Tuesday, February 26, 2008

استنـ .....تـــــــاج





تعلن دولة عسقلانيا العظمى .. دولة المدونين المتحدة .. برئاسة الباشمهندس الدكتور الأديب الفنان العميد اللواء الركن العلامة الفهامة البحاثة الحجة المجدد الشيخ أبى عبد الله محمد بن حجر العسقلانى المصرى الشهير بأبى العساقيل .. أو "عسقول" كما تقول الأخت خيخة.. أو "حجر حجنجر" زى ما بيقول معلمى الباحث.. تعلن عن حاجتها إلى وزراء فى جميع المجالات و التخصصات .. و مش مهم الإمكانيات أو الكقاءات .. أو صبيان أو بنات .. المهم إنك تبقى من أصحاب المدونات .. و لذلك نود أن نعرف اقتراحاتكم يا معشر المدونين فيمن هم أفضل المدونين الذين يصلحون لكل منصب من المناصب التالية




ا
ملاحظات
أ- برجاء ترشيح اسم واحد فقط لكل منصب
ب- ببساطة يا جدعان دة تاج .. يعنى كل واحد ياخد التاج دة و يروح يلعب عند بيته .... قصدى يروح يجاوبه فى مدونته
ج- احنا عارفين أيوة إن التكرار يعلم الشطار .. و أحيانا التكرار يعلم الأبرار .. و ساعات التكرار يعلم الحـ ......ـار .. لكن معلش .. ماحدش يكركر الاسم .. قصدى يكرر الاسم فى أكثر من منصب .. يعنى مثلا لو واحد عايز يبقى وزير خارجية و داخلية و رئيس وزرا يبقى ييجى يقعد مكانى أحسن
د- إللى عايز يزود مناصب يزود براحته .. أنا كتبت المناصب اللى أنا شايفها أهم ... و اللى شايف مناصب تانية أهم يبقى يحطها .. أو لو حد عايز يكرم واحد صاحبه بمنصب جديد .. شغال مافيش مانع .. إن شالله يعمل وزارة لتربية النمل




ا
نخش فى المهم




ا
مين من المدونين يصلح لتولى منصب
ا
رئيس الوزراء فى دولة عسقلانيا العظمى
ا
وزير الثقافة
ا
وزير الإعلام
ا
وزير التعليم
ا
وزير البحث العلمى (أيوة .. البحث العلمى ليه وزارة لوحده)ا
ا
وزير الجامع الكبير (زى شيخ الأزهر فى الدولة الصديقة مصر يعنى)ا
ا
وزير الصحة
ا
وزير العدل
ا
وزير الداخلية
ا
وزير الخارجية
ا
وزير الهجوم (زى الدفاع فى دول تانية يعنى)ا
ا
وزير المواصلات
ا
وزير المالية
ا
وزير الاتصالات
ا
وزير الزراعة

ا



ا
أنا حاولت أجاوب على أسئلة التاج فلقيتها غاية فى الصعوبة عشان كدة هاكتفى إنى أمرر لكم التاج دة و اطلع أنا منها زى الشعرة من العجين
ا
و الله أنا كمان ورايا تلات تاجات ماجاوبتهمش .. واحد من الباحث عن الحقيقة .. و لتانى من فرانسواز هانم و كمان هريرة الصحراء .. و التالت من أحمد الصباغ .. معلش يا جماعة سامحونى .. لما ارجع بإذن الله هابقى أضرب التلات تاجات دول كدة مرة واحدة
ا
فى التاج دة أنا هاعمل زى الزميل المتألق أحمد الصباغ و هامرره لسكان مجرة درب التبانة كلها و هم




ا
الباحث عن الحقيقة – عصفور المدينة – فارس قومى عربى – عيون مصر - إيمان حبة حاجات - جدو – آفاق الحرية – أحاسيس زجاجية – أفكار مبعثرة – لى لى – أبو شنب - إنسانة – أرسم بالرصاص – اسكندرانى قوى – الجعفرى – اليعقوبى – البنات عايزة إيه (لكل المشتركين فى المدونة) – البنت الشلبية – الساحرة الشريرة - العنقاء – بت خيخة و أى كلام – بقت سلاطة - صرصارة – محمد الجرايحى – تلفزيون ملون - مكسرات سيد سعد – أحمد الصباغ – دمعاتى – ربة السيف و القلم – شوية كلام – أبو أحمد – طوق الحرية - سوووو – رئيس جمهورية ذات نفسه – هريرة الصحراء - سلكاوى – عروبة – عين فى الجنة – فرانسواز هانم – فى عالم من الشجن – عمر محمود – فتات من كلام – كدة أو كدة - لماضة – متربية آه معقدة آه برضه – مذكرات عروسة ننوسة – لا للسكوت - وطنى – ولاد النهاردة – مصرى بن بلد - وميض - أمولة – دكتورة أجدع بنوتة – حنين – فتاة الجنة – أهل الجنة - إنسان – ابن همام – ارحم دماغك – استراحة المحارب - الحرية – الدين و الديناميت – الصارم الحاسم – الفجر الباسم قادم – الله غايتى - المنبر – إنها أساطير الخريف – بنات أفكارى – حالة حوار – جنى الجنتين دان – حور الجنة – حى على الفلاح –العائشة فى الأحلام - - دكتور حر – راجى عفو الله – شهاب الأزهر – شهادة لله وحده – صيد الخاطر – صناع الحرية – ضاكتور خالد – طريق المسلم – ظبط دماغك – عصفور بلا أجنحة – فقاقيع كلام – خطاب المصرى - كف – ابن عمر – مهندس مصرى – هكذا علمتنى الحياة فى ظل العقيدة – هكذا حدثتنى نفسى – أحمد منتصر – دنيتى الجميلة – أم أحمد المصرية – عبده – رفقة عمر – القلم السكندرى – قبلة الحياة - عاشقة الفردوس – أنا مسلمة – عاشقة النقاب – ما علينا – طريق الأمل – أريج – يقين النصر – نبض الأمة – حراس الحقيقة – إصرار أمل – داعية المستقبل – همسة قلم – مكان فى القلب – أمة الله - طال الليل - الطائر الحزين - مطرح ما ترسى دقلها - أحمد منتصر - خمسة فضفضة
LG – Appy – noury – Soul.o0o.Whisper – S H E B A K – myfingerprint – rain man – maii bahaa – nigro – light whispering – momkin – Simply sweet – raspoutine - ahmd ebn om ahmd – human – mermaid - mayas




ا
و أى حد يحب يجاوب عليه يجاوب يا جماعة و لو نسيت حد يبقى يعذرنى
ا
مش عارف ليه حاسس إن ماحدش هايجاوب على التاج و شكلى هايبقى وحش فى المجتمع الدولى
ا
نيجى للمهم يا جماعة .. أنا هاستأذن الكرة الأرضية فى إنى آخد أجازة من التدوين .. أنا مش هاقول إن لى أسبابى الخاصة و كأنى رايح أعمل أبحاث سرية .. لأ .. أنا هاخد أجازة عشان ورايا تدريبات كتير عايز أعملها و دى هاتستهلك منى وقت كبير جدا بإذن الله.. بصوا يا جماعة .. أنا شغال مهندس اتصالات .. تخصصى هى التصميم الإلكترونى أو بالإنزليجى
Hardware Design Engineer
دايما فيه جديد و فيه حاجات كتير لازم أتعلمها عشان أحافظ على مستوايا .. كل اللى أنا اتعلمته فى السنين اللى فاتت خلاص استهلكته.. ففجأة حسيت إن الدنيا بتجرى و أنا مكانى .. فقلت أجرى شوية يمكن الحقها ... فادعولى الحقها .. و إلا هابيع بطاطا بعد كدة .. أو أشتغل فى تصميم أفران البطاطا بحكم تخصصى
ا
و أنا عارف إنكم مش هاتقدروا على غيابى عشان كدة ان شاء الله الأجازة مش هاتطول (أنا سامع ناس بتقول يا ريتها تطول فهاعمل نفسى مش سامع) هابقى موجود معاكم فى التعليقات بإذن الله.. و لما ييجى على بالى موضوع حلو و ألاقى وقت .. هابقى أضربه ليكم فى السريع عشان أنا عارف إنكم مش هاتقدروا تعيشوا من غيرى
و ياللا يا جماعة .. أشوفكم أمس




ا
حاجة كدة على جنب: أنا فرحان فيك يا باحث عشان أخيرا هاتسيب ترابيزة المعلم و هاتقوم تخدم على الزباين بنفسك .. و مش هاتلاقى حد تقول له روح هناك و تعالى هنا.. أهو تدوق من الكاس اللى أنا شارب منه لكيعانى .. قوم بقى من على الترابيزة و روح أجرى اشترى طلبات القهوة و ماتنساش تسيأ الأرضية قبل ما تقفل بالليل فى عز التلج بمية ساقعة .. الأرض أنا كنت سايبها بتبرق .. لما أرجع ألاقيها بتبرق برضه
و ياللا .. أشوفك أمس
..............................
بعد اذنك يابن حجر
تنبيه من المعلم الباحث
كله يدخل يبارك للدكتوره ايمان بمناسبة الخطوبة السعيدة

59 comments:

بت خيخة وأى كلام said...

يا تاجاتك يا عسقول
طيب ينفع اخد التاج والعب بيه هنا ولا لازم العب بيه هناك فى مدونتى
اصل انا خايفة العب بيه هناك وازعج جيرانى
عموما والله تاج متكلف صح ولذيذ
هافكر فيه وهارجعلك تانى
بس والنبى يا عسقول مش تغيب علينا
علشان والله انا بقلق على صحابى المدونين لما بيغيبوا
ما بالك انت بقى
ده انت عسقول يعنى مش اى حد
ربنا يوفقك يارب وتوصل دايما للاحسن
سلام
اختك خيخة
هييييه
قلتها صح المرة دى ومتلغبطش
سلام
يا ابو العساقيل
وروح قول لمعلمك انى عايزة سحلب و دومنا

بت خيخة وأى كلام said...

هييييييييييييييييييييه
انا كنت اول تعليق
هييييييييييييييه
مبسوطة اوى
سلام

ابن حـجـر الـعـسـقـلانـى said...

هيه هيه

خيخة أول تعليق ... دة أنا اللى فرحان و الله ... كأنى أنا اللى أول تعليق عندك

لأ .. ما ينفعش تلعبى بيه هنا .. اللى هاشوفه بيلعب هنا ها أرش عليه مية و أغرقه و الكورة لو جت هنا هاقطعها

مش هاغيب .. أنا هاتابع المدونات عادى لكن من غير كتابة مواضيع بإذن الله لغاية ما التدريبات تخلص

أنا لاحظت إنى فى الكام موضوع اللى أنا كتبتهم الأخرانيين أنا كنت بأرد على الناس بعد ما يعلقوا بتلات أربع سنين .. و لقيتنى مش عارف أظبط نفسى تكنيكاللى .. يعنى فنيا :) انزليجى بقى و حركات .. و ربنا يسهل و أظبط نفسى و ارجع لكم يا جدعان

أحلى سحلب و كمان دومنا دوبل .. مع إنى خلاص أخدت أجازة من القهوة ... لكن معلش .. خيخة غالية علينا

أخوكى زكى جمعة

فرنسا هانم said...

وانا بعد خيخه
انا فرحانه برضه
انا وخيخه اخوات

فرنسا هانم said...

شوف بقى يا ابن حجر
كلامك هنا منطقى جدا
وانا معاك واؤيدك
خلى بالك من مستقبلك
ومتنساش اننا مستنينك

قول للمعلم الباحث بقى
يجيب لى شيشه قص
فى الخباثه كده
تحياتى لك
خالتك فرنسا
اه
نسيت
التاج
هو ده تاج ؟؟؟؟؟؟؟؟؟؟؟
ده هيعمل حرب اهليه بين المدونين

عصفور المدينة said...

انت تاني وانا مش مانع الشيشة هنا أي حد يطلب شيشة اطرده برة

شد حيلك ياهندسة

الباحث عن الحقيقة said...

معلش يا جماعة مشغول شويه
تعالى بقى يا حجنجر افندى هات النوته بتاعتك واقعد حاسبنى
ومتنساش تجيب اكياس السكر والكوبايات اللى عاينها عند الحاجة ام العساقيل
وطلع نوته الشيشه على جنب انا عارف انت كنت بتهربها لفارس من زمان
وفين الارضية اللى مسحتها وبتقول بقت مرايه
انا كل ما ابص فيها ألاقيها سوده ولا علشان انا اسمرانى يعنى
ربنا يوفقك يا بطل اهتم بمستقبلك ومتخافش هجيب خيخة وفرنسا يمسكوا ورديتين فى القهوة
بس انا خايف منهم يشفطونى ولا ألاقى سكر ولا شاى ولا كراسى حتى

عاشقه الفردوس said...

ههههههههههههههههههههههههه

والله حرام
ايه التاج الغريب ده

وبعين ايه يااستاذ الباحث
انت داخل شمال كده ليه
انت اللي عليك توضيب القهوه

انت هتشغل خيخه وخالتو ولا ايه
ايه ده


ياابن حجر ربنا يوفقك ايوه كده هو ده الشغل عايزين ناس بتاخد بالها من التكنولوجيا والتطور الزراعي الصناعي

ربنا يباركلكو كلكم وعايزه اشرب حلبه بلبن
او موز باللبن
او فراوله باللبن برده
:))

appy said...

كده طيب انا مدونتى ملغمه اليومين دول ممكن اقعد هنا وبعد اذنكم واحد شيشه وكوبايه شاى هههههههههههههه
ربنا يوفقك ان شاء الله بس متغبش

Desert cat said...

تروح وترجع بالسلامة يا محمد
وما تقلقش خالص على الكافية احنا هنلعب مع بعض وهنكسر لنا قيمة خماشر تماشر كوباية كدا
المهم مش تقلق خالص واحلق تدريباتك اصل مصر بتتقدم بينا
LoooooooL
ابقى طمنا على اخباراتك يا بشمهندس
تحياتى

Bella said...

انا اسمي مكتوب

هههههههههه

طيب

طيب ينفع يعني اختار لنفسي وزارة مش موجودة في الوزارات المذكور عاليه

وصراحة انا شايفة معلش يعني انها من اهم الوزارات ووزارة حيوية جداجدا

طيب انا بس مش فاهمة معلش

وماحدش يضحك لان المفروض الوزرا يكونوا مش فاهمين

هل يعني اجابة التاج معناها اني اقول مين من المدونين ينفع للوزارة الفلانية
ولا اختار لنفسي وزارة واحط برنامج لادارة الوزارة دي ولا ايه الحكاية يعني

ياريت حد يفهمني
اصلي ماليش قوي في شغلانة التاجات دي

وباتهرب منها الصراحة

ههههههههه
وفيه تاجين معلقين في رقبتي من شهور واكيد اصحابهم زعلوا مني

افيدونا افادكم الله

Nigro said...

روح يا أبو العساقيل
انت من الأحرار يا بني
ربنا يوفقك
و يوفق المعلم الباحث في تقضية طلبات الزباين
الزبون دايما على إيه
أيوه .. على قد حاله
إيه التاج الجامد ده؟
انت بتفرقع القنبلة و تجري
مااااااشي

الباحث عن الحقيقة said...

حلبة باللبن
موز باللبن
اسمى مكتوب
وزارات
قنبلة
خماشر تماشر كوبايه
يا ساتر يا رب
ده مقلب تفقعنى بيه يا ابن حجر قبل ما تبتدى الكورسات بتاعتك
ماشى
اما تجينى بس واشوفك
دول زباين دول ولا فتوات

الساحرة said...

كدة يا ابو العساقيل اول تاج يجيلي يبقي صعب اوي كدة عموما عينيه ركز انت في الكورسات
واحنا هنخلي الباحث عن الحقيقه يعتزل
ويقفل الفهوة لحد ما ترجع متتاخرش

MerMaid said...

انا اسمي مكتوب ؟؟؟؟؟؟؟؟؟

طيب الحاااااااااامد لله
العزيز ابن حجر
اشكرك للغاية علي تمريرك التاج لية
و اتمني انك ترجع بسرعة
و متخافش انا هجاوب ع التاج بتاعك ومش هاحرجك ولا حاجة

تحياتي ليك

ammola said...

يعنى انت بتاع التكنولوجيا وسايبنى محتاسة ولايصة؟؟؟؟؟
تصدق ان ده احلى تاج قريته ..على الاقل تدبيسة وحيرشق صح
كنت باحاول آخد كورسات فى التكنولوجيا بس كل ما آجى ابدأنفسى تغم عليا وابقى نفسى فى حاجة حرشة..تعرفش ليه؟؟
على فكرة انا نظرتى ليك حتبدأتتغير...اصلى دايما باشوف بتوع التكنولوجيا دول على انهم ناس غير عادية
ياللا نسيبك بأه تلحق قطرالحضارة احسن ده يادوب طالع م المحطة

فرنسا هانم said...

الدنيا ساقعه بره
والباشمهندس محمد
عصفور المدينه طردنى بره علشان الشيشه
يا جماااااااااااااااااعه
سقعانه
خلاص يابو يحيى
بلاش شيشه
اروح اشربها فى حته تانيه
هههههههههه
وبعدين يا معلم يا باحث
انا مستعده للعمل فى القهوه
بس 3 ورديات يا ناصح
انا وخيخه
وانت
ولا هتعمل علينا معلم
بنت يا خيخه او عى توافقى على ورديتين

ارسم بالرصاص said...

السلام عليكم ورحمته وبركاته
يا رب يوفقك في عملك
ومنتظرين عودتك
إن شاء الله
ودولة حلوة أوي
وشكرا لتمرير التاج
جزاك الله كل خير
والسلام عليكم ورحمته وبركاته
دعواتي
هايدي

L.G. said...

فين التعليق بتاعي
خلاص مش حلعب معاكم
كرسي في الكلوب وسك على المشاريب

جمعاوى روش طحن said...

ابو العساقيل

إنتظر الرد يا مولانا

رئيس جمهوريه نفسى said...

عسقول على راى خيخه حنفتقدك ونفتقد اسلوبك بس مستقبلك اهم تمنياتى ليك بالتوفيق ان شاء الله كمان احلى ما فى التاج انى مفيش رئاسه جمهوريه والا كنت خطفتك لوراء الشمس

nonoymm said...

دة انا اسمي مكتوب
طويب
ليه بس كدة
ماااااااااشي مااشي
تروحوا وتيجوا بالف مليون سلامة
بدعيلكم ربنا يوفقوا يا رب
بس اوعوا تطولوا الغيبة
ومبروك للاخت ايمان
انما ههي مين ايمان مدونة معانا يعني ولا مين
معلش اللي مايعرفك يجهلك
دمتم بخير وسعادة

Soul.o0o.Whisper said...

السلام عليكم و رحمة الله و بركاته

إيه دا يا جماعة ؟؟؟
هو الخبر بقى على القنوات الفضائية و القهاوى كمان؟؟؟

دا أنا بقيت مشهورة بقى على كدا
هههههههههههههه

معلش والله أنا بأعتذر إن دى أول زيارة للاستراحة الجميلة دى
بس لقيت اسمى متعلق على الباب من فوق

احرجتونى يا جماعة بذوقكم والله
طيب معلش .. أنا من هواة القهوة السادة و ساندوتش جبنة
و لا لقيت دى و لا دى فى القايمة ...اهئ اهئ اهئ ...ماليش دعووووووووووة


شد حيلك يا بشمهندس ..مصر محتجالك ، هههههههههههههههه
خدالكام كورس و ارجع بسرعة
منتظرينك


و خالص التحية لمعلمنا الكبير
الباحث افندى
و ماتحرمش من ذوقك ابدا يافندم

Soul.o0o.Whisper said...

بالحق يا ....
بتقول الشهرة ايه ؟؟؟

اه ابو العساقيل ...معلش .. أصل الذاكرة عندى بايظة
جمهورية عسقلانيا عاوزة وزرا

و دا بالانتخاب و لا بالقرعة؟؟
علشان بس يكون عندنا علم بالشئ

مش عارفة والله مين ينفع لايه
بس بما إن سعادتك ادرجتنى فى القايمة

فهحاول القيام بهذا الواجب الوطنى لدولة عسقلانيا العظمى

سمعنى كدا السلام الوطنى؟؟

لالالالا ...كويس خالص
طيب ندور على الوزرا بقى

ابن حـجـر الـعـسـقـلانـى said...

فرنسا هانم

يا سلام يا فرنسا .. أجدعها شيشة و أجدعها معسل قص البرج .. أنا عارف إن مزاجك فى معسل قص البرج .. و أنا اللى هارص الحجر كمان بحكم شغلى كصبى و بحكم اسمى كابن حجر

و ياللا .. خلى التاج يعمل حرب أهلية .. أهو أبيع السلاح اللى مركون عندى فى المخازن
--------------
عصفور المدينة

إيه دة .. حضرتك هنا .. يا نهار مش فايت .. لأ كمان شوفتنى و أنا بارص الحجر .. أنا شكلى بقى وحش .. عديها المرة دى يا أستاذنا .. ثم إن فرنسا خلاص قربت تخلص الحجر
--------------
الباحث عن الحقيقة

أن أن أن آآآآآآآن

جالك الموت يا تارك الصلاة .. انت عايز الحساب و النوتة .. احنا ما اتفقناش على كدة .. احنا اتفقنا أورد لك اليومية بيومها

ثم الحاجات اللى أنا واخدها و مخزنها عند أم أبو العساقيل دى أنا واخدها تخليص حق .. أما ما أخدتش منك أجرة لغاية دلوقتى

و الأرض السودة دى اسودت بعد أنا ما مشيت .. أنا كنت سايبها بيضاء ناصعة .. شوف بقى مين اللى سودها

--------------

عاشقة الفردوس

ربنا يقدرنا و نعمل الكام تدريب دول على خير

و ما تقلقيش ... فرنسا أنا هاحاول أخليها المعلمة بتاعة القهوة .. بس واحدة واحدة

بس احنا ما عندناش موز باللبن .. تاخدى لبن باللبن ؟؟
--------------

Appy

هو إيه الحكاية يا جدعان .. هو الطلب زاد على الشيشة ليه كدة .. طب كنتوا تعالوا قبل ما ييجى أستاذ عصفور المدينة .. أصله رش مية على الفحم و تخلص من المعسل .. آخر حجر ضربته خالتى فرنسا

خدى كوباية شاى بالنوعناع أهى أحسن من مافيش

و ما تقلقوش يا جماعة .. راجع يعنى راجع بإذن الله .. و قاعد على قلبكم
--------------
هريرة الصحراء
بصراحة طمنتينى .. أنا كنت خايف تزودى الكوبايات المكسورة عن تماشر كوباية .. بجد شكرا على كرمك

و يا رب يا معين .. أخلص و أرجع لكم على طول .. و عايز لما أرجع أبقى أشوف كوباية ناقصة .. هاتشوفوا إيه اللى هايحصل .. أنا سخن أنا ولعة
--------------
bella

طبعا اسمك مكتوب .. أمال هانكتب اسم مين يعنى

و التاج دة المطلوب فيه إنك تشوفى مين من المدونين يصلح للمناصب اللى فيه .. يعنى مثلا دكتور حر ينفع يبقى وزير الصحة .. آبى تنفع تبقى وزيرة إعلام .. كدة يعنى

ممكن ترشحى نفسك لمنصب لو عايزة .. بس تدفعى فرق السعر

--------------

nigro

هى فرقعت ؟؟ أصلى ماسمعتهاش .. كنت هربان بعيد

عايزين نشوف بقى اختياراتك إيه خصوصا و انت مش هاتعمل مجلس وزرا .. انت هاتعمل مجلس قيادة الثورة .. انت من الأحرار يا نجرو

ابن حـجـر الـعـسـقـلانـى said...

الباحث عن الحقيقة

يبدو كدة يا باحث إن الناس دى ناوية على شر .. خد بالك من القهوة يا معلم .. دى أموال ناس برضه
---------------------

الساحرة

معلش بقى التاج جه كدة .. بس انتى قدها و قدود .. ما تقلقيش ... راجع يعنى راجع بإذن الله .. بس بلاش تعويذات

نورتينا يا ساحرة
---------------------

mermaid

يا ستى العفو .. أى خدمة .. مستنيين إجابة التاج .. و بجد كنت خايف لاحسن ماحدش يجاوب التاج .. أشكرك على إنك هاتجاوبيه .. مستنى الإجابة بإذن الله
---------------------

ammola
يا خبر محتاسة و لايصة و أنا موجود .. دة أنا يبقى شكلى إيه فى المجتمع الدولى دلوقتى ؟؟

و يا رب تكون فكرتك اللى اتغيرت عنى تكون اتغيرت للأحسن .. و يا خوفى ليكون العكس

بس بجد حاة تسعدنا إن التاج عجبك

بس هو ليه اتن شايفة الناس بتوع التكنولوجيا ناس مش عادية ؟؟
---------------------

فرنسا هانم

معلش يا فرنسا .. مش قادر أدخلك جوة القهوة .. حكم القوى .. بس ممكن تدخلى القهوة من غير شيشة و أنا ممكن أعمل خرطوم طويل و أمده من برة القهوة حيث الشيشة لجوة .. و ماحدش هاياخد باله

و أيوة كدة خليكى واعية .. الباحث ممكن يخليكم تشتغلوا ورديات زيادة .. و ما تغلطوش غلطتى .. انت كل شوية تطالبوه بحقكم و العلاوات و المكافآت و بدلات الهروب من الأستاذ عصفور المدينة
---------------------

أرسم بالرصاص

شكرا على الكلمات الجميلات .. و مستنيين نشوف إجاباتك على التاج و الحمد لله إنه عجبك .. و بجد شكرا على الدعاء

ابن حـجـر الـعـسـقـلانـى said...

ممكن أكمل ردود بكرة يا جماعة عشان حاسس بإرهاق شوية ؟؟

شكرا على موافقتكم

بت خيخة وأى كلام said...

لا ماتخافش مش هاخد التاج تانى
انا بس جاية ادحرج التماسى عليك وعلى معلمك
سلام
اختكم زبيدة العالمة
العالمة ببواطن الامور يعنى
مش العالمة اللى هى بتهز

همس الاحباب said...

جميل قوى المدونة
واللى عاجبنى اسعارك
انا اقفل القهوة عندى
واجى عندك
علشان اشرب شاى خمسينة وكابتشينو منه فيه بس مش عايز شيش
لانى زهقت من دخانها من كتر وجودى فى القهوة
تحياتى ودى اول زيارة وارجو التواصل

همس الاحباب said...

جميل قوى المدونة
واللى عاجبنى اسعارك
انا اقفل القهوة عندى
واجى عندك
علشان اشرب شاى خمسينة وكابتشينو منه فيه بس مش عايز شيش
لانى زهقت من دخانها من كتر وجودى فى القهوة
تحياتى ودى اول زيارة وارجو التواصل

لماضة said...

هههههههههه
انا اتبريت من اسم لماضة خلاص
بس تاج جميل وعاوز مخمخه جامده
ووقت كمان
بس ا عمل حسابك من دلوقتى
انى دبستك فيه

د/اجدع بنوته said...

انا اسمى مكتووووووب

طااااااااااااااايب

اشته

جارى تأسيس الحكومه ياريس

ونشيد الوطنى هيكون ايه بقى

هشتكنا وبشتكنا ياريس ده انت رئيس والنعمه كويس

الله .. الوطن .. الرئيس

تعش جمهورية ابو العساقيل العظمى

؟؟؟؟؟؟؟؟ said...

http://who-is-wael-abbas.blogspot.com/

ابن حـجـر الـعـسـقـلانـى said...

lg
لأ .. أرجوكى .. بلاش الكلوب .. دة عليه رهن .. بس ممكن تكسرى الكرسى .. و خصوصا الكرسى بتاع المعلم

و خدى اللمون دة مجانا
--------------

جمعاوى روش طحن

باشا .. منورنا يا معلم .. شكلك كدة هاتجاوب على التاج إجابات جامدة .. بس حلو لقب مولانا دة .. ينفع و الله
--------------

رئيس جمهورية نفسه

يا باشا سعادتك الريس و مافيش ريس تانى غيرك .. ثم انت بقالك كام سنة فى الرئاسة ... سنة .. اتنين .. تلاتة .. لسة فاضل لك خمسة و عشرين سنة

و معلش أنا مقصر معاك و الله .. بس أن أصلا مقصر فى حق المدونتين بتوعنا .. و الدنيا مكركبة فى نافوخى
--------------

nonoymm

الله يخليكى .. أنا مش هانقطع خالص و الله .. أنا هابقى موجود من حين لآخر .. و معلمى الباحث عن الحقيقة هو اللى هايمسك المدونة بعد كدة ... بس انت نورينا و تابعينا بس و هاتلاقى كل ما يسرك
--------------
Soul.o0o.Whisper

يا خبر معقولة مافيش قهوة سادة فى القائمة .. أزاى .. دة كل القهوة عندنا سادة ... أصلنا بننزلها سكر برة .. و ساعات بننزلها بن برة

و ما تنسيش الواجب الوطنى .. نداء عسقلانيا لازم كلنا نجيبه .. و اللى هايتخلف عن الواجب الوطنى هانحط له سكر فى القهوة

--------------

بت خيخة و أى كلام

تعرفى إن الاهتزاز دة علم لوحده .. بجد و الله .. فى قسم ميكانيكا فى الكلية عندهم مادة اسمها "فايبريشن" و أنا شوفت الكتاب و كان كتاب ضخم بس عجبنى .. عجبنى علميا مش اهتزازيا
--------------

همس الأحباب

عايز شاى ؟؟ و كابوتشينو ؟؟ يعنى نضربهم فى الخلاط ؟؟ طب نحط عليهم سحلب و عصير قصب ؟؟ و لا نكتفى بإننا نضيف عليهم لمون و قرفة ؟؟

نورتنا زيارتك يا برنس ... و بلاش شيشة المرة دى
--------------

لماضة

اتبريتى من اسمك ليه بس يا حاجة ..دة اسم جميل جدا

ثم حرام عليكى تدبسينى فى التاج .. أنا كنت عايش حياتى و كافى خيرى شرى .. أقوم ألاقى التاج لف لف و رجعلى .. ماشى يا ستى .. بس تجاوبى عليه الأول
----------------

دكتورة أجدع بنوتة

و الله ضحكتينى بالقسم اللى فى الآخر دة

يا ترى السلام الوطنى بتاع عسقلانيا .. هايبقى زى السلام الوطنى لجمهورية مالى اللى بيقولوا فيه: و انا مالى و انا مالى و انا مالى ... و انا مالى يا بووووووووى و انا مالى ؟؟؟؟

L.G. said...

على فكرة
الوزارة بتاعتي ابتديت أشكلها من البوست رقم كام وسبعين عندي أو وستين مش فاكرة بس ناس بجد شخصيات عامة وأدي كل واحد وزارة
لكن المدونين
معرفهمش أمسكهم البلد كده هيا ناقصة ياراجل
بالله عليك سيبلي وزارة الزراعة وممكن الاعلام معاهاولا أأقولك الزراعة الزراعة

القلم السكندري said...

لا حول ولا قوة الا بالله

طب ليه الأذي ده بس اللي بتوزعه بالجملة؟؟


عموما ألف مبروك تأسيس جمهورية ابو العساقيل..

وإن شاء الله الحكومة كلها كدة متجمعين في مصايف طرة العظمي برده.. حتي عشان نعرف ناخد وندي مع بعض ونعمل اجتماعاتنا براحتنا

المشكلة بقي في الأخوات لأننا هنفقد اتصالتنا بسجنهم.. لكن عموما ممكن أنا مشتركش معاكم في الحكومة عشان افضل انا برة وانسق لكم الاتصال بين السجنين :)

بالتوفيق في تدريبك ياريس

la3lahakhier said...

السلام عليكم
انا اول مرة ادخل هنا بس مش فاهمة فصة التيجان دى ايه؟
ممكن تفهموهالى
لعلها خير

قبلة الحياة said...

يا ساتر يارب

يا منجي من المهالك يا رب

ايه ده تاج ولا فتنه بلوجريه

انت حطيت التاج وكنت سبب في اندلاع الحرب البلوجريه دي وقلت يا فاكيك وهربت ؟؟

كويس انك استخبيت اليومين دول على ما الحرب تهدا

بجد قنبله فظيعة اللي رميتها دي والله يكون في عون الشعب قصدي المدونين والمدونات

وانا من خلال منصبي هذا اقول ان الاعدام سيفي بالغرض وستكون عقوبه كافيه لسيادتكم يا ابو العساقيل

والله الموفق

تنوية : على السادة المدونين والمدونات سرعه الابلاغ عن المدعو ابو العساقيل وعدم التستر عليه وابلاغ الجهات البلوجريه المختصة
لتنفيذ الحكم

Salwa said...

إيه التاج الصعب ده

وكمان اسمي مكتوب

المهم

ربنا يوفقك وتزداد علما
وتعاصر كل جديد

(تعاصر دي جايه من العصر .. لأ مش أذان العصر
لأ .. عصر الفواكه وكده .. علشان ما تنساش الإستراحه وطلبات الزباين ) ربنا يوفقك


دمت بكل خير

بنوته مصرية said...

ياسلام عليك كل دول وزراء دانت هتقلب نظام الحكم بقي
ههههههههههههههه


رغم اني اسمي مش موجود
بس ان شاء الله هجابه بعد اذنك يعني



ممكن بقي انا اول مرا اجي حد يعزمني علي سحلب بلمكسرات

تحياتي

بت خيخة وأى كلام said...

انتوا فين يا بهوات
والنبى لو عملتوا ايه
هتيجوا برضه ومع كل واحد فيكم الملاية بتاعته

انا مستنياكم
سلام
اختكم خيخة

عابد الرحمن said...

عسقول يا امور
لو عايز وزير فرفور
متنساش اخوك الأمور
عابد السكور
ههههههههههههه
هتودينما في داهية
تحياتي يا ابو العاقيل يا معسقل

مهندس مصري said...

آه
و آهين و تلاتة
أنا جاي اعبر لك عن فرحتي برؤياك قوم الاقيني لابس تاج

حاضر علم و ينفذ يا هندسة

مهندس مصري said...

و ابقى بص على آخر بوست عندي و عايز تعليقك

فارس عبدالفتاح said...

سعادة سمو العميد الركن القائد الفذ والنابعة العلامة والفهامة وحجة المدونبن / ابو العساقيل حفظه الله ورعاه


تحية طيبة وبعد ،


اقدم الى سموكم اوراق اعتمادي الى المناصب التالية


منصب رئيس الوزراء

او وزير الزراعة


او وزير الداخلية

او وزير العدل

او وزير التعليم


اما بالنسبة الى وزارة المسجد الكبير او الجامع الكبير

فانا على استعداد تام ولكن اوضح الى سموكم اني ليست لى اجازات علمية شرعية ولكني اذا تم قبول اوراق اعتمادي الى هذه الوظيفة فسوف اطبق نظام ولاية الفقيه على الطريقة السنية



وتفضلوا بقبول فائق الاحترام والتقدير

مقدمه


فارس عبدالفتاح

قومي عربي

Ahmed Al-Sabbagh said...

شكرا على اللقاء الجميل بساقية الصاوى

تعالى عشان تغطية اللقاء

ايميلاتى اهى

ahmed4u21@yahoo.com

ahmed000eg@hotmail.com


تحياتى

أحمد الصباغ

appy said...

بقولك ايه انا جيت متخفيه كده اشرب حجرين منكن استاذ عصفور المدينه مش هنا
بس بحب النعناع انت عارف
هتخلص ولا اسيح لك واروح اقوله انت اللى قولت ليه تعالى هااااااااااا

أحمد سعيد بسيوني said...

بسم الله
معذرة على التحليق خارج السرب
ولكن
ثورة طنطا في صور - جديد مدونة البحر
مع خالص تحياتي

مروة الزارع said...

اسمى مكتوب

ههههههههههههههههه

احمدك يارب

هعهعهعهعهعهعهعهعهعهعهعهع

ابن حـجـر الـعـسـقـلانـى said...

lg

نفسك فى وزارة الزراعة ؟؟ طب ادفعى المعلوم و احنا نمسكك وزارة الزراعة .. و خدى بالك إن وزارة الزراعة قليلة فى السوق اليومين دول .. و انا كنت شايل حتة كدة للزمن .. لكن برضه انت أخت عزيزة علينا و هانكرمك فيها .. و ممكن نديكى وزارة الإعلام هدية عليها كمان

----------------

القلم السكندرى

انت بتحوقل فى وشى يا راجل .. أنا كدة هاسميك أبو الحواقيل .. و تبقى زيى كدة "أبو العساقيل" .. و نعمل نقابة لكل اللى من عينتنا .. و يا راجل أذى إيه بس .. هو وجودك معانا فى السجن يبقى أذى .. دة يبقى ليا الشرف إنك تشرف على البورش جنبى .. و وقتها مش هانحتاجك برة السجن .. هانحتاجك جوة السجن تنسق العلاقات جوة أحسن من برة
----------------

la3lahakhier

أهلا بيكى يا ستنا فى أول زيارة ليكى عندنا .. التاج دة بيبقى شوية أسئلة تاخديهم تجاوبى عليهم فى مدونتك .. و التاج بتاعنا هو عبارة عن شوية مناصب و عايزين نشوف مين من المدونين اللى انت بتتابعيهم ينفع لها

بس خلاص .. و منورانا
----------------

قبلة الحياة

لااااااا .. أرجوكىىىىىىىىىى .. أنا عايز اعييييييش .. يا ستى بلاش تبلغى عنى الله يخليكى و أنا مستعد أتنازل لك عن منصب رئيس جمهورية عسقلانيا العظمى.. أنا مش قد بتوع الشرطة .. و العمر مش بعزقة .. أنا ممكن أروح جمهورية عسقلانيا الصغرى و اعمل فيها رئيس .. أهو الناس هناك غلابة و سهل احكمهم

أنا مش عارف بس مين اللى فتن عليا و عرفك مكانى .. ما أنا كنت مستخبى لحد الحرب ما تخلص .. آه لو أشوفه .. هاعلقه من رجليه على باب المدونة
----------------

salwa

أنا خفت من كلمة "تعاصر" لأن شكلها كدة من "العصر" اللى بتعمله الشرطة فى الناس .. خصوصا إن الأخت "قبلة الحياة" ناوية تبلغ عنى الشرطة :-) .. و بخصوص القهوة .. أنا خلاص يا فكيك كام يوم كدة .. الباحث بقى هو اللى يشوف طلبات الناس و يعتقنى بقى من المشاوير بتاعة القهوة .. بس الواحد مش بيهرب من قدره .. و راجع يعنى راجع بإذن الله .. و شكله كدة هاينتقم منى لما ارجع و هايخلينى أسيأ القهوة عشر مرات فى اليوم .. ربنا يستر

و شكرا على دعائك الجميل
----------------

بنوتة مصرية

أجدع سحلب بالمكسرات للبنوتة المصرية .. مع إنى واخد أجازة من القهوة بس عملته بإيدى أهو .. و يا ستى اللى اسمه مش مكتوب فى القائمة بياخد اشتراك فى القهوة لمدة خمسين سنة يطلب طلبات مجانا .. كدة أحسن و لا كنا نحط اسمك ؟؟ و ما تقلقيش .. عسقلانيا العظمى مش هايحصل فيها انقلاب و لا حاجة .. طول ما أنا قاعد على الكرسى يبقى كله فى السليم .. و أنا مش ناوى أنزل من على الكرسى قد بتاع خمسة و عشرين سنة تانى كدة .. حاجة كدة بسيطة .. مش هاطول يعنى .. عشان لازم ندى فرصة للشباب

----------------

بت خيخة و أى كلام

أنا جيت و عملت البؤجة
----------------

عابد الرحمن

يا باشا بعد الكلمتين دول أنا اتكيفت قوى .. و قررت أعطيك خمسة آلاف دينار .. آا..أقصد أعطيك منصب نائب الرئيس .. و دة منصب للغاليين بصراحة .. بس ما تطولش فيه عشان فيه ناس قبلك كانوا فى الطابور و أنا طنشتهم و عينتك .. و برضه احنا لينا مصالح عندهم و عايزينهم ما يزعلوش .. و ما تخافش .. هابقى أعينك سفير فى عسقلانيا الوسطى بعد كدة
----------------

مهندس مصرى

قدرك بقى يا باشمهندس تلبس التاج .. نعمل إيه .. بس يا عم التاج دة مش إجبارى .. يعنى براحتك .. لو عجبك جاوبه .. لو مستتقل دمه سيبك منه

بس بجد أنا اللى سعيد جدا إنى قابلتك .. و كان نفسى نقعد شوية .. بس نحاول نقعد المرة الجاية بإذن الله

أنا جيت عندك و علقت .. بس معلش كان تعليقى متأخر شوية .. فعلقت على آخر موضوع فقط .. بس و الله كنت مشغول جدا و مش عارف حتى أرد على الناس هنا
----------------

فارس عبد الفتاح

الصديق الجميل .. اللى نفسى أشوفه

يا عم أنا هاكلمك رسمى بخطاب حكومى على عرضحال دمغة

السيد الموقر فارس

بعد الاطلاع على أوراقكم المقدمة إلينا و بعد أن عرفنا أنك ترغب فى منصب من عدة مناصب عرضتها علينا .. و بعد أن علمنا أنك تعيش خارج البلاد فإنه قد تم رفض طلبكم .. و لكن لعلمنا أنكم على قدر عال من الوعى و التمكن و خصوصا أنكم تعيشون خارج البلاد .. فقد تقرر تعينكم رئيس مكتب العمليات الخاصة بالخارج لعلمنا أن الكثير من المؤامرات تحاك من أعداء الخارج و وجب أن نوقفهم عند حدهم و ذلك بالاستعانة بشخص يستطيع أن يقدر ثقل دولة عسقلانيا العظمى فى المنطقة فلم نجد من هو أكفأ منك لهذا المنصب.. و سيتم إرسال شيك بمقدار خمسة ملايين زلوطى عسقلانى على عنوانكم كمجرد بداية

و نرجو من سيادتكم تلبية نداء الوطن

و تفضل بقبول وافر الاحترام

رئيس عسقلانيا العظمى
أبو العساقيل

ملحوظة: هانبقى نبعت لك المنفاخ اللى موجود فى الصورة عشان ممكن تحتاجه فى نفخ أعداء الدولة .. و عايزين نسمع اخبار حلوة عن المنفاخ

----------------

أحمد الصباغ

علم و ينفذ يا أبو الصبابيغ
----------------

appy

بسسسست .. بسسست .. أيوة هنا ..بس بصوت واطى عشان ما حدش يسمع ..أنا رصيت حجر نعناع إنما إيه .. من بتاع بلاده .. بس الشيشة ورا القهوة .. فأنا هامد لك خرطوم اللى لحد الكرسى بتاعك و خليه ورا الجرنان اللى هاتعملى نفسك بتقريه .. و لو حد فقس الموضوع قوليله بنعمل تجارب حول تأثير ثانى أكسيد الكربون على ورق الجرايد

و خلاص يا ستى .. بلاش تهديد و لا تسييح .. آدينى جبت الشيشة أهى .. بس خبيها انتى كويس لاحسن أترفد
----------------

أحمد سعيد بسيونى

لا عليك يا أخى .. و نرجو أن نراك زائرا علينا دوما

ابن حـجـر الـعـسـقـلانـى said...

مروة الزارع

مش هاوصيكى على وزارة الزراعة .. أنا عارفك بتحبيها

و شكلنا كدة هانشوف نباتات و محاصيل ما نحلمش بيها

أنا شوفت تعليقك عند قطة الصحراء لما هى جاوبت على التاج و مت من الضحك

بقول لك إيه .. الشاى اليومين دول بقى غالى .. و كلام فى سرك إحنا بقينا نخلط الشاى بنشارة خشب عشان نقدمه للزباين بنفس السعر القديم .. فممكن تزرعيلنا كام فدان شاى كدة عشان حال القهوة وقف خالص

رفقة عمر said...

على فكرة التاج دة صعب جدا بجد
صعب قوى تختار الاختياار بيكون صعب جدا والاصعب انك غصب عنك هاتختار الناس المقربين لك واللى تعرفهم قوى
فاهيدخل هنا المحسوبيه والكوسه
بس علشان حضرتك اول مرة تمررلى تاج هاحاول واجتهد ان شاء اجاوبه واكون محايدة تماما
على فكرة انا رفقه عمر والعائشه فى الاحلام
حضرتك زكرتنى مرتين
شكرا لحضرتك كتير

شريف طلال said...

أنا عايز ابقى وزير الداخليه
عشان أقبض على كل ظباط البلد و ادخلهم السجن
نياهاهاهاه
شكراً يا باشا
تحياتى

امين سر said...

أنت
يا سارق ياء النداء من حروفي
لماذا أنت مرتبك ؟
نعم أعنيك أنت
ادعوك للإنضمام للفكرة
فانت وحدك .. ذلك الذي لم يأت
هذا طريق لم يكن يعرفه احد
و لا يعرف احد
طريق لم تعرفه اقدام المارة
و لم تدنسه من قبل عجلات سيارة فارهة وقودها من عرقك و دمي
تعالى معنا و املأ الدنيا بالضجيج
نظرة على اسرار اون لاين لن تضيرك
و مشاركتك تأكد انها مصدر سعادة لنا
http://asraronline.com/vb/

Soooo said...

انت فين ياعم وفين جديدك
احنا هنحمرق ؟؟؟
وبعدين اساسا اساسا .. انت ماعملتش ولا جاوبتش التاج بتاعك
ولا وزعت مناصب ولا فلوس ولا اي حاجه في رغيف

خش في عبي خش




سلاموووووووووووووز

البنت الشلبية said...

مبروك للدكتورة ايمان وربنا يتمملها على خير

انا برشح نفسى لوزراة الاعلام

=================
ببعت سلام كبير اوى للسيد ابن حجر العسقلانى
والسيد الباحث عن الحقيقة
اتمنى انكم تكونو بخير وبسلام

حزيــــــــــــــــــن said...

ابن حجر العسقلانى وعمر خيرت وفيروز والموسيقى من اهتماماتك واضحك الصورة تطلع حلوه
تنوع غير معهود
اقترح دمج وزارة الاعلام والثقافه وجعلهم وزارة واحده

ابن حـجـر الـعـسـقـلانـى said...

رفقة عمر

منورانا يا أختنا .. معلش إنى كتبتك مرتين .. أصل أنا كتبت الأسماء دى على مدار أربعة أيام .. فمعلش يبدو إنى كتبت اسمك الأولانى فى يوم و التانى فى يوم تانى

و معلش برضه فى تأخرى فى الرد . بس و الله مشغول جدا

و الله يكون فى عونك فى إجابة التاج :) :) :) :)
--------------------

--------------------

سووو باشا

ازيك يا برنس

يا عم التاج دة صعب .. و كل ما أحاول أجاوب عليه ألاقى المدونات دخلت فى بعضها .. فأتراجع تانى .. إلى جانب إنى مشغول فحت

و ما تقلقش .. هاوزع عيش و فول إن شاء الله .. بس لما ربنا يكرمنى و أتجوز
:) :)

ادعيلى انت بس و اخرج من حياة الأشفرة اللى أنا فيها دى
--------------------

شريف طلال

بصراحة حركة جامدة .. تبقى وزير داخلية و تشد الظباط على السجون .. خليهم يدوقوا من اللى بيعملوه فى الناس
--------------------
أمين سر

نزورك بإذن الله .. و نورتنا
--------------------
البنت الشلبية

يا مرحب بيكى بعد طول الغياب .. نرجو إنك تكونى بخير ... و كل سنة و انت طيبة بمناسبة المولد النبوى الشريف

--------------------

حزين

يا عم ما دام التنوع دة عجبك تبقى بالتأكيد شخص ذوقك عالى .. و تستحق وزارة الإعلام و الثقافة و ممكن فوق البيعة وزارة التموين
:) :)

منورنا

somaa mahaba said...

الباشمهندس الدكتور الأديب الفنان العميد اللواء الركن العلامة الفهامة البحاثة الحجة المجدد الشيخ أبى عبد الله محمد بن حجر العسقلانى المصرى الشهير بأبى العساقيل ..
انت حسستنى انى دخلت ليبيا وان الاخ العقيد الفقيد معمر القزافى قاعد قدامى مع اختلاف فرق العقليات مع انى احترمت عقليته من بعد ما لغى الحكوكمه والوزرارت واكتفى بثلاث وزارات بس دماغه نضيفه فعلا
طبعا انا اسمى مش فى التاج فانا حكتفى بانى اكون مواطنه بس مجنونه ورخمه...وحقعد اناكف فى الرئيس اصلى ان بحب اكون مشاغبه
تحياتى لقائد مقام عسقل المعسقل عظم الله اجره
سومه_87