Saturday, November 22, 2008

يا بنات الحور ..سيّبوا القمر

حين ارمي بصري بعيدا في اطراف ذاكرتي الاولى , اتذكر تلك الساحة الممتدة من مسجد الشيخ نجيب البحري الذي هو موطني الروحي الى طلمبة الماء حيث تبتدي الجهة التي كنا نسميها " شرق" كانت هذه المساحة الكبيرة ماتين متر هي ملعبنا الكبير التي احتوت عظام طفولتنا حتى قويت فيها
كنا نلعب لعبة اسمها النكيسه حيث ننقسم الى فريقين الفريق الاول ينطلق حرا يفر من افراد الفريق الاخر الذي يتخذ من حائط موطن نسميه " الميس" وحسبما يقضي الاتفاق قد يكون على الميس حارسان من افراد الفريق الثاني او اكثر واحيانا يكون الميس طليقا بلا حراسه فاذا نجح افراد الفريق الاول في احتلال الميس قبل ان يمسك بهم احد فانهم يعاودون الانطلاق مرة اخرى وافراد الفريق الثاني يلاحقونهم
تشبهها لعبة اخرى نسميها ثابت واحد واربعين حيث يتم إلقاء القبض على افراد الفريق الحر بمجرد القول ثابت واحد واربعين فلان وينطق اسم من اكتشفه
لعبة اشبه بالعسكر والحرامية .. واتذكر يحي الذي كان يتخفى في ثياب امه لينجح في " التحليل" كان الفائز ما ان يلامس الميس حتى يصيح " حلّلت" وكان اخيه يلف المنطقة ويقفذ من نافذه صغيرة بكنيسة الملاك ليأتي من الجانب الاخر دون ان يلاحظه احد فكنا نطارده من نافذة باب الكنيسة الحديدية حيث يرانا قسيس ملوحا لنا : إلعبوا بعيد
ولعبة اخرى تدعى خارطة الجبنة القديمة وكانت من الالعاب المؤلمة حيث نقف في مربع في كل جهة يقف واحد والخامس يقف في المنتصف ينادي خارطة الجبنة القديمة فمن يفشل في الفوز باحد الاركان الاربعة يتلقى شلوطا على مؤخرته من الاربعة الباقين
ألعاب كثيرة ومنها مثلا الحنجيلة والسبيعة والسقوفة والطرة والوزير
وكان لي عظيم الفخر اني كنت عضو في اخر اجيال العصابات في المنطقة حيث كانت هناك عصابتان من الصبيه عصابة الشيخ نجيب البحري وعصابة الشيخ نجيب القبلي وكانت بيننا الصولات والجولات
ولازلت اذكر يوم الصلح الذي خدعونا فيه عصابة الشيخ نجيب القبلي فما ان حضرنا الى " كامب " المفاوضات حتى انهالت علينا قذائف الاحجار وقنابل التراب المسيلة للدموع والعمى الوقتي
كل هذا لم يكن عمري تجاوز الثامنة او التاسعة حتى ضاعت العصابتان التاريخيتان في مهب ريح الزمان
كان اليوم الذي اقدمت فيه الوحدة المحلية على رصف هذه المنطقة بالأسفلت هو اليوم الذي قضى على ابداعاتنا الطينية حيث كنا ننحت العرائس والتماثيل من الطين والطاحونة
وعلى ذكر الالعاب التي كنا نصنعها بأنفسنا كنا ايضا نصنع السيارات من البوص "اعواد الذرة الرفيعة " والالعاب الورقية
ان جيلي يتفوق على جيل البلاي استيشن بقدرته على الابداع والتخيل وانه كان يصنع ألعابه بيديه ولا يشتريها له احد
ومع ذلك لم يسلم الاسلفت من ابداعات عقولنا الصغيرة فكنا نمزقه الى قطع صغيرة ونحشو بها غطاء زجاجات المياة الغازية ونلعب لعبة المثلث التي يلعبها الاطفال اليوم بالبلي ..وكنا قديما قبل الاسفلت ان نحفر حفرة صغيرة في الارض ونلعب لعبة النواة مستخدمين نوى البلح
لم يمنعنا الاسلفت من الانطلاق ولم يمنعنا من الابتكار ولم يحجب عنا ابو رجل مسلوخة
حيث كنا نجتمع للاغارة ليلا على احد الشوارع وفي مكان ضيق بين منزلين يرمى الناس فيه قمامتهم ويحرقونها فيه كنا نظن ان ابو رجل مسلوخة وكنا نسميه ابو رجل محروقة انه يقطن في هذا المكان الضيق فنرمي بالحجارة وقذائف التراب رمية رجل واحد ونفر صائحين: اجري ياد قبل ما يطلع بوععععع بوععععع اجري اجري
ولم يكن ينتهي العام قبل ان يأتينا في اول كل سبتمر مولد الشيخ نجيب حيث تنتشر الالعاب ويأتي الغجر وبتوع المراجيح وحلقات الذكر..كنت اجلس الى حلقات الذكر بعيدا عن الزحام كي استمع ماذا يقول المداح؟
وكنا نندس وقت توزيع القرفة بين الصفوف لننال كوب القرفة
وينتهي المولد بليلة تسمى "الشيبيتي " حيث يأتي الزوار من كل القرى المجاورة لزيارة قبر الشيخ نجيب
ومن الاساطير التي قيلت في حق الشيخ نجيب انه ظل يحارب اعداءه اربعين يوما بدون رأس
وهي خرافات كانت تتناقلها ألسنة العجائز والمسنين ولكن لم يكن يعنينا صدق هذا من عدمه بقدر ما يعنينا البريزة اللي هنركب بيها المراجيح
وما زال الشاطئ يمتلئ بكثير من الذكريات منها هذه الانشودة حين كنا نلمح في وجه القمر حمرة فنظنه مخنوقا فكنا نجتمع وكل منا يحمل علبة فارغة او صفيحة كبيرة او يصفق على يديه بكل قوة وننشد
يا بنات الحور.. سيّبوا القمر
ده القمر مخنوق ..ومعندناش خبر
ملحوظة : الفقرة دي اتصورت لو تحبوا نذيع قولوا نذيع
:)

27 comments:

mahasen saber said...

اولا الالعاب دى طبيعى لازم تطلع شخص عبقرى هههههههههه ايه الابداع ده
بس طول عمرك حساس تسيب الاجرام وتروح تسمع حلقات الذكر يا مؤمن

والله بوست من الذ ما يمكن يا باحث
الا ابو رجل مسلوخه قصدى محروقه لا مكسوره مش بيفكرك بحاجه

دكتور حر said...

تعرف يا عمنا

اسوأ ما في الجيل الجديد ان العابه مع اجهزة ومعظمها منفرده


طلع جيل ماسخ أناني مبيعرفش يتعامل حتى مع أهله

بس ذكريات جميله متعتنا بيها وبطريقتك الصراحة

فاتيما said...

ياااااه يا باحث
فكرتنى بالذى مضى
أيام اللعب و الشقاوة
أصل اختك كانت غاوية لعب مع الولاد كورة و ملاكمة و كله الألعاب اللى بتنتهى بأصابات ....
و البنات مكنتش تحب تقعدنى معها عشان بيعتبرونى ولد و من الآخر كانت طفولة مشردة
بس جميلة
الميس دى كنا بنلعبها بس بأسماء تانية
تتصور بحاول أفتكرها مش عارفة
لعبة الثابت و دى كن بنقول عليها كهربا لما نقف و شد الكوبس لما نجرى تانى الله يحظك يا شيخ رجعتنى ييجى 25 سنة ورا
هييييييه
فين الأيام دى ؟
ربنا يسعد أيامك دايماً
أما بخصوص الجمعية فمنفعتش الشغلانة و السبب معاملتهم مريحتنيش و كان فيها تحفز كدا من اولها ...
سلام لعسقول زينة الشباب

Unknown said...

العاب حلوة لانها كانت تدعوا على المشاركة والابتكار ومحاولة نيل متعة بسيطة من كل الاطفال
كما انها تترك ذكريات جميلة وطيبة فى النفس تصبح بمثابة واحة نعود اليها لنرتاح من عناء الحياة


موضوع حلو يعنى اهو يمسح بعض الاخطاء فى المواضيع السابقة

همس الاحباب said...

ههههههههه
كانت ايام وعدت كانت ايام وراحت
فكرتنا بايامنا الخوالى
وايام الطفولة المشردة
والاستغماية وامسك حرامى
ذكريات وابداع فى الالعاب
وما تنساش السبع بلاطات والسيجة
والموالد كانت نزهة ومتنفس لنا
تسلم ايديك
رجعتنا لزمن جميل باسلوب سهل وبسيط
تحياتى

ابن حـجـر الـعـسـقـلانـى said...

إيه يابنى حالة الصفاء اللى انت فيها دى ؟؟ دة أنا كنت لسة قاعد معاك أول امبارح و الدنيا كانت متكربسة فوق راسك

بجد موضوع جميل جدا

تحياتى ليك يا باحث

أمل حمدي said...

النهاردا موضوع جميل

حملني معه لذكريات طفولتي ايضا

ما انا كنت طفلة برضه متلعطش ماما على طول

هههههههههههههه

بس كان اخر لعبي رجلي اتكسرت حرمت بعدها

بورفؤاد كانت هادية قوي وكانت عبارة عن فلل والكل جيران واصحاب
وكنا كل يوم نتلم بنات وولاد
ونلعب اخوات مع بعض

ايام جميلة كانت في زمن اجمل
دلوقت بنخاف على اولادنا من الهوى

شكرا يا باحث رجعتني لايام حلوة

وانا بقولك ذيع

سلام

Kiara said...

هههههههههههههههههههههههههه


رجعتني بجد لايام زمان

كانت ايام حلوه اوي وعمرها ماتتنسي


ذييييييييع

Mony said...

هههههههههههههه

ايام جميلة مش ممكن تتنسي ابدا


فكرتني بالمصايب اللي كنا بنعملها انا و اخواتي زمان

الباحث عن الحقيقة said...

محاسن صابر

ابو رجل مكسورة بيفكرني
بام رقبة هتنكسر
نيهاهاها

************

دكتور حر
فينك يا مان
اسعدتنى بهذه الطلة المشمسه
فعلا جيل اناني بيلعب مع الكمبيوتر
الالعاب الجماعية فعلا مفيدة تربويا


************

فاتيما
ملاكمه؟؟؟
يا خبر
!!!
ده انتي الواحد يخاف منك
هههههههه
والشغلانه يلا معلش خيرها في غيرها

*********

نهر الحب

اخطاء زي ايه
ولا بس بتشتكيني لعسقول؟؟

**********

همس الاحباب
منور يا سوهاجي
اكيد انت في جرابك من الحكايات دي كتير
اعترف ايه الاغاني القديمة اللى بتغنيها لهمس


**********

ابن حجر
يابني حرام عليك الموضوع في درافت الكاشفة بقاله سنين خلص بقا انا روحي طلعت

الباحث عن الحقيقة said...

ماما اموله
ايه ده بجد كنتي صغيره
بس تعرفي انا كمان توقعت كده
اكيد ذكريات في بور فؤاد هتكون جميله لانها بلد رااااائعة

**********

مولان

ويا ترى رجعتي كام سنه لزمان
اعترفي احسنلك
ولا اقولك طلعي البطاقة على طول

**********

موني
مصايب؟؟
حتى انتي يا موني
بقى كنتى عامله عصابة جوه البيت
اشي خيال يا ناس

صبرني يارب said...

باحث

ممكن احقد عليك ؟؟؟

تعرف انا كنت فى بلد ارياف قريب ولاحظت حاجه مهمه اوي

كان فى مجموعة بنات بيلعبوا قدامي واناقاعده فىالعربيه البنات ما شاء الله عليهم عندهم نشاط غير عادي البنت بتجري من قدامي زي الطلقه

وكلهم رفيعين جدااااااا

تعالى بقى لماا روح المدرسه عند مريم
مدرسه خاصه لغات

عندهم نسبة بدانه فظيييييييعه بالاضافه الى ان العيال عندها بلاده شنيعه

انا باقول على مريم بنتى حركتها قليله وكسلانه

لما باروح المدرسه بتكون هي من انشط الناس الى فى الحوش فىحصة الالعاب

المدنيه وبؤسها على الناس

والقمر مخنوق دي تيته كانت بتقعد تقولي ان العيال زمان كانوا بيقولوا كده برضه
انما انا ما لحقتوش بقى المدنيه طغت علينا للاسف


على فكره قريت البوست الى فات ومت من الضحك وانت عامل زيي لما روحت القاهره وابصل للناس وانا فاتحه بؤي

مع انى باروح القاهره كتير بس طبعا مش على طول فلما باروح بابقى مذبهله يعنى

ما تغيبش علينا كده ابقى عدي قول اي حاجه

المستنصر بالله said...

ذكرياتك جميله جدا
انا باشكرك جدا لمشاركتنا اياه وهذه السعاده التى ادخلتها عليينا
تحياتى لحضرتك

أمل حمدي said...

ما انا كنت طفلة برضه متلعطش ماما على طول


ايه متلعطش دي مين اللي كتبها اكيد الكيبورد احول

معلش ها البسه نضارة

الصح مطلعتش

الغلط مردود

سلام

كلام على بلاطة said...

مدونة رائعة
تحياتى

الباحث عن الحقيقة said...

صبرني يا رب
صبرني على الناس اللي بتيجي تحقد وتمشي
قال يعني هي مش اكبر مني وما سمعتش اغنية القمر مخنوق

ماهو يا ام خطيبتي لما العيل طول الوقت قدام الكمبيوتر او البلاي ستيشن هيكون نشيط ازاي؟؟
لازم يتخن ويتكلبظ
ويكون كمان اناني لان معظم الالعاب فرديه بيلعب مع الجهاز

واللعبه هي اللي بتتحكم فيه مش بتخلي عنده قدره على الابتكار
اللعبه لها نظام ثابت يعني مثلا كل ما ألعب كوره لازم ييجي فيا اول جون وبعين هو يسيبني اعوض وااتعادل
ده لو انا استغليت الفرصة اللي هو بيتيحهالي لكده

ما علينا
علمي البنت ازاي تعمل العاب وتبتكر من الورق بس اوعي تقطع كتبها
ههههههههه


....................


المستنصر بالله

والله انت وحشني
منور جدا وسعيد بتواجدك واسف لعدم قدرتي على المتابعة

.....................

ماما اموله

جايه تصلحي الاملاء دلوقتي؟؟
خلاص ما ينفعش النتيجة طلعت تسعه من عشرة
خدي بالك المره الجاية


.............

كلام على بلاطه

طلتكم في مدونتنا هي الاجمل والاروع

صفــــاء said...

فكرتنا بلعبه كنا بنلعبها بغطيان قزايز البيبسى
بس مش زى البلى كانت مختلفه شويه
والسبع طوبات وصيد السمك

بس احنا صعايدة والموالد عندنا أجمل وأشد زحام
والاغنيه بتاعه كسوف القمر لسه لحد دلوقتى العيال بيغنوها فى الشارع وبيخبطو على حاجات معدنيه كل اما يكون القمر مخنوق

Mony said...

عارف
بالنسبة لحكاية ان القمر مخنوق

الحكاية ديه فكرتي بحاجة كنت قراتها من زمان اوي

و من ساعة ما قرات البوست بتاعك و انا عمالة افتكر الحكاية علي بعضها
و الحمد لله افتكرت

بس الحكاية ديه عن كسوف القمر
بس مشابهة

كان في اسطورة عن اليبانيين ان لما يلاقوا القمر مكسوف كانوا بقعدوا يخبطوا علي حاجات معدنية علشان يعملوا دوشة جامدة و هيصة

آل ايه
التنين بياكل القمر
و هم بالازعاج اللي بيعملوه ده بيزعجوا التنين علشان مايكملش اكله و يهرب

لحسن القمر يخلص
و يقعدوا من غير قمر

انا كده استريحت بعد ما افتكرت القصة ديه و كتبتها

قوس قزح said...

يا ولاد يا ولاد
تعالوا معنا
علشان نعمل بؤجة جميلة
و تكسبنا صدقة كبيرة
و تهدينا
و تجمعنا
وتعرفكم كمان اسامينا
بؤجة .. بؤجة جديدة

ههههههههه ده بمناسبة البوسن عن ابام الطفولة
معرفش انت كنت بتسمع البرنامج الاذاعى ده ولا لا بس انا كنت بحبه اوى
انا اخويا بيعشق الكرة
و كان زمان يقولى العبى معايا ماتش و انا العب معاكى بالعرايس
و بعد ما العب معاه الماتش و اتخبط من الكرة كل خبطة و خبطة تورم جسمى
يقولى لا خالص انا تعبت من الشوط فيكى هههههه
و من وقتها مش بهتم بالكرة غير المنتخب لما بيلعب ماتش مهم


هنستانكم انت و عشقول بكرة
اوعى محدش يجى منكم
هنشوطه على طول :)

سلام

قوس قزح said...

عسقول عسقول

الحمدلله انها مطلعتش فشكول
هههههههه

جنّي said...

السلام عليكم

ازيك يا ابو حميد والله وحشتنا عامل ايه وايه اخر اخبارك .. خليها على الله وربنا ها يكرمك ان شاء الله ..

قريت البوست اللي فات واشكرك جدا والله القلوب عند بعضها .. بس انت جيتلي وانا تعبان جدا ومن قبل ما تيجي لدرجة اني كنت اصلي بالبيت واحيانا وانا جالس والحمد لله على كل حال نعمل ايه العظمة كبرت يا ابو حميد ولا زلت اعاني حتى الآن ربنا يعافينا ويعافيك ودعواتك يا احمد ..

البوست السابق لي عليه بعض الاعتراضات واظنك عارفها من غير ما اتكلم ..
بس انت متضايق من المحروسة ليه هما عملوا معاك ايه اوعى تكون اشتريت مترو الانفاق اصل انا بعته لواحد بلدياتك ..وهي دي مصر يا هبلة قصدي عبلة عايزة الناس المصحصحة مش المدروخة من الحشيش ..

وذكرياتك الحلوة مع الألعاب رجتنا فلاش باك بس العابكو كانت لذيذة بدون عنف مع اني كنت فاكركم بتلعبو بالبندق واللي يكسب تطخوه .. مع ان جني عمل عمايل في رمضان بلعبة رهيبة طبعا ما جيتش قريتها ..المهم كان عندنا العاب اشد واقوى من اللي ذكرتها ..

المهم عودا حميدا ونورت يا ابو حميد

أنت...وأنا said...

السلام عليكم
احلي مافي الموضوع الي عاش ٤٠ يوم من غير راس انتوا كمان عشتو جو البلستيشن بس بالخيال
انته ما التش لنا عن شعور الامهات لمه ترجعوا البيوت .... يله علي الاقل الواحد يتذكر انه لعب احسن من العيال الي عايشين بشقق صغيره
بوست جميل .. الهروب من الواقع الي الماضي
هاهاها ..... اسفه 

جنّي said...

السلام عليكم ورحمة الله وبركاته

كل عام وانتم بخير بحلول عيد الأضحى المبارك

كل عام وانتم على صعيد عرفات
كل عام وانتم من الحجيج
كل عام وانتم من الملبين
كل عام وانتم من المكبرين
كل عام وانتم من المهللين
كل عام وانتم مغفور لكم
كل عام وأنتي حرة يا أمتي

......أخوكم سعيد

أنت...وأنا said...

السلام عليكم
كل عام وانت بخير يا جنى وسلامتك كل عام وانتم جميعا بخير وان شاء الله كل الى بيقرى التعليق هذا السنه الى جايه يمون من حجاج بيت الله كل عام وانتم بالف خير وربنا يهدينا ويقوى ايمانا

أمل فتحى عزت said...

السلام عليكم
كل عام وانتم جميعاً بخير بمناسبة عيد الاضحى المبارك أعاده الله عليكم بالبخير والبركات
مع خالص تحياتى

د.توكل مسعود said...

"قد تكون المساوة ... عار"

مهداة إليكِ في بلاوطن

ABUL_HASAN said...

بسم الله الرحمن الرحيم
كل عام وانتم والامة الاسلامية كلها بخير
حديثك عن الطفولة والذكريات ذو شجون
وانا احييك على هذا العرض واود ان اشير الى شيء كان يضايقني في طفولتي وعازم ان شاء الله على الا افعله مع اي طفل او ابن من ابنائي في المستقبل
وهو الجملة التي نسمعها دائما
العب بعيد يا ولد
اعتقد اننا لا بد ان ننظر للعب الاطفال نظرة مختلفة
اينشتين كان يقول ان السبب فيما وصل اليه هو بوصلة اهداها اليه ابوه وهو طفل ليلعب بها
جزاك الله خيرا ووفقك