Wednesday, February 20, 2008

لماذا يكرهون محمد؟

السلام عليكم ورحمة الله وبركاته
وبعدين هزرنا كتير وضحكنا كتير ولعبنا كتير
نتكلم جد بقى شوية
جاوب يابن حجر : تعرف ايه عن المنطق؟
اولا اللى بيتكلم دلوقتى هو انا ..علشان محدش يرجع يتلخبط ويفتكر انه هو
اول مره عديتها بمزاجي لما افتكرتوه ..هو لكن المرة دى بقولكم انى ..انا
ونظرا لقيام المدعى عليه زميلي "ابن حجر" -يعنى اللى بيتكلم دلوقت الباحث مش ابن حجر خدوا بالكم ناس كتير بتلخبط بينا حتى انه ناس كتير افتكرت اننا شخص واحد وعاملين اتنين "نكتة طبعا بس ده حصل" نظرا لقيامه باحتلال صحيفة الكاشفة بالحديث عن الوطنية وشكله كده لسه هيكتب عن الوطنية ..وانا شخصيا بقوله وانا من موقفي هذاااا ..سلملي على الوطنية انت بتتكلم عن حاجة من الكماليات .. مش كلنا بنتمتع بنفس القدر من المواطنة ولا كلنا شركاء في هذا الوطن فيه ناس واخده نايب كبير وفيه ناس الوطن أكلها لحم ورماها عضم
ما علينا كانت هذه هي المقدمة " استفتاح يعني" وإليكم الموضوع
...............................
هنتكلم سوا سوا عن موضوع الاساءة للنبي محمد صلى الله عليه وسلم
معلش هم بقين هنقولهم بسرعة انا عارف ان كتير كتب في الموضوع ده
بس احيانا بنتسائل
اشمعنى سيدنا محمد ..وليه بيكرهوه اوى كده؟
بالرغم من انه انسان وحد العرب واقام دولة حضارية على اسس من العدل والمساواة بين الناس
وكان اول رجل فى العالم يقيم دولة كبيرة على اسس دينية ..وفضل الاسلام دولة قوية تمتد من بلاد السند والهند وبلاد تركب الافيال لغاية بلاد تركب البغال في اسبانيا والبرتغال
كل هذا بفضل تعاليم رجل واحد
ولا يستطيع احد ان يقول ان سبب انهيار هذه الدولة هو المنهج نفسه الذي جاء به محمد ..لانه لو كان منهج يهدم ..مكنش بنى من الاول
واحنا وهم والناس التانيين عارفين ان سبب انهيار الدولة الاسلامية وتخلفها راجع لان المسلمين ما فضلوش متمسكين بالمنهج الذي جاء به الراجل ده
اللي هو الانسان العظيم ..كشخصية تاريخية انسان قام بهذه الاعمال هو انسان عظيم
ولو كان القران من تأليفه يبقى انسان عظيم يستطيع ان يوضع في مكانه اكبر من مكانة اى معلم فى التاريخ قبل مكانة بوذا او المسيح لسبب واحد مش بالنسبة لعدد معتنقي افكار كل واحد فيهم وإلا كانوا تقدموا فى الترتيب ولكن لان محمد " ورغم انى حبيت اتكلم بشكل موضوعي لكن خلونى من نفسى اقول " صلى الله عليه وسلم" هذا الرجل هو الوحيد الذي اسست تعاليمه دولة قوية غلبت دولة بوذا البوذية ودولة الروم النصرانية
وتعاليمه حتى اليوم هى الاسرع انتشارا فى العالم
.................
طيب انسان بالعظمة دى ..بيكرهوه لييييه؟
الناس اللى بتكره النبي محمد " صلى الله عليه وسلم " ثلاث اشكال
1- رجال الحكم والسياسة
2- رجال الدين
3- عامة الناس
تمام كده ..اصحى وركز معايا بقى
رجال الحكم والسياسة بيكرهوه لانه جاء بكتاب ورسالة تقول : إن الحكم إلا لله
يبقى لا سلطة سياسية تعلو سلطة الله ولا حاكم يعلو فوق الله سبحانه وتعالى
ولا تشريع قانونى يخالف منهج الله
يعنى لا اشتراكيين ولا رأسماليين ولا زفت طين له كلمة فوق كلمة ربنا
فهذا اذن رجل جاء ينافسهم فى سلطانهم السياسى على الناس
ويجعل الناس كلهم سواسية كأسنان المشط الكل سواء امام الله لا تفاضل بينهم بغير التقوى
ولاجل ذلك كفار قريش من السادة كانوا بيحاربوه ..لانه هينزع سلطانهم ويخلى الكلمة كلمة ربنا بس
................
طيب رجال الدين بيكرهوا محمد ليه؟
الاجابة : لانه رجل جاء برسالة من الله تقول : واذا سألك عبادي عني فإني قريب
يعنى لغى اى وساطة بين العبد وبين ربه
فلا كهانة ولا حباره " جاية من حبر يعنى زى احبار اليهود" ولا اى حاجة خالص
فبذلك حرم الكهان من القداسة اللى اخدوها بسبب انهم وسطاء يقربوا الناس بالله
يعنى مفيش قداسة الكاهن فلان
واللى عنده نذر او عايز يطلع فلوس لله ..مع نفسه بقى مش يروح يديها لكاهن
واللى اذنب ذنب ..يقفل عليه صدره ..يستر نفسه ويستغفر ربنا ويتوب .مفيش حد في الاسلام بيبيع صكوك غفران ..نأسف هذه البضاعة غير متوافرة عندنا
ربنا احتكر الغفران ده وخلاه ببلاش
ومتنسوش ان هرقل ملك الروم كاد ان يُسلم لولا خوفه من الكهان ..كانوا بيهددوه بانهم يثيروا الشعب ضده والفتن داخل القصر وغيرها ..طبعا لانه لو اسلم هم بقى مع السلامه فى الباي باي
................
طيب عامة الناس وضعهم ايه؟
كالماشية ..بقر ..غنم مطرح ما الراعى يسوقها بتمشي
الحاكم او الكاهن او الرجل السياسى " ومنهم المفكرين او النخبة" قالوا نبي العرب ده كذا يبقى كذا زى ما مولانا الكاهن بيقول او سيدنا الحاكم زعيم القبيلة
بالمناسبة وقبل ما اختم كلامى واشمعه بالشمع الاحمر
فيه واحد من الاخوة الـ ..الزائرين ..ممكن يسأل طب ما المسلمون اهو بيقولوا لرجل الدين "عم الشيخ يعنى" يا مولانا وسيدنا ..اشمعنى يعنى ؟
طبعا كلنا عارفين ان كلمة مولانا وسيدنا دى تكريم لعلمه وحفظه لكتاب ربنا وتقدير له واحترام
لكن مولانا ده لما بيروح يشترى كيلوا لحمه الجزار بيضحك عليه زيه زي اى مواطن عادى يعنى ويديله لحمه نصها دهن ونصها عضم وتقعد من الصبح لغاية المغرب علشان تستوى
يبقى يا جماعة نبينا علية الصلاة والسلام رجل عظيم ..وكل اللى شايفين ان محمد رجل عادي وليس نبي اقولهم احكموا عليه بميزان العقل يعنى وشوفوا الانسان ده موقعه فى التاريخ ايه؟ ..هتعرفوا انه شخصية عظيمة
صلى الله عليه وسلم

32 comments:

عصفور المدينة said...

برضه دمك شربات
رغم الموضوع ومأساة الإساءة لحبيبنا صلى الله عليه وسلم


عايزين نطالب صحيح بحقوق المواطنة ولو لك في الموضوع حاوكلك تطالب بحقوق المواطنة للعقلاء واهرب واسيبك
:)

الباحث عن الحقيقة said...

استاذي الفاضل
الف شكر على المجاملة الرقيقة حضرتك اللى كلك زوق
على فكرة هبدأ دروس الفقة بالاسلوب ده فى الصحيفة الكاشفة ان شاء الله يعنى استعدوااااا للمنافسة القوية
دى عينات بس
بس يا رب ابن حجر يخلص سلسلة ليالى الحلمية قصدى سلسلة الوطنية على خير

وبعدين عقلاء مين ومواطنة ايه ..هو ده اللى علمهولك ابن حجر
لو سمحت احذف كلمة المواطنة وقبلها كلمة عقلاء دى من القاموس دى ممنوعات هنا
وقبل التوكيلات ادينى مقدم اتعاب احجز بيه على اول ناقة طالعه السودان ..سمعت ان الجنية السودانى ما شاء الله صحته فى تحسن مستمر شكله بياخد فياجرا من ورانا
.............
احنا هنهزر وننسى موضوعنا
عايزين نعرف الغرب ونتكلم عن سيدنا محمد بشكل موضوعى من خلال دراسات المستشرقين الموضوعيين المنصفيين
وياريت اخوانا السلفيين بتوع السعودية "اصل بتوع مصر غلابه" ادينى اهو ببعد عنكم عيون الضرايب بس اوعى تنسى تعمل الاقرار الضريبى
بدل طبع كتب المسح على الخفين ..ياخدوا هدنة شويه ويشوفوا كتابات المستشرقين التى انصفت سيدنا محمد ويعيدوا نشرها فى دول اوربا

Dr.khaled said...

وما نقموا منهم إلا أن يؤمنوا بالله العزيز الحميد

أحمد منتصر said...

حلوة المقالة دية يا معلم :)

Empress appy said...

الباحث عن الحقيقه
اهو انا معلطش اهو شوفت بس انا فى رأى ان الناس دى مش بتحبه علشان كمان هما فيه حاجات مش فاهمنها عن الرسول ولا عن الاسلام وبرضه ده عيب فيهم لانهم مش بيدورا علىالحقيقه غير كده ربنا بقى يسامح اللى اسأوا للاسلام بصورة او بأخرى فدورنا اننا نفهم الناس دى يعنى ايه الرسول ويعنى ايه الاسلام وشكرا ليك على الموضوع

الباحث عن الحقيقة said...

ض/ خالد
شرفت يا فندم الاستراحة وده كرم كبير من سيادتك هذه الاطلالة رغم تقصيرنا مع سيادتك
وحضرت كمان فكرتني بالاية التى تقول
بسم الله الرحمن الرحيم " وجحدوا بها استيقنتها انفسهم" صدق الله العظيم
نعوذ بالله من شر النفس

..............

احمد باشا منتصر
والله انت اللى راجل حلو وزوق
شكرا للزيارة يا فندم بس دى اول مره اشوفك هنا - وعندك واحد المشروب الوطنى بتاع اول مره للاستاذ احمد

............

appy
اهلا وسهلا بحضرتك
بصى حضرتك هو مسألة جهلهم دى وعدم معرفتهم ممكن نعذر فيها البقر - قصدى عامة الناس مش كلهم بيبحثوا ويقروا
انما رجال الدين والسياسة المفروض ناس بتقرأ وبتفهم وعلى اطلاع
النجاشى اول ما سمع القرآن قال ان الذي جاء به محمد والذي اخبر به عيسى ليخرج من مشكاة واحدة
فيه مؤامرة لتشوية المقدسات الاسلامية والناس المتآمرين دول استغلوا جهل الناس بالحقائق دى - وحاليا واحد زى زكريا بطرس مثلا بيقتبس فقرات من كتب زى الطبرى وغيرها علشان يشكك المسلمين كمان وطبعا هو بيقتبس الروايات الضعيفة وياخد فقرات تؤيد كلامه ويترك الباقى لان محدش بيدور او يبحث فيشكك المسلمين اللى مش بيطلعوا او يقروا
ان شاء الله اعمل موضوع عن تدليساتهم على المسلمين وتشكيكهم في النبي


شكرا للجميع على الزيارة
واحلى واجب هنا علشان خاطركم
تلاته عناب سخن يابن حجربسرعة

Desert cat said...

بص يا احمد
سيدنا رسول الله ترك لنا القرآن والسنة حتى لا نضل بعده
لكننا للاسف مش متمسكين بيهم وكل واحد بيطبق قانون من دماغه
لذلك امته اول ناس هجرت القرآن والسنة وبالتالى اللى بيهاجموه اخدوا فرصة قوية للهجوم ضده ... ايه اللى ممكن يحصل كام واحد مسلم هيعترضوا وكام واحد تانيين هيعلقوا شعرات بابى انت وامى يا رسول الله
ونحن فداك
وشيخ الازهر هيطلع يقولك ازاى يغلطوا فى واحد ميت لا يملك الدفاع عن نفسه
وبالتالى الفرصة قدامهم قوية والطريق مفتوح للهجوم براحتهم
تحياتى

raspoutine said...

انا شايف ان الموضوع مش كره لانهم فى الاساس ميعرفوش مين هو النبى محمد عليه الصلاة والسلام
الموضوع اكبر من كده بالنسبة ليهم الناس دى بتحب تتسلى مع عالم عربى جبان متخلف وهما عارفين اننا مش هعنعمل اى حاجة غير التنديد والشجب والمقاطعة الاقتصادية
مقاطعة اقتصادية ايه طوز ميفرقش معاهم الكلام ده فى جهات اعلامية كبيرة على مستوى العالم من مصلحتها ترويج المشكلة لاغراض فى الاساس مادية وزيادة نسبة المشاهدة
وعشان كده لما بيجو يضربونا بيضربونا فى عقيدتنا ودينا ونبينا محمد عشان عارفين ان صوتنا عالى لكن هيفيد بأيه الصوت العالى مدام الايد مغلولة ومش طايلة


اشكرك على طرح الموضوع المهم ده

أم أحمد المصرية said...

اللهم صلي و سلم و بارك عليك سيدي يا رسول الله صدقت سيدي يارسول الله حين قلت الخير في و في امتي الي يوم الدين و الدليل مقالك ده و مدونة الا رسولي و كل من يهتم بالدفاع عن نبينا الذي لا يحتاج لدفاعنا و لكن نحن من نحتاج له لكن انا موافقة راسبوتين هي مش حكابة حب وكره دي مصالح كبري و شوية ناس سايقين باقي البقر اللي ما يعرفش حاجة عن
الاسلام و رسوله

دنيتى الجميله said...

لماذا يكرهون محمد
سؤال قوى جدا
بس ممكن تقولى كام واحد بيصلى على سيدنا محمد يوميا او اسبوعيا
انا حزينه جدا والله لانه ابسط شىء ولكن للاسف مش كتير الا من رحم ربى
الموضوع يبتدى اننا لازم نعرف قد ايه هو كان بيحبنا علشان احنا كمان نقدر ندافع ونعبر عن حبنا ليه
يعنى انا سمعت والحمد لله من عمرو خالد سبب تعدد الازواج فى حياه سيدنا محمد صلى الله عليه وسلم
وبعدها سمعت من القسيس ربنا يهديه عن زواج سيدنا محمد باسلوب بلاش اعبر عنه
المهم انه استفزنى جدا وقلت لولا انى سمعت كلام عمرو خالد كان زمانى مشتته دلوقتى
ولاحول ولاقوه الا بالله العلى العظيم
يعنى المواطنين حقهم على العلماء توصيل حياه سيدنا محمد قبل ما يسمعوا عنها من اشخاص تانيين
واكيد انت فهمت قصدى

ابوزياد الفاتح said...

جميله جدا والله اخى
ربنا يكرمك يارب

ويجعله فى ميزان حسناتك
مدونتك دمها خفيف هى وموضوعاتك

بتشل من همومى شويه
ربنا يكرمك

الباحث عن الحقيقة said...

الاخت / قطة الصحراء
كلامك صح جدا ونت هتكلم عن النقطة دى امبارح واعمل اضافة بس خفت من الاطالة
وهى كيفية مواجهة هذه الاستفزازات
الغضب والعنف والانفعال العاطفى بدون عقل او توجيه مش هيكون له داعى لانه مع التكرار هنتعود زى ما اتعودنا نسمع اخبار القتل فى غزة والعراق
وتتحول الاهانه بعد كده لشئ عادى وبذلك تقل هيبة الدين فى نفوسنا
لازم نفكر صح ونواجه صح

..............
الاخ / راس بوتين
زى ما قلت فى البوست الناس اللى تعرف بتستغل جهل الناس اللى ما تعرفش لتحقيق مؤامراتهم الدنيئة وهى عايزين شعوبهمتكره الاسلام فيقل عدد الداخلين فيه فى اوربا مثلا
وكمان يشوهوا صورة العرب ويستغلوا رد الفعل العنيف من العرب فى تشوية صورتهم بانهم همج اتباع نبي ارهابي جاء ليسلط سيفه على رقاب الناس
هى لا شك مؤامره هتحقق لهم عدة اهداف مادية وغير مادية وده واضح من تعليقك وردى عليه
شكرا يا راس
بوتيييين

الباحث عن الحقيقة said...

اختى الناظرة الحاجة / أم احمد المصرية
منورة الاستراحة يا فندم
ربنا يكرمك ان شاء الله وما تقلقيش
وكان وعد علينا نصر المتقين

...............

الاخت / دنيتي الجميلة
والله كلامك اوحى ليا انى اكتب موضوعات للرد على الشبهات دى
ان شاء الله الموضوع القادم وهيعجبكم ان شاء الله لانى عضو فى منتدى الكنيسة العربية - حيث اقوم بالرد على الشبهات حول الاسلام


...................

عبده بيه باشا افندى
شرفت زيارة مدونتى وصديقى اللدود ابن حجر العسقلانى زميلى وشريكى فى المدونتين
واهلا وسهلا بحضرتك
نقول واحد كاكاو تضفى صدرك علشان البرد ماشى
اهلا وسلا منور يا ..احنا اخر حاجه قلنا ايه ..اه افندى صح
منور يا عبده افندى

الساحرة said...

الحكايه ملهاش علاقه بالاديان دي سياسه وبعدين اللي بيرسموة الصور المسيئه او يتكلموة عنه كلام باطل هيعرفو منين سيدنا محمد (ص) المسلمين والدعاة اللي اصبحوةكالهم علي الفلب (العدد في الليمون)) عملوة ايه هذا ليس تبرير لتصرفهم ولكننا نشجب فقط
من الاخر نحن من سمح لهم
ملحوظه
بوست دمه خفيف يتحدث عن موضوع خطير بطريقه سهله
تحياتي

رفقة عمر said...

مشكلتهم انهم شايفين ان المفروض اخر الرسالات تخرج من قومهم وخصوصا اليهود كانوا منتظرين خروج اخر الانبياء الموجود عندهم فى التوراه من عندهم لما ظهر اخر الانبياء سيدنا محمد صلى الله عليه وسلم من امه اميه راعاه اغنام امه جاهليه استكبروا واستعلوا فحاربوا الرسول ومازالوا يحاربوه وطبعا كل من يؤمن به هو استكبار واستعلاء
وطبعا بالاضافه لكل اللى حضرتك ذكرته لان اليهود هم قتله الانبياء عموما وحيث انهم هم المسيطرين على العالم كله الان فصدروا فكرهم الدموى للعالم كله وطبعا لازم يكون ضد المسلمين وبس
سعيدة بعودة حضرتك جدا
ادام الله وجودك وكتاباتك

القلم السكندري said...

تسلم ايدك يااا..الباحث عن الحقيقة

وربنا يجعله في ميزان حسناتك

وربنا يلعنهم -هما وكل من يسئ أو يقبل أو يتغاضي وفي يده أمر- الإساءة الي رسولنا صلي الله عليه وسلم

قبلة الحياة said...

السلام عليكم ورحمة الله وبركاته

اسلوبك رائع ما شاء الله ولا حول ولا قوة الا بالله

القضيه مطروحة من مدة ومهاجمة الرسول الكريم مش جديدة على أعداء الاسلام وسلبيتنا لا بتقدم ولا بتأخر

ولا نملك اليوم شيء سوى أضعف الايمان

اللهم عليك بهم فانهم لايعجزونك اللهم عليك بهم فانهم لايعجزونك اللهم عليك بهم فانهم لايعجزونك

تقديري واحترامي لكل ما خطه قلمك الجميل

الباحث عن الحقيقة said...

الاخت / الساحرة
اولا شكرا لزيارتك
ثانيا وليه نحمل الدعاة مسئولية التقصير فى الوصول للاوربيين دول ..هم الدعاة دول هيعملوا ايه
وبعدين للاسف الدعاية دلوقتى اصبح زى بضاعة فى ايد راس المال اصحاب الشركات الاعلامية هم اللى بيرعوا عملهمويسفروهمويعملولهم مؤتمرات وندوات
يعنى الحكاية بقت فى الليمون بس بتاع التجارة


.........

الاخت رفقة عمر
ادام الله وجودك واطال بقائك فى كل خير
ومما ذكرتيه حضرته يتبين انها بالفعل احقاد صهيونية قديمة
لان اليهود ارادوا تكون لهم السطوة والغلبة الدينية فى العالم وانهم الشعب المختار ويضعوا نفسهم فوق البشر
لكن الله اختار ان يكون محمد من العرب الاميين ..كى يحمل حضارة دينية اسلامية نقية بعيدة عن تحريفات اليهود
ماهم قبل كده نزلت عليهم الانجيل فماذا فعلوا حرفوه برضه واردوا قتل المسيح
لكن الله سيرد كيدهم عنرسوله كما رد كيدهم عنه فى حياته لانه اذا كان محمدا مات فرب محمد حى لا يموت

الباحث عن الحقيقة said...

القلم السكندرى
اهلا وسهلا بزيارتك
وبخصوص اللى يقدر يرد وساكت ده ربنا يكرمه وياخده الموت احسنله من ان يسأل عن تقصيره فى نصرة رسول الله

................

قبلة الحياة

ماشاء الله لا قوة إلا بالله
اسم حضرتك مميز وجميل
اشكرك لزيارتك وتواجدك معنا هنا
وان شاء الله ربنا يقدرنا ونملك ما هو اكبر من اضعف الايمان
على الاقل لسه اللسان
محتاجين موقف رسمى قوى من المؤسسات الدينية وياريت السلطات تعين على تنفيذه باعتبار الدول التى تسمح بذلك دول معادية لا يجوز التعامل معها
يا ريت
الناس دى لازم تفهم ان الدين الاسلامى مش مجرد عبادة تؤدى فى المسجد وخلاص وانما دى مشاعر قوية هى اللى بنت دولة الاسلام وخلت العربى الامى يهاجر فى سبيل نشر الاسلام فى كل مكان
شكرا لزيارتك

فرنسا هانم said...

ايه يا معلم فيه ايه ؟؟؟؟؟
بقالى ساعه قاعده فى الاستراحه ومحدش سأل فيا
ليه المعامله دى ؟؟؟؟
وبعدين جيت لقيت الباركنج بتاع العجله لسه مخلصش
يلا اربطها بالجنزير وخلاص
شوف بقى يا معلم
فى المره الاولى
بعد الاساءه للرسول صلى الله عليه وسلم
تهاونا
ووقفت الدول الاوربيه مع الدنمارك
فعادت الاساءه
وستزداد اكثر
ان لم نقف وقفه رجل واحد
كبيرنا قبل صغيرنا
وتحياتى
وسلامى لابن حجر

الباحث عن الحقيقة said...

فرنسا هانم ام سحلول
متشكر لحضرتك اوى بقى سبتى طابور العيش وجاية تزورينا
احلى واجب لفرنسا وعجلة فرنسا
بس خدى بالك احسن ابن حجر يلعب فى الجرس
كان لسه معايا من دقيقتين وبيقولى عايز ينزل بموضوع جديد قلتله لاااا لسه اتنين كمان فرنسا هانم و بت خيخة
اقوم ادخل ألاقيكى موجوده
سبحان الله ..فين الخمسة ارغفه يا فرنسا
هو فعلا لو سكتنا المره دى وفعلا رد الفعل اقل من المرة اللى قبلها يبقى المرة الجاية هنقول بجد لا حياة لمن تنادى
يبقى لازم نقف صح وناخد موقف صح علشان اللى حصل لا يتكرر تانى
بس مين اللى ياخد الموقف القوى ده وازاى؟؟؟ محتاجين ريسه زى فرنسا
نزل يابنى حلبة حصى وكتر الحصى علشان فرنسا ..حصى ايه خليه زلط احسن دى غالية علينا

ahmd ebn om ahmd said...

السلام عليكم ورحمة الله وبركاته
بعد التحية يا أخى فى الإسلام وأخى فى الإسم ليه بيكرهوا محمد(ص) لإن يعض المسلمين نسوا الله فتصرفوا بسلبية تجاه كراهية الأجانب لرسوله بسبب الأفكار الخاطئة التى تمت عن طريق الوسوسة الشيطانية المجهولة المصدر

فإذا كان المسلمين بيعملوا كده فحنلوم الأجانب إزاى بس على الأقل إحنا عندنا أبهات وأمهات يرشدونا لكنهم معندهمش حد
وأرجو أن يستمر التواصل

وبالله التوفيق

إنسان || Human said...

أعتقد ان هما مايعرفهوش صح عشان يكرهوه

د/اجدع بنوته said...

بأبى انت وأمى ياحبيبى يارسول الله

شكرا ع البوست

nigro said...

أخي الباحث عن الحقيقة
أعتقد أن السبب الأول و الأهم في كرههم لأشرف الخلق سيدنا محمد صلى الله عليه و سلم هو ضعفنا نحن المسلمين
فمنذ البدايات الأولى لبذوغ الإسلام و هو غريب مكروه من السواد الأعظم الكافر
فــكره سيد الخلق موجود من زمن سحيق
و لكن عندما قويت دولة الإسلام لم يجرأ أحد هؤلاء الكفرة على أن يجهر بهذا
و لكن في ظل الضعف المُخيم علينا الآن وجدوا الفرصة سانحة لإبداء هذا الحقد و الكره تحت مسمى حرية التعبير
أعتقد حتى و لو اتضحت لهم الصورة عن سيد الخلق و عن الإسلام لن يكف عن هذا إلا أعداد قليلة بسيطة ممن كتب الله لهم الهدى
و لكن السواد الأعظم منهم سيظل على ما هو عليه
لا أقول ألا فائدة من قيام مشايخ المسلمين بالقيام حملات تثقيفية توضيحية لدول الغرب عن ماهية الإسلام و عن كنه سيد الخلق
و لكن علينا أيضاً أنا نبدأ بأنفسنا و ألا نظهر بهذا الضعف
أعرف أن في ظل الوضع الحالي الطريق طويل و لكن أعاننا الله وإياكم على نصرة هذا الدين
أحييك على عرضك الموضوعي الجميل
و آسف على الإطالة

الـسـيـدة نـون said...

اوك يا معلمى
حلو الكلام
بس انا عندى شوية استفسارات
بصراحة هى استفسارات كتير اوى
هابقى اكتبها عندى فى بوست لوحده
وانت ابقى رد عليا
اهه برضه نستفيد من علمك يا معلمى
سلام
اختك خيخة

MerMaid said...

كلامك صح

بس فين دور الجماعة المسلمين في توصيل الصورة الصحيحة لو اختلط ع الاخرين اللي هم العامة الامر ؟؟؟؟

انا لا اعفي نفسي ولا غيري من المسئولية

الحق والحق يقال

هم جزم
و احنا مش لاقية لنا وصف مناسب
و مش عاوزة حد يزعل مني


تحياتي ليك

بنت الصالحين said...

استاذنا الباحث
تدوينه حلوة ومختلفه فعلا

جزاك الله خيرا عنها

أنا مسلمة said...

أول مرة ازور المدونه

ما شاء الله جميله

والتدوينه رائعه

جزاكم الله خيرا

mayas said...

انت فكرتني باستاذي في المرحلة الثانوية
لما قال على الرسوم المسيئة السابقة
قال لنا يا ولاد الشجرة المثمرة هي اللي الناس بيحدفوها بالطوب لكن الشجرة الميتة اللي مفيش فيها حاجة
محدش بيقرب منها
الناس مش واخدين بالهم منها يعني مش فارقة معاهم الشجرة الميتة؟؟؟؟؟

Soul.o0o.Whisper said...

الاخ الفاضل / الباحث

حلوة حكاية هذه البضاعة غير متوفرة لدينا
بتفكرنى بنكتة سمعتها

طبعا كل واحد بيروح يشترى غير صك الغفران بيروح يشترى حتة فى الجنة
و طبعا مصدقين انهم بيشتروا فى الجنة

قام واحد لما شاف كدا قام رايح عاوز يشترى النار
فطبعا القس استغرب جدا إزاى يعنى؟؟؟
و الراجل دا اهبل
فباعهاله بابخس الاثمان
قام الراجل نازل تانى يوم فى السوق يا جماعة أنا خلاص اشتريت النار و مش هادلخ فيها حد
طبعا الناس كلها فرحت و ماعدتش حد بيروح يشترى الجنة
فجه القس بسرعة يستسمحه يشترى منه النار
أبدا و لا رضى
هههههههههههههههههههههههههههههههه


بالنسبة بقى ليه هما بيكرهوا محمد ؟؟
فالاجابة .. إنه لما نبقى احنا الاول نبقى نعرفه و نحبه نبقى نحاسب غيرنا ليه بيكرهوه

طبعا كلنا بنقول بنحبه
و يوم ما رسمه مسيئة بتتنشر كلنا بنهيج
و هياجنا دا أقل شئ يثبت إننا و لا نعرف أى شئ عن نهجه و لا سيرته

فياريت نتعلم صح علشان نوصل صورة صح للغير
بدل ماحنا مش شاطرين غير فى الكلام بس
حتى المقاطعة اللى بينادوا بيها ..هى يومين
و نرجع نقول معلش مانقدرش نعيش من غير الحاجات دى


خالص التحية لك و لقلمك المبدع

الباحث عن الحقيقة said...

ماقلتيش اسمه ايه اللى اشترى النار
ههههههههههههه
اشكرك واشكر اللى الاخوة والاخوات اللى شرفونى بتعليقاتهم