Friday, September 12, 2008

ملاحظات قاهرية ..>>> يتبع

السلام عليكم
منذ شهر تقريبا وطئت قدمي ارض القاهرة بهدف الاستقرار
وبالفعل اصبحت اعيش بها وبالتحديد الجيزه - اخر فيصل
حاجات كتير في القاهرة لاحظتها ولفتت نظري
فكرت ادون الملاحظات دي
لكن للاسف الكسل جعلنى افقد الكثير وانسى الكثير منها
ببساطة البوست ده قد يراه البعض رخم ..لكن استحملونى لقيتنى مضطر علشان كمان موضوع الاندهاشة الكبرى اللى طول ده
نبدأ ملاحظاتنا في نقاط متفرقة
........
كنت سعيد جدا بلقائى مع المدونين واخص البت خيخة بالتحية والسلام وجوز شرابات
............
الصباغ ..شخص تلقائي وتماما كما تخيلته
............
سووو .. ماندمجناش بالسرعة اللى كنت متوقعها جايز لانه طخين ودخل مطعم مطلعش منه
............
ابو خالد ..هو ده اللى تتمنى يكون صاحبك ..ابوك ..اخوك الكبير.باختصار شخص رائع
............
نهر الحب ..عجبنى هدوء شخصيتها وافكارها
.............
خالد همس الاحباب ..تحس انه اخ طبيعي بدون اى اصطناع
.............
جنه ..صمت يدعو للاعجاب وكلام حين يكون للكلام فائدة
..............
مش فاكر الباقي
.............
ملاحظات قاهرية
اكتشفت ان المسجد اللى بصلي فيه سلفي
واكتشفت كمان انهم بيأذنوا يوم الجمعة اذان واحد ..وزعلت اوى علشان ضيعوا عليا الركعتين بين الاذانين
..............
حرمت اشتري حاجه من بقال ملتحى او مسن تظهر عليه علامات الطيبة
اكتشفت ان البقالين وبائعى الاطعمة في مصر ليسوا سوى ..لصوص
.............
العملة ..رغم ان المصريين بيتعبوا جدا من اجل الحصول على العملة ..لكن اسؤ عملة ممكن تشوفها هى النقود في مصر ..رديئه بشكل مستفز
..................
العملة المعدنية ..ناس كتير مش بتقبلها ومكروهه نفسيا
حد الركاب قال : المشكلة كمان انها تقيله
فقلت في نفسي ..ماهو اللى اخترع الجنية المعدن لو كان بيشيله كان ندم على الفكرة دي
انما اكييييد عمره ما استخدمه بالكتير شاف تصميمه على الورق
...................
العيش غالي في مصر ..بس دى مش مشكلة المشكلة لما يكون حجمه معفرت وردئ
وحشنى خبيزك يامه
.................
رغم الزحام الشديد في القاهرة لكن العجيب انه نادرا ما تلاقي حد بيدوس على جزمتك او يخبط في كتفك وانت ماشي
.................
بائعى المناديل في الشارع : يبقى ماسك باكو المنديل وبيرفعه ناحيتك ويقول : لله
طب يعنى انت بتبيع ولا بتشحت ؟؟؟؟
...............
رغم اني مش بحب النقاب لكن الحسنة الوحيدة اللى شوفتها فيه هو انه حفظ كرامة كتير من البائعات في الشوارع
..............
سيدة عجوز رايحة المنيب ..مشيت معاها وانا بقولها تعالي اوريكي تركبي المنيب منين ..لقيتها زوغت مني
الجبن ده ..يفسر لنا ليه كل واحد بيحب يكون في حالة
.............
لا توجد ثقة بين افراد الشعب المصري ..غالبا
............
البنات ..رغم كثرة الفتيات لكن ادركت سبب العنوسة في القاهرة الكبرى وهو ..لا يمكنك الوثوق باي بنت حتى لو كانت منقبة وتقوم بتعليم الفتيات التجويد في احد المعاهد الدينية المتخصصة
..........
المعاكسات اقل مما كنت اتصور ..وذلك لان العلاقات منتشرة بكثرة
والغريب هو ذلك الرضاء الخفي من الوالدين عن افعال بناتهم او اولادهم
..........
فتيات الطبقة الراقية ..التدين نوع من الكماليات
...........
الريبة والشك وعدم الثقة ..هو ما يجب ان يكون شعارك في العمل وإلا ..هيتاكل على قفاك عيش كتير
...........
فهمت ليه شخصية احدى المدونات التى كنت اعتبرها اخت ..لماذا كل حديثها مادي وعدم ثقة بان هناك من يفكر بالمساعدة لوجه الله
علشان الناس هنا مش بتعمل اي شئ إلا اذا كانت تنتظر مردود مادي حال او ..ولو بعد حين
ومع ذلك فضلت اني اقطع تعاملي معها ..محبش حد يعاملني بالشكل ده
............
سؤال : لغاية دلوقتي بقالي شهر مش لاقي حد اتكلم معاه في موضوعات دينية
هتخنق
فكرت اني ادخل معهد اعداد الدعاه لمجرد اني ألاقي حد اتكلم معاه
ولكن هل تتحول الفكرة لواقع
احتمال ضعيف
..............
حتى الان كمحامي أرفض العمل في الجنح او اي عمل جنائي حتى لا اكون عونا لظالم او مدافعا عنه
ولكن الى متى؟
ومع ذلك لا اعتقد اني سوف استسلم رغم المكاسب المادية التي يحققها العمل في هذا الشأن
...............
الحياة مش سوده ولا هي وردي
في القاهرة ..ألوان اخرى وجميعها لدى الناس .. بيضاء!!!! عجبي
..............
رمضان كريم وكل سنة وانتم طيبين
..............
الحياة ..رحلة الى الله ..الله في كل مكان
الله في كل حياتنا
الله من حولنا
الله معنا
الله في كل عملنا
الله
ولا حول ولا قوة إلا بالله
كل سنة وانتم طيبين

44 comments:

عصفور المدينة said...

وربما صحت الأجسام بالعلل :)

صيد الخاطر said...

والله بر بحري كله نور بمجيك من الصعيد

ولو نطولوا كنا عملنالك زفة جبارة بتعطيش الجيم

عموما نورت
ملاحظاتك جميلة وقيمة وفعلا واقعية

بالذات حتت الانتفاع المقابل دي

Ahmed Al-Sabbagh said...

تصدق يا واد يا باحث عن الحقيقة انا كنت بحبك جدا من بعد اللقاء

دلوقت بحبك اوى اوى

مش عارف ليه حسيت ان شخصيتك شفافة ونقية اوى

Unknown said...

الحمد لله الذي عافنا وفضلنا على كثير من الخلق تفضيلا
انا كمان مبحبش القاهره
بعلنها على الملا
الحمد لله اني في بلد ساحلي واعيش في مدينه ريفيه ما زالت تتمسك بالعيب والحرام
وازاي البنت بنت والولد ولد
احزنتني بكلامك يا باحث
المشكله انه صدمني بواقع قابلته ومعرفتش فين الخلل بتاعه
بس انت قلت الخلل فعلا
دين واخلاق
ربنا معاك يابني

أختكم فى الله said...

والله انا عمرى ما رحت القاهرة ابدا ابدا


وكل اللى اسمعه عنها انها زحمة اوى وان الجو كله تلوث

ولا حتى عمرى زورت الاهرامات


ساعاتا بحس ان احلى بلد فى مصر اسكندرية

معرفش ليه

لو انى عمرى ما روحت غير مرسي مطروح وبس

ما علينا

المهم

البوست جنان

والفكرة جديدة

جزاك الله خيرا

صاحب المضيفة said...

ملاحظات رائع يا مولانا فعلا


انا لاحظتها أيضا منذ اقامتي في القاهرة بلد الألف مأذنة



رحم الله الأيام الخوالي



تحياتي يا جميل

Anonymous said...

كل سنه وأنت طيب

تذكرت ما كنت كتبته في تاج عندك
بأنك تسير في الشارع كطفل يكتشف ما حوله

فطبيعي أن تسير في القاهره مستكشفا

ربنا يوفقك ويحفظك وتحقق كل ما تتمنى

مهندس مصري بيحب مصر said...

فكرتني بإحساسي كل ما أنزل القاهرة
زحمة و خنقة و ناس مش طايقة بعضها و تلوث و دوشة
لولا ناس زي الصباغ و خيخة و عسقول و امثالهم القاهرة دي كانت بقت مستحيلة الإحتمال
صراحة أنا معمريش شفت غيرها وجهها المترب فمعمريش حبتها
ربنا يكون في عونك على الحياة فيها

Unknown said...

اهلا حاج باحث
ازيك يارب تكون بخير
طبعا بخير لانى شفتك امبارح
اولا شكرا على الاطراء واللهم اغفر لى ما لا يعلمون

اما عن ملاحظاتك فهى كلها صح بس لا تنطبق على القاهرة الكبرى فقط ولكن على اغلب محافظات مصر

ملاحظات تستحق النقاش
هرجع لك تانى

Anonymous said...

كل سنه وانت طيب

šσяšαяαα said...

ماهذا الذى ارى
ايه اللغة العربية الفصحى دى اللهم لاقر ولاحسد

هو حضرتك من اى منطقة فى الارض المصرية
لانى وبم انى من الاقاليم المجاورة وبرضو بشتغل حديثا فى القاهرة فأتفق معك فى الرأى فى كل وجزأ ومعظم ماتحدثت عنه

وبعدين هى فين الحياة البيضا اللى هنا دى
هو الدخان والسجاير والاتربة والسحابة السودا خلت فى بياض

بس اقولك تلاقيهم بيتستعملو اوكسى اللى بيخللى الهدوم تتنفس

عقبالنا احنا كمان مانعرف ناخد نفس نظيف
:)
والسلام عليكم

عاشــــــ النقاب ـقــــة"نونو" said...

لا تعليق
ربنا يوفقك لما يحب ويرضى

WhItE HeArT said...

ههههههههه

اهلا بيك في مصر

بجد اتشرفت بحضرتك جدا لدرجة فوق الوصف واعجبت بأفكارك الجميله وطريقتك الراقية في توصيل المعلومه


تحياتي

الباحث عن الحقيقة said...

عصفور المدينة
بسأل عليك دايما رغم اني بينى وبينك متهيب اللقاء لكن انتظره بشغف
كل سنة وانت طيب
شكرا لانك اول تعليق


*************

صيد الخاطر
والله وحشتوني يا جماعة ووحشتني مدونتك وموضوعاتك
ماهو انت من ضمن طائفة العملاقة اصحاب الوعي والفكر ومن الناس اللى بعتبرها مكسب للتدوين علشان بنتعلم منك
والقاهرة منورة بيك يا استاذنا

*****************

الصباغ
انت كمان جميل اوي
بيعجبنى زوقك في اختيار الاطعمة ..ربنا يستر

*****************


لماضة
اتقابلنا مره في جمعية المعادي
ارجو ان تتاح لنا فرصة اللقاء مره اخري
شكرا لتواجدك

الباحث عن الحقيقة said...

اختكم في الله
شكرا
انا كمان بسمع ان اسكندرية جميلة اوي
واجمل مكان في مصر


*************

صاحب المضيفة
انت اللى مولانا يا بتاع الالف مأذنه
وبالاقدمية كمان
شكرا لك

*************


غير معروف
كل سنة وانت طيب
اشتقنالك ده لو انت اللى في بالي

*************


مهندس مصري
فعلا ولولا ناس زي عسقول مكنتش فكرت انزل القاهرة
بكون مستمتع بلقائى مع المدونين بحس انهم اخوانى واهلى وزمالك كمان


************

نهر الحب
العضو ده يقوم من جنبي
اجري يا به إلعبي بعيد اجري
وسلامي للاخت نسمة
وحد يدخل عند ابو خالد ويسلملى عليه

جايين كايرو تاني امتى؟
ماقصدكيش انتى طبعا قصدى ابو خالد
:)

************


غير معروف
انت بقى اللى فات ولا واحد غيره
كل سنة وانت طيب ربنا يباركلى فيك


*************
صرصاره

يا قهلا بالصراصير
خبي البيروسول يا عسقول علشان خاطر صرصاره بس المره دى بس
ويا ترى جاية لوحدك ولا الشلة هتحصلك

الباحث عن الحقيقة said...

عاشقة النقاب

لا تعليق على اللا تعليق
بس شكرا لتواجدك ده لوحده يتفهم بشكل جميل رغم اختلافنا حول النقاب
بس انتى كان ناقص تضربينى بالمعلقة
ههههههه

*************

القلب الابيض
والله انت اللى انسان جميل
كان نفسى تكمل وتفطر معانا
اكيد هنتقابل تاني ربنا يكرمك يا رب وشكرا لكلامك الجميل


*************


جني
وحشتنى يا رااااااجل
وحشتنى اوى
خلاص هعيط اهو
:(


*********

نيجرو
انت فين مش ظاهر على الشاشة ليه

**********

مجداوية
كل سنة وانتى طيبة

************

خيخة
كل سنة وانتى طيبة

************

مقصوفة الرقية : آبي
كل سنة وانتى طيبة
ومتنسيش تجيبي سجاير للاطفال المره الاية


وسلامى للجميع
:))))))

سلامووووووز

وسلام للواد سووو الطخين

مهندس مصري بيحب مصر said...

لا ما هو انت لازم تحدد الاهلى و الزمالك نقيضان لا يجتمعان الا في المنتخب
:D
ثم إخواني دي موضوع تاني لوحدها

Soul.o0o.Whisper said...

السلام عليكم و رحمة الله


حمدلله على السلامة يا باحث
إيه الغيبة دى يا عم
لا و راجع كمان تتشاكل معايا
طب قول إزيك ؟؟؟
أخبارك؟؟؟

بلاش يا سيدى
راجع بوستاتك اللى قبل دى عشان تعرف


بس ملاحظاتك عن القاهرة فى محلها
و أكتر حاجة محلات الكادووو
غاليين بشكل

و برغم بردوا انى بأختلف معاك فى قضية النقاب
لكن اختلاف الرأى لا يفسد للقهوة قضية
عاوزاها ع الريحة و على حسابك
<< حق ماأنت هتطلع غلطان... بس بعد الفطار..هاه
ماشى؟؟


و بعدين لو سمحت ما تتخنقش معايا هنا
انا خلاص اتفقت مع عسقوول اننا نتخانق عنده عشان الاقى حد يحجز عنى
خلاص؟؟؟

ياللا سلام

(احمد سكر ) said...

السلام عليكم اخينا الفاضل الباحث

تصدق اول مره اعرف انك مش من القاهره

داانت شركت بلدنا ياجدع

وانا ااقول الجدعنه دى جايه منين

مرضيش يسبنى اللا لما غيرت فاردت الكاوتش

اه اتكيت على اخوك عسقول

وخليته شال الفرده

هههههههه

بس حركت جدعنه انك تيجى ورانا

سعدت جدا بصحبتك اخى الفاضل

واتمنى لقائنا قريبا ان شاء الله

اخيك

احمد سكر

Unknown said...

به ؟؟
انا به ؟؟
يالهووووووى ياما الحقينى أأقصد يا مامى :)
احنا مش جايين انتم اللى جايين

الـسـيـدة نـون said...

اولا بعتذر عن تأخيري فى التعليق
أصل انا معنديش الاختراع ده اللى بيخلينى اعرف مين كتب ايه؟
اللى اسمه رايدر تقريبا


ثانيا
فين جوز الشرابات اللى عليك يا احمد


ثالثا
انا بحب العملة المعدنية جدا
ومعنديش مانع انى ابدلها مع اى حد بعملة ورقية

رابعا
كنت احب انك تستفيض فى اسباب عدم ثقتك فى البنت حتى ولو كانت منقبة وبتعلم اطفال التجويد
عايزة اعرف الاسباب حب فضول ومعرفة ازاى الشباب بيفكروا فى البنات


خامسا
رغم انى مادقتش خبيز الست والدتك
لكن ده ما يمنعش انى نفسى ادوقه لانى حيسيت ان طعمه حلو جدا
ياريت تبقى تعزمنا مرة على خبيز الست الوالدة
وانا بتكلم فى النقطة دى بجد مش بهرج


سادسا
ليك حق فى ان الخوف بيخلى الناس تكون فى حالها وكل واحد يقول وانا مالي
بس تفتكر الخوف ده جه منين اساسا؟


سابعا
هو احنا مش هانشوفك ولا ايه؟

ثامنا
كل سنة وانت طيب

سلام
اختك خيخة

L.G. said...

تدوين ملاحظات عن تجربة جديدة شئ مهم جداً لتقييم التجربة بعد فترة
أشعر بأني متشوقة للقاء المدونين كلما كتبتم عن لقاءاتكم وكيف تروون بعضكم البعض في حقيقة الحياة
لا أدري ما السلف والاخوان كنت أعتقد أننا مسلمون سنة وكفى

لحية البائع ليست السبب اسأل عن من له سمعة طيبة في المنطقة ستجد بإذن الله

أتأذى من العملة الورقية خاصة الميتة والمحتضرة والمتجبسة وأفضل المعدنية حتى أني علمت أنهم يصرفون لموظف الخزينة فوطة وزجاجة صابون وبدل عدوى بسبب النقود وبعدين الجنيه المعدن بقى بلية أصلا

العيش الرحاوي أو الشمسي بتاع الفلاحين بحبه جدا وافتقده لأنهم توقفوا عن الخبيز وبيشتروا من الفرن هذا بيان من الدقهلية

فعلا محدش داس على رجلى في القاهرة بعكس اسكندرية واضح ان هوا البحر بيسطل الناس هنا بس القاهرة أصلا خاصة في المترو لا أجد قدمي على الأرض أساسا وأخرج بقوة الدفع

لا أفضل النقاب فب جميع الأحوال لأني أشعر كأني أتخبط لا أرى من أمامي

أعتقد العجوز خافت منك على شنطتها لأن المساعدة شئ ليس معتاد الآن

بالمناسبة العوانس اكثرهم فضليات اي شخصية غير سوية في الغالب تتزوج زواجة طيبة بمعايير اليوم المادية

العمل .. حرص ولا تخونش وافترض حسن الظن ولكن مع الفطنة

معهد الدعاة فكرة طيبة .. إدخل أي مسجد في صلاة العصر وبعدها ستجد حتما من تأنس به وتتكلم معه في مواضيع دينية ؟؟ وأين العسقلاني تكلم معه أم أنكم تتكلموا في الدنيا لا في الدين ؟؟

زوج خالتي رحمة الله عليه قال لي أنه لم يمتهن المحاماة لذاك السبب تحديدا قال لي باستطاعتي أن اخذ حكم براءة لتاجر مخدرات لمجرد خطأ في الاجراءات وسلك مجال العمل القانوني ولكن كموظف في هيئة حكومية

نعم في القاهرة سبحان الله مثل المقطم علية القوم او الاغنياء فوق الجبل وأناس تحت خط الفقر أسفله مجرد خط طولي يفصل بينهما

ننتظر منك تدوينة عن محاسن القاهرة كما كتبت عن مساوئها من باب العدالة
أتمنى ألا يكون تعليقي له ثقلا في نفسك
دمتم بخير

Anonymous said...

ونعم بالله وربنا يكون فى عونك...
بس انتا حسستنى انك جيت من كوكب تانى على القاهره ما فيه قواسم مشتركه بين اليى فى القاهره والريف والمدن المأريفه...يعنى موضوع البايعين الملتحين او السلفيين والمساجد اليى خلوها سلفيه ويا مكترهم فى الارياف...
وعدم الثقه للاسف زحفت من اهل المدينه لاهل الريف بشكل مباشر والظروف الاجتماعيه وتكالب الناس على ارزق بشكل مزعج وشرس خلاهم فقدوا افضل ما فيهم وهو التعامل لوجه الله...
على العموم هبوط بسلام ان شاء الله وربنا يفتحلك ابواب الرزق ويباركلك فى حياتك وشغلك ..
وبعدين اعتقد مجال الجنح ممكن تلاقى فيه حد مظلوم بعدين هو مجال المحاماه شائك انك ممكن تلاقى حد من غير ما تكون عارف ضالم وانتا معتقد بالادله انه مظلوم..
فحاول تحكم عقلك كويس ..وضميرك وعلاقتك بربنا ومتأكده ان دى حاجه انتا متتوصاش عليها..
ربنا يوفقك وتبقا خطوه جديده لمستقبل افضل ..ان شاء الله
ورمضان كريم عليك وعلى اهلك وعلى كل من تحب..

Anonymous said...

وبعدين بعتذرلك اعتذار جامد على تأقصيرى فى الزياره انا اسفه جدا جدا
انا مش عارفه اعتذرلك ازاى انتا وقفت جنبى فى مدونتى ..
ودعمتنى بأرائك فبشكرك جدا جدا
وبعتذرلك قوى قوى ..
جزاك الله كل خير واتركك للقاهره ..
فى رعاية الله وامنه وربنا يستر طريقك ويبارك خطواتك..

Anonymous said...

يا خبر أبيض كل ده اكتشفته في شهر بس ؟؟
كل دي سيئات ومفيش ولا حسنة ؟؟
على كل حال حاول تبص بصه صغيرة على النص المليان هتلاقي حاجات كويسة
وخليك فاكر إن الانطباعات الأولى مش بتدوم ومش دائما صح
وكل عام وأنتم بخير

دعاء مواجهات said...

مش فاكر الباقي

وقدرت تقولها يامتر

مااشى مااشى

لما اشوفك تانى بس

================

القاهرة مش غريبه اوى كدة للدرجه دى

انا كمان لاحال من بعضو بس عادى بتكيف

عديها علشان تعدى

كل سنه وانت طيب

Asmaa mahaba said...

طب افهم الاول مين كاتب عسقلان ولا الباحث عشان ارد عليه
حولتونى الله يسامحكم
البنات ..رغم كثرة الفتيات لكن ادركت سبب العنوسة في القاهرة الكبرى وهو ..لا يمكنك الوثوق باي بنت حتى لو كانت منقبة وتقوم بتعليم الفتيات التجويد في احد المعاهد الدينية المتخصصة
الجمله دى تنطبق على البنات والشباب والشيوخ والرجال والمدرسين والمهندسين والموظفين والاطباء خد عندك من اول الكناس لحد رئيس جمهوريه استبحس الكبرى
لا يمكن الوثوق فى اى انسان فى الحياه غير يعنى قلائل القلائل قول عنى فقريه متشائمه كئيبه غتته اى شىء بس دى هى الحقيقه
انا حمشى عشان مزاجى مش مظبوط وحعقدكم اكتر
بس قبل ما امشى فى شىء عاوزه اشكر عليه عسقلان وبجد والله احرجنى جداا وانا كنت بهرج بس هو قابل تهريجى بذوق شديد يوم المستشفى
اتمنى يكون فاكر الموقف
جزاك الله كل خير
سلام

Asmaa mahaba said...

كدا انا فهمت مين كاتب الباحث ياله بقى سقفولى

Asmaa mahaba said...

ابقى نزل فى اول كل بوست تنويه عشان ضعاف النظر اللى زيى طبعا مستغرب عشان انا مبلبسش نضاره بس مفاجاه انا بشوف البعيد احسن من القريب عشان كدا مبشوفش الشاشه عدل

جنّي said...

السلام عليكم

عودا حميدا ياابو حميد

واهلا بيك في القاهرة الكبرى

يا ترى جيت راكب ولا بتعد الفلنكات

وطبعا القاهرة غير الصعيد تماما

مذكراتك مش كلها بتفق معاك فيها وللا اجاملك واقول كلها صح زي نهر ما قالت لك .. تلاقيك في سرك دلوقتي عمال تقول اهو رجع لي بغلاسته وشكله ووشه العكر ..
يعني مش لو واحد مسن ضحك عليك يبقى الباقي كلهم وحشيين ..
ومش لو واحد نسي يحلق ذقنه وضحك عليك يبقى ملتحي سنة ..
ومش لو فيه حد مادي يبقى الكل ماديين ..
مش شرط تحب النقاب لكن يجب احترامه

خف شوية يا عم احمد ما تزعلش ناس حلوين منك

اخيرا اللي لقي احبابه نسي اصحابه
اهو اللقاءات الجميلة دي يمكن تكون فرصة للقاء نصك الحلو يا وحش

رمضان كريم

سلام يا صاحبي

ابن حـجـر الـعـسـقـلانـى said...

ازيك يا حاج أحمد

إيه يا عم ... مش لاقى حد تتكلم معاه فى مواضيع دينية يا ررررررراااااااجل

أمال اللى كنا بنتكلم فيه امبارح دة إيه ... دة احنا اتكلمنا فى القدر و الفلسفة و فى المنطق و فى الفيزيا الحديثة

عايز إيه تانى يا راجل ... ممكن نقعد نتكلم فى الإليكترونيكس بقى لو عايز بحكم إنه تخصصى

المهم يا زعيم انت منور القاهرة من ساعة ما وصلتها

و نشوفك تانى يا برنس

ابن حـجـر الـعـسـقـلانـى said...

سومة مجنونة فى بلد عاقل

و الله أنا مش فاكر الموقف .. و يا ستى أنا آسف لوكنت تسببت لك فى إحراج ... بس بصراحة اليوم كان جميل جدا .. و بجد بجد الواحد بيبقى سعيد جدا فى وسط التجمعات دى و بيفتكر كل حاجة حلوة

و ربنا يتقبل مننا يا رب

و رمضااااااان كرييييييييم

صبرني يارب said...

هو في جو تاني غير الى انت قلته ده يا باحث ؟؟؟
اصل احنا عندنا كده برضه؟!! لو فى مكان غير كده دلني عليه عشان اروح الا انا اتخنقت على الاخر

أختكم فى الله said...

فيه تاج فى مدونتى يا ريت لو حضرتك تحله

شــــمـس الديـن said...

ممممممممممممم

السلام عليكم و رمضان كريم اولا :)

علي فكرة يمكن موضوع الوثوق في الناس و خاصة البنات بتوع القاهرة و الكلام دا فيمكن دا علشان انت شايف القاهرة لحد دلوقتي بعيون زائر و لا يوجد له "عشيرة " فيها حتي تعلم انها مدينة مثل اي مدينة فقط العدد ضخم فيجعل الانسان يهتز داخليا بعض الشئ

و لكن هي فيا الكويس و فيها الوحش
و علي فكرة التدين مش كماليات عند بنات الطبقة الراقية ... لانه دا بيتوقف علي تعريفك للبنات دول

ان شاء الله تلاقي البائعين الملتزمين الحقيقيين الغير متشدقين بالمظاهر ... و تلاقي الصحبة الصالحة اللي تعرفك ايه ي القاهرة بجد :)

مرحبا بك في ام الدنيا مصر

Asmaa mahaba said...

احرجنى بمعنى انى كنت عاوزه اشكره مش احرجنى انى اتضايقت منه :))
عموما جزاكم الله كل خير

Asmaa mahaba said...
This comment has been removed by the author.
Asmaa mahaba said...

ومفيش اسف انا اللى اسفه عشان موضحتش الكلام فى التعليق

Unknown said...

السلام عليكم ورحمة الله وبركاتة
اهلا اخى الباحث كيف الحال ؟؟
بص انا قلت ان ملاحظاتك تستحق النقاش
بما ان القاهرة هى العاصمة ومركز للتجمع من كل انحاء مصر فترى فيها فئات ونوعيات مختلفة من البشر فى كل شئ سواء التربية او التفكير او درجة التدين وايضا السلوك والاهداف
انت اتكلمت وكمان القيت الضوء على الخداع بأسم الدين وللاسف دا موجود وبكثيرة فى كل مكان سواء عن عمد
ان بعض الناس بيحبوا يلبثوا عبائة الدين للحصول على وقار الدين وهيبتة وثقة الناس بسرعه ودا طبعا معروف ابعادة والتانى عن جهل هو خد من الدين ظاهره ولا يبفقه شئ لا عن المعاملة ولا عن اخلاق المسلم اصلا
وفى الحالتين لنا الله عز وجل اما عن الثقة فى المنقبات مش كلهم كويسين دا ممكن لكن برضة مش كلهم وحشين فى منهم بجد من تقف امامه بكل احترام وتقدير لعلمهم ودينهم واخلاقهم


اما عن ان سيادتك مش لاقى حد تناقشة فى الدين فيكفيك عسقلانى
بصراحة انا لا املك غير انى اسمعكم وانتم بتتكلموا وبس هههه اكيد فى ناس حتى وان كانوا قلة لكن اكيد هتلاقى من يناقشك ويبهرك ايضا


بص انا عيزاك تدون تانى شهر وتقولى اية اللى وصلت له ؟؟؟
تحياتى لك

جنّي said...

السلام عليكم


تقبل الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

جنّي said...

السلام عليكم


تقبل الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

mahasen saber said...

يا سلام اخيرا نورتنا وشرفتنا
عيد سعيد عليك وعلى كل من تحب
وهتعيد فى القاهره بقه ولا تبت منها
وهتعيد فى البلد...
عيد سعيد ومبارك عليك وعلى كل من تحب ..

Mony said...

ملاحظاتك في محلها يا باحث


انا فعلا لقيت كتير من سكان الاقاليم(من اهلي)
لما يجو القاهرة بيكونوا متضايقين و وعايزين يروحوا بسرعة

هو فعلا الثقة مش موجوده خالص
اصل ولاد الحرام ماخلوش لولاد الحلال حاجة


معلش لتأخيري في الرد بس كنت عايزة اعتزل النت في رمضان بس جيت علي الاخر و ماقدرتش اكمل

nona said...

البنات ..رغم كثرة الفتيات لكن ادركت سبب العنوسة في القاهرة الكبرى وهو ..لا يمكنك الوثوق باي بنت حتى لو كانت منقبة وتقوم بتعليم الفتيات التجويد في احد المعاهد الدينية المتخصصة

اولا كل سنة و حضرتك طيب
ثانيا انا شايفة ان شهر واحد مش كفاية تخليك تحكم على بلد تضم ملاين من البشر فيها و انك تحكم على البنات فيها
اليس العنوسة فى القاهرة فقط ام انها امتدت لكل شبر فيها و ليس بنات القاهرة فقط
و ليس معنى انك رايت فتاة او اثنين او حتى عشرة تخليك تحكم ان حتى المنقبات لا يمكن الثقة فية
او ليس الشباب ايضا لا يمكن الثقة فية
اخى العزيز لا تصدر احكام على جميع الناس لانك لم تتواجد فى هذة المدينة الكبيرة الا شهر او ازيد قليلا و طول ما انت مقيم فيها كل يوم هتغير رايك لان ليس كل الناس تلك الفئة التى تتعامل معها
و ليس من جلسة واحد او اثنتين تقدر تحكم على الناس
حتى لا ترتكب ذنب باسم كل هؤلاء الناس
و على فكرة مش كل الناس الملتحين اشرار و بيستخبوا وارء الدين
لسة الدنيا فيها خير و لسة فيها نااااااااااااس كتير طيبة و كويسة جدا
اريدك ان تنظر الى بلدك بتلك النظرة التى نظرة بها لقاهرة المعز
اتعرف شى يمكن القاهرة واضحة شوية عكس البلاد التانية لانى عارفت و عشرة ناس من الصعيد و ما توقعتش منهم انهم يكونوا كدة رغم ما فى الصعيد من عادات و تشدد
و لكنى اريدك ان تنظر لهم عندما يكونوا فى القاهرة او اى بنت من الارياف و ساعتها هتعرف الفرق صح و ان فكرتك كانت غلط
معلش انا طولت فى الرد لان رغم ان صارحتك عجبتنى بس انا شايفة انك تسرعت فى اصدار الحكم علينا نحن اهل قاهرة المعز
و على فكرة معنا مدونات منتقبات ماشاء الله عليهم دون ذكر اسم و يا رايت تقرب منهم اكتر عشان تعرف الوجة الحسن و ليس الوجة السى اللذى تعرفت علية