Thursday, July 3, 2008

عام من التدوين

السلام عليكم ورحمة الله وبركاته
ممكن ادردش معاكم شوية من غير زعل
بتاريخ 20 يوليو 2007 بدأت رحلتي التدوينية
اول مره سمعت فيها عن المدونات كان من تلات سنين
احدى الاخوات في احد المنتديات قالتلي انت ممكن تعمل مدونة وتتكتب فيها براحتك ان شاء الله حتى تشتم انت حر
فدخلت على مدونة بنت مصرية وعملت مدونة
ومش فاكر اسمها ايه ولا الباسورد ايه
بعدها عملت مدونة اسمها شيكا بيكا وغير اسمها وبقى اسمها الحالي يا مسافر وحدك
وطبعا مكنتش بعرف اسجل دخول في المدونة فكنت فاكر ان المشكلة في الباسورد
.............
ثم كنت قرأت رسالة محققه لابن حزم الاندلسي في الموسيقى والغناء المباح
ورأيته يرد على جميع ادلة من قالوا بتحريم الغناء
والاخطاء اللي وقع فيها ابن حزم وجدت المحقق عباس احسان بيرد عليه فيها لكنها اشياء بسيطة بحيث ننتهي الى نفس النتيجة التي انتهى اليها ابن حزم
فأنا اتضايقت بصراحة
اتضايقت من العلماء الكبار اللي انتقدهم ابن حزم وعلى فكره ابن حزم بطبيعته حاد اللسان جدا في نقد العلماء بطريقة جامدة
حسيت انهم ( بيستغفلونا ) ايوه اولا: بيخفوا ادلة التضعيف , ثانيا : يلوون اعناق النصوص يعني بيفسروها حسب مزاجهم
وده شفته كمان في موضوع النقاب ..كنت اقرأ في كتاب رسائل ابن عثيمين في فتاوى النساء ( تقريبا الاسم كده صح) ولقيته ذكر اربعتاشر دليل على وجوب النقاب
فسحبت ورقه فلوسكاب وبدأت اكتب الرد على هذه الفكر الذي يستشهد به فوجدت ان نفس الادلة التى يستشهد بها كحجة على وجوب النقاب هي نفس الادلة التى تثبت عدم وجوبه وفرضيته فرميت الورقة وقلت لا ..كده ما ينفعش
الدين مش كده
الدين مش اني اعصر النصوص وألويها علشان تمشي على مزاجي
المفكر المحترم هو الذي يعرض كلا الرأيين ويترك للقارئ حرية الاختيار مش يفرض عليه رأيه ويعرض وجه واحد من وجوه المسألة
نشرت موضوع ابن حزم في المنتدى تاني يوم مش لاقيته ..ولان المشرف كان ولد سلفي وكان مخنوق من كتاباتي خاصة اني مش بحب شيخه المفضل محمد حسان
فا مفكرتش اسأله فين الموضوع لغاية ما عرفت بالصدفه ومنه انه هو دمج موضوعي في موضوع قديم واصبح موضوع عباره عن رد في الصفحة ما بعد السادسة في موضوع قديم في اخر صفحة المنتدى من تحت
فقلت ما بدهاش انا اعمل مدونتي
وكان الهدف هي عرض المسائل المشهورة ذات الوجهين وعرض الوجه الاخر الذي يريدون اخفاءه او تشويهه .. ومش بالضرورة اكون متفق معاه
لكن امانة البحث وامانة العرض تستوجب ذكر الرأيين في كل مسألة
وعيب لما يكون عالم كبير من القدماء وتكتشف انه مدلس
فأنشئت مدونتى وسميتها الصحيفة الكاشفة
وطبعا معرفتش برضه ازاى اسجل دخول وكل ما اكتب الباسورد مش بيدخل
لغاية ما لقيت بالصدفه موضوع بالمنتدى عن التدوين وعرفت ان اسم الدخول هو الايميل نفسه
وانطلقت
وكان موضوع ابن حزم في الغناء هو اول موضوعاتي في عالم التدوين
وكان لازم بقى اروح واجي في المدونات علشان الناس تعرفني افتكر من اوائل المدونات اللى دخلتها مدونة بينو ورفقة عمر وفتاة الجنة ودوبا اللي جت قالت تعليق فهمت منه انها زي ناس كتير بتستتقل الموضوعات الدينية
في الوقت ده في المدونات دي لقيت الباشمهندس عصفور المدينة رجل مفكر محترم قلت خلاص هييجي يزورني خلينا احنا نكمل لف على المدونات لكن عصفور المدينة مجاش غير لما رحت وجهتله دعوة لزيارة مدونتى :) احم احم
ومنذ زيارة عصفور المدينة لمدونتى وانا حسيت بأني مدون بجد لاني لقيت شخص اتحاور معاه شخص بيقرا صح وبيتابع صح
فكنت مكتفي به وكنت بطبعي قليل النشاط لانى لفيت كتير ومحدش من اللى رحتلهم جه غير بينو ورفقة وفتاة الجنه وعصفور المدينة ..اللى لسه فاكرها ومتضايق انها ما جاتش هى الاخت مناجاة..كنت فاكرها هتيجي لكن حتى تاريخه لم تشرفنا بتعليق يثبت قيامها بزيارتنا
وفيه بعض الاخوة افتكروا اني علماني خاصة السلفيين ووجدت تريقه عند الاخ مسلم والاخت كارميلا كان لها تعلق ساخر من مدونتى برضه واخ بيعلق باسم مجهول وافتكر حد فيهم قال عنى انه مسمي مدونته الصحيفة الكاشفة وكأنه بيحتكر الحقيقة لنفسه
اما الاستاذ عصفور فكان افضل منهم كلهم لانه ما سبنيش حتى غاص في اعماقي حتى يستكشف حقيقة هذا المدون الجديد
خاصة بعد انضمام ابن حجر العسقلاني اللي للاسف بعض هذه المدونات اعطته سمعة قشطه
سبب اختياري لابن حجر كشريك في المدونة اني شعرت انه عنده فكر عنده وجهة نظر
وكان ولا زال طبعا شخص في قمة الاخلاق والادب والذوق
بس الغريب والعجيب ان المدونات ذات الطابع الديني اصحابها مش بيترددوا كتير على بعض
وانا واحد من دول يعني ..فمثلا زي ما انا مقصر مع اخوة محترمين جدا هم اساتذة مدرسة العلوم الشرعية مضافا إليهم بعض الاسماء المحترمه زي ضاكتور خالد ..او حتى بينو اللى اختفى عنا واختفينا عنه ..او حتى الاخ مسلم اللي من البداية مش طايقنا رغم اني رحتله اكتر من مرة وتعليقاتي في منتهى الهدوء
لكن يظهر ان المدونات الفكرية الدينية روادها مش كتير بشكل عام
ما عدا الصحيفة الكاشفة الحقيقة واعتقد سبب كسرها لهذه القاعدة معروف وهي بساطة الاسلوب الذي اتبعناه منذ البداية
فيه مدونات تانية كانت صديقة زي مدونة داعية المستقبل ..حتى الاخت كراميلا جات في كام زيارة استكشافية تفتيشية كده
وبجد مدونات كراميلا كانت جميلة جدا كان اسم مدونتها الرئيسية عباد الرحمن
وفيه الاخت سلوى صاحبة مدونة طوق الحرية ..اللى عرضت عليها تشاركنا واعتذرت
ودلوقتي احكيلكم قصة مدونة الاستراحه
كانت طلعت مدونة كده على شكل مجلة وكان شكلها جميل جدا اسمها تقريبا طراطيش كلام او حاجة زي كده يعني
وكان عسقول معجب بالمدونة دي ..وتقريبا عرضوا عليه المشاركة بس هو رفض
فأنا فكرت نعمل مدونة تانية عامة بحيث نقدر نكتب فيها موضوعات عامه واجتماعية ومتنوعة بحيث نحافظ على الطابع العلمي للصحيفة الكاشفة
وبعد حيرة كبيره في اختيار الاسم وكان احد الاقتراحات نسميها ( يا إلهي الملكة حامل من فعلها ) وكتبت بوست هو تاني بوست في الاستراحة وكان يحمل عنوان اقرا الحادثه وعنوان داخلي باسم يا الهي الملكة حامل ..الخ
لكن قلت لعسقول كلمة تحققت فعلا : قولت له انا خايف المدونة الجديدة تخطف الاضواء من الصحيفة علشان كده فكرت نسميها استراحة الكاشفة علشان يفضل القارئ حاسس ان مش دي المدونة الرئيسية وبالتالي مش تأثر على الصحيفة
لكن يا حبيبي كل شئ بقضاء
فأصبح للاستراحة جمهور عمره ما خطى ناحية الصحيفة الكاشفة
حتى الجدد ما هوبوش ناحيتها
ولما رحت للاخ الربان مثلا ووجهتله دعوه جه لغاية هنا ووقف
يبدو زي ما قلت ان المدونات ذات الطابع الديني جمهورها قليل
بصوا انا بتكلم بصراحة وبندرش سوا الموضوع مش رسمي اوى يعني
فكوا الحزام فكوا الحزام
ولا بحمل ضيق من اى حد ..الحمد لله كبرنا واتعلمنا
المهم
لقيت المدونات المشهورة وصاحبة اكثر تعليقات هى مدونة عايزه اتجوز..ومدونة ازميرالدا
كنت بتابعهم خاصة ازميرالدا لانى حصل موقف بينى وبين مدونة عايزه اتجوز كنت لسه في البدايات وقولتها عندك موهبة جميلة ليه مش تستغليها في كتابة موضوعات اجتماعية
ويبدو اني قلت تعليقي بشكل فج شويه لاني فاكر في ردها عليا انها اتضايقت شويه فانا اخدتها من قصيرها
مش عارف ليه لقيت المدونات اللى بتتكلم على الجواز والخطوبة والعنوسه ومواقف المتزوجين زي مدونة طهقانه لهم جمهور كبير جدا اكتر من غيرهم
طبعا انا مش قصدي انتقد اصحاب المدونات دي بالعكس اسلوبهم جميعا ممتع جدا ويستحقوا بالفعل هذا النجاح
بس مش الاسلوب وحده هو سبب نجاحهم لان ناس كتير اسلوبهم رائع جدا وبيبذلوا مجهود في التعليقات وزيارة مدونات الاخرين بشكل اكبر لكن جمهور اقل
واكتشفت ان السبب المهم برضه هو انهم اختاروا موضوعات رائجة جدا خاصة ان معظم المدونين بنات وشباب وبيدخلوا للتنفيس او للحقد او للقر او للهزار
وخلوني انفس عن نفسي شوية واقول ان سبب اختيار بعض المدونات للطباعة كان السبب الربحي سبب اعتقد هو المهم
علشان كده كنت سعيد بمدونات مصرية للجيب لانه بغض النظر عن نوعية موضوعاتها إلا ان السمة الابرز فيها وسبب اصدارها هو اخراج صوت شباب مصر على هيئة كتاب مطبوع ..وبالتالى ( على فكره مش مشاركين فيها لسه بس عسقول هيشارك العدد القادم ان شاء الله) وبالتالى ده مش عمل فردي وانما ده عمل جماعي
وعلشان فيه ناس حذرتني من الحديث في هذه النقطة فأحب اكرر انى احترم كتابات الاخوات الثلاثة وانا اضعهم في القمة الى جوار كتّاب أحب اقرالهم
الموضوع مش نفسنه يعني الموضوع ان التدوين يا دور النشر والطباعة مش ظاهره تستربحوا منها ..التدوين عمل في حب مصر فياريت يكون النشر من اجل مصر برضه
وجهة نظر ..وزي ما بيقولوا الناس اذواق
........
نرجع الي قصتي التدوينية
وتكلم عن المدونات
مدونة عصفور المدينة ..مدونة الاخ الاكبر او مدونة رب الاسرة التدوينية
مدونة رفقة عمر ..برتاح فيها
مدونة آبي ..اتاريها بنت جدعه خسارة اني اتعرفت عليها متأخر رغم انه زبونه قديمه
مدونة فرنسا ..من ساعة العملية وهي مش هي
مدونة خيخة ..بنت جدعه جدعه يعني
مدونة مجداوية ..الام

مش عارف ليه حسيت ان الاسرة التدوينية محتاج فيها لشخصية احس انها امي في هذا العالم التدويني
لغاية ما ربنا كرمني بمجداويه
مدونة نيجرو ..اخويا اللي بحبه
مدونة مع اصراري ..صديق احترمه
مدونة جني ..حبيب قلبي
مدونة عاشقة الفردوس ..بنت مثالية
مدونة الساحرة ..ههههههه قصدكم طنط !!!؟
مدونة بنات افكاري ..اخت يعتمد عليها
مدونة صبرني يا رب ..ابهرتني بمدونتها التانية رؤية اسلامية
مدونة اصرار امل ..استاذتي وحزين لغيابها
مدونة همسة قلم ..اول مدونة اضافتنا في قائمة المفضلة
مدونة محمد المؤرخ ..بكيت لما شوفت اسم مدونتى عنده في قائمة المدونات العلمية مع مدرسة العلوم الشرعية وعصفور المدينة وكان اسمنا قبل عصفور المدينة ..وسبب بكائي ان الراجل ده معرفوش ولا عمري علقت عنده وتقريبا هو جه عندنا مره وحيده
وده كان زمان في البدايات فكنت فرحان اوى ودمعت كمان
بالمناسبة مره لقيت واحد اسمه ياسر جاي يقول فين دروس اصول الفقه ..واحنا بقالنا فترة متوقفين ففرحت انه جاي يسأل على موضوعات قديمه علشان يقراها او يتعلم منها, حسيت ان دي مكافأة عظيمة جدا على الدروس دي
مدونة راجي ..رجل محترم جدا واخلاق واكيد جدع
مدونة ال جي ..المدونة المفضلة عندى انا وعسقول ولا يخلو لقاء من الحديث عنها كحالة تدوينية متفرده
مدونة فارس عربي قومي ..أبو عمو ..اصله بلدياتي اول مره ألاقي مدون من نفس مدينتي وحشتنا يابو الفوارس
مدونة سووو ..تحس وانت بتقرأ انك قاعد مع واحد صاحبك ع القهوة
مدونة شيماء الجارحي ..بتفكرني بنفسي وانا في الاعدادية
مدونة لعلها خير ..اختي يا جماعة اختي
مدونة قطة الصحراء ..معرفش اذا كنت بكرهها ولا ده لاني صعبان عليا اني اكتشفت فيها شخصية مكنتش اعرفها
مدونة دكتور ضياء ..الخصم الذي تعلمت منه
مدونة طهقانة ..ابن حجر بيحسدني عليها علشان بتعلق في موضوعاتي وهو لا
مدونة احمد الصباغ ..ده اللى بيبعت رسايل لعسقول في موضوعاتي :) لسه كان معايا على الماسنجر من شوية
مدونة شيكو اون لاين ..الحمد لله اني معرفتهاش وإلا كنت بكيت اكتر مما بكيت لما عرفت بوفاتها وما زالت عيني تدمع كلما تذكرتها
مدونة فتاة الجنة .. أفكار جميلة
مدونة اموله ..ذكريات جميلة اعلى ضحكة ضحتها كان من تعليقات اموله
مدونة هذا صوتي ايمان حسن ..احساسي وانا بقرالها زي احساسي وانا بسمع باهتمام
يا جماعة اللي بنساهم يعذروني انا مخي مش دفتر واكيد بنسى
وعموما انا رحت مدونة عصفور المدينة وشوفت قائمة المدونات عنده علشان افتكر اللي نسيتهم
معلش ماهو انا لو كنت اتغديت كويس مكنش حصل كده
مدونة واحدة مفروسة ..مدونة (عشرية ) من الناس اللي تحب انهم يكونوا جيرانك في الحياة
مدونة سمباتيك ..دي من الناس الاعلام في التدوين
مدونة أبو خالد ..ان جه سلمولي عليه
مدونة افاق الحرية ..شخص مؤدب ومتواضع ..ومتابع (كله حرف ميم) 1
مدونة ابن همام ..محاور احترمه
مدونة البنت الشلبية ..صاحبة الخطوة العزيزة كتر خيرها كانت بتيجي تسأل علينا في الشات بوكس
كنت بقدر ده لان فيه ناس مش عندها طول بال لقراءة موضوعات دينية فبتبص وتمشي هي كانت بتسيب رد بقى في الشات بوكس فانا بشكرها بجد مش هزار وبقدرها جدا
مدونة صاحب المضيفة ..وجدنا قبل ان نجده لذا فهو صاحب فضل علينا
مدونة امام الجيل ..كان عامل جو حلو في رمضان اللي فات
مدونة بنت الجنوب .. فعلا مسير الحي يتلاقي ..دفعتي في الكلية
مدونة بهلوله ..مدام هدى الله يرحمها كانت نشيطة اوى ومحبوبه من الجميع
مدونة جنى الجنتين دان ..من الناس القليلة اللى بحب اقرا تعليقاتها عند الاخرين
مدونة حراس الحقيقة ..وجهتلها دعوة لزيارتنا وانا مش بوجه دعوة صريحة لحد إلا اذا كنت احب انه ييجي ويعلق
جت ومعرفتش تعلق..قالت ان مدونتي محتاجه وقت تكون رايقه فيه
مدونة صيد الخاطر ..شهادة لله وحده ..حائر في دنيا الله ..محمد عبد المنعم ..هكذا علمتني الحياة
عمالقة تدوين محترم ناس قصرنا معاهم رغم حبنا لكتابتهم
مدونة ظبط دماغك ..فتامينات سريعة وكانت في رمضان اللى فات مميزة جدا
مدونة عصفور بلا اجنحة ..فكرتني يا عم عصفور هي فينها دلوقتي
ربنا يكرمها من الناس اللي شجعونا في البدايات
مدونة دكتور حر... ده من فئة العمالقة في التدوين
اصل فيه مدونين لما ييجي يزوروك كأنك اخدت ختم النسر على البوست
مدونة سومة مجنونه في بلد عاقل ..مدونتها اجمل وأرقى من اسمها المتواضع
اللي هيزعل علشان نسيت اسمه ..والله انا هزعل اكتر منك
فياريت المعاتبة تكون بالراحه علشان انا لما بتكسف بزعل من نفسي وبعاقب نفسي احيانا
مدونة نونو عاشقة النقاب
شايفين كنت هنسى ازاي
يا ريت يا عاشقة الفردوس تبلغيها ان احدى امنياتي كانت انها تشرفنا من زمان في الصحيفة الكاشفة
لكن زى مانتم عارفين سحر الاستراحة حرمنا منها في الصحيفة
مدونة محبط افندي ..معرفوش لسه ضايفني على الايميل وانا بكتب بقوله انت مين قلي لسه بعمل مدونة
جبت ايميلي منين ؟ قال واحد عطاه ايميلات المدونين علشان يساندوه
على فكره دمه خفيف
الموضوع ده كتبته قبل ميعاده لاني مش عارف لما ييجي ميعاده هنكون موجودين ولا لا
بعتذرلكم لاني راح اكون مشغول الفترة القادمة ..وجايز اقابل كتير منكم على ارض الواقع قريبا ان شاء الله
وجايز تلاقوني يومين تلاته وكاتب موضوع جديد
بس نفسيا ..محتاج لاجازة
واتمنى محدش يكون زعل من اي كلام في البوست ..دي حاجه كده زي ما نكون قاعدين بينا وبين بعض وبندردش يعني وواخدين راحتنا شوية في الكلام

42 comments:

Mafrousa said...

وانا فين؟؟؟؟
لازم اكون بكتب فى الدين يعني؟؟؟؟؟
انا زعلت:(
ولو اني بقالي فتره كنت فى اعاره لمدونة فرنسا و الرايق لكن معلش

الضاحكون said...

يسعدنا تشريفكم
فى المدونه المشتركة

nigro said...

انت يا راجل انت مش هتهمد بقى شوية؟
اكتب وحش بقى مرة
يعني حتى لما تيجي تدردش تطلع موضوع تحفة برده
تصدق بالله أنا قلت بس هأبص كده و أشوف الجو العام و بعدين أبقى أقرا
و بالفعل
شوفت الجو العام من أول سطر لآخر سطر يا ريس و أديني بأعلق كمان
لدرجة إني كنت هأعمل حاجة و نسيتها
عاجبك انت كده؟
كل سنة وانت طيب يا أستاذي و بخير و في خير و إلى الله أقرب و على طاعته أدوم
بس إيه يا راجل اللي انت كاتبه ده؟
ده كتير عليا و الله يا أحمد
يا عم أنا آجي إيه جنب الناس انت ذكرتها دي
الله وحده يعلم مدى غلاوتك عندي و اللي في القلب في القلب بقى يا أبو حميد

إن شاء الله أكون من الناس اللي انت قولت هتشوفهم قريب إن شاء الله
ياااااااااا رب
خد أجازة براحة راحتك .. بس ماتتأخرش
مستنيييك

يلا سلام

دكتور حر said...

والذي لا شك به
اننا اكتسبنا اثنين من أصحاب الفكر الجاد في التدوين
والتقيت بواحد من اعز الأصحاب
وفي انتظار الشق القبلي من المدونة
:)

تحياتي وحبي وتقديري

بنت الصالحين said...

ولا يانهااااااااااار ايه الكلميت اللي وقعو عليا كالصاعقه دي


اللهم اغفرلي مالا يعلمون واجعلني خيرا مما يظنون


بس تعرف اللي حصل معاك في التدوين حصل معايا
انا كمان كنت عامله مدونه قبل دي ومكنتش عارفه ادخلها برده من الاسم وكده


وكنت في بيات غريب لاني مكنتش بروح لحد



وبرده حكايه ان التدوين الخوف دلوقتي انه يبقي ربحي وانه لمجرد الشهره
دي انا مرعوبه منها

وباذن الله احنا وكل المدونات التي كان مبداها منذ البدايه هو رضا الله و كتابه كلمه نريد بها ان نعبر بها عن شباب مصريين بيحبو مصر جدا هيفضلو بنفس الاسلو ب ونفس الطريقه


بس فيه ناس رائعه بتكتب بطريقه رائعه دول بجد مواهب ومن حقهم ينزلو كتب الناس تقراها وربنا يوفقهم


بجد احنا شباب رائع ومش اناني وبيحب يعمل كل حاجه كويسه برغم الظروف الصعبه اللي بنواجهها


ربنا يباركلك ويديم صداقتكم انت وابن حجر


ماتتاخروش في دروس الصحيفه

واختلاف الراي لايفسد للود قضيه


السلام عليكم

Ahmed Al-Sabbagh said...

هههههه

ياراجل

يعنى مش فاكرنى غير بانى ببعت رسايل لعسقول فى موضوعاتك

ده بيحصل لانى فعلا بتلخبط من المدونات المشتركة

مش معاك انت بس

تحياتى

جنّي said...

كيف حالك ياأبو حميد

كنت متعود تيجي مرة واتنين وثلاثة .. لعل المانع خير .. لو أنا ماجيتش ما تسألش ؟ ..

تعرف بعد ما فضيت أصبت بحالة من الزهق والقرف والوقت الضايع مني كتير ومش عارف أعمل أي حاجة .. حتى المدونات نشرت الرسالة التي كلفتني بها مجداوية وفقط .. وما ليش نفس أزور أي مدونة لدرجة أني أفكر في الاعتزال.. ولكني وجدتني أحضر إلى هنا من خلال الصحيفة لا أعرف لماذا ؟

لكن تعرف إني فرحت جدا عندما وجدت أسم جني في أول ماذكرت من المدونات مما أخرجني من الحالة التي ألمت بي ولو لقيل من الوقت .. والقلوب عند بعضها

فكرتني ببدايتي كنت أهبل في زياراتي واختياري للمدونات وكانت تعليقاتي ساذجة من هاو بهرته أضواء المدونات ..

ومين سمعك أنا كمان محتاج أجازة نفسية
تيجي نشوف مصحة نفسية نأجز فيها اجازة نفسية ..

أدع لي بخير ..

سلام يا صاحبي

الباحث عن الحقيقة said...

واحده مفروسة
عملت تعديلات علشان خاطرك
ارجعي اقري كتبت عنك ايه

************

فرنسا والرايق
هنزوركم يا عم علشان نتفاوض حول عسقول يا تدفعوا الجزية بقى

**********

نيجرو
ربنا يخليك يا نيجرو
انت من المكاسب اللى انا كسبتها في التدوين
ربنا يكرمك يا بطل

الباحث عن الحقيقة said...

دكتور حر
معلش الذاكرة وحشه يا دكتور
بس رجعت عملت تعديل وضفتك وضفت ناس كتير
وان شاء الله متشوق اني اشوفكم كلكم
شكرا لذوق حضرتك

**************

عاشقة الفردوس
حقيقي والله من الشخصيات اللى مش ممكن انساها
واشكر تواجدك الرائع في الصيحفة وفي الاستراحة

*************

احمد الصباغ

فليسجل التاريخ اول مره احمد الصباغ يكتب تعليق في موضوع لي ويكون بيقصدني انا
مش رساله لابن حجر يعني
هههههههههه
اخيرا عملتها

الباحث عن الحقيقة said...

كلام في سرك يا جني
وانا كمان
بس الواد ابن حجر قلي ما تقفلش الباب مرة واحده سيبه مفتوح شوية
فقلت اجازه
بس ان شاء الله مش هنقطع
اجازه بس ان شاء الله
هتوحشني يا جن

Soul.o0o.Whisper said...

ايه دا .. ايه دا ؟؟؟ ايه دا؟؟!!

و طلعت فى التليفزيون كمان
ياااااااااااااه ... متشكرين جدا جدا

بس تعرف إنى معلافتش ان الكلام عليا غير لما شفت اسمى

هى على فكرة ترجمة اسم مدونتى ..هذا صوتى
دا أولا
ثانيا .. إنى بصراحة مافهمتش يعنى إيه لما بقرأ باحس زى ماكون باسمع باهتمام
معلشأصل دى تانىمرة تقولها و أنا مش فاهمة

معلش فهمى على قدى انت عارف
على فكرة أنا كمان من النوع المتقوقع الى حد ما
و الشهر دا انا كمان هأكمل سنة على مدونتى

ياللا كل سسنة و مدوناتنا بخير :)
و تصبح على خير

جنّي said...

كنت جايلك تواسيني

لقيتك با عبد المعين

أشوف حد تاني يواسيني

تصبح على خير

اوعى تفكر said...

ياااااه
كل ده فى عام واحد ده انا تعبت من كتر القرايه فيه
بس مبرووووووووك ياعم وعقبال العام القادم

رئـــــيسـة حزب الأحلام said...

الموضوعات اللى بتشد الناس الموضوعات الاجتماعيه
طب ليه مايحصلش دمج الحياة الاجتماعيه بالدين بطريقة مبسطه وتشد القارئ وتفيدة
وانا مش زعلانه انك ماقلتش اسمى

عصفور المدينة said...

المفروض يعني لو حاعلق يكون تعليقي طويل بس انت رغيت بما فيه الكفاية وحكيت القصة منذ البداية

بس برضه مافهمتش التدوين أحسن ولا المنتديات

وبعدين فين يا عم إيجار قايمة المدونات مش كنت تقولي أبعت لك القائمة دلفري عشان نزود الحساب

أمانة عليك يا راجل يا طيب لو ظهرت في أي مكان غير قبلي تقول لي قبلها

وبعدين انت ومحمد مشكلتكم إن الناس فاكرينكم شخص واحد

كل سنة وانت طيب يا جميل

Empress appy said...

امممم
طيب اولا مش هشكرك على ذكرى ك لاسمى
بس كنت عاوزة اقولك حاجه من وجهه نظرى برضه النونو يعنى اقولك حاجتين
هات واحد ليمون تعالى هنا
ليه وجهه نظر فى المدونات الدينيه اللى مش بيعلقوا عند بعض
بص يا سيدى بحس ساعات انهم بيأخدوا فكرة غلط عن المدون من اول بوست وساعات ناس بتحكم على ان الشخص ده بيهاجم مش بيستفهم او يتناقش فى الموضوع فبيأخدوا الباب من مش عارفه ايه انت عارف المثل ده
المهم وفيه ناس وانا متأكده بتنقل موضوعات ولما تيجى تتناقش معاها فى حتت دينيه قويه جدا متعرفش وتهرب منك قوى قوى قوى وبيبان انهم حافظين مش فاهمين
طبعا انا مش بتكلم عن الاسماء اللى انت ذكرتها انا بتكلم عموما مش خصوصا هتقولى حكمتى على الناس منين اقولك انا متابعه جيده للتعليقات على المواضيع عند ناس كتير وطريقة حوارهم
وعلى فكرة فيه الكتير اللى بجد انا بستفيد منهم جداااااااا لانهم فعلا ناس فاهمه كويس مش نقل مواضيع ورد كوبى وبست بس ولما تناقشها تتهجم عليك
وعلى فكرة فيه ناس بوشين فى مدونتهم او بعض المدونات برد وفى مدونات اخرى رد تانى خالص او طريقه بلاش رد
انا عارفه ان التعليق ده ممكن يزعل ناس منى بس لو فهوا صح هيأخدوا بالهم انى بتكلم صح والله

وميرسى ليك على ذوقك وذكرك ليه بجد وحسابى تقل هنا ابعت لكم خروف بقى بدل الحساب اختك اول الشهر ومزنوقه هههههههههههههه
وكمان يبقى هديه للاستراحه

الباحث عن الحقيقة said...

هذا صوتي ايمان
طب هو انا ماقلتش المره الاولى يعني ايه؟
وبعدين واضحة يا دكتوره يعني اسلوبك بيجذب القارئ وسلس وبسيط
والله اعلم


********
جني
على فكرة انت بتروح في النوم بسرعة
لاني قلت ألحقك واضيفك على الايميل هوب مالقيتكش


*********

اوعى تفكر
ردك بيفكرني بنفسي زمان لما بديت تدوين
كنت بقرا نص التدوينة واعلق
انا مش بقول ان انت عملت كده بس فكرتني بكده
:)
الله يبارك فيك وانت طيب

***********

رئيسة حزب الاحلام
ليه ماقلتيش تعليقك ده من زمان
انتي شجعتينى وحفزتيني واستفزتيني لكتابة موضوعات دينية اجتماعية بشكل جذاب
وشكرا انك مزعلتيش علشان نسيت اسمك
راح ازعل انا بالنيابة عنك

الباحث عن الحقيقة said...

عصفور المدينة
انت حظك حلو علشان جيت بعد الفجر
لاني بعد صلاة الفجر رجعت فتحت وغيرت في البوست
اصلي وانا بقرا في قايمة المدونات عندك شوفت اسامي فورت دمي وانت عارفهم او على الاقل عارف واحده منهم.وقريت بوستك الاخير لكن عيني لمحت اسمها وسط التعليقات فخرجت ومقدرتش علشان مش اكتب تعليق عندك مايصحش اقوله في مدونة عصفور المدينة
المهم الاسامي دى ذكرتها انا هنا وطبعا انتقدهم بشكل موجز ..لكن رجعت حذفت اساميهم
وجاي تقولى على ايجار قايمة المدونات
انا اللى عايز بدل فوران دم
لما نتقابل يا حاج عصفور ان شاء الله علشان عايز اسألك اتخلص من ذكرى الناس دى ازاى؟

الباحث عن الحقيقة said...

آبي
من فضل الله له على عباده ان الواحد يلاقي ناس تحبه ليه ماعرفش

فأنا اشكرك على مودتك لنا ومشاعركم الرقيقة وخفة دمكم وبتحسسينى اني خال ابراهيم الصغير
نيهاهاهاها
وعايز اقولك حاجه
كلامك صح تماما فعلا
فيه ناس بتعمل كابي بيست او بتردد موضوعات او شعارات وهي مش فاهماها
يعني مثلا انا عرفت عسقول ازاي؟
لقيت الواد عنده شوية اسئله كتيره وكل ما يسألها لحد يهاجمهوها ويتهموه ويشبهوه تشبيهات مش لطيفه
ومحدش فيهم فكر يجاوبه او يناقشه ..رغم انها اسئلة مشروعة ..يعني واحد بيقولي الاسلام هو الحل فطبيعي اسئلك ما هو تصورك لتطبيق هذا الشعار على الواقع
فتجاوبني
مش تفتح عليا النار
المدونين بشر
واحنا مش صغيرين شوفنا بشر كتير في الواقع وعلى النت وبقينا بنعرف نميز وبنعرف نختار
وربك موجود بيألف بين القلوب الصادقة
لكن المهم في كده هو
الخرووووف ..هيوصل امتى ؟؟
اديني بقولك اللى هييجى فيكم المره الجاية الاول هدبحه
يعني بالذوق كده تيجي وقدامك الخروف وإلا
اه إلا الحساب انا محدش يضحك عليا

Mafrousa said...

ههههههههه
الدنيا ابسط من انك تزعل من نفسك وتعاقبها
انا اصلا مش زعلت خالص علشان تبقى عارف
انا سبحان الله واحده ربنا خالقها مش بتزعل من حد
تاخد على خاطرها شويه..و بكلمه فى ثانيه و لا كأن
ربنا يعملك الخير كله و يحبب فيك خلقه يارب

ابن حـجـر الـعـسـقـلانـى said...

انت عارف يا باحث .. و الله أنا باقعد مع نفسى كتير قوى أفتكر أحداث الفترة اللى حصلت دى ... و أفتكر ظروف معرفتنا ببعض ..ز أفتكر الكام ميل اللى بعتناهم لبعض فى الأول ... و لا لما لقيتك بتقول لى أشاركك فى الكتابة فى المدونة ... ياااااه ... كان شعور غريب جدا

الواحد ماكانش يتوقع و لو بنسبة واحد فى المية كل هذا العالم الغنى بالناس و الأفكار و المشاعر

الواحد اتأثر بشكل كبير جدا بهذا الكم الضخم من التدوينات اللى قرأها .. اتأثرت نفسيا و علميا و أخلاقيا و بكل شكل ممكن الواحد يتأثر بيه

و الحمد لله الحمد لله ... معظم الناس بقى فيه بينا و بينها ود و محبة ... الحمد لله ... اللهم زدها نعمة علينا و احفظها من الزوال

بجد أشكرك يا باحث إنك اديتنى الفرصة دى إنى أشاركك التدوين و أتعرف على كل الناس دى

معلش يا باحث أنا مقصر حبتين مع المدونتين أصل التونجر شغال بأقصى قدرة ليه معايا اليومين دول

أه صحيح ... أنا مسافر بكرة إن شاء الله رايح الأقصر أحضر فرح واحد صاحبى ... عقبال يا رب أما أسافر أسيوط عشان أحضر فرح واحد صاحبى تانى

السفرية دى هاتقعد حوالى اربعة ايام .. يعنى هارجع على الخميس كدة ان شاء الله

و يالا يا جماعة ... أشوفكم أمس

بنات افكارى said...

السلام عليكم

ايه يافندم ازاي بس تحطنا وسط الناس والمدونات العظيمة اللي زكرتها دي كلها نروح فين بس احنا وسطيهم وربنا يكرمك يافندم على ثقتك وربنا يجعلنا ادها يارب اللهم امين وجزاكم الله خيرا ان حضرتك افتكرتنا اصلا يعني ويكفي كلمة اخت دي حاجة تشرفني جدااا وتسعدني كمان انا فاكرة زماااان كنت علقت مرة فى الاستراحة وقلت لحضرتك ان في خمس مدونات ليهم مكانة عندي من ساعة مادخلت عالم التدوين والصحيفة كانت من ضمنهم فعلا ربنا ينفع بيها وبحضرتك دائما .طيب اقول لحضرتك على حاجة كمان والدتي من اكتر الناس اللي بتزور حضرتك هي مديرة مدرسة بس بتدرس زي الاخت مجداوية فى معهد اعداد دعاه وبتحب تقرا مقالات دينية فاكنت بدخلها مدونة حضرتك وبعض المدونات التانية ان شاء الله اعلمها تعلق ازاي وتشوف تعليقاتها ان شاء الله
يعني الاستراحة ماخطفتش الاضواء من الصحيفة ولا حاجة حضرتك بيتهيئلك
بس هي الناس بتبقى محتاج تستريح فعلا فاتلاقيهم بيعقلو اكتر فى الاستراحة لان الاسلوب بيكون خفيف ومرح وربنا يديم على حضرتك روح المرح وخفة الظل دائما
واحنا خلاص بئا اعتبرنا نفسنا تلامذة عند حضرتك فى الصحيفة ومفيش مانع قهوجي فى الاستراحة احنا فى الخدمة يعني
ربنا يعزك يافندم ان شاء الله وكل عام وحضرتك بخير والمدونة بالف خير ويجي عليها سنين وسنين كمان ونتعلم ونستفيد اكتر واكتر وحضرتك تنفعنا اكتر واكتر ان شاء الله وجزاكم الله خيرا على سؤالك
ماتقلقش يافندم انا قولت لحضرتك انا تلميذتك بئا ولازم اكون شاطرة فى كل حاجة يعني انا ان شاء الله الدكتورة اول ماهتصحح ورقة الاماني بتاعتي هاتبعت للسفارة يدوني الجنسية فورا اه امال ايه دا احنا صعايدة جدعان اوي مافيش حاجة تقف قصادنا يعني
اسعدنا سؤالك يافندم وكمان ايمان ولعلها كانو لسه متصلين بيا وانا فى العربية يطمنو بردو ويبشروني على نتيجة اول محاضرة فى الحملة ودي من احلى الحاجات اللي بتحصل فى التدوين وهي العلاقات الانسانية يكفي اوي احترام الناس لبعضيها وحضرتك شخصية تجبر اللي بيتابعها على احترامها
اما لو حضرتك اتصدمت فى بعض الاشخاص مثلا فاهو دا واقع الحياه مش التدوين بس وزي ماحضرتك قولت قبل كدا ان التدوين احلى حاجة فيه القلوب الصادقة كتير فاركز حضرتك مع كل الناس اللي بتحترمك وبتعزك وربنا يزيدهم كمان وكمان

صحيح ازاي حضرتك تاخد اجازة قبل الطلبة بتوعك لا يجوز يافندم ولا اقول لحضرتك خد اجازة احسن علشان تعمل ريفرش كدا وترجعلنا بافكار ودروس مفيدة ان شاء الله ويجعل النفسية بخير دايما معندناش صعايدة نفسيتهم تتعب وماتسالنيش ازاي هو كدا وخلاص وربنا يعينك يافندم وييسرلك الخير دايما وابن حجر كمان ويديم المعروف والود بينكم ان شاء الله ويظل حضرتك ان شاء الله وكل من احببت فى الله تحت ظل عرشه يوم لا ظل الا ظله ان اللهم امين ..ومعذرة على الاطالة والرغي الكتير دا

السلام عليكم

Unknown said...

السلام عليكم ورحمة الله وبركاته
كل سنة وانت طيب ياأيها الباحث عن الحقيقة( مهمة شاقة للغاية) وفين انا؟؟؟؟
اوكى حأعتبر انك ذكرتنى مابين اى اثنين من المدونينن العظام اللى تشرفوا بذكرك لهم(يابختهم يابختهم يابختهم )) ومش حاحقد عليهم ولا اغير منهم ولا
حااااااجة ابدآ
المهم بيقى شعور عظيم لما تلاقى اسم مدونتك عند حد تانى ولو انى لم اعمل اى روابط لمدونات صديقة بسبب حادثة حصلت لا احب ذكرها الان
المهم
هابى برث دى تو يو ياباحث
وهابى برث دى تو يور بلوج
(فين التورتة؟؟
السلام عليكم.
NBنسيت اقولك اجازة سعيدة مباركة

عصفور المدينة said...

أنا ضفتك ع الفيس بوك يا احمد من كام يوم

فينك مش بتقابلني هناك ليه

الساحرة said...

كل سنه وانت طيب وعقال 100 عام


من التدوين

تعرف ان انت وابو العساقيل

كنتو اول ناس تعلقوة عندي

وكلامكو اسعدني جدا

ودخلت عندكو طبعافي الاستراحه الاول

وبعدين اكتشقت الصحيفه

كنت فكراكو شخص واحد

بس بعدين المحكمه اتنورت

انا بتابع الصحيفه باستمرار

بس ساعات بيقي التعليق

لا يضيف الي الموضوع

بتبقي مجرد حلوة

هايله

وانا مبحبش كدة

مجرد اثبات حضور

مع اني ساعات بعملها

ههههههههه

بعد كدة هبقي اسلم متزعلش

بقي مدونتي مبتفكركش غير بطنط

ماشي لك يوم ههههه

Unknown said...

السلام عليكم ورحمة الله وبركاتة
ازيك يا باحث
عارف تدوينتك دى فيها الكثير من المشاعر المشتركة بيننا انا كمان بحس ان المدونين اسرتى وبقينا بنتشارك فى كثير من الامور والهموم ووجهات النظر سواء اتفقنا ام اختلفنا
اعتقد ان دا شئ حلو ومفيد اننا نكون اتحاد اسرى فكرى بالافكار والاقلام نتلاقى ودا شئ جميل
على فكرة بوستك حلو وبيدى دفعه للكثيرين عشان يكملوا المشوار
كل الاحترام لك

Jana said...

"بأحب اقرا تعليقاتها عند الآخرين"
!!!!؟؟؟

تقصد يعنى تلمح انى مش بأعلق هنا كتير؟؟
صحيح انا عمرى ما علقت فى الصحيفة ..وده لسبب اعتقد قلته قبل كده
لكن علقت كتير فى الاستراحة
يا أحمد انت راجل جدع ..وانا باحب اقرا كل تدويناتك وتعليقاتك عندى وعند الآخرين كمان

عموما مبارك عليك وعلينا مرور عام على تواجدك الجميل
وسامحنى لو قصرت فى الزيارة ..انا مشغوووولة جدا والله يعلم

ربنا يعينك على الاعمال الموكلة لك فى الحملة ويجعله فى ميزانك ان شاء الرحمن

دعائك يا أحمد الله يكرمك

الباحث عن الحقيقة said...

كده التعليقات كترت ولازم ارد
يا كريم يا رب

واحده مفروسة
متشكرين خليتنا راجعنا المدونات وافتكرنا جزء من اللى نسيناها

***********
ابن حجر العسقلاني
عقبال فرحك اوعى الصعايدة يطخوك في الاقصر..متخافش هنجوزك الخطة الجاية

************

بنات افكاري

ما شاء الله هي ابله المديرة بتقرا الصحيفة الكاشفة كمان
يا خبر طب مش كنتي تقولي يا بنتي
ده شرف كبير لنا ان شاء الله نتقابل انا والست المديرة في حملة حبا في رسول الله وهسمع تعليقاتها بنفسي
وهعلمها تعمل مدونة واركنى انتى على جنب بقى
ربنا يوفقك في والنتيجة كده تطلع حاجه تشرف احسن نسحب منك الجنسية
زمان واحنا في الجيش كانوا يقولولنا النهارده هينزل اجازة بتوع الصعيد وبني سويف بس ..فعرفنا ان بني سويف داخله اونطه في التشكيل بتاع الصعيد
بينكم وبين القاهره ساعة ونص عايزه تبقي زينا واحنا بينا وبين القاهره ست ساعات

الباحث عن الحقيقة said...

نورهاتي
والله شرف كبير لنا تشريفك وحقيقي بكون سعيد بتشريفك لنا
ولما بتغيبي عنا وترجعي بيكون لحضورك فرحة حضرتك شخصية نسعد بمرورها في مدوناتنا وبالتالى سعادتنا بتكون اكبر بتعليقك

**********

عصفور المدينة
يا عم انت ضفت حد تاني على الفيس بوك
انا اسمي احمد الباحث في الفيس بوك
ahmed elbaheth
وكل مافتح مش بلاقي حد ضايفني جديد
عموما اكيد انت ضايف عسقول هدور عليك عند عسقول واضيفك

**********

الساحرة
ههههههههه طنط
هههههههههههه
اصغر أم في عالم المدونات
بجد نفسي اشوفك يا طنط
ههههههههههههه
منتظر معاكى نتيجة الثانوية
على اخر الزمن بقى عندك بنوته في ثانوى
ربنا يستر حاسس ان كلها اربع سنين ولا خمسه ونقولك يا تيته بدل طنط

************
نهر الحب
اكيد يا نهر الحب شئ مش سهل اني افتكر
ثلاثتين مدونة في وقت واحد حتى مع الاستعانة بصديق
اسف جدا اني نسيت حضرتك
نهر الحب ..شخصية متميزه تواجدك عندنا شئ اقدره واحترمه خاصة اني قليل ما برد الزيارات دي
يعني حضرتك صاحبة فضل علينا برضه وبتكسفينا بكرمك ده
بس انا من زيارتي لمدونتك اقدر اقول : انك غير كل البنات

************

جنى الجنتين
ازاي بس اكيد بحب اقرا تعليقاتك عندنا
دي قضية بديهية
بس كمان بحب اقرا تعليقاتك عند ال جي وعند لعلها خير
وكفاية اكتشافنا لخفة دم حضرتك
بعيدا عن العك اللي حصل مؤخرا بس تبقى الحقيقة انك شخصية (سبيشيال )انتي او المدونة يعني
بصي حضرتك من ذوي القدرات في الكتابة بشكل رائع وحساس وفي كل مره تقدمي لنا شئ جديد في كتاباتك سواء من ناحية العمق او الفكرة او تعرفنا على شخصيتك
وشكرا لمروك دايما .ماهو انتى من الشخصيات اللى لو غابت عننا بنزل وممكن نروح نعمل معاكي زي ما عملنا مع ال جي .ده من معزتنا بس ليكموانتظارنا تعليقاتكم
:)

مجداوية said...

السلام عليكم

طيب ,,وسع شوية كده ,,ايوااااا

كوووول ده وسنة تدوينية واحدة أومال لو عدت خمس سنين حتعمل ايه !!! دى حفلة كبيرة أوى


شوف يابنى طالما بقى أنا أمك التدوينة تسمع الكلام وتقول حاضر


أمك مجداوية فى نص المدة يعنى فى أقل من ست شهور فكرت أهج من هنا يجى عشر مرات
زهق ,,قرف ,,ملل,,غضب ,,يأس ,,
يعنى أسباب كتيرة
لكن لقيت ان أسلم وأحسن حل ان لا أغلق الباب تماما لكن أسيبه موارب ...ليييه ؟؟؟
عشان
الأيام دول ودى طبيعة الناس والأشياء بين ليل ونهار وحزن وفرح ونشاط وكسل وهمه وخمول
عشان الانسان بطبعه ملول ومتقلب
عشان الكتابة متنفس جيد بالنسبة ليا وبتعمل ليا توازن نفسى
عشان اللى متعوزوش انهاردة تعوزه بكرة
عشان احساسى ان المساحة دى ملكى وأنا أملاكى فى الدنيا مش كتير أهو أبقى من ذوى الأملاك

عشان لقيت هنا فى عالم التدوين اللى مش وهمى أوى يعنى ناس تستحق انك تتواصل معاهم صحيح قليلين بالقياس بالعدد المهول للمدونات لكن أنا لا أدعى انى أعرف كل الناس الكويسة وبالعكس كل شوية اكتشف ناس فكرها ملوش حل رغم صغر سنهم

كمان نسيت أقول سبب مهم مخلينى دايما عندى استعداد لغلق الباب هو عامل السن
لأنى حسيت كتير وقعت فى ملقف شباب مليش بينهم مكان وخايفة ان يكون ليا تفكير وتسلط الأمهات
تقوم تيجى وتدينى البادج الرسمى وبقيت أم تدوينية
هو طبعا ليا الشرف وسعدت جدا ان يكون ده احساسك بوجودى لكن أنا بسألك وبجد هل أنا ليا هذا الطابع التسلطى أو الفكر البعيد عن فكر الشباب اللى زيكم بمعنى هل أنا منفصلة عنكم

المهم مش عايزة أطول عليك قول طولى

الحر ممكن يعمل فيك أكتر من كده فخد أجازة صغننه روح فيها مرسى مطروح مثلا حاتنسى القرف كله هناك وارجع اكتب وفيد الناس

بس أنا ليا رأى فى بعض أفكارك مش حاقولهالك دلوقت لما ترجع من الأجازة وكمان أنا مش فاضية للنقار دلوقت
ياللا كفاية كده عشان أمك مجداوية فرفرت من الحر

و سلام الله عليك ورحمته وبركاته

بنات افكارى said...

السلام عليكم

ايه دا يعني ايه اطلع منها مااااشي
عموما هي زي حضرتك اجتماعية اوي وبتاخد على الناس بسرعة وابقى حضرتك براحتك خالص يعني وعلمها براحتك احنا هانيجي ايه جمبكم يعني فى عالم التدوين

وعلى فكرة احنا اصلنا من محافظة قنا يعني ابعد من حضرتك بس عايشين فى بني سويف وعلى فكرة المسافة ساعتين وبالنسبة لي بتوصل لساعتين ونص لاني عايشة فى مركز مالناش دعوة ببتوع الجيش بس هما عندهم حق احنا عملنا زي اللي رقصو على السلم لا حصلنا قبلي ولا بحري عموما انا كنت هاستقر فى اسيوط من فترة بس رجعت فى كلامي
على فكرة بكتب التعليق وبنم عليك انا ولعلها بس ماتقولش لحد ولا تسال بنقول ايه

السلام عليكم

الباحث عن الحقيقة said...

مجداوية
ماما جت ماما جت
هههههههه
ربنا يخليكي لنا يا فندم
والله الواد عسقلاني دايما يقولي خلي الباب موارب ما تقفلوش
نفس وجهة نظر حضرتك تماما
بس زي مانتى قلتى احيانا الواحد بيحس انه خلاص وكده كفاية
واحيانا ظروف بتفرض علينا نتوقف
لا تتصورى حضرتك كم كانت حاجتى لوجود شخصية مثلك في حياتي في هذا العالم الافتراضي
لاني سبق وعانيت من سيدة حضرتك تعرفيها صاحبة مدونة وكانت اشر الناس واكثرهم ألما لي في حياتي
فحضرتك اتيتي مثل البلسم لجراحي على النت وثقتي في الناس
كان الاستاذ عصفور بمثابة الاخ الاكبر
فكنت محتاج للام
الى ان اتيتي حضرتك ..معلش جايز اكون مريض نفسيا ولكن على الاقل هذا ان كان شعور ممكن يعتبر مريض ولكن صادق والله على ما اقول شهيد

حضرتك مش تفكيرك قديم ولا تسلطيه اطلااااااقا ده احنا اللى بنيجي برجلينا لغاية عندك يا مجداوية ولما بتتأخري بنقولك تعالي
هي بس مناقشتك مع ضياء او مع غيرها مأثرة في حضرتك بس صدقيني انا مش عايز اتكلم علشان اسيب ذكرى كويسه دي ناس جاية تفرد عضلاتها ويستخدمون الكلام المنظم في بناء حائط منيع يوهم الشخص اللى قدامهم انه ضعيف لكن صدقيني مهما علا جدار الباطل ..مهما بدا قويا فإن كلمة واحدة تهزمهم جميعا وهي الاسلام
جادلت ملحدين جادلت نصارى جادلت شيوعيين ما علا فيهم احد على الحق بفضل الله ولقد نصرني الله عليهم واقسم لكي يا امي اني ابكي مما اراني رددت به عليهم لا اعرف كيف خرج منى وكيف قلته وكيف كتبته
فعلمت ان كلمة الحق اقوى من اي جدار
حضرتك تمام وافكارك زي الفل
ولاعب اساسي في منتخب الفكر الاصلاحي الاسلامي التقدمي
اما بخصوص بعض الاراء اللي عايزه تناقشيني فيها اعتقد انها بخصوس النقاب وربما خاصة بخصوص رأيي الذي ذكرته عند الاخ محمد فوزي ..وانا مستعد بكل ود وبكل حب
هنعمل ايه بقى حب الامهات واجب علينا
ربنا يخليكي لنا يا مجداوية
طول عمرك بلسم روحي واجد في كلماتك راحة واحساس جميل بالامان
رغم حتى لو اختلفنا
:)

الباحث عن الحقيقة said...

بنات افكاري
اهلا بقنا وناس قنا
انتى كده حضرتك هتحيرينا معاكي

وده اخرة اللي يقف على السلم
اسيوط كانت هتتشرف يا فندم
معلش محافظة مالهاش بخت

وانا كمان ماليش بخت اقابل الست المديرة
كملي نم مع لعلها خير وهتعرفي
فيه ازمة دبلوماسية

Mostafa Abdelmoneam Badr said...

أزيك يا أبو حميد
والله بتوحشنى جدا
كلامك الجميل بيحيينى ويرجعنى تانى للعالم التدوينى ده
أنا ليا فترة مش عارف أكتب حاجة بس دلوقتى عايز ارغى
أستأذنك عشان وراريا رغى
وربنا يخليك لينا
مع اصدق تحية
السلام عليكم ورحمة الله

الباحث عن الحقيقة said...

مع اصراري
والله يا عم مصطفى انا استغربت برضه من تأخرك
بس قلت الراجل مشغول يمكن بييجي يلاقي البوست طويل يبص ويمشي
اتاريك كنت متوقف برضه
ليه بس كده يا شيخ
كمل يا باشمهندس احنا التدوين بالنسبالنا رسالة
كمل كمل
هسيبك ترغي براحتك وبكره اعدى عليك اشوفك قلت ايه

Anonymous said...

انا زعلت: )) اذاي ما تجيبش سيرتي بالقليل او بالكثير , كده ماليش اي تاثير في الفضاء السرمدي : ))) انا محتاجاك جدا جدا جدا eshelbaia@gmail.com
بخصوص الحمله

شكرا وكل سنه و مدونتك طيبه وبخير

الباحث عن الحقيقة said...

ايمان
الاخت ايمان تلات اربع مدونتك بالانجليزي
وانا كل مادخل على حظي بصادف بوست بالانجليزي
طب اعمل ايه يعني
بس اللى بالعربي ممتاز والله
انتي شخصية سلسه وطبيعية وتلقائيه وبسيطة
ومن اللي بتقوله عنك لعلها خير نحس انك جدعة والله اعلم
:)
شرفتينا بزيارتك
لما تكتبي بالعربي كتير هبقى احطك في القايمة
انما دلوقتي خليكي في القاعدة لغاية ما ربنا يفرجها واتعلم انجليزي

جنّي said...

هي دي أخرة الصداقة

جئتك حزينا مهموما تركتي وخلعت

ولم تحدثك نفسك بزيارتي وتفقدي

وتقولي مالك فيه ايه

الظاهر كانت معرفة قروانة

شكرا صديقي العزيز وأخي الكريم

sakayar said...

سلامو عليكم
تعال هنا ... ايوة ... قرب وتعال اقف ع البلاطة دي .... بسررررررعة
كل سنة وانت طيب عسقول على الاستراحة
اول زيارة مني لمدونتك ومستغرب فعلا اني مش جيت هنا قبل كده
ولما لقيت اسمك الباحث عن الحقيقة استغربت جداً واني شفت اسمك واللينك بتاعك ده كتير بس سبحان الله عمري ما عملت كليك ع الاسم ودخلت ... مش عارف ليه
بس زي ما بيقولوا " يا حبيبي كل شيء بقضاء" ههههههه
ممكن ربنا كان مأجلني آجي علشان اول زيارة ابقى داخل عليك بجاتوه وصواريخ علشان افرقعها ف المدونة عندك
مش هخبي عليك وانا بقرأ البوست ده النهاردة وانت بتتكلم على الأغاني وابن حزم والعلماء اللي بيلووا الأدلة ... أنا زعلت ... علشان انت نفسك قلت نعرض الأدلة الضعيفة والصحيحة والآراء كلها ونسيب الشخص يختار... فمينفعش نحكم على حد بلوي أدلة ... إلخ بس بعد ما كملت قراءة فهمت نظريتك وعذراً على اصدار حكم سريع عليك قبل ما اكمل قراءة ... عارف بقى قلب ابيض يا عسقوووول
على فكرة دي طريقتي في الكلام دايما بدخل على أي حد بهزار ...حتى لو أول زيارة ... أرجو مش تكون متضايق ...حتى أخونا الكبير عصفور المدينة كان بيننا العشم ده من أول زيارة
المهم بقى علشان انا بقيت لكاك الفترة دي كتيييير ومش عايز اطول
ألف مبروك وكل سنة ومدونتك على طريق الحق والحقيقة دايما وربنا يسدد خطاك للخير
وعذراً ممكن أدخل كتير وتعليقي يكون قليل لإني الوقت عندي غريب مش بعرف اتحكم فيه اوووي فيادوب بقرأ واتابع الناس بس ان شاء الله اكون متابع جيد لحضرتك
ومبسوط لان فيه في العائلة التدوينية شخصية جميلة نحسبها على خير زي حضرتك

الباحث عن الحقيقة said...

جني
قروانة ايه بس
ربنا يخلي الجي ميل
بس انت مختفي ليه تاني


************

سكايار
معلش هو بوست طويل شوية
انما لو كنت ركزت اوي كنت هتعف اننا اتنيييييييييييييييين
222222222222222
انا احمد - الباحث عن الحقيقة
والثاني عسقول -ابن حجر العسقلاني

بس ولا يهمك ماتفرقش اصلا المهم ان افكارنا توصل للناس
بس حبيت اعرفك المعلومه دي من البداية بس
:))))

يا هلا يا هلا
شكرا لزيارتك وصواريخك

كوارث said...

مبروك يا باشا وعقبال 100 سنه
تم اضافة النقد اللى طلبته على سر الكلام

FaceMoon said...

كل سنة وانت طيب ويارب تفضل تتدون كدة عالطول وتمتعنا بكتاباتك واراءك دايما