Wednesday, March 4, 2009

حلبة حصى ..حصى بجد

مره سألت الواد عسقول
خدوا بالكم سألت مين؟؟
عسقوووول
يعني أنا مين؟؟
الباحث
نقطة ومن اول السطر
تفتكر يا عسقول الدين بيشكل نسبة كام في تصرفات الشخص العادي وهل يمكن القول أننا شعب متدين؟
أجاب : ان النسبة كبيرة اوي يكفي مرة مثلا سواق ميكروباص بيشتم واحد وبعد ما شتمه قعد يستغفر ربنا
يا سلام ..طب وليه يشتمه اصلا
يعني تلاقيه يشتم شتيمة قبيحة وبعد ما ينفش في الراجل يرجع يقول استغفر الله العظيم خليتوا الواحد يغلط والعربية كمان فيها حريم
بصراحة
بصراحة بصراحه يعني
انا شايف اننا بنمارس أو بنشوف النفاق الديني بشكل معتاد ومتكرر في حياتنا اليومية
صحيح بنستغفر بعد ما نغلط
لكن التدين ده مش بيمنعنا من البداية اننا نغلط
نقدر نقول أن احنا الاحساس الديني عندنا عالي ..لكن مظهري أكتر منه حقيقي
ومش بعمم يا جماعة فيه ناس طيبين وحلوين وزي الفل
بس برضه ارجع واقول رغم الاذان اللي بنسمعه في كل شارع خمس مرات
وجوه البيوت على شاشات التليفزيونات
لكن ..بنغلط
بنغش
بنكدب
ونرتشي
ونرجع نستغفر
!!!!!
بنتعاطف مع مشكلة ونقول يا حراااام ..بس بطلنا نمد إيدينا ونساعد زي زمان
ليه الدنيا مابقتش حلوه زي الاول
اكيد طبعا الظروف الاقتصادية والكفاح في سبيل لقمة العيش
على ذكر الكفاح ..زمان كانت الناس بتجاهد علشان تاكل عيش
دلوقتي الواحد بيطلع عينه علشان يقدر يسدد ايجار الشقة وان شاء الله عنه ما اكل وربنا يخلي قانون الايجار الجديد
ده حتى صلة الرحم ماعادتش زي الاول
وكلنا عارفين ليه؟
لازم يتوجدلها فائض في الميزانية يسمح بصلة الرحم
ثم بعد كده نحدد هنتقابل امتى؟
واية الميعاد المناسب لطرفين بيشتغلوا أغلب الوقت
امبارح رحت ازور واحد زميلي في الزاوية الحمراء
محمود بتاع الاسئلة اللي في الصحيفة
المهم انا وصلت لغاية عنده الساعة اتناشر
كان فاكر نفسه اجازة لكن اتصلوا بيه وقالوله ييجي بكره وياخد بعده اجازه
فكان لازم يصحى الساعة خمسة ونص صباحا علشان يلحق يوصل شغلة
وعلشان يقعد معايا فضلنا سهرانين لغاية الساعة تلاته مش عايز ينام علشان نلاقي وقت نقعد سوا
قولته نام انا مش قادر اسهر ..ونمنا
صحي الساعة خمسة ونص نزل راح شغله وقعدت انا وحدي زي القرد لغاية الساعة اربعة بعد العصر هو رجع من شغله لقاني بلبس ونازل
يا دوب قعدنا ساعة كمان سوا
ونزلنا علشان نخطبله لكن لقينا الولية ام البت قافله المحل
اه كنا رايحين نخطبله البنت من امها وهي شغاله في المحل
ماهو مفيش وقت يا جماعة
:))))
على ذكر التدين
في بلدنا كنا كلنا في الجامع نعرف بعض وقبل الصلاة وبعدها بنقعد ندردش
هنا بلاقي محدش يعرف حد
يبقى البقال بتاع المطعم بيصلي جنبي واطلع اشتري منه ألاقيه بيضحك عليا ويديني ابو جنية فول اد ابو خمسة وسبعين
:)
وماتلاقيش اتنين اصحاب خارجين من الجامع سوا إلا اذا كانوا رايحين مشوار وطالعين يمدوا
الله يرحم زماااان قدام جامع الشيخ نجيب كنا نقعد خاصة بعد صلاة العصر والعشاء ..نعمل ندوااات قدام الجامع
م الاخر ارجع واقول احنا مش شعب متدين يا جماعة
احما شعب بيخاف من الاخرة
طول عمر قدماء المصريين بيعملوا حساب للاخرة وبيخافوا منها
وانعكاس ده على سلوكنا ايييييه؟؟؟؟
اننا بعد ما نغلط ..نستغفر
يعنى اوكي اغلط بس ما تنساش تستغفر ربنا واغلط برضه مش تبطل غلط يعني
لا عادي وكرر نفس الغلطه بس إلزق الاستغفار في نفس جملة الشتيمة مثلا
يعني : يا راجل يا بن ال..... استغفر الله اصلك راجل وا ...معندكش دم
كده يعني
ودمتم
ايوه جااااي وعندك واحد حلبة حصى مغلية قبل كده مرتين
:)
استغفر الله سامحني يا رب
قصدي مرة واحده بس
:)))))))))))

25 comments:

فاتيما said...

باحث يا بااااااحث
أزيك يا أستاذ
و مختفى فين مش بنشوفك ؟؟
مش عارفة إيه علاقة الحلبة حصى بالموضوع أصلى لسه مدروخة من فرحة إمبارح ...
المهم
مش هناقشك فى حكاية التباعد
اللى ما بين الناس دا
لأنها آفة المدنية
و الزمن اللى بقينا فيه
بس حكاية التدين دى و تركتنا اللى ورثناها من الفراعنة دى مش داخلة دماغى قوى ...
أصل كل الإحترام و التبجيل لقيمة الموت و ما بعدها
و اللى شوفناها موجودة و بقوة فى كل آثار قدماء المصريين
عمارة و لا كتابات حتى
مش معقول تكون خوف بس
دا شىء أكبر و أقوى من مجرد الخوف
لو كان خوف كان تلاشى من زمن و راح مع اللى فرضوه على الناس
لكن الحكاية اكبر من كدا بكتير يا باحث العلاقة اللى بين البنى آدم و ربه
و الى طول الوقت إنت حاسس إنك مقصر و قليل و خايب و طماع و ...و...
و أظن اللى يحس غير كدا يبقى سوبر إنسان بقى
الغلط دا طبيعة إنسانية
كل إبن آدم خطاء ...المهم اللى بعد الخطأ دا
هنعمل إيه ؟؟
و حتى لما بنعمل كدا
يعنى نغلط و بعدين نقول سامحنى يا رب
تفتكر كل اللى بيقولها بيبقى عاوز يرضى ضميره بس و يخلص ؟!!!
معتقدش
متهيألى إن دا مش خوف جبن ...
دا خوف حب
يعنى الواحد بيضعف قدام نفسه و بعدين يخاف من غضب ربنا عليه ...
مش خوف من الأذى لأن البنى ىدم بيناله اذى فى الدنيا كتير قوى
يعنى العقاب حاصل حاصل
بس هوهو بيتمنى لو ربنا ميبقاش غضبان عليه
دا فى رأيى أعظم مظاهر التدين
إنك حابب ربنا و مستنى يفيض عليك بكرمه و يسامحك دايما
دا الام بتنسى الحجود
و الاخ بيصالح اخوه
و الحبيبة بتسامح اللى بتحبه
فمابالك برب العزة
كتير علينا نتعشم فيه!!
و مع كل هذا ...لا أنكر رأيك فى إن الواحد لازم قبل ما يغلط ... يفكر
مش العكس
و خالص تحياتى ليك يا عزيزى

صبرني يارب said...

اه احنا فعلا بدأنا نتحول الى كده شعب مظهري

وفعلا بنتى مره قالتلى يا ماما هو ينفع نكذب وبعد كده نستغفر ويبقى خلاص
قلتلها لا طبعا
وكنت مشغوله ساعتها
تاني يوم جت تعيط
عشان هى قالت للمس ان الكراسه مش معاها وطلعت كانت معاها ومش شافتها وده هى اعتبرته كذب وقعدت تعيط لانه ما ينفعش تستغفر وخلاص

طبعا قعدنا نحكي فى القصه دي ساعه ونوضح المواقف

لكن برضه فى ناس بتتعود انها تستغفر وخلاص وكده اتسمح الزباله الى عملوها

زي بالظبط الى بيسرق ويعمل بلاوي وبعدين يعمل دار ايتام

وانت فعلا عندك حق فى ان الناس ما عندش عندها لا وقت ولا مقدره ماديه يدوا بعض

بالكاد عايشين للاسف

ما تقارنش البلد بالقاهره هاتتعب

تحياتي لك

ومش باحب الحلبه شوفلي حاجه تانيه

koukawy said...

اهو نص العمي ة لا العمي كله
بدل ما يشتم و ما يستغفرش
اهو مين عارف يمكن بعد كجه ما يشتمش
ربنا سبحانه و تعالي ما بيقفل الباب في وش حد
اكيد طول ما فيه ذكر لله حتي لو وسط غلط
ده بيمنع انه الغلط يبقي لوحده
****************
ما بلاش حلبه
بتعمل ريحه وحشه
مفيش حاجه تانيه عشان مبحبهاش
و تبقي مغليه 3 مرات مقبوله منك مش مشكله

عاشقه وغلبانه said...

كويس ان الناس لسه بتعمل لاخرتها

اللي جاي بقي لا هايعملو لا لدنيا ولا لاخره

واطمن هايبقي العمل مطابق جدا جدا للبعد عن الدين
ومش هايحيروك معاهم


ممكن تجبلي واحد سحلب

Soul.o0o.Whisper said...

باحث

انت مالك؟؟؟

على فكرة انت مش طبيعى
و دا مش كويس علشانك!!!

أنا مش هناقش الموضوع دا الوقتى
بس ايه اللى ورا البوست دا؟؟؟


يارب تكون كويس




دمت بود

mohamed ghalia said...

سعيد جدا انى اتعرفت على حضرتك فى حفل توقيع كتاب انا انثى
محمد غالية

الباحث عن الحقيقة said...

فاتيما
شوفي ازاي وانا اللي كنت فاكرها طاء مش تاء
ما علينا
أنا معاكي واهو المهم على الاقل اننا بنستغفر وان ده ممكن يكون معناه ان الضمير الديني موجود لكن بينام ساعات
ولكن
وارجع للقدماء المصريين
بنوا مقابر واهتموا بالموت وما بعد الموت
وده ورثناه منهم
لكن ما ورثناش السلوك الديني اليومي
او نقدر نقول اثرت عليه عوامل كتير خلتنا نكتفي بس بالمظهريه الدينية كنوع من التمسك بالدين
لكن الدين لو كان رادع حقيقي وقوى في حياتنا
مكناش نشوف رشوه ودي انا بشوفها كتير بحكم مهنتي
مكناش نشوف كدب ولف ودوران وعدم امانه في التعامل والاستغلال الخ
وما ننكرش ان ده منتشر فعلا وبجد
واللي بيخليني استغرب ان اللي بيرتكب السلوك ده تلاقيه بعد ما يغلط يرجع يقول استغفر الله ومع ذلك لا يردعه هذا عن عدم الاستمرار او تكرار الغلط
ده اللي مش عاجبني
والحمد لله ع الاقل الاستغفار بعد الخطأ بيأكد ان فيه أصل صح بيقيس عليه الانسان افعاله وبيعرف انه غلط
واننا لازم نقوى الاحساس بالاصل الصحيح جوه الانسان
وتحياتي لحضرتك يا فندم ونتمنى نشوفكم قريبا
بعد ما خلعنا انا وعسقول من مشوار التبرع بالدم :)))))))

الباحث عن الحقيقة said...

صبرني يا رب
بجد بيعجبني وعيك وملاحظاتك وانك واخده بالك من اللي بيحصل
وبيعجبني جهادك في محاولة الاصلاح والتوجية
وربنا يخليلك بنتك
خطيبتي بأعتبار ما سيكون
:))))
مش كده برضه يا حماة المستقبل

الباحث عن الحقيقة said...

كوكاوي
نص العمى
ينفع عنوان بوست
هنقضيها كده نص عمى ونص فضيله ونص حياة
فعلا وجهة نظر موظفة بتاخد اتنين جنية زيادة
ثم انتي اخرك شاي ..مالك انتي ومال الحلبة

الباحث عن الحقيقة said...

عاشقة وغلبانه
ياااه هو انا كنت متشائم كده اوي زي حضرتك
لالالا حضرتك تاخدي الجايزه الاولى بجدارة
ثم اللي جايين دول ايه
اولادنا
ده باعتبار هنتجوز ونخلف يعني
يبقى ناخد بالنا ونربيهم كويس
ونكافح زي صبرني يا رب


****************

دكتورة ايمان
بلاش شغل علم النفس والدوافع والروابط وما وراء وما بعداء
ثم انا طبيعي
كل الحكاية ان القهوة اللي بيقعدني عليها عسقول بيجيبولنا الحلبة زي المية لون بس
حاجه كده استغفر الله يعني



****************

محمد غالية

اكيد انت تقصد عسقول
واكيد ما قريتش البوست
شكلك مالكش في الحلبة
اجيبلك شاي بلبن
:)

وشكرا لزيارتك

Soul.o0o.Whisper said...

ههههههههههههههههههههههههههه
هههههههههههههههههههههه




ماشى يا باحث

و بعدين مالكش دعوة بشذى لو سمحت
حلوة قوليلها و هى تعرف دى


أصلا أنت بالذذات مش حكتلها عنك
هههههههههههههههههههه





سلام

جنّي said...

السلام عليكم

بتشتكي من الحلبة ليه حد قالك تقعد على قهوة .. ممكن تقعد على .... لأ مش شاي كابتشينو احسن ..
وتفتكر الراجل القهوجي بيستغفر كام مرة ..

التغيرات التي حدثت للناس ما بين الامس واليوم .. وما بين الحضر والقرى لها اسباب كثيرة .. واذا كان الناس يخافون وغير متدينين فعلى من يقع الدور في تصحيح مفاهيمهم وتحويل الخوف فقط الى خوف وتدين .. يا ترى مين اللي ها يتحاسب على سبب تحول الناس وتغيرهم .. الناس نفسها ولا ولاة الامر ولا ولا ولا مين ؟

صلي على النبي يا عم احمد

سلام

لحظة said...

نعم

نحن نخاف من الاخرة
لاننا لا نطيق عذابها
ولانا مؤمنين بالله الذي جعل يوما للحساب

ولكننا بشر
ولذلك جعل لنا الله الاستغفار

ولكن ليس لان فيه ناس مش فاهمة
ان الاستغفار يعني اتوب عن الذنب اللي عملته
واندم اني عملته
واحاول بكل جهدي اني ماعملوش تاني

وممكن اعمل كل ده وانا ناوي اني اعمله تاني
واستغفر تاني
واندم تاني
واحاول اني ماعملوش تاني

وبكده انا باضحك على نفسي وعارف اني باضحك على نفسي وعارف ان ربنا عارف اني باضحك على نفسي

ولحظة الختام هي اللي هتكون اللحظة الفاصلة

ربنا قال في القران
" اعملوا ماشئتمانه بما تعملون بصير"

وكل واحد ذنبه على جنبه

وكل واحد ادرى بنفسه


شكرا يا باحث عن الحقيقة

ارجو ان ابن حجر العسقلاني يتابع ردي عليه في مدونتي

معلش دي تقريبا اول زيارة مش ارفة ايه البرتوكول المتبع

تامر علي said...

موضوع الدين ده مفهوم عندنا غلط .... إنت لو سألت أي حد في الشارع الرشوة صح ولا غلط ؟ هايقولك غلط ويديك خطبة كمان بس ممكن تلاقيه مرتشي في الآخر .... لو سألت واحده بتشرب معسل في أي كافيه إيه رأيك في البنات اللي بيشيشوا ؟ هاتقولك غلط وتديك محاضرة وهي بتكركر:)

المشكلة تتلخص في " هناك فصام بين ما يعتقد الإنسان بأنه صواب وبين ما يعتقد أنه يجب عليه فعله "
يعني من الآخر "شعارات شعارات شعارات:)

سومه...مجنونه فى بلد عاقل said...

يا شيخ اول مره الحمد لله اقرا منغير لخبطه واعرف مين كاتب البوست:)
الحرامى عندنا بيدعى ربنا يوفقه وبيسمى قبل ما يفتح الخزنه
موضوعك قريب قوى من موضوع دكتور اشرف كاريكاتوظ دى صدفه ولا اتفاق بينكم؟؟

Beram ElMasry said...

اتمنى زيارتكم لمدونتى وابداء الراى فى الموضوع المطروح ، فلا تتاخروا ولا تبخلو ا بالمشاركة

Beram ElMasry said...

اتمنى زيارتكم لمدونتى وابداء الراى فى الموضوع المطروح ، فلا تتاخروا ولا تبخلو ا بالمشاركة

قلب ينبض بالحب said...

ههههههههه شعب عنه اسيكزوفرنيا عامل زي الي بتمثل وهي متكشفة وفي نفس الوقت بتطلع تحج وتعمل موائد رحمن مش قادرة ااقول غير كده

م/ الحسيني لزومي said...

شارك في الحملة من أجل إطلاق سراح
1-المدون دكتور / توكل مسعود
2- الناشط / ضياء الدين جاد

mahasen saber said...

يا سلام عليك يا باحث لما بتبحث فى بواطن ومداخل الامور

سجل المزورين said...

إلى مدوني مصر الأحرار
السيد الفاضل صاحب مدونة /استراحه الكاشفه

تحية طيبة وبعد

شباب مصر الأوفياء
أمل الحرية وبناة المستقبل
ندعوكم للمشاركة معنا في
التحالف الوطني ضد التزوير
تحالف يضم كافة القوى الوطنية الموجودة على الساحة المصرية
نهدف إلى فضح وتوثيق كافة أشكال التزوير التي تتم في الانتخابات المصرية
نهدف لنشر الوعي الانتخابي وثقافة المشاركة و مبدءا المساواة والحرية
ندعوكم للمشاركة معنا بالإدلاء بشهادتكم و أرائكم حول تزوير الانتخابات وما هو منشور
ندعوا كل صاحب كلمة حرة للتعبير معنا عن رأيه في هذا الداء وطرح صور للدواء
ندعوا كل شريف حر يستطيع مساعدتنا للمشاركة معنا بما لدية من إمكانيات ومواهب ووقت
و نرجوا منكم المساهمة معنا في نشر إعلانات الموقع والجروب والقناة على مدوناتكم الشخصية في سبيل نشر الحق والعدل ومن باب المشاركة في التوعية والتوثيق لحقيقة هذا النظام المزور لإرادة الشعب
نرجوا ممن يضع الإعلان لدية إبلاغنا عبر أيميل الموقع لوضع أسم موقعة او مدونتة ضمن قائمة المواقع الصديقة لدينا
شاكرين لكم حسن تعاونكم معنا

موقعنا www.sgelalmozwreen.com سجل المزورين

لتحميل إعلانات الموقع هنا
http://sgelalmozwreen.com/images/e3lan-1.gif
أو
http://sgelalmozwreen.com/images/e3lan-2.gif
أو
http://sgelalmozwreen.com/images/e3lan-3.gif

لتحميل إعلانات قناة سجل المزورين على اليوتيوب
رابط القناة http://www.youtube.com/Sgelalmozwreen

الاعلانات
http://sgelalmozwreen.com/uploads/you tube.jpg
أو
http://sgelalmozwreen.com/images/1.gif
أو
http://sgelalmozwreen.com/images/1%5C%27%5C%27%20copy.gif
أو
ولتحميل إعلان جروب الفيس بوك
رابط الجروب http://www.facebook.com/group.php?gid=57329097688
الاعلانات
http://sgelalmozwreen.com/images/11%5C%27%5C%27.gif
والسلام عليكم ورحمة الله وبركاته
سجل المزورين

روح البيت said...

مش كل الناس وحشين ولكن اقدر اقول لسة فى خير ودين الحمد لله وسبحان مغير الاحوال
http://www.rou7albayt.blogspot.com

لاسع افندى said...

اننا شعب متدين جدا معدوم الضمير تماما

arabcooL said...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

Uouo Uo said...


thx

كشف تسربات المياة
غسيل خزانات
شركة نظافة عامة