Monday, January 14, 2008

القانون الأول لنيوتن

طلعت فوق السطوح هز الهوا كمى .... يوميها العشوة باظت و كلت علقة من أمى
_________
ا
طبعا كلنا فاكرين العالم الكبير إسحق نيوتن لما كان قاعد تحت شجرة تفاح و راحت سقطت عليه تفاحة سقوطا حرا .. فراح بعدها ضارب التلات قوانين المشهورين بتوع الحركة .. الحكاية اللى جاية دى بقى أنا كنت أتمنى إن السيد نيوتن يكون عايش عشان يشهد بعينيه و يسمع بأذنيه الدليل العملى لفشل القوانين بتاعته


------------------


كان يا مكان .. من سالف العصر و الأوان .. كان فيه زمان واحد اسمه ابو العساقيل .. و كان لسة فى سنة خمسة ابتدائى


أبو العساقيل دة فى مرة أمه بعتته يجيب شنطة فيها شوية حاجات من عند جارتهم "أم خالد" .. أم خالد دى كانت ساكنة فى البيت اللى جنبهم .. و كان أبو العساقيل بيروح لأم خالد عن طريق سطح البيت .. يعنى كان بيطلع الدور الأخير فى بيتهم المكون من ثلاثة أدوار .. و بعد كدة يطلع على سطح البيت عن طريق سلم خشب متهالك شبه السلالم اللى فى لعبة "السلم و التعبان" بالظبط زى دة
و اللى الواحد بيستخدم أطرافه الأربعة فى الصعود و النزول من عليه.. بعد كدة يخبط على شباك "أم خالد" عشان ياخد منها الحاجة اللى أمه بعتته عشانها


و بالفعل.. أبو العساقيل طلع الدور الأخير و بعد كدة طلع على السلم الخشب مستخدما كل أطرافه الأربعة أثناء عملية الصعود .. لغاية ما وصل للسطح و مشى لغاية شباك "أم خالد" و خبط عليه


أبو العساقيل: تك تك تك

أم خالد: أيوة يا أبو العساقيل .. استنى أجيبلك الشنطة

أبو العساقيل: حاضر

أم خالد: خد الشنطة أهى و سلم لى على ماما

أبو العساقيل: حاضر

أم خالد: خد بالك و انت نازل.. أوعى تقع

أبو العساقيل: حاضر


الشنطة كانت شنطة بلاستيك قوية شبه السبت الخوص .. و كان جواها كيس من بتوع الفاكهة القديم اللى شبه شكاير الأسمنت و مش باين فيه إيه جوة الكيس


المهم أبو العساقيل راح لغاية حافة السطح اللى عندها السلم الخشب .. و بدأ ينزل .. ماعرفش .. يبدأ ينزل رجله .. يبقى عايز يسند بإيديه الاتنين على الأرض .. طب يسند ازاى و معاه شنطة ناشفة و حجمها كبير؟؟ و لو ساب الشنطة لغاية ما يسند و ينزل رجليه الاتنين .. هايلاقى نفسه نزل درجتين على السلم و الشنطة ما بقيتش فى متناول إيديه ... طب الحل إيه ؟؟


الحل إنه يسقط الشنطة من السطح على الأرض .. و لما ينزل من على السلم الخشب يبقى ياخدها .. عجبته الفكرة .. راح مسقط الشنطة من على ارتفاع تلاتة متر و عشرين سنتى .. فسقطت الشنطة سقوطا حرا .. و ارتطمت بالأرض بلا ارتداد و لا إزعاج على غير المتوقع .. ما أخدش فى باله .. و راح نازل على السلم الخشب بسهولة مستخدما أطرافه الأربعة كلهم .. و راح التقط الشنطة و نزل بيها شقتهم .. و راح داخل المطبخ .. و ركن الشنطة على جنب .. و خرج ينادى على أمه: يا أمىىىىىىىىى .. أنا جبت الشنطاااااااااااااة .. و حطيتها فى المطبااااااااااااخ


و بعد كدة قعد يكمل مذاكرة على الترابيزة مستنى أمه تجهز العشا للأسرة


قامت أمه بالتوجه للمطبخ لإعداد العشاء .. صوت أدوات المطبخ و تجهيزاتها مسموع كالمعتاد إيذانا فى إعداد العشاء .. و خروشات الكيس اللى شبه شيكارة الأسمنت مسموعة .. و فجأة سكوووووون غريب ... ثم........ العاصفة


صوت من داخل المطبخ: يا لهووووووووووىىىىىىىى .. إيه ده ؟؟ البيض بقى عجة


أبو العساقيل محادثا نفسه: بيض إيه اللى بقى عجة؟؟ .. ثم أنا مابحبش العجة و أمى ما قالتش إنها هاتعشينا عجة النهاردة .. طب هى مخضوضة ليه؟؟ .. و إيه المشكلة إن البيض يبقى عجة؟؟ مش البيض بيتعمل عجة برضه ؟؟


ثم خرجت أمه من المطبخ و علائم الشر و الانتقام على وجهها قائلة: إنت عملت إيه فى البيض يا وااااااااااااد ؟؟
أبو العساقيل: بيض إيه يا أمى ؟؟

أم أبو العساقيل (ما حدش يضحك على المصطلح اللى فات دة): البيض اللى فى الشنطة .. تلاتين بيضة .. بيضة تنطح بيضة

أبو العساقيل: هو كان فيه بيض فى الشنطة ؟؟

أم أبو العساقيل (قلنا ما حدش يضحك):أمال كان فيها إيه ؟؟ انت ما بتشوفش يا أعمى

أبو العساقيل: طب والله ما اعرف إنها كان فيها بيض

أم أبو العساقيل (هازعل أنا من الضحك دة): ا"783خه4لاخهلربهلبعغا9898-34فب8ابعاjiحي983ب "ا

اأبو العساقيل: -----------ا


و توتة توتة .. خلصت الحدوتة


و نستفيد إيه يا أولاد من الحكاية دى ؟؟ نستفيد إنه "يظل الجسم على حالته من السكون أو التحرك بسرعة منتظمة مالم تؤثر عليه قوة خارجية تغير من حالته" و هو القانون الأول للباشمهندس نيوتن


ملحوظة مهمة.. للأمانة العلمية.. التلاتين بيضة مش كلهم اتكسروا .. تسعة و عشرين بيضة بس هم اللى اتكسروا .. و فضلت بيضة واحدة سليمة .. و دى ظاهرة فيزيائية فشل قانون نيوتن إنه يفسرها .. عشان كدة بدأت تظهر نظريات فيزيائية أخرى زى "النسبية " لأينيشتاين .. و "ميكانيكا الكم" اللى أسسها "ماكس بلانك" .. و مازالت حتى الآن الأبحاث دائرة على قدم و ساق لتفسير الظاهرة الغريبة


ــــــــــــــــــــــــــــــــــــــــــــــ


أود أن أتوجه فى النهاية بالشكر للأخت خيخة مش عشان بس هى كانت الزائرة رقم ألف لصفحة البروفايل بتاعتى .. لأ .. كمان عشان هى نبهتنى إن صفحة البروفايل اتفتحت ألف مرة .. يااااااااه يا جدعاااااااان .. مين كان يصدق إن صفحة البروفايل بتاعة بن حجر العسقلانى تتفتح ألف مرة .. و أنا اللى كنت بارقص لما من كام شهر كدة عدد فاتحى صفحتى تجاوز المائة.... إيييييييه .. دنيا


و رئيس مجلس إدارة رابطة العساقيل يود أن يسلم بنفسه هذه الكؤوس للأخت خيخة نظيرا لمجهوداتها الجبارة فى دعم العساقلة فى أنحاء المعمورة



و كل سنة و انتى طيبة يا خيخة .. و عقبال ما تشوفى شريف عريس فى الكوشة
يا جماعة ..يا ريت نروح نهنى خيخة بعيد ميلادها .. و ادعوا لها دعوة حلوة من اللى بتحبوها لنفسكم

47 comments:

بنت الصالحين said...

اضحك الله سنك استادنا
ربنا يبارك في حضرتك
قوانين ايه بس ياعمنا انت حليت فيها قوانين

ادي اخره اللي بيسمع كلام العلماء
ومبرووك ع الالف زائر
عقبال مايبقوا مليون

عصفور المدينة said...

حلو أوي يابشمهندس ربنا يحفظ عيلة أبي العساقيل

هو نيوتن بيه ما قالش أصلا إن البيض يتكسر هو قال إنه ينزل ويقف على الأرض
أما يتكسر دي بقى فده قانون تاني

عجبتني أوي الحتة دي

"783خه4لاخهلربهلبعغا9898-34فب8ابعاjiحي983ب "ا


فكرتني بالنحل اللي بيلف فوق الراس في الكرتون

Empress appy said...

هههههههههههههههههه
ابو العساقيل جبت اسم الدلع ده منين بس تصدق حلو شرحك للنظريه بصرف النظر عن البيض اللى انتهى خلاص
وبعدين ايه حصل هى ماما عملت حاجه فيك ففى الاخر لخبطت فى الكلام بيتهيأ ليه البيضه اللى فضلت كسرتها عليك هههههههههههههههههه

ammola said...

معلش حضرتك هو قانون ميكانيكا الكم له علاقة ببيت الشعر بتاع طلعت فوق السطوح هز الهوا كمى؟لامؤاخذة اصل الميكانيكا ايامنا كانت نص كم
ثم يا ترى ايامن قوانين الحركة ينطبق على عدم اتخاذك للطريق الطبيعى لزيارة السيدة ام خالد؟ام انها كانت تدريبات مبكرة لامور نجهلها
الف مبروك على الزائر الالف ولو ان بعضهم كان انا كنت واقع منى حاجة وباجى ادور عليها
علمت انك مهموم فدعوت لك بتفريج الهم وزوال الغم وتيسيير الامور

الـسـيـدة نـون said...

مش عارفة اقولك ايه اولا عينى مدمعة من كتر الضحك وكتر التأثر
على هديتك الجميلة دى
حلو اوى طقم الكاسات ده
المهم بقى انا عمالة اضحك من اول سطر فى البوست رغم انى ماكنتش عارفة انت تكتب عن ايه
بس ماعرفش اول مادخلت عندك ولاقيتك كاتب بوست جديد وفى اول طلعت فوق السطوح هز الهوا كمى
لاقيت نفسى ضحكت جامد جدا وعمالة اضحك كنت متوقعة انى هلاقى بوست عبارة عن كوميديا سوداء
ماكنتش اعرف ان الموضوع مليان بيض بالشكل ده
ههههههههههههههههههههههه
وبصراحة يعنى ماتزعلش انا قعدت اضحك على مصطلح ام ابو العساقيل
متزعلش بقى هههههههههههههههه
المهم بما انى كنت ادبى ومش فاكرة كل القوانين اللى بتتكلم عنها دى
بس عموما واضح جدا انك بالبوست بتاعك اثبت فشل نظرية نيوتن

بجد بوست دمه خفيف
وكنا كلنا مفتقدينك يا ابو العساقيل
ياريت متتأخرش تانى علينا كدة
علشان بنقلق
وعايزة اقولك كل سنة وانت طيب علشان عيد ميلادك اللى كان من كام يوم
وياريت تبعت سلامى لمعلمك الباحث
وشكرا ليك جدا جدا
اختك خيخة

Anonymous said...

ههههههههههههه
جامده جدا
طلعت فوق السطوح هز الهوا كمى .... يوميها العشوة باظت و كلت علقة من أمى
فهمت انا بقى الجمله دى ليه
ههههههه
بس اعذرنى انا ضحكت على المصطلح بس متزعلش

ههههههههههه
سلامى

فرنسا هانم said...

ههههههههههه
ابو العساقيل ايه الكوميديا الجميله دى
انا لو منك
كنت اشتريت فرخه عتقيه وحلفت عليها طلاق تلاته انها ترقد على البيضه اللى فاضله لغايه لما تفقس
اكيد البيضه اللى قاومت الخبطه الشديده دى
تنتج كتكوت له شأن عالى ويمكن يمسك رئاسه العشه
هو نيوتن كان قاصده نرمى البيض وننط وراه على الكيس علشان نضمن ان البيض يتكسر كله

MerMaid said...

واحد سحلب لو سمحت :)

------------------
بجد حلوة قوي القصة بس ازاي انت مسمعتش صوت البيض و هو بيتفشفش؟؟
طيب وبعد كدة اتعشيتوا ايه؟؟
انا اول مرة اعلق عندك يا ابو العساقيل
و بجد لاقيت دمك خفيف قوي

تحياتي
:)

Desert cat said...

بقى كدا تكسر البيض يا ابو العساقيل وعمال تقولى نيوتن وانشتين
مبروك على الالف متفرج اللى قاعدين فى مدرجات البروفايل
بس بالمناسبة انا لوحدى 500 منهم لانى مش بدخل المدونة غير من خلال البروفايل
عقبال الالفين يااااارب

ابن حـجـر الـعـسـقـلانـى said...

عاشقة الفردوس

الله يحفظك .. أدام الله الضحك على وجهك فى الدنيا و الآخرة

و الله إحنا أيام الكلية درسنا نظريات لعلماء غاية فى الغرابة .. و ماعرفش هم وصلوا للمعلومات دى إزاى .. و أدينى عملت برأيك و طنشت كل اللى قالوه و عايش حياتى من دماغى بنظرياتى الخاصة
-----------------
عصفور المدينة

أستاذى العزيز .. الله يخليك .. ربنا يحفظك و عيلتك فى الدنيا و الآخرة

والله ضحكتنى جدا على النحل اللى فى الأفلام الكرتون .. بس و الله أمى ساعتها ماعملتش معايا حاجة .. قالت لى كلمتين كدة عشان آخد بالى بعد كدة و خلاص

لما كنت فى إعدادى هندسة .. كنت باحب الديناميكا جدا .. و كامت عاملة لى لوثة فى دماغى .. كنت باحسب سرعة و عجلة أى حاجة باشوفها حواليا ... يااه .. كانت أيام
-----------------

appy

و الله أنا مش فاكر اسم "أبو العساقيل" دة ظهر ازاى .. يا إما أنا اللى قلته يا إما خيخة .. و لو كانت خيخة اللى قالته فأنا حاسس إنه طبيعى جدا و كأنه اسم مش غريب عليا

بس و الله أمى طلعت طيبة و ماعملتليش حاجة .. هم كلمتين فى السريع للتنبيه بس.. كل الموضوع إنها بتذلنى لغاية دلوقتى :)
-----------------

ammola

هو ميكانيكا الكم مالهاش علاقة بالقانون .. اللى ليه علاقة بالقانون هو نشاطاتى الأخرى .. لأنى كنت باتدرب أدخل "المسابقة المحلية لتجريد البيوت .. من الدهب و الفضة و الياقوت" لكن للأسف فشلت .. دة حتة كيس بيض لا طلع و لا نزل انا عملت فيه كدة .. أمال لما أروح ألاعب فطاحل "التجريد" هاعمل إيه
-----------------

بت خيخة و أى كلام

يعنى سيبتى البوست كله و ما عجبكيش إلا المصطلح .. ياللهول .. و الله مصطلح "أم أبو العساقيل" دة ممكن يتفهم بشكل مش اللى هو ..حاجة كدة زى لما واحد يقول للتانى "أم اللى جابك يا جدع" .. بس بالتأكيد مش دة المعنى اللى جه فى دماغك .. صح و لا إييييييييييه ؟؟

بس الحمد لله إن طقم الكاسات عجبك

معلش يا خيخة .. و الله كنت مشغول بشدة .. و مش عارف افتح المدونات الا بالعافية .. و الحمد لله .. أحمد بخير
-----------------
shayma

أنا كمان ضحكت جدا على المصطلح عشان كدة قلت لكم امسكوا نفسكم
:) :) :)
بس هو إيه الموضوع يا جدعان .. انتوا سيبتوا الموضوع كله و مسكتوا فى "المصطلح" و الله أنا كمان ضحكت عليه جدا .. خصوصا أنا كنت كاتبه و أقصد معناه الحقيقى .. بس بعد كدة لقيته مصطلح نكتة بصراحة
-----------------
فرنسا هانم

مش معقول يا فرنسا ... أنا قريت تعليقك فى الشغل و قعدت أضحك كتير جدا .. أصلى تخيلت نفسى بالفعل واقف جنب الفرخة العتقية و بامارس عليها القهر و هى ياعينى مستجيبة و قاعدة على البيضة اللى مش عايزة تفقس

ثم البيضة تفقس إزاى .. إذا كانت قوة سقوط حر من على ارتفاع تلاتة متر ماقدرتش تكسرها .. إلا بقى لو هايطلع سوبر كتكوت .. و ساعتها يبقى يا ريته ما يطلعش من البيضة عشان مش هانعرف نسيطر عليه
-----------------
mermaid

أيوة جاااى
السحلب السخن .. السحلب المكار

و الله ما سمعتش صوت البيض و هو بيتفشفش .. ماعرفش ازاى .. لكن بالتأكيد سمعت صوت أمى و هى بتنعى البيض المفشفش

نورتنا زيارتك الأولى .. و المشاريب مجانا لأول زيارة .. أول زيارة بس
-----------------
قطة الصحراء

طب اضحكى على يا هريرة و قولى لى إنك مش بتدخلى عن طريق صفحة البروفايل .. سيبينى أحس إن أنا مهم شوية

بس بخصوص حكاية البيض .. أمى مش عايزة تنسى الحكاية دى لغاية دلوقتى .. و دايما بتذلنى بيها

Doba said...

انا زعلانة
زعلانة
زعلانة

ومتضايقة

ازاى ابصفى القائمة وملقيش النيسكافيه بتاعى

انا كنت هروح استراحة تانية وامشى ودموعى على خدى

بس لقيتك بتقول انك أخدت علقة من امك ام العساقيل العسل

يسلم ايديها عالعلقة بصراحة - بقى بتكسر تلاتين بيضة يا مفترى ده كان حقها تكسر حاجة قصادهم بس يلا حصل خير

يا عبده - هات اتنين برطمان نيسكافيه من الحجم الكبير ودخلهم الاستراحة للضيوف

فرنسا وخيخة

ممنوع

تقربوا للنيسكافيه
انتو عارفين متكهرب

عاوزين ننور القعدة بحبة كهربا بقى

يلا انا عملت اللى عليا
والسلام ختام



عااااااااااااااا

شكل حد مسك النيسكافيه
واتكهرب

نيهاهاهاهاها

يلا باى
هبة

3ala asm masr said...

لاء كتر خيرك والله انك سبت بيضه اهى تنفع بردو احسن من مافيش
مبروك على الالف زائر عقبال ما يبقوا مليون

الساحرة said...

نيوتن ايه الاهم البيض اول ما رميت الشنطه حسيت ان فيها حاجه هتتكسر بس متخيلتش انه بيض العيب علي ام خالد كانت لازم تقولك وبعدين بصراحه وبيني وبينك قعدت كام يوم من غير اكل عقابا ليك علي فكرة حلوة ابي العساقيل دي بذمتك دة اسم هههههههه

ابن حـجـر الـعـسـقـلانـى said...

doba

فيه إيه بس يا أخت دوبا ؟؟ زعلانة ليه ؟؟ حقك علينا .. بس أنا شغال قهوجى هنا .. يعنى أنزل طلبات و بس .. أما شئون القهوة العليا من تموين و مشتريات و خلافه فمش بإيدى خالص

لكن على العموم أنا هارفع مذكرة لمعلمى الباحث عن الحقيقة عشان يضيف بند النيسكافيه للميزانية الجاية

بقولك ايه .. بخصوص الكام برطمان نيسكافيه اللى انت جايباهم .. يا ريت ماتقوليش للمعلم بتاعى عليهم .. عشان بقالى تلات سنين ما قبضتش و شكلى هاضرب البرطمانات دول معايا

و خدى بالك .. أنا مهندس اتصالات .. يعنى الكهربا لعبتى .. و مش أنا اللى أتكهرب .. أىىىىىىىى .. نسيت افصل المفتاح
-----------------

3ala asm masr

بصراحة لما أمى جات و قالت لى إن فيه بيضة سليمة قلت كويس .. أهى بيضة أحسن من مافيش .. لكن أمى ما اقتنعتش مش عارف ليه
-----------------
الساحرة الشريرة

أخيرا لقيت حد ينصفنى .. المفروض أم خالد كانت تقولى خد بالك من البيض .. و دة اللى قلته لأمى ساعتها لكن ما سمعتنيش .. كانت زعلانة على البيض

و يا ريتها كانت منعتنى من الأكل بس تنسى الموضوع .. دى بتذلنى بيه لغاية دلوقتى

صانعة الحرية said...

السلام عليكم
اضحكك الله كما اضحكتنى
والله جزاك الله خيرا كنت متضايقه ونفسى اضحك
وشككرا لامانة حضرتك ان 29 بيضه بس اللى اتكسرت
وحلو اسلوب العرض

Nada said...

هههههههههههههههههه
دى القوانين باازت عالاااااااااخر
ربنا يوفقك مدونتك جميييييييلة

ابن حـجـر الـعـسـقـلانـى said...

صانعة الحرية

الحمد لله أن كنا سببا فى إدخال البسمة عليكى

ثم انت عارفة إن البيضة دى هى محور القضية .. دة هى دى اللى أثبتت فشل قانون نيوتن .. مع إنى باحب نيوتن والله
-----------------
nada

ماهو مش معقول يبقى قانون بجد و بحق و حقيق و ما يعرفش يثبت نفسه أمام بيضة .. المفروض نيوتن كان جه لحد عندى يعتذر .. بس ياللا .. الله يرحمه بقى

نورتنا زيارتك يا أخت ندا

خالد حفظي said...

لا أجد
ما أقوله
أشعر بالعار يلفني
يشل يدي
و يعقد لساني
صدقوني
ما تمنيت الموت غير اليوم
يااااااارب
إقبضنا إليك غير خزايا ولا مفتونين
........................
صائم حتى يرفع الحصار عن غزة

Anonymous said...

أحم أحم العواف عليك ايه ده انت غيرت مقطع الاغنية خالص اسمها طلعت فوق السطوح ادور على فردة شراب بني ...يالا دنيا وكل حاجة بتتغير اشمعنى دي المهم يعني انا مش زعلانة خالص مالص لاني بجد مش بعرف ازعل من حد ولانك فعلا مش عملت شي يضايق وكلنا معرضين للسهو يافندم وانا محظوظة كتير بمعرفتي بيك يالا بقى افوتك بعافية احسن وريا حاجات كتيييييييييير اورفوار

walaa said...

اخواننا فى غزه محاصرون ومعذبون لايجدون طعام ولا ماء ومشردون ويجب علينا ان نفعل لشىء لنصرتهم لذلك قرر مجموعه من المدونين الذهاب الى معبر رفح لكىيرفعوا المعاناه عن الشعب هناك لو تقدر تشارك او اى حد يحب المجيىء معك
يا ريت تبلغنى

جهاد خالد said...

النساء يصرخون
الرجال اشلاء يبعثرون
الاطفال يتالمون يحتضرون

هبوا وانتفضوا
واصرخوا
عااااااااااااااائدون
www.somood.blogspot.com

عاشــــــ النقاب ـقــــة"نونو" said...

مقلب ساخخخن لماما
الحمد لله انك ما وقعتش
ضحكة محتاجاها فعلا
جزاك الله خيرا
ادعوك وزوارك الكرام لقراءة مقال اهداء لغزة ولتبدا من هذا الرابط
http://nonoymm.maktoobblog.com/
هستناكم

Unknown said...

ههههههههههههههههههههه


حلوة دى .. لا كان المفروض ينزل البيت وميتكسرش لأ طبعا .. يطلع كتاكيت ههههههههه


قال نيوتن قال .. ياراجل انت بتصدق الحاجات دى بردو .. بلا بتاع ياشيخ

:D

ابن حـجـر الـعـسـقـلانـى said...

وطنى

يا أستاذنا الوضع معقد .. فى غاية الصعوبة .. و الشعور بالعجز شعور قاتل .. بجد الواحد مش عارف يعمل إيه
----------------------

قلوب حائرة

طب الحمد لله إنك تسامحتى معايا.. و أحييكى على حسن معاملتك .. بجد أشكرك ..و أنا كمان محظوظ بمعرفتى بيكى ..و كويس إن الموضوع عجبك .. أنا نفسى ضحكت على المثل اللى أنا كاتبه دة
----------------------

walaa

يا الله .. الناس هناك فى حالة احتياج شديدة.. و ماحدش من اللى فى إيديهم الأمر فتح بقه.. اللهم احفظ إخواننا فى غزة
----------------------

النجمة الصامدة

بالفعل .. كل لحظة دفء و كل لحظة شبع الواحد بيحس بيها بتبقى لحظة شديدة .. و الشعور بالعجز دة شعور قاتل
----------------------

nonoymm

الحمد لله أن كنا سببا فى ضحكة رسمت على وجهك .. منورانا أول زيارة ليكى

و أنا جاى فى الطريق أهو
----------------------

إنسانة

و الله ضحكتينى .. حلوة حكاية "كانوا طلعوا كتاكيت" دى

ثم قوانين نيوتن إيه بس .. هى دى قوانين .. دى إشاعات

انت عارفة إن أنا درست قوانين نيوتن فى تالتة ثانوى .. لكن ما فهمتهاش إلا فى الكلية

مي بهاء الدين said...

ياراااااجل وعجبك البوست بتاعي دانتا أستاذ
أنا ضحكت ضحك
المدونة دي محتاجة قعدة كدة بتركيييز
ومبروك ال1000 تستاهل
مساء الفل
:)

ابن حـجـر الـعـسـقـلانـى said...

maii omar

طب و الله الحمد لله إن الموضوع ضحكك .. بس من ناحية الأستذة .. طبعا دة موضوع محسوم فى صالحك .. المقال بتاعك عجبنى جدا جدا .. أحييكى عليه

و لعلمك .. أنا كنت الزائر رقم 100 لصفحة البروفايل بتاعتك .. و عشان كدة احنا هاننزل لك مشروبات مجانية لمدة تلات آلاف سنة

ا بـن عــمــر said...

أضحكتنا
جزاك الله خيرا
كويس ان لسه فى بيضة مانكسرتش

أيمن صادق said...

ياريس هي ناقصة قوانين

مش كفاية البيه اللي نزلت علي دماغه التفاحة قعد يألف فيها ويخترع وأهو كله بييجي علي دماغ الطلبة!!!



لا بس بوست جامد ياباشا

تحياتي

اسكندراني اوي said...

جميله اوي الذكريات دي
وربطها بالفيزيا والكيميا والعجه
ههههههههههههههههههههه

Unknown said...

ابو العساقيل
انت راجل سكره
ومتزعلش مني لان كل مره انت نبهت عليه مضحكش
كنت بموت على نفسي من الضحك كانك زغزغتني بالظبط

تعيش وتكسر بيض يامان
لو سمحت متضحكش
Lol

سلوى said...

البيضه يا أبو العساقيل لما وقعت
وقعت
في بحر من زلال ال 29 بيضه الأخرى
والسؤال اللي بيطرح نفسه
إشمعنى دي بالذات

هقولك
وتطبيق لنظريه الأمثال التي بدأت بها البوست
أقدر أقولك
أن البيضه كانت واعيه
وعند سقوطها قالت
إديني عمر وارميني في زلال البيض

بس بصراحه أم خالد غلطان

بوست جميل يا بن حجر
بالتوفيق دوما

ابن حـجـر الـعـسـقـلانـى said...

ابن عمر

ازيك يا راجل .. كيف حالك .. أنا كان نفسى نحنط البيضة اللى فضلت دى .. لكن طبعا ما كانش ليا أى وش أطلب من أمى أى طلب

------------------

أيمن صادق

يا مرحب يا مرحب .. و الله انت أثرت فى دماغى تساؤل .. يا ترى لو كانت اللى وقعت على نيوتن وقتها بيضة مش تفاحة .. يا ترى كان هايفكر فى ميكانيكا و كدة ؟؟ و لا كان هايفكر فى إنه ازاى ينظف هدومه؟؟ و الله مش بعيد كان ابتكر مسحوق غسيل
------------------

اسكندرانى أوى

أنا من زمان نفسى نعمل علم زى الفيزيا و الكيميا يبقى اسمه علم العجة .. و يبدو كدة إنك طلعتها فى دماغى .. انتظر اسمى قريبا فى المحافل العلمية
------------------

دمعاتى

يا عم انت اللى راجل سكرة .. و مش سكرة واحدة بس .. لأ.. دى سكرية بحالها

و الله أنا كمان ضحكت على الاسم بعد ما كتبته .. عشان كدة نبهت إنكم ما تضحكوش .. أتاريكم ضحكتم أكتر

يا عم اضحك و ابعد عن الدموع
------------------

الأخت سلوى

:)

والله ضحكتنى نظريتك الجديدة فى "السقوط الحر" بتاعة زلال البيض .. و لا المثل .. جااااامد جدا

بس أنا قلت لأمى عشرميت مرة إن أم خالد هى اللى غلطانة لكن ما صدقتنيش .. يا ريت تكلميها الله يخليكى

عابد الرحمن said...

بص يا عصقل سميه قانون البيضة لابي اسحاق العسقلاني
هههههههههههههه
بس بجد متوصلتش البيضة مش اتكسرت ليه
هههههههههه
جزاك الله الجنة

ارسم بالرصاص said...

السلام عليكم ورحمته وبركاته
يا سلام بقي هي الحكاية كدة
دول كانوا فلقنا بقوانين نيوتن
لا وايه بالإثبات كمان
موضوع رائع جداً
أكرمك الله وأعزك
ومبروك كتير علي الألف زائر
حضرتك تستحق كل خير
اللهم إني أسألك بعزك مع ذلي
وأسألك بقوتك مع ضعفي وبغنائك مع فقري إليك أن تحسن في لوائح العيون
علانية عبدك هذا وتقبح في خفيات العيون سريرة عبدك هذا
آمين يا رب
والسلام عليكم ورحمته وبركاته
دعواتي
هايدي

mo'men mohamed said...

جزاكم الله كل خير أخى
بقالى كتير قوى ما ضحكت بالطريقة دى
ربنا يعزك
السلام عليكم

سفروتة said...

ههههههههههههههههههههههههههههههه

اضحكك الله يا ابا العساقيل

وزاد قلمك خفة دم

وجعلك ذخرا لعالم الكتابة الساخرة

اسلوبك رائع بجد

متهيالي نيوتن كده ميقدرش يفتح بقه بكلمة والا جزاته هتبقي كسر البيضة رقم تلاتين علي دماغه

ابقي سلملي علي ام خالد

Anonymous said...

السلام عليكم ورحمة الله

بص بئه يا أبو العساقل يا خويا احنا كدا لينا عندك بوست توضيحي

تقولنا فيه يا ترى كان ايه مصير ابو العساقل ..
وايه هو نوع العشا اللي اكله عساقل ..

وياتى البيضة الوحيد الناجيه من القصف الحر ده

كان ايه اخرتها

تم دشديشها مثل اخواتها مآزرة
ولا اتعشى بيها اخونا عسقلان
ولا زي ما قالت فرنسا جبت العتقيه
ولا محطوطه في صندوق من القطيفة بغرفه الصالون

تحياتي لاخونا أبو العساقل

والله يكون في عون مامتك

29 بيضة

يا قلبك

ده الواحد بتقع منه بيضة على ما بيوصل ابوه من الشغل بيكون باض واحده بدالها عشان ما ينضربشي

احترامي وخالص تقديري

Rain man said...

هل جئت متأخراً ؟
عظيم
الان يمكنك التأكد اننى انا
لانى دائما اجىء متأخرا
و هذا ليس سيئا
لاننى اعرف اشخاص لا تجىء اصلا
المهم
احيانا اتسائل
من كان سيكتشف الجاذبية لو ان نيوتن كان شاعرا
و اليوم إكتشفت الاجابة
ابو العساقيل كان سيقوم بالمهمة
و من يدرى
ربما اشتهرت البيضة الواحيدة الناجية تماما كما اشتهرت تفاحة نيوتن

هل للبيض علاقة بالتفاح ؟

مش موضوعنا

سعيد بآرائك يا ابو العساقيل و وجودك عندى
سعادة لم تتفوق عليها سوى سعادتى بوجدى عندك

ابو المداميد

Soooo said...

ام ابو العساقيل
ومش عايز الناس تضحك
وبعدين ياراجل يا مؤمن .. تسعه وعشرين بيضه يتكسرو وبيضه واحده بس سليمه
انا لو مكانك .. اكسرها .. اشمعنا هي يعني اللي ما اتكسرتش
فلوطه يعني
لا
تتكسر زي اخواتها ولا تطلع نيوتن غلطان




سلاموووووووووووز

ابن حـجـر الـعـسـقـلانـى said...

عابد الرحمن

ضحكتنى و الله .. حلو اسم "أبو اسحق العسقلانى" .. بس بجد مش عارف ليه البيضة ما اتكسرتش .. حاولت أفسرها بقوانين نيوتن .. و بنسبية آينيشتاين .. و بميكانيكا الكم .. و فشلت

---------------------------

أرسم بالرصاص

دعائك ما حصلش ... مش عارف أشكرك عليه إزاى .. ربنا يجازيكى بمث ما دعوتى لنا و أكثر

بس تعرفى.. أنا باحب نيوتن دة جدا .. و الميكانيكا أنا كنت باعشقها .. و مازلت .. كنت بامشى فى الشوارع و احسب سرعة العربيات و باحسب "العجلة" (اللى هى تفاضل السرعة) و باحسب القوة .. و بافضل أكلم نفسى فى الشارع

-----------------------

mo'men mohamed

و الله أنا بابقى سعيد جدا و الفرحة مش سايعانى لما باكون سبب فى رسم ابتسامة على وجه حد .. ربنا يكرمك دنيا و آخرة
-----------------------

noury

أم خالد بتسلم عليكى .. و بتقول لك خدى الشنطة دى و وديها البيت و خدى بالك و انت نازلة على السلم .. و ماتعمليش زى واحد صاحبنا طلع ......... و رمى البيض من السطح .. قال و رايح يلزق عملته السودة فى نيوتن .. و خدى بالك .. فيه سلمة مكسورة
-----------------------

العنقاء

الجملة دى:"ده الواحد بتقع منه بيضة على ما بيوصل ابوه من الشغل بيكون باض واحده بدالها عشان ما ينضربشي" موتتنى من الضحك .. بجد ضحكت كتير .. أصلى تخيلت نفسى مطلوب منى إنى أبيض 29 بيضة .. بس كنت هاجى على البيضة الخمستاشر مثلا و هافصل شحن .. خصوصا إنى كنت ساعتها صغير فى السن و صحتى ما تساعدنيش على إنتاج الكميات الكبيرة من البيض

بس و الله أنا مش فاكر يومها أمى عملت إيه بالبيضة .. و ما اعرفش يومها اتعشينا إيه .. بس متهيألى إنى ماكانش لى نفس أتعشى
-----------------------

rain man

و الله كلامك الجميل أخجلنى .. يا عم دة أنا اللى كنت طاير من الفرحة لما لقيت تعليقك

عارف الفرق بين البيضة و التفاحة إيه ؟؟ التفاحة لما وقعت على نيوتن .. فرح بيها عشان كدة أطلق العنان لتفكيره .. لكن لو كانت البيضة هى اللى وقعت عليه .. كان هايتشغل بهدومه اللى باظت و ازاى هاينضفها و ما كانش ضرب ربع قانون حتى .. بس مش بعيد كان اكتشف مسحوق غسيل

و ما تقلقش .. هاطلع نظرية قريب و هاشرحها فى كتاب عنوانه: اللؤلؤ و الدر .. فى كيفية استنقاذ البيض من السقوط الحر

و حلوة حكاية "أبو المداميد" دى .. احنا كدة ممكن نعمل نقابة و نسميها: "نقابة آباء المفاعيل" .. و نرشحك رئيس ليها
-----------------------

سوووو

مساء العناب يا باشا .. و الله عندك حق .. المفروض كنت كسرت البيضة و مانطلعش نيوتن غلطان .. دة حتى يبقى عيب عليا يعنى أطلع الراجل غلطان بعد لعمر دة .. بس المشكلة إنى ماكنتش اعرف إن فيه بيضة سليمة .. دة أنا لقيت "أم أبو العساقيل" (امنع الضحك) بعد ما سمعتنى موشحات .. راحت عشان ترمى خليط البيض و القشر و الورق فى الزبالة ... لقيتها جاية و على وجهها ابتسامة ساخرة .. و بتقول لى: بيضة سليمة .. هى دى اللى طلعنا بيها من مشوارك

و ربك ستر إنها ما كسرتهاش على دماغى

ســـــــمــــكة said...

حلوة اوي مع اني مبحبش الفيزيا

مدونة جميلة تحياتي

الـسـيـدة نـون said...

جرى ايه يا ابو العساقيل
هو انا كل ما اجى الاقى هو هو نفس البوست
انتوا كسلانين كدة ليه انت ومعلمك الباحث
عايزين جديدكم بقى
يا إما والله هتشوفوا العين الحمرا بتاعة الخيخة
سلام

3ala asm masr said...

شاركوhttp://hnro2masr.blogspot.com/نا فى شباب هيروق مصر

ابو احمد said...

وحشتنى مدونتك
شاكر لك عزائك الكريم وصدق مودتك
دمت بخير

ابن حـجـر الـعـسـقـلانـى said...

سمكة

الف شكر على الكلام الجميل .. بس و الله الفيزيا دى جميلة .. فهمتنى حاجات كتير جدا
---------------

بت خيخة و أى كلام

معلش يا خيخة .. الموضوع الجديد نزل .. و بلاش العين الحمرا الله يخليكى عشان باخاف
---------------

على اسم مصر

ربنا يسهل و نيجى إن شاء الله
---------------

أبو أحمد

أستاذنا العزيز .. أحمد الله على سلامتك .. إنما يوفى الصابرون أجرهم بغير حساب

زيارة حضرتك لينا شرفتنا .. و مستنيين زيارات حضرتك فى المدونتين .. الصحيفة و الاستراحة

عروسة ننوسة said...

ميرسى ليك كتير على تعليقك ابو دم خفيف انا فعلا لسه جديدة هنا لكن بكتب من زمان على ياهو 360 اتمنى نبقى اصدقاء

د/اجدع بنوته said...

ههههههههههههههههههههههههههههههههههههههه

المهم اكلته ايه .. عجه .. ولا اكتفيت بالعلقه .. واكلوه هما اوملييت

هههههههههههههههههه ابو العساقيل كان طفل شقى

واااااااااااااااااو