Sunday, April 27, 2008

اللقاء الحجري الاول والثاني

تحديث اخر: الاخت الفراشة مش هتجيبها لبر ونزلت توضيح حول الناسخ والمنسوخ في الصحيفة بعنوان
.............................
اول لقاء حجري تم بينى وبين ابن حجر كان من 4 شهور تقريبا
اتفقنا في التليفون على المكان والزمان
الساعة 6ونص
امام محطة رمسيس
ابن حجر : هتلاقيني لابس بلوفر ازرق
الباحث : قعدت اضحك طبعا لاني اولا كنت شفت صورته من زمان ثانيا ..مفيش حد بيحلق اقرع في عز الشتاء غيره
وده مش بخل يا جماعة ..دي ضريبة العبقرية ..ربنا سلطه على شعره مش بيطيقه على طول جايبه نمره واحد
رحت لقيته منتظر امام سلم المترو اللى في وش محطة رمسيس
كان اول مره نلتقي فيها حضنين كده ع السريع على بوستين تقريبا ..في خدوده طبعا ولا اييييه
ابن حجر : ايه ده تصور انا كنت فاكرك اطول من كده
الباحث : يا عم انت اللى طويل..يا جماعة 170 سم اعمله ايه تاني مش يحمد ربنا
هنروح فين يا عم الحج
بصيت لقيته جاهز وراح مطلع تذكرتين مترو ..ونزلنا فين مش فاكر المهم رحنا مكتبة دار السلام اشترى هو كتاب اصول الفقه للمبتدئين
وبعدين رحنا الحسين
ابن حجر مغرم جدا بالاحياء القديمة ونفسه يعيش هناك في الحسين المهم حسيت اني سايح وهو قعد يلف بيا في مغارة على بابا دي لغاية ما وصلنا الى قهوة زبيده
وعند زبيده الخبر اليقين
دى الوكر الرئيسى لابن حجر وشلته..طلبنا شاي
بس انا انضحك عليا بصراحة الشاى ده معدلش دماغي معلش بقى يروح فين ده جنب الشاي الصعيدى
اها ..نسيت احنا كنا دخلنا قبلها محل فطاطري وطلبنا فطير محشى ....مش فاكر
المهم قعد قبالنا جماعة فرنساويين ..بس بجد مش فرنساويين بتوع السويس زى خالتكم فرنسا هانم كده
وكانت الفضيحة الدوليه قعدنا ناكل بادينا والراجل الفرنساوى يبص علينا ويتنح
وشوية ويضحكوا ويظهر والله اعلم كانوا بيضحكوا علينا
وانا خفت بصراحة الراجل الفرنساوي يطلع موبايله ويصورنا فيديو وتاني يوم نشوفها على اليوتيوب..صعايده في الحسين
ابن حجر فيه عرق منياوي
وعلى قهوة زبيده اتكلمنا كتييير في كل حاجه عن التدوين وعن حياتنا الشخصية
وكنت لسه جاي من استدعاء قعدنا ندرش واتضح انى ماشى مع واحد له تاريخ في المظاهرات
صحيح نصها كان بالصدفه انما اهو ..اللى حصل بقى
وطول ماحنا قاعدين في قهوة زبيده شباب وبنات رايحة جايه من قدامنا
ايه يا جماعة ما ينفعش كده ..اتنين عذاب واحد عايز في قوقعة هاردوير والتاني صعيدي
انما اللى لفت نظري في الموضوع ده كله قلة الادب اللى في الشارع المصري
ازاى؟
ألاقي الشاب ماشي جنب البت وحاطط ايده على كتفها ودماغه هتلزق في دماغها وماشيين في الشارع عادي
المشهد ده شفته كتير ..وطبعا في الكورنيش حدث ولا حرج
بقول لابن حجر : ايه ده يا عم هو الناس دي مالها عيب ده احنا مسلمين في بلد مسلم برضه
قال ابن حجر مقولته اللى لفتت نظري: الشباب عندهم كبت عاطفي مش عارفين يعملوا ايه
بالظبط كل بنت وولد يمشوا مع بعض شويه هم عارفين ان دي علاقه مؤقته انما اهو بيفرغوا الكبت العاطفي وخلاص
..................
اللقاء الثاني
كان من كام يوم كده
الباحث : ألو انا منتظرك في نفس المكان القديم بتاعنا .
بين الاطلال هههههه
بعد ربع ساعة لقيته قدامي.. يلا بقى كده شوفلنا قهوه قريبه على السريع علشان عايز اروح البلد
ركبنا المترو ..وكان قاطع لى تذكرة مضروبه وكان شكله هيحبسني كل ما ادخلها الجهاز يصفر وما يشتغلش
جدير بالذكر اننا ألتقينا بالمترو بصحفي شاب في جريدة الحياة ..واد يابن حجر ما فكرتناش ناخد تليفونه ليه ؟ المهم ..عمل مدخله بين كلامنا خاصة ابن حجر كان بيتكلم عن خطبة للشيخ سعيد رسلان بيتكلم فيها عن الاضراب فأتكلم الصحفي الشاب ده عن مستوى الخطباء بشكل عام لدرجة ان فيه ناس بطلت تروح تصلى الجمعة بسبب الخطيب اللى بيقول كلمتين مملين مش بيغيرهم ..واتكلمنا عن الموضوعات الجديدة ..بقوله اني عايز احضر موضوع جديد عن السلفية ..بصيت لقيته مخنوق من بعض السلفيين دول وموقفهم من اضراب ابريل..هو بقى ابقى يحكيلكم
وطلعلى كتاب عن شم النسيم وفتوى المرحوم عطية صقر ..
وطلع كتاب عن السلفية للدكتور رمضان البوطي الكتاب يبحث في السلفيه ومعناها وينتهي الى انها حركة زمنية مباركة لا مذهب اسلامي
ما علينا ده مش موضوعنا
انما احب اوضح حاجه انا وابن حجر مش معادين للسلفية رغم اقتناعي انا ببطلانها كمذهب فكري ولكن كل شخص حر احنا بس ضد ان حد يطلع علينا ويحتكر لنفسه الصواب ..بل ويحتكر لنفسه الاسلام والصلاح والتقوى واتباع الرسول والصحابه وبالتالي هم الفرقه الناجية وغيرهم ضالين عن هذا الطريق
ان شاء الله هوضح وجهة نظري دي اكتر في موضوع مستقل واعطيكم الفرصة تشاركوا بس علشان ما ننشغلش بحوار جانبي
بالمناسبة دي اقول ان طبعا عصفور المدينة هو الغائب الحاضرفي لقاءاتنا وفي كتابتنا لموضوعاتنا
وهو شخصية مثيرة بالنسبالنا ومحل نقاش وازاى مثلا انه يكون صديق لصاحب مدونة يوميات عيل مصري
رغم التباين السلوكي او التربوي كمان لكل واحد فيهم مع ابناءه
واقوله ايوه يا عم عصفور بيحبك انت اكتر مني ..ده حتى بطل يعلق على موضوعاتي ههههه
يضحك ويقولي لا بس هو اللى مشغول
اه نسيت اقولك يابن حجر ان عامل مشاكل لعمك عصفور من كام اسبوع كده بسبب موضوع قديم واحده راحت اشتكتني لعصفور المدينة والراجل كتر خيره تعب جدا وسط الموضوع ده
بالمناسبة يا عم عصفور الموضوع انتهى نهائيا والحقيقة ظهرت وبقت علنية وربك اخدلي حقي بايد واحد منهم
اعلنها حرب عليهم وقالى يا باحث شوف رغم انى متضايق منك بسبب مشاكلك الكتير ..بس انا مرضاش بالظلم ويانا يا هم ان شاء الله حتى يوقفوا عضويتى ..وده يبقى المدير التقني اللى صمم المنتدى اياه
المهم
قعدنا برضه في كوفي شوب مش فاكر اسمه
وأفاجئ بالعنتيل ..التمنياوي طه
شخصية ظريفة جدا لا تمل منها طول ماهو قاعد يهزر ويقلد الاعلانات ويسخر من اساليب الاعلانات
ومن اظرف مواقفه كان ماشى وراء مظاهره في الكلية في الااااخر من باب الفضول وفجأة
واحد من اللى بيقودوا المظاهره جوه الجامعة قال : لف وارجع تاني
ويلاقي التمنياوى طه نفسه فى اول صف في المظاهره
هههههههههههههههه
اتكلمنا كتير انا والباشمهندس عسقلاني
واكتشفنا اننا احنا الاتين معجبين بمدونة الاخت ال جي
وغزارة الانتاج اللى عندها لدرجة انها ممكن تعمل 4 بوست في يوم واحد
وبتكتب فعلا موضوعات جميله جدا .من ضمن الموضوعات اللى بتضحكني وبتضحك زمايلي
عامله بوست بعنوان المسابقة الكبرى
كم عدد الوزراء في مصر؟
بس انتهى البوست
متهيألي حتى فرنسا هانم نفسها ما فكرتش تعدهم
واتكلمنا عن فرنسا ودمها الخفيف جدا ..وازاى قدرت تحقق نجاج في فتره صغيره
يعني قعدنا نقر عليها شويه
والست ام شريف خيخة هانم ..يا ساااااتر ايه ده
حاجه كده مصرية ع الاخر ..ماركة مسجله متميزه كشخصية طبعا
بتمثل امهات مصر ..وشابات مصر ..وعيال مصر.. وبلطجية مصر
حاجة كده زى كوكتيل غريب .وكل ما افتكر اللى عايزه تعمله في رانيا ابقى عايز ارجّع
ههههههههههه
واموله طبعا وخفة دمها الل بتفطسنا من الضحك
م الاخر احنا بتعجبنا المدونات اللى دمها خفيف
واتكلمنا عنكم كلكم
واقوله فينك فيه ناس زى مجداوية وصبرني يا رب جايين المدونة على حس موضوعاتك
ولغاية دلوقتي ما شوفش جديد منك
اه صحيح الواد المنحوس ده كل ما احطله عيني على مدونة تطلع مخطوبه
اصل انا كنت وعدته ادورله على زلطه ..قصدي عروسه لابن حجر
لانه وحده مش هيعرف يتصرف
سعادة البيه اللى قدامكم ده لما بيقف يتكلم مع بنت فجأة بيقلب ويبقى سيبويه ويقعد يتكلم باللغة العربية الفصحى
والنتيجة اول سؤال يتوجه له : أنت مصري
هههههههههههههه
عموما هو صرف نظر خلاص ..خسارة كنا عايزين نفرح فيه انما قرر يأجل الموضوع ده للخطة الخمسية الجاية
اتكلمنا عن لقاء المدونين اللى بيعمله احمد الصباغ ..ولقاءه بالفاتحين الجعفري واليعقوبي
كلام كتير واتكلمنا مؤخرا عن اضافة شريك ثالث في المدونة
زمان كنت عرضت على الاخت سلوى طوق الحرية انها تشارك معنا كعنصر نسائي في المدونة وهي للاسف رفضت لانها كانت لسه جديده في التدوين وحبت تحقق نجاحها بنفسها باستقلالية بعيد عن استغلال نجاح الاخرين ..ده كان ردها
واحنا احترمنا رغبتها في انها عايزه توجه اهتمامها لمدونتها ..ورجعت مؤاخرا عرضت عليها الفكره برضه لكن رفضت كمان مره لان دلوقتى اصبح عندها ثلاث مدونات وشريكة في مدونة رابعة مع ال جي
ونظرا لظروف انشغال ابن حجر ..وتوقفاتي المفاجأة لفترات طويله وعلشان المدونة ما تقفش
فكرنا في شريك ثالث وفضلنا انه يكون اخت من الاخوات حتى يمكنها طرح موضوعات هي هتفكر فيها احنا مش هنفكر فيها او نطرحها بنفس الاسلوب
واتفقنا انه من الافضل ان الشريك الثالث مايكونش عنده مدونة ففكرنا نعمل اعلان مطلوب مدونة للمشاركة معنا بشرط مايكونش عندها مدونة شخصية علشان اضمن انها بقلبها تكون في مدونة واحده ومش تقعد تفاضل لو عندها موضوع حلو تكتبه هنا ولا عندها في مدونتها
وأخيراااااااا ..وبمحض الصدفة
وجدت الطرف الشريك الثالث ..الفراشة ده اسمها
اتعرفت عليها في الشات اول مره ألتقيت بها كنا مختلفين في الرأي تماما وقعدنا نتناقش على العام وطبعا رأيها مكنش عاجب حد لانها بالفعل كانت داخله بنقد في الفكر الاسلامي
تاني مره كان تعارف بسيط ..ثالث مره طلبت منها تشاركنا في المدونة
ان شاء الله هتشارك معنا
وانا شخصيا بقولكم انتظروا كاتبة من العيار الثقيل جدا
ومبدئيا انا اخترتها وانا عارف اننا مختلفين في الاراء ..لذلك احب اقول ان رأيها هيعبر عن وجهة نظرها الشخصية
وانا اتوقع وجود حوار رائع بيننا ابن حجر والباحث والفراشة .حوار علمي وواعي يخاطب العقل وهيكون حوار قوى عموما ربنا يستر
وهتلاقونا بنختلف كتير والاستثناء اننا نتفق
انما هي شخصية مفكره على مستوى مثير للفكر ومحرك للمياه الراكده
وانا شخصيا افخر بمشاركتها معنا مهما اختلفنا في الاراء

38 comments:

امام الجيل said...

هلا

ربنا يخليكم لبعض
ويزود حبكما لبعض

بس غريبة انكم لسه متقابلين قريبا
كنت فاكر انكم اصدقاء منذ زمن

بس مستغرب حكاية الاخت المخالفة
مش عشان مخالفة
بس عشان كما قلت عندها نقد شديد للفكر الاسلامى

انكم تشركوها فى المدونة
هو طبعا لازم نقبل اى فكر
ونحاول نتعامل معاه
بس اللى يناقد الفكر الاسلامى ككل
افسحله مجال ومنبر للكتابة
والا هى مش كده اوى

فهمونى
ربنا يكرمكم

مجداوية said...

السلام عليكم

أخى الكريم اشكرك انك جبت سيرتى فى حديثكم الشيق جدا رغم انى متشرفتش بابن حجر وعمره ما جاء مدونتى !! فمعرفش هو يعرفنى منين الا منك بالطبع ,,وبرضه معلش مفهمتش انتو اتكلمتواعن اختلافى معاك فى البوست اللى فات ولا فى ايه ؟؟ بس لو بتزور مدونتى الأيام الأخيرة كنت عرفت انى كنت حاسيب التدوين خالص حصلى عطب والحمد لله مؤازرة أخوانى وأخواتى صلحت العطب لكن واخده هدنة من الكتابة لحين تجميع الشتات
بالنسبة للأخت الفراشة ربنا معاها ويعينها على الاختلاف مع محامى من اسيوط ومع حجر منياوى وهى كده بقت بين حجرين رحى وكله بالديمقراطية وديمقراطية الصعايدة زى ديموقراطية الحكومة بالضبط ههههههههههههه ربنا معاها وان كنت خايفة من الفكر المختلف ده لكن ننتظر ونشوف واللى تخاف منه ميجيش احسن منه

جولة جميلة واخوة اجمل أسأل الله أن يديمها عليكما

تحياتى وتقديرى

الباحث عن الحقيقة said...

امام الجيل
لا انا وابن حجر معرفة مدونات
انا في اسيوط وهو في القاهره
واتقابلنا بعد فترة طويله حوالى اربع شهور تقريبا من مشاركته في المدونة
وهو شخصية جميلة جدا لا تمل معه ابدا
يعنى الربع ساعة معاها سحبت الى اربع ساعات
بالنسبة للاخت الفراشة مش عارف ليه ما ظهرتش النهاردة
انما هي انسانه صاحبة فكر متميز
يعنى امبارح قعدنا نتكلم في الناسخ والمنسوخ في القرآن وهى من الذين ينكرون وقوع النسخ في القرآن وقعدنا اتناقشنا كتير في المسألة دي
كمان هي ترى ان الفقه الاسلامي يحتاج الى اعادة كتابه فمثلا كيف نقبل ان تكون اقصى مدة الحمل اربع سنوات مثلا او سنتين وترى ان اقسام الماء ليست طهور وطاهر ونجس فالماء عندها لا يوصف ابدا بالنجاسه وانما هي مع الذين يجعلون الماء قسمين اثن وغير اثن
اتمنى انها تتمكن من المشاركة ان شاء الله وتتعرفوا على فكرها منها شخصيا
شكرا لزيارتك

الباحث عن الحقيقة said...

مجداية
اه طبعا يا ست الكل جبنا سيرتك
وابن حجر هو اللى بدأ واتضايق اوى وقلى ازاى يا راجل تتعصب على مجداوية وقعد يدافع عنك ويلومني قلتله انا مش بركز قوى في المقدمات بمر عليها بنظرى مرور عابر من غير تدقيق علشان غالبا بتحوى مجاملات او استعراض عضلات انما البهاريز بتبقى جوه
هههههههه
قلتله فينك في ناس جت المدونة علشانك انت وعمرهم ما ألتقوا بيك زى مجداوية اول مره جت قعدت تمدح في موضوع الفرقة الاجية وكانت فاكره انى انا اللى كتبته
وكمان صبرني يا رب
جايين على حس تدوينات ابن حجر
المهم بقى
ايه حكاية العطب دي وتسيب التدين ازاى هى فوضى يا حاجه
اولا اشكر المدونين اللى خلوكى تغيرى رأيك
وانا هروح مدونتك دلوقتى اشوف ايه الحكاية بالظبط
اما الفراشه ..صدقينى دى لو كتبت ..انا وابن حجر هنحتاج لطوق انقاذ وإلا الفك المفترس هيبلعنا
اتمنى انها تتمكن من المشاركة قريبا ان شاء الله

nigro said...

بص بقى يا عمونا
من منطلق أن من أحب أحداً في الله فعليه إخباره... أو فيما معناه
الأخوة الأعزاء جداً/ الباحث عن الحقيقة و ابن حجر العسقلاني

إني أحبكما في الله

بجد يا باحث انت ما تعرفنيش ولا أنا أعرفك ولا ابن حجر
بس بجد يا جماعة أنا بحبكم قوي بجد
لو كان ليا أخوات كبار كنت هتمنى يكونوا زيكم كده
بس خلاص أنا بقى عندي أهوه.. ولا انت تمانع؟

ربنا يخليكم لبعض و يديم الحب و الود و التواصل بينكم

و في انتظار الوافدة الجديدة
يا أبو الأفكار الرائعة

أخوكم الصغير
محمد النجار

بت خيخة وأى كلام said...

عنصر نسائى فى المدونة
؟؟؟؟؟؟؟؟؟؟؟؟؟؟؟
ان ان ان ااااااااااااااااان
ودى عرفتوا تقنوعوها ازاى انها تشترك معاكم
وكمان رايها مخالف لرايكم
ماشاء الله
ده ايه الدمقراطية دى

احنا مستنين اهه الحوارات اللى هتحصل بينكم

تحياتى ليك يا باحث
وشكرا على وصفك ليا
ده اقل حاجة عندى
نيهاهاهاهاهاهاهاع
متواضعة جدااااااا
سلام
وسلملى على عسقول كتير

اختكم خيخة

فرنسا هانم said...

اخى العزيز احمد
شرف ما بعده شرف ان تكون فرنسا هانم طرف فى حوار الباحث والعسقلانى
لا
ده انا اعمل بارتى كبير على راى عبده الرايق
اخى احمد نحن فى انتظار الفراشه
وان كنا نشتاق فعلا الى ابن حجر العسقلانى
ونفتقد كثيرا جدا الباحث نظرا لغيابك المستمر
جزاكم الله خيرا
ونتمنى لكم التوفيق

د/اجدع بنوته said...

بتجيبوا ف سيرة الناس لييه

ايه ده ايه ده

ويحك يافتىىىى

سأنسخن هذا البوست

13 ورقه

استعدادا لارسالها الى القوات المعاديه

ممثله ف زوجات المستقبل

واطفال المستقبل

واحفاد المستقبل

وانا وراكم ف المستقبل

ميتنجاتكم زى الفل

ربنا يديم المعروف وتفضلوا ع طول كده

متفلسفين سوااا

وعؤبال كده منحضر فرحكم ف ليله واحده
واشد عيالكم م لسانهم بايدىىىى

ال عنصر نسائى ال

والله لأنسخنه

نسخا شديدا

الباحث عن الحقيقة said...

محمد النجار
يا راجل ده انت محلاوي
يعني حبيب مصر كلها
احبك الله الذي احببتنا فيه
وربنا يديم الود والمعروف وربنا يخليك
انت بتحرجنا بذوقك وده واخلاقك العاليه
وبعدين ليه اخوات كبار دي
احنا ناخدها بالترتيب
ابن حجر اكبر مني بشهرين
بلاش فضايح ومشيها اصدقاء
ربنا يخليك

الباحث عن الحقيقة said...

خيخه واى كلام
ازيك يا وليه يام شريف
هههههههههه
ربنا يخليكي يا رب والله احنا بجدعنتك دي حاسين ان لنا ضهر
لا ومش اي ضهر
ضهر مفتري
ههههه
ربنا يخليكي لينا وتفضلي على طول صديقة البرنامج
تحبي بقى في الخوتام تسمعي ايه؟
قصدي تشربي ايه

الباحث عن الحقيقة said...

فرنسا هانم
ايه يا فرنسا ده تعليق ولا بيان عسكري
ايه مالك فين خفة دمك
وقعت منك وانتى جايه بالعجله
ان شاء الله عسقول راجع بموضوع قريب
بس اصلهم بيعزلوا من الشقة لشقة تانية
وسلملي على القانون الجديد
ان شاء الله ربنا يستر

الباحث عن الحقيقة said...

د/ اجدع بنوته
ايه المظاهره دي
وقوات معادية كمان
طيب لما نشوف مين في المستقبل هيغلب مين
وابعد عن العيال ..عارفه ما تشدي عيل من لسانه ..انتي حره
فكرتني بابن حجر لما كنت بقوله افرح بيك واشيل بنتك دبشه على ايدي
بس انا زعلان من حكاية فرحكم في يوم واحد
اصل هو مستعجل بيفكر خلال الخطة الخمسية الجاية
انا بقى في الخطه الخمسينية الجاية
ركزى شويه هم خطتين شبه بعض بس فيه فرق اللى هيركز هيشوفه
ايوه انا عندى ياء ونون زيادة

د/اجدع بنوته said...

لا يااخى تفائلوااا خيرا ان شاء الله

تجوزوا قبل الخقبه الجايه

باذن الله

بس قول ياباسط انت

هتلاقى الدنيا هاصت

واحب اقولك انى نسختهن البوست اهو

وحضرته علشان لو مخلتنيش اسحب العيال م لسانهم

هشهدهم ع هذا البوست

وع زياارات ابوهم المتعدده والمتواليه لحى الحسين

وكمان بياكل فطيرررررر

شولت يداااااااااى

عاشقه الفردوس said...

ايه التدوينه الغريبه دي

ربنا يرحمنا
:)))))))))))


لقاء هايل وربنا يخليكم لبعض
ومبروك للشريكه التالته وانا لقيتها نزلت التدوينه دلوقتي هروح اشوفها بقي

سلام

nonoymm said...

جيت اكتب كلام لقيت عاشقة الفردوس كاتبة اللي عاوزةاقوله

ربنا يخليكوا يارب
ومبرووووووووووووووك
تحياتي

الباحث عن الحقيقة said...

اجدع بنوته
هو حي الحسين متراقب ولا ايه


..........
عاشقة الفردوس
ايه بس اللى غريب
خيييير
معلش هو تدوينه محجرة شويه
تعرفي انى عرفت ان الفراشة نزلت بوست من تعليقك
احنا يلزمنا مؤتمر فصائل زي بتوع غزة علشان نتفق على خارطة المدونة


..............
نونويم
انتي قريتي الاول اللى عاشقة كتبته
ولا ده تخمين
هههههههه

شكرا على زيارتكن

Salwa said...

ربنا يديم الود والصداقه بينكم
إن شاء الله

وطبعا كان شرف لي إنكم
نعرضوا عليا مشاركتكم المدونه
ولكن لنفس الأسباب التي ذكرتها كان سبب إعتذاري
ربما لو لم يكن عندي مدونه كان اختلف الأمر

المهم

مبروك لأنضمام الفراشه
وإن شاء الله تكون أفضل منى
وتكملوا مسيرة الكاشفه
تحياتي لثلاثتكم

دمتم بكل خير
وربنا يوفقكم

Jana said...

مبروك يا جماعة انضمام الفراشة
والتهنئة دى لينا احنا طبعا ..لأن اى عنصر نسائى يضاف للتدوين يبقى مكسب
:)
لقيتكوا جايبين فى سيرة اتنين صحابى وحبايبى ..ماقدرش ماعلقش عليهم
امولة ...اغلى من عرفتهم فى عالم التدوين
ال جى ... مدونة جبارة عقلها وقلبها كبار ..
والاتنين لازم تقول الله فى سرك بعد ما تقرالهم
وبصراحة ..كل من ذكرت لهم كل تقدير واحترام ..وربنا يخليلنا باشمهندس عصفور المدينة .أشعر احيانا انه ابانا الروحى

واخيرا ربنا يديم عليكم الاخوة والمحبة فى الله
الصعايدة اجدع ناس يابن حجر ..اصلى لى عرق برده
يا باحث ربنا يكرمك انا اسمى جنى ..مش جنة ..التانية كبيرة اوى عليا ..اتارى الكافيه اوليه بتاعى مبيوصلنيش
:)
ربنا يرزقنا جميعا بالجنة
جزاكم الله خيرا
وجعله فى ميزان حسانتكم

الافغاني said...

ايه ياعم البوست الطويل ده

بس بجد لذيذ


يسعدني زيارتكم لمدونتي المتواضعة

الافغاني

الباحث عن الحقيقة said...

سلوى
منورة الاستراحة يا فندم وكان نفسنا تنوريها اكتر من زمان وتكوني صاحبة مكان
انما انتي يظهر فلوسك كتيره ومش بتحبي تشربي ببلاش
اشكرك يا سلوى واتمنالك التوفيق في مدوناتك الاربعة
المسألة مش لو كان معندكيش مدونة
انتي اللى ترددتي وقتها وحبيتي تنجحي لوحدك في مدونتك الاول وده كان من حقك
ولما عرضت عليكى الامر تاني كان للاسف اصبح عندك اربع مدونات وبقيتي مشغوله
وللاسف فاتنا مكسب كبير مع قلم بنحترمه كلنا

الباحث عن الحقيقة said...

جنى
كده يعني
مبسوطه كده
بس مش ذنبي يعني علشان اخد زيرو في الترجمه ..انتي اللى اسمك مش واضح مش كنتى تحطي ياء لينه علشان اعرف
منوره الاستراحة يا فندم
خلاص هنصلح اسمك في كشف الطلبات
نزل يبني هنا عرقسوس
ولا اقول نزل السوس وهى تعصره لما تطلع عرقه براحتها
انا من المعجبين جدا بتدوينات ال جي
ومن المعجبين بخفة دم ال جي في تعليقاتها
بس للاسف مش متابع قوي لمدوناتها
سبت الاخ مهند يتابع بدل مني
ههههه
هي هتفهم
ههههه
شكرا
اخبار السوس ايه

الباحث عن الحقيقة said...

الافغاني
ايه يا عم
انت جاي تقر علينا
طويل , قصير ..عادي انا بكتب في ملك الحكومة
ايه مزعلك انت
ههههه
منورنا بزيارتك ال.. انت تبع الضرايب
ويسعدنا اننا نزور مدونتك

بنوته مصرية said...

ربناي خليكم لبعض ودائما صدقاء

محمد انسان محترم واخلاق ربنا يحمية وربنا يدوم المحبة بينكم

ومنتظرين الصديقة الثالثه


لك كل التحية

رودي

رئـــــيسـة حزب الأحلام said...

السلام عليكم ربنا يخليكم لبعض

دكتور بهــدوء said...

يا رب تفضلوا اصحاب ع طوووول
هيه دي صحوه المجتمع التدويني
لازم نعرف بعض ونقابل بعض ولا ايه ياولاد
اومّال هنفضل مستخبيين كده ورا شاشاتنا
عؤبالي اما اقابلك انا كمان
ياااااااااااااارب

الربان said...

تحياتي

ما أجمل ان نجتمع علي حب الله و في الله.

أخي الكريم...الاختلاف في الرأي يصحح الرؤية...و يثري النقاش...و لابد ان
نحترم وجهة النظر الاخري...خطأ كانت ام صحيحة.

فمرحبا بك وبابن حجر و بالاخت الفراشة
نريد ان نستمتع بحوارات فعالة تزيد من معلوماتنا...و تحمسنا.

تحياتي و تقديري

الباحث عن الحقيقة said...

بنوته مصرية
ربنا يخليلك كل اللى بتحبيه
محمد انسان محترم
وانا اللى صايع مثلا
هههههههه
ده هزار طبعا

الباحث عن الحقيقة said...

رئيسة حزب الاحلام
انا بفكر في مشروع الاستكية ده
انتي ايه رأيك
انا شفت ردك عند عاشقة الفردوس

الباحث عن الحقيقة said...

دكتور بهدوء
انت جاي تقر ولا حاجه
بالتأكيد هنكون سعداء لما نلتقي بيك
ان شاء الله في اقرب مؤتمر للمدونين في القاهره او حتى تجمع اجى وألتقي بيكم

الباحث عن الحقيقة said...

الربان
اتمنى تشارك معنا في حوارتنا على الصحيفة
ومنتظرين ردودك على مدونة الصحيفة الكاشفة
فينك يا عم ؟؟؟؟؟

shaimaa samir said...

بداية سعيدة انى دخلت المدونةولقيت موضوع جديد
كنت ياست خلاااااااص
المهم
بلغ كامل احترامى لصديقك الاخ ابن حجر
انه بيحب الحسين
كده هو فناااااان
واكيد حضرتك
احم
المهم
ربنا يعينكم فى تقديم كل جديد
ودائما متسعين صدوركم لتقبل الراى الاخر
اعزكم الله

الباحث عن الحقيقة said...

شيماء سمير
احنا برضه ما يهونش علينا تيأسي
ولو جيتي بكره هتلاقي موضوع جديد
الواد ابن حجور كاتبه في الديفورت بس منتظر هو اللى ينزله
احم
سلامتك

الساحرة said...

عقبال اللقاء المليون

بس لما ابو العساقيل لقاك سايح

سابك تسيح ملوش حق
ههههههههههههههه

وعامل نفسك خطبه كمان

امشي في ...........ولا تمشي في جوازة ههههه

الباحث عن الحقيقة said...

الساحره
وراه وراه لغاية ما اجوزه ان شاء الله اسرح بيه على الجوامع
بس هو يبطل نشوفيه دماغ الواد اتعقد

التمنياوي طه said...

يا ابو البواحث انا اللي سعيد جدا اني اتعرف بواحد زي سيادتك و مستنينك تيجي تاني

الباحث عن الحقيقة said...

ايه يا تمنياوي
انت كنت نايم وصحيت
متنساش تسلملي على صلاح

L.G. said...

حجر وباحث وحاجات غريبة
أكيد بترتبوا في لقاءات التنظيم الحجري رايحة جري أبلغ
وبعدين أول ناس تنموا عليها احنا كمان نمينا عليكم علطول أول ما اتقابلت مع سلوى ورحيل ومنى ونحوى قطعنا فروتكم
وبعدين هو مدونتي محكمة بتبعتوا محامي تاني يأجل القضية طيب ايه رأيك مهند ماجاش وحنزل حكم بأقصى العقوبة وحشمع القهوة دي
أنا معترضة بأه
وبعدين ازاي متقراش مدونتي
دي علم ونور وفرح وسرور
يا لا ماعلينا الزباين كتير

المفروض نعمل لقاء في اسكندرية والقاهرة ونلم الناس كلها بجد ايه رأيكم

الباحث عن الحقيقة said...

انا شخصيا اتمنى انى ألتقي بكل الاخوه المدونين ..وخصوصا الاخوات المدونات
هههههه
يسعدنا يا فندم بس هي فين الفرصة