Saturday, December 22, 2007

مايكروباص .. و عربية نقل .. و توك توك

تحديث متجدد
التحديث السابع
تم إغلاق المسابقة .. و النتيجة خلال ساعات ... ما تقلقيش يا خيخة ... الكلام الجديد بتاعك هانحطه فى الاعتبار

التحديث السادس

كنا خلاص بننهى فى الموضوع .. جات الأخت سلوى نهت علينا ... تسع عشرة عبارة

------------------------

التحديث الخامس

المنافسة اشتدت بعنف .. و شهدت الساحة مشاركات قوية من يوميات عيل مصرى و عليوه و أبو زياد الفاتح و
رئيس جمهورية نفسى و و haneen زُمُرده و appy

لكن قطة الصحراء ... اكتسحت الجميع برصيد ست عشرة عبارة

------------------------

التحديث الرابع

يا هريرة انت بتجيبى حاجات متكررة .. و لجنة التحكيم بترفضها .. عايزين حاجات جديدة .. و ليكى عندنا مصاصة لومبو .. و خدى بالك .. انت لسة متساوية مع الباحث عن الحقيقة .. و كلاكما فى المركز التانى

و بت خيخة و أى كلام أضافت أحلى كلام

و كمان دكتور حر

------------------------

التحديث التالت

قطة الصحراء تساوت فى العدد مع الباحث ... المنافسة أصبحت شديدة .. تسع عبارات لك منهما .. ميييييييين يزووووووود

------------------------

التحديث التانى

الباحث عن الحقيقة اكتسح يا جدعااااااان ... رصيده بقى تسع عبارت يا جماعة .. يعنى من الآخر .. الباحث جالكم .. خبوا عيالكم .. سلام بقى عشان رايح أخبى عيالى

------------------------

التحديث الأول

يتربع الآن على قمة المتسابقين فى المركز التانى الأختان بت خيخة و أى كلام و قطة الصحراء برصيد خمس عبارات لكل منهما

طبعا هاتسألونى مين المركز الأول .. هاقول لكم: طبعا أنا .. لأن انا جايب واحد و سبعين عبارة .. نيا ها ها ها ها (وش بيضحك ضحكة شريرة)ا

ما تقلقوش يا جماعة .. المركز الأول ماعليهوش جوايز .. الجوايز بتبتدى من أول المركز التانى .. يخرب بيتى .. دمى خفيف موووووت و باعرف استظرف .. صح ؟؟؟؟ ناس كتير قالوا لى إن دمى خفيف و باعرف استظرف بس أنا مش مصدق .. لكن يبدو كدة إنى هاصدق

نرجع بقى للموضوع الأصلى و سيبوكوا بقى من الظرف اللى يفقع دة لاحسن الواد بتاع ميلودى تتحدى الملل ييجى هو و البنت اللى معاه .. و لا يا ريت تيجى هى و بلاش هو




من أكتر الحاجات فى اللى بتشد انتباهى و أنا ماشى فى الشارع هى العبارات اللى بيكتبها سواقين المايكروباصات و سواقين النقل و التكاتك (جمع توك توك يعنى) على عربياتهم .. و فى الغالب بتتكتب على العربية من الخلف .. و دة بالتأكيد عشان لما السواق يسبق الناس .. يسيب لهم رسالة وداع.. فارضا عليهم رأيه فى الحياة الذى ضمّنه فى رسالته.. العبارات دى يا إما بتبقى دينية فى صورة دعاء أو آية .. و ساعات بتبقى جملة تحسسك إن اللى بيسوق العربية دة واحد من عمالقة التاريخ و رايح يفتح عكا .. و ساعات تحسسك قد إيه هو غلبان و طالع عينه .. و ساعات بتبقى حمكة مُحكمة مُفحِمة تحس فيها بخلاصة التجربة الإنسانية الشاملة تقولش فيلسوف اللى كاتبها .. و أحلى حاجة بتعجبنى من العبارات دى هى العبارات الرومانسية أو الإنسانية




و آدى العبارات اللى انا جمعتها .. أهى .. زى ما هى .. خام .. من غير ترتيب و لا تصنيف و لا تحليل و لا تعليق




الحلوة تفاحة .. للسفر و السياحة





ادعوا معايا .. اللهم ابعد عنى المرور




لا نار و لا حريق .. شعبان على الطريق




الحلوة مش ورث .. دى جاية بخلع الضرس




توك توك العاصمة




عضة أسد .. و لا نظرة حسد




العظمة لله




أذكر الله




فى رعاية الله



سلام يا صاحبى




فين الصحاب




الفرفورى




الأصلى




طال السهر يا لوا




للبيع .. بعد ما استويت




التعلب الصغير




يقينى بالله يقينى




فالله خير حافظا و هو أرحم الراحمين

ا(و هى العبارة الأكثر انتشارا باكتساح)ا




ا" 9 × الخير = السلامة




زهرة البساتين




أبو تريكة




لا بيهمه حسد .. دة عضه أسد




ما حدش عارف حاجة




الكبير كبير .. و النص نص




ما تبصليش بعين رزية .. بص للى اندفع فيا




بتبص على إيه يا عبيط .. دى عليها أقساط




العجلة فوق المسمار .. و ربك هو الستار




العين صابتنى .. و رب العرش نجانى




الحب كدة




يا رب سترك




البرنس طاهر




طريق السلامة يا أبو شكوكو




أرزاق يا دنيا




اللهم أعطى الناس كل ما يتمنوه لى




أنا زى ما أنا




الغيرة حيرة




نيولوك




طمنى عليك




مسير الزمان يتغير




الإمبراطور




الطيب




يا نور عينى




الحكمدار




من صاحبنا .. صاحبناه




يا صغير على الجراح




زينة الرجال .. الأدب




عمهم .. و حابس دمهم




لو عيشت هاذلكم .. و لو مت ربنا يسهلكم




اللى عنده دم .. أحسن من اللى عنده عزبة




ابراهيم فرنسا .. جاى على الطريق




الجزار




المدمر




و لا يهمنى .. مادام ربنا بيحبنى




الغندورة




تعبت خلاص .. من عيون الناس




معلش .. أصل الحلوة مخطوبة




عتاب الندل .. اجتنابه




نظرة يا عدوى




جديد × جديد .. كله تبع التقليد




عودة الزعيم




ماحدش هايصعب عليا .. عشان مش عايز اصعب على حد

ا(الجملة دى أنا طلعت أجرى ورا توك توك عشان أقراها)ا




الخواجة هو الأساس




كدا رضا




آدى آخرة الشقاوة




يا تهدى .. يا تعدى




الحنش




الإحساس نعمة




كلام الناس هواية .. و ذكر الله كفاية




أعز الناس .. أمى




رئيس المتوحدين

ا(بصراحة مش عارف صاحب العبارة دى يقصد إيه)ا




الصحوبية أمانة .. مش غدر و خيانة







و كفاية بقى كدة عشان خلاص .. عنيا وجعونى و صدعت من كتر البص على العربيات .. بقيت ماشى فى الشارع زى المجذوب .. و كل شوية أطلع ورقة و اكتب اللى باشوفه .. بقيت عامل زى المخبر السرى .. دة غير نظرات الاستغراب اللى باشوفها فى عيون زمايلى لما باسألهم على اللى فاكرينه فى ذاكراتهم من هذه العبارات .. لكن نظرات الاستغراب دى سرعان ما بتتحول إلى ابتسامة واسعة و استحسان و اهتمام مفاجئ بالموضوع




لكن فى النهاية الكلمات دى معبرة جدا ..ربما يجدون فى هذه العبارات السلوى من مآسى الحياة .. و ربما يتلمسون بها الثقة فى النفس .. أو يبحثون عن الأمان الذى ضاع بأيدى أمناء الشرطة و ضباط المرور .. أو يطلبون العون من الله .. أو بغرض الشكوى لشخص غير محدد .. أو ينتقدون حالة الناس الأخلاقية من وجهة نظرهم




يا جماعة .. كل واحد فيكم شاف عبارة من النوع دة على المايكروباصات أو النقل أو التكاتك ..يا ريت يقولها فى التعليقات .. و أنا هاعمل تحديث للتدوينة و أكتبها ضمن القائمة و هاكتب مين اللى بعتها لنا إن شاء الله .. و كل ما تكتب أكتر .. فرصتك فى الفوز تكتر .. بس الجايزة إيه ؟؟ مش عارف بصراحة .. بس هانحاول يكون فيها جوايز .. و ممكن تقترحوا إيه هى الجوايز اللى تتعمل .. ممكن ننزل للكسبان مشاريب مجانا لمدة عشر سنين




ـــــــــــــــــــــــــــــــــــــــــــــــــــ




إضافات الضيوف الكرام




-------




أستاذنا عصفور المدينة




بيحسدوني عليكي وانت سر عذابي

When I grow up I wanna be a rolls royce
عينك يا ظالم



ــــــــــــــــــــــــــــــــــــــــــــــــــــــــــــــــــــــــــــــــــــــــــــ



الضيف no chance




انا بابا يالا




ــــــــــــــــــــــــــــــــــــــــــــــــــــــــــــــــــــــــــــــــــــــــــــ




الأخت عاشقة الفردوس



بتبص على ايه ياعبيط .. الحلوة دى بالتقسيط

امشى بالراحه بالراحه ... خليها ماشيه بتناحه




ــــــــــــــــــــــــــــــــــــــــــــــــــــــــــــــــــــــــــــــــــــــــــــ

melkhouly

جاميكا

المصرى

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

l.g.

اذكر الله

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

أحمد الدرعه

ظلموني في الامتحانات

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

بت خيخة و أى كلام

متبصليش بعين رضيه ....ده أنا طلع عين أمي فى السعودية

الحلوة من حلوان وصاحبها راجل غلبان

الحلوة من دمياط ولسه عليها أقساط

دى قصه كفاح مش جايه على المرتاح

ما تزمروش يا بهايم دا السواق نايم

عفوا السيارة فى التليين .. والسائقة ايضا

ليس لك فى الامر شئ

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

قطة الصحراء

العين صابتنى ورب العرش نجانى

القلب الطيب اوس اوس

عاشق ديانا

ده مش غنى ولا زيادة مال دى جاية بدهب المدام

ادفع الاجرة لو سمحت

عفاريت الاسفلت

يا ناس سيبونى اسدد ديونى

الرايق عمهم

أنت الغالى

اولاد الاكابر

عينك يا ظالم

ياليل يا زمن

امشى ع الطريق بالراحة خلى التويوتا مرتاحه

العالم الله

العوازل لامونى

جننت الاسفلت

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

فارس عبد الفتاح

فكك منى

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

التمنياوى طه

لا تغرك كشخة العيد

ا(يخرب بيت دماغك يا تمنياوى .. شوفتها فين دى)ا

عالماشي كدة

العندليب

احمد الرايق

زغدانة

غزال الوادي

zakzouka و ترجمتها تحتها زقزوقة

احببت السفر من نفاق البشر

و ايه يعني .... المعلم مدلعني

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

الباحث عن الحقيقة

احذر السائق صعيدى

يا ناس يا شر كفاية قر

العين صابتنى ورب العرش نجانى

ارجع يا بابا ..محمد واميرة

راجعة بإذن الله

العربية عليها تار

لتكن مشيئتك

الدلوعة

الكريم لا يضام

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

دكتور حر

اللي جايباه واخداه

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

يوميات عيل مصرى

don't folow me I am lost too

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

عليوه

الباشا

شايفك يا حرامى

هذا من فضل ربى

الدلوعه

الطير المسافر

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

أبو زياد الفاتح

اسدد ديونى .. وبعدين احسدونى

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

رئيس جمهورية نفسى

الدنيا على جناح يمامه

بنزين فى التنك ولا فلوس فى البنك

تيت تيت خلصت فلوسى فى التقسيط

اميره قوص

بص عليه عروسه الدخليه

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

haneen

الحلوه دى من امبابه وموكله الغلابه

ما تبوصليش يا عبيط دا انا جايبها بالتقسيط

مالقيتشى صاحب يتصاحب

ان باض الديك الآخر اوديك

يا ناس يا عسل السريع وصل

طريق السلامه ياأبو آيه

الرب راعى

بكابوزا جه يا ولاد

سولار وربك الستار

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

زُمُرده

حبيبي يا مدلع الاسفلت ولع

قدامي يا اللي انت مش مقامي

فتح عينك تاكل ملبن

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

appy

ارتاحو معروضه للبيع

الحلوة توتا

ــــــــــــــــــــــــــــــــــــــــــــــــــــــــــــــــــــــــــــــــــــــــــــ

سلوى

توكلنا على الله

بسم الله ما شاء الله

صلوا على النبي

طالما قلبك مع الكريم .. تبقى في السليم

بيقولوا عليا شقي وأنا حسن التقي

تكتك الجاهز

الحب المستحيل

عفاريت الأسفلت

الحلوة خوخه جت بعد دوخه

حبايب بابا محمد ومريم

مين اللي ما يحبش فاطمه

( وبالتقصي طلعت بنته اسمها فاطمه )

الطير الحزين

سلام يا صاحبي

الصبر جميل

إحنا الأساس وبنحب كل الناس

دلع البنات

flower

don't forget me

مع السلامه

ـــــــــــــــــــــــــــــــــــــــــــــــــــ




ــــــــــــــــــــــــــــ




ملحوظة مهمة




الموضوع دة نشرناه من حوالى أسبوع لكن شيلناه عشان ننزل الموضوع اللى فات الخاص بالباحث عن الحقيقة لأنه كان لسة راجع من الجيش.. و قبل ما نشيل الموضوع كان فيه ثلاثة تعليقات.. هاكتبهم زى ما هم




-----------------




عصفور المدينة ...




يااه يا احمد انت سبقتني بالموضوع ده انا كنت باحضر له بس كنت باسجل عبارات برضه
بالصوت أول ما اشوفها
طبعا انت حطيت مجموعة كويسة
بس باتأثر أوي بمقولتهم

بيحسدوني عليكي وانت سر عذابي

بس عجبتني أكثر عبارة كاتبها واحد على عربية صغيرة
When I grow up I wanna be a rolls royce





مش فاكر دلوقت ربما ارجع بس عندي خناقة في الصحيفة الكاشفة بعد إذنك




-----------------




no chance ...




خد دى

انا بابا يلا

بتاع خالد صالح فى فيلم تيتو

تحيااااااااااااااااتى




-----------------




عاشقه الفردوس ...




تحديث بسيط بس
الجمله دى
بتبص على إيه يا عبيط .. دى عليها أقساط

مش بتبقى كده دى بتبقى كده

بتبص على ايه ياعبيط .. الحلوة دى بالتقسيط

فيه كتيير والله بضحك وانا فى المواصلات منهم
زى مثلا

ماتبوصوليش بعين رضيه ... كفايه اللى اندفع فيه

امشى بالراحه بالراحه ...خليها ماشيه بتناحه

هفتكر وهرجع تانى

موضوع حلو ومسلى والله



----------------------------------

63 comments:

فرنسا هانم said...

ابراهيم فرنسا .. جاى على الطريق
ايه ده؟؟؟؟؟؟؟
ابن حجر ؟؟؟؟؟؟
من ابراهيم هذا؟؟؟؟؟؟
اهو ابن لفرنسا
يا ويلتى
ياللدمار
لا يسلم الشرف الرفيع من الاذى
حتى يراق على جوانبه الدم
بس بجد
مجهود كبير
اكيد كنت ماسك ورقه وقلم وواقف جنب عسكرى مرور
وطبعا لميت لم
جنب العسكرى
تلم اكتر واكتر

عصفور المدينة said...

عينك يا ظالم

دي مشاركة مني بعد العودة
كل عام وأنتم بخير
بس بعد العودة الموضوع كبر وبقى موسوعة

Anonymous said...

أنا شوفت واحد كاتب
جاميكا

L.G. said...

سلامو عليكم
نعم يستهويني أيضاً قراءة ما يكتب على وسائل المواصلات داخلها وخارجها وتعلمت منها من عربات النقل يقيني بالله يقيني بجد ومن يومها وضعتها مبدأ لي وكذلك دعاء السفر وحفظته من داخل الميني باصات وكذلك المداومة على ذكر الله عندما يلصقون كلمة اذكر الله

Unknown said...

خد عندك دي كمان كانت علي بيجو
"ظلموني في الامتحانات"

tota said...

لفتني اسم مدونتك كتير واما زرتها شدتني بجد حبيت مدونتك قوي حسيتها مختلفه غن المألوف
يارب تكون في تمييز ديماً
دي اول زياره ليا والاكيد انها مش الاخيره
مش هتعزمني علي فنجان شاي بقي؟؟
سلامي ليك

اسكندراني اوي said...

على فكره الظاهره دي مش موجوده غير في مصر
والمصريين الوحيدين الل بيعملو ده بره مصر


بس بجد اكيد تلاقيك تعبت جدا عشان تلم الكم الهائل ده من العبارات

الله ينور

كل سنه وانت طيب

الـسـيـدة نـون said...

 متبصليش بعين رضيه ....
ده أنا طلع عين أمي فى السعودية
 الحلوة تفاحة للسفر والسياحة
 الحلوة من حلوان وصاحبها راجل غلبان
 الحلوة من دمياط ولسه عليها أقساط
 دى قصه كفاح مش جايه على المرتاح
 ما تزمروش يا بهايم دا السوق نايم


معنديش امثال تانية خاصة بالميكروبصات بس لو عايز امثال شعبية انا ممكن اخدمك فى الموضوع ده
وكل بتمنه
اما بالنسبة للجوايز
انا افضل ان الجايزة الخاصة بيا تكون عبارة عن شكولاتاية كبيرة جدا

يلا سلام
اختكم خيخة

Desert cat said...

ازيك يا احمد
هو انت بتيجى بلدنا كتير ولا حاجه
اصلى كل لما امشى فى الشارع عينى تلزق فى جملة منهم
الجمل اللى فاكراها
العين صابتنى ورب العرش نجانى
ودى كانت على جرار زراعى
القلب الطيب اوس اوس
على توكتوك
عاشق ديانا
برضه توكتوك
ده مش غنى ولا زيادة مال دى جاية بدهب المدام
على ميكروباص
العين صابتنى ورب العرش نجانى
اوعدك لما اشوف حاجه تانية ها اجى اكتبها
تحياتى

Desert cat said...

الجملة دى شوفتها جوا ميكروباص
ادفع الاجرة لو سمحت
قال يعنى احنا حنزوغ

Anonymous said...

شوفت واحد كاتب احسن كلمه

المصرى

انا بجد فضلت ساعه افكر في ابعاد الكلمه

melkhouly

فارس عبدالفتاح said...

طبعاً سوف أورد مقولة ولكن بعد أن أوضح أنها لي أنا شخصيا فقد كنت مشارك نسيب عمي وهو شاب سمكري سيارات ومتعلم في نفس الوقت حاصل على لسانس آداب قسم لغة عربية .

وقد شاركته على سيارة أجرة مكروباص داتسون قبل مغادرتي ارض مصر .

فقال لي ماذا نكتب عليها وكان إنسان طيب وليس له في المشاكل مع انه سمكري سيارات وبيلعب بالفلوس لعب .

قلت له اكتب عليها .

((( فكك مني )))

وهذا من قناعتي الشخصية بان أي سواق الشيطان هيلعب في دماغوا ويغلس على السواق بتاع السيارة اللى أنا مشارك فيها سوف تكون ليله ابوه أسود من شعر رأسه .

اهاهاهاهاهاهااهههههههههههههههههههههههههههههههههههه

معلش يا إخواني أنا كنت مقيم في الإسكندرية من 1994 م ، وكنت كل شهر أو خمستاشر يوم اعمل عركه اسيح دم واحد فيه اللى يتغز وللى يحصلوا ارتجاج ويخدلوا خمسة وعشرين غرزه فى رأسه .وللى يجيلوا انفصال شبكي من بنية تلبس فى عينه .

اااااااااااهاهاهاهاهاهاههاهاهههههههههههههههههههههههه

معلش أصل أنا لم رحت إسكندرية لقيت انك إذا تعاملت بعاداتك وتقليدك اللى تربيت عليها في الصعيد مش هتاكل عيش معاهم .

فكنت متخنقش إلا مع الفطاحل بتوعهم تجار الحشيش العيال المتسيطه سواقين المكروباصات الجذرين بيعين السمك .


اهاهاهاهاهاههاهاهاهاهاهاها

وكان ابويا ياعيني كل ما اسيح دم واحد يدفعلوا فلوس يعني كام آلف عشان يتنازل عن القضية .

طب بالنسبة لنا كصعيده الفلوس مش مشكله لان الدم عندنا غالى ومدام انا متعورتش او مرحتش المستشفة فكل اللى يجي فى الريش بقشيش .


العبد لله كان يمشي في الشارع قسماً بالله وما ليكم عليا يمين أنا أو أخواتي .

اتخن شنب مع أنهم معندهم شنبات ، يعملي حساب وانا معدي بس من قدامي يكش يكون الزناتي خليفة بتاعهم .


كانت الستات والبنات هتموت نفسها على العبد لله بس أخوكم صعيدي ملياش فى المشوير ده بس كنت بشوف العجب من النسوان والبنات ..

احكيلكوا حكاية

مره بنت كانت زي القمر كانت لما بتمشي فى الشارع كل اللى فى الشارع يتنح من أول اللي عمره 70 الى 16 سنة .

ومره كانت بتشتري حجات من محمصة قدام القهوة بتاعتنا وأمال تبص عليا وأنا قاعد على القهوه .

بصيت لقيت الواد سامح بتاع المقله جارنا بيشورلي وبيقلي أنا عيزك فكنت مشغول شويه مع الإخوة الصعيده بنلعب دومونو أصلى مكنتش اقعد إلا مع الصعيده بلدياتي .

فرحتلوا بعد شويه لقيتوا بيقولي انت فين ياعم البنت اللي ( عليا ) كانت بتسأل عليك وعيزاك تتجوزها وهي مش عايزه منك أي حاجة .

طبعاً أنا زهلت من كلام سامح لكن بما أني صعيدي كبرت دماغي وبعد كام شهر سفرت ..

اهاهاهاهاهاااااااااااااااااااااااااااااا

أنا اسف على الحكايات دي انتوا اللى فكرتوني بالسواقين والشمحطجية .

الـسـيـدة نـون said...

طب انا عايزة الشكولاتاية بتاعتى بسرعة قبل ما حد تانى يجى ويقلشنى من المركز التانى

اضمن حقى الاول وبعد كدة اللى عايز يكتب حاجة جديدة يكتب براحته

والنبى يابو العساقيل لو البت بتاعة ميلودى جت اندهلى الله يكرمك
علشان كنت عايزة اسالها على حاجة كدة
اوعى تفهمنى صح
انا كنت هاسالها هى بتنفخ فين
متفهمنيش صح تانى
انا كنت هاسالها هى بتنفخ فين العجل بتاعها
علشان عجلتى مفسية وكنت عايزة انفخها
وبالمرة اخد عجلة فرنسا انفخهالها

سلام
اختك خيخة

ابن حـجـر الـعـسـقـلانـى said...

فرنسا هانم

و الله موتينى من الضحك .. أنا ما أخدتش بالى خالص من تشابه الأسماء.. انا كنت مشغول بلم أكبر قدر من العبارات .. و معلش يا ستى .. دى تلاقيها غلطة فى السجلات

بس و الله العبارة دى الواحد ممكن يتأمل فيها كتير جدا .. هذا الشخص ينبه الناس أنه يقوم بعمل على قدر عالى من الأهمية ألا و هو "قدومه على الطريق" و هو شايف إن دة يتطلب من الناس الانتباه بل و ربما التعظيم و الاحترام و المهابة .. و بيدعم دة بانتسابه إلى فرنسا -الدولة- إمعانا فى استثارة الهيبة فى نفوس الآخرين .. طبعا هو بالتأكيد سواق مطحون و طلعان عين اللى جابوه و يا عينى بيلاقى نفسه فى الكلمتين اللى كاتبهم على العربية

اللى قال لى على العبارة دى واحد صاحبى .. هاتلاقيه معلق فوق ..التعليق التالت ..صاحبى دة زعيم كبير من زعماءالدماغ العالية فى البلد .. قعدنا أنا و هو نحلل فى كذا عبارة من اللى فى التدوينة

و الله يا أخت فرنسا أنا سمعت إن أحد الباحثين جمع الكثير من العبارات دى و عمل عليها دراسة اجتماعية و وصل لنتائج مهمة جدا .. نفسى ألاقى الدراسة دى

ابن حـجـر الـعـسـقـلانـى said...

أستاذنا عصفور المدينة

حلوة موسوعة دى .. بس كنا عايزين عبارات تانية منك يا أستاذنا عشان الموسوعة تتسع اتساعا أوسع مما هى متسعاه

ابن حـجـر الـعـسـقـلانـى said...

خولى باشا .. عمى و عم الزعماء العرب و العجم .. و الشرق و الغرب .. و البحر و البر .. و الجو .. دة لو كان فيه زعماء فى الجو (بالتأكيد فيه الزعيم صاحب الطلعة .. بس دة خلينا بعيد عنه) .. منورنا أحلى نور

يا ترى الراجل اللى كاتب "جامايكا" دة يقصد إيه ؟؟ و ليه كاتب اسم بلد أجنبى ؟؟ و هل يعرف إنها فى أمريكا الشمالية؟؟ طب هو ليه عنده الرغبة مجرد ذكر اسم هذا البلد ؟؟

و لا اللى كاتب "المصرى" .. هل بجد هو عايز يعبر عن انتمائه للبلد؟؟ و لا دة اسمه بجد ؟؟ طب دة اسمه و لا اسم العائلة ؟؟ طب ليه مش كاتب حاجة مرعبة زى "الحنش" مثلا ؟؟ يا عم الأسئلة كتير .. و كدة مش هانخلص .. نبقى نقعد سوا نتناقش فى الموضوع دة بالتفصيل و احنا بنشرب الشاى

و خد بالك .. اوعى تزعل فرنسا تانى .. عشان انا طمعان فى كوباية نسكافيه من اللى بتقدمه فى الصالون بتاعها

ابن حـجـر الـعـسـقـلانـى said...

l.g.

يا أهلا يا أهلا

و الله الواحد بيبقى راكب المواصلة من دول و بيبقى مهموم جدا .. و فجأة ألاقى عبارة "أذكر الله" أو "ألا بذكر الله تطمئن القلوب" . بجد الواحد بيستريح كتير

ربنا يكرمك أختنا العزيزة

ابن حـجـر الـعـسـقـلانـى said...

أحمد الدرعه

يا عم كنا عايزين عبارتين تلاتة تانى .. واحدة بس مش كفاية .. مع إنها عبارة بتفكرنى بأيام الامتحانات و الذكريات الأليمة .. لكن والله معبرة جدا

عايزينك بقى و عبارتين تلاتة تانى

و منور يا ريس

ابن حـجـر الـعـسـقـلانـى said...

tota

طبعا نعزم سعادتك على سطل شاى .. مش كوباية واحدة .. دة احنا صعايدة .. و معلمى "الباحث عن الحقيقة" صاحب القهوة كان يجطعنى جطيع لو ما قمناش بواجب الضيافة

بس والله احنا سعداء جدا إن المدونة عجبتك

ابن حـجـر الـعـسـقـلانـى said...

اسكندرانى قوى

هو صحيح .. لو واحد عنده مايكروباص "الترامكو" فى ألمانيا مثلا.. هايكتب عليه إيه ؟؟ أو واحد عنده توك توك فى اليابان هايكتب برضه عليه إيه ؟؟

متهيألى الناس برة بتقدر تعبر عن نفسها بوسائل سليمة .. و مافيش قهر و لا قيود .. اللى عايز يقول حاجة بيقولها و هو مش خايف ... مش هايلجأ لوسيلة غير مباشرة لتنفيس كبته و قهره بحيث إنه يروح يكتب عبارة على وسيلة مواصلات يلتمس فيها أمانه الضائع أو يشكو فيها حاله أو يجد فيها مظهر من مظاهر القوة حتى لو كان بالكلام

بس والله أنا فضلت مصدع شوية كتير من وجع عنيا من كتر البص على العربيات

و كنا عايزين نسمع منك كدة جملتين سكندريتين نضيفهم للموسوعة

ابن حـجـر الـعـسـقـلانـى said...

بت خيخة و أى كلام

يا رافعة معنوياتى .. بصراحة شوية عبارات فى الجون

بس إيه حكاية "كله بتمنه دى" دى .. هى المادة هاتدخل فى الموضوع و لا إيه .. أنا ممكن أنزل لك طلبات على كل عبارة تقوليها

عايزة شلكلكليطة ؟؟ نجيب لك ماشى شلكلكليطاية كبيرة جدا .. بس استنى عليا شوية أوصى فرع الشركة اللى فى غابات أشجار الكاكاو .. و احجز لى شجرتين كاكاو يضربوهم لى فى شلكلكليطاية كبيرة .. و كلها كام سنة و اجيبهالك لغاية مدونتك

و عايزك تتأكدى إنى فاهمك غلط بنسبة مية فى المية .. و أعتقد إن البنت بتاعة إعلانات ميلودى بتنفخ العجلة بتاعتها عند نفس المنفاخ اللى صفوة نفخت عنده عجلاتها

أنا زى ما انت عارفة مهندس اتصالات .. و درسنا فى الكلية طرق صناعة المكونات الإلكترونية لغاية ما ورمنا .. و أكتر مادة كانت بتدخل فى صناعة المكونات الإلكترونية كانت مادة السيليكون

و أرجوكى .. افهمينى غلط

ابن حـجـر الـعـسـقـلانـى said...

هريرة الصحراء

انتى أهو .. فى المركز التانى مع خيخة .. بس خدى بالك .. ممكن بين لحظة و أخرى حد يجيب عبارتين تلاتة و يتقدم عليكى .. مش عايزين كسل .. عايزين تمرينات ليل مع نهار .. قصدى عايزين كام عبارة كدة من بتوع بلادهم

بس بصراحة احنا محتارين لغاية دلوقتى نعمل جوايز إيه .. ابقى اقترحى كدة اقتراحين تلاتة .. يمكن يوجهوا تفكيرنا اننا نعمل جوايز حلوة

و بالمناسبة
أنا -و أعوذ بالله من كلمة أنا- بن حجر العسقلانى الشهير بمحمد

أما الباحث عن الحقيقة هو الشهير باسم أحمد

بس مش فارقة .. أنا و هو واحد .. يمكن ييجى فى يوم من الأيام و يخلينى شريك معاه فى القهوة

ابن حـجـر الـعـسـقـلانـى said...

أبو الفوارس عنترة

أو فارس القومى العربى

أنا ماكنتش أعرف انك ليك فى الجبال علامات على رأى اللمبى

يا عم كدة أنا هاخاف اكلمك ياعم .. هابقى أكلمك من ورا درع واقى .. أو أكون متصل بالإسعاف قبلها

أخاف أقول لك كلمة كدة و لا كدة أروح أنا فيها .. العمر مش بعزأة (بعزقة يعنى من الفعل "بعزق") .. و براحة على اخوانك الكويتيين شوية .. دول مش قدك برضه .. دول أشقاء عرب يعنى و انت أبو العروبة و المفهومية

واحد معسل هنا لابى الفوارس عنترة و صلحه

التمنياوي طه said...
This comment has been removed by the author.
التمنياوي طه said...
This comment has been removed by the author.
التمنياوي طه said...

صباحه قشطة يابو العساقيل
انا مرة شفت حاجة غريبة كاتبها خروف من خراف الخليج من الكويت على عربيته
" لا تغرك كشخة العيد "
و النبي اي حد ليه علاقة بالخرفان يحاول يفهمني يعني ايه عيد
و احلى تحية للبرنس الخولي اللي طال غيابه علينا و عاوزين نشوف سيادته قبل مايروح الهايكست

الباحث عن الحقيقة said...

وسع وسع وسااااااااع
احذر السائق صعيدى
انا مش بهزر
دى عباره كان كاتبها احد السائقين على ميكروباص من اللى هم خط قبلى

اولا ارحب بكل الناس الحلوة اللى شرفتنا منورين فى القعدة تملى
خالتهم فرنسا واختهم خيخة وعصفورهم المدينة وقطتهم الصحراوتية واسندراننيهم الاوى اوى واخلع يا فارس احسن ما تنضرب وانت عارف انا اول واحد هيجرى ..وبعدين مالقيتش غير اسكندرية بلد عمك عصفور ..انت شكلك عايز تضيعنا معاك
واهلا بالدرعة وتوته النوته كاونوته
والزعيمة ال جى والخولى
واهلا يا تمنياوى طه ..انت اللى كنت فين زبيدة سألت عليك كتير
زبيده دى قهوة يا جماعة لان مفيش اصلا بنت ممكن تبصلها وذلك لانه يشمل مساحة مترامية الاطراف يعنى البنت اللى هتبصله عينيها هتزوغ مش هتبقى عارفه تحدد جهة تبص فيها
منورين يا شباب
ابقى فكرينى يابن حجر نكتب على يافطة القهوة : يا ناس يا شر كفاية قر والعين صابتنى ورب العرش نجانى
ارجع يا بابا ..محمد واميرة
راجعة بأذن الله
العربية عليها تار
لتكن مشيئتك
الدلوعة
الكريم لا يضام

Desert cat said...

هييييييييييييييييييه انا كسبت
هات المصاصة لومبو بتاعى
مش حتنازل عنك ابدا
لالالالالا
مش انت
مش هتنازل عن اللومبو ابدا مهما يكون
لو مش لاقيتها ولا يهمك انا بقبل الشيكات ابعت لى هديتى مبلغ وقدره على رقم حسابى

Desert cat said...

انا جبتلك كمان جملة لسه معدية طايره حالا من قدامى على ميكروباص
معلشى بقى اصل مكتبى على شارع حيوى ومن وقت الموضوع بتاعك ده وانا قاعده ضاربه عينى فى اى وسيله مواصلات
عفاريت الاسفلت
دى مش ورث دى جاية بخلع الضرس
يا ناس سيبونى اسدد ديونى
الرايق عمهم
بس انا مش عارفه الرايق دى اسم ولا صفه
لو التوكتوك رجع تانى ممكن اساله
نكتفى بهذا القدر
فين بقى الجاااااااااااايزة يا محمد

Maha said...

هههههههه

يا ربييي .. ضحكت ضحك

:d

Empress appy said...

بجد هايل انا هكتب لك وابعت لك بس يا رب الناس متقولش عليا مجنونه وعادى يعنى هو مين بقى عاقل

الـسـيـدة نـون said...

ابو العساقيل
فهمتك غلط خااااااااالص

اما بالنسبة للعبارات بتاعة الميكروباصات
انا عندى جملة جديدة لانج ماشفتهوش عند اى حد والجملة دى انا ناوية اكتبهاعلى ورقة والزقها على ضهر عربية جوزى لما اتعلم السواقة واخد منه العربية علشان اسوقها
وبما انك غالى عندى اوى فحبيت تكون انت صاحب السبق الصحفى ده وتعرف انا هاكتب ايه
هاجيب ورقة كبيرة واكتب عليها
عفوا السيارة فى التليين والسائقة ايضا
يلا
اهه حاجة جديدة لانج لسه اساسا متكتبتش
بس علشان خاطرك انت خيخة بتضحى

سلام
اختك خيخة

Desert cat said...

وادى كمان توكتوك مكتوب عليه
انت الغالى
وده ميكروباص
الكبير كبير والنص نص
لما اشوف حاجه تانى ها اجى
بس انا لسه مش شوفت اى حافز لحد دلوقتى
هى الجمل دى ببلاش ولا ايه

دكتور حر said...

ربنا يجازيك يا أبو العساقيل على رأي خيخه

منك لله شوهت الراجل حالص

اكتر جمله كنت بشوفها وباضحك عليها قوي

>>
>>
>>
اللي جايباه واخداه

ابن حـجـر الـعـسـقـلانـى said...

عمى و عم عيالى من بعدى و عم جدودى من قبلى معلمى الباحث عن الحقيقة

انت أول ما شطحت نطحت .. تسع عبارات مرة واحدة ... يالا خلى المنافسة تشتد

بس جامدة جامدة جامدة عبارة احذر .. السائق صعيدى دى

أنا هاخش بقى على الناس الضيوف عشان أنزل الطلبات

و آدى الماركات بتاعة الطلبات اللى على الصينية

ابن حـجـر الـعـسـقـلانـى said...

التمنياوى طه

ازيك يا تمن ..عامل إيه من ساعة ما سيبتك من عشر دقايق ؟؟

بس يخرب بيت دماغك .. انت جبت الجملة دى منين .. دى أنا ممكن اقعد أفكر في مدلولاتها كتييييير .. خصوصا لو طبقنا نظرية صاحبنا الفيلسوف اللى بتقول إن مستوى الثقافة و الإبداع فى المجتمع يتناسب بشكل أو بآخر من مفردات لغاتهم .. هانوصل لنتائج هائلة

و لا لو طبقنا قواعد "هيمينيوطيقا النصوص" .. هانحضر رسايل دكتوراة

بصراحة انت فضلت ساكت .. و لما اتكلمت قلت عبارة فى الصميم .. فكرتنى بالحاج أحمد كومبوستيلا

---------------------

هريرة الصحراء

انت قاعدة جنب الشارع الرئيسى .. و يبدو كدة انك هاتكتسحينى من المركز الأول ... و انتى لحد دلوقتى جبتى عبارات كتير (هو بعضها مكرر آه) و شكلك كدة متمرنة كويس و عايزة تحققى رقم قياسى

ثم هو فيه يا جدعان ... انتى عايزة مصاصة لومبو .. و خيخة عايزة شلكلكليطة .. يا جدعان دى مش بقالة .. دى قهوة .. يعنى أجيب لكم شاى سكر برة .. قهوة سكر برة .. و ممكن قهوة بن برة .. و ممكن اعمل نسكافيه برضه بس انتوا شيلوا الكهربا من عليه .. يعنى الحاجات دى كدة ... لكن مصاصة لومبو .. يا خبر يا جدعان

و على العموم يا ستى حفلة توزيع الجوايز لسة فاضل عليها يوم و لا يومين و لا حاجة .. و عندنا مفاجآت إن شاء الله .. و من هنا لغاية يوم التوزيع .. ليكى عندنا تلتميت مشروب فى اليوم مجانا

و لومبو مصاصة .. لومبو
لذيذة لذاذة .. لومبو
بتمزمز مزازة .. لومبو
لومبوووووووووووووووه .. أوه

---------------------

maha

أهلا بيكى .. منورانا فى أول زيارة ليكى
يا ستى ربنا يزيدك انبساط و تضحكى كمان و كمان .. و ابقى شاركى كدة بأى عبارة .. ان شالله حتى "ريان يا فجل" .. دة هايبقى فيه حفلى توزيع جوايز بإذن الله و الحقي لك مركز

---------------------

appy

يا هلا يا هلا .. يا ستى ما تقلقيش .. مش هانقول عليكى مجنونة .. بس انتى هاتيلنا بس كام عبارة كدة و احنا نقول عليكى عاقلة العقلاء

ثم انت لسة قايلة :"يعنى هو مين بقى عاقل" .. يعنى هو الجنون دة حاجة وحشة .. دة الجنون دلوقتى هو عين العقل

و منورانا

---------------------

بنت خيخة و أى كلام

يااه يا أخت خيخة .. عبارة فى الجون .. لأ و جون يتحسب بجونين ... و أشكرك جدا إنك فضلتينا بالعبارة دى .. بس خدى بالك .. قطة الصحراء متفوقة لغاية دلوقتى .. و لازم تشوفيلها حل ... و أنا جاى أهدى النفوس

و أحلى سلام للأخت خيخة صاحبة التضحية الكبرى

و شكرا إنك فهمتينى غلط

---------------------

دكتور حر

حلوة الجملة بتاعتك دى .. و ايه بقى .. هى جملة واحدة و لا إيه ؟؟؟ عايزين الإمكانيات .. حتى تلحق لك مركز عشان تاخد لك جايزة فى الحفلة اللى هانعملها

مستنيينك يا دوك

Unknown said...

موضوع جميل بجد .. فعلا بفضل طول الطريق تسليتى هى الجمل اللى مكتوبة فى ظهر المكروباصات دى

وياااااااااااااما شوفت بعيد عنك

بس اللى شدت انتباهي أوى .. لو عيشت هاذلكم .. و لو مت ربنا يسهلكم هههههههههههههه ده اللى هو غلاسة غلاسة يعنى

لا والتانية بتاعة بيحسدونى عليكى وانتى سر عذابى .. بقيت كل شوية اقولها للبت بنت اختى لما تقرفنى فى عيشتى هههههههه

متتعبش نفسك عشان تعرف تجيب جمل تعالى عندنا فى شارعنا الخنيق واستنى تركب بس حتكسب حاجتين .. الحاجة الأولى هى انك مش حتلاقى حاجة فاضية تركبها .. الحاجة التانية هى انك حتلم جمل كتييييييير اوى تنفعك فى البوست

واقعدوا بالعافية فى مصر
:D

Maha said...

احم أنا أصلا مش في مصر .. عشان كده ضحكت قوي لما قريت العبارات عشان تقريبا مبلحقش أشوفهم في الشهرين اللى بنزل فيهم مصر كل سنة

ولولا إني شفت من سنتين اختراع التوك توك ده في مصر في الأجازة مكنتش فهمت حضرتك بتتكلم عن ايه

:D

يلا كفاية عليا أكون مستمعة ضاحكة :d

القلم السكندري said...

سعيد جدا باكتشاف مدونتكم

تحياتي

ومعلش بقي العبارات اللي عندي انتو اشاء الله جبتوها كلها في ديوان السواقين بتاعكم

تحياتي

Unknown said...

don't folow me I am lost too
كل سنة وانت طيب يا ابو حميد

بنت الصالحين said...

نزلتو البوست ده تانى طيب كويس والله
وكويس انه نزل فى الايام دى
ش عارفه ليه معظم المدونين بيحكو انهم مانبسطوش فى العيد

اللهم اصلح حال المسلمين جميعا
وكل عا وانتم بخير

بس بجد الموضوع ده فيه مجهود كبير

عليوه said...

موضوع حلو وجميل وخد عندك بقه بعض من الكلمات المكتوبه
1- الباشا 2- شايفك يا حرامى دى على تنك البنزين 3-هذا من فضل ربى 4-الدلوعه 5- الطير المسافر
زكفايه كده ولو افتكرت حاجه هرجعللك بوست جميل

حبة حاجات (ايمان) said...

انا اول مره اجى المدونه
ومن الواضح ان المدونه جميله
كل سنه وانت طيب

ابن حـجـر الـعـسـقـلانـى said...

إنسانة

و الله أنا كمان لما سمعت العبارة بتاعة "هاذلكم" دى ضحكت كتير .. الراجل شايل جواه حقد أسود من النوع الغامق من جوة .. ربنا يهديه

طب الشارع اللى عندك مافيهوش حاجة فاضية تتركب .. أمال الناس بتركب إيه ؟؟ الله يكون فى عونك
-------------------
maha

يا ستى أدينا فكرناكى بالفولكلور الشعبى بتاعنا .. و بالتأكيد لما ترجعى بعد كدة هاتلتفتى للعبارات اللى مكتوبة على العربيات و هاتشوفى العجب

و ترجعى مصر بالسلامة إن شاء الله
-------------------
القلم السكندرى

يا عم دة إحنا اللى سعداء جدا بزيارتك .. منورنا يا راجل .. و حلوة حكاية "ديوان السواقين" دى .. ضحكتنى جدا
-------------------
يوميات عيل مصرى

أهلا بيك يا أستاذ أحمد .. و كل سنة و حضرتك مليون طيب

جميلة العبارة بتاعة التوهان دى
-------------------
عاشقة الفردوس

تقريبا مابقاش حد عنده طاقة نفسية تمكنه إنه يتبسط زى زمان .. الإحباطات كتير .. بصراحة حتى لما بنضحك اوقات كتير بنضحك على همومنا

المهم .. سيبك من النكد دة و خليكى فى العبارات الظريفة بتاعة التكاتك
-------------------
عليوة

يا عم شكلك كدة داخل سخن .. حلوين الكام عبارة اللى انت جبتهم دول .. يا عم انت لو شديت حيلك شوية فى كام عبارة تانية هاتحقق مركز بين المتسابقين

و مدونتك جميلة يا عليوة .. الله ينور عليك

-------------------
إيمان .. حبة حاجات

يا ستى نورتينا فى المرة دى ... و يا رب ما تكونش آخر مرة

ابوزياد الفاتح said...

موضوعك ممتاز والله
ومدونتك حلوه والله

ممكن اضيف برضه جملع باشوفها كتير

يتهدى ........ يتعدى


اسدد ديونى وبعدين احسدونى

ابن حـجـر الـعـسـقـلانـى said...

أبو زياد الفاتح

يا عم انت اللى حلو والله .. بس يا عم شم كنت تجيب عبارات مش متكررة .. انت جبت عبارتين .. واحدة متكررة و التانية جديدة .. و أنا أضفت الجديدة للتدوينة .. لو رجعت للتدوينة هاتلاقى إسمك و عبارتك تحته

و ابقى زورنا ياعم من حين لآخر

منور يا فاتح

رئيس جمهوريه نفسى said...
This comment has been removed by the author.
رئيس جمهوريه نفسى said...

خد بقاء يا باشا انافس وبقوه
( الدنيا على جناح يمامه )
(بنزين فى التنك ولا فلوس فى البنك)
(تيت تيت خلصت فلوسى فى التقسيط )
( يا تهدى يا تعدى )
( اميره قوص )مركز فى قنا
(بص عليه عروسه الدخليه )
الف الشوارع وارجع تانى

Hoda said...

السلام عليكم ورحمة الله وبركاته
اخى العزيز/ الباحث عن الحقيقه
كل سنه وانت طيب بمناسبة السنه الجديده ويا رب تكون سنه جديده سعيده علينا كلنا يا رب انا جايبه معايا شوية عبارات كده شفتها بص يا سيدى

الحلوه دى من امبابه وموكله الغلابه
ما تبوصليش يا عبيط دا انا جايبها بالتقسيط
مالقيتشى صاحب يتصاحب
ان باض الديك الآخر اوديك
عضت اسد ولا نظرة حسد
يا ناس يا عسل السريع وصل
طريق السلامه ياأبو آيه
الرب راعى
بكابوزا جه يا ولاد
سولار وربك الستار

وكفايه كده النهارده اروح اشوف وارجع تانى
طريق السلامه يا شربات

حبة حاجات (ايمان) said...

واضح جدا المجهدو المبذول لكتابة البوست دا

وكل سنه وانت طيب

Desert cat said...

بقى انا جملى مكرره
معلشى النوبة مش خدت بالى والله
عموما لن اياس
وخد عندك
اولاد الاكابر
عينك يا ظالم
ياليل يا زمن
امشى ع الطريق بالراحة خلى التويتا مرتاحه
هرجع لك تانى

زُمُرده said...

السلام عليكم
حلوه الحكايه دي
انا كمان بتعجبني عبارات كده
خد عندك
...حبيبي يا مدلع الاسفلت ولع...
...قدامي يا اللي انت مش مقامي...
...فتح عينك تاكل ملبن...

وفي حاجات تانيه بس كتبوهااااااا خلاص

Empress appy said...

اول حاجه لقتها

ارتاحو معروضه للبيع
دى كانت على عربيه نقل
الحلوة توتا
على توكتوك

Desert cat said...

خد كمان
العالم الله
العوازل لامونى
جننت الاسفلت

Unknown said...

حمادة
أنا اسف عل حذفي لتعليقك، وجيت عندك عشان اعتذرلك
حقك علي جدا ويارب ما تكونش زعلت

ابن حـجـر الـعـسـقـلانـى said...

أستاذ أحمد
اعتذار حضرتك دة شىء كبير جدا .. و الله مافيش حاجة تستوجبه ..الموضوع عادى جدا والله

بل أنا الذى أعتذر .. ربما تطرقت لأشياء لم يكن ينبغى أن أتطرق إليها .. أنا آسف

على العموم أرجو انك ما تنساش الحفلة خلال يوم بإذن الله .. عندنا جوايز لكل الناس

سلوى said...

لسه في مكان ؟
معلش جيت متأخر
طيب في وقت ؟
يعني ممكن أشترك ؟
ممكن صح ؟
ابن حجر بيقول ممكن
المهم دي بعض العبارات
****************
توكلنا على الله
بسم الله ما شاء الله
صلوا على النبي
طالما قلبك مع الكريم .. تبقى في السليم
يا ناس يا شر كفايه قر
ماتبصوليش بعين رضيه .. شوفوا اللي اندفع فيا
العين صابتني ورب العرش نجاني
بيقولوا عليا شقي وأنا حسن التقي
تكتك الجاهز
الحب المستحيل ( كاظم وكده يعني )
عفاريت الأسفلت
الحلوة خوخه جت بعد دوخه
حبايب بابا محمد ومريم
مين اللي ما يحبش فاطمه ( وبالتقصي طلعت بنته اسمها فاطمه )
الطير الحزين
سلام يا صاحبي
الصبر جميل
إحنا الأساس وبنحب كل الناس
دلع البنات
flower
don't forget me
مع السلامه


جبت لي حول يا بن حجرررررررررر

الـسـيـدة نـون said...

لقيت يوم الخميس اللى فات وانا فى وسط البلد
عربية نقل مكتوب عليها
ليس لك فى الامر شئ
او هل لك فى الامر شئ
مش فاكرة اوى بصراحة
ها انا كدة اكسب ولا فى حد تانى كسب
انا عايزة شكولاتة كتييييير اوى

اختكم خيخة

التمنياوي طه said...

مساؤه عناب يابو العساقيل انا جايبلك كام عبارة عالماشي كدة
العندليب
احمد الرايق
زغدانة
غزال الوادي
zakzouka
و ترجمتها تحتها زقزوقة
احببت السفر من نفاق البشر
و ايه يعني .... المعلم مدلعني
و برضه و انا جاي من شوية شفت عربية ميكروباص ابيض في احمر مكتوب عليها
وزارة الصحة و السكان

Unknown said...

ههههههههههه
يا خبر ابيييييض
ان تعبت من الضحك
فاتتنى المسابقه دى بجد
ده انا عندى اجنده بجمع فيها الحاجات دى
ههههههه
اصل اختك وخداها هوايه وشعبطه فى الميكروباصات
بس جميله والله تسلم ايدك
اول مره ادخل مدونتك الحقيقه
وان شاء الله اجى اتلامض عندك تانى

šσяšαяαα said...

السلاااااااام عليكمممم

ايه الاستراحة الجميلة دى كانت تايهة عنى فين

والله انا فرحت اوى انى دخلت هنا واتعرفت على المدونة دى

تسلمو يارب وان شاء الله انا متابعاكم على طول

وانا كمان على فكرة بحب اشوف ايه اللى بيتكب على العربيات والتكاتيك:)

كان مرة مكتوب
عملنا اسد احترمونا
عملنا عصفورة كالونا
بالظبط دا للى كان مكتوب:)
حتى عجبتنى اوى حسيت انها حكمة من حكم الزمن وكتبتها على طول عالموبايل

كان نفسى ادخل المسابقة دى

ياللا تتعوض ان شاء الله

وسلااااااام

ابن حـجـر الـعـسـقـلانـى said...

لماضة

معلش .. خيرها فى غيرها يا لماضة .. يبدو كدة انك لو كنتى شاركتى كنتى هاتكتسحى الناس كلها .. يا خوفى من الأجندة

على العموم .. نورتينا و الله

ابن حـجـر الـعـسـقـلانـى said...

ŞoŖśậŖấầ

بصراحة .. جامدة العبارة اللى انت كتبتيها دى .. طب العبارة بتقول إنك تبقى أسد و ما تبقيش عصفورة .. انتى بقى تروحى تعملى نفسك صرصارة ؟؟ بس والله الصرصارة لها قدرة عالية على الاختفاء .. و ما بقتش تتأثر ببايروسول دلوقتى

تحياتى لمدونتك الجميلة