Friday, June 20, 2008

طلعنا الكراريس وحلينا الواجب

واجب
وفي رواية قديمة كان يقال له : تاج
معلش يا جماعة استحملوني ده رابع مرة يجيلي تاج واهرب منه
بس المرة دي اللي بعتت التاج مصمصمة على اني احل هذا الواجب او التاج
لخبطونا كل شوية يطلعوله اسمه بكرة يسموه جريب فروت ويقولوا عليه بيض
اقدم تاج كان من الاخت العزيزة ال جي
اللي رجعت برضه بعتت تاج تاني
بس لاني مش بحب التاجات زوغت منه
وبعدين جنى الجنتين دان بعتتلي تاج الاحلام
فاكرينة ؟؟
كان وقتها موضه منتشرة في المدونات زي مناطيل الاسترتش
وطبعا زوغت
ولكن الاخت لعلها بخير ألحت وجايه تطاردنى وتقولى فين الواجب
وهى الحقيقة مش ألحت لا دي أصرت
أصرت ..تصر .. إلحاحا
بالمناسبة الجميع مدعو عند لعلها بخير للضرورة وعاجل جدا اضغط على اسمها ده مش لون ده لينك يا فالح
لغاية ما سيد جني بعتلي نفس التاج رغم انه كان مبعوتلى انا وهو من لعلها بخير في بق واحد
فالواحد محتار يجاوب اي تاج فيهم وكلهم من اخوة واخوات لهم معزة مربوطة فوق السطح
قصدي جوه القلب ..ومحبش اكسف حد
وبمناسبة المعزة كنت وانا في رابعة حقوق ماسك كتاب اصول الفقة وقاعد ازاكر فوق السطح تحت طبق الدش
اللي هيضحك هطلعه بره الفصل
وحطيت الكتاب جنبي علشان الديك ابن الرزله واقف قدامي وكاك كاك كاك
عايز يطفح طب يابن الفرخة هو انا حوشتك ..امال انا مطلع لجنابك وما ملكت يمينك من الفراخ اكل ليه؟
ويادوب عيني غفلت عن الكتاب ثانية ..بصيت لقيته معزاية راحت متناولة كتاب اصول الفقة من جنبي وهتجري بيه
أوبا ..كده بقى الجنونه طلعت يا ولاد ال .. وشديت الكتاب من بوزها وكنت متغاظ اوي ..يعني حبكت مالقتيش غير كتاب اصول الفقة ..طب قوليلى وانا اجيبلك القانون الدستوري مالهوش لازمه
واكلت حته من اخر صفحة الفهرس ولسه اثار العدوان المعزواي على الكتاب موجودة لغاية دلوقتي
المهم
خلونا مع التاج الاخير
اللي بقى اسمه ايه ياولاد دلوقتى ؟ الواجب
صح يا عسقول
اضربوه بالنار ده لسه صاحي
الواجب
اخر مرة حليت فيها واجب كنت في تانية ثانوي
وكان واجب الجغرافيا كنت اروح اصحح كشكول الواجب ألاقي المدرسة تستغرب
واكتشفت اني الوحيد اللى كان بيحل الواجب في المدرسة من بعد ما أتلغت اعمال السنة ..فرحت موفر باقي الكشكول وقعدت اشخبط فيه شوية خواطر على شوية نثر على قصة على مسرحية
اولا : أذكر اسم من طلب منك حل هذا الواجب
محدش يفكرني انها اختي لعلها بخير وأكد عليه سيد جني علشان لما بفتكرهم اسناني بتخبط في بعضها وبتبقى عايزه تقطع اي حد
ثانيا : أذكر القوانين المتعلقة بهذا الواجب
مخنوق يا جماعة مخنوق حد يرد بدالي
اه هو اللى بعمله دلوقتي هو قانون الواجب ..ارتحت ولا نقول كمان
ثالثا : تحدث عن ستة أسرار قد لا يكتشفها من يقابلك للمرة الأولى
سته مرة واحده ده كده بقى الواحد يعوز يشمر ..ويستربع كده زي ما كنا زمان في ابتدائي نقعد نذاكر على الطبلية
كانوا يقعدونا زمان نذاكر على الطبلية ويقولولنا عايزينكم تاكلوا الكتب اكل
مش عرف كانوا فاكرين اننا معزه ولا ايه
معلش دايما كده الفلاحين كاسقينا ..بس بينجحوا وبيجيبوا مجاميع ..مش زي الساحرة الشريرة
احم احم
الصفة الاولى
اجتماعي ..يعني انسان بقابله لاول مره زي انسان بعرفه من زمان ..مفيش فرق
مرة قعد جنبي واحد معرفوش فبقوله ايه يا عم فينك مش باين
قلى : معلش كنت بستحمه
وقعدنا نرغي شوية وبعدين راح مشي
بصيت بعد شوية ولقيته رجع وبيقولي لو سمحت انا اسف جدا بس مش قادر افتكرك
قلت له : انا اول مره اصلا اشوفك دلوقتي بس انا باخد على الناس بسرعة
افتكرته هينبسط ..لكن بصراحة النظرة مكنتش نظرة انبساط ابدا ..كانت نظرة صدمة مشوبة بالاستغراب باستفهام عن كنه الشخص الغريب ده اللى هو انا
الصفة التانية
عفوي وتلقائي.. واللى بيطلع في دماغي اقوله والى ييجى على بالي اعمله
الصفة الثالته
عصبي جدا .. وده عيب خطير اوي والخطورة فيه على رأي ابن حجر اللى بيستغرب جدا من المسألة دى كان بيقولي الغريب انك لما بتتعصب جدا مش بتحاول تهدي نفسك وبتتخذ قرارات وانت في حالة العصبية دي
ودى حقيقة فعلا لما بكون عصبي بكون زي الاعصار المدمر وصعب الارضاء جدا ..وبامانة محاولة استرضائي بتكون مرحلة خطيرة لانها احيانا بتقلب لنتيجة عكسيه
انما الغريب اني لما بهدا لوحدي ولو بعد حين ..برجع اقيم كل الجسور التي تكسرت وبتعامل بشكل طبيعي حتى لو مكنتش نسيت ..لكن ده مش يخلينى اغير معاملتي طالما قبلت اني اتعامل مع نفس الشخص مرة اخرى
وده شئ مش سهل علشان كده بحاول اقلل من اثار عصبيتي بأني لما اتعصب.. ابتعد لغاية ما اهدا
الصفة الرابعة
أبوي ..أبوووييييي
انا عارف جديدة عليكم دي
قول ورايا ..أبويييي
يعني بتصرف بأبويه في المحيط اللى حواليا وببقى عامل زي كبار السن والعواجيز في تعاملهم مع الناس اللي من سنهم او اصغر منهم
وبيبقى طريقة كلامي نفسها احيانا تفطس من الضحك
خاصة لما يكون واحد لابس بدلة او قميص وبنطلون وبيتكلم زي الفلاحين الاميين بكل تلقائية ومحبه وتواضع مع الاخرين
فتلاقيني مثلا استخدم جملة : ايوه يا بابا ..او ايوه يا بويا لما حد صغير يندهلي
عندنا في الصعيد كده او المجتمعات الريفية او المدن البسيطة
حتى اختى المتجوزة اصغر مني لما تندهلي اقولها : ايوه يا بويا ..ايوه يا بوي ..ايوه يا بابا
وطبعا هي بتتغاظ اوي ..لانها بتحس اني بعاملها زي عيلة صغيرة
دايما بحب اكون محتضن للي قدامي ..بس جايز الصفة دى مبتظهرش كتير لان محدش هيفهمها صح
خاصة لما بكون في القاهرة
انما بستخدمها وبحسها كتير يعني
الصفة الخامسة
محبش اطلب حاجه من حد.. او أحس اني بلقح جتتي على حد
لما بحس اني غير مرغوب في وجودي بخلع على طول واحيانا من سكات وفي ثواني اكون اختفيت واحيانا بفجاجه بس في صورة دعابة
الصفة السادسه
صريح..يعني مرة واحد زميلى بيسأل واحد زميلنا برضه كنا طلبه وساكنين سوا
بيقوله ايه رأيك في صراحة أحمد ؟
جاوب بغيظ : ده صريح لدرجه يستحق عليها الضرب
وفعلا قللت موضوع اني اكون مباشر وفج في صراحتى ..وحاولت ازوق الصراحة شوية علشان ما تألمش حد
خلصوا كده ..اخيرا
يا ساتر
بس على فكرة معظمهم بيتم اكتشافهم في اول مره ..والله اعلم
بس يعني كنت هجيبلكم منين صفات ..وكل البقالات قافله دلوقت
رابعا : حول هذا الواجب إلى ستة مدونين وأذكر أسماءهم وروابط مدوناتهم
ماشي يا سيدي..عد ورايا
على فكرة كتبت ناس تانية كتير بس لقيت نفسي هنسى ناس فقلت كفاية سته قال يعني غصب عني الواجب قال سته وانا مقدرش اكمل اكتر من كده
ملحوظة : اوعى حد يفتح اللينكات ويلاقيهم كاتبين مواضيع حلوه كالعاده فيروح عندهم وينسانا
تعلق الاول يا جميل قبل ما تخلع
على فكرة هتلاقي عند مجداوية موضوع جديد وبنتها نسمة نجحت في الاعدادية , وعاشقة هتلاقوا موضوع احساس لسه طازه شوفته وانا بجيب اللينك , ونيجرو كاتب شوية رباعيات مستوى عالي جدا والله , مع اصراري عامل مدونتين حلوين ابقى تابعوهم , والساحرة منزلة بوست جديد فيه صورتها وهي صغيرة , بت خيخة بقى اللى هيروح هناك دلوقتي يحاول ياخد باله من بوز التربيزه
خامسا : اترك تعليقا في مدونة من حولت الواجب عليهم، ليعلموا عن هذا الواجب
وانت مالك يا غلس وانتى يا غلسة ..هم هييجيوا وكل واحد له تاج هياخده كده زي التلميذ الشاطر ما يجاوب الامتحان
..............................
خلصنا من الواجب
فضفضاية صغيرة
على طول الحياة نقابل مدونين ونعرف مدونين ونرتاح ويا مدونين عن مدونين
وهي دي الحياة وهو ده التدوين
التدوين زي الحياة ..لانه صوره من صور الحياة
فيها الناس الحلوه , وفيها الناس اللي مش حلوه
وفيها ناس بأقنعة , وناس من غير أقنعة
فيها الملايكة , وفيها الشياطين
وفيه مدونات بكرهها بس من قبل التدوين ..وفيه مدونات كرهتها بعد التدوين وانا قلبي بياكلني عليهم بس اعمل ايه لازم اكون قاسي زي قسوتهم
وفيه ناس حبيناهم ..وناس حبونا ولا احنا شفناهم ولا هم شافونا
وناس بنحبهم من بعيد ومجاتش الفرصة المناسبة علشان نعبر لهم عن حبنا او هم يعبروا عن حبهم لنا
وفيه مدونات بنحبها وبنسعد بزيارتها كأن سيادة وزير المدونات هو اللي زارنا ..وللاسف مش بيكونوا حاسين بسعادتنا دي وإلا ماكنوش يغيبوا علينا
بس اكيد غصب عنهم ..زي ماهو غصب عننا
والتدوين ده عالم ..اجمل ما فيه القلوب الصادقة كتير
تحياتي

49 comments:

nigro said...

أقولك على سر كمان يمكن انت أصلاً ما تعرفوش
انك تتحب من أول كومنت
آه من أول كومنت
بجد يا أحمد انت راجل زي السكر و زي ما قولتلك قبل كده اني بأعتبرك انت و ابن حجر زي اخواتي .. بأحبكم في الله .. لأنكم بجد تستهاهلوا كل حب و كل خير و كل فخر إن بلدنا المعفنة دي لسه فيها شباب نضاف و وعاقلين و مرحين و ملتزمين و مثقفين زيكم
ربنا يباركلكم يا رب

و بجد أسعدني جداً إنك اعتبرتني من أصحابك و مررتلي التاج

ربنا يكرمك يا رب

تحياتي ليك
و لعسقول

يلا سلام

عصفور المدينة said...

أول مرة أعملها وأركز على السلبيات

وبتتخذ قرارات وانت في حالة العصبية دي ودى حقيقة فعلا لما بكون عصبي بكون زي الاعصار المدمر وصعب الارضاء جدا

معرفة العيوب الطريق الطبيعي لعلاجها ولا ينبغي أن يكون نهاية المطاف

مع تحيات وكيل وزارة المدونات

الباحث عن الحقيقة said...

نيجرو
ايه السرعة دي
كنت بقرا الموضوع واراجعة ولسه هعدل الاخطاء الاملائية وشوية اضافات بسيطه لقيتك معلق
طب والله ده شئ جميل وانا سعيد بتواجدك وعايز اقولك الرباعيات اللى انت كاتبها قمها في الجمال
وفعلا مصر بخير
ماهو لما يطلع عندنا جاهين تاني ولا فؤاد حداد تبقى مصر لسه بخير
لاننا محتاجين للنبوغ في كل المجالات

الباحث عن الحقيقة said...

عصفور المدينة
الاستاذ
انا عصبي لدرجة اني لما بكون متضايق ايدي بتاكلني اني احذف المدونة او احذف اسمي منها
وبجد وجود عسقول معايا في المدونة بيخليني امسك نفسي
ومرة فعلا قلت لعسقول انا هرفع اسمي من المدونة
ده كان وقت زعلي انا وايمان الحسيني
وحاولت بس مقدرتش لانى وقتها كنت الادمن لوحدى وده يعني ألغاء المدونة وكده هظلم عسقول
لغاية ما عرفت ازاي عسقول ممكن يكون ادمن كمان ودي جت بصدفه
بس دلوقتي بقيت اهدى شوية وعفاريتي هديت على المدونة
بس لسه برضه عصبي شوية وادينا بنحاول
الحمد لله لسه صحيح باخد قرارات احيانا وقت العصبية ..انما بطلت احلف
الاول كنت احلف يمين علشان اكون قاطع في قراري ..وده اللي خلاني اتحكم في نفسي شوية لاني برجع اندم على اليمين ده
.ويعني ما شفتش إلا دي يا عم عصفور
ثواني اروح اعدلها اني لما بهدا ..صحيح بعد حين بس بنسى كل حاجه

Soooo said...

مرة قعد جنبي واحد معرفوش فبقوله ايه يا عم فينك مش باين
قلى : معلش كنت بستحمه
-----
هههههههههههههههههههههه

طب والله انا فرطت ضحك على الجمله دي هي وحوارات الديك وماملكت يمينه

بس اجاباتك حلوة وبجد تحسس اللي يقراها انك ابوي يعني
وبمناسبه الابوه .. فين المصروف ولا اي حاجه في رغيف

----

ردا على فضفضتك .. اكيد طبعا الانسان بيحب يقرا تعليق الناس ويشوف رأيهم فيه وفي اللي بيقوله
لكن برضه حط في دماغك انك بتكتب لنفسك قبل ماتكون بتكتب لغيرك

اضربلك مثل
في مدونه بتاعة واحد انا دخلت عنده وقريت موضوع من مواضيعه .. شدني لدرجة اني رحت جايب كل مواضيعه وقاريهم في قعده واحده
المؤسف في الموضوع .. ان الشخص ده بطل يدون .. وانا فعليا زعلت على اختفاؤه لاني احترمت فكره وكان نفسي اننا نبقى اصدقاء
لكن يلا بقى .. نصيبه كده


ملحوظه
انا عايز اتعرف عليك واشوفك واقعد اتكلم معاك بجد .. انت مش ناوي تيجي ولا ايه ياعم .. ده في حاجه كده خايف لو قلتها تفتكرني سخان ابولو .. ابو العساعيس بيقطع في فروتك وبيقعد يقول ده ولا بيفهم في اي حاجه وانا اللي شايل الاستراحه على كتافي وانه - ابو العساعيس يعني - من غيري ولا يسوى مش عارف ايه
وانا اقولو يابو العساعيس عيب .. وهو ابدا
انا قلت بس اهدي النفوس .. وفي نفس ذات التوقيت المحلي .. اقولك اني عاطل عن العمل لو احتجت حد ياخد بالو من الاستراحه يعني
ومش هنختلف عالمرتب

وربنا يسعدك ويكرمك ويبسطك ويوفقك دنيا وآخره


سلامووووووووز

la3lahakhier said...

احم
كنت واثقة انك لك علاقة بالمعيييييز
فهمت دلوقتى
بس ايه علاقة الديك والمعزة بطبق الدش؟؟؟؟؟
اولا الواجب ده اى كلام
يا ذكى قول اسرار مش اوصف نفسك يعنى قول الحاجات اللى لما يشوفك الناس مايعرفوهاش
فهمت؟
طبعا لا
ماعلينا
البش والهش فى وش الناس جميل لكن احيانا لازم تكون عفيف شوية يعنى ماتخليش شكلك وحش وانتى بتقول عمو هات ربع جنيه اركب المترو مثلا
وبعدين يا ابويا ايه وبتاع ايه اتمدن يا صعيدى بقى قولهم مثلا يس ب ا ب ا او دادى كدا يعنى مش ابويا وكمان لبنات انا لو منها كنت عملت فيك زى مابعمل فى عصام وعلاء بس بلاش فضايح خليهم مستروين
بجد يا باحث انا كنت بتلخبط لما اقرأتعليقاتك واحيانا كانت بتحرجنى جدا لكن لما فهمت اسلوبك عرفت انك رغم انك خنيق ولزقة وغلس كدا وزى القراد بس طيب ومؤدب وابن حلال ربنا يوفقك ويصلح احوالنا جميعا يارب

بت خيخة وأى كلام said...

ايه فينك مش باين يعنى؟
كنت بستحمه

هههههههههههههههههههههههههه
هههههههههههههههههههههههه
ده بجد قاللك كدة
لا والغرابة انه اساسا مش عارفك ومع ذلك قالك انه كان بيستحمى
هههههههههههههههههههههههههههههه

المهم يا معلمى
اخر حتة خالص فى البوست
بتخلينى اتشوق اكتر انى اشوفك لما تنزل القاهرة
ارجوك ارجوك ارجوك
متبخلش علينا
وتعالى قريب



بس يعنى ايه القوانين المتعلقة بالواجب
مش فاهمة الحتة دى

شكرا على التاج وهحاول اجاوب عليه فى اقرب فرصة

عاشقه الفردوس said...

ليه كده الاذي ده
التاج ده مش بحبه

ده فضيحه

عاشقه النقاب حلته وبعتتهولي
وانا عملت نفس طرشه واستهبلت

تقوم تيجي تبعتهولي
يعني ايه بتعجزونا يعني

مااااااااااااااشي
سأحاول
:))



صفاتك دي مش وحشه خالص

حته العصبيه دي بس ه اللي عايزة تعديل

ربنا يوفقك



بس علي فكره انا ضحكت عادي يعني وانت مخدتش بالك مني وانا بضحك وكملت قراءه الكلام عادي:P

وبعدين دي الاستراحه مش المدرسه تفرق يعني

:::::::
خلصت كلامي في مدونتي بسرعه لاني كنت كتبت موضوع كبيييييييييييييييييييييير جدا


بس بصراحه حسيت بعد ماكتبته اني مخنوقه

فقولت هكتب اي حاجه تطلع مني وخلاص

الباحث عن الحقيقة said...

سوووو
ايه النشاط ده يا سووو
اوعى تكون واخد مشطات

مصروف مين يا عم
لا في الحته دي انت اللى ابويا وانا عيل
هات انت المضروف
ان شاء الله يكون فيه فرصة ونتقابل
المشكلة ان لقاء البورصة ده بيكون يوم جمعه وانا طبعا مش هاجي القاهرة يوم جمعة لاني اذا ركبت بعد الصلاة مش هلحقكم برضه
بس ان شاء الله نتقابل
علشان عايز عسقول في حته ضلمة
ايه رأيك ننزل فيه ضرب لغاية ما نعرف اخوه قال ايه عن لونه الشبل

****************

لعلها بخير
مترو بربع جنية
ده كان زمان يا ماما ..وكان ممكن تركبي بيه عجله في بلدكم
انما مترو
اصحي يا لعلها بخير احنا في 2008 يا بنتي
وبعدين هو ده الواجب اللى عندي
ماليش دعوة ها
قلتلك مش بحب الواجبات
عاااعااااا عاااا
بتفخيم العين..ده عياط صعيدى

الباحث عن الحقيقة said...

بت خيخة واي كلام
اه والله قلى كنت بستحمى

المهم يا معلمه
انا اللى خايف اشوفك اليومين دول خاصة واحنا بنقرب على ميعاد اغسطس وحملة التبرع من الدم
ولا يعني عسقول خلع منك اول مرة ..هتمسكي فيا انا
ده انا غلبان
هجيبلك كيسين دم من عسقول ما تخافيش
قوانين الواجب تقدري تعرفيها لما تدخلى مدونة لعلها خير او سيد ..معلش اصلي ماليش في الواجبات

***************

عاشقة الفردوس

طالما اعترفتي انك ضحكتى خلاص براءة
بس بقى في الصحيفة لنا حساب تاني بس اما تيجي هناك

المهم التاج ده اجباري اجباري يا ولدي
انا محبش اتدبس لوحدي

وشكرا انا عارف ان صفاتي حلوه ماهو انا لازم اقول قدامكم الصفات الحلوة طبعا
نيهاهاهاها
بوست احساس كان رقيق وجميل جدا
بس كده انا زعلت يعني كنتى كاتبة موضوع اكبر من كده؟؟
ماشي ماشي وبتحذفيه من غير ما ترجعي لرئيس الجماعة
معيدين اخر زمن

عاشقه الفردوس said...

الواحد زهق من النت عندي

كل شويه اكتب تعليق النت يفصل ارجع اكتب تعليق انسي فيه نقط
ياااااااااااااااااااه


الله المستعان


بالنسبه لفضفضتك دي بقي

فعلا والله التوين عرفنا علي ناس جميله جدا اخلاق وادب واحترام

وبرده عرفنا علي ناس ربنا يهديهم
وناس اعتبرتهم اخواتك بجد


بس كده كفايه بقي لا النت يفصل تاني

عاشقه الفردوس said...

ههههههههههههه هو انت بترد

طيب
اه منا عارفه انك هتقول الصفات الحلوه وممكن تكون صفات مش فيك اصلا
:))

الباحث عن الحقيقة said...

عاشقة الفردوس
بنت حلال
بصي انا قبل ماجي هنا رحتلك مدونتك وسيبتلك نداء استغاثة عاجل
روحي مدونة لعلها خير
هتلاقيها عامله حمله لااااازم تشاركي فيها
خاصة انها محتاجه مترجمات
يلا روحي دلوقتي
هي الصفات دي موجوده وفيه اللى خف عن الاول وفيه صفات جديدة
بقيت اكثر هدوءا وممكن ابدو غامض اكتر
اعمل ايه المفروض ابن حجر كان هو اللى يتكلم عني بس هو مشغول
او تقريبا مساتني لما اموت علشان يكتب عني
اكيدمحدش بيعرف يوصف نفسه صح
المهم
يلا على مدونة لعلها خير

عاشقه الفردوس said...

روحت ياباحث

بس انت بجد بتجيبلي حاجات مقدرش اقولها لا
والمشكله اني مشتركه اليومين دول في مليون حمله
وكمان كنت لسه هطلق حمله جديده
وهتبقي عمليه

الله المستعان
لا شكلي لاازم اظبط اموري سريعا علشان ابدا معاكو الحمله

جزاك الله خيرا وفي ميزان حسنات كل القائمين علي الحمله

صاحب المضيفة said...

ايه ده يا عم أحمد

بجد انت حد رايق قوي وتمام


ربنا يسعدك يا ابوي ويهني بالك

المـــفـــــــقــــــــوعـــــة مــرارتـهــا said...

دلوقتي اسمه هوم ورك

الواجب ده كان زمان وجبر
بس فكرتني بأإبني الصغير وهو بيطلع عيني عشان يعمل الهوم وورك

الباحث عن الحقيقة said...

عاشقة الفردوس
انتى قدها وقدود
وشكرا لسرعة استجابتك

**********

صاحبة المضيفة
وه يا بو عمو ..جاي تقول عليا رايق
كتر خيرك والله الحمد لله على كل حال


***********

المفقوعة مرارتها
بلاش هوم ورك دي احسنا عسار حملة اللغة العربية يجطعونا جطيع
متشكرين يا مودام على الزياره دي

عصفور المدينة said...

نسيت أقول أنني ولله الحمد أول من استورد كلمة
واجب
في مدونات المصريين غشيتها من اخواننا السعوديين وحست أنها أفضل دلالة من كلمة تاج الانجليزية

عصفور المدينة said...

.برجع اقيم كل الجسور التي تكسرت وبتعامل بشكل طبيعي حتى لو مكنتش نسيت


فاكر يا أحمد فيه قصة بتتحكي عن راجل اعطى لابنه مسامير يدقها في سور خشبي وبعدين في الآخر كان فيه مكان المسامير معلم في الخشب أعتقد أنه ينبغي التحكم في الذات لأن المسامير تترك آثارا وربما يكون بعض هذه الآثار ذنوبا

الباحث عن الحقيقة said...
This comment has been removed by the author.
الباحث عن الحقيقة said...

معاك حق يا استاذ عصفور
بس الى ما تعرفوش
قسما بالله لا اذكر اني تعصبت على حد وطلع ان انا اللى فهمت غلط إلا وكان عذرني واتعامل معايا تاني
لكن عمري ما حد هو اللى غلط فيا وخلاني اتعصب ورحت انا بعد كده ابوس ايده واقوله حقك عليا علشان انت عصبتني اوى إلا ولقيت قلبه اسود
رغم ان هو اللى غلطان
هو ده الصنف اللى انا بروح اقيم الجسور معاه
لكن اوعدك ان ده مش هيحصل ابدا
واللى يغلط فيا ..هحذفه من حياتي على طول

جنّي said...

السلام عليكم
انت صاحي ياجميل قصدي يا بوي
قبل ما تشتم وتقل ... بقدم اعتذاري كنت مشغول في إنهاء البحث المتواضع عن اللغة والقرآن إن شاء الله يعجبك

وبعدين مش تجاوب على طول عمال تلف وتدور مع المعيز والديك والدش وفي الأخير الاقيك بتقولنا صفاتك يعني حولت الأسرار لصفات ... ويا ترى نحن من المكروهين ولا؟
هي الدنيا جارلها ايه ؟ كل الناس عصبية وتغضب بسرعة ..
مع إن النبي صلى الله عليه وسلم قال ( لا تغضب )
على طول الحياة
مع السلامة يا حليم

عاشقه الفردوس said...

معلش ياباحث عارفه اني زهتك

بس مش فاهمه وربنا
المفروض اعمل ايه
الكلام مش واضح
ولعلها خير لخبطتني
واللي رد عليا قبلها لخطبني اكتر

طيب هي قالت امثله وناس طبقوها واطفال وبوسترز وحاجات حلوة طيب ي محتاجه الترجمه في ايه

وبعدين كلمت رفقه وقالتلها تقوليلنا مشاريع اقتصاديه وان مامتها قالت ان الستات تبطل شغل وتعمل اكتر مشروعات صغيره

طيب لو كده منا اكمل مواضيع هو انت صح

ولا هو المقصود اننا نكتب مواضيع ونترجمها


انا جيتلك تترجملي الكلام بقي


انا اجلت حاجات كنت بعملها ماعدا حاجه واحده بس والله المستعان
يلا قولولي بقي علشان نبدا

الباحث عن الحقيقة said...

جني
بقيت مشغول اليمين دول يا جني
الناس كلها خلصت امتحانات إلا انت
بس طالما خلصت البحث يبقى فضيت
طب مش كنت تقول يا عم ..عندى كتاب كان هيفيدك اسمه اللغات في القرآن
اتمنى نقدر نشوف عينة من بحثك ده في المدونة عندك

**************

عاشقة الفردوس
والله ياختي ولا انا
مش قادر افهم منها حاجه
وده للاسف لانها هي مش مقتنعه اوى ان حد من النت ممكن يساعدها
ومكتفية بالورس اللى عملاها
لكن يظهر كده بدأت تقتنع
لانها في كل رد بتعطي تفاصيل اكتر
اتمنى تسأليها بشكل مباشر في رساله وتحاولوا تتقابلوا
بجد انا واثق انك اكتر واحده هتقدري تساعديها في كل افكارها ان شاء الله

أم أحمد المصرية said...

صديقي العزيز
احسدك انك انك عملت الواجب انا طلبت من صديقتي عاشقة النقاب الواجب ده و شكلي مش حعرف ازوغ
عجبتني قوي حكاية ابوي دي بس اوعي يكون معناها انك شايف دايما نفسك بابا الذي لا يخطأ احسن يبقي عيب خطير :))
اما تعليقك الاخير عن المدونين و المدونات فالحقيقة انه في الجون تماما
مع خالص تحياتي

appy said...

بجد انت لكاك مووت ههه خخخخخخخخخخخخخخخخ

انت طلعت بتحب المعزه انا بموت بجد فى الخرفان ههههههههههههههه
بس الرساله الخبيثه اللى تحت دى انا مين فيهم اممممممممممم انا المعلم هههههههه مش انت اللى قولت الله بتزعق ليه
بجد اكتشفت فيك خفه دم حلوة قوى
وانك حد بسيط قوى والله
ممكن حاجه ساقعه بقى او ليمون اختك رحانه موووووت والتكيف فصل ابن حجر شالوه من على التونجر والتكيف فلل اعمل ايه

الربان said...

تحياتي

الف مبروك يا استاذ المحكمة حكمت لصالح موكلك....

قدمت حيثيات صادقة و بسيطة لكنها مقنعه...

الصراحة راحه...لكنها بتتعب هذه الايام فاحرص علي ان تغلفها بورق سلوفان حتي تصبح كالسيمون فيليه...عليها اقبال...


تحياتي و تقديري

خواطر رئيس شاب said...

انا عجبنى فى البوست ده كام حاجة

المعزة وانت قاعد تجرى وراها علشان تلحق الكتاب القيم

والدش وانت قاعد تذاكر تحته

والديك ابن الرزلة هو وما ملكت يمينه (الراجل خايف على قوته وقوت عياله )

اسلوبك جميل جدا والله

تحياتى

عاشقه الفردوس said...

السلام عليكم

النت كان صعب انبارح دايما ريكوستات

الله المستعان

بجد مش عارفه اقولك ايه

الكلام اللي قولته عند اختنا بجد كتييييير جدا عليا يمكن مااستحقش ربعه حتي


الله يكرمك

اللهم اغفرلي مالايعلمون واجعلني خيرا مما يظنون

Jana said...

عفوى وتلقائى
ايوة صح.. شفت بنفسى محدش قاللى

ابويييي
اممم برده صح
طيب كده وابن حلال ودماغك كبيرة ..

نحرجك بقى ونقولك نسيت تقول انك كريم وبتعزمنا على الاستراحة دايما
ومش بتاخد مننا ولا مليم
على اساس انى نسيت شنطتى وكده

الجملتين الاخيرتين
مكنتش اعرف ان ليك فى التورية..
بس رفقا بالبعض
فى ناس كتير قلبها طيب اوى ممكن تقول كلمات مش فى مكانها احيانا عن غير قصد وهى فى الاصل الاكثر طيبة وذوق على الاطلاق ..
صدقنى ناس كتير كده
اعرف منهم اتنين لحد دلوقتى

فكر تانى كده
قد تستطيع انقاذ ما يمكن انقاذه

فكر فكر... خلاص فكرت!!؟؟

بنات افكارى said...

السلام عليكم

يعني ان ماكنتش سيرة المذاكرة والامتحانات تبقى سيرة واجب والله دا ظلم الواحد جاي يستريح شوية عندكم يلاقي واجب فى وشة الحمد لله انه ماكنش اجباري على الجميع بس حضرتك ضحكتني ربنا يسعدك دنيا واخرة يارب

بالنسبة لصفات حضرتك ماشاء الله ربنا يباركلك يافندم انا من تدوينات حضرتك لاحظت العفوية دي فعلا ومن تعليق حضرتك عندي لاحظت الابوية دي بردو لما بتقولي
ركزي شوية
وبطلي سهر
بقيتي بتدفعي اجرة نص نفر ..خسيتى ووشك اصفر من السهر
نسيت بس تقولي ماتنسيش يابابا تشربي اللبن قبل ماتنامي بس كويس علشان انا يابوي اللبن مش بيحبني خاااااااااالص
بس على فكرة هو فى كلمة تاني توصف حالة الابوة اللي عند حضرتك دي احسن لان انا لاحظتها بس مش هاقول لحضرتك عليها وكمان لاحظت من تدوينات حضرتك وتعليقاتك صفة تانية ممكن تكون عكس صفة الابوة دي بس مش بتناقضها بالعكس دي بتقوي المعنى التاني اللي كنت اقصده
بس بردو مش هاقول لحضرتك عليه
يلا اللي هايحل الفزورة ليه حاجة حلوة معلش دا تاثير مذاكرة وامتحانات

نيجي لنقطة العصبية مفيش حاجة مستاهلة يافندم والرسول صلى الله عليه وسلم نهانا عن الغضب وقالنا طرق عملية لتخلص منه وكويس ان حضرتك بتدرب نفسك تهدى شوية كان عندي بنت من بنات الجامعة اللي بديهم فى المسجد كدا وفضلت وراها لحد ماهديت يعني مش صعب بس حضرتك تخلي بالك ان الناس مش ملايكة وهاتلاقي كتير ناس بتناقضك فى التفكير فى شوية حاجات تقدر تعملها وقت ماتتعصب تساعدك ان شاء الله تتخلص من الموضوع دا شوية شوية وربنا ييسرلك الحال ان شاء الله
الجزء الاخير حضرتك بئا بجد قولت كلمتنين كان نفسي اقولهم وزي ماحضرتكم بتسعدو بزيارة ناس ليكم ناس كتير بردو بتسعد بزيارتكم ليهم لانهم بيستفيدو منكم اكيد وفعلا احسن مافى االتدوين القلوب الصادقة كتير وربنا ينفع بينا جميعا

اخر حاجة الحملات بتاعتكم ماشاء الله كان نفسي اشارك بس لما اخلص ان شاء الله وانا بفضل الله اقدر اترجم لاني معايا انجليزي وفرنساوي وبدرس الماني حاليا وايطالي بعد شهر بامر الله وياريت اقدر اساعد باي شىء وان شاء الله لما اخلص هابقى ازور الاخوات واتكلم معاهم بس المشكلة فى البعد عن القاهرة بس ربنا ييسر كان لي كام فكرة بعملها مع بناتي فى البلد فان شاء الله انا كمان هاستفيد
وربنا يجعل اعمالكم جميعا فى ميزان حسناتكم ان شاء الله
وماتقلقش يابوي على الشهادة لما اخدها انا مش عندي معزة تاكلهاانا اخري بتفرج على شوية كتاكيت عند الجيران
بس ممكن فى يوم من الايام نربي وماله ماهي دي اخرتنا ان شاء الله وربنا يجعلها اخرة خير وماتنساش تدعيلنا وبلاش تفول علينا

السلام عليكم

Jana said...

والله احترت فى امرك يا باحث
وقد اكون انا من كلامه يغلب عليه التورية
انما قصدت بتعليقى الاخير شخصا آخر اعتقد انك كنت قاسيا بعض الشىء معه وأحببت ان تعيد نظر فى كلامك لها لا اكثر
وذلك من باب وجهة النظر الاخرى .. ورؤية من بعيد ليس الا
ولأن امركما يهمنى كأخوة

اما بالنسبة لى
فلم اعنى شيئا
عموما كما قلت سابقا
تعليقاتك دوما تسعدنى
وانت بتنور مدونتى

لقد اصبت فى استرجاع الاولى وأخطأت فى الثانية ..ارجو ان تعيد الثانية الى مكانها

ارحو ان اكون قد نجحت فى ازالة اللبس
ولا انا اللى مش فاهمة ولا ايه!!!!!؟

Jana said...

حين كتبت التعليق السابق لم اكن قرأت تعليقك الثانى

شكرا لأنك أعدته والاخطاء الاملائية لم تكن كذلك ابدا والله بالنسبة لى
انما هو اللبس من التعليق الاول
اقصد تعليقى ما جعلك تفهم انى اتكلم عن نفسى

ياللخبطة

شوية راحة بقى كده
:)

heba sayed said...

السلام عليكم ورحمة الله وبركاته

اول مرة ازور هذه المدونة الجميلة

بس اللى محيرنى الواجب والهوم ورك ده

ههههههههه الناس لسه خارجة من امتحاناتها شافت واجب تانى برضو وراها وراها

بس بجد مدونة جميلة قولت ازورها يمكن استريح عندكم شوية

يلا سلام

هبة سيد

الباحث عن الحقيقة said...

مع احترامي للجميع
ورغم اني عارف ان محدش فيكم غالبا بيقرا الردود
ولاني الصبح كنت قررت حذف الاستراحة علشان اريحكم من التعب وةاريح نفسي
المهم

اسمحولي هرد على الاخت جنى فقط
اولا انا تلقيت رسالة بتطلب مني حذف تعليقاتي عندكم
ولاني مكنتش فاهعم اي تعليق فحذفت الاخير وبعدين رجعت حذفت المقصود وكنت ناوي مدخلش عندك تاني
لكن تواجدك السريع هنا هخلاني ارجع اعلق عندك تاني

طبعا حضرتك تقصدي ال جي
يا فندم احنا اللي بنزورها وهي اللى مقاطعانا
فاذا كان مقاطعتها دي بسبب زعلها من تعليقي على تعليقها
فتعليقها كان يستحق
ومع ذلك بقيت اروح واعلق عندها
وهي منفضه لحضرتنا
حتى الصحيفة الكاشفة اسأليها اخر مره جت عندنا امتى
وبعغد ده كله هي اللى زعلانه؟؟
سوري انا مش هفضل اتحايل على الناس ويبقى هم اللي بدأ ( بسوء التفاهم) وانا اؤكد لحضرتك احترامي الكامل والتام لها كل اللى قلته انى قلبت مقاطعتها لنا
وعلى فكرة هي لو فهمت كلامي صح هتفهم انه عتاب اكتر منه هجوم
وان انا اللى زعلان
بس اعمل ايه يعني
انا مش بعتبر نفسي خسرتها على الاقل من ناحيتي واقصد كأنسانه واخت وان على استعداد دايما للوقوف جنبها اذا احتاجتني في اي شي
انها كزميلة ومدونة بقولها اني مش هزعل من عدم زيارتها لنا
دي الخلاصة

مع اصرارى said...

أنا عملت الواااجب يا ريس

جنّي said...

انت صاحي ياجميل

رحتلك الصحيفة فلم أجدك .. قلت أكيد مستخبي في الاستراحة .. الموضوع اللغوي نزل .. تقدر تقول بحث وليس ببحث حاجة صغيرة كده على قدي ..

وانت ايه حكايتك عاملي مشاكل في كل حته .. انت ماينفعش معاك غير لعلها خير هي اللي بتخلصه من جتتك

على فكرة الاختبارات تنتهي عندنا يوم الأربعاء القادم 25/6

أحمد كمال said...

واضح ان الواجب ده "وجب" مع ناس كتير ..

تحياتي لك على الإجابات :)

بنات افكارى said...

السلام عليكم

مع احترامي للجميع
ورغم اني عارف ان محدش فيكم غالبا بيقرا الردود
ولاني الصبح كنت قررت حذف الاستراحة علشان اريحكم من التعب وةاريح نفسي
المهم

المهم فعلا اولا كدا انا سبحان الله من ردود حضرتك الصبح حسيت ان فيه حاجة غريبة او في حاجة مزعلة حضرتك اولا كدا

مين قال لحضرتك ان غالبا محدش بيقرا الردود اللي هايهتم يزور حضرتك ويعلق عندك هايهتم يرجع ويشوف رد حضرتك عليها علشان في ناس مش بتدخل تقضي واجب تعليق وتمشي لا دا احنا معلش يعني بنتكلم وبعدين انا كل ماخد ريست من المذاكرة ولا اهرب منها ادخل علشان اشوف الرد على التعليق ولا يكون فيه تدوينة جديدة علشان مش عندي ريدر وانا قررت ابقى تلميدة شاطرة ومفيش حاجة تفوتني الاقي حضرتك بتقول كدا طيب ماعلينا من دي

مين بئا قال لحضرتك ان حذف الاستراحة هايريحنا لو هايريح حضرتك ماشي لكن اذاي قررت انه هايريح الناس اللي بتقدرك وتذورك يعني بس مش مشكلة احنا عرفنا خلاص ان العصبية بتخلي حضرتك تاخد قرارات متسرعة
انا مش جاية اجبر حضرتك على حاجة بس انا عايزة اقول لحضرتك انا واحدة من الناس التدوين دا اثر فى حياتي كتير ولما بتعامل مع اي حد فيه مش بعتبر ان فيه اسوار نت وكلام من دا لا لان احنا بني ادمين كفاية اوي الخير اللي بتحاولو تعملوه وربنا يجعله فى ميزان حسناتكم

طيب دا نا كنت جاية اشتكي لحضرتك بما انك المحامي بتاعنا علشان كنت بكلم الاخت لعلها بخير واول مرة اكلمها لسه بضيفها لقيتها بتكلمني واتفقنا على شوية حاجات لما اخلص ان شاء الله وقررت تشرفنا بالزيارة وبعدين فى الاخر طردتني وقالتلي روحي ذاكر يابه
واول مرة حد يقولي يابه
طيب يرضي حضرتك كدايابوي
الاخت تعمل معايا كدا

وعلى فكرة سبب معرفتي بيها كان حضرتك والاستراحة هي واخوات تانيين نحسبهم على خير يعني اي عمل هانقوم بيه حضرتك هاتشركنا الاجر فيه عايز تستغنى كل دا ؟ دي حاجة ترجع لحضرتك
انا ماليش اني اتدخل فى اي شىء ماليش فيه ومش عايزة اعرفه بس عايزة اقول لحضرتك على حاجة ياريت وقت عصبيتك او وقت اتخاذك لقرارات مهمه تذكر النية
وافتكر حضرتك اي حاجة قبل ماتلغيها من حياتك كانت نيتك ايه قبل ماتعملها وهل تستاهل انك تلغيها ولا لا علشان حضرتك ممكن تلغيها بكل مافيها سواء كتابات قيمة نفعت الناس او اشخاص نحسبهم على خير بنستفيد منهم بردو انا اسفة اني بتكلم بعشم شوية وانا مش من طبعي على فكرة كدا بس انا بجد لي اخ واحد واسمه احمد بردو فاعتبرت حضرتك زيه وبكلمك بنفس الاسلوب لانه بيكلمني بنفس اسلوب حضرتك فى التعليقات كدا وبعدين محدش يزعل من حضرتك حضرتك اعترفت انك عفوي ودا اسلوبك وكل انسان له صفات ينبغي على اللي حواليه يتعاملو معاه على اساسه خصوصا لو مش بتغلط فى حد ونحسبك على خير يعني انا صحيح زياراتي كانت قليلة بس مايمنعش اني كنت بدخل واتابع من وقت للتاني حتى لو مش هاعلق والا ماكنتش رجعت بس تعرف حضرتك

دا بياكدلي الصفة التانية اللي فى حضرتك واللي بردو مش هاقولك عليها يلا بئا الغي بئا الاستراحة وانا هاتلكك وهاسحب الاشتراك من الصحيفة ومش هاتشوفني فى الفصل ولو قررت تتعصب فى يوم وتلغي الصحيفة هاشوفلي قهوة تانية اروح استريح فيها ها بئا
على فكرة انا والله مش قصدي اتدخل او اخلي حضرتك تغير رايك او قراراك فى حاجة بس حبيت الفت انتباهك لبعض على الحاجات علشان تتردلي فى اي وقت حضرتك تلاقي فيه اي حاجة عندي فى المدونة او في انا شخصيا انا هابقى سعيدة لو لقيت حد بيوجهلي اي نصيحة واسفة لو كنت طولت على حضرتك او قولت كلام مالوش لازمة وماتنساش تدعلينا بس وانت هادي الله يكرمك لا تنسى وتدعي عليا خلي بالك فى ملايكة بترد

يلا ربنا يحفظك يافندم ويحميكم جميعا وينفع بيكم ويرزقكم البصيرة ان شاء الله ويروقكم الاخلاص دايما
السلام عليكم

mony said...

ازيك يا باحث

علي فكرة انا مش بحب اقعد اقرأ الواجبات ديه اوي

يعني لما اشوفها عند حد اعدي عليها تخاطيف كده يعني

بس اول ما بدأت اقرأ البوست ده كملت الي اخر قطرة اقصد كلمة

حسيت انك قاعد يتحَكٍي

و بعدين داحنا طلعنا جرايب يا ولد العم

بس ابوي و امي هم الي اتولدوا و اتربوا هناك و جم اتجوزوا هنا
لكن جدتي ام ابوي نقلت لنا الصعيد بحاله هنا

من فراخ لبط لمعيز(من غير دش) و الفرن البلدي و العيش البلدي الصعيدي و الطاجن الصعيدي
و يا سلام علي البيض المطجش في الطاجن

بس قبل ما اختم بقولك حاول تتحكم في النرفزة ديه
اصل ده طبع صعيدي
و انا و اخواتي ياما عانينا منها في بابا
لغاية دلؤتي اعصابي بتتعب من اقل شئ بسبب عصبية بابا

و خلٍي كظم الغيظ باب لدخولك الجنة
بس احتسب علشان تاخد ثواب


معلش بأه طولت عليك

يالا بأه علشان نشوف اشغالنا


سلام

la3lahakhier said...

احنا بقى حنلعب مش حنشتغل ولا ايييييييييييه؟
بقى انا اقول حبا فى رسول الله نحد من الغضب ونببببببطل نتأمص يقوم محامى الحملة الهمام هو اللى زعلان ومأموص ؟؟؟
وكمان بنات افكارى بتشتكينى وقامت من على المذاكررررررررررة نهارك مش فايت
انت يا استاذ منك لها لها له
في حملة هنا شغلاك وعايزين همة بطلوا رغى
يلا الكل يروح يسجل حضور ويعد عدته
اما لعب عيال صحيح
هاتوا العصا ياولاد مش نافعة الطيبة

أبو خطاب said...

السلام عليكم ورحمة الله وبركاته

رجاءاً مراجعة صندوقك البريدي

إحترامي وتقديري

ňįĝŗő said...

بص بقى أنا ولا أعرف انت متضايق من إيه ولا مين اللي ضايقك
كل اللي أعرفه إني لما قريت إنك كنت هتلغي الإستراحة اتغظت منك جداً و كان فاضل شوية و ألم شوية محلاوية من اللي معروفين بقوتهم و جبروتهم و نجيلك أسيوط و يبقى لينا صرفة تانية معاك
انت بتقول إيه يا أحمد؟
تلغي إيه؟
انت فاكر علشان الإستراحة أو الصحيفة انت المشرف عليهم يبقى من حقك تحذفهم وقت ما تعوز؟
لأ .. خلى بالك إن المدونتين دول بتوعنا احنا و انت يدوبك بتكتب فيهم و بس
و احنا اللي بنقرأ
أنا عاوز فين ابن حجر اللي سايبك تعمل اللي انت عاوزه كده

أحمد يا أبويا فوّق كده الله يرضى عليك

قال يصحى الصبح يحذف المدونة؟!!!
بيحلم

روّق يا أستاذي

استنى استنى
مين دول اللي مش بيقروا التعليقات
ده طُعم يعني علشان تعرف إن احنا بنقرأ التعليقات ولا إيه؟
طيب تصدق بالله أنا واحد من اللي بيقعدوا يقرأوا تعليقك ييجي خمستلاف مرة
مش علشان مش فاهمه .. آه فكرك مش يدويك لبعيد
علشان أنا أصلن أصلن بأحب أقرا كلامك
طيب أقولك على حاجة تانية سر بين و بينك
أنا لما بأشوفلك تعليق في أي مدونة تانية بأتسمّر قدامه و أقعد أقراه
آه و الله .. مش بأقولك بأحبك في الله

شوفت أديك ضيعت جزء من وقتي الثمين في الكتابة و الكلام
شوف بقى هتدفع كام

يلا أسيبك بقى علشان أقوم أستحمى
)^_^(

شوفت الوش الغريب ده

يلا سلام يا ابن عمي

الساحرة said...

ممكن افهم الاول في ايه وعاوز تقفل الاستراحه ليه افهم الاول بعدين اعلق

علي الواجب اللي انت ضربته الواجب دة معمول اي كلام

ممكن حد يفهمني

جنّي said...

انت فين ياأبو حميد ؟

لماذا لا ترد على التعليقات ؟
لو مشغول قولي وأنا أرد بالنيابة والمحكمة عنك .. خيرك سابق ياعم الحاج
وبعدين وسع صدرك شوية وطول بالك ألم تعرفهن بعد ؟ وتقبل أي شئ مالم يمس كرامتك ..

سلام يا صاحبي

نـــــــور said...

:)

ماشاء الله .. أول زيارة لمدونة حضرتك والصراحة الأسلوب شدني جدا

اجابات طيبة وموفقة .. ربنا يكرمك

تحياتي

الباحث عن الحقيقة said...

لا انتم فهمتوني غلط يا جماعة
انا مش فكرت اوقفها او اقفلها علشان زعلان من شخص معين

هقولكم بصراحة
اصل انا اتضايقت علشان فيه ناس رحت وجهتلكم دعوة علشان يشوفوا موضوعي في الصحيفة
وجم فعلا
بس هنا في الاستراحة
للاسف فيه ناس انا ببقى منتظرها في الصحيفة
مكانها هو الصحيفة لكن مش بتتعدى الاستراحة ابدا
يعني مثلا الاخت الغالية والعزيزة عاشقة النقاب ام اسراء
بقالها ثلاثة شهور بتيجي تزورنا
بس هنا في الاستراحة
وعمرها ما دخلت الصحيفة غير في الموضوع الاخير..اول مره تدخل يعني مش دخلت وقرت ومشيت من غير ما تعلق
اخونا العزيز الربان
وجهتله دعوة للصحيفة
وسبق وزراني قبل كده بناء على دعوة برضه
لكن جه الاستراحه مش الصحيفة
فقلت الناس بتيجي عند الاستراحة وبس
انما لو عندي مدونة واحده
كل الناس هتدخل الصحيفة
وبالتالى تقرا
تتعلم
رسالتى توصل لاكبر عدد
بس
ده كان سبب ضيقي وخلاني افكر اقفل التعليقات
لكن خلاص عدلت عن الفكرة

عاشقه الفردوس said...

المسامح كريم

ماكنتش ذكرت اسماء ياباحث

النصيحه ع الملا فضيحه

يلا خير
عموما انت افضل فاتح المدونتين لان كلاهما رائع
:))))))

الباحث عن الحقيقة said...

عاشقة الفردوس
لا يا اختي انا قصدي من ذكر اسمهم المعاتبة الاخوية مش اكتر
مش قصدي حاجه وحشه يعني لان الناس دي كتر خيرها انها بتيجي يعني