Saturday, August 9, 2008

الاندهاشة الكبرى



أتوجه أنا بن حجر العسقلانى بالشكر للأخت العظيمة بت خيخة و أى كلام لاقتراحها الرائع بإننا نتبرع بالدم بشكل دورى ... و أتوجه بالشكر لكل من حضر يوم التبرع و حضر احتفال ما بعد التبرع .. بجد اليوم كان راااااااااائع .. خصوصا إنى اكتشفت إمكانياتى الجبارة كما هو واضح من هذه الصورة .. وكما يقولون: صورة تغنى عن ألف كلمة



نيجى لموضوع التدوينة .. بصوا يا جماعة .. أنا عايز أتكلم فى الموضوع دة ببعض الصراحة و عدم التكلف .. لكن دة هايخلينى محرج حبتين .. عشان كدة أنا هاغمض عينى .. و هاتكلم

و قبل ما أبدأ .. أحب أنوه إلى إن معنى "الاندهاشة الكبرى" هايبان فى آخر التدوينة

حاجة تانية معلش قبل ما أبدأ .. الموضوع دة اتكلمنا فيه يوم التبرع بالدم اللى فات و اتقالت فيه أفكار كتير جدا و اللى أثارته هى الأخت
"نهر الحب" صاحبة مدونة أوتار و شوية مدونات تانية

ندخل فى المهم

مدرس علم النفس فى سنة تانية ثانوى قال لنا عبارة لسة بترن فى ودانى لغاية دلوقتى .. قال لنا إيه؟؟ قال: إن الرغبة الطبيعية فى الزواج هى التى تنشأ عن رغبة الإنسان فى الانتماء .. الانتماء إلى أسرة مستقلا بها مسئولا عنها

العبارة دى بتوضح إلى أى مدى إن الدافع الرئيسى وراء الزواج هو دافع اجتماعى .. تلعب فيه العلاقة الإنسانية بين أفراد الأسرة الدور الأهم .. و أعتقد إن أمر زى دة معروف عند الناس و مش محتاج تفسير أو شرح .. لكن الملاحظ أن رغبة الإنسان فى تكوين أسرة لتحقيق الانتماء بتتأخر فى الشعور بيها .. أو مش بتظهر بشكل ملح على الإنسان خصوصا لو كان عايش وسط أخواته و أبوه و أمه بشكل متناسق و متناغم

فى مقابل دة بتبتدى تنمو عند الإنسان رغباته الفطرية فى الانجذاب للجنس الآخر .. و إلحاح هذه الرغبة بيزداد بشكل كبير جدا مع الأيام .. يعنى كمثال .. إن افترضنا جدلا إن أى انسان بيبتدى يشعر بإلحاح رغباته للجنس الآخر منذ سن الخامسة عشرة .. و فى ظل ظروفنا الاقتصادية المنيلة بنيلة فى مصر مش بيقدر يتجوز قبل سن التلاتين .. فلنا أن نتخيل أن الإنسان يتعرض لضغط رغباته الجنسية يوميا و لمدة خمستاشر سنة على الأقل فى ظل المواد الإعلامية شبه الإباحية
و الإباحية .. فإنه يكون من الصعب جدا وسط هذا القدر من الرغبة الجنسية أن ينتبه الإنسان لميله إلى الانتماء لأسرة لتحقيق الارتباط بأفراد أسرة يحبهم و يحبونه و يوجه لهم كل اهتمامه و مجهوده .. من الصعب جدا أن يتجنب نداء الجسد الذى يصم الآذان من أجل أن يستجيب لنداء إنسانيته و تكوين أسرة

و من هنا فإن رغبة الإنسان فى إشباع إنجذابه الجنسى للطرف الآخر تكون هى المحرك الأول و الرئيسى فى رغبته للزواج هذا إن أراد أن يشبع رغبته بشكل شرعى .. و هنا تنقلب الصورة .. فبدلا من أن يكون الزواج أصلا يتبعه إشباع الرغبة الجنسية كفرع له .. أصبح إشباع الرغبة الجنسية هى الأصل و إقامة الأسرة فرعا لها .. و هنا تظهر عند الشاب معايير إختيار شريكة الحياة بشكل ظالم جدا للبنت .. فنجد معايير الطول و القوام و الشكل و لون الشعر و ما إلى ذلك أهم بكثير من معايير طباع البنت و اهتماماتها و مدى التوافق بين الزوجين بل و مدى التوافق بين العائلتين

و طبقا لما هو معروف و مكرر حتى فى الأفلام العربى فإن الأيام الأولى من الزواج يزول فيها هذا الإلحاح الضاغط الذى تراكم عبر السنين من الانجذاب للجنس الآخر .. و لا يبقى إلا المسئوليات و الواجبات و الحقوق لتبدأ المشاكل

بعد الكلام اللى فات دة .. هانلاقى إن المعيار الأخلاقى و الاجتماعى فى البدء بخطوة الزواج مفتقد بشكل كبير .. و دة جعل الأسر تفقد الثقة بشكل كبير فى أى شاب يتقدم لخطبة بنتهم .. طب يعملوا إيه عشان يتثبتوا من جدية هذا الشاب ؟؟؟

الحل الذى يفضله معظم الناس فى استبيان جدية الشاب بيكون فى امتحانه فى مدى قدرته على الكع (يعنى يقدر يصرف قد إيه).. يعنى لازم شقة بمواصفات معينة .. و شبكة .. و مهر محترم .. و فرح .. و فساتين و جزم و زيارات و مناسبات و بلاوى زرقا بعيد عنكم .. لو الشاب بالفعل عايز البنت بجد .. فطبعا هايحاول يعدى كل الصعوبات دى عشان يتجوز البنت .. أما لو الشاب واخد موضوع الجواز دة بعدم اهتمام فهايخسع من أول مطلب و يرفع العلم الأبيض و هات يا خلعون

فى الآخر الموضوع أصبح إن جدية الشاب تزداد كلما ازداد استعداده للإنفاق .. طب الشاب الجاد و مش قادر ينفق؟؟ فليذهب إلى الجحيم

و بصراحة أنا - للأسف - مع هذا الرأى (الرأى اللى بيقول أن جدية الشاب لازم تبقى مربوطة بقدرته على الكع) .. لأن معظم الشباب - زى ما قلنا - بيلجأ للزواج مش من أجل تكوين أسرة .. لكن إما لأجل إشباع رغبة جنسية .. أو عايز يتجوز و هو مش مقدر مسئوليات الزواج و اهتمامات ما بعد الزواج و إيه هى الحقوق و الواجبات اللى تخص كل فرد من أفراد الأسرة .. و الكارثة الكبرى إن لو شاب من دول صادف و لقى أسرة بتتقى ربنا و عايزة تسهل موضوع الزواج بلا تعقيد و قللت قوى من شروطهم المادية .. تلاقى الشاب دة يبتدى يفقد ثقته فى العروسة و أهلها لأنهم كدة بيبيعوها رخيص و هايقول لنفسه:"لا يا عم .. دى بنت رخيصة و أهلها راميينها" .. أو يستمر فى الموضوع و يتجوزها لكن هاتسقط من نظره هى و أهلها و هايتعامل معاهم دايما على إنهم درجة تانية .. طبعا شباب عايزين الحرق و أخلاق منيلة بنيلة

نقطة تانية مهمة ممكن تظنوا فيها إنى متطرف .. النقطة دى هى إن مصر على الرغم من إن فيها ذكور كتير إلا إنها تقريبا مافيهاش رجالة إلا من رحم ربى .. يعنى إيه ؟؟ يعنى ما تلاقيش شخص ينفع تجوزه بنتك بسهولة (دة بافتراض إنه جاد فى طلبه للزواج و قادر عليه).. دايما هاتلاقى فيه شوية عيوب قاتلة ما ينفعش تقبلها .. طبعا هاتقولولى: ما كل الناس لازم يكون ليها عيوب زى ما ليها مميزات .. طبعا هاقول لكم إن الإنسان اللى ليه عيوب و مميزات دة هو الإنسان العادى المتزن .. و للأسف دة تقريبا مش موجود .. الموجود هو شخص يكون متصفا بعدة صفات يستحيل تقريبا أنك توافق عليه لابنتك .. أنا مش باطلب إنسان كامل خالى من العيوب .. لكن باطلب إنسان يكون متزن .. و دة نظريا مطلب عادى و مشروع و ليس فيه شىء مرفوض .. لكن للأسف هذا الشخص "العادى" هو تقريبا غير موجود إلا نادرا .. و تفاصيل الموضوع دة كتيرة جدا مش وقتها دلوقتى


فالخلاصة فى رأيى .. إن أزمة الزواج فى مصر على الرغم من إنها ليها جانب اقتصادى مؤثر و خانق بشدة .. إلا إن الجانب الأخلاقى و الاجتماعى بين الطرفين بل و بين العائلتين هو العنصر المؤثر بشكل هائل

عشان كدة كنت ناوى بإذن الله أن أتكلم على الصحيفة عن موضوع وضع المرأة فى بيئتنا و أشوف شوية نقط مهمة لعلها توضح الفارق الكبير بين وضع المرأة الفعلى فى المجتمع و بين وضعها فى المجتمع كما جاء به الإسلام .. فإن الفارق بينها واسع جدا .. و أود أن أقول إن الموضوع صعب جدا و متشعب و كل اللى أنا هاحاول أعمله إنى أعرض وجهة نظرى فى مجموعة محدودة من النقط لعلها - إن كانت صوابا - أن تساهم فى تغيير الأوضاع للأفضل دة إن كان للى بنكتبه تأثير حقيقى على أرض الواقع .. بس إعداد الموضوعات دى هايستهلك منى ليس أقل من شهر عشان ينزل أول موضوع بإذن الله هذا إن وجدت الوقت الكافى .. و يا رب يا معين

الموضوع دة أثارته الأخت "نهر الحب" فى لقاء التبرع بالدم اللى فات .. فقلت لنفسى إنها مناسبة جيدة إننا نناقشه على الصحيفة خصوصا إنه كان من المواضيع إللى شاغلة دماغى جدا (أيوة شاغلة دماغى طبعا .. أمال شاب زى الورد زيى داخل فى الـ28 سنة يعنى سن الضياع و لسة ما اتجوزش هايشغل دماغه بإيه ؟؟ بالنظرية النسبية لآينيشتاين مثلا؟؟ و لا بميكانيكا الكم لماكس بلانك ؟؟)

خلاص بقى .. اتكلمنا جد كتير .. نتكلم حبة هلس شوية

بعد استقصاء حالات أصحابى اللى اتجوزوا و مقارنة حالتهم قبل الجواز و بعده لقيت إن هناك تلات تغيرات دائما بتحصل عند كل واحد بعد ما يتجوز

التغير الأول: قابليته للإندهاش بتقل
التغير التانى: يتم ملاحظة قدر كبير من الثقة الزيادة فى كلامه

التغير الثالث: رغبة شديدة فى النوم لساعات طويلة فى أيام الزواج الأولى (و كمية المواقف الطريفة اللى بتحصل لأصحابى فى موضوع النوم دة محتاجة تدوينة لوحدها)


مرة كنت قاعد باناقش النظرية دى مع التمنياوى طه على القهوة فى أمان الله بحكم إننا لسة أعذبين .. فدار الحوار الآتى

أنا: ألا قول لى يا تُمن إحياة أبوك
التمنياوى: قول يا عم .. بس سيبك من أبويا
أنا: هو ليه اللى بيتجوز من أصحابنا بتلاقيه بقى أكثر هدوءا و اتزانا عن ذى قبل ؟؟
التمنياوى: كركركركركركركركر (دة صوت الشيشة اللى هو بيشربها) .. إيه يا عم اللى بتقوله دة .. يابنى ما تقول كلام نفهمه
أنا: يعنى ماتلاقيهوش بينفعل معاك زى الأول .. و تحس إنه بيتعامل مع الدنيا كأنها نكتة بايخة و تلاقيه بيضحك نص ضحكة مش ضحكة كاملة كأنه خلاص فقس كل المواضيع اللى فى الدنيا و مافيش حاجة بقت تدهشه .. يعنى من الآخر .. قابليته للإندهاش بتقل
التمنياوى مندهشا: و عايزه يندهش ليه .. ماهو خلاص .. اندهش الاندهاشة الكبرى

روحت باصص له .. و هو بص لى .. ثم انفجرنا فى الضحك .. و كل واحد مننا بيتمنى إنه يندهش

50 comments:

Unknown said...

السلام عليكم ورحمة الله وبركاتة
ابن حجر العسقلانى
بجد انا سعيدة جدا انى اتعرفت عليك
ولى الشرف
ربنا يكرمك ويوفقك بجد
الموضوع اللى حضرتك بتناقشة الوقت له اكثر من جانب
اولا
الجوانب الاخلاقية
المرجعية الدينية
التربية والنشاة
ونظرة الرجل للمراة
ونظرتة ايضا للحياة الزوجية وكيف يريد ويحب الحياة ما بعد الزواج
للاسف المشكلة كبيرة وما علينا الا العمل بجد لتغير رواسخ خاطئة

اان شاء الله لى عودة اخرى للنقاش


بجد انا اشكرك لاهتمامك
وكمان انك تناولت الموضوع بجمال ورقى
بجد شكرااااا

تحياتى
واحترامى الشديد

nigro said...

أتاريك كنت قاعد ساكت و بتتأمل في سحابات السماء
كنت بتمخمخ و بتسنتر الموضوع صح في دماغك بعيداً عن غوغائية تشتت الأفكار

بالنسبة لمسألة قياس مدى جدية الشاب في الزواج بمدى قدرته على الكع أنا شبه متفق معاك
هي بتنفع في حالات

و في حالات تانية
تلاقي قدرة الشاب الفائقة على الكع ما هي إلا محاولة منه لكسر عين البنت و أهلها و التعالي عليهم فيما بعد الجواز
من منطلق : أنا جبتلك اللي عمرك ما حلمتي بيه و معيّشك عيشة ماعشتيهاش عند أهلك
انت تحمدي ربنا إنك اتجوزتي واحد زيي
وكل ده من حوارات مُجرّبة قبل كده

يعني أحياناً يكون قياس على غير ذي ثقة
و الإنفاق بيبقى سلاح ذو حدين

أما بالنسبة لمسألة الإندهاشة الكبرى فأنا هأروح بعيد عن المعنى المقصود بيها في كلامك و اقولك
إن اندهاشتي الكبرى كانت بيك يا عساقيلو
بجد يا محمد انت ماتعرفش معزتك في قلبي قد إيه؟
معزة إيه؟
ده انت ليك قطيع معيز بحالة في قلبي

ربنا يبارك فيك يا محمد و يوفقك لما يحبه و يرضاه
و يمد و يبارك لك في الزمن ما يجعلك تقوم ببحوثك اللي فيها فكر و نفع كبير



يلا سلام

3ala asm masr said...

يا سيدى يارب تندهش ونفرح فيك لما اندهاشك يقل
بص موضوع الجواز ده موضوع كبير اوى انا هعلق على موضوع ان عدد الشباب فى مصر لكن الرجاله اللى تامنهم على بنتك قليلين
انا بشوف مناظر مبعرفش اقول اودامها غير لا حول ولا قوة الا بالله
شباب ضايع ومتحسش فيه باى نسبه من الرجوله وبستغرب اتكتبلهم فى البطاقه ذكر ازاى
ربنا يرحمنا
اما بقا حكاية الولد اللى بيشوف البنت رخيصه لما اهلها يسهلوا الجواز فالمشكله فيه مش فيها وصدقنى ده ميستاهلش غير واحده قويه ومفتريه تطلع عينه وربنا مبيسبش حق حد

Anonymous said...

First, I am so sorry that I am writing my comment in English.
I have just read your topic. I need to say it is very good and has in-depth treatment for some faces of the problem. Sure there are lot of points need to be studied deeply. In addition, some faces need to be analyzed from many different points of view.
I totally agree with u that the moral and social problems that are like a plague in our society have a great impact in the marriage problem. We have a real problem our morals are decreasing in a very high rate. This creates a mistrust problem between us.
I will discuss many issues with you when we meet. And I will post some comments soon

Melkhouly

بث تجريبي said...

السلام عليكم
بص انا حاسة ان الموضوع عبارة عن حلقات متواصلة
بمعنى العنوسة مرتبطة بالظروف النيلة الظروف النيلة جاية من اقتصاد انيل
والاقتصاد الانيل جاى من سيساسة منيلة بستين نيلة والسياسة النيلة بتؤدى الى فساد فى فساد.
وزى ما قولت ان ان المجتمع بقى مريض نفسى بيعانى من امراض كتير
زى ما ذكرت لو الولد اهل العروسة تساهلوا معاه هتلاقيه شك فى العروسة
ودا غصب عن الشاب بسبب ان فى بنات يعنى
وكمان الشاب من دول قبل الجواز بيبقى لف ودار وعرف دى وعرف دى وعرف مصايب دى ودى
فدا بيدى شعور عنده بعدم الثقة فى اى بنت ولو فكر انه يستقر هيخاف انه يحصل له كدا
ولو فرضنا انه اتجوز هيتحول لسجان لمراته نظرا لشكه فى اى واحدة.

ههههههههههههههههههههههههههههههههههههههههههههههههه يعنى ايه اندهاشة كبرى؟؟؟؟؟؟؟
ههههههههههههههههههه

سلاموز

Mostafa Abdelmoneam Badr said...

عسقول
هى فصيلة دم دراعك اليمين ايه؟
راجعلكwaiaiaiait.

Anonymous said...

Ebn Hajar. I am a guy with 28 year , and also thinking in relativity of Einstein and Quantum of Max Blank
:), i think solving some Quantum Mechanics problems is much easier than solving the marriage problem
:P
Melkhouly

رئـــــيسـة حزب الأحلام said...

الله أكبر عليك
الموضوع كاتبه بمنتهى الحياديه ولا جيت على البنات ولا جيت على الشباب
وبجد دة اللى حاصل
----------------------------
راى بعد المقال دة ان الموضوع مقفل يعنى لو اهل البنت تغاضوا عن اشياء سينظر العريس على انها فعلا رخيصة ولن يحافظ عليها لان الرجل الشرقى لابد ان يدفع دم قلبه للحصول على زوجة
وغير ان الشباب المصرى تلات تربعة زى مااتفضلت وقلت فى الضياع
اخلاقى ونفسى واشياء اخرى
وفى النهايه المقال دة جايب من الاخر
تحياتى

رئـــــيسـة حزب الأحلام said...

هههههههههههههههههههههههه
وايه اللى انت كاتبه فى الاخر دة
دى نكته
بجد جامدة
أضحك الله سنك

ابن حـجـر الـعـسـقـلانـى said...

نهر الحب

و عليكم السلام ورحمة الله و بركاته

بل أنا اللى سعيد بالتعرف عليكى و الف شكر على الدعاء الجميل

بالفعل الموضوع متشعب جدا و أنا هاحاول بإذن الله إنى أعرض نقط محددة و مختصرة على قدر ما أقدر

و مرة أخرى أشكرك على الكلمات الجميلات و فى انتظارك لمتابعتنا دوما
---------------------

nigro

أخ .. فقستنى يا ابو النجاجير و أنا سارح و متأمل

يا راجل دة أنا اللى اندهشت جدا بمعرفتك .. و نفسى نتقابل تانى .. و ان شاء الله نتقابل قريب .. أنا احتمال أروح لقاء بورسعيد .. يا ريت تبقى موجود .. و يا رب أكون أنا كمان موجود

و عايزين نفرح بيك بقى و تتجوز و تندهش بجد .. بس يكون عندك القدرة على الكع .. و لا لسة ماعندكش القدرة على الكع ؟؟
قول لى و انا أسلفك من جنيه لجنيه و ربع .. عشان تعرف إن أنا مش بخيل و باحب أساعد الشباب

و يا رب يا معين على مواضيع الصحيفة .. و شكرا بجد على اطمئنانك
ياللا .. أشوفك أمس

-----------------

3ala asm masr

و الله عندك حق ... فيه شباب كتير مثلهم الأعلى هو تامر حسنى و أشباهه .. بصراحة بابقى هاتخنق منهم و مش مستحمل أبص لواحد فيهم

أما بقى اللى بيبص إن البنت رخيصة عشان أهلها عايزين يسهلوا الجواز .. فدى صفة فى الرجل الشرقى .. ماعرفش إمتى هانشغل عقلنا و نتقى ربنا
و نورتينا بتعليقك

ابن حـجـر الـعـسـقـلانـى said...

محمد الخولى باشا .. الزعيم الكبير

بص يا ابو حمووووووودة :-) احنا متفقين بالكامل فى التعليق الأولانى .. و كنت عايز أقعد معاك النهاردة لكن معلش .. البلوتوث نفخنى و طير منى اليوم .. نقعد بكرة ان شاء الله على سيلينترو و نديها كلام لغاية ما نورم

بخصوص التعليق التانى .. أنا مت من الضحك .. بقى مشاكل علم ميكانيكا الكم و النسبية حلها يطلع أسهل من حل مشكلة الجواز ؟؟ بس بصراحة عندك حق .. أهو آخرك تلاتين اربعين كتاب هاتقراهم فى الفيزيا و فى الآخر هاتعرف تحل المشكلة الفيزيائية .. أما المشكلة الاجتماعية بتاعة الزواج فدى مالهاش كتب تتقرى إلا كتاب الحياة .. و دة ماحدش بيقدر يخلصه إلا لما يكبر فى السن قوى و يكون اتجوز و خلف .. و ساعتها بيكون مالهوش لازمة لأنك خلاص هاتكون عيشت حياتك سواء كانت حلوة أو لأ

و ياللا يا ابو حمووووووودة ... أشوفك أمس

----------------------

Do not Press F1

بجد و الله الموضوع صعب جدا و متشعب .. و متداخل بشكل كبير عامل زى فزورة البيضة الأول و لا الفرخة

إلى جانب إن بالفعل زى ما قلتى إن الثقة بقت مفتقدة جدا بين الناس و بعضها .. ماحدش واثق من التانى .. عشان كدة الأطراف بتتشدد فى مطالبها

و بخصوص سؤالك عن الاندهاشة .. ليه الإحراج بس :-) خلينا ساكتين أحسن

ابن حـجـر الـعـسـقـلانـى said...

مع إصرارى

أنا فصيلة دم دراعى اليمين هى
H
و دى يعنى الاختصار بتاع كلمة "هيموجلوبين" .. و مستنيين رجوع سعادتك مرة تانية .. بس ابقى اعمل قول لنا على نسبة هيموجلوبينك عشان احنا مش بنقبل حد يعلق و يكون هيموجلوبينه أقل من ستاشر

و منور يا باشا

-----------------------

رئيسة حزب الأحلام

ازيك و إيه أخبارك؟؟
بالفعل .. الراجل الشرقى راجل غريب فى تعامله مع المرأة ... لازم يتشحتف و هو بيحصل عليها .. و لو ما اتشحتفش هايحس إن فيه حاجة مش مظبوطة فى الموضوع

و اللى أنا كاتبه فى الآخر دة من وحى ضغوط السنوات الخمستاشر

و يا رب نندهش

son's egypt said...

السلام عليكم
انا معك في هذا الموضوع اصبح معاييرالشباب في اختيار شريكة الحياة بعيده تمام عن اش شئ اخر غير اشباع ما لدية من رغبات فقط
اصبحت بعيده عن الاخلاق والثقافة والتوافق

عيله مفتريه سابقا said...

يا اندهاشاتك يا عسعس
الموضوع اللى فات ده يا استاذى بيتلخص فيه كل ما يؤرق ويعكر صفو عملية الزواج

بجد الموضوع شامل لكل ما هو يسبب العنوسه وتأخر الزواج لدى الشباب

عايزة اقولك اننا لو قدرنا بس نحاول نوعى ونحل ولو جزء من الجانب الاخلاقى

مش هيكون فى ازمه فى مصرنا الحبيبه من العنوسه او تأخر سن الزواج للشباب

لو تغيرت الفكره واتضح المضمون الخاص بالزواج

مش هيكون هذا هو الحال

على العموم ربنا يكرمك على كلامك

وللمرة الالف انا مكنتش متخيلاك بهذه الروح الخفيفه والمرحه والطيبه

سلامى لك اخى الكريم

Empress appy said...

هههههههههههههههه
انا عرفت كنت بتبص فى السقف على ايه
هههههههههه هموت من الضحكك على شكل الاندهاشه دي
طبعا انت عارف راى يالا ربنا معاكوا بقى

الـسـيـدة نـون said...

ههههههههههههههههههههههههههههه
هههههههههههههههههههههههههههههههههه
ههههههههههههههههههههههههههههههههههههه
ههههههههههههههههههههههههههههههه


وانا بقول برضه الراجل حصله ايييييييه؟
الراجل حصله اييييييييه
اتاريه اندهش الاندهاشة الكبرى

انا قلت من زمان ان هانى ليه الجنة

بس واضح ان الرجالة كلهم ليهم الجنة


معلش يا عسقول
مش عايزة اعلق على فكرة البوست دلوقتى
خليها لما اشوفك مرة تانية


كفاية انى اعلق على الاندهاشة الكبرى

تحياتى ليك وللتمنياوى وللباحث

سلام
اختك خيخة

Soul.o0o.Whisper said...

السلام عليكم و رحمة الله و بركاته

ياااااااااااااااااه
و أخيرا ابن حجر
احمدك يارب


ازيك يافندم؟؟؟
أخباراتك ؟؟اهراماتك؟؟ جمهورياتك؟؟

بس أنا فقستك بردوا يابن حجر
يا جماعة الراجل عاوز يقولكم انه خلاص
بالنسبة للناس اللى عاوزة الكع
هو مؤمن بالنظرية
و بالنسبة لموقفه من الزواج و رؤيته ليه
اهو وضح النظرية بردوا

يعنى من الاخر بيقولوكم
جوزووووووووووووووووووووووووووووونىىىىىىىىىىىىىىىىىىىىىىىىىىىى
هاعمل اللى انتوا عاوزينه

هههههههههههههههههههههه
و بعدين فى الاخر بردوا حب يوضح بقيت الفروع بتاعت تكوين اسرة
هههههههههههههههههههههههههههههههههه


ربنا ييسرلك انت و جميع شباب المسلمين
و بالتبعية البنات بردوا
ههههههههههههههههه


بص بصراحة موضوعك جامد وفى الصميم
بس بجد مش قادرة اناقشه الوقتى عشان عاوز روقان
و انا مش فيا دماغ الوقتى

أول ما استرده هاجى اناقشك على طول
ياللا سلااااام

Anonymous said...

الله يدهشكوا زى ما دهشتونى ..ايه الموضوع الفوق الممتاز ده الله ينور هو التبرع بالدم بيعمل كده موضوعك وطرحه احسن من رائع بعدين مش غريب عليك الاسلوب الكتابى الشيق ده ما انتا الصحيفه الكاشفه والله انتا اكتر من رائع ربنا يكرمك ويسعدك ويجىى عليك رمضان تكون محقق كل اليى انتا عايزه ..ده على اساس انك هتلاقى الفانوس..كل رمضان وانتا بالف خير ..اسيبك فى رعاية الله وامنه..

مهندس مصري بيحب مصر said...

بقى انت من انصار نظرية الكع
طب نتجوز ازاي يا عم اذا كان اللي معانا ما يكفيش الكع المطلوب
ثم انا مش واثق من ان قابليتهم للإندهاش بتقل
بس هما الهم اللي على دماغهم بيخليهم متنحين بسبب المسؤليات المالية الطاحنة في عصرنا المولع نار

Asmaa mahaba said...

شوفت يا اخويا يا عسقول كلهم عاوزين عين خضرا وشعر بنفسجى واحنا نروح فين يعنى يا جماعه السمار نص الجمال مفيش فايده نشغل عبحليم اسمر يا ابيضانى مفيش فايده ...الحل الوحيد نهاجر للصومال عشان نتحسب من ضمن البيض هناك
حكايه تسهيل الزواج دى للاسف بتتفهم غلط يعنى مثلا مثلا حصلت معايا انا سخصيا جه عريس وابويا شاله من ع الارض شيل سيبك انت ابويا دا اصله غلبان والله بس طالع على مفيش المهم العريس لما لاقى الاهتمام زايد والعمليه متسهله قال لالا يبقى فى عيب عبيط ميعرفش العيب الوحيد ان العروسه واهلها هبل وطيبين عشان اكرموه
عشان كدا اهل العروس بيخافوا حتى يتساهلوا ليتفهموا غلط
عموما ربنا يدهشك يا سيدى اعتقد ان اللى بيتجوزوا بيضحكوا نص ضحكه لما يدركوا ان اصبح عندهم مسؤليه كبيره وهم مكانوش حاسيبين حسابها الحل والوحيد لحل العنوسه حاجتين حسن الظن بالناس ودا افتقدناه والاحساس بالامانه والمسؤليه من الشباب
واوافقك ان الذكور كتير لكن الرجال قليلين...ربنا يعفينا من الوحش ويكتبلنا كل خير
تحياتى ليك سومه_87

mohra said...

يدهشنى و يسعدنى ان يأتى هذا الكلام من رجل
اتمنى ان اقرأ لك عن الشخصيه فى هذا الزمن
تحياتى

جنّي said...

السلام عليكم

كيف حالك ياعسقلاوي وكيف صديقك واخبار برده ايه وهو فين
بلغه سلامي وقوله اني رجعت من الاجازة التدوينية ودونت من تاني ..

وانت واحمد الباحث مش ناوييين تندهشوا ولا ها تبوروا في رقبتنا ..

انا ها اخلي صديقي جنّي يمسك جردل وخيشة ويمسح المدونات يعني يقوم بعملية مسح (سيرش ) للبحث عن عروستين حلوين علشانكم وامري لله .. صعبان علي عذوبيتكم وسيبك من التمنياوي اللي ملى المدونة بريحة المعسل هو معسل تفاح ولا كان مغمس ..

نتكلم جد شوية هناك معايير قديمة ومفاهيم عفى عليها الزمن في الزواج
المغالاة في المهور والشبكة مع ارتفاع اسعار الذهب والشقة اللي اربع مطارح وعفشة ميه والقايمة والمؤخر وحاجات كتير بتكتف العريس بتخليه يخلع ويضرب عرفي ارخص ..
ثقافة المجتمع لابد من تغيرها وجعلها تتمشى مع اسلامنا الجميل
وللموضوع بقية
سلام ياصاحبي وصاحب صاحبي
وسلملي على احمد

شكرا

حياتي كلها لله said...

السلام عليكم و رحمة الله و بكاته
ماشاء الله المدونة جميلة و رائعة .........و علي فكرة الجواز يعني مش حلو اوي كده يعني ادخل بس عندي و اقري موضوع يوميات زوج سعيد جدا و انت تغير رايك علي طول
تحياتي

abo salah said...

بعد السلام عليكم


موضوع غاية فى الأهمية

أكاد اتفق معك فى كل سطر من سطوره

ولو أن نظرية الكع دى ضررا كبيرا للجادين الخارجين عن هذه القاعدة

دا غير ان الكع مش دايما اختبار لجدية الشاب

الأخ التمنياوى دا مشكلة
رده الأخير ضحكنى اوي

تحياتى ليك
تقبلنى فى زيارتى الأولي
وكل سنة وأنت طيب وإلى الله أقرب

Gannah said...

السلام عليكم
أنا أول مرة هنا وطبعا الموضوع اللى انت بتتكلم فيه مهم وواقعى جدا
ومن الصعب تغيير المفاهيم لان كل شىء من حولنا بيضغط على الشباب وحتى لو قاطعت الفضائيات والاغانى كفاية لبس البنات فى الشارع اللى أصبح مهزلة كبرى وطبعا كل واحد عايز يتجوز ملكة جمال وبعد ما يكتشف ان جمال الشكل مش دايما مرتبط بجمال الجوهر بيكون الوقت فات
علشان دى اول زيارة مش عايزة ارغى كتير
انا بشكرك انت والباحث عن الحقيقة ويا ريت تبلغوا سلامى ودعوتى ليكم لزيارتى علشان تعرفوا انى بتكلم بس المشكلة عندى انى مش بعرف اتكلم فى وسط مجموعة ودى مشكلتى من ايام ما كنت طفلة فاعذرونى وياريت بس بعد كده متشتيكوش من انى رغاية
لكم منى خالص التحية والاحترام

Anonymous said...

ايه يا جماعه انتوا فين انشاءالله تكونوا بافضل حال انا كنت فى زياره خاطفه فقولت اتطمن عليكوا كل رمضان وانتوا بالف خير ...اسيبكوا فى رعاية الله وامنه..

قوس قزح said...

محمد و احمد

بما ان المدونة دى بتوه فيها و مش بعرف انهى واحد بتعتكم و مين اللى بيكتب هنا ولا هنا

انا هسيب لكم تعليق هنا و خلاص

انا بشكركم على مشاركتكم معنا يوم البؤجة و سعيدة بمعرفتكم

و جزاكم الله خير

Anonymous said...

بداية اللى قاله مدرس علم النفس بتاعك ده كلام محترم جدا و فعلا موزون

لكن بالنسبة للاندهاشه الكبرى فهى صحيحة
لان بعد الزواج يظهر تغيرات كثيرة جدا على لانسان
تجده اكتر اتزانا
يتروى فى التفكير قبل اى قرار
من الآخر
بيهدى

او بالمعنى الآخر عند البعض و ان كنت لا احبذه

بيتهد
:]

tarek alghnam said...

ابن حجر
الاسم دة حسسنى انى داخل على التاريخ كله
بس لما قريت البوست حسيت بشخصيه رائعه
ماشاءالله عليك تناولت موضوع هام برؤيه جميله
تقبل تحياتى
وكل عام وانت بخير
واتمنى التواصل

Unknown said...

السلام عليكم ورحمة الله وبركاتة
اولا انا حابة جداا اشرك يا ابن حجر وكمان يا باحث على اليوم الجميل والاستضافة الرائعه لنا
جزاكم الله خيراا
بجد انا وجروب بورسعيد فى غاية الشكر لكم والامتنان
ويارب تشرفونا قريب جداا

الدرعمي said...

السلام عليكم ورحمة الله

خسارة إني مكنتش معاكم

بس أديني لحقتكم بعد التبرع

وبعدين لازم يشوفوا حل

عشان أنا بخاف موووووووووت

من الإبر

يحاولوا يخترعوا طريقة جديدة

وإلا هحلف منا متبرع أبدا

ويتحملوا بقى

يشوفوا هيجيبوا دم زي دمي منين

هعهعهعهعهعهعع


كل سنة وأنت طيب

رمضان كريم


آدم

قررت أكون عانس said...

اندهشت من الموضوع بس مش اندهاشة كبرى ولا حاجة

موضوع مهم وكلام وجميل وضح لى حاجات كتيرة اوى

شكرا ع الموضوع ويارب نشوفك مندهش اندهاشة كبرى

nigro said...

لا مؤاخذة يا عساقيلو الكلام ده لأخونا الباحث .. احنا لينا أرض تانية نتكلم عليها

إيه يا عم أحمد؟
إيه يا عم
ماكنش دور برد ده يا راجل
انت روحت و قلت عدّولي
انت فين يا متر
مستخفي ليه كده بقالك كتير
انت زهدت التدوين ولا إيه؟
الصحيفة بتنادي
طيب ابن حجر و عرفّني اللي فيها
انت بقى إيه نظامك؟
واحشنا يا عم الحاج
خلينا نشوفك .. نسمع كلامك
طمّنا عليك يا صاحبي

كل سنة و انت إلى الله أقرب و على طاعته أدوم
كل سنة و انت طيب يا أحمد

بلغكم الله و إياي فضائل الشهر الكريم



يلا سلام

جنّي said...

السلام عليكم ورحمة الله وبركاته

كل عام وأنتم بخير
كل عام وأنتم صائمون
كل عام وأنتم مصلون
كل عام وأنتم قائمون
كل عام وأنتم قانتون
كل عام وأنتم متصدقون
كل عام وأنتم مغفور لكم
كل عام وأنتم معتمرون
كل عام وأنتم قائمون ليلة القدر
كل عام وأمتكم الإسلامية منتصرة

اللهم بلغنا رمضان وأهلّه علينا بالسلامة والإسلام واليمن والبركات والنصر والتمكين

أخوكم
سعيد

Mony said...

فعلا هو موضوع موجود حوالينا بس مسمعتش ولا شفت حد مهتم بيه اوي

او علق عليه بالحيادية ديه

فعلا عندك حق في كل اللي قلته
الذكور كتير بس الرجالة نادرين


و البنات عايزة راجل علشان تقدر تعتمد عليه باقي حياتها


اخر 3 ملاحيظ علي اللي لسة متجوزين صح فعلا

بس مش عارفة ليه


اما الاندهاشة الكبري ففعلا اندهشت لما قريتها


و عقبال ما تنول الاندهاشة الكبري انت كمان

Gannah said...

محمد واحمد
كل عام وانتم الى الله أقرب
وعلى طاعته أقدر
وكل عام وأنتم بخير
رزقنا الله العفو والمغفرة ودعوات لا ترد

تحياتى

Soul.o0o.Whisper said...

السلام عليكم و رحمة الله و بركاته

ابن حجر
رغم انى وعدتك بالرجوع لمناقشة الموضوع

إلا انى المرة دىجاية أقولك انت و الباحث
كل سنة و انتو طيبين

و رمضان كريم ويعوده عليكم يارب بصحة و سلامة

تحياتى لكم انتوا الاتنين

Asmaa mahaba said...

هى فين مواضيعك الجديده؟؟؟

الـسـيـدة نـون said...

انا جاية ادحرج التماسى والسلام
واقول لاهل المدونة الكرام
عسقول والباحث
كل سنة وانتوا طيبيبن

سلام
اختكم خيخة

قوس قزح said...

يارب
كلما طرق هذا العبد بابك
أفتح له كنوزك
و سخر له عبيدك
و ابسط له رحمتك
اللهم اجعله من الصائمين القاثمين
الركع السجود
و بارك له فى شعبان و بلغه رمضان
فى يسر و سلامة و امان
اللهم امين

كل سنة و انت الى الله اقرب

ابن حـجـر الـعـسـقـلانـى said...

son's egypt

بالفعل عندك حق .. قليل قوى اللى بيختار شريكة الحياة و هو مركز على صفاتها كـ "إنسان" مش كـ"أنثى" .. أنا معاك تماما

-------------------------------
عيله مفتريه سابقا

ازيك يا مفترية
و شكرا على كلامك الجميل
ربنا يسهل و نقدر نكتب حاجة عن وضع المرأة الغير سليم فى مجتمعنا بحيث يحرك الراكد و الآسن عند الناس

و و الله حاجة تسعدنى لما ألاقى الناس شايفانى دمى خفيف ... بس عايزة الصراحة؟؟ انت بجد اللى دمك خفيف جدا ... بس انت كنتى متخيلانى إيه ؟؟ هاطلع فاس من جيبى و أروح اضرب الناس فى دماغها ؟؟

و بجد تعليقك أسعدنى جدا
---------------------------

appy

أنا كنت بابص فى السقف عشان باتأمل فيما وراء السقف .. أقصد فيما وراء الطبيعة باحثا عن أسرار الكون و الاندهاشة الكبرى

ضحكتينى و الله يا آبى

----------------------------

قوس قزح

بالفعل يوم البؤجة كان جميل جدا ... بإذن الله نداوم على أعمال الخير .. و جزاكى الله كل خير بالفعل يا قوس قزح و جعل اليوم دة فى ميزان حسناتك
------------------------------

بت خيخة وأى كلام

ربنا يزيدك انبساط و ضحك يا خيخة

بالفعل .. الرجالة ليهم الجنة من اللى بيتعمل فيهم من أهل العروسة .. و بالتأكيد من اللى بيحصل لهم من العروسة بعد الجواز

و أنا و الباحث و التمنياوى طه بندحرج التماسى عليكى

أخوكى عسقول
---------------------------------

Soul.o0o.Whisper

أختنا العزيزة ... و عليكم السلام و رحمة الله و بركاته

كيف أخبارك ؟؟ احنا الحمد لله بخير .. مفتقدينك بقالنا كتير


بس هوبااااا ... انت فقستينى كدة بسرعة

جوزووووووونىىىىىىىى

:-) :-) :-)

يا ريت البنات تسمع منك عشان لما آجى اتجوز ألاقى الدنيا سهلة من غير تعقيد

بس بجد .. تحياتى ليكى .. فصصتى الموضوع صح .. ربنا يعينا على إننا نكتب حاجة تأثر بشكل إيجابى


و شكرا على دعائك الجميل

و كمان شكرا على إطرائك على الموضوع .. و معلش أنا اتأخرت فى الرد .. بس اعذرينى

و ممكن لما نكتب المواضيع المفصلة على الصحيفة يبقى فيه فرصة أكتر إننا نتكلم و نتناقش فى التفاصيل

و بجد نورتينا بتعليقك

-------------------------------------

عايزه اتطلق

دة التبرع بالدم بيعمل أكتر من كدة .. هو احنا لسعنا من شوية

بس بجد أشكرك جدا على كلامك الجميل .. و على دعائك الأجمل

طب كنتى ادعى لنا نلاقى الفانوس ... على العموم .. لما نلاقيه ليكى عندنا خمسة و سبعين قرش هدية

و كل سنة و انت طيبة

---------------------------------------

مهندس مصري

ياااه يا راجل ... واحشنى جدا جدا .. و كنت سعيد جدا بالشات معاك المرة اللى فاتت .. ربنا يكرمك كدة و تندهش

و الله يا باشمهندس أنا باحب النظرية بتاعة الكع دى بمزاجى ... بص لو الواحد لقى راجل يصلح بالفعل لبنته أو أخته .. أنا أعتقد إن الواحد مكن يرضى بيه حتى لو فقير جدا

ثم حكاية الاندهاش دى ليها جوانب أخرى غير المسئوليات يا هندزة .. افهمنى بقى .. واحد اندهش اندهاشة كبرى .. فيه إيه تانى هايدهشه؟؟ فهمتنى و لا لسة؟؟ نبقى نكمل كلامنا على الشات يا زعيم
------------------------------------------

سومه...مجنونه فى بلد عاقل

يا بنتى انت تعليقك مش معقول ... موتنى من الضحك .. خصوصا حكاية السفر للصومال دى

و بجد .. أنا بنفسى شوفت شباب من دول .. و بصراحة ليهم دماغ عايزة تتغسل بصابون .. حاجة مستفزة فعلا إن تسهيل الزواج يبقى مدعاة لشكوك .. بجد بجد مافيش رجالة فى البلد

و يسمع من بقك ربنا و اتجوز كدة قريب .. خصوصا كل زمايلى اتجوزوا ماعدا أنا و التمنياوى طه .. نفسى تطرأ عليا تغيرات ما بعد الزواج .. و كفاية بقى كدة عشان خلاص هاعيط
----------------------------------

mohra

إحنا سعداء جدا بزيارتك لينا و بجد تعليقك أسعدنا جدا ... ربنا يسهل و نكتب حاجات مناسبة على الصحيفة الكاشفة بعد رمضان ان شاء الله

------------------------------
جنّي

ازيك يا راااجل ... أحمد الباحث بيسلم عليك جدا جدا جدا و خصوصا لما عرف إنك باعت له السلامات

و الله يا ابو العفاريت أنا نفسى أندهش امبارح قبل النهاردة .. بس العين قصيرة و الإيد طويلة

معسل مغمس ؟؟؟؟؟؟ و انت عرفت منين ؟؟؟ يبدو كدة إنك ليك فى اللون يا زعيم .. طب كتم على الخبر و حقك محفوظ

بس بجد عندك حق ... المطالب عند بعض البنات بقت مغالى فيها جدا .. يبدو إن الحل الوحيد إنى أشتغل حرامى

------------------------------------

Dr/Salma

و عليكم السلام و رحمة الله و بركاته

معقولة الجواز مش حلو للدرجة دى ؟؟ ياللإحباط :( و أنا اللى كنت خلاص هاموت و اتجوز تقريبا كنت هاتجوز على روحى خلاص

بس نعمل إيه بقى فى دماغنا اللى مش بتقتنع بإن الجواز مش حاجة حلوة إلا لما نخوض التجربة

بس ادعى لنا فى رمضان كدة إننا نندهش .. و نسيب الباقى على ربنا
-------------------------------------

abo salah

بعد و عليكم السلام

أنا معاك إن نظرية الكع دى نظرية منيلة بنيلة .. أنا أول المتضررين منها .. لكن الوضع للأسف سىء و مافيش مفر منها

و بخصوص التمنياوى طه ... التمنياوى طه دة مشكلة .. فظيييييييع .. بيموتنى من الضحك على طول

نفسى يسمع الكلام و يعمل لنفسه مدونة

و بزيارتك دى منورنا نور نورانى أنور من النور اللى نورنا
--------------------------------


Gannah

و عليكم السلام

بصراحة قبل ما أعلق .. بجد زيارتك منورانا .. و سعداء إننا نلاقى من ضمن المعلقين

و الله مرة دكتور عندنا فى الكلية قعد يتكلم معانا فى موضوع مقاييس الجمال المبالغ فيها اللى الشباب بيشوفها على الفضائيات و بالتالى بيطالب بيها البنات .. و بصراحة قال لنا كلام جميل جدا .. الدكتور دة

اسمه شريف عبد العظيم اللى هو مؤسس جمعية رسالة للأعمال الخيرية .. بصراحة قال نفس كلامك تقريبا

و من عنينا الاتنين هابلغه سلامك .. بس عندنا انت تاخدى راحتك فى الكلام .. احنا كان بيجيلنا تعليقات بمقام صفحة و نص وورد .. يعنى براحتك خااااالص

و بجد سعداء بزيارتك
--------------------------------------------

عايزه اتطلق
الف شكر بجد على السؤال الجميل .. احنا الحمد لله بخير بس مشاغل الحياة

و كل رمضان و انت بخير

-------------------------------------------------

قوس قزح

بالعكس .. دة إحنا اللى سعداء بالفكرة و بالمشاركة .. و سعداء أكتر بإن ناس كتير اهتمت و شاركت .. و مستنيين باقى النشاطات بإذن الله

و فى ميزان الحسنات ان شاء الله

و كل عام و أنت بخير
---------------------------------------

عبدٌ من عباد الله

و أنا اللى كنت فاكر إن الهدوء و الاتزان دة ليه أسباب أخرى ... يا جماعة انتم كدة بتصدمونى .. و شكلى كدة هاتراجع عن رغبتى فى الزواج .. أنا مش عايز اتهد يا عم

و لا أقول لك ... الواحد يتجوز و يتهد أحسن ... أهو يلاقى حد يسنده

و بجد .. زيارتك نورتنا و مستنيينك دايما و عذرا على التأخر فى الرد

ابن حـجـر الـعـسـقـلانـى said...

طارق الغنام

الله يخليك ... هو بالفعل اسم تقيل حبتين بس خلاص بقى ملازمنى

و بجد أشكرك على كلامك الجميل .. و أرجو أنك تتابعنا دايما

--------------------------

نهر الحب

إزيك يا نهر

بالعكس و الله ... اليوم كان منور بيكم كلكم .. انتم كنتم ضيوفنا .. لكن احنا موجودين على طول .. أما انتم اللى نورتونا لما جيتم

بجد و الله .. و أستاذنا أبو خالد بيعطى اليوم طعم جميل

و تنورونا دايما يا رب
--------------------------------


ADAM


و عليكم السلام ورحمة الله و بركاته
يا عم يا ريتك كنت جيت .. مش مهم تتبرع بس كنت شاركتنا اليوم و أحداثه

على العموم ابقى تعالى المرة الجاية .. و انا هابقى أديك كيس من التسعة أكياس اللى أنا باتبرع بيهم كل مرة .. ما تقلقش

و كل سنة وأنت طيب
-----------------------------------

قررت أكون عانس


تعليقك جميل جدا جدا .... قصير بس رائع .. و بجد شكرا على الكلام الجميل .. و يا ريت نشوفك دايما متابعانا

--------------------------------------
nigro
أبو النجاجير يا منجرة

ازيك يا رااااااااجل

كان نفسى أشوفك فى التجمع بتاع البؤجة .. بس معلش .. الجايات أكتر

بس بجد بجد بجد ... عااااااااايز أشوووووووووفك

و كل سنة و انت مليون طيب

--------------------------------------

جنّي

و عليكم السلام ورحمة الله وبركاته

بصراحة ... جزاك الله كل خير ... و لك بمثل ما دعوت لنا و أكثر

دعاء جميل جدا

ربنا يرزقك النظر إلى وجهه الكريم

أحمد بيسلم عليك جدا جدا

---------------------------------------

mony

الف شكر على كلماتك الجميلة

و بالفعل ... الرجالة مابقوش موجودين اليومين دول .. قليلين جدا

و التلات ملاحيظ دول سبحان الله مافيش حد من أصحابنا بيتجوز إلا لما بيظهروا عليه بالفعل .. حتى إحنا بقينا نتحدى بعض .. و احنا اللى مش متجوزين بنكس لأنهم مش بيقدروا يداروا التغيرات دى

و يا رب التغيرات دى تطرأ علينا احنا كمان

و شكرا جزيلا على التعليق الجميل
---------------------------------


Gannah

بجد ربنا يكرمك على دعائك الجميل .. و لك بمثل ما دعوتى لنا و أكثر ... ربنا يؤتيكى فى الدنيا حسنة و فى الآخرة حسنة و يقيك عذاب النار

Jana said...

اللهم تقبل منا صيامنا وقيامنا وصالح اعمالنا
وارزقنا الاخلاص فى القول والعمل
اللهم اجعلنا من المتوكلين عليك ..والفائزين لديك.. والمقربين اليك
وارزقنا اللهم فضل ليلة القدر
واكتبنا فى زمرة المقبولين لديك..والنائلين رحمتك وغفرانك وعتقك يا كريم
كل عام وأنتم الى الله أقرب

L.G. said...

كل سنة وانتم بخير

رمضان كريم

Anonymous said...

http://zahrapharm2000.blogspot.com/2008/06/blog-post_24.html

خبر هام جدا

Anonymous said...

http://zahrapharm2000.blogspot.com/2008/06/blog-post_24.html

Anonymous said...

انت الحمدلله خليت كل شاب وبنت فى حالة شك

ojg said...

وهو فيه اندهاشه اكبر من كده؟؟
بس بجد كنت حيادي جدااا
يعني لا جيت علينا ولا عليكو
وبالنسبة لسياسة الكع
فهي فعلا زي مانت قلت
مجبر أخاك لا بطل
ربنا يستر علينا

الشاطر حسن (أبو على) said...

حقيقى يا عم حجر انا مش معاك فى نقطتين ان القدرة على الكع مهمه لتحديد جدية الشاب وبكرة تدوق من نفس الكاس وإن الإندهاشة الكبرى سببها اللى فى دماغك وفى شيشة صاحبك كل الحكاية انك لو لقيت حد من زميلك اترقى فى الشغل تصرفاته بتتغير حسب دوره الجديد وفهمه لهذا الدور وكذلك فإن المتزوج يكون مسؤل عن اسرة فتتغير تصرفاته وطريقة تفكيره حسب الدور الجديد المنوط به كسبع البرارى وده طبعا لمده بسيطة لغاية ما زوجته او حماته او كلاهما يبدؤا عملية الترويض للمذكور أعلاه

دعاء مواجهات said...

ههههههههههههههههههههه

جميل والله ياابو العساقيل

انا المفروض كنت اقرا الموضوع من زمان اوى

من ساعةما قولتلنا على عنوانه ومرديتش تقول تفاصيل

فاكر اكيد..

كتير من كلامك لا كل كلامك تقريبا

صح وهو اللى بيحصل

تعرف لما قولت هنعرف ايه هى الاندهاشه الكبرى ف الاخر

افتكرتك هتعلن عن مقولتلك المشهورة

(الرجاله كلهم ..)

اللى عجبتنى وكيفتنى جدا

نفسى والله تكتب بوست عن الحكايه دى بجد

عاوزينك تنورنا عندى ف البلوج

سلام

وكل سنه وانت طيب