Friday, December 5, 2008

أحمر شفايف .. عيش وسيبني أعيش

قال : فاكر في فيلم الباشا تلميذ لما كريم ظبط البنت اللي بتسرق فهي كمان بينت له انها عارفه حقيقته ايه وقالتله عيش يا باشا وسيبني أعيش
سيبني اسرق واقلب مصلحتي علشان اسيبك تقلب مصلحتك
اهو ده حال البلد
اللي عايز يعيش فيها لازم يفهمها ويتعامل معاها زي ما هي كده علشان لو حاولت تعدلها راحت تنصدم معها ومش هتعرف تعيش
انا مثلا اتجوزت خمس مرات قبل كده كنت كل سنة اتجوز واحده ما عدا الاخيرة دي رغم انها مش حلوة وقصيرة بس قاعدة معايا بقالها خمس سنين ليه؟ علشان عارفه اني بخونها واني بعرف ستات ..خلاص هي اتعودت على كده اخر ما هتعمله زي ما شفت امبارح لما لقت احمر الشفايف في الحمام كلمتين وخلاص كبرت دماغها
هي البلد دي كده تفهما صح , تكبر دماغك صح , هتعرف تعيش فيها
شوف مثلا احمد عز علشان بينفع وبيستنفع وبياكل وبيأكل غيره عارف يعيش
شوف هم خطين حمر في البلد دي يابو حميد اوعى تعديهم
الاول انك تهاجم سياسة البلد او تحاول تنازعهم فيها وإلا هتترمي رمية ايمن نور اللي هو ياما هنا ياما هناك ورغم علاقاته بامريكا
وبحاجه هايفه قال ايه تزوير توكيلات تأسيس الحزب ..طب واي حزب في مصر توكيلاته مفيهاش تزوير؟؟
كلها تلاكيك ..ليه ؟ علشان حب يعدي الخط الاحمر في السياسة
الخط التاني يابو حميد ..الظهور والشهرة
يعني ايه؟ يعني اشتغل براحتك واكسب كتير مش مهم بس اوعى تعديني وتبقى اكبر مني في السوق من غير ما تكسبني معاك او تكون اكتر شهرة مني في المجتمع خليك كده اكسب مليارات بس من تحت لتحت يوم ما تفكر تظهر هنوقعك
يعني مثلا واحد غرق عبارة وموت اكتر من ألف نفس ..فين؟؟
من قبل المحاكمة وهو بره ..وكمان خد براءة
انما واحد زي هشام طلعت مصطفى لان نجمه طالع وفي ظهور وبدأ يعلى جابوه
تفتكر يعني هشام طلعت ده مكنش يقدر يخلع بره مصر
ده لو عايز يقتل سوزان تميم كان يقدر يقتلها في مصر وبكل سهوله
انما هم حبوا يوقعوه علشان مش عايزينه يظهر ويشتهر
لا انت كفاية عليك كده
وعندك مرتضى منصور اللي هو اشهر محامي في مصر ..مرتضى نفسه اتحبس
مش لشئ غير ان نجمه كان ظاهر وبياخد شهرة اكتر وإلا مرتضى كان يقدر يظبط نفسه وياخد البراءة زي ماهو عايز
شوف يابو حميد هو المبدأ كده عيش وسيبني اعيش
عندك المحكمة الرشوه في كل مكان علشان تعرف معلومة او تاخد شهادة او صورة حكم لازم تدفع والقضاة عارفين كده كويس ..وهنروح بعيد ليه هو مش فيه قضاة محبوسين في جرائم رشوة؟
شوف مثلا دلوقتي جريمة قتل نادين وهبه بنت ليلى غفران ..خلاص القصة بقت مكشوفه وكل مصر عارفه مين هو القاتل وفي الاخر رجال المباحث يجيبولنا عامل غلبان علشان يهدوا الرأي العام وبعد سنه ولا اتنين محاكمة يطلع براءة بس تكون الحكاية اتنست زي حادثة المنيا لما القاتل طلع مختل عقليا
كله بيضحك على كله
شوف يابو حميد دايما في حياتك كده وتعملاتك مع الناس
افهم الناس وعاملهم زي ماهم عايزين
علشان ترتاح وتكسبهم
وإلا مش هتعرف تشتغل ومش هتعرف تعيش وخلي بالك مش مهنتنا بس اللي كده
كل الناس
فهمتني يابو حميد؟؟؟؟؟؟؟
....................................................
دي كانت وجهة نظر احد الزملاء المحامين اللي كان بيشرحلي ازاي اعيش في مصر من غير ما اتصادم مع الاخرين
وفق مبدأ عيش وسيبني أعيش
والمثال: احمر شفايف
إيه رأيكم في الكلام ده؟؟؟

31 comments:

جنّي said...

السلام عليكم

مش هي ديى اخلاقك ولا اخلاق الناس المحترمين ..
فكر كويس يا عم احمد وانت عارف مصادر حصولنا غلى الاخلاق ..

مش احنا ولا انت بتوع احمر الشفايف ..

سلام ياصاحبي

الباحث عن الحقيقة said...

منورني يا حاج
وكل سنه وانت طيب
مش عارف ليه من وقت ما جيت وانا عمال اخد على دماغي في القاهره
ربنا يستر

رئـــــيسـة حزب الأحلام said...

عارف الفكر دة هو اللى خارب البلد
كله شايف وساكت ونفعن وننفعك
والبلد هى الخسرانة
دة تكملة المثل ان كنا عاوزين نكمله وربنا يكفينا شر الامثال الجامدة دى
تحياتى لك

Kiara said...

لا طبعا

تفكيره غلط

الحياه مش كده ابدا

ومش احنا اللي نكون بالشكل البشع ده

همس الاحباب said...

طبعا كلنا نهاجم الفكرة والكلام ونقول لا طبعا مش كده
ودى مش اخلاقنا ولا عاداتنا
بس الحقيقة هى كده
ده فعلا حال البلد
وصاحبك فهم اللى فيها صح وجاب من الاخر
ربنا يسترها علينا دنيا واخرة
وكل سنة وانت طيب يا ابو حميد

صبرني يارب said...

رايي ان ده فكر واخلاق واحد منحل يا ابو حميد

واحد بيبرر لنفسه الفساد والخطيئه

واحد عايز يخلي الناس كلها فى نفسه مستنقع الحقاره الى هو عايش فيه

لان ببساطه نضافة الناس بتفكره بحقارته

فبيقنع نفسه بقى ان الناس كلها فى نفس المستنقع

وانه مجبر يا ولداه على انه يكون زيهم عشاني يقدر يعيش

لكن قله الحجر الداير لابد من لطه

الى هو ماشي وراهم وبيطوف حواليهم ويامن على فسادهم يوما ما هاتلطوا وهايكون هو اول واحد لانه فى الغالب هايبقى فى الديل ورا

وما فكرش ان الوحشه الى في بيته دي ممكن تكون بلبه على قفاه وهى كمان بتخونه عشان كده ساكته
ههههههههههههههههههه

مش مشكله وحشه هو برضه الى بيأمم من الزباله بيشم قبل ما ياكل ؟؟؟

بس انا زيه مش مقتنعه ابدا فى قضية هشام وهبه ونادين ان دي الحقيقه
وكذلك ايام قضية بنى مزار

الموضوع لاااااازم فى ان

باحث ما تكتئبش
النضافه لسه موجوده والى يقولك غير كده اديله على قفاه من فضلك نيابة عني

صبرني يارب said...

اه كل سنه وانت طيب

جنّي said...

مين يابني اللي يقدر يديك على دماغك

طيب واللي خلق الخلق انيمهالك من المغرب ..

انت اللي ابتليت بناس متعبة ومقرفة كمان ..

يابن الحلال اختار الجار قبل الدار

ربنا معاك

زهرة الجنة said...

يمكن يكون في جزء فينا بالصفات دي
لكن مش أخلاق الناس كلها كده
دي وجهه نظره وهو حر فيها
ومش معني ان جزي كبير من الناس اصبحوا كده
نكون احنا كمان زيهم
ومفيش شيء يبرر لنا فعل الخطأ
ومفيش انسان بيجبر انسان علي فعل الخطأ

كل سنة وانت طيب
وعيد سعيد عليك

Lobna Ahmed Nour said...

لو الحال كده .. يبقى .. ارض الله واسعة

أنت...وأنا said...

والله جميل لو تعيش وتخلي غيرك يعيش المصيبه لمه يعيش وعايزك تموت
الدنيا فيها مصايب كل ماتقول دي مصيبه تلاقي اكبر منها ربنا يستر

صباح الصباح said...

بيب بيب كل سنة وانت طيب يا باشا وبعودة الايام الجميلة

انا متفق معاك فى كل حاجة ولو تفتكر كمان اللى عملوة فى عمرو موسى لما لقوا نجمة ظاهر رفسوة فى التلاجة ونفس القصة مع محافظ الاسكندرية رفعت الحبوب زى الاسكندرانية ما كانوا مسميونة واتجمد هوة التانى

انما معلش هوة اية موضوع بنت ليلى غفران بالضبط.. مش هوة القاتل اللى عندة 19 سنة اللى قالوا علية واللا دة كمان لعبة سياسة؟

Anonymous said...

هي غامقةبس مش قوي كده يعني فيها اوقات الالوان فيها فاتحة شوية يالا كل سنة وانت بالف صحة وسلامة

ahmed_k said...

رفع الحجيج أكفهم
يرجون رحمة ربهم
ورفعت كفي أدعوه
يجعل ثوابك مثلهم
وكل عام وأنتم بخير

mahasen saber said...

ده مش محامى يا باحث ده فيلسوف
بغض النظر عن القبيله اليى متجوزهم والغلب اليى موريه لمراته

البوست فيه كلاكيع بس حلوه تصدق


وكل سنه وعيد وانتا بالف خير وصحه وستر يا باحث
وربنا يعود عليك الايام بخير

هى فوضى said...

ماااااااااااااء مااااااااااااااء
مااااااااااااء مااااااااااااااااااااااء ماااااااااااااااااااااااااء


عيد سعيد
وكل عيد اضحى وانت بخير
وان شاء الله العام القادم على عرفات متجمعين

أمل فتحى عزت said...

السلام عليكم
كل عام وانت بخير والى الله أقرب
مع خالص تحياتى

Anonymous said...

أولا كل سنه وانت طيب وبخير وصحه أنت وعسقول وأسركم الكريمه

بالنسبه للبوست
مبدأ صاحبك غلط

دي مش عيش وسيب غير يعيش
ده عيش وإظلم وأقهر غيرك

في حاجه اسمها حلال وحرام
في حاجه اسمها تقوى الله
في حاجه اسمها ارحم من في الأرض يرحمك من في السماء

ومخصوص لصاحبك بقى في مثل بيقول
دقه بدقه وإن زدت لزاد السقا
والمثل له حكايه لو مش عارفها أحكيها لكم المرة الجايه
بس طبعا المشاريب عليكم :)

قوله يتقي الله في مراته
ده لو جرى له أي شئ المفروض هي اللي هتشيله
فخليها تفتكر له شئ طيب


والحكومه وعمايلها
مهما الليل طال
ففي صبح إن شاء الله
هي كانت دامت لمين؟

كل سنه وأنتم طيبين

Unknown said...

عيد سعيد
وكل عيد اضحى وانت بخير
وان شاء الله العام القادم على عرفات متجمعين

Soul.o0o.Whisper said...

كل سنة و أنت طيب يا أبو البواحث


و عيد سعيد عليك و على الأمة الاسلامية يارب

و كل لحمة كتير و أتغذى

خزن للسنة الجاية


ههههههههههههههههههههه



بالنسبة بئا لموضوع أحمر شفايف
فكل واحد عقله فى راسه
يعرف خلاصه


بص يا متر
بجد بجد
أوعى شئ يبعدك عن هدفك اللى أنت ماشى فيه
و اللى هو طبعا رضا ربنا

بجد ... حط ربنا قدامك
و حبه أوى
و شوية صبر
ربنا هيرزقك من حيث لا تدرى و لا تحتسب

أنا بأقولك الكلام دا مش عدم ثقة فيك
لكن لأن الدنيا فعلا بتغير يا أ/ أحمد
بجد بتغير أوى
و أنت بتقول عمال آخد على دماغى
فأوعى دا يخليك بس تفكر
لأن التفكير فى حد ذاته
معناه إنك بدأت تتزعزع فى مبادئك



معلش استحمل كلام أختك الضغيرة
و آهو كله بثوابه
ههههههههههههههههههههههه






خالص تحياتى

أمل حمدي said...

كل عام وانتم بخير

عيد سعيد ان شاء الله

طبعا انا مش ها اقول رأيي في الكلام

وكفاية

انما الامم الاخلاق ما بقيت فان هم ذهبت اخلاقهم ذهبوا


واحنا ماشاء الله ذهبوا على الاخر


تمسك بمبادئك

ولا تستمع للاخرين

مهندس مصري بيحب مصر said...

ليك حق تكتئب من القاهرة يا احمد إذا كنت شفت فيها اشكال كتير من النوعيات الغريبة دي

Mony said...

ايه يا باحث مختفي ليه

كل سنة و انت طيب

ليك عندنا تاج ياريت تعدي تاخده

القلم السكندري said...

السلام عليكم..

عن تجبة شخصية أن البلد دي مصرة تعلمنا درس يعتبر قاعدة عامة فيها

أن اللي بيمشي بضميره هنا ومبيسكتش عن الباطل ده بيسبح ضد التيار ولازم هيتبهدل

لكن مش معني كدة ن الغلط هينقلب صح بالأغلبية

لا يعرف الحق بالرجال.. ولكن اعرف الحق تعرف أهله..

طبعا الكلام سهل.. لكن تنفيذه ليه تمن

وربنا يهدينا للحق ويثبتنا عليه

L.G. said...

عشان كده المتمسك بدينه كالقابض على جمر من نار

ناس كتير بترمي الجمرة لما بتتلسع وناس بتقاوم انت اختار

šσяšαяαα said...

انا جالى ياناس احباط
تارارارارارارا

مش عاوزة اكملها لانى مش بطيق اللى بيغنيها

وبعدين معقولة يعنى الناس كلها بقت تنهب وتاكل فبعض
اكيد يعنى فى شوية ناس برضو عندهم ضمير صوغنون كدا على قدهم

تفائلوا يامعشر المصريين.. فالتغييرو قادمون:)
وكل عام وانتم بخير

L.G. said...

عندي تاج
يارب متسيبهوش يصدي

koukawy said...

بص يمكن الكلام اللي هقوله مثالي
بس انا ايه فايدة اني اعرف اعيش و في الأخره تبقي وقعتي مهببه
انا بغلط و بغلط كتير بس طول ما انا عندي خطين حمر غير اللي بتقول عليهم و هما: الله و الضمير
طول ما انا مراعيه الخطين الحمر دول هاعرف اعيش و لو بصعوبه
ياللا ربنا يسهل

أنا حر said...

عزيزي كل ما ذكرته في البوست لا يعلمنا كيف نعيش ولكنه يخبرنا ان مصر هي اكبر دول العالم فساد في العالم
تحياتي

Asmaa mahaba said...

ما شاء الله فعلا فعلا كل مره بقرالك مواضيع بحثها اسودت واتحرقت وبقيت بطاطا ياريت لو الموضوع غم اكتب ع المدونه يا سومه متدخليش لو سمحت...لان انا بقيت لا وبقيت ليه انا اصلا اصلا شخصيه كئيبه تكئبنى اكتر ليه
بص يا باحث فى ناس كدا تقدر تكبر انا ليا ناس اعرفهم كدا اساتذه تكبير والنهارده غزه بتنضرب يسحوا شويه دموع بكرا يروحوا سيما عادى يعنى ..
اييييييييييييييه دنيا سلام

ابوعدي للتسوق said...


شركة تنظيف فلل بالجبيل
شركة تنظيف شقق بالجبيل
شركة مكافحة حشرات بالجبيل
شركة تنظيف منازل بالقطيف
شركة تنظيف فلل بالقطيف