Monday, February 4, 2008

يا نيوتن يابو تفاحة روح شوفلك لعبة فى الساحة

انتباه حنالناظر وصل


ايه العك ونيوتن وتفاح وبيض ..انت ياواد يابو عقل محجرفتحت سوق سودا جوه الاستراحة ولا ايه؟

انا دلوقتى عرفت ليه اخترت اسم بن حجر ..واحد بيرمي شيكارة البيض من ارتفاع مترين وعشرين سنتي ومستني ترجعله تاني ..بذمتكم مش ليا حق اقوله يابو عقل محجر

ما علينا ..خلاص الناظر وصل والواد نيوتن ده مرفود من المدرسة اصلا التفاحة لما وقعت عليه عملت عنده ارتجاج فى المخ ..فقال ان الارض جذبتها ما يعرفش ان التفاحة استوت ابن الناصح ..قال ايه ليه التفاحة وقعت لتحتتتت وما وقعتش لفووووق .. يعنى واحد مجنون زى نيوتن ..ابن حجر يمشي وراه ويسمع كلامه ليه؟

اكيد التاني كابلات العقل في مخه لسعت

المهم

انا كنت منقطع بقالي مدة طويلة لعدة اسباب

السبب الاول والتانى والتالت هو ..الاكتئاب

السبب الرابع والخامس والأخير هو ...الاكتئاب برضه

ولسه مكتئب

انما عادى

صعبتوا عليا ..الواد ابن حجر نازل فيكم موضوعات بتحرض على الفشل

فقلت لااااااااااااااا

الامر يحتاج الى وقفة

رحت واقف كده ..وقلت يابن حجر لما تحب تذاكر تاخد نيوتن ده وتذاكروا بره عند عمك عصفور ولا اختك خيخة واى كلام

عصفور علشان مهندس زيكم ..وخيخة علشان هم السابقون وانتم اللاحقون ..فى الفشل طبعا

انما نيوتن ده ما يعتبش هنا

وبخصوص الاكتئاب هو انا مش عايز اعقدكم معايا

بس احيانا كده الواحد نفسه بتنسد من كل شئ

ويبقى في حالة خمول ومش عايز يكتب اى حاجه او يعمل اى شئ

وده اخرة اللى يقعد يكلم نفسه كتير

ويشغل دماغه بما كان وما هو كائن وما سيكون ومحدش يقول بيقول ايه الواد ده المجنون

ما علينا

سيداتى انساتى سادتى

نعتذر عن هذا العطل التدويني

وقد قررنا نحن الباحث عن الحقيقة ناظر الكاشفة ومعلم القهوة فتح مدرسة تعليميه خاصة

فكرت اعمل مدرسة لتعليم اصول الفقة بشكل بسيط وسهل وميسر ..بس بصراحة رجعت ترددت وعايز رأيكم فى الموضوع ده

اولا : ثلاث تدوينات كتير على الزوار والضيوف المشاركين

ثانيا: ممكن ده يؤثر على المدونتين الصحيفة والاستراحة

ثالثا: هو مين اصلا طلب منى اعمل مدرسة لتبسيط اصول الفقة

الجواب : انا بدى دروس اصول فقة فى احدى مواقع الشات وكل ما يدخل واحد جديد يقولى انا محضرتش من الاول ممكن تراجع

رابعا : هل سأجد ناس مهتمة باصول الفقة يعنى هل الاطلاع عليه كعلم من اهتمامات القارئ؟

ففكرت انى ممكن اجعل بين الدروس موضوعات دينية برضه تعليمية

يعنى مره تفسير ايه؟

او حديث

وعرضه باسلوب مبسط وسلس زى ما بنتكلم كده على الاستراحة

يعنى الكلام هيكون عادى جدا مش مكلكع ولا معقد

ملحوظة : الدراسة هتكون بالمشاريب ..يعنى اللى هيتابع معى فى المدرسة لازم يكون له حساب هنا فى الاستراحة

وانا هعمل وقت مستقطع بين الحصص واخلى ابن حجر يشيل صندوق ساقع من القهوة ويلف عليكم والشراء اجباري

ومحدش يقول شتا او الجو برد اشتريها وسيبها زي ما هي عادى ..مش هنزعل

هنجمعهم ونلمهم ونبيعهم تاني

ههههههههههه

ايه رأيكم

نعمل مدونة تالتة نشرح فيها اصول الفقة ويعنى ايه حلال وحرام وواجب ومندوب ومكروه وحرام ومباح واجماع وقياس واستصحاب واستحسان ومصالح مرسلة وسد الذرائع وقول الصحابي والعرف والاجتهاد ..ولا بلاش بقى احسن

حد عنده فكره تانية؟

ولا تحبوا نرجع نيوتن ونقضيها فشل وبيض وعجة وام ابوالعساقيل تطير ورانا بالـــ ...اسمه ايه ده

منتظر مشاركاتكم

42 comments:

mo'men mohamed said...

الفكرة جميلة
واعتقد ان استراحة المحارب كان عامل واحدة
وتقريبا اسمها المدرسة الشرعية المبسطة
جزاكم الله كل خير
السلام عليكم

عصفور المدينة said...

توكل على الله
والأستاذة أمل (وهي أزهرية متخصصة في الأصول) أيضا سوف تعود بدروس أصول الفقه في مدرسة العلوم الشرعية المبسطة وإن كان هذا لا يتعارض مع مدونتك لأنك سوف تشرح بأسلوب مبسط كما شرحت لي

والدكتور المحارب كانت مدونته في أصول الحديث

الساحرة said...

الفكرة جميله بس مدونه ثالثه هو انت هتاجر فيهم خليك هنافي الاستراحه بس للعلم انا بقعد من غير مشاريب واذا كان ضروري اشرب نسكافيه ومش هحاسب عليه يله ابتد ي وتوكل علي الله

سفروتة said...

توكل علي الله يا ابا العساقيل

وافتكر انها تبقي في مدونة تالتة افضل عشان تبقي مخصصة فقط لتبسيط العلوم الشرعية

جزالك الله خيرا

ابن حـجـر الـعـسـقـلانـى said...

أبو البواحث عنترة

اسمحلى أولا أرحب بالأخت

noury

و أقول لها إن أنا خلاص ما بقيتش المعلم بتاع القهوة .. عشان معلمى "الباحث عن الحقيقة" رجع يكتب فى المدونة تانى.. و أنا رجعت صبى قهوجى زى ما كنت .. آه يا زمن .. دة حتى هو اللى كاتب المقال اللى مسيح لى فيه و مسيح لنيوتن كمان .. و خدى دى كوباية شاى بالنعناع من بتاعة بلادها


و أحب أقول لممعلم الباحث:

عمى و عم عيالى من بعدى و عم جدودى من قبلى و عم الشباب و الرياضة

أنا فى منتهى السعادة على عودتك من بلاد ما وراء الشمس .. قصدى ما وراء النهر

ثم هانخبط ليه بقى يا عم الباحث ؟؟ لعلمك بقى .. قوانين نيوتن اللى مش عاجباك دى أطلقوا بيها صواريخ .. ثم انت كنت سايبنى لوحدى فى القهوة .. يعنى كان ممكن ترجع تلاقينى عامل تجارب "السقوط الحر" على الكوبايات الزجاج زى ما عملتها على البيض .. و أنا خلاص بقيت سوابق .. يعنى هاحدف الكوباية بقلب ميت .. و ابقى شوف بقى هاتنزل مشاريب للناس فى إيه

و خش يا برنس على المدونة الجديدة .. طبعا انت عارفنى .. علامة و فهامة و حجة من يومى و واحد من أساطين أصول الفقه .. بأمارة كتاب المبتدئين اللى فى أصول الفقه اللى أنا اشتريته لما قابلتك .. و خلصته من كام أسبوع كدة و مش فاهم فيه حاجة

يالا بقى .. مستنيينك تشرح لنا حاجة كدة بسيطة زى كتاب "المستصفى" أو كتاب "إرشاد الفحول" .. حاجة كدة تسخين يعنى

L.G. said...

لا أعرف ولكني لا أتفق معكم وأري أن الفقه والدين تعليمه أفضل بالتجربة بمعنى أن الفقه والدين أيام الرسول كان الناس يعرفونه من ملاحظتهم لأفعاله صلى الله عليه وسلم وعملا بقوله أما التعليم فيجب أن يكون مباشر وله مواعيد والتزام وفيه رؤية بين الشارح والطالب للسؤال والرد ولا ننسى أن بعضنا يختلف في التلقى المكتوب عن التفاعل مع الآخر
لست أدري ولكن لتجعلها مواقف ونرجعها لأحاديث الرسول وماذا فعل في موقف مشابه مثلا وماذا قال لكن أن تكون دينية بحته
هذا والله أعلم

التمنياوي طه said...

المعلم الباحث
سيري يا نورماندي بسم الله مجراكي و مرساكي
دوس يا معلم في البلوج الثالث
بس ابقى خد من ابو العساقيل المسائل اللي في الكتاب اللي كان بيقراه و معرفش يحل منها حاجة و كانه يتذكر ايام الفشل في الكلية لما كان ينزل الشييت و محدش يفهم فيه حاجة

دنيتى الجميله said...

يلا ابتدى
بسم الله
المهم بأسلوب بسيط علشان اقدر افهم
اصل انا فهمى بسيط على ادى

مي بهاء الدين said...

أبو العساقيل باشا

لاتبخل أبدا بعلم عندك..وده صدقة جارية بإذن الله

ياللا نحن في الإنتظار
ولو مش عايز تتشتت بمدونة تانية ممكن هنا ويبقى بالتبادل بوست كده وبوست كده

ده مجرد اقتراح
تحياتي
:)

Dr.khaled said...

معندك المدرسة يا جميل
خش هناك مدرس بالحصة مؤقتا
لحد ما يثبتوك في حركة التثبيتات الجاية...
على فكرة انت عملت تحريف في البيت الشعري اللي ابتديت به موضوعك السابق
لان اصل البيت
طلعت فوق السطوح هز الهوا كمي...كل اليعال اتجوزوا وانا قاعد جمب امي :(

Dr.khaled said...

العيال

Empress appy said...

انا موافقه بس بجد انا نفسى اتعلم الحاجات دى بس الله يكرمك يا رب ويخليك ويبعد عنك الاكتئاب ويرزقك حسنات فى الخرة تغطى العالم كله ويخلى ليك ام العساقيل ويبعد عنك البتاع اللى اسمه ايه ده
الحمد لله استراحه بقى
ممكن تشرح بس بطريقه بسيطه مش مكلكعه وبلاش الفاظ تخينه خليها سمباتيك وراعى الناس الغلبانه اللى مش درسوا غير بعض الايات فى القرأن فى المدرسه وشكرا على كده منكن يا فندم ولا ايه ظروفك هخبطك بقله فى دماغك

Desert cat said...

انشئ يابا شا المدونة واعتمد على الله
يمكن حد لما يفهم تفسير ايه او حديث ربنا يهدية وتاخد من وراه حسنات اد كدا
بس ابو قسم بقى

ابوزياد الفاتح said...

تحياتى يا ابن حجر
موضوع ممتاز
بس لا اشجع موضوع المدونه التالته دى
علشان محدش بس يتكلم علينا
كفايه الفضائيات والناس اهى عارفه كل حاجه
خليك هنا بس وكمل فى دى
تحياتى

الباحث عن الحقيقة said...

كنت اعتقد ان اللى يقرأ البوست لازم يكتشف ان مش ابو العساقيل اللى كتبه

ولا هوانا فشلت فى ابراز النقطة دى ولا ايه
ارحب بكل الاخوة والاخوات اللى شرفونى بالتعليق واللى شرفوا زميلى ابو العساقيل بالتعليق برضه
انا خايف يا عسقلانى اعمل مدرسة الكاشفة تطلع انت الناظر وانا الفراش ده لو حد عبرنى اصلا
صك على المشاريب لغاية ما نعرف الجماعة اللى دخلوا مفكرين انك انت صاحب الموضوع شربوا ايه على الصبح
ولا هومحدش قرا يعنى ولا ايه
انا زعلاااااااااااان
بس هكمل برضه
ويانا ..يا نيوتن بتاع التفاح

ملحوظة : واد يا بن حجر بمناسبة السقوط الحر .. وانا اقول هى الكوبايت ليه كل ما تيجى تهوب عندها بتقع تتكسر
أتارى انت عليك عفريت نيوتن اللى بيكسر الكوبايت
اتفضل بقى حاسبنى على كل الكوبايات اللى اتكسرت من ساعة ما فتحنا النورماندى تو قصدى الاستراحة
منور يا تمنياوى
وشكرا للاستاذ عصفور وال جى
وكل الناس اللى شرفتنا
ولسه ف ا ك ر ي ن ى

الباحث عن الحقيقة said...

السؤال : نبدأ فى الاستراحة

او مدونة تالته فرعية

او مدونة مستقلة

؟؟؟؟؟؟؟؟

يرجى الاختيار

كان معكم الباحث عن الحقيقة
انا عارف ان الاسم هيظهر فى التعليق انما انا مضمنش
لازم اختم بيه برضه

الساحرة said...

بترد علي كل الكومنت وانا زي الهوا اشكرك

الباحث عن الحقيقة said...

اهلا بالاخت الساحرة
هما فين كل الناس دول
انا رحبت بالجميع بشكل عام
وخصيت بالذكر الاخوة والاخوات اللى ذكرونى بالاسم وهم اصدقاء قدامى
فلهم معزة خاصة
اما الاخوه اللى افتكرونى ابن حجر فانا تمنى بس يكونوا قرأو البوست
واشركم جميعا على تواجدكم
وانا وابن حجر واحد انا مش زعلان من دى
انا بس مستغرب ان اللى قرا البوست ازاى افتكر ان ابن حجر هو اللى كتبه
يظهر الناس نسيتنى خااالص
عموما اهلا وسهلا بالساحرة
فى تانى تعرف بينى وبين حضرتك بعد تعليقى من مدة فى مدونتك
وحضرتك كنتى المدونة الوحيدة اللى علقت عليها فى فترة انقطاعى وعزلتى
شرفتم جميعا مدونات الكاشفة
تحيتى للجميع

Empress appy said...

يا سيدى متزعلش وبعدين انت وابو العساقيل اخوات كمان والدته تبقى زى والدتك بس انت ناوى تبدأ دروس ولا هتموتنا قبل ما تبدئها

الساحرة said...

ولا يهمك وليه الشرف انك تعلق عندي وبعدين انا عارفه انك مش ابو العساقيل ومرحبا بك بعد فترة العزله

الـسـيـدة نـون said...

هو لازم مدونة تالتة
انا مابحبش كتر المدونات دى
بتلخبطنى
لكن انا معاك يا معلمى انك تعمل دروس دينية تعليمية بسيطة
لانى عن نفسى محتاجة ده اوى
محتاجة اقرا مقال او كتاب او اى حاجة دينية تكون مكتوبة بلغة بسيطة وسلسة ويسهل على امثالى فهمها
لانى مابحبش الكلاكيع
احب الكلام يكون مبسط جدا
ياريت بجد تعمل الدروس الدينية دى
بس هو لازم يعنى فى مدونة مخصوصة
خليها فى المدونة دى
علشان دى المدونة اللى انا بازورها باستمرار
بس بجد فكرة جميلة اوى
توكل على الله
وابتدى يلا
وصل سلامى لابو العساقيل
اختكم خيخة

(احمد سكر ) said...

هههههههههه
مدونه تالته
طب هى فين التانيه
انا اول مره اعدى من هنا
بعد ما كرتونة البيض وقعت على دماغى يا عم
ههههههه
بجد مدونتك رائعه
دمك زى الشرررربااااات
ههههه
بس من غير بيض
تقبل مرورى
احمد سكر

Soooo said...

والله يا زين ماخلفتي يا ام ابو العساقيل

بجد فكره حلوة والله

وانا اول واحد هشجعك واشرب مشاريب من عندكم

على بركة الله يا نورماندي تو
تو
تو
تو
تو





سلامووووووووووز

Desert cat said...

هو انت طلعت احمد
طيب نزلى هنا نسكافية الله يكرمك وانا هشجعك
قصدى اى بوست ينزل بعد كدا حتى لو محمد اللى منزله هدخل اقولك شكرا يا احمد
وانت عارف القطة لما بتصيت حد بقى بيبقى عالمى ... زى خالتى فرنسا كدا ومنى ذكى ... انت ظبطنى بس كل يوم كدا مج نسكافية الصبح وبالليل ... وانا اسيطك .. كدا شكلنا اتفقنا ؟؟؟
نيجى للموضوع بقى واقولكو اتقول الله فينا مدونة تالتة ليه
هو البلوجر سايب الدنيا تضرب تقلب كدا مجانا علشان احنا نعمل بدل المدونة عشرين ... بقولك ايه يا احمد اتوكل على الله واعمل المدرسة فى الحضانة ... يوووووه فين النسكافية علشان اعرف اجمع ... ايون كدا شكرا
اعمل المدرسة فى البلوج بتاعك او بلوج محمد عادى يعنى ... اصل مدونة تالتة دى الواحد بيتلخبط وعلشان بس اعرف اتابع ... لانى من الناس الى لما بتدخل تلاقى سبعين بلوج فى بلوج واحد بروح واخده بعضى وراجعه على القطة بتاعتى نونو سوا تانى

عاشــــــ النقاب ـقــــة"نونو" said...

ابو العساقيل
عودة محمودة ان شاء الله
والله في امس الحاجة لفكرتك
يلا توكل على الله وهتابعك باذن الله
دمت بخير

عاشــــــ النقاب ـقــــة"نونو" said...

اسفة ابدا يا اخ باحث عن الحقيقة على بركة الله
معلش اللي ما يعرفك يجهلك
والسن بقى

الـسـيـدة نـون said...

فين يا معلم الدروس المبسطة
هو انا كل يوم اجى مالقيش حصص اقوم اروح من غير ما اخد الدرس
انتوا بتلعبوا معانا الدنيئة ولا ايه؟
هات يا عسقول واحد حلبة بلبن هنا الله يكرمك
انا هافضل قاعدة لحد ماشوف اخرتها مع معلمك الباحث
سلام
اختكم خيخة

ا بـن عــمــر said...

توكل على الله
مادام فيها خير للمسلمين

فرنسا هانم said...

اخينا الباحث رجع بالسلامه
حمدلله على السلامه يا معلم
بصراحه ابن حجر فى فتره غيابك
كان مخلى القهوه عشره على عشره
وطبعا انت نواره مكانك
لكن كلام فى سرك واوعى حد يسمعنا
ابن حجر شرب الصنعه وهو ماشاء الله عليه
يعنى تمسك فيه بايديك وسنانك علشان ميمشيش من القهوه
لا
بايديك وسنانك
مش تعضه
قصدى تتمسك بيه
المهم
انا عن نفسى لا احب كتر المدونات
بجد بتلغبط
ممكن تبداء الدروس فى اى المدونين
وسلامى لابن حجر العسقلانى

Ahmed Al-Sabbagh said...

صديقى واخى العزيز جدا

اولا احب اسلم عليك واعتذر عن تأخرى عنك

ثانيا بقى انا بين نارين

نار انى بكرة تعدد المدونات

وكنت بحس ان المصريين نوع من محدثى النعمة تدخل عند واحد فى البروفايل تلاقى خمسبعتاشر مدونة

حاجة ببلاش كدة

وهو اصلا مش بيتابعم ولا بيتقن شغلة فيهم

وبين نار انى موافق على الفكرة جدا

ومتلهف اشوف مدونتك الجديدة دى بالفكرة دى

طب كمل استطلاع الرأى ونشوف

:)

تقبل تحياتى

اخوك احمد

فضفضة said...

هو انت هتعمل اية ولا اية

خليك هنا تابع الكشافة والكافية

وانا طالبة سحلب بالقرفة الله يقرفهم

وهات كمان معاه تحلية ساندوتشين فول وطعمية وسلاطة قوووووووطة

تمام تسلم

سفروتة said...

سيدي ومعلمي الباحث عن الحقيقة
ههههههههههههههههههههههههه
حلوة الجملة دي
المهم

اعذرني لذلك الضعف الشديد في خلايا حضرتي العصبية والتي لم تستطع التعرف علي ان حضرتك اللي كاتب البوست
اتاريني وانا كنت بقراه عمالة اقول هو ابو العساقيل كاتب بوست بيرد فيه علي نفسه ولا ايه ،وكنت خايفة ليكون اصيب بالبتاع اللي اسمه الجنون ده

وكمان انا لسة مكتشفة القهوة من البوست اللي فات بتاع نيوتن ند عمنا ابو العساقيل

بس مش مشكلة حصل خير

يللا بقي افتح باب التقديم في المدرسة ولا انت مش هتخلي اللي عندهم 17 سنة يقدموا فيها؟

كل التحية لك سيدي الناظر
وتحياتي لابي العساقيل

الدرويش المرووش said...

توكل على الله
فكره لطيفه جدا

فى مدونة مستقلة
و من غير إكتئاب لو سمحت

آفاق الحرية said...

الله ايه الجمال ده
الحقيقة انا اول مرة ادخل المونة واعلق فيها
بس هي ماشاء الله جميلة جدا
هو كابلات مخك لسعت زي كابلات النت ولا ايه هههههههههه

رئيس جمهوريه نفسى said...

اتوكل على الله واحنا معاك

الـسـيـدة نـون said...

لا ورحمة جدى ده بجد ومش تمثيل وبحق وحقيقى
ده انتوا قصدينها بقى
اجى كل يوم ومالقيش الدروس
ايه يعنى
هو انا قاعدلكم على بنك
تاكسى رايح وتاكسى جاى
وكل يوم اجى والاقى المدرسة قافلة ومافيش دروس ولا مدرسين
جرى ايه
فين يا عم منك له الدروس
قلتوا ادفعوا نص المصاريف دفعنا
قلتوا هاتوا شنطة جديدة جبنا
قلتوا اكوا مريلة المدرسة كوينا
جرى ايه بقى
فين الدروس
والله باين عليكم بتلعبوا معانا الدنيئة وبتشتغلونا
لما نشوف اخرتها معاكم ايه
سلام
اختكم خيخة

د/اجدع بنوته said...

ايوون اول رد رسمى بقى ف المدونه العظيمه دى

يكون ف دعوه للخير

روح ياشيخ ربنا يجازيكم خيير

لو تعملوا مدونه بقى دى وكمان نحفظ فيها كلنا قرأن

يعنى حد منكم يبقى مشرف عليها ويدينا كل يوم مثلا جزء وعدد معين م الايات

نحفظه مع الاصول الفقهييه وتفسيرها

يبقى كده بقى بجد ماشاء الله عليكمم

هترد تقولى متحفظى مع نفسك

ولا مع فتيات ف الجامع

ولا مع الشيخ احمد بتاع قناة الناس

هقولك والله النت بقى تقريبا فراغ حياتنا

يعنى مننا اللى بيشتغل وينت

او بيدرس وينت

فياريت الاقتراح يلاقى صددى

واهو كلنا بنسعى للخير

تحياتى

وبالمناسبه عايزه واحده مانجه مشبره

القلم السكندري said...

توكل علي الله ياريس

وربنا يجعله في ميزان حسناتك

الـسـيـدة نـون said...

يا مسهل
افرجها من عندك يارب

الباحث عن الحقيقة said...

هو هيكون عيب لو ما ردتش
بس بينى وبينكم
............
بخصوص المدونة جديدة ولا اتابع فى واحده من الاتنين انتمحيرتونى اكتر معاكم
ما زال القرار ينتظر

رفقة عمر said...

يااااااه انا اخر من يعلم بعودة حضرتك حمدالله على سلامتك
ارجو ان تزول حاله الاكتئاب وان تفدنا بعلم حضرتك

الباحث عن الحقيقة said...

شكرا رفقة عمر
وجودك فى ى وقت كفاية
حضرتك انا بتفائل وبكون سعيد جدا بتواجدك
لانك اول من علق فى مدونتى