Wednesday, May 7, 2008

خربوها ولاد القطقوطة .. لا طرحت بامية و لا قوطة

تحديث

أنا أعتذر بشدة على تأخرى فى الرد علي تعليقاتكم لكن و الله كنت مشغول بعنف

و أشكر بشدة أخى الكريم الباحث عن الحقيقة عشان هو اللى نشر القصيدة و كمان رد على تعليقات ناس كتير .. هو دة الكرم الصعيدى بصحيح

و بجد أشكركم جميعا


الباحث عن الحقيقة
د أجدع بنوتة
l.g.
مفقوعة مرارتى من حماتى
حزلووووقة
سفروتة
التمنياوى طه
الساحرة
مجداوية
محمود الدوح
Jana
فرنسا هانم
monaliza
ميادة رفعت
nonoymm
رئيسة حزب الأحلام
بنوتة مصرية
همس الأحباب
نهر الحب
Appy
أهو دة عيبه
FaceMoon
somaa mahaba
رئيس جمهورية نفسه

ملحوظة للباحث: انت مش ناوى ترفع الأسعار و لا إيه ؟؟ الحاجات كلها غليت بعد رفع أسعار الوقود .. ابقى ارفع الأسعار اتنين مليم لكل القايمة
------------------------------

الأولة آه
والتانية آه
و التالتة مفيش


معنديش


معنديش نفس أقول آه


قالوا إقلعوا .. وقلعنا

ومفيش بتاعكوا وبتاعنا
وصار متاعهم متاعنا
وألف مرة اتلسعنا
وبرضك مفيش



الأولة آه
والتانية آه
و التالتة مفيش


قالوا ابصموا .. بصمنا
ده بكرة سكر وسمنا
اتقسمنا
على أد ما فينا من جراح .. ابتسمنا


الأولة
والتانية
و التالتة مفيش


الدنيا هاصت وهيصنا
ريحنا لما تيسنا
تاه الطريق من اتوبيسنا
يئسنا
لا عرفنا ليه قلعنا
ولا عرفنا ليه لبسنا


الأولة
والتانية
و التالتة مفيش


واهي ماشيه تجري المسائل
ولا حد سائل
يصحى مرسي
ينام وائل
ده أنا كنت واد من الأوائل
وكنت شاطر شطارة
وكنت فن و عمارة
وكنت صاحب تجارة
معرفش إيه اللي صابني
في قلبي ضاعت سمارة


خربوها


خربوها ولاد القطقوطة
لا طرحت بامية ولا قوطة
وسابوها في سرير مربوطة
ويا ريتهم طلعم رجالة
ويا ريتها رايقة و مبسوطة


خربوها


دول سرقوا الهوى و الضي
و يا عيني عليها بلد
ويا ريتها ما قالت أي
ويا ريتها ما جابت ولد


خربوها

--------


كلمات الشاعر الرائع
علي سلامة

--------------

ملحوظة:هى قصيدة بالعامية .. لكن فى منتهى البلاغة و أفضل من مليون خطبة دينية تحض على الاستسلام و الخنوع و الخضوع

ملحوظة تانية: أشكر التمنياوى طه لأنه فكرنى بالقصيدة و كمان هو اللى جابهالى

ملحوظة تالتة: القصيدة دى لو سمعتوها من على سلامة نفسه و هو بيلقيها .......... خطيييييييييييييييييرة

37 comments:

الباحث عن الحقيقة said...

طرحت كوسة يا فالح
هههههههه
كنت قاعد اكتب موضوع وبعدين الجهاز هنج عملت ريستارت
رجعت اكمل الموضوع بتاعي لقيت الواد المحجر كان مصدر دماغه فيها
وبيكتب موضوع في نفس الوقت
عجبتني اوى القصيدة وقعدت اضحك
فرحت منزلها من غير ما اعرف رأيه
وقلت ادبسه
خاصة ان فيها شوية ألفاظ متنقيين زي البامية
ههههههه

د/اجدع بنوته said...

هههههههههههههههههههه

ههههههههههههههههههههه

جامده جدا ع فكره

بس تعرفوا والله

اخيرا بدات ابص للجانب المليان م الكوبايه السودا اللى كلنا واقعين فيها

الا وهو كلما احتدت الازمه
وتوعكت الظروف

كلما زاد الابداع

وظهرت الملكات الشعريه والادبيه والنقديه والكاركاتريه

وانبعجت المواهب التربتتتيه

فاصبح الضغط يولد الابداع

عرفتوا ليه بقى بيوعكولنا الظروف

علشان نبدععععع يابشررر

L.G. said...

هو الواد الصغير اللي على جنب ده كان بيدخن من أول ما فتحتو المحل ؟؟

على سلامة كتاباته جميلة في المصري اليوم أنا حاسة ان الناس شوية وحتمشي تشد في شعرها وشركات الشامبو حتقفل والحلاقين والكوافير لأن الناس حتبقى ... ودمتم

مفقوعة مرارتي من حماتــــــــــــي said...

القصيدة دي حلوة أوي وجاية علي الجرح

حزلووووقه said...

باميه

فكرتني بالباميه

ليه كده

علي فكره يابن حجر انت سقط في التخمين

وسيبك من ولاد القطقوطه

وقولي صحيح يه اللي حصل في الاضراب اللي فات

ولاحس ولاخبر عنه ليه

سفروتة said...

هما خربوها بس

دول عدموها العافية

واحنا بناخد علي قفانا لما قفانا خلاص ورم


جميلة جداااااااااا القصيدة دي وكلامها جاي ع الجرح

تسلم يا علي يا سلامة

التمنياوي طه said...

يا حاج عسقل ايه الحلاوة دي
و كمان عاملي شكر عندك
كدة كتير يا كبير

الساحرة said...

انت اللي غلطان مش اي حد يقولك حاجه توافقه بتسمع كلامهم ليه تستاهل هههههههههه


حلوة القصيدة ومعبرةعن الايام المهببه اللي عايشنها

الباحث عن الحقيقة said...

د/ اجدع بنوته
توعكت
انبعجت
مواهب تربتتيه
بيوعكولنا الظروف
يخرب بيت التعليم الحكومي
انتى متأكده انك كلية طب
امال لو اداب كنتى عملتي ايه
..........

ال . جي
الواد الصغير موجود من زمان
بس اول مره اشوف الصورة بتتحرك امبارح
وعموما قرار الشامبوهات وقفل محلات الحلاقة مش هيفرق مع ابن حجر
وانا كلها كام سنه ومش هيفرق معايا
على فكرة مدونتك هايله

..............

مفقوع مرارتها من حماتها
اي جرح بالظبط
دي مش عن الحماوات
دي بمناسبة تحرير الجزائر

الباحث عن الحقيقة said...

حزلوقه
هو بس سقط في التخمين
ده ساقط قديم في الطبيخ وبدأت رحلة السقوط بمشروع البيض بتاع ام خالد
مش كان اسمها ام خالد برضه يابن حجر
على فكره دي مدونتى انا وزميلي ابن حجر علشان ابقى تركزي مين صاحب الموضوع

**************

سفروته
حزلوقه ..وسفروته
هو ايه اللى حصل في التدوين
اهو ابو بلاش يعمل في الناس كده
ههههههه
منوره يا سفروته اسمك بيفكرني بواحد صاحبي في الجيش
خاصة لما قلتي بناخد على قفانا
نجيب عصير قصب ولا عناب ساقع

*************

التمنياوي
خدت بالك يا تمنياوي من صورة العيل اللى بيدخن على جنب فوق ده
يا ريت تقولي رأيك

الباحث عن الحقيقة said...

الساحره
ايه يا ساحرة انتى كده هتلخبطيني في العدد
انتى رديتي امتى
ع الموم استني لما تكملوا تلاته ابقى ارد عليكم
انتى عليكى تلاته مليم من المره اللى فاتت شربتي ايسون وما دفعتيش الحساب قلت معلش جاي عندها مغص ونسيت
نيهاهاهاها ضحكة شريرة اتعلمتها من ابن حجر

التمنياوي طه said...

الصورة جامدة يا برنس
بس لو كنت ماسك اللي بتاع الشيشة بدل السيجارة كانت هتبقى احلى خصوصا ان اسجاير غليت يا معلم
و سلملي على صلاح
و نزللي حجر تفاح هنا يا معلم ابن حجر

الباحث عن الحقيقة said...

نزله هو حجر
ونزلى انا التفاح
والمعسل سعره مش بيغلي ليه هو مش من عائلة دخانكو
آه يا برنس طول عمركم بتاكلوها والعة
قصدي بتشربوها والعة
هلسملك على صلاح
بس متنساش انت تحول على اتصالات

مجداوية said...

السلام عليكم

الكلمات جميلة ودمها خفيف جدا بس حسيت انى باسمع واحدة معددتية

وملحوظة صغنونة وسؤال فتفوته لأخينا الباحث هو ليه بيرد عن الفراشة وابن حجر
ولا ده اتفاق بينكم فيفتى فيفتى هم يكتبوا وانت تعلق ؟؟


وخربوها ولاد القطقوطة
وطرحت بدل القوطة بتنجان
والناس ماشية رابطة دماغها بالفوطة
ورايحه رايحه على المرستان
وعجبى

حزلووووقه said...

ايه ابو بلاش ده ياباحث


قصدك التدوين جاب ناس انتو مش عايزينهم

ههههههههههههههههههههههههههههههه

طيب احنا علي قلبكوبقو

ومش هتعرفوا تفلفصوا من حزلووووقه ولا سفروته



ابن حجر قولي تعليقك انا مستنيه مش لازم استني لاخر القصه علشان تقولي رايك في اسلوبي

لو فيه اي حاجه ناقصه او مش متظبطه عندي هيبقي كويس اني اعرفها دلوقتي بدل بعد ماتخلص



مستنيه تعليقك

الباحث عن الحقيقة said...

مجداوية
ابدا يا ستي مش اتفاق
الباشا مشغول جدا وكتر خيره بصراحة على مشاركاته معنا
وانا برد على الناس من باب الذوق
وكمان حفاظا على زباين الاستراحة
اما الاخت الفراشة فهي معندهاش لسه خبرة المدونات وكمان هي مشغوله جدا وللاسف هي بلغتني قرار نهائي بالانسحاب من المدونة بسبب انشغالها

بس والله عجبتني اوى المقطوعة القطقوطة اللى قطقطيها في اخر التعليق
ايون كده يا مجداوية طلعى المواهب المستخبية
قال وبتقول على القصيدة معددتيه
ههههههههههه

**************

حزلوقه
مش قصدي اسلوبكم طبعا ولا شخصياتكم او الفكر اللى بتقدموه
انا قصدي غرابة اساميكم اللى اخترتوها حزلوقة وسفروته
انما احنا سعداء طبعا بتواجدكم في عالم التدوين لاننا بنستمتع بكتاباتكم
بس انا رديت على قصتك الجزء التاني
وعايزك تاخدي بالك بس اننا اتنين في المدونة دي
وخاصة انى انا المعلم وابن حجر هو المعسل ..قصدي هو العضو المنتدب
ههههههه

محمود الدوح said...

على سلامة
الاستاذ بجدارة

متنساش تسلملى على التمنياوى

Jana said...

انا برده مصدقتش ..وقلت ايه اللى حيجيب الطماطم والبامية فى الاستراحة
طب ممكن نشرب عصير طماطم
لكن تفتكر حتوصل بينا الامور لشرب عصيرالبامية!!!!!؟؟
طب متوفر ال 80 ولا برده من 90 وطالع ؟؟
الترجمة
طماطم بالاسكندرانى = قوطة بالقاهرى

خدمة يا ريت يا عسقول ..عشان مش متابعة من زمان
لينك او اى حاجة حضرتك ..عشان اوصل للاخ على سلامة

يا باحث ربنا يسعد ايامك وينورلك طريقك قادر يا كريم..ما تجيبلى سيرة العرقسوس تانى ..ريحته بس قاتلة
حضرتك مابشربش غير كافيه او ليه..ومن ساعة جيت هنا ..ذلتونى عليه وعلى الفاضى..

فرنسا هانم said...

طبعا سيادتك انت والباحث هيصيين هنا وانا عندى حوارات غريبه فى المدونه وانتوا عاملين نفسكوا مش من هنا

عموما
القصيده فى منتهى الجمال
وحلو اختيارك يا عسقلانى

حزلووووقه said...

عارفه ياباحث

عارف ليه


المفاجاه الكبري

ان ان اااااااااااان


انتز اسيكرت


انا اصلا معاكو في التدوين من فتره بس داخله متخفيه في اسم جديد

:)))))))))))))))))))))


سلامي



حزلووووقه

monaliza said...

احييك على امانة النشر وعلى اختيار القصيدة

مياده رفعـــــــــــــــــت.. said...

على فكره القصيده فعلاً احساسها عالى..حتى لو مش مسموعه..

لا بجد روعه وفيها معانى كتيييييييير تمسنا وتمس العالم كله..

تقبل تحيــــــــــــــاتى ومرورى..

nonoymm said...

قصيدة معبرررررررررررة
وتحية لحسن الاختيار المناااااسب
بس خطب دينية تحض على الخضوع والاستسلام والخنوع؟؟؟؟؟؟؟!!!!!!!!
تحياتي

رئـــــيسـة حزب الأحلام said...

كلمات جميلة اوى وجاية على الجرح اختيار رائع وانا بقراها افتكرت اعطاء الغاز لاسرائيل وتحياتى لك

بنوته مصرية said...

ههههههههههههههههههههههههه

تحفة بجد

اختيار جميل يا عسقول منور يا باشا متبقاش تغيب علينا كدا

ومبسوطه اني شوفتك يوم الخميس بس صحيح فين محمد مجاش معاك ليه (^_^)

همس الاحباب said...

طرحت كوسة وبامية وقلقاس
اختيار موفق وكلمات وافية جدا
تحياتى وتقديرى لاختيارك
خالد

نهر الحب said...

قصيدة حلوة بجد
شكرا لك على اختيارك اللى امتعناا

appy said...

هههههههههه باميا دى ملوخيه وكوسه خالص
بس تصدق والله حلو بس ليه تظلموا القطقوطه بس مش عيب عليكوا يا رداله دى القطاقيط حلوة خالص

FaceMoon said...

فعلا حلوة
رائعة
بتعبر عن كل حاجة بكلمات بسيطة
وبجد ميرسى انك خلتنى اقراها
تحياتى

اهو ده عيبه said...

حلوة قوى قوى بجد
بس ولا قطقوطه ايه دول ولاد حاجه تانية خالص

هى عموما متظبطه انها متطرحش غير قرع
واحيانا بانجو علشان الشعب ينسى ويعيش
تحياتى ليك

somaa mahaba said...

هههههههههه عسقلانى جامده جدااا
فعلا فى خناقات عند خالتو فرنسا شديده تعالى وشمر كمك
انا شغاله من امبارح لما دماغى ورمت
تحياتى ليك سومه_87

somaa mahaba said...

انا مش فاهمه حاجه هو باحث والكاشف شخص واحد ازاى...
دا انا طلعت ترللى خالص
سومه_87

رئيس جمهوريه نفسى said...

اوجز فا انجز وقال كل شى بصراحه واختيار رائع بجد

ابن حـجـر الـعـسـقـلانـى said...


الباحث عن الحقيقة
د أجدع بنوتة
l.g.
مفقوعة مرارتى من حماتى
حزلووووقة
سفروتة
التمنياوى طه
الساحرة
مجداوية
محمود الدوح
Jana
فرنسا هانم
monaliza
ميادة رفعت
nonoymm
رئيسة حزب الأحلام
بنوتة مصرية
همس الأحباب
نهر الحب
Appy
أهو دة عيبه
FaceMoon
somaa mahaba
رئيس جمهورية نفسه


أنا أشكركم جدا على تعليقاتكم و مشاركاتكم و أعتذر بشدة على تأخرى فى متابعتكم لكن و الله العظيم كنت مشغول جدا و كمان النت كان فاصل من البيت عندى بقاله حوالى أربعة أيام

بجد أنا ممتن ليكم جدا و مش عارف أقول لكم إيه .. بس أرجوكم أعذرونى لأنى كنت مشغول جدا

و أشكر الباحث عن الحقيقة بشكل خاص لأنه هو اللى نشر القصيدة و كمان رد على تعليقاتكم بس و الله ماكنتش عارف أعمل حاجة .. كان نفسى أشارككم بس الباحث قام بالواجب

شكرا يا جماعة و أعتذر مرة أخرى على تأخرى

البنت الشلبية said...

ههههههههه صح طرحت كوسة هعهعهع
بوست جامد ضحكنى والله

ابن حجر العسقلانى ...الباحث عن الحقيقة
وحشتنى مدوناتكم واسفة عن تأخيرى فى متابعتها
اتمنى انكم تكونو بافضل حال

Jana said...

طب خلاص خلاص سامحناك
ولا أقولك أستغل فرصة الاحراج دى وأقولك لا ممكن نسامحك الا لو رديت على التاج بتاعى ...انت والباحث
وده مش ينفع تخمسوا فيه زى الشاى اللى بنشربه عندكم
ده كل واحد فيكم يجاوبه لوحده من غير ما يبص فى ورقة اخوه
ونشوف مين حيطلع الاول ومين حيطلع الاخير :D

يا ريت تيجوا تاخدوه بقى قبل ما النت يقطع تانى

حمدلله على السلامة

الساحرة said...

ابوالعساقيل كل شويه النت قاطع عندك

ادفع الاشتراك وهو ميتقعطش

وبعدين انتو غليتو المشاريب

انا هبقي اجي ومعايه النسكافيه بتاعتي

قاطعوة معي كافيه الاستراحه ههههههههه