Saturday, January 24, 2009

الرجال لا يتزوجون الجميلات

قال : عارف يابو حميد أوعى تتجوز واحده حلوة
أبو حميد : ( مازحا ) يعني قصدك اتفرج عليهم من بعيد ولا ايه؟
قال : انا مثلا اتجوزت ست مرات ..كنت كل ما أشوف واحده حلوه اتجوزها بس حصل ايه بعد كده
واحده ما بتعرفش تطبخ ..طلقتها
التانية طول اليوم مهتمه بس باللبس والمكياج وعايزه فسح على طول ومكنتش بتصحيني الصبح طبعا علشان طول الليل عايزه تسهر فكانت بتضرني في شغلي ..فطلقتها
وواحده كنت اديها تلاتين جنية تنزل علشان تشتري اكل وما تعرفش وتبوظ الاكل كمان
انما مثلا عندك مراتي الاخيرة دي أهي وحشه مثلا ومش حلوه ولا حاجه بس تفتح التلاجه تلاقي فيها كل حاجه
اديها عشرة جنية تنزل السوق تشتري كل اللي البيت محتاجه
اقولها عايز اصحى الصبح تصحيني رغم انها بتنزل شغلها متأخر بعد ما انا بنزل
وفي المكتب مظبطه المكتب عارفه شغلي وعارفه بتعامل مع مين وعارفه اخر الشهر عليا ألتزامات ايه ودفعت لمين ومين لسه ما دفعتلوش
يعني مرياحني وظابطه شغلي
علشان كده استمرت معايا خمس سنين ولسه
..............
الكلام ده فكرني بصديقي الانتيم المشمهندس صالح
قولتله : ايه رأيك في فلانة؟
قلي : يا عم انت عايزني اتجوز واحدة طول ماهي ماشية في الشارع حد يعاكسها لا يا عم انا هتجوز واحدة وحشه
يعني م الاخر جواز عتريس من فؤادة باطل

25 comments:

سلوى said...

الجميله هتلفت الأنظار
والوحشه هيكون عندها نقص

خليك وسط
وبعدين مفيش جمال كامل
لازم تلاقي شئ ناقص
ولا قبح كامل
لازم هتلاقي شئ جميل يعوض النقص في الشكل

~*§¦§ Appy §¦§*~ said...

ده قصر ديل يا ازعر ههههههههههه
وحشتنا يا مصيبه ووحشنى النكش فيك
انت مختفى فين ما داهيه الا تكون اتجوزت
على فكره دي هواجس عند الرجاله يا ابو حميد مش اكتر
فيه ناس مبتحبش تتجوز الا الحلوين ومش معنى ان الواحده تكون حلوه انها مش هتهتم ببيتها ولا جوزها بالعكس

زهرة الجنة said...

خير الأمور الوسط

لكن برضه مش كل الجميلات أغبياء

ومش كل الوحشين عقلهم كويس

يعني مفيش انسان كامل

لازم يكون فيه شيء ناقص

يعني ممكن جميلة وغبية ووحشة وذكية

لكن الجمال في الست الوحشة بيكون في اشياء تانية

تحياتي

جنّي said...

السلام عليكم

ازيك يا عم احمد وحشتنا فينك .. وليه القطيعة دي انت زعلان مني في حاجة ..
طيب مش تسأل وتتفقد اصحابك فرحانين ولا زعلانين ولا فقدوا عزيز ؟

شوف يا عم الحاج انا افضل اتزوج واحدة انظر اليها تبتسم لي الحياة واحب من خلالها كل الناس وان كانت التلاجة ها تبقى فاضية ..

وانت عامل ايه دلوقتي وفين اراضيك في اسيوط ولا القاهرة واخبار شغلك ايه ؟
سلام موقت

ماما أمولة said...

اهلا يا متر والله لك وحشة ليه مش بتسأل على ماما امولة مكنش عيش وملح دا اللي اكلناه مع المدونين

المهم من الاخر لاحلوة ولا وحشة

اظفر بذات الدين تربت يداك كما قال رسولنا صلى الله عليه وسلم

وتكون من بيت اصل مش اي حاجة

ربنا يصلح حالك ويدلك على الخير

وابقى عدي ومسي ولا صبح

سلام

Soul.o0o.Whisper said...

اييييييييييييييييه دااااااااااا

الباحث ظهر يا ناس
الحمد لله ... النده فى الميكروفونات جاب نتيجة
ههههههههههه


اولا : حمدلله عـ السلامة

ثانيا : أفضل إنك ماتتجوزش خالص
و بكدا ترتب حياتك بمعرفتك
:)

ثالثا بئا : لكم تاج عندى تعالو استلموه



ياللا سلام

دعوة الفردوس said...

هي بقت ماشيه حلوه ووحشه؟؟

امال فين
اظفر بذات الدين
وفين القبول
وفين مدى التوافق العقلي والثقافي
وفين الأرضيه المشتركه والأهداف الثابته


انا اخر ماكتبت على مدونة وآخرتها كان يخص الزواج
أتمنى لو تلقي نظره وتدلو بدلوك

عاشقه وغلبانه said...

غلبتونا......!!
ارسوا علي بر
حلو ولا وحش

ربنا يجعلنا حلوين في عيون ازواجنا وحشين ومقرفين في عيون الشباب اللي بيعاكس في الشارع
هههههههههههههههههههههههههه

تحياتي

mony said...

اخييييييييييرا


حمد الله علي السلامة يا باحث

انا من رأي ماما امولة

اظفر بذات الدين

اللي تتقي الله فيك

و لما تتقي الله فيك هتحسن ليك في كل حاجة



ربنا يوفقك
و يرزقك بيها بأه

صبرني يارب said...

الجمال جمال الروووووووح

ايه يا ابنى انت خلاص بعتنا

هى القاهره الى عملت فيك كده ولا ايه

ماشي ياعم

اصحابك دول معلش يعنى مخهم على ادهم شويه

الاولاني ده حضرتك مش عايز زوجه ده عايز مستخدمين

والتاني ابقى قوله ان الوحشه بتتعاكس برضه خليها يتجوز اخوه احسن
هههههههههههههههههه

اتجوز يا ابنى واحده حلوه ما تسمعش كلام العالم التعبانه دي ههههههههههه

لماضة said...

ليه تتجوز اصلا
العقل نعمه
اتجوز العقله اللى تعرف ربنا
وبعدين الجمال ده شىء نسبي
فيه بنت وحشه تعرف ازاي تحسسك انها جميله والعكس صحيح
ومن حق اي راجل ان مراته تكون جميله ليه
عشان انت عارف الرجاله عنيهم زايغه طبعا ده شىء مفروغ منه
:))
ربنا يرزقك الزوجه الصالحه الى تكوت قرة عين لك ولاهلك

dodda said...

يا عم حلوه وحشه ..بس تعيش
وبعدين بينى وبينك المهم النفس

وسلملى ع المأذون


حد لا قى يتجوز اصلا
ولد والا بنت كله قرب صلاحيته تنتهى....

koukawy said...

مش قاعده ابدا

رحــــيـل said...

انا شايفه انها مش مسألت شكل الموضوع فكر وشخصيه مهى ممكن تكون جميلة وذات فكر وتقدر تعمل كل اللى اخر زوجه واللى بيقول عليها وحشه بتعمله

بعيدا عن الشكل هناك اشياء اخرى
وبعدين يعنى على اساس ان كل الرجاله امله قوى
كل مشكله تبقى ست

kochia said...

طبعا لا مانع تكون جميلة بتعرف تطبخ ومدبرة وزي الفل

ولا مانع برده ان الوحشة تكون حبوبةوجذابة

والعكس صحيح في الحالتين

الشطارة والخيابة والادب وعدمه ليس لهم اي دعوة بالجمال والقبح
والشواهد كثيرة

تحياتي

mahasen saber said...

خير الامور الوسط يا متر

قلب ينبض بالحب said...

ههههههه لاحول ولاقوة الابالله لاالحلو مرتاح ولاالوحش مرتاح يعني هو الواحدة متنفعش تكون حلوة من برة ومن جوه ولاايه ده يعني الي معروف ان حلاوة الداخل بتنعكس على الخارج يالا بقى ربنا يوعدك بحلاوة الداخل والخارج يا ابو حميد

الرابطة وبناء الأمة said...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

عاشقه الفردوس said...

:))))

ارحمنا برحمتك يارب

مش بالحلاوة والوحاشه
بالدين والقبول ومستوي التفكير

بس انت ماتنقش علي نفسك وادعي ربنا يرزقك بذات الدين


:)))

NIDAAL .R said...

ايه يا عسقول
هو ده كلام برده
يعنى على كدة الحلوة تقعنس فى بيتهم
ولا ايه ؟
بالدين الاول ..
لا بالجمال والحلاوة ولا بالشقاوة ولا بالوحاشة والرخامة والرزالة

من الاخر
كل واحد وله نصيب وبياخده

بسمـــة مســـــلّم said...

السلام عليكم دى اول زيارة ليا عجبنى موضوعك بس فى رأيى مفيش بنت وحشة اكيد حتلاقى فيها اللى مش حتشوفه فى غيرها سواء فى الشكل او الاخلاق او الجمال الداخلى وكلامى فكرنى بمثل لولا اختلاف الاذواق لبارت السلع يعنى من الاخر محدش حيعنس يا بنات ههههههههه سلام واكيد منتظرة تعليقك

الفقير الى الله said...

هاه
مش ممكن يعني نتعذب واحنا مش متجوزين
واحنا كمان متجوزين
يعني الجميلة لا
والوحشه اه
طب مهو الشرع محلل اتنين وتلاته واربعه
اتجوز 3 حلوين ووحده وحشة
هههههههههههههههه
لاياعم ربنا يرزقنا اللي عندها دين
وحكاية الطبخ هتتعلمها هتتعلمها

تحياتي

مصطفي ريان said...

انا شايف ان اهم حاجة القبول

شهووووده said...

نسبة الجمال تفرق من واحد للتاني.. اللي تشوفها انت وحشة غيرك يشوفها حلوة واللي تشوفها حلوة غيرك يشوفها وحشة.. وعلى رأي لطفي بوشناق..


لاموني الي غارو مني وقالولي اش عجبك فيها لاموني الي غارو مني وقالولي اش عجبك فيها جاوبت الي جهلو فني خدوا عيني شوفو بيها

Anonymous said...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه