Sunday, June 15, 2008

الزوج المصري ابو عين فارغة


الصورة من مدونة خيخة واي كلام

فاكرين الاعلان بتاع


طلب رز ..عملت له رز

طلب مكرونه ..برضه عملت له مكرونة


وبصلي من فوق لتحت ..وسابلي البيت


مع انها كانت حلوة ..وكانت لابسه احمر


ولا يكونش هو زملكاوي


سوري يابن حجر معلش بنسى انك زملكاوي


كنت مره قاعد بندرش انا وخالي اللي عاش فترة بالكويت وشاف جنسيات كتير


بيقول ان افضل زوجة عربية هي الزوجة السورية


تدخل البيت تحس ان انت قاعد مع راجل وتلاقيها هي اللى بتقوم بواجب الضيافه وتعزم عليك ومثقفه جدا ومدبرة واقتصادية ومحافظة على قوامها ورشاقتها

وقعد يوصف كتير وانا جاء في ذهني مسلسل يوميات هناء وجميل وبقيت عايز اقوله وكمان دمهم خفيف


واتضح ان الست المصرية دي ولا تساوي حاجه ..وانها عالة على زوجها وكتر خيرنا اننا متحملينها

وانها فعلا لا تستحق غير اننا نبصلها من فوق لتحت ونقولها هي اللى تسيب البيت وتمشي


نيهاهاهاها (ضحكة عسقلانية) هاها


وآن الاوان كي يظهر الحق

الزوجة المصرية مظلومه معانا جدا جدا وهقولكم ليه


الزوجة المصرية ام لخمسة او سبعة اطفال


الزوجة المصرية بتشتغل علشان تساعد زوجها في مصروف البيت


الزوجة المصرية هي اللى بتقدر تخلى مرتب جوزها على مرتبها يقضيهم طول الشهر


الزوجة المصرية بتقف في طابور العيش وما ادراك ما طابور العيش


الزوجة المصرية هي المسئولة بمفردها عن مرحلة تجهيز الطعام ووضعة على السفرة ومرحلة ما بعد الطعام


لان الزوج الصبح فطر وعايز يلحق شغله وهي مش مهم تتأخر ..وبعد الغداء عايز يستريح من تعب الشغل ولو سمع صوت عيل من عيال الجيران يزعق عليها وهي في المطبخ
هو: سكتى عيالك مش عارف انام
هي : ده مش عندنا ياهبل (بس اهبل دي غالبا في سرها ) ده عند الجيران

برضه هو تلاقيه مصمم ويقولها طيب سكتي العيال مش عايز دوشة


وتبقى واقفه في المطبخ وبتربي العيال بصوتها في الصالة

وبعدين تقعد تذاكرلهم علشان توفر تمن الدروس الخصوصية اللى حضرته بيطفح بيها سجاير


وبعد العشاء ياما هيتعشى ويخرج يأما جاي من بره عايز يتعشى ويتخمد

وهي تنيم العيال اللى عندهم مدرسة الصبح واللى معندوش مدرسة يقعد طول الليل لاهو نايم ولاهو صاحي علشان يفضل مطير النوم من

عين اللى جابوها


وبعد ده كله تلاقي ان

الزوجه المصرية هي اكثر الزوجات العربيات تعرضا للضرب من ازواجهم


خالي اللى قاعد يمدح في الزوجة السورية مخلف سبعة عيال ومراته طول اليوم زي النحلة في البيت ورغم انها مش بتشتغل لكن برضه مش بتلاقي وقت علشان تعمل اي حاجه في اي حاجه

ولانه محامي برضه فتلاقيها لازم تكون حافظة جميع العملاء وقضاياهم علشان تعرف مين لما يتصل بيه تقولهم مش موجود ومين ترد عليهم وتقولهم موجود


واغلب الزوجات المصريات يعملن ويكافحن في صمت رغم حتى عدم سماعهم لكلمة حلوة لكنها بتضحي دايما علشان خاطر ابنائها


متهيألى عمرنا ما شوفنا واحده تطلب الخلع من زوجها بعد ستة وعشرين سنة زواج لانها مش مرتاحة مع زوجها

ولما نسألها ليه فضلتي ساكته العمر ده كله تقول علشان خاطر اولادي وهم خلاص كبروا واتجوزوا


النموذج ده لا يوجد غير في مصر تقريبا ..وفيه اللى بتفضل مستحمله ومش بتطلب خلع ولا طلاق


يعنى الزوجة المصرية بتقيد لزوجها صوابعها العشرة شمع وبرضه مش بيعجب حضرتنا



طبعا البنات هيفرحوا اوي بالبوست ده


بس استنوا ما تفرحوش اوي

يا شباب اعزيكم في وفاة الزوجة المصرية اللى هي النموذج اللى كنت بتكلم عليه

ومن هنا ورايح هيطلع عين اهلك وانت اللى هتقوم بشغل البيت وتذاكر للعيال والمدام هتلاقيها بتحشش ولا بتشرب شيشه في قهوة زبيدة وتضطر تبطل سجاير علشان حضرتها تشرب ببسي دايت ..زي واحد صاحبنا

هابي بيرث داي تمنياوي طه

تمنياوي ده واحد صاحبنا عيد ميلاده كان امبارح

بس ما تقلقوش ..افسحوا الطريق الزوجة المغربية قادمة وبقوة وهتقعد بنات مصر في البيوت

واحد صاحبي دكتور اتجوز مغربية اتعرف عليها من النت شهر وكانوا متجوزين

من ساعتها وهو ماشي في الشارع شايل قفص عصافير

نيهاها ها (قلنا دي ضحكة عسقلانية ) هاهاها


51 comments:

nigro said...

إيه يا أبو حميد
انت مال مواضيعك كده ليه اليومين دول كارفة على " الأسرة و المجتمع " .. " بين الناس " .. " لك يا سيدتي " ؟

بمناسبة الزوجة المصرية المكافحة المضحية اللي طالع عينيها و عين اللي جابوها
خد عندك الحدوتة دي
بنت عمرها 17 سنة اهلها جوّزوها لواحد عمره 35 سنة
طلب منها انها تبيع دهبها اللي أهلها اصلاً هما اللي جابوهلها شبكة علشان كان مزنوق شويتين غير انه في يوم شرّبها حاجة أصفره و أخدها على مشتفي و باع كليتها لواحد كان متفق معاه وقبض التمن بدون علمها
عارف بعد ما اكتشفت كده عملت إيه؟
خلعته
ما اخدتش منه حاجة
خلعته
حقيقي و نعم الزوجة المصرية
شوفت انت تضحية أكبر من كده

يلا سلام

الباحث عن الحقيقة said...

لا ابوس ايدك
لو هتقول تعليقات تقطع القلب كده صدقني
انا مستحملش بجد
اللى انت بتحكية ده شئ فظيع بجد
حقيقي يا نيجرو مش عارف اعلق بايه
بس انت فكرتني بحلقه جت قريب في القصة وما فيها مع رولا خرسا
عن الشخص اللى دبح خطيبته وامها علشان يسرقهم
ايه يا عم
احنا هنقلبها نكد ولا ايه
ياريت يا جماعة بلاش الحاجت اللى تأثر جامد دي بجد بتعب

عاشقه الفردوس said...

علي فكره

مواضيعك كده بقت غريبه
بس يلا ماشي
حلو التنوع برده


بص
انت بتقول ان النوعيه دي مش موجوده
بالعكس
النوعيه دي موجوده وهتفضل موجوده
بس بفرق واحد

مفيش حد هيذلنا
مفيش ست هترضي انه يضربها ويبهدلها

انت تحترمني هحترمك

علي فكره
شروط لازم اي بنت قبل ماتتجوز تولها للباشا اللي هتتجوزه

اولا تختار صح
لان اختيارها ده هيترتب عليه حاجت كتيير


اولا يكون ملتزم دينيا وخلقيا
يعني يكون محترم احسنله :))

قبل العقد تقوله عندي شروط وتشهد عليه راجل حكيم من قرايبها ومن قرايبه
( اللي هيكونو هما الاتنين متفين عليهم علشان لو حصل بينهم مشكله يدخلوهم - حكما من اله وحكما من اهلها- وتقوله الاتي

* توعدني انك هتعاملني بالران والسنه
* توعدني انك عمرك ماهتهينني
* توعدني ان لو غلطت هتفهمني غلطي بالراحه

وهكذا

ولو خالف شرط من الشروط دي تجيب الاتنين الحكمين دول وتعرفهم اللي عمله علشان يبقي يحترم نفسه

:))))))))

الباحث عن الحقيقة said...

عاشقة الفردوس
على فكرة
تعليقاتك بقت غريبة
بس كويس برده
التنوع حلو
ماهو ده اللى انا بحزر اخواني وحبايبي الرجال منه
وهو الندية بتاعتكم دي
بكره تقوله تغسل زي مانا بغسل
تطبخ زي مانا بتطبخ
وساعتها مانعرفش مين متجوز مين علشان ايه
اه الحياة مشاركة بس برضه انا راجل وعايز احس براحة

شخصيا اوعدك اني مش راح اخليها تتعب في المطبخ
لاني ساندوتش وكباية شاي ممكن يخلص معايا
بس عسقول بيحب الطبييييخ

وبعدين حد يروح يتجوز ياخد حكم من آله وحكم من آلها ..مانجيب حكم دولي احسن زي ماتشات الاهلى والزمالك
دي جوازه ولا رايح يقعد قعدة عرب يفض خناقه
هي كلمتين
بيني وبينك كتاب ربنا وسنة رسوله
ولو فيها امانه والناس مآمنه بعض مش هنحتاج للحكم
إلا اذا كانت الثقة والامانة منعدمة من البداية
ده مش جواز ده ..دي بيعه وشروه

ابن حـجـر الـعـسـقـلانـى said...

يا عم أنا روحت أرد على الناس فى الصحيفة .. أرجع ألاقيك لاسع موضوع جديد على الاستراحة .. أنا ما لحقتش أستريح .. هو انت مسميها استراحة كدة و خلاص

بس بجد بجد يا باحث ... انت أصبت كبد الحقيقة فى موضوع الزوجة المصرية دة

الزوجة المصرية بتقع فى فخ الزواج .. و من بعده بتشيل هموم الدنيا و تلاقى دايما ملامح الهموم و المسئولية محفورة على وشها

و تلاقى الزوج الحاكم بأمر الله فى البيت بيتعامل معاها على إنها جارية .. تلك الشخصية الذكورية المسيطرة على الناس

يكاد الرجل فى بيته أن يكون شخصا مقدسا .. يأمر فيطاع .. لا يخطىء .. الحكمة تجرى على لسانه و من بين يديه

و يبقى يوم مراته أسود من قرن الخروب المركون بقاله عشر سنين لو فكرت إنها تكسر عادة من عاداته

يا جدع الرجالة دول بقوا حاجة وحشة قوة

آه .. نسيت أقول لك حاجة .. السوريات بصراحة من أجمل نساء الوطن العربى .. و يشهد على كدة لونا الشبل المذيعة فى قناة الجزيرة... عشان كدة أنا هاروح أتجوز واحدة من سوريا .. و سيبك من المصريات

انت عارفنى أنا واحد بتاع مبادئ ... و عمرى ما أخالف مبادئى أبدا .. و أحب دايما أكون عند كلمتى

نياهاهاهاهاها ... ضحكة شريرة

الباحث عن الحقيقة said...

مذيعات الجزيرة تاني
ومين لونا الشبل دي هتخلينى اعمل بحث في جوجل والواحد مع جوجل بينسى نفسه
ثم ايه الافترا ده
هو انت مش معانا ولا اييييه
ايه الاشاعات المغرضة اللى داخل تطلعها علينا دي
اه ياعم مانت مش خايف مانت حاطط عينك على سورية علشان كده بتسخن المصريات علينا
بص ..انا ممكن اكلمك واحد صاحبي يشوفلك مذيعة في قناة زيمبابوي
مش هتكلفك كتير
كيس صبغة اسود بس

ابن حـجـر الـعـسـقـلانـى said...

بمناسبة التمنياوى طه صحيح

بيقول لك يعنى انت ما كتبتش اسم أى حد فى التدوينة اللى فاتت .. و افتكرت اسمه هو بس ساعة ما قال:"دة يبقى ابن محظوظة".. و شكله كدة هاييجى يكسر لك الكوبايات فى الاستراحة

و بمناسبة الحكم اللى من أهلها

أنا لما أتجوز واحدة سورية ... لما حد يحاول ييجى من أهلها .. هايكسل طبعا ييجى من سوريا لمصر .. فطبعا أنا هاكون المنفرد بالحكم ... و هاعمل أى حاجىة و مش هايهمنى أى حد من أهلها .. و اللى عامل لى فيهم تخين يطلع لى

طبعا الكلام دة طول ما هما فى سوريا

لكن أول ما واحد منهم ييجى مصر .. هايبقى فيه مبادىء تانية

و انت عارفنى طبعا .. أنا راجل بتاع مبادىء .. و إنى أرجع عن كلمتى دى مش أخلاقى

ابن حـجـر الـعـسـقـلانـى said...

طب ابقى فكرنى لما تيجى القاهرة أبقى أحكيلك جملة قالها أخويا فى مرة لما كنا قاعدين أنا و هو بنتفرج على النشرة و كانت لونة الشبل هى اللى بتقدم النشرة

الباحث عن الحقيقة said...

نيها هاهاهااااااا
ماكفاية علينا التمنياوي وكمان اخوك
انا خايف بوليس الاداب يعرف سكتنا
هههههههههه

ابعد ايدك يا تمنياوي عن الكوبايات
دول بالتقسيط ولسه علينا دفعات متأخره
وبعدين مع السورية انت مش محتاج حكم
انا هبقى اجي انام عندكم بصفتي محامي دولي
نيهاهاها(ضحكة اشر من ضحكتك ) هاااا

مع اصرارى said...

يا مجدوب وكيف ما بتعرف جراتسيا
إنت جننتنى يا راجل
شوية تقولى السورية وأول ما اقتنع ترجع تقولى المصرية
يادوب هانوى والنية لله تقولى المغربية وقفص العصفر
يا عم حيرتنا معاك
أنا معايا مراتى "صعيدية" هاكتفى بيها الخمس سنين دول لحد ما آخد القرار الصح

عاشقه الفردوس said...

عاشقة الفردوس
على فكرة
تعليقاتك بقت غريبة




تعليقاتي غريبه ازاااااااي
:))

........................................

بس كويس برده
التنوع حلو
ماهو ده اللى انا بحزر اخواني وحبايبي الرجال منه
وهو الندية بتاعتكم دي
بكره تقوله تغسل زي مانا بغسل
تطبخ زي مانا بتطبخ
وساعتها مانعرفش مين متجوز مين علشان ايه
اه الحياة مشاركة بس برضه انا راجل وعايز احس براحة






لا طبعا مافيش نديه
كل واحد له حقوق وواجبات

بس مش معني اني بطلب انه يعملني باحترام اني ببقي عيزه ابقي ند له
بالعكس
هو له عندي اني اراعيه واحترمه واقوم بطلباته وبالعكس لازم قبل ماانام اساله اذا كان راضي عني او لا ولو مش راضي هسترضيه

بس ي المقابل
ميبهدلنيش
فهمت

::::::::::::::::::::::::::::::::::

شخصيا اوعدك اني مش راح اخليها تتعب في المطبخ
لاني ساندوتش وكباية شاي ممكن يخلص معايا
بس عسقول بيحب الطبييييخ




لا بس انا عن نفسي بحب الطبيخ والاكل والحاجات دي هو اي نعم مش شاطره اوي بس بتعلم وباذن الله لازم اون استاذه كمان
علشان مايبقاش لحد حجه :)))



:::::::::::::::::::::::::::
وبعدين حد يروح يتجوز ياخد حكم من آله وحكم من آلها ..مانجيب حكم دولي احسن زي ماتشات الاهلى والزمالك
دي جوازه ولا رايح يقعد قعدة عرب يفض خناقه
هي كلمتين
بيني وبينك كتاب ربنا وسنة رسوله
ولو فيها امانه والناس مآمنه بعض مش هنحتاج للحكم
إلا اذا كانت الثقة والامانة منعدمة من البداية
ده مش جواز ده ..دي بيعه وشروه



ازاي بيعه وشروه
يعني انت قصدك ان الامثله اللي قولت عليها زي ان الست تنضرب وتنهان كانها عبده دي مش بيعه وشروه
واما تكون بتتفق علي حياتها وبتحطلها اساس دي تبقي بيعه وشروه


:)))

الباحث عن الحقيقة said...

يا مجدوب انت اكيد ما بتعرف جراتسيا
مع اصراري
زمان على ايامنا كانت اللغة الصعيدي غير كده خالص
انت متجوز صعيدي من ادفو ولا ايه
وبعدين انت عايز توقعنا مع الصعايدة ليه
ده انا صعيدي وبقولك الصعيدي ماركة مسجلة هتعيش معاك العمر كله
بمزاجك او غصب عنك
هيجطعوك في البلد يا جبيصي لو نضرك راح اكده ولا اكده

الباحث عن الحقيقة said...

عاشقة الفردوس
مش بتقولي على موضوعاتي بقت غريبة
يبقى اكيد تعليقاتك برضه بقت غريبة من باب لزوم ما يلزم

عجبتني فكرة انك تسترضيه دي
شاطره شاطره
بس اوعي يكون في احلاها نومه وتصحيه علشان تسترضيه..ساعتها هو سيستبطحك في دماغك

مابتعرفيش تطبخي ودايرة تعملى مشاريع وشنط واستيكات وشموع
اقيمي عليها حد المطبخ يا رجال

بصي الحقوق والواجبات واضحة بشرع ربنا بس للاسف الناس نسيتها علشان كده معاكي حق بنبقى مضطرين اننا نقعد نشرحها ونذكر بها
بس المشكلة ان كل طرف بيفتكر ان الطرف التاني بيتشرط عليه
بينما هو بس تذكير بحقوق وواجبات مشروعة من عند ربنا مفيش دخل فيها لبشر
وبعدين ولا ضرب ولا اهانة ولا هيكون فيه مشاكل خالص يوم ما يزعلوا يقولها ادي يا بنت الناس كتاب ربنا وسنة رسوله واللى له حق يمشي على رقبة التاني علشان ده دين
بس للاسف فين الناس المتدينة
ثم ان رسول الله كان في بيته يكون في مهنة اهله
ش بقولك الزوج المصري عينه فارغه
انتم خسارة فينا
خلاص احنا عقابا لينا نتزوج سوريات
نيهاهاها دي ضحكة ابن حجر

عاشقه الفردوس said...

ايوه وصلنا لنقطه حلوه اوي

مممممممممممم

فهمت قصدك
الخوف من انه يلاقيها بتتشرط عليه

لا ماانت مش عارف خد بالك ان الستات مش سهله يعني

يعني نقدر نجيب الكلام بطريقه سهله ومش بتبي صعبه

يعني مثلا نعكس الموضوع الاول

انت جيت لخطيبتك وقولتلها

بصي ياخطيبتي احنا عايزين نمشي صح مش كده هتقولك اه

هتقولها خلاص احنا لازم نتفق
اما تقابلنا مشكله لازم نفكر فيها بهدوء
لو حد زعل من التاني يقوله وميكتمش في نفسيته يعني

ويقولها للتاني وبالراحه مش بنرفزه علشان مااطلعش المطواه :)))

وبعدين لو جت مشكله كبيره لان طبعا المتزوجين حديثا مش بيبقي عندهم خبره كفايه بالحياه ومشاكلها
انتي تقولي شخصيه من عندك تشفيها حكيمه وعاقله وانا من عندي ويوافو عليها هما الاتنين بحيث اي مشكله مش هتطلع عنهم الاربعه

ممممممممممممم يارب تكون النظريه وصلت

صدقني لاهو بيلاقيها بتشترط عليه
ولا هي بتشوفه بيشترط عليها يعني



وعلي فكره التفاهم حتي علي حل نقط الخلاف في الاول هي دي اللي هتبقي الفرق بين ستات ورجاله زمان وبين ستات ورجاله دلوقتي

صاحب المضيفة said...

هههههههههههههه

يخرب عقلك


وديت خالك ورا الشمس باللي قلته ده

ربنا سيتر عليه وعليك انت كمان

لما نشوف اخرتها

انت برضو نسيت تقول ان الست المصرية بتشيل في ايدها ساطور برضو لوقت اللزوم

بينفع برضو ولا انت ايه رايك



سلام يا جميل

حاجات جوايا said...

هههههههههههههه
ليه بس كده مانت كنت ماشى كويس
قلبت علينا ليه
ده احنا غلاااااااااااااابة
وبعدين ايه حكاية قفص العصافير دى
معلش اصل ثقافتى مش مغربية
هههههههههههه

دمت بخير أخى

سالى

la3lahakhier said...

انا قلت ابص واما اروح الشغل ابقى اعلق
ربنا يستر ماتكنش عاكك

appy said...

هههههههههههههههه والله كنت هقولك على العصافير دى ده زمانه صحبك بيجيب كل قنوات الدش
بقولك ايه لا فيه والله ستات كويسه بقولك ايه بقى كده يعنى هما الرجاله اللى عدلين متخلنيش اتكلم ولا اقول اللى بيبقى ماشى ومش عارف الالوان اللى لابسها على بعض ولا العرق ولا ريحه البق هااااااا اكمل ويقعد فى البيت باى حاجه وكمان بيزعق ويشخط وصوته وحش اقعد اعد ليك ولا كفايه النهارده انت تقول العزاء فى الناس الكويسه الللى بدات تنقرض وشكلى هقوم عليك المدونات الحريمى قريب نيهاهاهاها ضحكه من كوكب آبى ومعاها خروف ينطحك

الباحث عن الحقيقة said...

عاشقة الفردوس
اممممممم
لا لسه مش متفقين
انا مش مؤيد اوي لفكرة الحكمين دي
الحكمين دول لما الامور تبقى على وشك الخلاص
لكن انا مع ان مشاكل الزوجين تفضل بينهم هما الاتنين بس
دي مودة ورحمة وسكن يا ناس
لزومه ايه بس الحكمين
لما نستنفذ كل الطرق الوديه ونلاقي ان الطرف التاني رافض الخضوع لشرع ربنا ساعتها نشوف حد حكيم من اهله
وده الفرق بين ازواج زمان ودلوقتي
زمان كانت المشاكل كوتيمي
في السر يعني ..مش في المحاااااكم

*************

صاحب المضيفة
الحمد لله انك ما تعرفش خالي
وإلا كان زمانك رحت قلتله
شكلك تعملها يا نصه
لا ساطور ولا كيس يدخلوا البيت إلا بعلمي واعرف بالظبط محطوطين فين


*****************

سالي وحاجات جواها
معرفش اية حكاية العصافير دي بس مره شوفته ماشي في الشارع وشايل قفص عصافير
ودي حاجه غريبة في بلدنا
احنا نربي فرخة حمامة اي حاجه تتاكل لكن مش عصافير

الباحث عن الحقيقة said...

لعلها خير
اه ياختي جاية تبرصي علينا وتمشي
طيب لما نشوف هترجعي ولا ايه؟

****************

المعلمة آبي زعيمة كوكب آبي
يادي النهار اللي مش فايت
قصدي يادي اليوم الجميل المشرق
اليوم الآبي

يا فندم ولازمته ايه الفضايح مانا اعترفت ان الستات مظلومات معانا اوي
بس ستات زمان
يعني الالوان اللى مش طايقه بعضها وانا عارف انك تقصديني
انما انتي محسساني اني لما اتجوز كل ده هيختفي
هأو أو
ماهي كل الرجاله اللي معندهاش زوق في الالوان متجوزين
والسبب انه لما بييجي خارج المدام بتقوله ألبس اي حاجه مغسولة وخلاص انت هتتعبني ليه
وبعدين فاتورة التليفون اللى بقت اد كده دي
من رغي مين مثلا؟؟
لا ماهو هتنشري هنشر
فأحنا نلم الدور ونسيب الحياة الزوجية كده في مصر ماشية بالستر
اصلا دول مش بيعرفوا يتجوزوا ولا يعيشوا سوا ..هي سنة وتعالى اتفرجي عليهم في المحاكم

عاشقه الفردوس said...

لا لسه مش متفقين



ليه بس كده مابلاش :))


::::::::::::::::::::
انا مش مؤيد اوي لفكرة الحكمين دي
الحكمين دول لما الامور تبقى على وشك الخلاص
لكن انا مع ان مشاكل الزوجين تفضل بينهم هما الاتنين بس
دي مودة ورحمة وسكن يا ناس
لزومه ايه بس الحكمين
لما نستنفذ كل الطرق الوديه ونلاقي ان الطرف التاني رافض الخضوع لشرع ربنا ساعتها نشوف حد حكيم من اهله





علي فكره الطريقه دي بتنفع

وانت تقصد انها مش لازم في الاول
ممممممممممم

ده في الاول احسن علشان يبقي كله علي نور
وبعدين دي مش طريقه اجباريه

انا هنفذها وهبقي اقولك نتيجتها باذن الله


:::::::::::::::::::::
وده الفرق بين ازواج زمان ودلوقتي
زمان كانت المشاكل كوتيمي
في السر يعني ..مش في المحاااااكم



ماهو علشان كده كانت بتاخد علي دماغها

مين جاب سيره المحاكم بس

ده بالعكس اتنين من الاهل ( ذوا حكمه وعدل) بدل ماتكون فيفي جارتهم واستاذ مرجان جارهم وتبقي فضيح وكشف لاسرار بيوت المسلمين


مش ملاحظ اننا بنناقش رايي ومش بنناقش الموضوع
ولا انا غلطانه

:))))

الباحث عن الحقيقة said...

عاشقة الفردوس
هي دي طريقتك في انهاء المناقشة؟؟
اننا بنناقش رأيك مش الموضوع
ماشي يا ستي
عموما كان لي تعليق لكن طالما اننا بنناقش رأيك مش الموضوع يبقى مفيش داعي بقى
وسعيد جدا بتفاعلك مع الموضوع والمدونة
ويارب تلاقي وقت علشان تقري اللى فاتك في الصحيفة

نهر الحب said...

السلام عليكم ورحمة الله وبركاتة
والله نا اتخضيت فى الاول
مش عشان التحيذ او ان السورية افضل او العراقية او اى امراءة اخرى لكن عشان النظرة الغير موضوعية
عموما المرأة فى الاغلب تتعرض للضغوط خاصة فى ظل عدم تفهم الزوج لها
اما ان كان رجل متفهم ويحاول المشاركة فهى امرأة محظوظة من وجة نظرى
زى ما قلت ان ظروف الحياة صعبة فما بالك دا وكمان رجل لا يقدر
ولا يرضها بكلمة طيبة
ولا يحاول يساعدها
اما ان كان يساعدها فهو جميل جداا

كل الاحترام بوست حلو

الباحث عن الحقيقة said...

نهر الحب
اهلا وسهلا بزيارتك
واسفين على الخضة
فعلا اهم حاجه التقدير والتفاهم لظروف الحياة
لان مع التقدير راح راح تيجي المشاركة
الاعياء الاسرية في نظري مش تقسيم للاعباء والواجبات بالتساوي وانما كل واحد يعمل اللى يقدر عليه
يعني الزوج مثلا فاضى مش وراه حاجه ليه مش يساعد في عمل البيت مثلا
هي مراته دي بتاخد فلوس على شغل البيت فمش عايز يحط ايده في حاجه؟
ولا هو عوج وخلاص
شكرا على الزيارة

ريمان said...

ههههههههههههههههههههه

والله فعلا

الزوج المصرى عينه فااااااااااااارغه

والله فعلا انا عمرى ما شوفت ستات مظاليم غير ستات مصر وخصوصا ستات دمياط

بس على فكرة ستات بورسعيد قويين شويه

ههههههههههههههههه

فى بورسعيد كان فى ست ماشيه مع جوزها فى الشارع وفجأه نزلت عليه ضرب وجرجرته قدامها وقالت له يلاااااااا قدامى ع البيت

ههههههههههههههههههه

.....................

بوست رائع جدا جدا

انا سعيده بزيارتى لمدونتك

الباحث عن الحقيقة said...

ريمان
اللى انتي بتقوليه ده ينفع فيلم كوميدى
هو على فكرة على حد علمي يعني الستات في المناطق الساحلية شداد حبتين
بس بينى وبينك اكيد جوزها ده يستاهل
ومش عايز اعك في الكلام عن الرجاله السواحلية علشان برضه دول زمايلنا واللى يعيبهم يعيبهم وحدهم طبعا بس برضه محسوبين علينا
انا اللى سعيد بتشريفك لزيارتنا

عاشقه الفردوس said...

لاااااااااااااااااااااااااا


خدها قاعده
عاشقه لفردوس بتحب تتنقش اوي

ولو فضلنا طول اليوم مناقشه
لان بباطه المناقشه بتخليك تفكر وبتزودك بمعلومات من لشخص اللي قدامك
كتييييييييييير ببقي غلط وساعات ببقي صح


يا ناقشني في الرد اللي فات
شكلك انت اللي هربت منه

انا قولت كده بس علشان مااباش تقيله ع المدونه وتقول ايه البت الخنقه دي ماكفايه كده بقي
:))

الباحث عن الحقيقة said...

عاشقة الفردوس
وجهة نظري ببساطة هو عدم تدخل اي طرف غير الزوجين في علاقة الزوجين
وعدم تحديد ذلك مسبقا
يعي مش من البداية كده نحدد المحكمة الواجب اقامة الدعوى امامها
يعني انا بقول مسألة الاتفاق على الحكمين دي نخليها لوقتها لما تحصل مشكلة يعجز الطرفين عن حلها
لكن تحديد حكمين سلفا هيخلى تدخل الغير سيف مسلط على رقبتها ورقبته عند اي خلاف
لكن بدل الحكمين دول مش نتفق ان المعاملة تكون بكتاب الله واذا كان هو رضي بظلمها هي تستحمل مقدرش يبقى حقها تطلب حكمين وهو كمان لو هي رضيت انها تظلمه انه يستحمل وان مقدرش ابقى يطلب حكمين
انا عارف ان الحكمين دول من شرع ربنا
بس امتى؟
بعد استنفاذ كل الطرق
هل انا مع تحديد الحكمين سلفا؟
الجواب لا لان ذلك هيعطي الطرف التاني احساس بأن الشخص الل بدأ وجاب سيرة الحكمين مش بيثق فيه وبيهدده وبيقوله اي غلطه هجيبلك فلان يعقلك
وكأننا داخلين ماتش وبنتفق على اصول وقواعد اللعبة
وجهة نظرى كده يا ستى
الله

عاشقه الفردوس said...

فعلا وجهه نظر برده
الله
:))

الطائر الحزين said...

يعنى بتلعب على الونجين مش عاوز تخسر حد يا لئيم

ومتنكر كمان
وبتكتب باسم مستعار

عارفك وشايفك وهاجيبك
(الدنيا مليانة )
ولا تنسوا الفضل بينكم

السبعاوى طه

نونو said...

السلام عليكم
طب خلي الزوجةالمصرية تعيا مرة وواحدة بس وترقد في السرير اسبوع واحد بس
هيلف الراجل حوالين نفسه ويبوس ايدها ورجليها
ههههههههههههههههههههههههه
اسالني انا
تدوينة هايلة

الباحث عن الحقيقة said...

عاشقة الفردوس
شايفة ازاي ممكن نوصل لمنطقة مشتركة ان كل واحد يحترم وجهة نظر التاني من غير حكمين
نيهاهاها

**********

الطائر الحزين
ايه يا فاقسني
لازم تقول بلعب على الونجين
خليها في سرك
الدنيا مليانه
وبص خدها قاعده
الطيبون للطيبات
التسعاوي طه

************

نونو أم اسراء
ألف سلامه ليكى دايما ومن غير ما نسأل
نظريا مجرد الافتراض بتاعك ده يلخبط حاجات كتير
ربنا يديم على كل ستات مصر الصحة
بس الطيبات بس المفتريات لا

la3lahakhier said...

انا مش حتكلم كفاية انى متهمة انى متطرفة وعدوة الرجال ومش عارفة ايه تانى
وشهد شاهد (ضلالى )من اهلهم
ههههههههههههههههههههههههههههه

الباحث عن الحقيقة said...

لعلها خير
ده اللى قدرك عليه ربنا
خدي يا ستي اجرة التاكسي ومتشكرين
سعيكم مشكور

الساحرة said...

بما اني طلعت مامتك ومكنتش عارفه خدها نصيحه مني

وابعد اليومين دول عن الاستراحه


لان المقاومه النسائيه ناويه تفجرها


بقي بتبصوة للستات السوريات

طيب شوفوة رجالتهم بتعاملهم ازاي

رجاله شيك في كل حاجه

مش احنا اللي طلعان عينيا وياريته بيعجب

تبقي الست مشغوله في المطبخ
وتلاقي صوت بينادي يا حبيبتي

يبقي عاوز شاي او قهوة

ولو قالت ثواني يزعل

دة غير المكواة وترتيب مواعيدة

والشقه التي تصبح بقدرة فادر عند وصوله الي سوق الخميس

الشوز علي اي سجادة
يليه الشراب

والباقي دور بقي انت وحظك هههههه

دة غير ريموت التليفزيون اللي بيلزق في ايدة

وياويل اي حد ياخدة

اقول تاني ولا كدة كفايه

ولو قالت نخرج يبقي يوم

والنبي تروحوة تلموة بعض وتقعدوة بعيدرجاله

ميملاش عينها غير السوريات هههههههه

la3lahakhier said...

لعلمك قريت للمرة التنية والبوسنت ده واللى قابله مش مريحينى كدا

ايه يا قانونجى مالك ومال الستات اليومين دول
وبعدين يا خويا اللى يحمل يشيل بلا خيبة خليييييييينى ساكتة احسن

الباحث عن الحقيقة said...

الساحرة المستديرة
قصدى الساحرة الشريرة
طب احلفي انك ام لبنوته في ثانوي
هههههه
مش قادر اصدق
يظهر انك كنتى مصدعاهم زمان فمصدقوا خلصوا منك بدري
تعرفي انا لو كنت نزلت من بطن امي بدري شهرين كان زماني قدك
بس تعرفي فكرتيني يا طنطططط بالريموت كنترول
ده ايويا عقدني بالموضوع ده
لا خلاص انتم كده صعبتوا عليا
علشان كده انتم براءة وهنروح نعقد السوريات
نيهاهاها
نتيجة الاعداية في القاهرة بانت ايه الاخبار عندك

الباحث عن الحقيقة said...

لعلها خير
اللى يتحمل يشيل بلا خيبة
؟؟؟؟
لما انتى بتقولى كده امال الساحرة تقول اية
وخلينا ساكته احسن
؟؟؟
ماهو انا عايزك تتكلمي
وبعدين ايه مالك ومال الستات وكلامك مش مريحيني
هو احنا لنا بركة غيركم
ولسه ياما هتشوفوا
يعني الساحرة الشريرة كانت بتجيب الشوز من على السجاده
شكلك انتى كنتى بترميها في الشارع علشان يحرم يقلعها على السجاده
في سوريا بقى
الستات بتشيل اجوازهم شيل كده
قصدي بيشيلوا السجادة
انما هنا كسل بعيد عنك
الست بقى وزنها 100 كيلو هتشيل ايه ولا اية

جنّي said...

السلام عليكم
صبحك الله بالخير يا متر ..
قبل ما تشتم وتقل .... بقدم اعتذاري للتأخير ووالله مرهق وتعبان من الامتحانات وقلت أجيلك على صباحية ربنا قبل ما أذهب للعمل لأني بالليل كنت باكتب الرد على التعليقات وأنا مش شايف قدامي وعمال أختصر وأضبش ..
بس أيه البوست الملهلب ما تلم الدور علشان تعرف تتجوز فين المصرية اللي ها ترضى بيك وانت بتغازل السوريات .. باين عليك مرقد ولابد في الدرة لواحدة سورية .. بس اللي يخرج من داره يتقل مقداره والمصرية وراك وراك وربنا يرزقك بواحدة تظغر لك بعنيها قائلة هيييه اسكت انت .. وانت يامسكين تبص في الأرض وتقول حاحاحاضر ..

الباحث عن الحقيقة said...

جني
ايه ياعم افلام الرعب ع الصبح دي
انت جاي تخوفني ليه
تتصور هو ده شكله اللى هيحصل
علشان كده بكتب براحتي
علشان لما اقعد مع نفسي بعد الجواز وده هيحصل كتير برضايا او غضب عني
اقول ايييه فين ايام زمان
كان مالهم بس السوريات
منك لله يا جني انت اللى فولت عليا
مبسوط
انا عايزك تنبسط كمان
هروح اشوف رديت عليا في مدونتك قلت ايه

la3lahakhier said...

لك عندى واجب تعال خده
ههههههههههههههههه ضحكة شريرة

بنت مصريه said...

كنت رضيت عليك بعد ما سنيت سنانى
خلتنى اسن سنانى تانى ليه
ياللا معلش سماح المره دى بس اعمل حسابك المره الجايه
كلمتى لاممكن تنزل الارض ابدا
ههههه
بوست جميل احييك

الباحث عن الحقيقة said...

لعلها خير
متشكرين على التدبيسه
قصدي الواجب

******
بنت مصرية
هو انتى عندك اسنان لسه
طيب متنسيش تستعمل سيجنال العفريت لتنضيف الاسنان

الحمقاء المضلله innominate x said...

ينصر دينك أول واحد يقول كلمة الحق

موناليزا said...

هعتبر كلامك الاخير ده مش موجود
واحييك على تعاطفك وتقديرك للزوجة المصرية

بنات افكارى said...

السلام عليكم

اولا اعتذار كبير اااااااااد كدا
لقلة الزيارت لكن ربنا اعلم بالحال
وعايزة اقول كلام كتير ااااااد كدا فى الموضوع دا بس جو الامتحانات مخلية دماغ
الواحد ااااااد كدا معلش عند حضرتك واحد قهوة مظبوط وصلحة يمكن الدماغ تتظبط ان شاء الله نخلص ونرجع نتابع معاكم والله المستعان
انا هاقول لحضرتك وجهة نظر بسيطة
الست المصرية يافندم عاملة زي الصلصالة كدا ومش عايزة الناس تسيب المفهوم وتبص الكلمة وتقول طينة يعني ماهو الصلصال طينة ويعني هو احنا خلقنا من ايه ماهو من طين نرجع لموضوعنا
انا اقصد انها بتكون خامة قابلة للتشكيل وبتكلم من وجهة نظر البنت الصعيدية الريفية اللي لله الحمد غير قابلة للتلوث من جو المدينة العجيب مهما كانت درجة تعلمها او مستواها الاجتماعي وثقافتهاوالمفروض ان دا يكون حال كل بنت مسلمة المهم يعني انها خامة يمكن تشكيلها بسهولة وعلى حسب الايد اللي هاتشكلها بئا وهنا بيجي دور كل رجل فيكم اما انه هايشكلها صح وعلى حسب طريقة تفكيره ودماغة علشان ماتتعبوش او انه هايفشل فى كدا ويشكلها من الخارج بس وطبعا فى الاخر كله على دماغه المهم انه يبئا هو الوحيد اللي عارف مفاتيح دماغها علشان لما تعصلج فى اي وقت هو اللي يقدر يظبطها والمهم كمان يكون رابط الصواميل كويس علشان ماتتفكش فجاة ولا تنعم وبردو كله على دماغة
كنت سمعت تشبية من حد قبل كدا ماعجبنيش بس هاقوله بيقول ان الست دي عبارة عن بيانو او اله موسيقية ربنا يعافينا يعني وان الرجل هو العازف لو هو عازف شاطر هايطلع منها الحان كويسة اما لو العكس يبقى مش هايسمع منها غير كل نشاذ المهم انه فى الاخر كله بيعتمد على الراجل وازاي هايقدر يشكل الخامة دي ويربيها على طباعه ويبقى هو الوحيد اللي فى ايده مفاتيح شخصيتها وبالتالي هي كمان هاتملك مفاتيح راحتة وسعادتة
حاسة اني مش عارفة اوصل اللي عايزة اقوله بس يارب حضرتك تكون فهمتني
المشكلة مش فى جنسية الزوجة ولا فى عين الزوج وطباعه المشكلة فى نوعية الخامة
ونوعية اللي بيشكلها من اول الطريق
من اول مابدء يمسكها ويتعامل معاها ياربنا هايكرمه وينتج زوجة مطيعة ومريحة ومن وجهة نظري مهما عملت فيهم الدنيا ومهما كانت الظروف فى لاخر بردو هاترجع تعمل على راحته وه هايرجع يحس بقيمة الشخصية اللي عملها ومهما قسي عليها هايرجع يريحها بردو
بقول كفاية رغي كدا واروح اصلي الفجر واكمل مذاكرة وياااااارب يرزق حضرتك وكل الناس بخامة كويسة سهلة التشكيل ويعين حضرتك وكل الناس على تشكيلها بالطريقة الصحيحة واللي ترضى ربنا فى الاول وفى الاخر
فى النهاية بئا ياريت تدعولنا معاكم
ااااااااااااد كدا

السلام عليكم

la3lahakhier said...

فين الواجب يا واد انت ؟
حتى الدراسة فاشل فيها ومطلع عينى كدا
اعمل الواجب والا هاااااااااااا

اوعى تفكر said...

ياراجل
انا عن نفسى
لا محصل دى ولا محصل دى
يعنى مش فارقه معايا

الباحث عن الحقيقة said...

الحمقاء المضللة
اهلا وسهلا بزيارتك
وشكرا على الحماس الكبير ده

********

موناليزا
زيارتك اسعدتني فعلا


********

بنات افكارى
حقيقي انا سعيد جدا جدا لما بلاقي اهلنا وناسنا القدام لسه فاكرينا
علشان كده ساعدتي بتعليقك اكبر من تعليقك نفسه
رغم انه تعليق اااااد كده
وانا متفق معاكي تماما وكمان الزوج
هو كمان لما بيكون سهل ومتواضع في بيته زوجته كمان بتعرف تريحه وتسعده
لانه لو عصبي هي نفسها هتتجنبه
وربنا يوفقك يا فندم ياااااا رب

************

لعلها خير
هشششششششششششش

هششششششششششششش

وواجب ايه دي فاكره نفسها في المدرسة


************

اوعي تفكر

ان شاء الله تحصل وتحصل
ونحصل كلنا وتبقى هيصه

Soooo said...

تصدق انا جيت هنا وكنت ناوي اعلق بس المود ماكانش متظبط قلت لما اروق ابقي اجي اعلق بروقان

الموضوع اللي بتقوله ده هيفتح عليك مليون سكه زي كلام اابي وغيرها من المدونات من اللي بيقولو البنات موجودين وانتو اللي مش عارف ايه
ونصيحتي ليك يا باحث
تتعرفلك على واحده امها مغربيه وابوها سوري .. سوري الجنسيه مش سوري اسف يعني

وهتقضيها عصافير واهتمام وضيافه وكللو كللو

واحب انتهز الفرصه واقول لاخويا التمنياوي طه كل عام وانت بخير واهديه اغنية ست الحبايب ياحنانا ننا


ملحوظه لعسقلاني
اخوك قاللك ايه .. ها .. ايه .. ها .. ها .. ها؟؟؟


سلاموووووووووووز

AL said...

النوعية موجوده اكيد انا صح حضرتك..موجوده فى الافلام القديمه لا تتزوج مصريه وعيش سعيدا