Thursday, October 11, 2007

التدوين ..رسالة

التدوين ..رسالة
السلام عليكم ورحمة الله وبركاته
في اول موضوع في الاستراحة "كاشفة شوب"أحب اتكلم عن : التدوين
أنا معرفش ليه هو وهى وانت عملتوا مدونة ؟ يا ريت اللى يدخل يعلق ابقى يجاوب على السؤال ده
فيه ناس عملت مدونة علشان ..تفضفض فيها ..تطلع اللى جواها يعنى المدونة عبارة عن مساحة للتنفيس عن احاسيس مكبوتة
وفيه ناس عملت مدونة لان عندها فكر ونفسها توصل رسالة للناس
وفيه ناس عملوا مدونات علشان يعبروا عن نفسهم ومن خلال احاسيسهم ومشاعرهم تجاه امور معينة بيوصلوا رسالة للناس
وفي رأيى انا شايف ان التدوين لازم يكون له رسالة وهدف الى جانب انه متنفس شخصى لرغباتنا فى التعبير عن مشاعرنا
ولكن ..هل التدوين قادر على تقديم رسالة فعالة ومؤثرة؟
اعتقد انه لسه بدري ..لكن بالتأكيد نحن نسير فى الاتجاه الصحيح ولكن بخطى ثقيلة والفضل فى ذلك يرجع الى بابا أمن الدولة الذى باضطهاده لبعض المدونات واصحابها لفت نظر الناس والصحافة لما يكتبه المدونون
طول عمرهم كده اذا اعتقلوا واحد بسبب افكاره كان فى اعتقاله شهره اكبر له ولفكره وده دليل انهم مش بيتعلموا من التاريخ
هذا مع نمو الاتجاه بين المدونين الى انشاء اتحاد او تجمع او عمل مؤتمرات كى يظهروا بشكل مؤثر اكبر بين النخبة المثقفة فى البلد
لكن الحقيقة انا لمحت مشكلة هى انانية المدون
انانية المدون ..هى العائق بين التدوين وبين تحقيق رسالته
يعني ايه انانية المدون؟
اولا: بيحصل اثناء تصفحنا اننا نشاهد مدونات محترمة تؤدي رسالة وعايزه توصل فكر وبنمر عليها مرور الكرام وما فكرناش نضيفها فى قائمة المدونات الصديقة ..ده اذا فكرنا نقرأ الموضوع اصلا
افتكرت الاخ المؤرخ محمد إلهامى الذي فوجئت به ضايفنا فى قائمة المدونات العلمية عنده من غير ما يعرفنا بل ولا حتى اذكر اسمه ورغم شعورى بالامتنان له لكنى حتى اللحظه لم اشارك فى مدونته وده تقصير منى
ثانيا: الردود معظم المدونين بينتقل بين المدونات لما بيكون كاتب موضوع جديد فبياخدله لفه على المدونات ويبص نظره عامه ويرد رد عام من غير مناقشة تفاصيل بس عايز يثبت لصاحب المدونة انه قرا الموضوع وفى نفس الوقت هو بكده حقق غرضه الاساسى انه يدعوه الى زيارته
للاسف المدونات غالبا قائمة على تبادل الزيارات من باب المجاملة ..لذلك تخلو التعليقات والردود من المناقشة ..واأسفاه
ثالثا : الاختلاف الفكري أو الشخصي , فأحيانا تتحكم فى تعليقاتنا على بوست عجبنا اهوائنا الشخصية مثلا المدون ده انا اعرفه ومش بحبه يبقى مش هرد عليه أو يبقى بيوصل رسالة وكلمة للناس ورغم ان الخلاف في المنطقة المسموحة لكن للاسف بنتعامل بشكل اناني ويدفعنا هذا الاختلاف الى اننا لا نشارك بتعليق او باضافة المدونة فى قائمة المفضلة
التدوين رسالة
حتى لو كنت عملت مدونة علشان تفضفض فيها فلو سمحت فضفض بإيجابية ..قول كلمة تنفعك وتنفع الناس
الاخوان المدونين
التدوين رسالة ..وكلنا شركاء وملزمون تجاه بعضنا البعض اننا نساعد بعض
ومفيش داعي بقى اقول انى عايز 500 رد على البوست ده ..انا عايز انافس ديفيد سانتوس
وبرايد صاحبة مدونة عايزه تتجوز
تحديث
تفضل علينا الاستاذ عصفور بهذا اللينك للاخ دكتور حر بصراحة موضوع ممتاز التعديلات التدوينية
ولو عايز تستفيد من التدوين عليك وعلى الحاج عصفور المدينة : التدوين

39 comments:

ابن حـجـر الـعـسـقـلانـى said...

أيوة جااااااااااااااااااى

اسكندراني اوي said...

اخي الكريم
ما تقوله صحيح جدا

انا مثلا انشات مدونه في حب اسكندريه
وده كان الهدف الاساسي منها
واغلب المواضيع اللي فيها في حب اسكندريه

ولكن لا يخلو الامر من كام بوست على المستوى الشخصي

او العام

اما من ناحيه باقي كلامك في البوست عن اللي بيعلق من باب المجامله

فده لحد ما صحيح

بس من وجه نظري الشخصيه بيبقى استلطاف للبلوج الي انا بحبه

وعموما ادينا بنشوف ناس محترمين زيك
نقرالهم ونضيفهم
ههههههههههههه
بس على الجوجل ريدر لاني تعبت من اضافه المدونات في لسايد بار

لك كل التحيه

وكل عام وانت بخير

عصفور المدينة said...

خطأ مطبعي زي العادة
استراحة الكاشفة
التصحيح
استراخة الكاشفة
وهنتكلم براحتنا
هنتكلم براختنا

طالما قلت صاخب المخل

والحقيقة ان صاخب المخل اتنين وتالتهم ضرايب المبيعات

عندي تصنيف من ضمن التصنيفات في الدونة اسمه التدوين لو دست عليه حتلاقي كل نقطة من اللي انت اتكلمت فيهم انا رادد عليها بالتفصيل
وأيضا أقترح قراءة هذه التدوينة لأخي دكتو حر
التعديلات التدوينية
بالتعليقات التي عليها
وبعيدن بما أننا شركاء في المدونة اللي هناك أنا عايز نصيبي هنا كمان
بس هاخده ناشف

لما لقيت ابن حجر كاتب هناك وجيت قريت هنا قلت الراجل بقى يعرف يتكلم بالعامية من غير ما يقول
سيدي
أتاري الباحث هو اللي بيتكلم والمقدم كان بن حجر
:)

الباحث عن الحقيقة said...

حاسب يا بن حجر انا شايفك اوعى تلبس الزبون العمه
الضرائب..مصلحتك اولا
هههههه
كل كوباية شاى وراها فاتوره

الباحث عن الحقيقة said...

الاخ اسكندرانى اوى
منور الاستراحة يا استاذنا
واد يابن حجر ..نزل الطلبات هنا على خساب صاخب المخل

انا مش بعيب على البوستات الشخصية
بس انا بقول ان كل مدون لازم يضع فى دماغة انه بيقدم رسالة ويفضفض بايجابية
احنا عايزين المدونة تكون مكان للثقافة والمعرفة مش مجرد تسلية
كمان ياريت نهتم بالبوست اللى بتقراه فى مدونات الاخرين
واللى محتاج نقاش نناقشه ونهتم به
شكرا يا باشا ..وجوجل ريدر اهو حلو برضه يا استاذنا
كل سنة وانت طيب

الباحث عن الحقيقة said...

الاستاذ عصفور
منور الاستراحة يا استاذنا
والكاشفة شوب تحت امرك ابتداء من الشاى ابو 3 مليمات لغاية الكوكتيل ابو 15 مليمات
وبما انك اظهرت نواياك تجاه حقك الناشف
فلا يوجد خصومات ولا عزومات يعنى هتدفع هتدفع يلا هات هات

لعلمك انا عملت الاستراحة دى بجد علشان خاطرك انت وابن حجر
لاحظت اننا عندنا خفة دم عالية كانت بتحاول تقفز فى موضوعات الكاشفة
فقلت لأ
احنا نفتح الاستراحة شوب دى
ونقعد براحتنا
ونفضفض
يعنى الموضوعات اللى بتشغل فكرنا او ملاحظات بسيطة
اى حاجة اى حاجة
تمام كأننا ع القهوة
بالناسبة ..ابن حجر بيقولك يا سيدى
بيقولى انا : عنب
ايه رأيك يا بن حجر فى كذا
يقولى كده عنب
ولما يعجبه حاجه اوى يقول عنب جدا
مووووز
ناقص لما يعجبه بوست يقول البوست ده ورور اوى
هروح اقرأ التدوينات اللى حضرتك اشرت إليها
احسن تسألينى فيها تبقى مشكلة
خد بالك من الاستراحة يابن حجر
قصدى خد بالك من الاستراخة يابن خجر
وكل عام وانتم بخير

Desert cat said...

انا لما عملت المدونة بتاعتى كان للفضفضه بصراحة
انى اى حاجه مضيقانى اكتبها فيها
موضوع المجاملات ده مش بحبذه اوى
يعنى لو حد دخل مدونتى ودخلت مدونته ومش عجبتنى مش برد اصلا
والعكس
يعنى فى ناس انا ضيفه دائمة فى مدوناتهم ومش شوفتليهم رد واحد عندى
وده عادى جدا ولا بيزعلنى ولا بيمنعنى انى ادخل واعلق عندهم تانى
لاننا بشر وطبيعه تفكيرك غير طبيعة تفكيرى وبالتالى مش ضرورى ان اللى يعجبك هو نفسه يكون عاجبنى
تحياتى

الباحث عن الحقيقة said...

الاخت / قطة الصحراء
مياو مياو
قصدى السلام عليكم
فى الحقيقة تصرف حضرتك مع المدونات التانية وتعليقك عليها تفكير يدل على انك انسانة طيبة لان فيه ناس تقولك طول ما فلان ده مش بيدخل عندى يبقى انا مش هرد عنده تانى حتى لو الموضوع عجبنى
شكرا لزيارتك
واتفضلى اشربى حاجه عقبال ما اروح مدونتك اشوف الموضوعات اللى بتكتبيها علشان اعرف ايه اللى مضايقك
اكيد ..اكيد بينسوا يحطوا اللبن فى التلاجة وده اللى مضايقك ..صح؟
نورتى يا فندم

ابن حـجـر الـعـسـقـلانـى said...

يا عم الباحث .. دفتر الفواتير فيه ميت ورقة و بخمسة جنيه.. يعنى الورقة واقفة علينا بخمسة قروش .. يرضيك أحاسب الراجل على كوباية شاى بتلاتة مليم و نتكلف فوقيها شلن .. دة غير الضرايب طبعا ... هو الحالة دى ممكنة و الله بس فى حالة واحدة .. هو اننا نبقى فاتحينها سبيل

--------

يا عم اسكندرانى .. و الله انت اللى آخر احترام ... أيوووووه يا جدعان .. هم دول الرجالة بصحيح

--------

سيدى العزيز عصفور المدينة
:) :) :) :) :)
انا كدة مش هاعرف اقول لك يا سيدى تانى ... كل ما هاكتبها هاضحك ... هاكتبلك "أستاذى" بعد كدة
شكلها كدة هاتبقى ليلة عنب علينا كلنا ان شاء الله و المسائل هاتبقى مووووز

لكن بصراحة .. انا باحب اتكلم باللغة العربية أكتر .. لسانى بينطلق بها أيسر و أسرع من العامية.. عشان كدة ناس كتير بتظن إن دمى تقيل (و دة ما يمنعش إن دمى تقيل فعلا) و معلش بقى أسيبك عشان ورايا طلبات .. أيوة جااااى

--------

أختنا قطة الصحراء ... بصراحة كفاية إنى قرأت فى البروفايل بتاعك الجملة دى
ا" كل أغانى فيروز "ا
و مافيش حاجة تانى تتقال بصراحة .. أنا هاوصى المعلم الكبير بتاع الاستراحة "الباحث عن الحقيقة" يجيب لنا تسجيل بالقسط عشان نشغل عليه فيروز ليل و نهار .. بس انت عليكى الشرايط

Salwa said...

تصفيق .. تصفيق .. تصفيق

بقالي ساعه ومفيش حتى ولا كوباية ميه

نزل مشاريب لكل الموجودين علي حساب صاخب المخل

نتكلم جد
فكرة المدونه رائعه
بالتوفيق إن شاء الله

أما عن سبب إنشاء مدونتي
فليس هناك سبب بالتحديد
هو اللي حصل بالضبط
إني أنشأت المدونه
وقلت هكتب فيها خواطري
وبعدين ذهبت في رحله إستكشافيه للمدونات المختلفه
ووجدت اللي كلها فضفضه
واللي بتتكلم في السياسه
واللي....
وبعدين
نزلوا لنا شاى لأن الكلام هيطول
وبعدين
وجدت أن هتوة كده
وقلت طالما عملت مدونه يبقى أحاول أكتب حاجه مفيده
ولأني كثيرا ما أتأمل في أشياء بسيطه جدا جدا
وأخرج منها في النهايه بأشياء وحكم كبيرة جدا جدا
فقلت أكتب التأملات دي
ولأنها تأملات بتكون طويله
فأنشأت مدونه أخرى لذلك .. لمن يحب أنت يتأمل
لأ .. كده طولت بجد
طيب خلى المشاريب على حسابي وأمرى لله
واهو كله مكسب للإستراحه
المهم
صار عندى مدونتي وإلى الآن لم أكتب شئ من الخواطر التي كنت أريد أن أملأ بها المدونه
أما المدونات الأخرى
فما يعجبني أضيفه للمفضله
وأرد عليه
والبعض أحرص على زيارة مدونتهم
وهم لا يزوروني مدونتي
عادي يعني
الأفكار بتختلف كما قالت قطه الصحراء
المهم كفايه كده مشاريب
سلام بقى

الباحث عن الحقيقة said...

على فين يا اخت سلوى
انتى نسيتى الحساب
امال تطلبى مشاريب من الصبح
ولا هو علشان الافتتاح تقومى بقى شافطه الحساب وتخلعى فى السريع

اقفل الباب يابن حجر
متهيألى فيه كبايات جوه واطباق عايزه تتغسل ولا ايه؟
وعلى ايه احنا مش كنا بنفكر نفتح ركن حريمى ..اتفضل يا عم ادى اللى هتشغله اديها مريلة الشغل وطربيذتين على جنب تقعد فيهم البنات اللى هتيجى
وخد بالك اوعى تقسموا البقشيش سوى وتنسونى

الاخت سلوى
فى الحقيقة انا احييكى على مدوناتك الاتنين فعلا انا حسيت انى امام قلم مدرب وعارف هو بيكتب ايه
ربنا يوفقك
بس برضه فين الحساب

ابن حـجـر الـعـسـقـلانـى said...

معلش يا عم الباحث ..سيبك من حساب الأخت سلوى.. خليها علينا المرة دى بمناسبة يوم الافتتاح.. مع إن الكوبايات كتيرة و نفسى حد يساعدنى

L.G. said...

التدوين
عملت مدونة عشان نفسي أوصل رؤيتي للناس عشان يتقدموا لو عندي معلومة فكرة خليها تطير توصل لأبعد مدى
فضفضة صعب لأنها عامة والفضفضة خاصة تنفيس لأ الناس ذنبها ايه فكر ماشي رسالة طبعا
إن البصر والفؤاد كل ذلك كان عنه مسئولا ألا نحاسب عن كل شئ
التدوين قادر ؟
طبعا بكرة تشوف وبقوة كفاية انه بيجمع أصحاب العقول ووسيلة اتصال سريعة
أمن الدولة : ويأبى الله إلا أن يتم نوره ولو كره الكافرون
أنانية المدون
النهاردة اتعلمت لأول مرة ازاي أضيف مدونة أحيانا تقصير المعرفة التكنولوجية يعوقني
القراءة مشكلة الفاتورة عندي تحد من قراءاتي للمدونات
المناقشة وفكرة جديدة مهمة ولو وجدت الردود قالت اللي عايزة أأقوله بكتفي بهذا ولكن أحيانا يعلق على كلامك بعض من يرفض فكرك بالاساءة ساعتها بفضل أأقرى المدونة عشان أعرف الناس بتفكر ازاي لكن لا أعلق لكي لا أتعرض لكلام يضايقني وهذا حدث لي في أول خوضي لمحيط المدونات
وبرضه للصدق من لا يهتم برأيي ولا يناقشه لا أهتم بزيارته كثيراً الحوار زي البينج بونج تريد معرفة الرد أو تأثير فكرك في الآخرين لتعرف هل أنت على الدرب الصحيح وإن لم تكن كيف تغيره
حاجة كمان المدونات بحر كبير وواسع ولا تستطيع أن تلم بكل ما فيه وكمان أحياناً لا أريد أن أثقل على الناس بالكلام الكثير حتى لو كان مفيد يعني ده موضوع كبير للمناقشة والرد مش حيكون مجرد تعليق حيبقى حوار طويل قد يمل القارئ لذا الايجاز أفضل يعني مثلا
عشان الوقت مقدرتش أزور كل اللينك الموجودة ولا أقرأ كل التعليقات بالتفصيل ولكن قرأتها بعين سريعة فاحصة ان شاء الرحمن حدخل الوصلة وساعتها أتمنى أن أسعد بصحبتكم على النت
خريطة الطريق
من مدونة رئيس جمهورية نفسي الذي علق في مدونتي على غير معرفة مني له الى سلوي ومن سلوى الى الباحث عن الحقيقة وكذلك أخرى هموم الناس قدري
البنزين خلص ومروحة لا حد قال قهوة ولا واحد شاي
يالا بنا نخرج يا مسعد شارع الترماي
كل سنة وانتم بخير عيد سعيد عليكو يعيد كل المواعيد والأهلي حديد

ابن حـجـر الـعـسـقـلانـى said...

الأخت إل جى .. كلامك هادئ و جميل و كذلك مدونتك
لكن هاتمشى على طول ليه بس .. لسة الريس حنتيرة هايغنى

و بمناسبة "حديدية الأهلى" .. أنا بصراحة مش عارف الباحث عن الحقيقة أهلاوى و لا زملكاوى .. هاتبقى كارثة لو طلع أهلاوى .. لأن أنا للأسف زملكاوى .. و طبعا لو يوم الأهلى لعب مع الزمالك أنا هاضطر آسفا إنى آخد اليوم دة أجازة من الاستراحة عشان أحافظ على ماء وجهى لأن النتيجة معروفة مسبقا و ابقى شوف لك حد يا عم الباحث يشتغل اليوم دة بدالى عشان مش هابقى ناقص حرق دم.. و بلاش توزع شربات ورد الله يخليك عشان باتغاظ
و ياااااااه .. فين أيام زمان لما كان لينا وش نقول: الأهلى حديد زمالك سيحه .. حطه فى علبة و راح يفسحه... لكن أيام بقى و راحت لحالها

و شكرا للأخت إل جى اللى قلبت عليا المواجع بملعقة من "حديد"ا

بنات افكارى said...

السلام عليكم
ماشاء الله فكرة جميلة
بس للاسف مش عافرة اندمج معاها
ده على اساس انه لسه ماحصلش فصل
اقصد يعني فين الجانب النسائي
يعني انا شايفة كله سايح على بعضه
ده نظام كوفي شوب ولا ايه ؟
ماعتقدش عموما كل سنة وانتوا طيبين
وربنا يكتر زباينكم يارب
تقبل الله منكم وجعل اعمالكم
هذه فى الموازين ان شاء الله
وبالنسبة لموضوع التدوين
ده موضوع مهم بس انا الحقيقة مش حابة اعملها تخصص بس اكيد فى الاخر
لازم يكون ليها هدف
ولعله فى الخير دائما ان شاء الله
اعانكم الله على خدمة زبائنكم دائما
السلام عليكم

الباحث عن الحقيقة said...

الاخت L.G
انا هبروز الكلمة دى
عملت مدونة عشان نفسي أوصل رؤيتي للناس عشان يتقدموا لو عندي معلومة فكرة خليها تطير توصل لأبعد مدى

بصراحة احنا سعداء اننا اتعرفنا على حضرتك واهلا وسهلا بيكى دائما فى الكاشفة واستراحتها


الاخت بنات افكارى
كل سنة وحضرتك طيبة
واحنا مش هنعمل فصل ولا ركن نسائى لان معانا محرم هو الاستاذ عصفور المدينة
مش شرط المدونة يكون لها تخصص المهم ان كل موضوع يكون بيهدف الى رسالة
حتى لو هذكر موقف شخصى احاول ابرز العبر اللى فيه لان مش كل واحد هيقلاأ قادر على الاستنتاج او انه يتعلم
ممكن يقرأ من باب التسلية
او ما يقراش ويرد مجاملة
ربنا يوفقك
وكل سنة وانتى طيبة

حـريــة الــفـكــر والابــداع said...

حيالك الله اخى الكريم
موضوع اكثر من رائع
وكل عام وانت بالف صحة وسلامة
تحياتى

حـريــة الــفـكــر والابــداع said...

عيد سعيد

الباحث عن الحقيقة said...

اخى من حرية الابداع والفكر
شكرا على تشجيعك
واهلا وسهلا بيك دائما
كل سنة وانت بخير
عيدك اسعد
والمشاريب هنا على خساب صاخب المخل

Human said...

أتمنى أن يخرج التدوين من دائرته المغلقة ..ويصبح له رسالة وهدف واضحين

Té la mà Maria - Reus said...

very good blog congratulations
regard from Catalonia Spain

Ragi said...

عزيزى
كلامك كله صحيح وكلنا نعانى من ظاهرة عدم الاهتمام بالهم العام والاكتفاء بالتعبير عن المشاعر الخاصة والمرور مر الكرام على مدونات الاخرين والتكاسل فى التعليق على التدوين فيها
واشكر لك مبادرتك بزيارتى وكل سنة وانت طيب
نزل مشاريب لكل الزباين على حسابى ومافيش طاولة ولا شطرنج؟

الباحث عن الحقيقة said...

الاخ " هيومن " انسان
فعلا التدوين مازال فى دائرته المغلقة ونقدر نقول انه حركة تثقيفية على المستوى الفردى الخاص
وان شاء الله نرتقى ويكون لنا دور مؤثر فى خدمة المجتمع
واعتقد ان ده بدايته اننا نقدم موضوعات ايجابية تنمى وعى الفرد اولا
تشرب ايه بقى ..ماهو لازم تشرب حاجة

الباحث عن الحقيقة said...

Té la mà Maria
Thank you for your visit us
Take drink, go ahead at our expense

************

الاخ راجى
منور يا باشا وشكرا على ردك للزيارة بشكل سريع
هو انت ساكن قريب من الاستراحة ولا ايه؟
شكرا يا اخى الكريم وكل سنة وانت طيب
ملحوظه : اه مفيش طاولة وكمان التدخين ممنوع

تجمع المدونين الطامحين في وطن عربي بدون سجين رأي واحد said...

اول تجمع حقيقى للمدونين
لاول مرة بالاسكندرية
ملتفى الدفاع عن سجناء الرأى وحقوق الانسان
الخميس القادم الساعة الخامسة مساءا بنادى المحامين بجليم

altwati said...

كل عام وأنتم بخير

Salwa said...

ألف شكر ابن حجر
ماجتش من الباحث
من أولها كده
أمال لما الإستراحه يبقى لها زبون هتعمل إيه
ولما الفلوس تبقى زي الرز
هتعمل اتلدخول بتذاكر ؟
وبعدين أنا تركت الفلوس على التربيزه
إنت بس دور كويس
وبعدين عندي رأي
كل واحد يخدم نفسه
البيت بيتكم يا جماعه
يعني اللي عايز حاجه يقوم يعملها
ويغسل كمان مكان ما شرب
يعني أنا شربت واحد شاي وواحد قهوة
وأديني بغسل الكوبايه والفنجان
الكل يعمل كده
ولا كله على رأس بن حجر
وبعدين الفلوس على التربيزه أهي
وكل اللي قاعدين شاهدين
علشان بس الباحث ما يفكرش إني خرجت من غير ما أدفع
بس لما أبعت لك الضرايب شوف هتعمل إيه؟

ابن حـجـر الـعـسـقـلانـى said...

altwati
و أنتم بالصحة و السلامة
-------------

خلاص يا أخت سلوى ... معلش .. بلاش الضرايب الله يكرمك.. دة احنا لسة بنقول يا هادى

بس حلوة فكرة إن الناس هى اللى تغسل الكوبايات .. فكرة هاتريحنى كتير

و الله لو كل واحد جاب معاه مشروبه من بيته و هو جاى هاستريح أكتر لكن دة ما يمنعش إنه يدفع كام مليم نظير القعدة اللى هايقعدها معانا

و هابقى أطلب من معلمى "الباحث" إنه يكتب قائمة جديدة.. زى ما فيه قائمة "المشاريب" يبقى فيه قائمة "من غير مشاريب".. لكن أعتقد كدة إنه مش هايلاقينى باعمل حاجة فهايرفدنى.. و ربنا يستر

بنات افكارى said...

السلام عليكم
انا جاية اصالح الناس اللي زعلانة
قولت اجي الاستراحة تكون الناس كلها
ريلكس كده علشان يسامحونا على خطا غير مقصود طبعا الاخ الباحث هو اللي زعلان
اعتقد.. اولا حضرتك بتشرفنا بالزيارة دائما ثانيا انا والله وماليكم عليا حلفان مدونة حضراتكم كانت من اول المدونات اللي ضفتها وبعدين جيت ادخل عليها لقيتني ضايفة لينك الاستراحة مش لينك الصحيفة فاشلتها علشان احط لينك الصحيفة بما انها المدونة الرئيسية
وبعد ماشيلتها ايه اللي حصل بقى
ظروف منعتني من المتابعة لحد دلوقتي
وبعدين انا فيه خمس مدونات لاخوة كبار
انا بعتز بيهم جداااااااا ومدونة حضراتكم واحدة من الخمسة فازاي بقى افكاركم مش عجباني يافندم ده احنا لينا الشرف اننا نضيفكم عندنا
شفت بقى حضرتك احنا طلعنا مظلومين ازاااااااي هاتسمحونا بقى؟
هاتسمحونا صح ؟
انا شايفة حضرتك بتقول سماح اهو
طيب الحمد لله معلش بقى اخت حضرتك الصغيرة اللي فى كج ون وهاتسمحها اكيد
وبعدين ماييجي على العيش والملح مع اهل بني سويف والله انا اتحرجت لما حسيت
اننا بنفكرك بايام الجيش
طيب كنا نفكرك بذكريات كويسة
لا حول ولا قوة الا بالله معلش بقى
وبعدين فيه حاجة انا كل زواري اكيد زوار حضراتكم يعني انتوا الكبار احنا لسه ناس على قد حالنا فى التدوين وبنتعلم منكم يعني احنا التلامذة وحضراتكم الاساتذة
ربنا يجعل اعمالكم في
ميزان حسناتكم يارب
ويديم عليكم روح الود
مع الناس دائما ويجعاكم
مسلمين حقا ان شاء الله
كفاية كده علشان اطالت عليكم
ولازم اعرف سامحتونا ولا لأ
ويارب ان شاء الله سامحتونا

السلام عليكم

ftataljanna said...

السلام عليكم ورحمة الله وبركاته

اولا كده اعتذر بجد عن تقصيري وعن انانيتي :)

بس بجد اتمنى كل الناس تقدر انا بمتحن يا جماعة اربع مرات فى السنة امتحانات مووووووووز :) على راى اخونا ابن حجر فيعني الحكاية ضاربة معايا خاااااااالص

وكمان قالبة باكتئاب فمش عارفه اذاكر والامتحانات قربت

ادعولى بجد ربنا يكرمكوا

واقبلوا اعتذارى

اما عن اللى حضرتك كتبته عن التدوين

فاكيد صح

انا من النوع التالت اللى بكتب الى حد ما افكارى الخاصة وفضفضتى بس بصورة عامة يعني على اد ما اقدر بحاول اوصل رسالة

انا من الناس اللى بتفكر كتير يعني طول الوقت ماعرفش اقعد من غير تفكير فبالتالى طول الوقت عندى افكار جديدة اوقات كتير كنت بحس انها مفيدة وكان بيبقى نفسي الاقى مكان اقدر احطها فيه علشان ما تبقاش ضاعت من غير ما تفيد حد ولما اكتشفت حكاية التدوين دى لقيتها زى انقاذ لافكارى اللى بتتولد وتموت من غير ما الاقى مكان يتبناها

كمان ابتديت تدوين زى ناس كتير اوى لما شافوا مدونات الملحدين والعلمانيين واتخنقوا لما لاقوا ناس جريئة فى البطل وحبوا يكنوا هما كمان جرئاء فى الحق

زى ما تقول كده حبيت انى يكون ليا وقفه مع نفسي

التدوين بالنسبة لى حياة كاملة

وهو فعلا حياة لان الافكار دى كلها اكيد ساعدتنى وهاتساعدنى على انى اتغير للاحسن اكيد في يوم من الايام هابقى فتاة الجنة ان شاء الله

انا بقى كده ابقى اكتر واحدة طولت عليكوا هنا اسفة عالاطالة بجد جدا ادعوا لى واعذرونى على تقصيري

اه بالمناسبة انا عملت بفكرة ان كل واحد يجيب مشاريبه معاه وكنت جايبة الكابتشينو بتاعى معايا

بس اسالوا اهل الذكر اهل الاختصاص يعني انا مش عارفه اعمله بوش :))))))))))))))))))

بتعمل الرغاوى ازاى يا استاذ ابن حجر واوعى تقول لى سر المهنة :)))))))))))))

ان شاء الله اواظب على مدونتكوا ان شاء الله وبالذات الاستراحة

ومالوش لازمة فصل القوات هما كده كده مفصولين :)))))))))

بس اخي عصفور محرم ازاى بقاااااااااااااااااااااااااا ؟؟؟؟؟

بجد مدونة لذيذة اوى ويا رب ان شاء الله تفيد

السلام عليكم ورحمة الله وبركاته

وكل سنة وانتوا طيبين :)

ابن حـجـر الـعـسـقـلانـى said...

ياااه .. معقولة .. فتاة الجنة .. أهلا بيكى و كل سنة و انت طيبة و يا رب تكونى حليتى كويس فى الامتحانات
و خدى راحتك فى الاستراحة .. المشاريب أول مرة بيتبقى على حسابنا .. عندنا عصير موووووووووز .. إيه رأيك ؟؟

التمنياوي طه said...

الف مبروك المدونة يا معلمين
انت يابن حجر واحد زبادي خلاط و بلاش الطلب التاني لاني مش هلاقيه عندكوا للاسف :(
و الاهلي حديد برضه
:p

ابن حـجـر الـعـسـقـلانـى said...

هوباااااا .. التمنياوى طه بنفسه عندنا .. ازيك يا تمنياوى .. و إيه أخبار باقى الإخوة .. الخمساوى طه.. و السبعاوى طه.. و التسعاوى طه.. و العشراوى طه.. ماتنساش توصل سلامى ليهم الله يخليك

معلش بقى مش هانقدر ننزل لسعادتك حجر التفاح اللى سيادتك عايزه .. احنا ما عندناش شيشة.. الشيشة دى ممكن تطلبها على قهوة زوزو

و سلام بقى عشان انا نازل رايح لك

و الأهلى حديد.. الزمالك سيحه برضه

Soooo said...

الموضوع ده انا جيت بصيت عليه مره واتنين وتلاته قبل ما افكر اني ادلي بدلوي في الليله دي

شوف ياباشا
اولا انا عن نفسي دخلت عالم التدوين مش لغرض غير اني لقيت اني عايز اتكلم عن حاجات ممكن تكون خانقاني
اكيد باهتم بتفاعل الناس معايا سواءا مدونين او غير مدونين .. واهتمامي بده من منطق اني اشوف وجهات نظر الاخرين بالنسبه للي باتكلم عنه ومناقشتهم فيه بموضوعيه اولا وبمعرفتهم شخصيا لو كانو شخصيات محترمه واكتساب صداقات

لما دخلت عالم التدوين ابتدت دايره علاقاتي وصداقاتي ومعارفي تتوسع تدريجيا وابتدت مفاهيمي لبعض النقط تزيد .. وده طبيعي

تعليقاتي على كلام الاخرين سواءا في مدوناتهم او في مدونتي بحاول على قد ما اقدر اني اقول اللي اعرفه او اتكلم في المفيد
صحيح بيبقى في بعض الاحيان مجاملات .. بس بحاول اني احجمها مابيني وبين نفسي عشان مش هو ده الغرض اللي انا دخلت عالم التدوين ليه

حاجه اخيره بقى
هل انا شايف التدوين رساله وليها دور
ليه لأ
زمان لما الانسان القديم اتعلم ينقش على جدران الكهوف اللي هو شافه وحصل معاه .. دي كانت بداية عالم الفن التشكيلي او بداية عالم الكتابه او بداية عالم المعرفه
لما يتحول الناس اللي عايزه تفضفض او اللي عندها فكر خاص بيها انها تدون افكارها دي ونتناقش فيها بموضوعيه وعقلانيه ومش مهم نتوصل لحل قد ماهو مهم اننا نعرف افكار غيرنا ونتعامل معاهم .. هو ده المكسب من وجهة نظري


الحقيقه موضوع شيق ومن اكتر المواضيع المهمه اللي قابلتني في عالم التدوين لغاية دلوقتي
ارجو لك الاستمرار بقوه في مثل هذه المواضيع
والسلاموووز ختامووووز

allah-slave said...

والله التدوين بالنسبالى تقدر تعتبرو حاجة زي مذكرات شخصية ... ومن رايي زي ما زمان الناس كانت بتحب تكتب مذكراتها الشخصية في اجندات .. دلوقتى بقى التدوين اسهل واكثر راحة وخصوصية

الحاجة التانية انك لو مثلا عايز تتكلم من غير ما حد يقاطعك او يتريق عليك .. .فالتدوين اهم وسيلة ... ووسيلة فعالة جدا

شكرا ليك على (( هرشك )) لهذا الموضوع :)

david santos said...

The regime of Mubarak and his minions is every day to transgress human rights. More than 10,000 Sudanese refugees are arrested and more than 100 have been killed.
Illustrative of the world arrogance and the atrocities committed against the Sudanese refugees by this criminal regime of Bubarak.

EGYPT EYES said...

موضوع جميل جدا فعلا أحييك عليه
أنا بالنسبالي أنشأت المدونه للتعريف بالفكر الأشتراكي وتحسين صورته بس دا مايمنعش أني ساعات بكتب في أشياء مختلفه يعني. وبالنسبه للناس اللي مش بيقروا الموضوع كله ويكتبوا رد عام دول فأنا من رأيي أنهم يوفروا ردودهم والتدوين مش جمايل أعلقلك في مدونتك تيجي تعلقلي في المدونه بتاعتي دا ميبقاش تدوين دا يبقى شات D:
تحياتي

همسة قلم said...

أعجبني الحوار جدا اخى الكريم مهند

شخصية لها ثقل بالفعل عصفور المدينة

بوركتم وبورك قلمكم

واما عن همسة قلم
فأحببت فيها أن تخرج بعضا من هواياتي في تسطير الخواطر والذكريات وقد كان

يعني شخصية أدبية تخرج جزءا اخر غير اسماء شحاتة الصحفية وان كنت ارى ان احيانا تغلب علىّ مهنتي في الكتابة :)

حياكم المولى واستراحة موفقة ان شاء الله

haneen said...

السلام عليكم ورحمة الله وبركاته عليكم جميعاً
عزيزى / الباحث عن الحقيقه - انا اول مره آجى المدونه اللذيذه الجميله دى بس بجد بقالى كتير بحاول ومش عارفه اوصل للموضوعات لغاية اما عثرت النهارده على الموضوع التحفه دا مش مهم ما علينا انا من وجهة نظرى ان الواحد لازم من الاول يخصص نوع الكتابه والتدوين اللى عايز يكتب فيه علشان برضه مش معقوله اكون انا مثلا مصنفه مدونتى على انها سياسيه او دنينيه وبعدين اكتب مثلا مره نكت متهيأ لى تبقى متناقضه شويه لكن ممكن بقى لو انا عندى تعدد للمواهب اعمل اكتر من مدونه واتكلم فى كل واحده منهم على الحاجه اللى انا عايزه اتكلم فيها ساعات اشوف مدونات ملخبطه كده تلاقيها اسلاميه على فكاهيه على سياسيه على اشتراكيه على ملوخيه تحس انك تايه ومش عارف ايه هى اتجاهات اللى انت دخل مدونته تقراها بالظبط لكن ساعات بتعبر برضه عما بداخلنا ولا ايه 000 كل سنه وانت طيب وعام سعيد عليك وعلينا كلنا يا رب تتحقق فيه كل الامانى ويكون ملىء بالصحه والنجاح والسعاده