Saturday, August 2, 2008

أنا عندي برد

السلام عليكم ورحمة الله وبركاته
أنا عندي نزلة برد
الغريب انى عمرى ما اخدت برد طوال حياتي غير مرتين
والاتنين في الصيف
امبارح قاعد لافف بشكير فوق دماغي زي واحد لابس عمامه كبيرة ..اخويا محمد شافني وقعد يضحك ويقولى مالك كده شبه حاكم الخرطوم
المهم بقالي كتير مش دردشنا سوى ..قلت ندردش
على فكره لسه لافف البشكير ..فاذا خرفنا شويه فأستحملونا
زمان وانا صغير
ايه مستغربين ليه مش اتفقنا اننا هنخرف شوية
ولا كده يبقى خرفنا اوي
ما علينا
زمان وانا صغير.. الكلب بتاع ام اشرف جارتنا عضني في ايدي
بصيت لقيت ام اشرف جابت المقص وقصت شوية من شعر الكلب وحرقتهم في غطا علبه صغيره وراحت حطتهم مكان العضة ..والحمد لله بقيت بخير من غير مستشفى ولا حقن
الكلب بقى ..مات
اه والله مات
لالالالالا ذهنكم راح بعيد مش انا ده مات بعدها بكذا سنة
واحد كان متغاظ منه حطله سم في حتة عضمة وقتله وقيدت الجريمة ضد مجهول
يعني انا برئ الحمد لله
على فكره مجهول ده شايل قضايا كتير عن ناس ياما منهم ناس كبار ..انا بدأت اشك ان مجهول ده بيقبض فلوس مقابل تقييد القضايا ضده
يلا اهي ارزاق احنا هنق على الراجل كمان
وزمان برضه لما كان صابع رجلي الكبير يتعور ويقيح " يعععع بقرف كل ما افتكر " كانت ستي ام فوزي برضه في علبه صغيره بتاعة سالمون وتحط شوية ملوخيه على شوية لبن وتعجنهم وتربطهم على صباعي
انما اللي مش قادر افتكره ..ايه الحاجه اللي بسببها كانت بترقدني وتوقف معزه فوق وشي وتقعد تحلبها على وشي
انا بقول يمكن علشان الخضة مثلا
اصل انا كنت اخاف من العنكبوت اوي
........................
ثواني الواد صالح معايا على الماسنجر بيقولي قلبظ خطب
قلبظ عباره عن تلاجة متحركة
كنا مره في الفصل في ثانوي ونفاجئ بيه في حصة الرسم بيطلع ازازة ساقع من جيب الجاكت
كان شايلها ازاي معرفش
طبعا ابلة الرسم كانت غلبانه اوي ..حتى مكنتش بتعرف تاخد الغياب ولما تيجي تحلف تحلف بالنعمه ..نقولها يا ابله انتي مش عارفه تعديهم كويس جايز غلطي ..تقول والنعمة عديتهم بقولك والنعمه
افتكرت ابلة تانية كانت صغيرة كده وقصيرة وجت قعدت قدامنا تحس انها عيلة صغيره ..كانت بنت وكيل المدرسة
اه كوسه طبعا علشان يعينوها في مدرسة ثانوي ..بس مش مهم اهي كانت بتدرسلنا تربية وطنية
فطبعا كنا عاملين دوشة ..فقالت : سكوووت اللي هيتكلم هجيبله بابا
طبعا الفصل كله فطس من الضحك ..تاني يوم اختفت من المدرسة في ظروف غامضه
الابلة بتاعة الاحياء بقى كانت مدرسة كبيرة وكان ميهماش
فمره سألت الواد ابراهيم تختخ سؤال : الكروموسومات موجوده فين ؟
فابراهيم راح مبتسم ابتسامه خبيثة مع كسوف..الفصل فهم قصده فكلنا ضحكنا
فراحت وقفت جنبه ومصممة تعرف منه الكروموسومات فين
والواد ابراهيم بصراحة كان جبل مقدرتش تعرف منه حاجه
كل اللى كان بيعمله ان يبتسم وخدوده تتنفخ اكمنه طخين
فراحت مسكته من خدوده وقرصته وقالتله الكروموسومات هنا ولا هنا وراحت ضربته على بطنه
كنا نفتكر الموقف ده ونقوله : عارف ياد يا ابراهيم انت انكتبلك عمر جديد ..لو كانت ضربتك تحت شويه كانت ضيعت مستقبلك
ههههههههههههه
الكلام ده كنا في سنة اولى ثانوى ..علشان كده كلنا دخلنا ادبي
طالما العلم قليل الحياء كده يبقى نخش ادبي احسن ولا تجيلنا واحده تقولنا الكروموسومات فين
نرجع لموضوعنا علشان شكلنا بعدنا اوي
ايه التخاريف دي ..وايه اصلا سبب الحكاوى دي
وايه الموضوع
انا مش فاكر حاجه خالص
ده عيل تايه ده ياخويا ولا ماله
هو انا مش سخن ..بس عرقان معرفش ازاي
بمناسبة ماله ده يا خويا وشغل المسرحيات وكده
انا كنت كاتب مسرحية زمان اسمها الواد هاملت العربجي
نفس الخطوط العريضة او التفاصيل العامه لمسرحية هاملت بس مع تمصيرها
أو بمعنى ادق ..تبحيثها نسبة الى الباحث
باختصار كده علشان عيانين ..وكمان عايز اقوم اعمل شوية آيسون
اتهريت ليمون اتهرييييت
المشهد : هاملت شاب في اوائل العشرينات يرتدي لبس عربجية كلكم عارفينه ويجلس على مقهى ولا يوجد غيره من الزبائن حيث ان الوكت قد تأخر, ويدخن سيجارة بانجو وفي غاية الانسطال ابن المساطيل
عامل المقهى : القهوجي يعني -واد يا هاملت اطفي السيجارة دي ياله انت عايز تودينا في داهية
هاملت : ياعم اجري انت بس انت فكرك يعني الحكومة ما تعرفش اننا بنشرب.. طب ده بكره يفرقوه على بطايق التموين بس اصبر انت بس
القهوجي :( في غضب ) طب يلا قوم روح عايزين نقفل
هاملت :(مسطول طول الوقت) اروح ازاي دلوقتي انت عايز جوز امي يهزأني اجري اعملي قهوة خلينى افوق واركز شوية
القهوجي : ( مستفهما ) صحيح ياله يا هاملت - انت ازاي وافقت ان عمك يتجوز امك؟
هاملت : انت حمار ياله - مش احسن ما يتجوزها حد غريب
القهوجي : يا واد افهم ..وليه ما يكونش عمك اتجوزها علشان طمعان في ثروتكم
هاملت : ( يضحك في هستيريا) ثروة ايه يا هبل انت هو احنا حيلتنا حاجه ده هو بيت قديم مفيش غيره
القهوجي : ( هامسا ) ياله دول بيقولوا ان بيتكم ده في كنز تحت الارض ..فيه دهب كتير
هاملت : بص ..طالما عمي شايف مزاجي وبيروشني ..حلال عليه يا عم
القهوجى ( بغيظ ) عليا النعمة انت واد اهبل ..ويتركه ويغادر المسرح
في هذه اللحظة ينشد هاملت ويدندن مع نفسه اغنية هابطة : بحبك يا حمار
دخان كثيف يظهر من جانب المسرح المقابل للجهة التى يجلس بها هاملت ثم يظهر من خلاله رجل في زي عربجي ملامحه تدل على انه جاوز الخمسين من عمره ويختفي الدخان تدريجيا فيما هو يتقدم خطوات قليلة تجاه هاملت ثم يتوقف وينظر ناحية هاملت بإشمئزاز
هاملت : يا ساتر ايه الدخان ده كله ..ولا انا عينيه زغللت ولا ايه
ومين ده اللى واقف هناك ..ده يظهر عليه زبون .. ينظر ناحية داخل المقهى الذي لا يظهر للجمهور - تعالى ياله زبون تانى اهو يابن الفقرية وكنت قال عايز تقفل
أبو هاملت : إزيك يا هاملت
هاملت : الله ..ده باين عليه يعرفني ولا ايه ..ازيك ياعم الحاج
ابو هاملت : عم الحاج !!!!!!!!!!!؟
هاملت : وكمان مش عاجبك عم الحاج ..اقولك.. ينفع عمتي الحاجه ..هاهاهاهاهاهاااا
ابو هاملت : وكمان بتتريق ومش عارفني ..فوق ياله احسن اكلك قلمين على وشك
هاملت ( معترضا غاضبا ) لااااا يا عم الحاج ..فوق شوية انا اللي كان بيضربني واحد بس ..ابويا واتنيل مات خلاص ..وما يستجريش حد يمد ايده عليا
ابو هاملت : ماهو انا ابوك ياهبل يا مسطول
هاملت: ( باستغراب ) يا عم انت ما سمعتنيش كويس ولا ايه ..مش بقولك ابويا مات
ابو هاملت : ابوك ما متش يا غبي ..ابوك انقتل
هاملت : لا مات موتة ربنا وشبع موت كمان ..واذا كان هو هيرجع في كلامه ..فانا مش هرجع ..ده انا ماصدقت يا عم ده كان كاتم على نفسي
ابو هاملت : اصحى وركز معايا بقولك انا ابوك ..بص في وشي كويس
هاملت : عايزني اصدق انك ابويا ؟
أبو هاملت : ايوه طبعا لاني ابوك
هاملت : خلاص انا همشي وانت حاسب القهوة .. ويهم بالانصراف مارا من امامه فيتناوله أبوه بقوه ممسكا به من قفاه ويجذبه نحوه فيصيح هاملت وكأنه يشاهده اول مره ..مين أبويا ازيك يابا بالحضن
أبو هاملت : ( يدفعه ناحية المقهى ليجلس مره اخرى ) دلوقتي بس بتقول ابويا ..لما حسيت خلاص انك هتنضرب ..اه يا جبان ..اقعد عندك واسمعني كويس
يجلس هاملت في مكانه الاول وفي هذه اللحظة يدخل عامل المقهى موجها حديثه لهاملت بالانصراف ثم يفاجأ بوالد هاملت امامه
القهوجي : يلا بقى يا عم هاملت علشان تمشي احنا هنقفل خلاص ..الله مين عم ابو هاملت ازيك يا حاج انت جيت امتى حمد لله على السلامه- ثم موجها حديثه لهاملت- إلحق ياله يا هاملت ابوك رجع
هاملت : ( بقرف ) آه رجع
القهوجي : بس ياله هو مش كان مات وطلع فوق خلاص في العالم الاخر
هاملت : ماهو مسكوه فوق في المطار يظهر التأشيرة طلعت مضروبة فرجعوه تاني
القهوجي : عملها الحانوتي النصاب - ثم يخبط كف يده في رأسه وفي ذهول - لالالا انا اكيد انسطلت ميت ايه ده اللي يرجع ..اكيد دخان الهباب اللي بتشربه ده هو اللي اثر عليا ..منك لله انت تشرب وتنفخ وانا اشم وانسطل ..اروح اطس وشي بشوية ميه - وينصرف داخلا الى المقهى
...................................
وكفاية كده علشان العرق خنقني ومش قادر اشغل المروحة هروح اعمل ايسون

48 comments:

mony said...

السلام عليكم

شوفت انا عوضتهالك ازاي

موني اللي كانت دايما في اخر الفصل بقت اول واحده


اولا: سلامتك

ثانيا: بلاش لما تستحمي تروح عند المروحة تاني

رابعا:حاول تفتكر جدتك كانت بتحلب المعزة في عينك ولا علي وشك عموما


اخيرا بقي

تخاريفك دمها خفيف



و عقبالك زي قلبظ

الباحث عن الحقيقة said...

موني
ربنا يخليكى ويجبر بخاطرك
صحيح جايه وايدك فاضية من غير كيس مانجه ولا بطيخة او حتى بربع ليمون
انما كفاية مجيتك

هو انا جيت من بره عرقان فرحت قالع وحطيت راسي تحت الحنفية وقعدت تحت المروحة جيت بالليل لقيت نفسي استهويت
الكلام ده بدأ الاربع ..وحتى اليوم
يلا ..الشافي هو ربنا
وسوري اني نزلت جزء هاملت بعد التعليق
اتمنى لما ترجعي ابقى تقريه

واحدة مفروسة said...

السلام عليكم
سلامتك الف سلامه يارب
إلا برد الصيف ده مؤرف آخر ارف
و بعدين انا جيبالك معايا قفصين لمون
تعصرهم كلهم
و تحط عليهم معلقة عسل واحده
و بالهنا و اشفا
و على العموم ما تقلقش
تخارف دور البرد مش تخوف
هيه تخوف
لما تبقى اكتر من بوست
هههههههههههه
سلامتك
وكل سنة و انت طيب
و رمضان كريم

الباحث عن الحقيقة said...

واحده مفروسه
اه والله ده مقرف بجد
الدور الاول كان من سنتين قعد معايا تسعتاشر يوم

عوما برضه تشكري طمنتينا شويه
ورمضان كريم عليكم
ونعتذر عن التقصير والله ربك اعلم بالظروف
والف شكرا يا فندم لزيارتك وتعليقك
ربنا يجعلك مثل ثواب صلة الرحم

بت خيخة وأى كلام said...

ههههههههههههههههههه
ههههههههههههههههه
الف سلامة عليك يا معلمى

بس عيب اوى الحركات دى
بقى انا قاعدة ومندمجة اوى فى المسرحية
تقوم تسيبنى وتروح تعمل ايسون

ماشى يا عم
هنستناك تعمل الايسون وتيجى تكمل المسرحية

والف سلامة عليك

اختك خيخة

الباحث عن الحقيقة said...

بت خيخة عندنا
يا مرحبا يا مرحبا
العدد كمل ..قيدوا النار
نيهاهاهاهااا
" ضحكة شريرة عسقلانية"
شكلك قريتي عليا علشان ما جيتش اتبرع ادينى كنت عيان من يوم الخميس يعني من قبلها بيوم
بركاتك
:(
" وش متغاظ "
بس قوليلي انتى بتضحكي على هاملت بس ولا حاجه تانية
")
" ابتسامه خبيثة"
وبعدين ايه التربص ده
يعني انتى هتفضلي لابده كده في الدره لغاية ما اخلص الايسون
عموما لو الايسون خلص ..الليمون لسه ما خلصش
نيهاهاها
شرفتينا ونورتينا يا مدام نوران
حلوه الريحه اللى انتي حاطها
ده صابون لوكس ولا مزيل عرق
نيهاهاهاها
" ما قلنا ضحكة شريره عسقلانية "

mony said...

هههههههههههه


حلوة ايسون ديه


طيب ما القهوجي كان موجود

لو كنت كملت المسرحية كان ممكن القهوجي يعملك (الايسون) بتاعك




و كان هيبقي علي ريحة فلة تسطل و تضيًع احساسك بالتعب


اديني جيت تاني علشانك مخصوص و معايا ليمون و عسل تاخدهم 3 مرات في اليوم

تعمل ليمونتين وتحط عليهم ملعقة عسل و يادوب تدوبهم في شوية ماية دافية صغيرين خالص


و هتبقي فلة ان شاء الله

ňįĝŗő said...

أبو البواحيث
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك

حمدلله على السلامة
يا راجل توّك ما افتكرت
ألف ألف ألف سلامة عليك يا أبو حميد من برد الصيف اللظيظ جداً
ألا انت بقى بتتكلفت ببطانية و كده
ولا إيه؟
و عاجباني جداً حكاية المدرسة اللي قالتلكم هأجيبلكم بابا دي
ياعيني
دي كانت نايتي خالص
المهم حمدلله على سلامة رجوعك
و ألف سلامة عليك من البرد في عز الحر

أنا شوفت رفيقك يا ريس
و قابلته و اتكلمت معاه
ابن حجيجير
مش هأنشوفك إنت كمان ولا إيه؟
ع العموم هو قاللي إنك ناوي تنقل للقاهرة و أفتكر إن بالشكل ده هأشوفك قريب إن شاء الله
عاوز أشوفك بقى يا أستاذي


يلا سلام

kochia said...

سلامتك
هو برد الصيف كدة دياما يعمل حالة ابداع
ممكن يكون ابداع عبقري
او ابداع تخريفي

بس المهم ابداع

تحياتي

الباحث عن الحقيقة said...

موني رجعت تاني يا مينز
رجاله بالعنجليزي
شكرا يا دكتورة ست ابوها على وصفة الليمون والعسل
بس ما قلتيش عسل اسود ولا اسود
ماهو الابيض هييجي منين في البلد دي كله بقى اسود خلاص
يا ساتر
حتى اسألي هاملت

الباحث عن الحقيقة said...

واد يا نيجرووو
إلا صحيح انت طيب زي ما بتقول خيخة
بس ده رأي خيخه ..يعني لا يحتج به إلا في المحاكم الخيخاوية فقط
بس تصدق لما قريت ردك لاحظت اني روقت شويه
مش عارف ده كان قبل ما اقرا ردك ولا بعده
سرك باتع يا مضروب

ربنا يخليك يا نيجروو باشا واحنا يحصلنا عظيم الشرف بمقابلتك
بس الوعكة الصحية دي تعدي على خير وهنشوف موضوع الانتقال ده

الباحث عن الحقيقة said...

كوشيا
ده كبسول ولا حقن
:)
دي دعابة اول زيارة
منور يا باشا
ابداع تخريفي
ابداع عبقري
طالما المهم ابداع
يبقى تحاسب على المشاريب طالما برنامج الحفلة عجبك
شكرا على الزويارة

appy said...

لا سلامتك بجد والله زعلتنى على الفوطه قصدى عليك

وكل اللى انت قولته ده عاوز تقنعنى انه تخاريف برد
امال لو مش تخاريف كان ايه اللى حصل بجد
وبعدين ايه قصه الكلب هما قالوا ليه انك السبب لا مش جاله تسمم هو اتقهر على الشعر بتاعه اللى اتحرق ومش فاهمه ايه علاقته بالجرح فهو برضه سال نفسه السؤال ده واتقهر على عمرة مات ههههههههههههههههههههه

ابن حـجـر الـعـسـقـلانـى said...

يخرب بيت دماغك ... أنا صوتى جاب آخر البيت من الضحك

هاروح أصلى المغرب و آجى أكمل التعليق

ماعرفش أنا هاصلى إزاى ... بالتأكيد هاضحك فى وسط الصلاة

norahaty said...

السلام عليكم ورحمة الله وبركاته
الف لاباس عليك ياباحث ومعلش هو الناس (الجامدين )ما بيجى لهم البرد الا فى الصيف وما تسألنى ليه؟ مش انا دكتورة بس برضه ماعرفش!! يمكن بيكونوابيحافظوا على نفسهم كويس فى الشتا يقوم البرد مستحلف لهم فى الصيف و
(وياخذهم على حين غرة)يعنى فى لحظة مش واخدين بالهم ويلا هوب يتمكن منهم
على العموم الف لابأس عنك ونصيحتى الراحة التامة والسوائل الدافئة بكثرة (وكمان القط بتاعك اللى عمال يشرب سجاير ده يبعد عنك شوية)
سعدت وضحكت اوى وانا الضحك عندى (نادر)هذه الايام بزيارتى لمدونتك فجزاك الله كل الخير واسعدك الله كما اسعت وتسعد كل من يقرأ هذا الكلام الجميل.
تحياتى ودعواتى بتمام الشفاء وتمام العافية بإذن الله

الباحث عن الحقيقة said...

appy
متشكرين يا رحاب على خوفك على الفوطه
بس هي بشكير بقى مش فوطه
عموما هلفه زي ماهو من غير غسيل واجيبهولك تذكار طالما قلقانه عليه كده
ملحوظة : انا احلى ابداع بيطلع مني لما بخرف
وبعدين كل ده كان وليد اللحظة والله حتى كلام صالح معايا على الماسنجر وقت ما بكتب البوست فكرني بايام ثانوي
منوره يا آبي
وخدي بالك احسن يجيلك برد ..علشان مش نقلك على الفوط بتاعة ماما ..طلعي من فوط جهازك

الباحث عن الحقيقة said...

عسقووول
بطل الجمهورية في تحليل البول
قصدي الهيموجلوبين
فينك يابني ..وتقولي انا على الجوجل توك على طول ولا شايفك ولا حاجه ..قلت يكونش حصله حاجه لما اتبرع بس خيخة بتقول انك كنت زي القرد وعايز تتبرع تاني
فينك يا عم
وايه يخرب بيت دماغك دي
هي البت خيخة عملت فيك ايه
ولا ده من تأثيرات الاعارة بتاعة فرنسا والرايق
لا انا لازم انزلك كاسبر وشوف ايه اللى حصلك انت محتاج
scan
وكل ده بتصلي المغرب

الباحث عن الحقيقة said...

norahaty
دكتوره!!!!
ده انا كنت فاكرك صحفية
استني اشوف كده
اه صحيح ده مكتوب طبيبه بشرية
اولا مهما كانت سعادة حضرتك والضحك اللى ضحكتيه فسعادتي انا بتشريفك اكبر بكتير
لاني مقصر جدا في رد الزيارات دي بس والله غصب عن الواحد
وشكرا ليكي جدا وربنا يسعدك دايما
وشكرا على وصفة السوايل دي وكويس انك ما جبتيش سيرة البرشام علشان انا اتعقدت من كتر الاصناف ..هو البرد له حاجات كتير كده ليه
يا ريت قايمة بالممنوعان والمسموحات من الاطعمة خلال الازمة دي
ويبقى ليكي عندي بوست مضحك ..ممكن يعني اكتبلك الفصل الرابع من مسرحية العيال كبرت
هههههههههه

ابن حـجـر الـعـسـقـلانـى said...

ياد انت مش معقول ... تعليقك موتنى من الضحك ... معلش أصل عندنا بيصلوا التراويح فى شعبان .. و بيصلوها بعد المغرب

بس بجد الموضوع بتاع الكلب اللى مات دة .. و إنه مات مسموم بسم فى العضمة موتنى من الضحك

و حكاية الضرب على البطن و المستقبل اللى ممكن يضيع دى كانت هاتوقعنى على الأرض من الضحك

معلش اتأخرت عليك عشان روحت أنا و أمى عند خالى .. أصله تعبان حبتين

المهم يا برنس .. أنا هابقى أفتح جوجل توك إن شاء الله .. و معلش كنت مشغول فحت

و ياللا .. أشوفك أمس

الشنكوتي الكبير said...

يا ابني يا حبيبي لما تشعلقنا كده على باب المدونه وتقعد تدخلنا في الغريق تدخلنا في الغريق وهوب تنطرنا بالشلوت علشان اليسون بتاعك قوم فز هات اليانسون وارجع كمل المسرحيه عايز اعرف الباقي

=================

بجد جامده قوي مع اني مكنتش بحب التمصير للقصص العالميه بس ده علشان دايما بيتعمل بصوره تقليد غبيه جدا انما المره دي الفكره تشد قوي عايز اعرف انت نويت تحورها لأنهي درجه البدايه جامده غيرت ملامح كتير في القصه بس فعلا بقت شبهنا بجد بجد عايز الباقي كمل بقى الله يخليك

علشان اجيبلك علبة كونجستال تتعالج بيها من البرد

ربنا يشفيك يا كبيييييير

سلااااااااااااااااااااااام
اخوك ايهاب

ana ga3an said...

موضوعك دمة خفيف
ومدونتك بشكل عام لطيفة اوي

اة علي فكرة الطريقة اللي ام اشرف استخدمتها معاك
اسمها العوادة
هي من العلاج الشعبي
ويختص بة الناس القديمة جايز من ايام ملك مصر

الباحث عن الحقيقة said...

عسقووول
بطل الجمهورية في ...الهيموجلوبين
هههههههههههههه
ماشي يا عم
لما نشوفك على جوجل توك ابقى نرغي

***************

الشنكووووتي الكبييييير

معلش هو الشلوت جه فيك
لالالالا معلش العتب على النظر انت عارف برد وكده
معاك حق كتير التمصير بيكون بايخ خاصة
خاصة لما يكون استغلال لقصة او فلم ناجح فيتم تمصيره لتقديمه كعمل فني سينمائي وهو لا يمت للواقع المصري بصلة
انما هنا احنا اخدنا فكرة هاملت امعانا في السخرية وثانيا : صورة كاركاتيريه تقوم على سؤال لو كان هاملت ده شاب مصري من بيئة مصرية ..بيئة بمعنى بيئة يعني .كان هيبقى شكله ايه ويتصرف ازاي
الموضوع كله نكته ..رغم انه مع بقية المسرحية بتبان الابعادالسياسية المقصوده من وراء العمل
وايه رأيك بقى مش هجيب الايسون
فز قوم هاته انت
اه فرصة بقى ولازم استغلها
هههههههههههههه


************************

انا جعان

وانا عيان ..وجعان برضه
وشكرا لتشريفك
وجميلة اوي المعلومة دي بتاعة العوادة
يعني حاجه معروفة اهي ومتجربة
متشكرين يا باشجعان ربنا يجعلك في كل خطوه رغيف

على صوتك said...

السلام عليكم
اولا الذكريات هايلة جداً مالهاش حل ودمها شربات
ثانياً مسرحية هاملت رائعة بجد انت ماحصلتش دمها سكر
الف سلامة عليك ان شالله هاملت وانت لأ

norahaty said...

السلام عليكم ورحمة الله وبركاته
ياباحث باشا
اسمع كلامى
البرد احسن حاجة له الراحة التامة فى الفراش لانه اساسآ فيروس والفيروس اساسآ اجسامنا هى اللى بتعمل الاجسام المضادة له والراحة والسوائل الدافئةوالاكل الخفيف المغذى هم اساس العلاج اما البرشام وووو فهذاهو رزق ال...على الم.... وافهامها انت.
والشفا من عند الله وحده هو الشافى من كل داء وبلاء
(يلا ايدك على حق الكشف الخصوصى ده
ماتبصش لىّ عايزين حق الكشف يلا)
سلامتك الف سلامة وشافاك الله وعفاك انت وكل مريض

Doba said...

انت مش ممكن
بجد وقعتنى على روحى من الضحك
==========
احلى ما فى طريقتك الانسابية الساخرة
=====
انا عمالة اضحك
مش عارفة اكتب
هروح اعمل نيسكافية بقى

تحياتى
هبة

همسة قلم said...

بداية شفاكم الله وعافاكم اخي الباحث ..

طهور واجر ان شاء الله

اما الاخ هاملت فربنا يعينه على الانسطال اللى هو فيه

اسلوب ساخر وسلسل بس مستنيين اخرتها :)

دمتم بخير

الباحث عن الحقيقة said...

عليّ صوتك
يا اهلا بالمجلة
شكرا لزيارتكم واعجباكم بالجزء من مسرية هاملت
نردهالكم في الافراح


**************
norahty

اهلا يا دكتوره
طب انا عملت بنصيحتك وكفاية برشام لغاية كده
خلينا مع المكافحة البيلوجية
وبخصوص المثل الظريف اللى قولتيه فعلا انا مصدقه في موضوع البرد ده
اصله غريبة ان فيه سبعين حاجه للبرد ومفيش حاجه بتقطع فيه
ربنا هو الشافي
ومفيش اجرة كشف
ينفع اقولك نكته
:)

الباحث عن الحقيقة said...

هبة دوبا

هههههههههههه
تتصوري انا كان المفروض اخلي الدخول للبوست ده بتذاكر..علشان خاطر المسرحية
وانتي بالذات تقطعي تذكرة عائليه علشان خاطر يحيى ويوسف

ولا اقولك علشان خاطرهم ..خليها علينا
هههههههه
وسعيد بتواصلك معنا ..حضرتك دخلتي التاريخ معانا وبقيتي جزء من ذاكرة المدونة وافتكرتك قبل كده لما كتبت عن تاريخي التدويني
منوره يا فندم ..ما تجيبي شوية نسكافية

**************

همسة قلم
المدونة التي ارفع لها قبعتي احتراما وتقديرا لاول مدونة اضافة مدونتنا في قائمة مفضلاتها
جزاكم الله خير
وشكرا على التواجد اللي اسعد قلبي جدا

عموما هاملت اتقبض عليه لما يخرج هنكمل

norahaty said...

السلام عليكم ورحمة الله وبركاته
انت لسه عياااااااااان!!!!!!
لأ بقى ده اسمه العلمى
تمااااااااااااااااااارض
تتحول فيه على التحقيق
وتسوى الاجازة اِداريآ
وشوف بقى؟؟
سلامتك
منتظريين
جديدك

عايزه اتطلق و said...

السلا عليكم ايها الاخ الكريم الباحث عن الحقيقه انا بقه الباحثه عن مدونتك من ساعة ما قريت تعلقك الكريم عندى فى المدونه واليى مش هقدر اعبرلك بسطنى واسعدنى وفرحنى قد ايه جزاك الله كل خير ومن ساعتها وانا بدور على المدونه لغاية لما لقيتها مكنتش مصدقه نفسى بس قولت اكيد كتر البحث ده فيه خير وده واضح من مدونتك الجميله فعلا وفعلا جزاك الله عنها كل خير دى مكتبه دينيه بسمالله ما شاء الله ربنا يجعله فى ميزان حسناتك ...وتعليقك كمان مره اسعدنى جدا جدا وارجو المدونه تفضل كده علطول عند حسن ظنك ..جزاك الله كل خير وفى رعاية الله وامنه.

سبهللة said...

الف سلامة عليك
بيقولوا برد الصيف احد من السيف
شفاك الله وعفاك
اللهم اشفى مرضى المسلمين وارحم متى المسلمين وانصر المتضعفين من المسلمين فى كل مكان
اللهم امين
سلام عليكم

قررت أكون عانس said...

قلبظ عباره عن تلاجة متحركة
كنا مره في الفصل في ثانوي ونفاجئ بيه في حصة الرسم بيطلع ازازة ساقع من جيب الجاكت
كان شايلها ازاي معرفش


هههههههههههه

احنا كان معانا و لد فى المدرسة بيجيب سندويتشات كتيرة مربى و جبنة و بيض...الخ

طبعا السدويشات بالنسبة له صغيرة فكان يجمعهم كلهم و ياكلهم كلهم مرة واحدة

عاشــــــ النقاب ـقــــة"نونو" said...

السلام عليكم
الف بعد الشر عليك
عليك وعلى زنجبيل بليمون وعسل ابيض
وبالشفا باذن الله
رمضان كريم
بس الظاهر الحرارة فعلا مرتفعة
سلامتك
تحياتي

الباحث عن الحقيقة said...

norahaty
تمااااارض يا طبيبه
وكمان ظالماني
ده بدل ما تيجي وفي ايدك كيس بتاع من اللى بيعملوه عصير
ماشي يا ستي
اقول ايه بس ..معلش نردهالك في الافراح
:(
وش متغاظ


***************

عايزه اتطلق و
محاسن صابر

شغل يا جدعان شغل
اذا كنتى عايزه تطلقي فانتي وصلتي للمكان المناسب
نتعرف يا فندم انا احمد المحامي
طلاق نقفة مؤخر اعيان جهاز كله احنا تحت امرك
ههههههههههه

اشكرك على تعبك وعلى زيارتك الجميلة
انا كمان سعيد بزيارتك دي

الباحث عن الحقيقة said...

سبهلله
خطوة عزيزه ..يادي النور يادي النور

فعلا برد الصيف احد من السيف واتقل من الفول بالزيت
ربنا يشفي كل مريض يا رب
شكرا للزيارة


****************


قررت اكون عانس

عندها 19 سنه وقررت تكون عانس
ايه التفائل ده
وبطلي قر على التخان ..شدي حيلك انتي وكلي كويس
شكرا على الزيارة

الباحث عن الحقيقة said...

عاشقة النقاب
نونو

ما شاء الله شكرا لزيارة حضرتك
ربنا يسعد قلبك ويفرحك باسرتك الصغيرة الجميلة ويبارك فيكم
شكرا على الزيارة
جزاكم الله خير

نهر الحب said...

الف الف سلامة عليك
بجد والله زعلات عشان البرد اللى جالك
سلامتك ان شاء الله اجر وعافية بأذن الله
راجعة تانى اعلق على الموضوع
حبيبت بس اطمن علىك
نهر الحب

جنّي said...

سلامتك الف الف الف سلامة
شفاك الله وعافاك
نسأل الله العظيم رب العرش العظيم ان يشفيك
اللهم رب الناس اذهب البأس اشف انت الشافي شفاء لا يغادر سقما

يامتر جريمة القتل لا تسقط بالتقادم .. المفروض يفتحوا تحقيق جديد شكل الكلب مات متسمما بعدما عضك ..

اضحك علشان تخف

مع السلامة

الباحث عن الحقيقة said...

نهر الحب
شكرا جدا جدا على زوقك واحساسك الرقيق
بجد اخجلتمونا بكرمك ده وسرعة اطمئنانكم علينا وحرصكم الجميل ده
ربنا يبارك فيكي ويخليكي


****************

جني
ابو السيد
ياااااه يا جدعان ده انت واحشني اوي يا عم سيد
طب انا خفيت خلاص اهو
ربنا يخليك يا عم الحاج
ما شاء الله ربنا يديك الصحة دايما كده
والبقية في حياتك الجثة بتاعة الكلب خلاص اتحللت والجريمة سقطت ولا يمكن التحقيق فيها
بقى بعد ده كله يا جني جاي تسأل عن الكلب
ماااااشي
لما تنزلنا بالسلامه لها حل
بس اشوفك يا عم سيد

دعاء مواجهات said...

الف الف مليون سلامة عليك

انا عارفة ان برد الصيف دة مفيش أأزعج منو بجد

ربنا يشفيك ياارب

_______________

اما بقى عن هاملت بجد تحفة اوى ودمها خفيف مووت

اتمنى التواصل

سلااام

دعاء مواجهات said...
This comment has been removed by the author.
Do not Press F1 said...

السلام عليكم
ههههههههههههههههههههههههههههههه
بجد اسلوبك جميل واحلى حاجه فيه انك قدرت انك تتكلم عن كذا حاجة من غير
ما الواحد يحس باى فصل بين الاحداث .
...................
بالنسبة للصباع التعبان دا انا بقى جدتى كانت بتعمل لينا
عجينة بسكر لا عجينة بسكر ايه بس العجينة بسكر دى لو طالع ليك
مسمار(المسمار دا فى لهجتنا الحباية الكبيرة)
كانت يتفتح تانى يوم على طول وتخف بقى .

...............................
بالنسبة لهاملت المصرى
هقول عليه اكتر من انه مصرى
وبجد اسلوبك جميل اوى بجد
.........................
حرررررررررررررررررررررررررام عليك بقى بعد ما تعشمنا ببقية الهاملت تخلى بينا
وتروح تبيعنا عشان كوباية ايسون.

سلاموز.

Jana said...

طب انا كنت داخلة اقولك شفاك الله وعفاك
بس بصراحة تهييسات البرد والسخونة كانت لذيذة

ينفع تكتب لنا حاجة كمان الله يخليك قبل ما تخف خالص
ههههههههههههههههههههههههه

لا يا باحث ..الف سلامة عليك
ان شاء الله الوحشين وهاملت وعمه والقهوجى وبنت وكيل المدرسة
:)

معلش متأخرة كتير
لو كنت خفيت بقى ..حوشلى سلامتك دى للبرد الجاى
:)
سلاااام

Soul.o0o.Whisper said...

السلام عليكم و رحمة الله و بركاته
إزيك يا متر ؟؟

أخبار البرد معاك ايه الوقتى؟؟
انا لقيت مونى جت فى أول تعليق قلت آخد انا بقى مكانها المرة دى فى آخر تعليق
:)

المهم يارب تكون الوقتى بخير
عشان تقريبا انا اخدت دور البرد فى نفس توقيتك
و لحد الوقتىلسه فى بعض الاثار الجانبية
ههههههههههههه


و معلش مقصرة فى الزيارة بس معلش
والله مدونتى لسه ما دخلتها
و مشغولة شوية الايام دى
ربنا ييسر كدا و ادخل قريب بقيت المدونات

ياللا شد حيلك
بالحق هتسافر امتى؟؟؟

جنّي said...

ايه يا عم احمد انت ما صدقت وبلطت في الخط ما تكتب دا فرصة دا انت حتى كانت تخاريفك في البرد حلوة .. انا بقى لا زلت في حالة ثبات ( بيات ) صيفي .. والكسل احلى من العسل .. بس بجد وحشتني الكتابة ووحشني المدونين والتدوين .. عالم رائع بصرف النظر عن بعض الصور السلبية .. بس فيه ناس زعلان منهم ما كلفوش خاطرهم يسألو عني ..
افوتك بعافية وتصبح على خير

عصفور المدينة said...

إيه أخبارك يا أحمد لعلك بصحة جيدة الآن

abo salah said...

بعد السلام عليكم

أولا ألف حمد الله على سلامتك
وألف لا بأس عليك

بس تصدق أن البرد عامل معاك شغل عالى أوى

تخارفك دمها خفيف أوى
خاصة موقف إبراهيم تختخ
هههههههههههههههههه

ومسرحية هاملت
بجد مسرحية دمها خفيف ياريت تكملها

اعتذر عن تأخرى الطوييييييييييل فى زيارة حضرتك
على الرغم من تشريف حضرتك ليا بالزيارة من مدة طويلة
ولكن أرجو أن تتقبل أسفى الشديد لأننى أملك اعذارى التى جعلتنى أتاخر فى زيارتك بل وانقطع عن التدوين فترة طويلة

تحياتى ليك
وألف سلامة على حضرتك
وكل سنة وحضرتك طيب وإلى الله أقرب

أختكم فى الله said...

السلام عليكم

الف الف الف سلامة على صحة حضرتك يا رب تخف بسرعة ان شاء الله

وكل سنة وحضرتك طيب بمناسبة رمضان

ربنا يتقبل صيامنا جميعا ان شاء الله