت المحامي
الباحث : ( في سري : يادي النيله رحنا في داهية ) شوفت حضرتك قولتلك انها متعرفنيش
مدير البنك :هو مش انت محامي
الباحث : اه بس انا اصل حضرتك اقصد انها متعرفش اسمي وبعدين هي استلمت الشيك من المحكمة ازاي ..هم هناك اتأكدوا يعني انها هي وبعدين انا همضي ضامن عادي يعني
ووقعت مرتين على الشيك اني ضامن للمستفيد واخدتها في ايدي ورحنا نصرف الشيك
الباحث : انتى متأكده يا ماما انك فلانه ..وقعدنا نضحك
..............
بس خلاص كفاية كده اما أروح امرهم رجلي = احط مرهم يعني
كلام في سركم لسه فاضل حقنة في الروشته بس مش هاخدها طبعا
انا مش هعقد كل يوم اوري عضلي للناس باسم الحقن
بالمناسبة انا روحت البلد - اسيوط
كل سنة وانتم طيبين

Friday, September 12, 2008

ملاحظات قاهرية ..>>> يتبع

السلام عليكم
منذ شهر تقريبا وطئت قدمي ارض القاهرة بهدف الاستقرار
وبالفعل اصبحت اعيش بها وبالتحديد الجيزه - اخر فيصل
حاجات كتير في القاهرة لاحظتها ولفتت نظري
فكرت ادون الملاحظات دي
لكن للاسف الكسل جعلنى افقد الكثير وانسى الكثير منها
ببساطة البوست ده قد يراه البعض رخم ..لكن استحملونى لقيتنى مضطر علشان كمان موضوع الاندهاشة الكبرى اللى طول ده
نبدأ ملاحظاتنا في نقاط متفرقة
........
كنت سعيد جدا بلقائى مع المدونين واخص البت خيخة بالتحية والسلام وجوز شرابات
............
الصباغ ..شخص تلقائي وتماما كما تخيلته
............
سووو .. ماندمجناش بالسرعة اللى كنت متوقعها جايز لانه طخين ودخل مطعم مطلعش منه
............
ابو خالد ..هو ده اللى تتمنى يكون صاحبك ..ابوك ..اخوك الكبير.باختصار شخص رائع
............
نهر الحب ..عجبنى هدوء شخصيتها وافكارها
.............
خالد همس الاحباب ..تحس انه اخ طبيعي بدون اى اصطناع
.............
جنه ..صمت يدعو للاعجاب وكلام حين يكون للكلام فائدة
..............
مش فاكر الباقي
.............
ملاحظات قاهرية
اكتشفت ان المسجد اللى بصلي فيه سلفي
واكتشفت كمان انهم بيأذنوا يوم الجمعة اذان واحد ..وزعلت اوى علشان ضيعوا عليا الركعتين بين الاذانين
..............
حرمت اشتري حاجه من بقال ملتحى او مسن تظهر عليه علامات الطيبة
اكتشفت ان البقالين وبائعى الاطعمة في مصر ليسوا سوى ..لصوص
.............
العملة ..رغم ان المصريين بيتعبوا جدا من اجل الحصول على العملة ..لكن اسؤ عملة ممكن تشوفها هى النقود في مصر ..رديئه بشكل مستفز
..................
العملة المعدنية ..ناس كتير مش بتقبلها ومكروهه نفسيا
حد الركاب قال : المشكلة كمان انها تقيله
فقلت في نفسي ..ماهو اللى اخترع الجنية المعدن لو كان بيشيله كان ندم على الفكرة دي
انما اكييييد عمره ما استخدمه بالكتير شاف تصميمه على الورق
...................
العيش غالي في مصر ..بس دى مش مشكلة المشكلة لما يكون حجمه معفرت وردئ
وحشنى خبيزك يامه
.................
رغم الزحام الشديد في القاهرة لكن العجيب انه نادرا ما تلاقي حد بيدوس على جزمتك او يخبط في كتفك وانت ماشي
.................
بائعى المناديل في الشارع : يبقى ماسك باكو المنديل وبيرفعه ناحيتك ويقول : لله
طب يعنى انت بتبيع ولا بتشحت ؟؟؟؟
...............
رغم اني مش بحب النقاب لكن الحسنة الوحيدة اللى شوفتها فيه هو انه حفظ كرامة كتير من البائعات في الشوارع
..............
سيدة عجوز رايحة المنيب ..مشيت معاها وانا بقولها تعالي اوريكي تركبي المنيب منين ..لقيتها زوغت مني
الجبن ده ..يفسر لنا ليه كل واحد بيحب يكون في حالة
.............
لا توجد ثقة بين افراد الشعب المصري ..غالبا
............
البنات ..رغم كثرة الفتيات لكن ادركت سبب العنوسة في القاهرة الكبرى وهو ..لا يمكنك الوثوق باي بنت حتى لو كانت منقبة وتقوم بتعليم الفتيات التجويد في احد المعاهد الدينية المتخصصة
..........
المعاكسات اقل مما كنت اتصور ..وذلك لان العلاقات منتشرة بكثرة
والغريب هو ذلك الرضاء الخفي من الوالدين عن افعال بناتهم او اولادهم
..........
فتيات الطبقة الراقية ..التدين نوع من الكماليات
...........
الريبة والشك وعدم الثقة ..هو ما يجب ان يكون شعارك في العمل وإلا ..هيتاكل على قفاك عيش كتير
...........
فهمت ليه شخصية احدى المدونات التى كنت اعتبرها اخت ..لماذا كل حديثها مادي وعدم ثقة بان هناك من يفكر بالمساعدة لوجه الله
علشان الناس هنا مش بتعمل اي شئ إلا اذا كانت تنتظر مردود مادي حال او ..ولو بعد حين
ومع ذلك فضلت اني اقطع تعاملي معها ..محبش حد يعاملني بالشكل ده
............
سؤال : لغاية دلوقتي بقالي شهر مش لاقي حد اتكلم معاه في موضوعات دينية
هتخنق
فكرت اني ادخل معهد اعداد الدعاه لمجرد اني ألاقي حد اتكلم معاه
ولكن هل تتحول الفكرة لواقع
احتمال ضعيف
..............
حتى الان كمحامي أرفض العمل في الجنح او اي عمل جنائي حتى لا اكون عونا لظالم او مدافعا عنه
ولكن الى متى؟
ومع ذلك لا اعتقد اني سوف استسلم رغم المكاسب المادية التي يحققها العمل في هذا الشأن
...............
الحياة مش سوده ولا هي وردي
في القاهرة ..ألوان اخرى وجميعها لدى الناس .. بيضاء!!!! عجبي
..............
رمضان كريم وكل سنة وانتم طيبين
..............
الحياة ..رحلة الى الله ..الله في كل مكان
الله في كل حياتنا
الله من حولنا
الله معنا
الله في كل عملنا
الله
ولا حول ولا قوة إلا بالله
كل سنة وانتم طيبين