Sunday, November 16, 2008

يلا اشرب يا منيل ..هتحس انك عيل

يوجد تحديث فى نهاية البوست
--------
دماغي هتنفجر
بجد
بقى هي دي مصر يا عبله
عبلة اللي هي مديحة كامل في فيلم السقوط في الهاوية
هي دي مصر يا باحث
امبارح ..قابلت شاب اسمه محمد واد زي الفل ودمه خفيف
مشيت معاه اتعرفنا وقعدنا نرغي
واعترفلي انه لسه محشش من شوية ولولا كده كان زمانه اتخانق كالعاده مع بتوع الميني باصات اللي بيحشروها بالناس في الطرقة
السؤال : ومحشش ليه يا محمد بيه؟
اجاب : علشان اقدر اعيش ..انا لو محششتش هنتحر وكل الناس اللي بتحشش بتحشش علشان تقدر تعيش ومش تخرج عن اعصابها
وبعدين يا عم الحشيش بقى عادي
انا : معاك حق ده بقى عامل زي السجاير من كتر اللي بيشربوه بدون اي حرج
انت بتشتغل ايه؟
هو : فني تبريد وتكييف ..ورحت اشتغل في شركة دعاية واعلان وادوني ادوية وقالولي هتنزل توزع وتبيع ومرتبك هيوصل لألف وخمسماية جنية في الشهر اذا بعت بتمان الاف جنية ..تصور بقالي اسبوع اهو ما بعتش غير بتلتماية جنية بس ورغم اني الوحيد اللي استمر معاهم لما رحت اقولهم انا همشي واسيب الشغلانه ديه محدش قلي لا او خليك رغم اني كنت متحمس اوي وبسهر معاهم اقولهم في افكار للدعاية وكده
انا : معلش الناس هنا اتعودت على كده انك ممكن تسيب في اي وقت
............................
في المكتب الاستاذ سمير بيقولي بلاش تثق في الناس كده
اصل انا اتنصب عليا وانسرقت بدون داعي للدخول في تفاصيل
.............................
كنت ماشي وام احمد بنت خالتي وسمعنا كاسيت خطبة دينية صوته عالي في الشارع قولتلها اييييييه مش بحب الناس دي
قالت : ولا انا ..بحس انهم بيعملوا كده علشان الفلوس
قولت: يا بنتي اصلا الناس هنا لها اكثر من وجه وبالتالي انا لا اثق في اي حد ..ده انا مانضحكش عليا في مصر غير من اللي شكلهم متدين
.............................
كنا اربعة ولسه خارجين من صلاة الجمعة وعايز اقولكم اني اتهزأت علشان رفضت اشارك المجرمن دول في جريمة الاتجار في الحشيش
ملحوظة : المجرمين دول هم اللي انا ساكن معاهم حاليا وساكن معاهم تخليص حق ..ابقى عسقول يحكيلكم
.............................
الاول كان ممكن اثق في اي بنت لكن بعد الحوار ده وغيره خلاص كان زمان
هي : ( فتاة سيئة السلوك ) على فكرة انا اختي منقبة واجمل واحده فينا بس حاليا قلعت النقاب بس بتلبس حجاب محافظ زي اللي انا لابساه ده
انا : طب والله كويس هي دارسة ايه؟
هي : معاها ثانوية وعايزه تدخل معهد تحفيظ قرآن
انا : طب جميل ما شاء الله
هي : بس فعلا جميلة حتى اسأل حسن معلق معاها وبيكلمها دايما في التليفون من الغردقة
أنا : حسن !!!!! شكرا
مش عارف ليه وقتها افتكرت مجدي وهو بيقلي انه كان بيقعد مع خطيبته في ش جامعة الدول ويمد ايده من تحت الخمار اللي جايب لغاية ركبتها ..وفي شهر رمضان ..بس للامانه يا جماعة الكلام ده بعد العشاء كانت بتقولهم انها رايحة تصلي تراويح وهي اصلا رايحه ..عيييب ..الرقابة قصت الكلام
..............................
خدوا بقى دي بناء على طلب بإلحاح من بطلة الحوار
هي : هسألك سؤال .القرآن مخلوق ام غير مخلوق؟
انا : نعم؟
......
هي : احنا اصلا ما ننفعش مع بعض علشان مختلفين
انا : ليه ؟
هي : علشان انا سلفية وانت اشعري ..ازاي تقبل تتجوز واحده سلفية وتآمن لاطفالك معاها
انا : يعني لو اتقدمتلك ترفضي
هي : اه ..لاننا مختلفين في العقائد
!!!!!!!!!!
بقيت اقول : أصلي خلفهم ..ولا يزوجني بنتهم
وده لاني بصلي في مسجد سلفي خلف امام سلفي لان هو ده اقرب مسجد ليا
اعتقد يا جماعة انها ممكن تكون مش بتصلي في مسجد اشعري
طبعا ناس كتير مش فاهمه يعني ايه اشعري وايه سلفي وايه ده
ولا انا
عموما انا حذفت ايميلها من الهوت ميل بس مش عارف احذفه من الياهو ..ما اهتمتش اصلا علشان مش هيفرق
ملحوظة : هي هتقرأ البوست وتعليقاتكم وكانت عايزه تعرف رأيكم في موقفها
.............
نسيت اقولكم ..المحشش قلي : إلحق نفسك وارجع بلدكم احسنلك
بفكر فعلا
طبعا البوست ده كله عك وحوارات كده مش مفهومه او مفهومه الله اعلم بس انا دماغي مزنوقه بكلام وحواديت كتير مشتته دماغي
البوست ده ما يحسبش يا جماعة اعتبروني داخل اسلم عليكم
واخص بالذكر الاستاذ جني اللي معزته كبيرة عندي بس اعمل ايه يا استاذي انا بقيت دايخ وبلاش عتاب يا حبيبي بلاش عتاب
بفكر في بوست للصحيفة انتظرني قريبا
بس بجد اكتشفت ان الحشيش مهم جدا
اقولكم حاجه تضحك ..قال ايه انا رايح قسم الهرم علشان اخرج واحده مقبوض عليها ..رحت وقعدت اسأل عليها لغاية ما لقيتها قدامي خارجه لوحدها اخدتها معايا وخرجت
انا : هو انتي يا بنتي قبضوا عليكي ليه؟
هي : انا كنت راكبه تاكسي وحصل ..............., واكتشفت في النهاية انها اتقبض عليها بتهمة تسهيل دعارة
ههههههههههههههههههههههههههههه
--------------------
يا جماعة .. أنا عسقول ... و الباحث موصينى أزف لكم خبر إنه ساب المكتب اللى هو شغال فيه .. و هو مش عارف يدخل النت عشان كان يقول لكم الخبر دة بنفسه .. هو اتصل بى و بلغنى الخبر دة ... و العجيب إنه كان بيضحك .. الواد شكله فوت و لا إيه
الله يكون فى عونك يا باحث
بدل ما تبقى الباحث عن الحقيقة .. هاتبقى الباحث عن العمل

34 comments:

الـسـيـدة نـون said...

اول تعليق
ازغرط وارجع اقرا

لولولولولولولولولولولى

اخيرا نزلتوا بوست جديد

الـسـيـدة نـون said...

قريت البوست
وكان هذا تعليقى

ابقى سلملى على ام احمد
بنت خالتك

وصدقنى يا معلم باحث
اكتر من كدة وربنا بيزيح

اه وربنا
يعنى متقلقش خالص

عليك وعلى الوحدة الصحية
ديتها اربع كبسولات لعلاج البلهارسيا

وشربة عم مسعود تنزل الدود
تشرب الشربة
يموت عم مسعود ويفضل الدود


قلتلى بقى القرأن مخلوق ام غير مخلوق ازاى يعنى؟


وقال يا محشيشين يكفيكوا شر الكمين


سلام
اختك خيخة

أمل حمدي said...

هو انا فين؟

انا دخلت بوست غلط ولا ايه؟

البوست مش محسوب

طب انا مش ها اعلق


سلام

Kiara said...

مش فاهمه حاجه يعني في الاخر مين مع مين

Asmaa mahaba said...

محشش يلومنى ولا يعتب عليا هههههههه يا ابنى انت بتقابل ناس غلط وفى اماكن غلط مش ذنب الناس التانيه
ثانيا حوار سلفى وافرنجى دا معلش انا مليش فيه وبصراحه اعز صديقاتى لبست نقاب من هنا وكانت كلمه بصراحه حتى الان مع حبى الشديد لها بس مش قادره انساها بتقولى السلف هم السنه بقولها ما احنا سنه شايفانى سيخ قالتلى لا السلف سنه انتوا شوفولكوا مذهب
انا ساعتها افتكرت جماعه التكفير والهجره ههههههه وقلت بس يومين ويغتالونى...الله يرحمنى
لا اللى لبس حجاب نفع ولا اللى بشعره نفع عندنا دكتور مطلع عين اهالينا ويشتم فى المحجبات والمنقبات واما نقفله نلاقى المنقبات شتموا فينا قم انا بصراحه حعتزل الخلق كلهم ومش حتعامل مع حد تانى
واخيرا والاهم والمهم لو لاقيت حل نموت بس منغير انتحار ابقى ادينى خبر عشان ارتاح
واسمع يا باحث سيبك منهم تعالى انا حجيبلك عروسه على ضمنتى البت بضمانها 15 سنه صوت وصوره ام بى ثرى صينى وبرباط باتنين جنيه ونص بس واختار لونها براحتك
:))
والبضاعه لا ترد ولا تستبدل
ياله سلام

Asmaa mahaba said...

نسيت اقولك متنساش نصايخ خالتك سومه فى بوست حمام البنات لو تفتكره زمان والتاكد اذا ما كانت العروسه صالحه للاستخدام الادمى ولا سبع طبقات واستيك

Asmaa mahaba said...

شوف وبلا حرج الدكتور بتاعى فى الكليه قالى انى انا زى امه وانى بفكره بجدته فى اللبس والكلام هو عنده 57 سنه فاذا كنت انا مامته يبقى انا جدتك متتحرجش فى اى وقت تقولى يا تيته سومه انا فى الخدمه

فاتيما said...

إيه يا باحث دا كله
انا دماغى لفت
حرام عليك
إيه يا بنى المتناقضات دى كلها
على نفر واحد كدا حرام
عشان كدا واخد موقف من القاهرة و من فيها
بس صدقنى فى كل حتة التناقض دا
الأخت اللى مختلفة معاك عقائدياً دى غريبة قوى ...
و إيه حكاية المخلوق أو الخالق
مفهمتهاش أبداً
بتاع الحشيش دا بيحل مشكلته
بمشكلة اكبر
نفسى أفهم بيجيبوا فلوس منين للكلام دا طب ما يوفر تمن الحشيش و يعمل لنفسه حاجة مفيدة ؟!!
المهم حمدلله على السلامة من البعتة دى
و تحياتى يا عزيزى

ايام العمر said...

هو مين مع مين رايح فيييين

بس كدة

سلاموووووووووز

Mony said...

يعني في الاخر طلع المحشش هو اللي فاهم الدنيا


هههههههههههههههههه



و بعدين احنا مسلمين
و بس
واللي قسمنا فرق كده هم اليهود علشان نتشغل بنفسنا عنهم


المسلم من سلم المسلمون من لسانه و يده

Empress appy said...

الله يخرب بيت الهباب اللى بتشربوه
فيه ايه يا حج اللى فهمته سلفك واشعرك دى
الهى اعدم شراب خيخه ما فهمت حاجه
انت بتهيس يا واد انت

ست البيت said...

انا زهقت بجد زهقت
هو ليه لما الانسان يهنج شوية يوم رازع بوست زي دا
يا عم ما المتناقضات في كل حته
يعني مش بس المنتقبات
انا بحترم جدا المنتقبات
والملتحين والمتشددين
ودا مش ملزم لحد بس اقثولك الحق
انا زقت وزعلت لما لقيتك انت بتتكلم بهذا الشكل عن المخمرين والمنتقبات مش كلهم كده يا عم
وبعدين
ما ياما بنات مش محجبات وطييييييييييييييييييييييينة
ومش منتقيبات وزبااااااااااااااااااالة
مش عارفة ليه
اشمعني مش بننتقد غير دوووووووووول
عموما انا كان ليه بوست عن الموضوع دا لأن بصراحة زادت حدة الانتقاد للملتحين ولأي شيوخ سبحان الله
مع ان عدد النصابين اللي مش متديينين في البلد دي اكتر بكتيييييييييير
وعموما انا مش قصدي ازعل حضرتك بس انا بدافع عن ناس كتييييير قوي محترمين
انا اختي منتقيبة ومحبش حد يذم في قطاع المنتقبات
زي ما انت لو ليك اخت مش محجبة وانا طلعت قلت ان اللي مش محجبات دول كذا وكذا حتزعل
يا رب تكون فهمت قصدي صح
أما موضوع الحشيش فده مصيبة سودة واحلى كلام اتقال في التعليقات عندك
بيجيبوا الفلوس منين صحيح ؟
وانهم يحلون المشكلة بمشكلة أكبر
ربنا يهدي طبعا دي مسئولية حكومات نوعا ما ليها توفر للشباب دا متنفس
وبعدها لموا اللي بيحشش لو بقى فيه
دمت بود

ضحكه said...

اكتر من كدة ويزيح ربنا


هههههههههههههه

mahasen saber said...

ده اتكتب امتى ده
اصل النت كان فاصل امبارح طول اليوم واحره
واول امبارح انشغلت مع ابنى كان عيان
يبقى اتكتب البوست ده امتى ومتقوليش بصى على التاريخ

mahasen saber said...

بس بالنسبه للشرب عارف انا بئه اتعرفت على بنات بيشربوا البدع كلها ومش تحت تاثير ضغوط قد ما هو قلة ادبوحب لخوض التجربه
طبعا اليى حكالى عنهم مصدقتوش الا لما شفتهم
يعنى شفت بعينى محدش قالى

وبعدين لو كل واحد هيتحجج بالظرو والضغوط زى اخينا الفنى كان زمان البلد كلها محششه وفى الطراوه

ومقالكش على قضايا المخدرات بئه والتعاطى للركب يا احمد

مهندس مصري بيحب مصر said...

دا اتاريك مكنتش طايق نفسك امبارح
:)
ربنا يكون في عونك
ثم شغلانة المحامي زيك زي كل النظام القضائي أحياناً بتتعامل مع مجرمين و شخصيات وسخة فلازم تعامل كل واحد بما يناسبه
اما موضوع سلفية و اشعري فده غريب جداً
خلق القرآن حسمه الإمام احمد بن حنبل من زمان قوي
ثم هي كده بتخلط بين المعتزلة و الأشاعرة
ثم ايه تعريفها لكلمة اشعري اصلاً
دا المصطلح ده انقرض

ثم هما السلفية بقوا مذهب خلاص ؟ !!!
مش كانوا على مذهب الإمام أحمد بن حنبل
عجايب و الله

الحشيش انتشر انتشار عجيب
دا في دكاترة بيحششوا
دا انا سمعت بس ما شفتش سمعت ان في امام مسجد كان بيحشش
فيه ألعن من كده؟
و التانية اللي بتحفظ القرآن و معلقة مع حسن
ده انفصال في الشخصية
ناس لا تعرف من الإسلام الا اسمه و من القرآن الا رسمه
و مفهموش روح الدين و الغرض منه

حسبنا الله و نعم الوكيل
ربنا يكون في عونك و يوفقك

Soul.o0o.Whisper said...

ياااااااااااااااااااااااه
أخيرا بوست

أحمدك يارب
و طبعا زى ما انتوا متعودين
اختكو جاية آآآآآآآآآآآآآآآآآآآآآآآآآآخر الصفففففففففففففففففففففففففففففففف
ههههههههههههههههههههههههههههههههه


أولا
شوف يا باحث
بردوا هأقولك كل مكان فيه الحلو و فيه الوحش
و أكتر شئ بيضايقنى
و يارب يبعدنا عنه
هو التحسيس ورا الناس
و خاصة اللى بيدخل فى شئ و يبصم وراه

بقيت فعلا مش بأثق فى أى شخص إلا لما أتعامل معاه
و مش مرة و لا اتنين
لا لازم كتييير عشان تقدر تقول هذا الشخص ممكن اتعامل معاه و لا لا
مش عشان أثق فيه و لا لا
أصلا الثقة فى ربنا وحده

و حكاية سلفى و أشعرى
كل واحد حر يا أخى
كل واحد ينام على الجنب اللى يريحه

و بعدين والله أنا مكسوفالك
ههههههههههههههههههههه
أنت بتكلم كام بنت فى الثانية ؟؟؟


و على العموم اوعى تزعل على شئ
ربنا ماكتبهولكش
صدقنى أكيد ربنا كاتب لك الأحسن


البوست على الرغم انه مش مترابط
بس ياللا
أى شئ يطمنا عليكم و السلام
اهو البوست من الباحث
و التحديث من عسقول
و بالشفا إن شاء الله
ههههههههههههههه






خالص تحياتى

الباحث عن الحقيقة said...

بت خيخة
مانتي شاطره اهو في الاغاني الهابطه
وبعدين دي زغروطة ولا بتصوتي على حد

...........

ماما اموله
ههههههههههههه
بتفكريني بام احمد اصل انا بقولها يا قموله علشان هي برضه اموله بس بالصعيدى تبقى قمولة ..نظام غلاسة بقى
منوره يا ماما
:)))

.............

مولان
متهيألي الاهلي مع القطن الكاميروني

..............


سومة مجنونه في بلد اجن منها
انتي ممكن تفتحي محل عرايس بقى وتحتبي عليه اي عروسة باتنين جنية ونص
ليه يا بنتي داخل اشتري شراب مثلا

...............

فاتيما
اه والله حرام
مخلوق ومش مخلوق ده فلم قديم ما تاخديش في بالك
والحشيش ارخص مما تعتقدي بقى زي السجاير بقولك وبعدين حشيشة المحب خروف ..قصدي طربه
اخبار الجمعية ايه؟؟

..............

ايام العمر

هو كان معاه بس التاني جه الاول

بس كده

...............

الباحث عن الحقيقة said...

موني
شوفتي ان الحشيش بينفع ازاي ..اهو طلع هو اللي بيفهم

اللي قسمنا كده هو جهلنا علشان نقول ان المسلمين مختلفين في العقائد ده جهلومصيبة عملها المتخلفين المتشددين

............


آبي

انا برضو اللي بهيس يا بتنجان انتي
بلاش انت يا واد
خدي المثل ده
لا تعايرني ولا عايرك التهييس طايلني وطايلك
وسيدي منمنمنمنمنمني

.................


ست البيت
والله سعيد بمشاركتك
بس مش ده المقصد
قصدي انه عادي اني اشوف واحده مش محجبه وملتزمه ده شئ بالنسبالي متوقع علشان انا راجل لسه جاي من الصعيد
لكن اللي مش متوقع اني الاقي منقبه او محجبه او مخمرة مش محترمه نفسها او اهلها او مظهرها اللي بتظهر بيه
شوفي مثلا حد مش مسلم ممكن يقول ايه
انا بس بعبر عن صدمتى

.............


ضحكة

اللهم امين
بس مش ننزاح معاه ..ربنا يستر

..............


محاسن
ازيك يا محاسن عامله ايه
وابنك عامل ايه
مش انا يا بنتي موصيكي على بيرو
طيييب يا محاسن لما اشوفك
:(

.................


مهندس مصري
قعدت اقولها يا بنتي انتي مش فاهمه حاجه ولا تعرفي الفرق بين المعتزله والاشاعره
تقولي لا هم الاشاعرة
لما اتخنقت منها وقولتلها اجري اتعلمي الاول قبل ما تتكلمي
هي بنت ممتازه على فكرة خلقا وتدينا وعلما
بس الناس مذاهب يا عم الباشمهندز

وبعدين الحشيش في بعض المناطق الشعبية هو المشروب الوطني
واسف اني معرفتش اكلمك اخر مرة
وحاليا مش عارف هقدر افتح الهوت ولا لا

...............

ايمان
ههههههههههههههه
هههههههههههههههه
والله ضحكتيني يا بنتي
قال موضوع مني على تحديث من عسقول واهي ماشية
هههههههههههههههههه
منورة يا ايمان

وبعدين ايه حكاية كام بنت في الثانية ايه القر ده

يلا ما علينا
كل واحد ينام على الجنب اللي بيريحه
المهم مش ينضرب على قفاه

سلاموووووز

لست وحدك said...
This comment has been removed by the author.
لست وحدك said...

أولا أحييكم على المدونه .. وفقكم الله
بالنسبه لمحمد اللي (بيحشش ) لا أعتقد أن الحل هو التوهان عن الواقع
منحنا الله العقل لنحترمه لا لأن نغيبه ونمنحه أجازة ( أخشى ما أخشاه أن آتي الزيارة القادمه أجدكم أضفتم للسته المشاريب
صنف آخر كالحشيش والسجائر المحشوة :)) .. )
*****************
الأستاذ سمير بيقولك لا تثق في أحد .. هو من الأفضل أن تكون حذر فقط في تعاملاتك
ديننا أمرنا بحسن الظن .. كما أن المسلم كيس فطن
**********************
أن تتهزأ من مجرمين كما نعتهم .. معني هذا أنك شريف

************************

حضرتك كنت تثق في البنات قبل حديثك الذي ذكرته مع الأخت التي حدثتك عن أختها .. معنى هذا أنك كنت تتعامل مع نوعيه طيبه من البنات أو الاتي من الممكن أن تثق بهن
وليس لحديث واحد مع نوعيه معينه تعمم سوء الظن
كما أن لي تحفظ على جملتك ( فتاه سيئه السلوك )
المهم من الممكن أن تجد آلاف الفتيات تقول جملتك هذه عن عدم الثقه في الرجال ولن أقول لتجاربهم الشخصيه
فقط يكفي أن يقرأن هذا المقطع الذي تتحدث فيه عن صديقك مجدي
الذي بكل بساطه يحكي لصديقه عما يفعله مع خطيبته ( أو أيا كانت ) وصديقه حكي لنا الأمر
أعتقد أن بينكم أصدقاء مشتركون وربما بعضهم يعرف خطيبته
فكيف يسمح لنفسه أن يسئ إليها هكذا
والمفروض أنها يوما ما ستحمل اسمه وكرامتها من كرامته
كيف يشجعها على أن تكذب على أهلها لترضى رغباتهم
حقا أريد أن أرى وجهها لو قرأت هذا الكلام
هو بالضبط كمن بات يفعل السوء ويستره ربه
وأصبح يكشف ستر الله عنه
طبعا الفتاه مخطأه أيضا .. لأنها لم تحترم دينها أو نفسها
وبالتالي لن يحترمها أحد

********************************
بالنسبه للأخت صاحبه السؤال
هل القرآن مخلوق أم غير مخلوق ؟
أختاه هذا الأمر حسم قديما
القرآن هو كلام الله
أما بالنسبه للسلفيه والأشعريه والمعتزله والسلفيه وغيرها
فأعتقد أنه لم يصل الأمر لتقولي إختلاف عقائد لا ينفع معه زواج
فنحن مسلمون وليس عندنا طوائف
كلنا نقول لا إله إلا الله محمد رسول الله
كلنا نصلي في نفس اتجاه القبله
كلنا نحج لمكان واحد في وقت واحد
الإسلام دين بسيط وجميل فقط لو نعرفه كما ينبغي
لذا أرجو أن تعيدي النظر في عرض الأستاذ أحمد :)

****************************
أستاذ أحمد .. حضرتك تركت الشغل .. ربما كان في تركه خير
إن شاء الله ربنا يرزقك بخير منه
فقط اصبر واسعي

أعتذر بشده على الإطاله

أمل فتحى عزت said...

السلام عليكم
أخى الكريم الباحث عن الحقيقة
مرة أخرى لنا لقاء بعد مدونة نون
وهذه المرة من مدونةعالمك والهجرة
أشكرك على التعليق
هذا الاسكتش من أعمال الفنانة إيمان جمال ..كلية الفنون الجميلة والجميل أن الاسكتش يحكى القصة عن حق
القصة موجودة فى المدونة فى فقرة القصص ودائماً أهديها الى القلوب الشجاعة والمحبة ولنا عودة متجددة ..
مع خالص تحياتى

مهندس مصري بيحب مصر said...

ربنا يقدر لك ما فيه الخير في موضوع الشغل ده و يكرمك يارب

مجداوية said...
This comment has been removed by the author.
مجداوية said...

السلام على من اتبع الهدى

أروح الصحيفة ألاقي عليها خيوط العنكبوت ومغلقة ومكتوب عليها مغلقة لعدم وجود أخلاق
آجى هنا ألاقى القعدة مصهلله وحشيش وبنات وميت فل
وأنا أقول ابنى الباحث رجله قطعت من مدونتى ليه أتاريه غير القناة وخلاها على البحرى
وبيكتب فى موضوعات قعدات الشباب وحكاويهم
وطالما بتكتب عن عبلة يبقى يمكن بتزور مدونتى بس فى الخباثة


بس تقولى انت ماما وانت بابا
وفين الباحث ؟؟
طفش ؟؟؟؟

انا مستغربة جدا لنوعية الكلام اللى اتكتب وطرح أمور فقهية فى مكان اتملى بدخان الحشيش والكلام عنه وحتى العنوان تحس منه انك داخل غرزة فى العشوائيات
حتى الناس اللى بيعلقوا مش فاهمين السلفية من الأشعرية ولا يعنى ايه القران مخلوق أو مش مخلوق يعنى بالظبط زى ما تكون داخل فرن عيش وبتسأل معندكمش كتب ابن تيمية !!!!! لكن طالما دى استراحة فبراحتك وعلى المتضرر الخروج والانتظار عند الصحيفة وشكلنا كده الانتظار حيتطول
وأنا متضررة
ومش عاجبنى اللى انت كاتبه
انت كاتب باسلوب عرسة الفلا اللى بتظهر السىء بس من الدين و من المحجبات والمنقبات !!!!
وكرسى فى الكلوب
وانا خارجة

ولو حتزعل من كلامى ازعل
ربنا يعلم أنا كتبته بنية ايه لكن بجد أحس بكثير جدا من الأسف


وحاضر
حاخد الباب ورايا


ملحوظة : أزلت التعليق السابق للاضافة والتعديل

هى فوضى said...

موضوع غريب جدا ومحتاج لنقاش واجوبة على اسئلة كتير محيرة

الباحث عن الحقيقة said...

لست وحدك

شكرا لتواجدك وتعليقكم الكريم

..........

مهندس مصري

اختفيت ليه من الماسن


.........


مجداوية
حييتمونا بتحية خص بها رسول الله المشركين من اهل الكتاب

استفسارا
الاول : مغلقة لعدم وجود اخلاق ؟؟
عند مين وايه ومش فاهم

الثاني: آجى هنا ألاقى القعدة مصهلله وحشيش وبنات وميت فل؟؟

شكرا لذوقك

الثالث : غير القناة وخلاها على البحرى؟؟

شكرا

الرابع : انت كاتب باسلوب عرسة الفلا اللى بتظهر السىء بس من الدين و من المحجبات والمنقبات

انا بظهر السئ بس من الدين؟؟؟

سيدتي الكريمة
عذرا انتي لم تفهمي البوست الذي بدأ بجملة دماغي هتنفجر وانتهى بضحكة هستيريه تعني اني كتبت وانا اعاني من فقد التوازن لما ممررت به منذ قدومي الى القاهره
هو رسم صورة لما مررت به وليس به قصد تعمد الاساءة الى احد ولا تنسي اني رغم اختلافي مثلا مع السلفية لا زلت اصلي خلفهم

لست حزينا لاني تعودت الاونة الاخيرة ان تنقلب الاشياء رأسا على عقب

لله الامر من قبل ومن بعد

............

هي فوضى

شكرا للتعليق ولتواجدك في مدونتنا

الباحث عن الحقيقة said...

انا مستغربة جدا لنوعية الكلام اللى اتكتب وطرح أمور فقهية فى مكان اتملى بدخان الحشيش والكلام عنه وحتى العنوان تحس منه انك داخل غرزة فى العشوائيات

...........

استدراك
السابق هو الاستفسار الخامس للاخت مجداوية

مجداوية said...

السلام عليكم

السلام على من اتبع الهدى أقصد بها أن أذكرك أنك متبع الهدى وليس للمشركين
للفت الانتباه وقد فعلت

شفت فيلم أرض النفاق لفؤاد المهندس ؟؟؟
كان بيروح يشترى أخلاق من راجل عجوز راح مرة لقاه مغلق ومكتوب على المكان مغلق لعدم وجود أخلاق
أنا اقتبست الجملة دى لأنك منذ فترة لم تكتب ولما جيت هنا عرفت السبب انك بتمر بدوامات خلت الكلام ميطلعش موزون ولا مظبوط ولا فى محله

أنا قريت البوست أكتر من مرة وفاهمة كويس جدا انك شايف نص الكباية الفاضى لكن هل أنت قرأت ما كتبت !!!!

اقرا تانى كده ملخص ما كتبت

مشيت مع واحد محشش قعد يكلمك على فايدة الحشيش روحت المكتب مديرك قالك اوعى تثق فى أى حد مشيت مع أم أحمد

((( سمعت خطبة دينية )))

المميز فيها الزعيق
دول بتوع فلوس
مش بتصدق حد عشان انت انضجك عليك من المتدينين
اختها منقبة بس قلعت النقاب !!!! تبقى منقبة منين ؟؟؟
وعايزة تدخل تحفيظ قرآن بس هى معلقة مع حسن
وصاحبك وخطيبته اللى بالخمار ومش عارفة بتعمل ايه
وموكلتك اللى بتسهل الدعارة
والسلفية اللى انت مختلف معاهم بس عشان الجامع قريب فبتتنازل وبتصلى وراهم
وانت نفسك قلت ان التدوينة عك وهى فعلا كده
لو جمعت مجمل كلامك مش حتلاقى غير انك أظهرت المتدينين أو اللى عاملين متدينين فقط متكلمتش على أى واحدة عريانه أو كاسية عارية أو حتى من غير حجاب ولابسة عادى كل كلامك عن المنقبات والمحجبات والشيوخ واللى شكلهم متدين
لو الوسط اللى انت بتقعد معاهم كلهم كده يبقى العيب مش فيهم العيب انك مش بتنتقى من تجالسهم ومش معقول كل اللى تعرفهم من نوعية اشرب يا منيل
ومش معقول كل موكلينك بيسهلوا الدعارة تركيزك على نوعية المتسترين بالدين بصراحة غاظتنى جدا وفعلا حسيت انك بتكتب زى عرسة الفلا ما القاهرة فيها ناس زى الفل وناس محترمة جدا وملتزمة التزام مثالى لكن انت حتى اللى ساكن معاهم بيتاجروا فى الحشيش مين يلزمك تصاحب نافخ الكير
تخليص حق

وبعدين فى وسط العك ده كله (والكلمة مقتبسة من كلامك ) !!!!!

تتكلم عن القرآن ان كان مخلوق ولا لأ والسلفية والأشعرية وانك أشعرى ومش مقتنع بالسلفية
أنا أول مرة أعرف ان الدين الاسلامى قسم الناس والمساجد ونختار بينهم !!!!!

أنا طبعا عارفة الأشعرية وكل الفرق التانية وفهمت دلوقت تفسيركم لحديث الرسول عن الفرقة الناجية لكن يا ابنى الكريم أو يا أخ باحث
اللى أعرفه اننا مسلمين نصلى كما صلى
رسول الله
وكما جاء فى الأحاديث الصحيحة
وحتى لو صلاتى مش زى ما كان الرسول بيصليها والأحاديث دى مش صحيحة فالله يحاسبنا على نياتنا وعلى ما وصل الى علمنا والدين أبسط من كل هذا التناحر والاختلاف فأنا أصلى لله وأعبد الله وكفى

أنا ان كان كلامى كرسى فى الكلوب فده لأنى لم أتوقع أبدا منك ان تركز على هذه النوعية من البشر وتظهرهم كأن مصر كلها كده
أنا ليا نظرة خروبية جدا عن الأخلاق فى مصر لكن لا أعمم بهذا الشكل ولا أركز فقط على عيوب المحجبات والمنقبات فقط وكأنك بكلامك تلقى الشبهة على كل المحجبات والمنقبات بعدم وثوقك فى أى بنت بعد ما حدث لك كما أكدت !!!!!!
أنت لم تقرأ ما كتبت بعين من يقرأ ولا تعرف مدى تأثيره عليه
حتى لم تنه التدوينة بأمل أو برأى مخالف لما واجهك
على فكرة أنا كان ممكن مكتبش أى حاجة وأمشى وخلاص وكمان كان ممكن مردش تانى وأفسر لكن أنا أفعل هذا لأنى أحب لك الخير وصدق هذا أو لا تصدق وان قسوت عليك فأنا أنصرك ظالماأو مظلوما وأبكيك وأبكى معك ولا أضحك معك وأضحك عليك



هذا هو تفسير الأخت مجداوية

!!!!!!!!

الباحث عن الحقيقة said...

الاخت مجداوية
اذا حييتم بتحية فحيوا بأحسن منها او ردوها
واحسن من تحية الاسلام لاهل الكتاب هي تحية الاسلام لاهل الاسلام
فالسلام عليكم ورحمة الله وبركاته
فإذا اردتي الاقتداء برسول الله فلا تبتدعي فما بلغنا ان رسول الله حيا بها غير المشركين

ان ما ذكرته في البوست هو مجموعة من الصور المتفرقة المتزاحمة في رأسي ودائما الصورة الاشد ايلاما تطغى على ما دونها

نعم سيدتي لم اصادف في القاهرة من اهل الخير الكثيرين بل قليل جدا لدرجة اني لا اتذكر منهم سوى عسقول والاخوة المدونين في لقاءاتنا
وبعض الوجوه العابره في الاتوبيس حين يقف شاب ليجلس سيدة عجوز مثلا
غير هذا لم أر
وليس العيب فيّ يا سيدتي
فانا كتبت عما مررت به بالمكتب من مواقف وليس في غيرها من امور عاديه ما يمكن ان يذكر
ام تحبين ان اقول وبجلسه كذا قمت بتأجيل دعوى فرز وتجنيب لجلسة كذا لاعادة الاعلان
؟؟؟؟
هل ترين هذا شئ يستاهل الكتابه؟

ان اسكن مع اشخاص سيئو السلوك تخليص حق وهذا لاني دفعت ايجار تسع شهور مقدما وحين اردت ان اتركهم لم يستطيعوا توفير ما تبقى لي من هذا المبلغ ولست املك بعد ان اصبحت الفين ونص اخرى في علم الغيب قد تأتي وقد لا تأتي ان انتقل واخذ سكن اخر وادفع تأمينا وانا راتبي لم يزد عن ثلاثمائة جنية
فانا ساكن مع هؤلاء الاشرار تخليص حق

حديثي عن خلق القران وعن السلفية والاشعرية فهذا يا سيدتي ليس موضوعا وانما احدى الصور العالقه بذهني لحوار تم بيني وبين احدى الاخوات ليس المقصود منه التطرق الى الحديث عن الفرق بل انا اقول انظروا كيف تفكر هذه الاخت عندما تفكر في الزواج وما رأيكم في هذا وقلت انها ستطلع على هذا الكلام وهو بناء على رغبتها

حديثي عن مجدي ومن كانت خطيبته وعن المنقبة التي خلعت النقاب ومعلقه مع حسن
هي اشارة الى صور زائفة صادفتها وصدمتني ولم اصادف منذ حضوري للقاهرة صورا جيدة وفقا للظروف المحيطه
ولا حضرتك عايزياني ادخل على مصلى نسائى علشان اعرف الصور الجيدة ولا امشى ورا المنقبات والمختمرات علشان اتكلم معاها؟؟؟

نعم كان مما آلمني ان الذين يكذبون علي ّ ويخدعونني كانت ملامحهم الظاهرية توحي بالتدين
ولكن ليس معنى هذا اني العن الدين وابو المتدينين على اللي جابوهم

يوجد في درافت الصحيفة الكاشفة موضوع قديم جدا لابن حجر وهو سبب تأخرنا في الصحيفة وطالبته وعاتبته اكثر من مره كي ينزله وفوجئت اليوم ايضا بعد وعود الامس انه لم ينزله

ملحوظة / لا ارى النقاب من الاسلام فرضا ولا سنة ولكن لم يحدث ان اسأت لهن
ولا للحجاب ولا لصاحبات الخمار
ما يكتب هنا في الاستراحه رصد لصور اجتماعية ليس بغرض التشوية ولكن لا تصدمنى رأيه كاسية عارية بقدر ما يصدمني رؤية ملتزمه في زيها وغير ملتزمه في اخلاقها

والسلام

حياتي كلها لله said...

السلام عليكم

هذة أول زيارة لي لهذة الأستراحة و لكني صعقت لما قرأت أعذرني فهذا هو البوست الأول الذي أقرأه هنا
و لك أن تتخيل كم الذهول الذي انتابني
أنا لا أعرف مجداوية و هذة أول مرة أصادف اسمها علي البلوج ...

بس أنا تقريبا متفقة معاها ..و بحيها لأنها الوحيدة اللي أنتقدت الموضوع علي الأقل


ملحوظة :أنا كان ممكن أكتب و أشكرها في البلوج بتاعها بس أنا تعمدت أكتب عندك _ده بعد إذنك يعني _كي تعلم أن الأعتراض علي الفكرة و ليست مسائل شخصيية و تخليص حق بينكما كما استطعت أن أفهم من حديثكما


بجد أنا متأسفة جدا لو كان في كلامي حاجة تضايق "الإختلاف في الرأي لا يفسد للود قضية "


تحياتي
د/سلمي

الباحث عن الحقيقة said...

د0 سلمى
شكرا لتعليقك
من حقك تنتقدي وتقولي رأيك
ومن حق الاخت مجداوية وكمان من حقي ارد
انا كتبت عن صور من الواقع مررت بها فعلا وصدمنتني انا ايضا كما صدمتكم
ولكن يبدو انكم لم تلتفتوا إلى ذلك ولم تبصر أعينكم سوى اني اتعمد الاساءة للمجتمع والدين والمتدينين

شكرا للتواجد الكريم

koukawy said...

الأخت اللي عايزه تعرف رأينا.... فكرتني بالظبط بالأرثوزوكس اللي مش بيجوز بنته من كاثوليكي
هما مش الاتننين مسحيين و لا انا بيتهيألي
كمان المسلمين هيجوزوا علي حسب الطايفه ول اهي
ما احنا كلنا مسلمين و دين واحد
شئ عجييييييييييييييييييييييييييييييب

koukawy said...

و صاحبك اللي كان بيدخل ايده من تحت خمار خطيبته متأكده انها كانت خطيبته و لا ايه؟؟؟؟؟؟؟؟؟؟؟