Saturday, September 27, 2008

أهي ختمت بحادثة يا مينز ..رداله بالعنجليزي

كله يوسع وياخد جنب
وقال ايه بيقولولي اكتب عن محاسن القاهره
اهي ختمت بحادثة يا رداله
كان يوم ظريف جدا وجميل ومروح بدري ومبسوط علشان خلصت شغل واجازتي هتبدأ وراجع بلدنا افطر مع امي
ونازل من ميني باص الهيئة الاخضر الجميل
وفي عز الهنا ضاع مني الهنا ..واتاريني حاطط رجلي في الهوا يا حبيبي رجلي في الهوا
ووقعت من الميني باص وقبل ما اتنيل اقوم كان المينى باص على مشط رجلي داس
أأن أن آااااااان أأن أن
مين ده اللى كاره دنيتك وبيشتهي موتك ..مين ده اللي موته في كلمتك وحياته في سكوتك
وفي اللحظة دي ظهر سوليمان وقالي مش هتروح يا دالي ..قصدي يا باحث
والنتيجة
الباحث تحت العجل = حقنتين في العضل
انا بإمانه مكنتش اعرف الحقن هاخدها فين بالظبط
لان كان معايا واحد صاحبي هو اللى راح معايا لما كشفت واخد الروشته وسمعت الدكتور بيقوله حقن
رحنا الصيدلية صرفنا الروشته وحاااان موعد الحقن
الباحث : مجدي ..هي الحقن دي فين بالظبط
رمضان : يا عم ماتخافش انت خايف كده ليه
الباحث : استنى انت يا رمضان ..الحقن دي في دراعي يا جماعة صح
مجدي : يا عم قلقان ليه دي الحقن احسن من البرشام
قال يعني الحقن دي بطعم التفاح
المهم وبصيت لقيت الولد اللى هيديني الحقنه بيقولي تعالى جوه
الباحث : طب ما تخلينا هنا واهي اللمة تشجع الواحد
مجدي : يا عم روح مع الراجل
الباحث : مجدي ..هي الحقنة دي بتتاخد فين بالظبط
مجدي : في دراعك بس روح يلا خلينا نمشي
رحت مع اخينا ده وفي حته مدارية ولقيته بيقولي : اقلع
الباحث : اقلع ايه يا عم مانا لابس بنص كم اهو
الولد الممرض : نزل البنطلون
الباحث : بنطلون مين
الولد : خلص بس ما تخافش
وماسك حقنه في ايده سبعة سنتمتر
الباحث : ايه ده كله انت هتديني الحقنة دي كلها
الولد : لا تلاته سنتمتر بس.. ما تخافش انت مش صعيدي ؟
الباحث : وانا علشان صعيدي اعملها غربال يعني ولا ايه
ما علينا وباختصار جزع في مشط الرجل ادى الى تورم
......................
المهم
اشكر كل من علق في بوست ملاحظات قاهرية
قريت تعليقاتكم الجميلة كلها وقلت اعلق سريعا هنا ..ايه رأيكم في الفكرة دي
اولا البوست اللى فات كتبته وتاني يوم ألتقيت بالمدونين في مستشفى ابو الريش
فجايز حصل خلط عند البعض وافتكروني بتكلم عن لقائي معاهم واني نسيت كم كبير من الاخوة المدونين
وانا من موقعي هذا وانا حاطط رجل على رجل لظروف صحية بقول : لا يا جماعة لاااا
ألتقيت بعدد كبير واخوة كتير والفطار الجماعي كان اكتر من ممتاز
اللى لاحظته في لقاءات المدونين انه رغم اننا بنكون بنتقابل لاول مره لكن بيكون فيه ألفة جميلة جدا وكأننا نعرف بعض شخصيا من زمان يعني اللقاءات لم تضف شئ اكتر من معرفة الوجوه
...................
نرجع للقاهرة في بعض المواقف اللي حصلت معايا
موقف ما يعلم به إلا ربنا
أكتشفت اني بعد الضهر لما بيكون عملى وشك على الانتهاء وفي حالة الارهاق اني بكلم نفسي بصوت عالي في الشارع وان ده لفت نظر بعض الناس اللي ماشية في الشارع لاني لاحظت انهم بيعدوا جنبي بسرعة ووشهم في الارض وزي ما يكونوا بيهربوا من حاجه او خايفين من حاجه
ما علينا
كنت مره في المواصلات وقاعد قدامي راجل كده بشوش كده فرحت مفاجئه بالكلام : تتصور حضرتك ان الواحد بقى بيكلم نفسه اه والله
الراجل انفجر من الضحك
..............................
موقف تلقائي
واحدة ست واقفه في الميني باص الهرم وركبت هي وبناتها اطفال صغيرين ووقالت للبنات تدخل جوه وطبعا زحمة فسمعتها بتقول للبنات :لو فيه حد مضايقكم قولولي وانا انزله
بصراحة انا ضحكت للموقف وحسيت ان هي دي الناس الشعبية الجميلة
شوية كده واللى جنبي نزل بصيت لقيتها قعدت في الكرسي جنبي وواحد من قدام امال يناولها في اكياس تحطها على رجلها
فرحت قولتلها بكل عفوية : هو فيه ايه ؟..هو انتى حاطه البنات في ناحية وانتى واقفه في ناحية وكنتى حاطه الاكياس في ناحية تانية انتى اخدتى العربية لحسابك ولا ايه؟
هي : قعدت تضحك وقالت امال لو كنت جبت العيال كلهم دول نصهم بص
انا : والاكياس دي ايه ان شاء الله الله دي حاجة المدارس ولا العيد
وقعدنا نرغي تقولش قاعد بكلم خالتي محاسن
.........................
موقف محرج
في البنك ومعايا ست مواليد سنة 33
جايه علشان تصرف شيك من البنك من حساب احدى المحاكم
المشكلة الاولى : الشيك باسمها الحقيقي الذي يحمل لقب هانم يتفق مع البطاقة الورقية ومخالف للبطاقة الرقم القومي
مديرالبنك بصلي
الباحث : اصل حضرتك ده اسم مركب ولقب والالقاب اتلغت وكده بس انا ممكن اضمنها
وتجاوزنا المشكلة دي باني اوقع ضامن لها
المشكلة التانية : وهى بتمضي كتبت اسمها الاول صح ونسيت اسم ابوها
مدير البنك بصلي وكأنه بيقولي هااا وبعدييين هي ولا مش هي
الباحث : اصل حضرتك دي مواليد 33 يعني لو سألتها انا مين مش هتعرفني..انا مين يا ماما
هي : انت المحامي
الباحث : ( في سري : يادي النيله رحنا في داهية ) شوفت حضرتك قولتلك انها متعرفنيش
مدير البنك :هو مش انت محامي
الباحث : اه بس انا اصل حضرتك اقصد انها متعرفش اسمي وبعدين هي استلمت الشيك من المحكمة ازاي ..هم هناك اتأكدوا يعني انها هي وبعدين انا همضي ضامن عادي يعني
ووقعت مرتين على الشيك اني ضامن للمستفيد واخدتها في ايدي ورحنا نصرف الشيك
الباحث : انتى متأكده يا ماما انك فلانه ..وقعدنا نضحك
..............
بس خلاص كفاية كده اما أروح امرهم رجلي = احط مرهم يعني
كلام في سركم لسه فاضل حقنة في الروشته بس مش هاخدها طبعا
انا مش هعقد كل يوم اوري عضلي للناس باسم الحقن
بالمناسبة انا روحت البلد - اسيوط
كل سنة وانتم طيبين

56 comments:

tota said...

انت محصلتش فطستني من الضحك طول منا بقرا
شكرا ليك علي الضحكة اللي رسمتها علي وشي ووش كل اللي يقرا كلاماتك الممتعه اسلوبك جميل وشيق
سلامي ليك وكل الود

مهندس مصري said...

ألف سلامة على رجلك يا باحث
شايف إنك إندمجت في القاهرة جوي يا بوي
ربنا يسعدك و تعقل و تبطل تكلم نفسك في الشارع
في البيت مفيش مشكلة
:))
و سلامي لأسيوط اللي قضيت فيها سنتين من اجمل سنين عمري

رئيس جمهوريه نفسى said...

الف سلامة عليك يا زمل تعيش وتاخد غيرها ونورت خط الصعيد من الجيزة لاسوان
وعيد سعيد عليك ان شاء اللة وبلاش تكلم نفسك فى منطقة العباسية انا خايف عليك

واحدة مفروسة said...

ههههههههههههههههههه
انت محصلتش اسلوبك فطسنى من الضحك
هههههههههههه
سيبك من رجلكديه حاجه عاديه
ولا الست و عيالها و شنط المدارس
و بلاش الحقد الاسود فى تفكيرك انها تكون بتعمل التقسيمة ده فى طابور العيش كمان
و سيبك من الست اللى من مواليد 33 اللى انت حسستنا انها من مواليد 1833 ده انت شرير شر
و خلينا فى المصيبه اللى حتعملها
حتمرهم رجلك؟؟؟!!!!
حديعمل كده؟؟؟!!!!
حد يمرهم رجله؟؟؟!!!!
يا شيخ انت عاوز تبوظها؟؟؟!!!
و تبوظ اخلاقها؟؟؟؟!!!!
خليهاناشفه كده علشان تتقبل الحياة الصعبة
من مشي و جزم ديقه..و دوسان على الزلط ..والكعبله..
هههههههههههههههههه
انت حكاية هههههههه
المهم اخدت نسبتك من الشيك
ضمنا الكحك ابو عين جمل

الباحث عن الحقيقة said...

توتا
غريبة وغربتك طالت يا توتا ..متنسيش تجيلنا معاكي تلاجه من ليبيا قبل الصيف ما يخلص
والحمد لله اننا قدرنا نسعدكم من احب الاعمال الى الله ادخال السرور على قلب اخيك المسلم
تصوري بقى حضرتك فرحتى بالتلاجه هيبقى اد ايه
:)

بت خيخة وأى كلام said...

هههههههههههههههههههههههههههههههههه
يخرب عقلك يا باحث

هو اكمنى صعيدي اعملها غربال
هههههههههههههههههههههههههههههههههههههههههههههههههههههههههههههههههههههه
لا طبعا مايصحش
قوم يا باحث وداري على عضلك

الردالة فى بلدكم يقولوا عليك ايه لما يعرفوا بإنك خدت حقنة فى عضلك بطعم التفاح

هههههههههههههههههههههه
بجد انت تجنن


تحياتي ليك
وابقى هات معاك عيش بتاع الست الوالدة

الباحث عن الحقيقة said...

مهندس مصري
تعرف الشيك اللى كنت بتكلم عليه طالع من ودايع محكمة دمنهور
خسارة ان القضية خلصت كنا شفناك يا باشمهندس
مره واحد زميلي بيسألني : ايه رأيك في دمنهور
انا : مستوى الجمال فيها عالي
:)))))
انت عارف بقى شباب وكده
:)

................

رئيس جمهورية نفسه
طب والله موضوع اني اكلم نفسي ده بدأ فعلا في العباسية
وكنت رايح هيئة الاستثمار اللى جنب مستشفى العباسية
وربنا يستر
شوف انت فقستني ازاي
دي حتى المحكمة بتاعتها يا راجل حاجه كده توقف نفس الواحد
شكرا يا زميل على الترحيب الحار صيفا وخوفك المليئ بالرعود الممطره

الباحث عن الحقيقة said...

واحدة مفروسة
حلوة حكاية التقسيمة في طابور العيش
انتى كده هتخليني احقد عليها بجد
بس والله كنت ست جميلة كده في روحها اصلها جدعة والجدعان ما بيخافوش
يا عيله ..قصدي يا مفروسه
وبعدين ماتخافيش
انا همرهم رجل واسيب التانية
علشان للظروف الصعبة والعيشة الزلط والتانية للظروف لما تطرا معانا والطراوة تعم على الاتنين بعد كده
شكلك انتى اللى حقودة
اقعدي ساكته انا اللى كنت بحاسب التاكسي من جيبي وماخدتش حساب المشوار ده لغاية دلوقتي اكمنه نفس اليوم اللى حصلت فيه الحادثة
ده انتى حقدك اسود بشكااااااال
:( وش متغاظ ومفروس اكتر منك

الباحث عن الحقيقة said...

خيييييييخه وهتفضل خيييخه
بلاش فضايح استري على عضلي الله يسترك
يطخوني في البلد لو عرفوا يا بت ابوي
وبعدين بلاش تقفيلي على الواحده كده
وكنتى عايزه تعرفي حكاية المنقبة بتاعة عصير فرغلي اللى في شارع الدول العربية ..لاااا ده بعدك
على فكرة انا كل ما ألاقي حدمش راضي ياخد العملة المعدنية بقوله هاتها انا عندي ناس بتحب تجمعها
بس خدي بالك الجنية هيقع على دماغك ان شاء الله بجنية وربع
وموضوع العيش ده هفكر فيه ..إن ألتزمتى الصمت وما فضحتيناش هبقى اشوفك بلقمة ولا حاجه

أختكم فى الله said...

السلام عليكم

هو قبل اى حاجة انا عاوزة اقول انى فطست من الضحك

بس الحمد لله ان حضرتك بخير

ومرةتانية ابقى خد بالك

خصوصا فى المواصلات وفى تعدية الشوراع

ربنا يحفظ حضرتك من كل سوء يا رب

عاشقه الفردوس said...

:))))))))))))))))))))))))))))))))



سلامتك ان شاء الله
في ميزان حسناتك باذن الله

التدوينه روعه اسعدك الله في الدارين

أنت...وأنا said...

السلام عليكم شكرا ليك على زيارتك لمدونتى المتواضعه.. اسلوبك حلو والله انا ضحكت وانا من زمااان مضحكتش
عايز كعك العيد؟؟ ولا يهمك يوصل بس انت مره تقول فى مصر ومره تقول فى الغربه وانا ضيعت على اى عنوان ابعتلك الكعك وكل سنه وحضرتك بخير وعيد سعيد بلاش مبارك احسن تكون حقنه تالته وفى القلب المره دى ... سلامتك

mahasen saber said...

يا نهارى ضحكتنى بشكل ابنى لو صاحى هيقولى بتضحكى على ايه يا ماما..طبعا انا مش فرحانه فيك خالص خالص مالص بس هيا دى القاهره يا عبله تعيش وتاخد غيرها ومن الحقن تصنع الرجال
الف الف لا بأس عليك ....
وبعدين مش هقلك خلى بالك لان ده اكيد قدر زى ما كلامك لنفسك قدر برضه ..
بعدين مش عارفه كنت متخيله انك هتقول وانتا فى مينى باص الهرم انك قمت وقعدت الست او باتها بس واضح انك كنت واقف ...ولاا هزعل قوى على اخلاق ابن القريه...
بس بخصوص الشيك تضمنيش فى شيك بخمستاشر الف جنيه ..شوفت الفقر..
الف لا بأس عليك وتعيش يا ما وتشرب غيرها وتاخد حقن غيرها وتبلبع برشام وطول ما انتا عايش توقع اى حاجه واحمد ربنا على كل حاجه...
اه عيد سعيد ومبارك عليك ان شاء الله
وعلى اهلك وكل من تحب...
بس بدل ما تدخلعليهم بهديه ولاا كيس جوافه فى ايدك داخلهم برجلك متجبسه
معلش عوضهلهم مش عشان هما اهلك تعمل فيهم كده...

الباحث عن الحقيقة said...

اختكم في الله
يا رب دايما سعيدة وبتضحكي
وشكرا على التاج انا شوفت ردودك عليه جميلة جدا
ان كان لنا عمر هنبقى نرد عليه
وشكرا على النصيحة

..............

عاشقة الفردوس
يا خبر ابيـــــــض
عاش من شافك يا فندم
ما شاء الله والله اشتقنا لأيام زمان
فاكرة الدروس يا عاشقة
كل سنة وحضرتك طيبة
وبالف خير
وهناء وسعادة وصحة وابتسامة وسرور
مش فتحي سرور
سرور ده يعني انبساط
كل سنة وانتى طيبة

الباحث عن الحقيقة said...

أنت ..وأنا
بيفكرني بمسلسل انا وانت وبابا في المشمش
وجميل ان حضرتك بتبدأي بالضمير :أنت
ده يعني حب الاخرين
وكل الكلام ده علشان ينوبنا كحكيتين م الاخر يعني
قلتم ايه
ولااعملكم فيها قتيل

..........

محاسن صابر
يا محاسن ..يام بيرو
اعيش واخد حقن وبرشام واقع ومش عارف ايه
ودي تبقى عيشه دي يا محاسن

بس انتى لو تلاحظى انى في كل مواقفي بضحك
اضحكى اضحكى محدش واخد منها حاجه
ثم ان الباص كان زحمة وانا قاعد في الكرسي اللى جنب الشباك مش اللى من بره
اخلاق القرية دي شكلها هتيجي على رجلينا بخسارة
ورينا انتي اخلاق الشرقاوية وقوليلنا عامله ايه على السحور
اوعي تقولي فووول انا اتهريت وطلعلي قرن في نافوخي زي الفول النابت

مهندس مصري said...

ياريت تضيفني و تكلمني على
wildfire22111@hotmail.com
و بص عندي

أنت...وأنا said...

هوا اسمو ايه دا؟؟
انا حاسه انى بتهزأ
الظاهر انه الحقن جابت مفعول سلبى
انا ماشيه...

الباحث عن الحقيقة said...

مهندس مصري
تمت الاضافة بنجاح
معلش لو كنت اتأخرت عليك اعمل ايه انت اللى بتنام بدري


************

أنت ..وأنا
دي تلاكيك بقى ولا بخل ولا ايه
خلي الكحك علينا وكمان العرقسوس
ولا خدي السوس واعصريه انت بمعرفتك وطلعي عرقه على مزاجك

أنت...وأنا said...

فيه ايه؟؟
ادينى العنوان وانا ابعتلك الكعك والكليجه والبقلاوه وكرتون حقن عشان العيد ال..مبارك

mahasen saber said...

طب ازفلك بشره ساره انا مبتسحرش
يعنى عامله الهوا على السحور اتفضل ...
لا بشرب مايه وباكل تمر تاكلمعايا
وطول اليوم باكل فى نفسى ...

وبعدين متغلطش فى الفول النابت عشان بعزه ..ويا سلام لو جنبه عيش محمص
واو ويا ستين واو
وتقولى قرون قال ..ده بيعمل قرون بس من الزمان..ههههههههه

مروة كمال said...

ألف سلامة

نسأل الله لك سرعة الشفاء

سعيدة بان مررت على مدونتكم الرلاائعة

بوركتم

حـــــ الــجــنــة ـــــور said...

السلام عليكم
خيرها في غيرها سلامتك يا أخي وبشكرك على الإبتسامه لي رسمتها في وجوهنا جميعا
كل سنه وإنت طيب
رمضان كريم

بنات افكارى said...

السلام عليكم

احم احم
انا مش عارفة اقول ايه
وماما مش راضية تبطل ضحك
اتصرف ازاي دلوقتي :))))

ربنا يكرمك يافندم يارب ويباركلك
ويجعلك سبب ديما فى دخول البسمة على قلوب الناس . ماما بتقولي لا
مش هو اللي كاتب دا
قولتلها هو بس بعد الحادثة :)))

شفاك الله وعافاك وخد بالك بئا بعد كدا شوفت بركة الدعوات :)

المهم حمد لله على سلامتك وربنا يحميك ويحفظك من كل سوء اللهم امين
ويزيدك تلقائية ومرح ان شاء الله
ماتنساناش من دعواتك بئا :)

السلام عليكم

mony said...

ههههههههههه



تعيش وتاخد غرها




و حقنة توت ولا حد يموت


و بعدين انت بتكلم نفسك من دلؤتي

امال لما تتجوز و تخلف و تشيل مسؤلية و مدارس و مصاريف

هتعمل ايه



تصدق



ساعتها ممكن تبطل تكلم نفسك



الف سلامة
و شفاك الله و عافاك

¨¨¨°~*§¦§ Appy §¦§*~°¨¨¨ said...

ههههههههههه مكنش داس على لسانك يا اخى وخلصنا
وبعدين انت اصلا طولك عشره سم اعذر الناس مش شايفاك هههههههههه
الف سلامه عليك ايه بس بيجبكوا البندر خليكوا فى بلدكوا احسن ههههههههه

الباحث عن الحقيقة said...

أنت ..وأنا
بسيطة يا ستى
ابعتيهم على اسيوط الدور التاني الشقة اللى في الوش
:)
او ابعتي حواله بريديه وانا اشتري جاهز من عندي

**************

محاسن صابر
خسارة مش هقدر ألبي عزومتك
اتسحري هوا لوحدك بقى
والمية دي بتشربيها حاف ولا بتغمسيها بكيس عصير ولا ايه
رمضان كرييييييم
يعني تتسحري


****************


مروة كمال
اسعدتني زيارتكم
واتمنى ان تزورونا في مناسبات صحية افضل ويا ريت تلاقي وقت تطلعي على مدونة الصحيفة الكاشفة علشان نشوف رأيك في موضوعاتها
شكرا للزيارة

الباحث عن الحقيقة said...

حور الجنة
اهلا باهل الجزائر البلد العربي المسلم الشقيق

وشكرا لابتسامتك وزيارتك الكريمة


*************

بنات أفكاري

وبعدين ماما لازم تتعلم التدوين علشان هي اللى تكتب تعليقاتها بنفسها
شغل الترجمة ده ما ينفعش معانا
سلامي للست المديرة ..ايون يا فندم ده انا بس بعد الحادثة
وشكرا على الدعوات
انا كمان بقول ربنا سترها علشان خاطر دعواتكم

الباحث عن الحقيقة said...

موني

أعيش اه لكن اخد غيرها لااااا
الملافظ سعد يا عب عال

وبعدين انا بكلم نفسي من دلوقت علشان عارف اني لما هتجوز هخرس خالص زي اللي سبقوني
شكرا على الزياره

************

آبي
ايه التهنئة العظيمة دي
يااااه ده انا كده اخف بسرعة
بس علشان اخنقك مش اكتر واطلع اللبالنه اللي في بؤك وألفها على رقبتك علشان رقبتك نطرقع يا مطرقعه يا شبه طراقيع بتاع ظاظا وجرجير

أنت...وأنا said...

انا امس على رواق تصفحت المدونه بتاعتك حلوه وقلت فين المدونه دى من زمان عنى الواحد يضحك شويه بس انا عارفه التنكيت دا فى حاجه وراه اصل انا الكل بيقلى شوفى متزعليش بس انا بحب اشوفك وانتى متنرفزه وله زهقانه لانك بتكونى نكته بكون انا بغلى ومش عارفه بقول اى والناس الى ادامى بترتمى بالارض من الضحك ويقولوا احنا عارفين انك متنرفزه بس مش ادرين نبطل ضحك
احلى حاجه هملت لمه طلع له ابوه وفى حاجات قلتها عن الناس والله انا متفقه معاك فيها ميه فى الميه
التدقيق راح يتعبك شوف وعدى لانك حتشوف اكتر وافظع من كدا
وربنا يتقبل منك عملك فى رمضان ويعيده عليك بصحه وعافيه وعيد سعيد يارب جمب خبز الحجه مش الخبز الى مش عارفه سميتوا ايه الله يفرجها على الناس كلها وتبقى تاكل وتشبع خبز ولحم وراحه بااااااااال

سلوى said...

يا الله

فضلت تقول رغم إن الدنيا زحمه إلا إن مفيش حد بيدوس على رجل حد

أهم داسوا على رجلك
ومش أي دوسه

الحمد لله إنها جت سليمه
خد بالك من نفسك أكتر من كده

شفاك الله وعافاك وحفظك من كل سوء أخي

الباحث عن الحقيقة said...

أنت ..وأنا
اشكرك وانا سعيد جدا لقيامك بتصفح مدونتي انا وشريكي عسقول او ابن حجر العسقلاني والحمد لله ان موضوعاتنا نالت اعجابك وسعيد جدا بتعرفي على مدونتك وبتعرفك علينا وان شاء الله تكوني صديقة للبرنامج
وموضوع اني اشوف واعدي دي هو مع الوقت الواحد بيتعود سواء على الحلو او الوحش وكله بيبقى عادي بعد كده
علشان كده قلت ألحق ادون واكتب ملاحظاتي قبل ما تبقى شئ عادي ساعتها مش هتلفت نظري

**************

سلوى
اختنا العزيزة سلوى شكرا لزيارتك العزيزة اللى كل فين وفين
تتصوري ملاحظة زكيه قال وكنت مستغرب ان محدش بيدوس على رجل حد
اممممممم
اوعي تكوني شمتانه فيا ..لعلمك هو داس على رجلي بس انا ما سكتش شاورتله وقولتله روح روح ما تقفش
غلبان مالوش ذنب
يلا حصل خير واهو درس وعبره
دعواتك بالشفاء ..ومش تحرمونا من زيارتكم كده
والسلام امانه للاخت ال جي
انا كنت سعيد جدا بتعليقها على البوست اللي فات يا ريت حد يبلغها تقديري وامتناني وشكري سرحان
:)

سلوى said...

شمتانه إزاي بس
ده كلام برضه؟

طبعا قلت له روح لأن المسامح كريم
وأنت مسامح وكريم عبد العزيز :)

إن شاء الله هوصل سلامك لإل جي أول لما أكلمها
هذا إن لم تسبقني هي لترى تعليقك بنفسها :)

ألف سلامه مرة تانيه
والحمد لله إنها بسيطه

ابن حـجـر الـعـسـقـلانـى said...

يا باحث انا لو شوفتك هاطخك عيارين

فى العضل يا باحث ؟؟ ياللعار ياللشنار

فى العضل يا مفترى

لا حول و لا قوة إلا بالله

أقول للناس إيه دلوقتى ..أخرج أمشى فى الشارع إزاى .. أقابلهوجو تشافيز إزاى و لا أتكلم مع كودوليزا رايس بأى وش

طب كل دول مش مهمين .. قول لى لو ماريا شارابوفا سألتنى عنك أقول لها إيه ؟؟ أقول لها إشاعة ؟؟ و أكدب و احنا فى رمضان ؟؟

لأ .. أنا مصدوم

Soul.o0o.Whisper said...

السلام عليكم و رحمة الله و بركاته

ايييييييييييييه داااااااااااااا؟؟؟
طب واحدة واحدة

مرة برد
و مرة عجلة أتوبيس

يارب استر
ههههههههههههههههههه

حمدلله ع السلامة و عيد سعيد ان شاء الله
ياللا أول واحد أقولك كل سنة و انت طيب
افتكر الجمايل دى ....:)

سلامتك ألف سلامة
بس بصراحة فطست من الضحك

مش عاوزة أقولك تعيش و تاخد غيرها
بس ابئا خد بالك بعد كدا

خالص تحياتى

الباحث عن الحقيقة said...

سلوى
شكرا يا فندم فعلا حادثة باص بسيطه
يظهر ان فيه ناس كانت منتظره انه يدوس على رقبتي مثلا
:)

***********

عسقول
جرى ايه يا عمر
انت هتسيحلي وتسوق فيها ولا ايه
انا لا اول ولا اخر واحد ياخد حقن في العضل ..بتحصل في احسن الحتت المدارية
بس امانه عليك يا شيخ ما تعرف ماريا شاربوفا حاجه وده جميل مش هنساه
لا كوندليزا مش مهم ولا تشافيز ..ماريا يا عسقول كله إلا ماريا
مين ماريا دي حكم انا جاهل في التنس
:)))))))


***************

صوت نفسها
الضاكتورة ايمان عندنا يا مرحبا يا مرحبا
خد بالك يا عسقول احسن تعمل ماس كهربائي من كتر نورها علينا
جمايلك كترت يا ...ضاك توووره
حتى كل سنة وانت طيب بتحسبوها على الفاتورة يا جبابره
ناقص تديني بها روشته هي كمان

الله يسلمك
لو كنتى عايزه تعملي جمايل صحيح كنتى دخلتي وفي ايدك طبق بيتي فور او ألفين جنية في ظرف وتحتيهم تت المخدة وتقوليلي شد حيلك ..كده يعني
هي دي الجمايل اللى بنحبها
:)

(احمد سكر ) said...

الف مليون سلامه لرجلك

هههههههههه

حلو اوى الافيه بتاع انت هتعملها غربال
هههههههه

يووووووووه

احنا هنضحك والراجل رجليه متمرهمه

هههههههه

كل سنه وانت طيب ياباحث

وعيد سعيد عليك

وانت متمرهم

احمد

الباحث عن الحقيقة said...

احمد سكر
منورنا يا راجل يا عسل
اضحكياعم اضحك انت خاسس حاجه
صحيح الولد بصلي باستغراب وكأنه عايز يقولي ده هم كلهم حقنتين خلاص بقت غربال
بس والله لو كنت شوفته وهو بيدينى الحقنه التانية كنت فطست من الضحك
اصله مكنش فيه غيره في الصيدليه
وانا واقف في حته مداريه وهوكل شوية يبص على عضلي ويبص بره ليكون حد دخل ولا حاجه محسسني زي ما نكون بنعمل حاجه غلط وخايف حد يقفشنا
وانا اقوله اعمل معروف ركز خلينا نخلص
وهو يبص بره يأمن المكان ويقولي ماتقلقش
وعلى ايه يا عم الاحراج ده بناء عليه ماخدتش الحقنة التالته دي فضايح يا عم الحاج
منور يابو حميد
بس اوعى تكون جايب الماس معاك

المستنصر بالله said...

كل عام وحضرتكم بخير
عيدكم مبارك

تحياتى لحضرتك

Gannah said...

هههههههههههههه
سلامتك الف سلامة
خير ان شاء الله
عيد سعيد ويارب تكون رجلك اتحسنت
سلامى الى العسقلانى
تحياتى

Beram ElMasry said...

سيدتى
عيد فطر سعيد اعاده الله عليكم باليمن والخير والبركة ، وادام سعدكم وحقق احلامكم

Soul.o0o.Whisper said...

مش هارد عليك يا باحث
حاكم انت ماحدش يسلك معاك<< بتطلع لسانها

شايف انا جمايلى رقيقة ازاى و خفييفة الظل
مش ألفيييييييييييين جنيييييييه
طبق بيتى فوووووووور

دا هو مرتب واحد اللى خدته و التانى الظاهر هيبئا بعد العيد عااااااااااااااااا

يعنى هاجيب لبس العيد بعد العيد
عااااااااااااااااااااا

ياللا أمرى الى الله ...هاعمل ايه


بس تعرف أظرف تعليق شفته عندك




Beram ElMasry said...

سيدتى
عيد فطر سعيد اعاده الله عليكم باليمن والخير والبركة ، وادام سعدكم وحقق احلامكم


والله فطست من الضحك
شكلك بئا تحفة يا باحث
ههههههههههههههههههههههههههههه


تحياتى

Jana said...

معلش يا باحث
تعيش وتاخد غيرها

أحلى ما فى الموضوع انك رجعت اسيوط وحتاكل كعك بالسمن البلدى اللى بجد مش المضروبة بتاعتنا

لو كيلو كحك بالعجمية والجوز معاك وانت جاى
يبقى احلى واجب

ربنا يتقبل منك ومنا ويثبتنا
عيد سعيد بالجوز واللوز
وألف سلامة.. شفاك الله وعفاك

نهر الحب said...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

dreem said...

سلامة رجلك يا باحث
واهلا بيك فى محافظة فيصل
كل سنة وانت طيب
تقبل تحياتى

أنا إنسان said...

الف سلامه

ňįĝŗő said...

أبو البواحيث
زينة شباب أسيوط بقراها بنجوعها بشوارعها بحواريها
إزيك يا جدع
إيه يا عم
أنا حاسس كده إني بقالي بتاع سنة ما قريتلكش حاجة
و هوب كده أدخل ألاقيك هابد موضوعين في ريح بعض كده لكشة واحدة
إيه هابد دي؟
قصدي رازع
نزحت للقاهرة خلاص
و الله أنا شكلي كده هأذاكر موضوع ملاحظات قاهرية دي لأني عن قريب كده إن شاء الله هأنزح لها أنا كمان
بخصوص حقن العضل
كلام في سرك كده يا خويا و ماتقلش لحد
أخوك من أربع سنين كان عندي حصواية كده و كان بيجيلي مغص كلوي ربنا مايوريك ولا يوري حد أساساً
و كنت بآخد يا زعيم حقن مسكنات للألم في العضل
بتاع خمس ست سبع حقن يا أبو حميد
مش دي المشكلة
المشكلة بقى إن اللي ادهوملي كلهم كانوا حريم


كل سنة و انت طيب يا أحمد
تقبّل الله منا و منكم


يلا سلام

ňįĝŗő

نهر الحب said...

بص بصراحة انا مش كنت عايزة اقولك
لكن البوست دا اثبت وجهة نظرى
انا كنت شاكة مجرد شك انك لاسع
لكن ياعينى الشك قلب بيقين ههههههه
ويعنى محامى اد الدنيا وصعيدى من اسيوط وتخاف من الحقن
امال ان شاء الله لما تتخانق كدة مع صحبة النصيب واو تحب تهز معاك يعنى من باب انكم تفتحوا كلام وتديك فوق دماغك بشكوش هتعمل اية ؟؟؟
او لو زعلت منك وحاولت تزغزك بساطور ؟فين ايام الرجالة الجبس هههههه
بس فى حاجة عايزة اعرفها طنط بتاعت سنة 33 الشيك بتاعها كان بكم ؟؟ يعنى انت عارف احنا داخلين على عيد

كل سنة وانت طيب وسلم لى على الوالدة وقولها انك بتخاف من الحقن وهى هتفرح بيك اوى

قوس قزح said...

الف سلامة عليك

رضي الله عنك وأرضاك
وهداك وأغناك
وعافاك وشفاك
ووفقك لخير الدعاء
وأجاب لك الرجاء
وأحبك بلا ابتلاء
وجعلك ساعياً للخير
مؤثراً في الغيْر
وكل عام وانت بخيْر

fashkool said...

كل سنه وانت طيب يا صاحب الاستراحه تكون السنه الجايه حاطط لى كرسى عندك .

جنّي said...

السلام عليكم ورحمة الله وبركاته

عيدكم مبارك

تقبل الله منا ومنكم
وكل عام وأنتم بخير
كل عام وأنتم من الفائزين
كل عام وقد حصدتم الجائزة
كل عام وأنتم ترفلون في ثوب الفرحة
كل عام وانتم مقبولون الصيام والقيام
كل عام وقد عفا الله عنكم في ليلة القدر

كل عام وأنتي منصورة يا أمتي

أخوكم
سعيد

nona said...
This comment has been removed by the author.
سلوى said...

إخواني عسقول والباحث
كل سنه وانتم طيبين أنتم وكل من حولكم

تقبل الله منا ومنكم

عيد سعيد إن شاء الله

mahasen saber said...

عيد سعيد....
كل سنه وانتا طيب وبالف الف خير
وصحه ..واركز قوى على الصحه فى حالتك دى...
وعيدسعيد ...
عليك وعلى اسرتك الكريمه
وعلى كل من تحب
وعلى موكلينك وخصومك والصيدلى اليى اداك الحقنه...كده كفايه ولاانسيت حد
رجلك عامله ايه دلوقتى
اظن مبسوطه فيك....

بجد من قلبى الف سلامه عليك
ويا رب تقضى عيد سعيد وانتا متمرهم كده...بس بيتهيألى انتا اليى هتاخد عيديه بحالتك دى...
عيد سعيد يا باحث

ojg said...

الف الف سلامه ع المشط
مبروك على سلامة الوصول للأراضي الأسيوطية
اهنيك ع البوست التحفة ده
كل عام وانت بخير

ايه ده هو التعليق اتقلب ليه كده بقى كله تهاني ومعايدات :))

mahasen saber said...

ماشى يا احمد ...بقه انتا كنت بتشفق على الصباغ منى ولما ربنا وقعك فيه
وعاملك معاملة الاقطاعى للفلاحين

دلوقتى بس اشفقت عليا انا منه
شوف انا اليى بيجى عليا مبيكسبش ولاا حتىفى اليانصيب ...
ويله بقه اتفضل ارفعلى قضية تعويض
عليك نظرا لكرامتى اليى بعترتها
ولما يتحكملى هديك اتعابك من التعويض اليى هتدفعه ليا ..او ابقى اخصمه..
قال يشفق على الصباغ منى قال
ده انا فاضلى جناحين وابقا ملاك...

صبرني يارب said...

الف الف سلامه على رجلك يا باحث

كده تهزر مع المينى باص مش كان لازم تكعبله يا راجل

بس ايه ده انت خواف اوي من الحقن دى تلاقيها حقنى كتافلام ما دام 3 سم
يعنى ما بتوجعش يا راجل

بس على فكره لازم تاخد الحقنه التانيه عشان الالتهاب ما يزيدش وبعدين ترجع تاخد دستة حقن

وبطل تكلم نفسك فى الشارع انت عارف الخانكه قريبه هناك .

وكل سنه وانت طيب انت وصعيد مصر كله
انت اسيوطي يا بوووووي بينى وبينهم طار بايت بس مش مشكله زي بعضه عشان خاطرك