Friday, October 10, 2008

أهو ده اللي مكنتش عامل حسابه

كنت لسه هكتب بوست جديد دوست بالخطا على مفتاح انتر فحصل انه بقى فيه بوست فاضي
بدون عنوان او كلمات
:)
ودلوقتي مضطر اكتب بوست بسرعه لتدارك الخطأ ده
تجربة جديدة متهيألي محصلتش مع حد قبل كده
طبعا لو حذفته هعمل مشكلة في الريدرات بتاعة الزملاء هيلاقوا عنوان فاضي ومفيش اي حاجه
المهم نقول ايه نقول ايه
طب انا كنت اصلا عايز اتكلم عن موضوع المسابقات بتاعة 0900 واتصل يا عم واتصل يا ذكي واتصل يا فالح واتصل وادي دقني لو كسبت ..الخ
بصراحه لما بشوف المسابقات دي بحس انهم بيستغفلونا علني ..بيستعبطونا .. بيسرقونا بمزاجنا
حاجه كده يعني
ماهو في الاخر سؤال تافه
لانه اصلا غرضه الوحيد انه يلم فلوس والسلام من اكبر عدد
فيروح طارح سؤال ساذج ..وما اكثر السذج في مصر ممن يحملون الزفت الموبايل وما اكثر الجعانين الذين يحلمون بسوق العيش
والامر بالظبط اشبه باليانصيب ومسابقات اللوتاري اللي اتلغت بعد ما ظهرت فتاوي بتحريمها
فرجعت لنا في العصر الحديث باسلوب ألكتروني
والمصيبة ان محدش بيتكلم وكل يوم الاستهبال والنصب والاحتيال بيزيد
والغريب ان اول من ابتدع المسابقات دي داخل مصرهو التلفزيون المصري القومي العربي المتحد
ما علينا وبسرعة علشان فيه بوست فاضي يا جماعة ظاهر في الريدرات
ازاي افرق بين مسابقة بتعتبر قمار ..وبين مسابقة عادية
الشيخ عبد الله المصلح الله يكرمه كان شرحها زمان بشكل مبسط جدا وواضح وسهل
شوفوا يا جماعة والحاضر يعلم الغايب
انت في المسابقة لك حالتين
حالة بتكون فيها : سالم -غانم
وحالة تانية : غانم - غارم
يعني ايه الكلام ده ؟
الحالة الاولى : سالم - غانم
يعني انت كان لزمك سجاده مثلا رحت تشتري سجادة من محل كبير وبعد ما اشتريتها لقيتهم بيقولك احتفظ برقم القسيمة علشان فيه سحب بعد اسبوع والرقم الفائز له جايزه شبشب هديه
انت هنا ما خسرتش فلوس
ولما كسبت جاتلك جايزه انت ما غامرتش علشان تكسبها
وان مكسبتش فأنت ماخسرتش
يعني مفيش مقامرة
الحالة نمبر تو 2
غانم - غارم
في الحالة دي انت بتدفع مقابل لشئ ليس سلعة وانما هو الجايزه
هذه الجائزة محتملة قد تأتي او لا تأتي
يعني انت معرض اما تخرج غانم يعني غنمت وفزت بالجايزه
او تخرج منها غارم يعني غرمت تمن المشاركة ع الفاضي
دي هي المقامرة
يعني حرام
طب فيه مسابقات بتكون جوايزها حج او عمرة؟
حرام طبعا يا ذكي
ودلوقتي
ليه المسابقات دي كترت اوي
واحد : علشان احنا شبابنا هايف وبتوع المسابقات عارفين كده اننا عالم فاضيه وبتصرف فلوسها في الفاضي
شوف مثلا بتشحن كام مرة وبتتصل وترغي ع الفاضي كام مره
ونسب التصويت على برنامج ستار اكاديمي وغيره تشهد على الهيافة
اتنين :شعب عاطل ..والعاطل بيحلم ..بيحلم بإيه ؟ ..بضربة حظ
ثلاثة: معندناش ثقافة الادخار ..يعني الناس في مصر بتحوش علشان تصرف فلوسها في الفاضية
اربعة : المسابقات دي بتستغل الكيف ( المزاج ) واحنا مدمنين كورة او عايزين نخس ومش عارفين او غاويين مسلسلات
وما شاء الله الموبايلات مع العيال من ثالته اعدادي يعني العالم الهايفه اللي غاوية مسلسلات وكورة ودول مالهمش سن .ورزق الهبل ع المجانين
خمسة : هي برضه رزق الهبل ع المجانين
كفاية كده انا عملت البوست ده ع السريع فك زنقه
قصدي يعني علشان نملا الفراغ
يووووه برضه خيخه هتفهمنا غلط
شوفوا انتم حل فيها بقى
ده ان رجعت من الخانكة اصلا

56 comments:

مهندس مصري said...

طيب كويس و الله
الواحد كده استفاد بمعرفة سالم و غانم و غارم
:)
و ياريت تعرفنا بباقي أصحابك
:))
بس بجد انا كده عرفت ازاي اعرف المسابقة قمار و لأ
شكراً يا باحث باشا

الباحث عن الحقيقة said...

باقي اصحابي:
لسه فيه سليم باشا البدري
زينهم السماحي
وشلة ليالي الحلمية
:)
انا كده هعمل للبوست اجزاء
شكرا يا باشمهندس
وكويس لحقتك قبل ما تتصل

mahasen saber said...

ايوه انا كده فهمت الفرق بين المسابقات
الله ينور عليك مع انى اصلا مليش فيهم
بس المعرفه مش وحشه ومبتضرش ...
بس انتا الباحث انا عايزه بقه بوست يفرقلى بين الباحث وبين عسقول
ولاا بيبقى فى اخر البوست وانا اليى مبشفش
اخبار قدمك المريضه ايه يا رب تكون خفت صحيا مش فى الوزن....

طالب ثانوى said...

بجد عرفتنا الفرق بين القمار والفوز الجايزة

شكرا ليك وجزاك الله خيرا

نهر الحب said...

اهلا عم احمد
ازيك حمد له على السلامة
الف سلامة عليك
بص ياسيدى حكاية المسابقات الهايفة زى ما نت ذكرت بالضبظ نصب علنى واستغلال لحاجة الناس وللاسف اغلب بلدنا محتاجين
يالله ربنا يسهل الحال

dalia said...

فعلا المسابقات حاجه تغلي الدم بس كنت بعتقد ان الناس كلها فكراها عبط طلع العكس في ناس كتير خاصة المراهقين بيتصلوا والاهم ان في شركات للمسابقات يملكها كبار وابناء مسئولين في البلد ولذلك لم تقدر الدولة تمنعها رغم تحريمها من قبل المفتي

الباحث عن الحقيقة said...

محاسن صابر عندنا
يا مرحبا يا مرحبا
فعلا يا بنتي : العلمو نورن
والجهلو ظلامون
وحسنة قليلة تمنع بلاوي كتير
بصي يا ستى الفرق بيني وبين عسقول هو اطول مني واقرع بمزاجه
انا اقصر واقرع غصب عني
مش اقرع اوي يعني لسه فيه امل ده لو لحقت نفسي واتجوزت قبل ما السراميك يزحف على اخرها
:)
وبالنسبة للموضوعات عسقول منظم شوية اما انا فبتاع قعدة مصاطب
:)


**************

طالب ثانوي
اهلا بيك يا فندم في مدونتنا انا وعسقول
وسعداء ان طالب ثانوي ومدون
ده شئ يشرف شباب مصر ان يكون فيه وعي كده مبكر
شكرا لزيارتك

الباحث عن الحقيقة said...

اهلا طنط ايناس
:)
انتي شوية كمان وهتمدي ايدك
فين بابا ابو خالد
؟؟؟؟؟؟؟؟
هو مش استغلال لحاجة الناس
هو استغلال لأحلامهم

رجلي الحمد لله في تحسن
شكرا على السؤال :)

**************


داليا
الحقيقة كثرة المسابقات دي وعددها المتزايد يعني ان فيه اقبال
بس هو المشكلة مش في المسابقة نفسها
المشكلة في معناها انها بترمز الى اد ايه احنا شعب هايف
ده غير انها حرام
وشكرا لزيارتك الكريمة

جنّي said...

ما شاء الله على الحيوية والنشاط راجع سخن بعد العيد
تصدق موضوع رجلك جا بفايدة خلاك تكن في البيت وتكتب بنشاط

انت لخصت الحكاية رزق الهبل على المجانين

انا كان عندي مسابقة والناس جاوبت واخدو طبق كعك وبسكوت من غير قمار ولا حاجة يعني كانو سالمين غانمين

وربنا ما يكسر لك رجل واحدة ابدا

سلام بقى رايح الصحيفة تيجي معايا

موناليزا said...

رغم انى ماليش علاقة بالريدر ولكن احييك على احترام الاخرين الذين يتعاملون معه
اما عن هذه المسابقات فحدث ولا حرج بدليل انشاء كذا قناة بغرض هذه التفاهات
بس بجد الحق على كل من يشارك معهم

الباحث عن الحقيقة said...

جني
لا راجع مكسور يا عم وانت مش سائل فيا
كل سنة وانت طيب تاني وتالت ..ومليون
مانا جاوبت يا عم في مسابقتك
وفضلت مستني الكحك
ماشي يا حاج
منتظرينك في مصر لما ترجع
:)


***********

موناليزا
اهلا وسهلا بحضرتك في المدونة
وبعدين موضوع الريدر ده هو لو مكنش فيه موضوع كان الاحراج هيكون لنا احنا طبعا
بخصوص المسابقات ..فعلا القنوات بقت بتتعمل مخصوص علشان المسابقات دي والاس ام اس
واهي ارزاق واهو كله اكل عيش
مش مهم ازاي المهم حاجه تجيب فلوس
:)

mahasen saber said...

يعنى انتوا الاتنين قرع ..طب هايل بس القرع ده معدى يعنى عشان اعملاحتياطى وانا داخله عندكم ...
بس عارف انتا هتتقرع اكتر واكتر ايون يا سيدى اكتر واكتر عشان انا مش مسامحاك من وقت ما قلت للصباغ انك كنت مشفق عليه منى اه انتا عرفت انى انا الضحيه بس بعد ايه يا ظنان يا مفترى روح يا شيخ ربنا ينتقملى من شعرك...

عاشقه الفردوس said...

:)))

لا الموقف ده حصل معايا

بس مش نزل فاضي
هو كان شكل الصفحه فاضيه بس انا كنت مختاره لون الخط اسود والتيمبلت اصلا كان اسود فاللي دخل معرفش ييقرا

بس فيه ناس ناصحه وعملت اكتفيت للصفحه وشافت التدوينه :)))



حلو طريقه عرض التدوينه وسهله كده كلنا فهمنا


ربنا يباركلك

أختكم فى الله said...

موضوع حقيقى مهم جدا

جزاك الله خيرا

صبرني يارب said...

حلو اوي الراي ده وانا اساسا كنت مقتنعه به وشايفه هو ده المفروض

وعلى فكره ملحوظه على الماشي : الموبيلات مش مع العيال من 3 اعدادي
وحياتك عندي مريم السنه الى فاتت وهى فى 2 ابتدائي كانت جايه تقولي ماما ممكن اخد موبايلك ا لقديم بقى ؟؟
لما قلتلها لا طبعا قالتلى ما اصحابي معاهم موبيلات ومامتهم بتكلمهم فى المدرسه
طبعا انا اديتها بؤين فى الموضوع وخلصت القصه معاها
وابقى شوف بقى الاعلانات دى على سبيس توووون
بس هما مؤدبين بقى بيقولوا استشر والديك واتصل على الرقم كذا ........
ويا حلاوه على الحلاوه

ňįĝŗő said...

إيه يا عم الجمودية دي؟
هو المرهم عامل عمايله ولا إيه ؟
ضاربلك موضوعين كده لكشة واحدة
واحد هنا و التاني في الصحيفة
حلوة حركة النشاط دي
يا رب دايماً
آه صحيح باقولك
انت أقصر من عسقول !!؟
يا خبر
ده على كده بقى مش هاشوفك لما اشوفك
حلوة مش هاشوفك لما اشوفك دي
انت نزلت القاهرة ولا لسه بتمرهم
رجلك في أسيوط
عاوز أشوفك بقى يا عم
ألف سلامة عليك يا أبو حميد


يلا سلام

عاشــــــ النقاب ـقــــة"نونو" said...

السلام عليكم
فعلا عندك حق الموضوع زاد عن حده اوي
بس لو مش جايب همه كانوا وقفوه
ربنا يهدي يارب
كل عام وانتم الى الرحمن اقرب
تحياتي

L.G. said...

أيوة

أنا ماشية مع سالم غانم دي من غير ما أعرف بجد والله حتى لما بيبقى معايا رصيد بستحرم لكن لو مسابقة أسئلة بجاوب الحمد لله ان طلع لها أصل فقهي

على فكرة مرة حصلت معايا بس حتلاقي البلوج محتفظ بالتدوينة درافت لأنه بيعمل أوتو سيف كل شوية يعني حيضيع سطر أو سطرين وكمان كان ممكن تعمل كونترول زد

كلنا هذا الرجل
الصورة الجديدة جميلة

nona said...

هو فعلا موضوع المسابقات دة كتر جدا
بس انا ملاحظة معظم الاى نعرفهم مش بيشتركوا فيها لانها كلها نصب فى نصب
هما ممكن الاطفال يتصلوا و يشاركوا بس الكبار ما اظنش لانة المفروض انسان عاقل و واعى
انا من راى الموبيلات دية ما تتشالش غير لما يخشوا الجامعة او ثانوى بالكتير قوى لكن تقولى ابتدائى واعدادى و شايل موبيل
ارحمنى يا رب

mony said...

يا سلام


ربنا مايوقعك في ديقة يا باحث






بس برضه رٌب ضرة نافعة

اهه طلعنا بموضوع جميل و مفيد و الله


جزاك الله خيرا و الله يا باحث علي المعلومة اللي علي الماشي

mohamed ghalia said...

اللهم اجعلنا من السالمين الغانمين.
فعلا والله المسابقات دى سرقه بس مش على المكشوف
والشعب كله جعان فبيحلم بالعيش
تقبل تحياتى
دمت بود

kochia said...

موضوع مفيد
واول مرة اسمع حكاية سالم وغانم دي

الباحث عن الحقيقة said...

محاسن صابر
كلاكيت تاني مره
عموما انا ورايا رجاله تاخدلي حقي
يا صبااااااغ
وريها الشغل الاقطاعي يا برنس علاء
انت كان ناقص تضرب علينا نار يا راجل
ما تيجي نعمل حزب وننتقم احنا من الواد ده

************

عاشقة الفردوس
يا اهلا يا فندم كل سنة وانتي طيبة
ربنا يكرمك دايما وشكرا لزوقك
هو انا كنت بفكر اكتب ايه وايدي سرحت على الكيبورد لقيت الصفحة بتحمل وانا قاعد مسبهل مش عارف فيه ايه لغاية ما لقيت بوست ابيض يا ورد


***************

اختكم في الله
الناس اللي بتحرجنا بزوقها دي
شكرا يا فندم ربنا يبارك فيكي

الباحث عن الحقيقة said...

صبرني يا رب
ايه حكاية سبيس تون دي يام مريم
وبعدين ما تدي البنت الموبايل انتي بخيله ليه
السنه الجاية هتقولك يا ماما عايزه لاب توب
ويا حلاوة الحلاوة

*************


نيجرووو

ماشي يابو طويله
لما اشوف بس وانا هجيبلك قرار ازالة لغاية الركب
وقر على النشاط قر
اديني جاي القاهره اهو وهنبطل نشاط

***********


عاشقة النقاب
بتسعدني زيارتكم جدا لانها دليل فعلا ان الاختلاف في بعض الاراء لا يفسد للود قضية
شكرا لروحكم الطيبة

الباحث عن الحقيقة said...

l.g
زغردي يا طيور
اهلا وسهلا بالاخت العزيزة ال جي
ماشاء الله انتي تعرفي سالم غانم من زمان ..طب تعرفي زكي جمعه؟
وايه حكاية مسابقة واصل فقهي دي
عموما انا كتبتلكم القاعدة وانتي طبقيها
وبالنص بعده كده اتفقنا
:)
اخدتي بالك من الصورة ..هعمل مسابقة بعد كده واقول مين فينا عسقول ومين الباحث
اتصلي على زيرو خمسمية من اي كابينة قمر صناعي في الشارع


************

نونا

قولي الكلام ده لمريم بنت صبرني يا رب
على فكرة لو تشوفي صور الفايزين اللي بيجيبوهم هتلاقيهم ناس بسطاء
وده لازم يكون له معنى ..الناس البسيطة اللي عايشه تحلم بضربة حظ

***********


موني

الناس اللي بتيجي تشمت ع الماشي دي
طب ياختى عقبال رجلك ما ..ولا بعد الشر
عقبال ما ينزلك بوست فاضي وابقى ورينا شطارتك
عسقول : سك على المشاريب هنا ..شطبنا مفيش
:)
هاتلها عرقسو هاتلها عرقسوس
كتر السوس كتر السوس

الباحث عن الحقيقة said...

محمد غاليه
فعلا المسابقات دي استغلال لحاجة الناس واحلامهم
شكرا لزيارتك الكريمة
هات سلحب بالمكسرات هنا ياواد يا عسقول
:)


****************

kochia

انتم بتجيبوا الاسامي دي منين
اهلا بجدعان السويس
وكل سنة وانتم طيبين باعياد النصر والتحرير

وخطوة عزيزة يا فندم
إلا عزيزه ازيها مش بخير برضك

:)
ازازة سفن هنا لاهل السويس

son's egypt said...

السلام عليكم
فعلا رزق الهبل
الواحد فعلا بستغرب من كتر المسابقات ديه
وكل يوم بحاجة جديدة
اليومين دول ماشين في موضوع اعرف الاية في اي سورة واكسب جنيهات دهب
يلا وهو كله شغل

Anonymous said...

في خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - الطاقة المتجددة كبديل للطاقة النووية. فالطاقة النووية لها محاذيرها وهذا ماسوف نشرحه بالتفصيل.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

~*§¦§ Appy §¦§*~ said...

الا سؤال يا اخ لو سمحت وشوفه فى الزمخشرك كده
هو مين مينى مينى مينى دا اللى الواد بيطلع يقول اطلبنى على المحلول وجوايزنا ميه على جاز ده
هو ده مينى بتاع ميكي ومينى هههههههههههههه

الباحث عن الحقيقة said...

ابن مصر
هم معندهمش مانع يعملولك مسابقة دينية او اي عفريت ازرق
دول بيستغلوا رغبات الناس من خلال معرفة اتجاهاتهم وميولهم
وكمان المسابقات الدينية علشان بيستغلوا عاطفيا الناس اللي نفسها تطلع امها او ابوها او جدتها حج او عمره

كله بيزنس حتى الدين يا برنس

*************

كوكب آبي
هو بيقول كده بيسأل عن عيل تايه تقريبا
اهو فيه حاجه بتوجعه في دماغه
ماهو كل من زعق وعمل شريط بقى مطرب
حتى الواد الهلهل بقى مطرب

بت خيخة وأى كلام said...

هو انا لسة هافهمك غلط يا باحث
انا فاهماك غلط من زماااااااااااان
هههههههههههههههههههه

بس بجد رغم خفة دمك بس برضه انا استفدت من حكاية سالم غانم
وغانم غارم
بجد عجبني شرح الحالتين والتفريق بينهم وامتى الواحد يكون فى الطريق الصح وامتى يكون كدة حود على سكة المقامرة والعياذ بالله

بس برضه فاهماك غلط

تحياتي ليك
اختك خيخة

mahasen saber said...

اتفضل اهه كتبت بوست جديد وانتا السبب ما كنت قاعده مكسله شويه ومريحه صوابعى
محاميين مبيجيش من وراهمالا القلق
بس هو انا ااقدر اتفضل يا فندم
اتفضل يا متر ومتنساش تجيبحاجه فى ايدك وانتا داخل المدونه...

الباحث عن الحقيقة said...

خيخه واي كلام
سلام يا خيخة نتقابل في القاهره بقى


**********

محاسن صابر

نشوف وشك بخير عقبال ما نتقابل في القاهره بس بعيد عن وش البت خيخه
لان دي اللي بيمشي معاها بتوديه الخانكة
بس تعرفي انتي ممكن تروحي معاها
:)

سلام

mahasen saber said...

بقه انا نكديه لاحظ انك على سفر وهتحتاج كل دعوه ليك مش عليك واخد بالك من عليك دى
وسفر يعنى ميكروباصات وعربيات واتوبيسات وقطارات من اليى بتتحرق واصلا اصلا فيه ناس صحابنا رجليهم بتزحلقهم طبيعى تحت عجل العربيات ....
لو رجلك خفت ونسيت افكرك مفيهاش حاجه
انا قلتطالما انتا مسافر اسيبلك الكلمتين اليى فى زوريتحطه سلسله فى رقبتك زى المطربين بتوع الفيديو كليبكده ابقا اربط رجلك فيك يا ابنى ومشيها جنبك عشان متروحش عند عجل الميكروباصات تانى اصل شكلها غاويه عجل ..خلى بالك من نفسك يا متر ومتنساش تاخد معاك بطاطين بلدكم كلها الجو بعيد عنك بقا اسكيمو...
سلام يا ايه ايه مجدى ولا احمد ولا مجدى احمد على ...

Soul.o0o.Whisper said...

السلام عليكم و رحمة الله و بركاته

هههههههههههههههه
تعيش و تاخد غيرها يا باحث باشا

بس ابئا عمل زييى و أكتب الموضوع فى ملف وورد
و بعدين كوبى و بيست :)

و بعدين مين قالك إن الموبيلات من أول 3 إعدادى

و الله أنا شفت عيال فى رابعة ابتدائى و شايلينه
عادى يعنى
و بعدين مش بس فى مصر

فى دول الخليج من أول لما الولد يبدأ يخرج من البيت ..يعنى يروح الحضانة و الابتدائى و معاه الموبايل

والله مش بأهزر




ياللا ربنا يصبرنا على ما بلانا
هههههههههههههههههههههههه


و شكرا على سالم و غانم و غارم
ربنا يبارك
هههههههههههههههههههههههههه




لك خالص التحية

بت خيخة وأى كلام said...

نتقابل فى القاهرة

بجد؟؟؟؟؟؟؟
هو انت خلاص رجلك خفت وفكيت الجبس؟


ابقى بلغ عسقول معاد التقابل
وانا هاطب عليكم

سلام
اختك خيخة

مهندس مصري said...

بص عندي على بوست القرضاوي عندي كده
في مهندس شيعي عراقي اسمه ناصر رادد رد طويل وحاجة آخر توهان
ياريت حضرتك تبص عليه و لو امكن ترد عليه لإني بجد مش فاضي له دلوقت

سومه...مجنونه فى بلد عاقل said...

اعتقد ان المسابقات دى فيها غارم غارم غارم :))
وحتى الغنيمه بتكون عشر الغرامه
تحياتى ليك على موضوعك السريع بتفكرنى بدقدق بتاع تيربو الهلال والنجمه عشان سرعه اختيارك المواضيع:))

mahasen saber said...

شكر يا باحث....
........
طبعا هتقول لا شكر على واجب
اخبارك ايه تمام كسرت رجلك التانيه ولاا لسه
...يا رب يكون لسه

mahasen saber said...

يا احمد يا باحث اتوصى بالبصل يوم التبرع عشان افوقك بيه بقه احنا هنقف بس عشان يغما علينا مش عيب ...
هتضحك علينا العيال
احنا نقعد فى حته ناكلنا حتتين جاتوه وفنجانيين قهوه ونروح نجرب حظنا بس طبيعى مش هيلاقوا حاجه ياخدوها مننا هههههههه ....
........
بس سيبك انتا انا نفسى اشوفك جدا .. اهه اكسب فيك ثواب وامسكك قضايايا مع البنوك
هما اليى واخدين منى قروض
.بس انا شاكره اهتمامك جدا وفوق الوصف ومش هقول على كرم اخلاقك انا مش قادره ارفع عينى فيك خلاص
.......

الباحث عن الحقيقة said...

سيحي يا محاسن سيحي
بس لمعلوماتك
انا مش عايزك تحطي عينك في الارض انا عايزك تحطيها في الشنطه وتطلعي الاتعاب يا محاسن

fashkool said...

شوف يا كاشف : احنا شعب اهبل وبتاع منظره .. الموبايل زى ما بتقول مع العيال من ابتدائى مش من اعدادى والمسابقات دى استهبال واستعباط واحنا عارفين مين اللى بيكسب شوف بقى المسابقات اللى بتتعمل على شاشة التليفزيون بنت حلوه زى القمر قاعده تترقص وتتشخلع وجايبه فزوره مكتوبه تحتمل اكثر من اجابه .. بس الاجابه اللى هما عايزينها ما تعرفش هى ايه .. وبعدين وعد بجوائز بآلاف الدولارات .. طب يقولوا لى مين اللى كسب وناس هبله تتصل وتقول اجابات والله تافهه وجاهله .. بس انت اتصل .. عايز الدولارات .. اتصل .. المهم اتصل وادفع من الموبايل بتاعك وللاسف احنا ما معاناش فلوس وعمالين نتصل .. المهم اتصل .. وفى النهايه كلنا خسرانين .. يا اما بنلعب قمار .. واقل الخساره .. ثمن المكالمه .. اللى راحت البحر

sakayar said...

أولاً سلامو عليييييكو
ثانياً بقى البوست
عجبني اوي الاسلوب الخفيف ف الكلام اللي نقل الفكرة بسهولة جميلة خلتني اقرا البوست ف السريع ووصلتني المعلومة وكمان فكرتك عن سبب المشكلة
بجد تسلم ايديك على البوست
وبعد كده مش تضغط انتر ابقى خد بالك
او ابقى اعرف الباسووردات بتاعة الناس كلها وادخل على ريداراتهم واعمل البوست اتقرأ علشان محدش يسأل هو البوست الفاضي ده ليه
ههههه
سلامو علييييكو تاااني يا بو حمييييد

جنّي said...

ازيك يا عم احمد

انا ما كنتش ناوي اجي هنا تاني ولا الصحيفة الكاشفة .. ما دام مش سائل ولا كان ليك صديق واخ ان كنت تعتبرني كذلك .. تجاهل وعدم سؤال ولا زيارة ولا تعليق ولا ولا ولا .. هي كانت معرفة قروانة .. على كل انا بعمل بأصلي وبسأل ..ورجلك عاملة ايه دلوقتي .. وبعدين ايه المانع من زيارتك يا عم اكتب بايدك ما دام رجلك بعافية ..

سلام وبس

القلم السكندري said...

جزاكم الله خيرا ياباشا

وربنا يبارك لنا ف زرار الانتر بتاع جهازك اللي اجبرك تكتب البوست ده

Beram ElMasry said...

عـــين الشــــمس عيانـــــة ومعصوبــــه بشـــال الليـــل
وفــــــــاس الحـــــزن منكـــودة ومرفوعـــة تهـد الحيـل
هجمـــت علينـــــــا عصابــــة زى الطوفــــان والســـيل
خلــــــــوا شبابنــــــا منكســــــر راضــــى يكـون الذيـل
باعـــــــــوا علينـــــــــا وهمهــم ووفـوا من دمانا الكيل
ولا خلـــوا فى البلـــد فــــارس ولا حتــى حداهــا خيــل

صباح الصباح said...

هههههههههههه
بجد افتكرت المسابقة المتخلفة اللى كانت بتيجى على قناة ميلودى تركس

النعلمة تلد والا تبيض
!!!!!!!!!!!!!!!!!!!

يا ولاد المجنونة هوة للدرجة دى العبط

م/ الحسيني لزومي said...

شارك في الحملة الشعبية للقيد بالجداول الانتخابية بوضع بنر الحملة علي مدونتك.
البنر موجود علي مدونتي

م/ الحسيني لزومي said...

شارك في الحملة الشعبية للقيد بالجداول الانتخابية وادعو غيرك.
ضع بنر الحمله علي مدونتك.
البنر موجود علي مدونتي

نهر الحب said...

ازيك يا أ/ احمد
يارب تكون بخير وتشرفنا



يوم الجمعه 14/11بأذن الله
هنروح نزور دار ايتام فى بورسعيد اللى يحب يشرفنا
ياريت تنورنا ونحاول نرسم بسمه ونتعاون على البر والتقوى
وبعدها هنقعد مع بعض شوية طبعا لو تحبوا
التفاصيل عندى بالمدونة
وياريت تعرفونى الرد 
اعتذر لكنه ليس اعلان لكنها دعوه للخير

ن said...

السلام عليكم ورحمة الله وبركاته
أخى الكريم شارك معنا بالرأى عبر مدونة (ن) لربما نصل الى الحقيقة
مع خالص تحياتى

ن said...

السلام عليكم ورحمة من الله وبركاته
تحياتى إلى كل المدونين الجادين وأتمنى أن يشاركونا الرأى والأجتهادات للخروج من تخبط الأراء التى كثرت عن الدين ودرء الشبهات التى تلصق الى الأسلام بتصيد بعض الأخطاء التى الصقت ببعض المفاهيم ..وعبر هذه المدونة علينا أن نبحث فى مصداقية الروايات السابقة وتخير الأجتهادات الحالية بما يخدم الأسلام وقضاياه .
مع خالص تحياتى
أمل فتحى عزت

سومه...مجنونه فى بلد عاقل said...

مررت لارى جديدكم فاين هو؟؟
عسى تكونوا بخير

~ dr.Sondos ~ said...

جزاكم الله خيرا على الافادة

جنّي said...

الله انت اخدت على كدا ولا ايه

لو اعتزلت قول علشان نعمل لك ماتش اعتزال .. وبعدين بطل تقل شوية الناس رجليها حفيت على المدونة طب رد يا اخي ..

يا عم احمد عايزين نطمن عليك لا اكثر ولا اقل ..

koukawy said...

ياه ه ه ه يا اخي
دي اعلانات مستفزه
و كله و التخين ابن التخينه اللي اسنمه ممدوح فرج اللي هيخسس الناس
مش لما يروح يخس هو الأول