Sunday, October 21, 2007

اقرأ الحادثة..اقرأ الحادثة

يا إلهي !..الملكة حامل !!..من فعلها!!!؟
السلام والتحية على اهل الاستراحة الندية ..وبعد غياب من ارض الفورمات "وكل هارد وانتم وبخير"يا صحابى يا اهلى يا جيرانى انا عايز اخدكو فى احضانى - وقبل ما نتكلم لازم نعرف الحساب على مين النهاردة وخد بالك اللى زوغ المرة اللى فاتت انا كاتب اسمه فى ورقة وهعلقها على ابواب قاهرة المعز لدين الله الفاطمى
ندخل ع الدرس
كيف تصبح مبدعا؟ كيف تنشئ مدونة او تكتب موضوع يجذب القارئ؟
اول حاجة ..اختيار اسم المدونة ..انا وزميلى ابن حجر قعدنا 3 ايام علشان نختار اسم للاستراحة من بين اكتر من عشرين اسم وكل اسم اجمل من التاني انما اكتشفنا انه مع اختيار الاسم بتيجي مشكلة اختيار الانسب ..ماهو مش كل جميل مناسب "على رأى خالى لما جيت اختار كلية ايام التنسيق قال لى : مين اللى بتغنى دى؟ (وشاور على التلفزيون) قلتله دى ديانا حداد (كانت لسه جديدة) قالى: اهى ديانا حداد جميلة لكن مش مناسبة ليك ..يبقى انت ما تختارش كلية علشان هى كلية جميلة اختار الكلية اللى تناسبك
فحمدت ربنا انى مش بحب ديانا حداد وكانت النتيجة انى دخلت كلية حقوق
المهم علشان ما اطولش عليكم راح ابن حجر مقترح نسميها "يا إلهى الملكة حامل من فعلها؟" نسيت اقولكم ان ابن حجر عبقري ..ما علينا ايه ده يابن حجر قالى انه سمع مره الاستاذ هيكل على الجزيرة بيقول انه زمان كانوا بيدرسوا لهم مبادئ الصحافة مختصرة فى العنوان التالى "يا إلهى الملكة حامل من فعلها؟" تخيلوا ان ده كان ممكن يكون اسم المدونة
نرجع للسؤال بتاع القعدة بتاعت النهاردة- ولغاية دلوقتى محدش طلب حاجة شاي قهوة عصير شكلنا هنفلس ونقفل تانى يوم الافتتاح
كيف تصبح كاتبا مبدعا ؟ وتنشئ مدونة او تكتب موضوعا جذابا؟
تعالوا من وجهة نظرنا الاول نحلل عنوان "يا إلهى !..الملكة حامل!!.. من فعلها!!!؟
يا إلهي : نداء استغاثة ..وجوده فى العنوان حتى يلفت الانتباه ويهيئ المستمع لتلقى خبر "كارثة" قول ان شاء الله
الملكة حامل : الخبر الكارثة ..ولاحظ انه يتعلق بشئ "الملكة" يهم كل الجماهير أو الاغلبية
من فعلها؟ : سؤال يضمن له ان يتحرك ذهنك مع الموضوع وتظل مرتبط به لحين اكتشاف الجانى او الفاعل
لاحظ كمان تدرج علامات التعجب فى العنوان "يا إلهى!..الملكة حامل!!..من فعلها!!!؟" فلكى يضمن انجذابك الدائم بالموضوع يجب ان يترك لك علامات تعجب كثيرة يضمن بها ان تظل متابع حتى نهاية الخبر
حد فهم حاجة؟
عارفين ليه؟ علشان لسه ما شربتوش حاجة ..واللى طلب حاجة لسه ما طلبش التانية ايه يا جماعة دى قهوه وعليها مصاريف وإلتزامات
فى الحقيقة انا اتعلمت من العنوان ده فى الكتابة 3 حاجات
الحاجة التانية : خالف المتوقع ..علشان محدش يقول انا كنت عارف انه هيكتب كده
الحاجة التالتة : التسلسل فى الفكرة ..علشان يفضل متشوق للنهاية حتى يعرف "الموضوع (الصداع) ده اخرته ايه"؟
ومع ذلك ..يبقى النجاح والجذب غير مضمون لان ده بيتوقف على 3 حاجات
الحاجة التانية : جمهور المدونات عايز يقرأ ايه؟ هل هو قارئ فعلا ام زائر؟"مجرد التفكير فى السؤال ده حاجة تغيظ فعلا"ولا ايه
الحاجة التالتة : مدى براعتك انت فى الكتابة والالمام بعناصر الجذب
ملحوظة: اللى عايز يعرف ايه هى الحاجة الاولى فى الـ 3 حاجات اللى اتعلمتها من العنوان ؟ وايه هى الحاجة الاولى فى الـ 3 حاجات اللى بتخلى النجاح غير مضمون ؟ جمع خمس كبايات شاى او اتنين كوكتيل او3 حاجة ساقعة وارسلهم على ص .ب 122"رقم سهل اهو على نفس رقم بوليس النجدة" استراحة الكاشفة- شارع الصحيفة الكاشفة ..وانتظروا ميعاد السحب
عموما يا شباب كلنا بنجتهد وبنحاول نتعلم ازاى الواحد يكون كاتب مدونة ناجح وموضوعاته بتجذب كل الزوار وتدفعهم نحو التعليق ؟
ياريت كل واحد من المعلقين يساعدنا ويقولنا عن تجربته :وما هى الاشياء او العناصر التى اختار على اساسها اسم مدونته وما العناصر التى يراعيها فى كتابة اى موضوع جديد ؟ وهل انت راضى عن مستواك فى الكتابة ؟
أروح انا بقى احاسب ابن حجر احسن شكله كده بيقول اننا هنقفل الاستراحة ونتنازل عنها يإما للديّانة ..او الضرايب

34 comments:

مهندس زراعي said...

رائع والله عن صدق قوي جدا جدا جدا

تحياتي القلبيه لك

وفي انتظار كل جديدك

eldoctor said...

هل اسم المدونة يدل على محتواها ؟؟ ليس دائما
احيانا يكون الاسم يحمل معنى خاص لدى المدونة مرتبط بفكرة اكثر و اكبر من الاسم نفسه

Desert cat said...

اتفق مع راى الدكتور مش كل اسم يحمل المحتوى
تحياتى

ابن حـجـر الـعـسـقـلانـى said...

إيه يا عم الباحث .. انت لحقت ترجع ؟؟ أنا قلت حكاية الهارد اللى طار دى هاتخليك أوف لاين لمدة أسبوع ((كنت ألحق أخنصر لى كام مليم كدة لكن أهو رجع تانى و مش هاعرف اضرب مليم واحد فى جيبى)) ..يا عم الناس بتيجى تتكلم بس .. ما حدش بيشرب حاجة .. يبدو كدة إن الناس عايزة شيشة .. ما تيجى نتنازل عن مبادئنا و ننزل للناس شيشة ؟؟ كام يوم تنازل عن المبادئ مش هايفرقوا.. أهم يظبطوا الحالة المادية ((و الخنصرية برضه)) و بعد كدة نرجع نلتزم تانى

بالنسبة للجملة اللى كتبها أخى الباحث و التى تقول: "يا إلهى.. الملكة حامل.. من فعلها إذن؟" هى تعد جملة قياسية مشهورة فى عالم الصحافة لأنها تحتوى على الخمسة عناصر التى إن احتواهم موضوع ما.. فإنه يكون موضوعا صحفيا شيقا و جذابا لأقصى درجة
العناصر هى
ا- الحديث عن أهل الحكم و السلطة (الملكة)ا
2- الحديث عن الدين و رموزه (يا إلهى)ا
3- الحديث عن الجنس (الحمل)ا
4- إثارة التساؤل (من فعلها)ا
5- للأسف .. ناسى خامس نقطة

هذا ما قاله محمد حسنين هيكل فى إحدى حلقاته على قناة الجزيرة

يا جماعة اللى يعرف خامس نقطة يقول لى الله يخليكم

و الف حمد الله على السلامة يا عم الباحث

Anonymous said...

البلوج لازم يكون حلو
فى شكله
وموضوعه
يعنى يجزب الناس بموضوعاته
ويكون فى نفس الوقت شكله حلو
مش كئيب ولا مبهرج
وسط يعنى
وبعدين انا جديدة هنا ومش عارفة طلبات ايه ؟
ممكن تفهيمنى؟

الباحث عن الحقيقة said...

مهندس زراعى

الدكتور

قطة الصحراء

احلى واجب علشان الحبايب
ومتشكرين على الزيارة
والكلمة العبقرية اللى قالها فضيلة الدكتور

الباحث عن الحقيقة said...

الاخت عابرة السبيل
شرفتى الاستراحة
واكيد العناصر اللى بتقوليها والتنسيق وكل ده مهم
وبخصوص الطلبات ثوانى ابعتلك ابن حجر ومعاه لستة المشروبات
هو مش باين علينا اننا فاتحين كافيتريا ولا ايه

شباب روش طحن said...

أعتقد أن كلامك ممتاز أشكرك علي هذه النصائح التي نحتاجها للأسف وجدت مدونة تعرض صور إباحية بل هي مخصصه من أجل ذلك تخيل

عصفور المدينة said...

أيوة المباديء دي مبنية على فكرة التسويق يا أساتذة
لكن الحقيقة أن التدوين مرتبط بالأهداف والمباديء أو هكذا ينبغي أن يكون من وجهة نظري
أما اسم المدونة فهو استخدامه لحين أن يعرفها الناس وبعد ذلك يصبح عبارة عن عنوان لا يفكر فيه الناس كثيرا كما لا نتدبر اسماء الشوارع
ولكننا نتأمل البيوت
أما أرباب الصحافة فإنهم إذا اشتريت الصحيفة فمش مشكلة رجعها وادفع ربع جنيه

أنا ممكن اقولكم العنصر الخامس من غير ما اعرف

القتل

أكد هيكل أن أكثر كلمة مستخدمة في الصحافة بعد كلمة الرئيس ومشتقاتها هي كلمة القتل ومشتقاتها ونظائرها


فأكيد الراجل اللي عمل العملة دي حيتقتل

الباحث عن الحقيقة said...

شباب روش طحن
اظن بتاع الصور الاباحية ده مريض عايز يلفت الانتباه لنفسه وخلاص
مره وانا فى تانية ثانوى جالنا مفتش علم نفس وبعد الحصة ما خلصت وكلنا خارجين رحت عليه وقلتله انا شايف ان الممثلين دول كلهممرضى نفسيين
قلى انا معاك ..العرى والاباحية مرض
شرفتنا يا شباب روش طحن واهلا بزيارتك

الباحث عن الحقيقة said...

الاستاذ عصفور هرب من البرج وجه على الاستراحة ..بقى هو ده الحصار يابن حجر
............
تمام يا استاذنا التدوين مبادئ واهداف
انما النتائج او النجاح مبادئ ووسائل تسويقية
ياما افكار جميلة وكويسه لكن مش بتحقق نجاح وانتشار افكار نص كويسة
مثلا تلاقى بوست فى مدونة عليه كم كبير من التعليقات بينما هو لا يستحق
وتجد بوست جميل وبيناقش فكر معين وتجد التعليقات لا تتناسب مع حجم الفكرة ومجهود الشخص اللى قدمها
وده لان الكتابة نفسها يجب ان تتضمن عناصر تسويقية
بالمناسبة انت طلبت حاجة ولا لسه
القعده هنا بالمشاريب
لكن وبما ان عناصر الجذب او النجاح غير مضمونه وفيه موضوعات بتحقق رواج لاسباب غير مفهومه يبقى الحل هو التركيز على المبادئ والاهداف وحسن عرضها
مع ضرورة ملاحظة ميول الجمهور المخاطب
زى تحليل هيكل لكلمة القتل ونظائرها
وانها الاكثر شيوعا بعد كلمة الرئيس ومشتقاتها
وده تقريبا لان الناس جواها ميل للانحراف عن القانون والنظام "الممنوع مرغوب" فعايزين يعرفوا اللى خالفوا حصلهم ايه وهربوا ازاى وان اتمسكوا اتمسكوا ازاى ..هذا الى جانب الميل الى القصص المأساوية وماذا حدث للمجنى عليه شعب بتاع قصص وروايات برضه

ammola said...

سندويتش فلافل وواحد كبدة اسكندرانى

يا الهى!..يوميات امولة!! من كتبها؟؟

مش قصدى دعاية للمدونة

انا باحاول استوعب الدرس

اقولك حاجة انا شايفة ان الاقبال على

تدوينة معينة او الاعراض عنها بيكون

نتيجة الميل البشرى,انا مثلا لما بالاقى

اى تدوينة فيها محاسبة او كلام عن نظم

كمبيوتر او ما شابه مش باعرف اكملها

لانى مش باميل للحاجات دى بس ممكن مع

نفس المدون يكون له تدوينة بعيدة عن

السكة دى اتفاعل معاها جدا

الحساب من فضلك

عصفور المدينة said...

تدفع كام يا احمد واقولك الأسباب الغير مفهومة التي تحقق مواضيع رواجا لأجلها وربما تراها أنت وأنا والأستاذ التالت بتاعنا غير مجدية؟

سندباد said...

بصراحة هي مش استراحة هي واحة للاستراحة جو المدونة جميل جدا
تحياتي لمجهودك ياعزيزي

الباحث عن الحقيقة said...

الاخت امولة
اهلا بيكى فى عالم التدوين
فعلا الميول الشخصية للقارئ بتلعب الدور الاكبر
بس فى المدونات بقى لازم تيجى على نفسك شويه وتعصرى على نفسك لمونه وتقرى للاخر وتردى وده هتعرفيه بعدين بالتجربه انتى لسه فى اولها

الباحث عن الحقيقة said...

الاستاذ عصفور
مش دافع يعنى مش دافع
قول يا استاذنا وابقى خدبها مشاريب مجانى لمدة 3 ايام
بس خليك فاكرها

الاخ سندباد
اهلا بمحامين اسيوط
منورنا يا باشا

عصفور المدينة said...

الإجابة :علاقات المدونين من خلال الشات يا طيب

الباحث عن الحقيقة said...

تما يا استاذنا مظبوط
وده برضه يعتبر نوع من المجاملة اللى قلت عليها فى التدوينة اللى فاتت
والشات فعلا مجال جيد للدعاية
احلى واجب يابن حجر مع عمك عصفور

Ahmed Al-Sabbagh said...

رائع وفى انتظار بوستات جامدة بقى

عصفور المدينة said...

أيوة يا معلمي ولكن الدعاية والمجاملات والتصفيق لا تصنع فكرا لا تبني وطنا
والعناوين وأرقام التوزيع لا تثقل ميزانا كما تعلم ولا انت ناسي المقولة الكاشفة

فيه أخت امس حطت بوست عوانه بوست هدية
وبعدين هي كانت بتحكي كلام عادي خواطر طيبة بس عادية

فالناس بقت تسأل بعد ماتجاوزوا مرحلة الجذب

هو البوست ده هدية لمين
هي ردت إنها قصدها هدية من ربنا ليها إنه من عليها بنعمة التعبير

عين فى الجنة said...

ازيك يامتر
مبروك الهارد الجديد
شوف انا جديد خالص فى العالم بتاع المدونات لكن انا بحب القراية والكتابة من زمان، وازاى اختر ت الاسم، انا قعدت محتار وبعدين قلت اسيب عقل الباطن يطلع اللى عنده طلعت عين فى الجنة قلت حلو قوى قشطة رحت كاتبها
اما الموضوعات فلم اكن وحتى تاريخه اتعب كتير فى اختيار موضوع ما فمصر مليانة اعاجيب ويوميا باشوف فى شغلى وفى انتقالى من مكان لاخر موضوعات جميلة اخزنها او اصور بعض الاشياء وبعدين لما يجى المخاض اقعد اكتبها وطبع انا واعترف بكده باجامل زوارى حصوصا من البنات الطيبين اللى بيحبوا الشعر ، لكن بانخرط مع نوارة مثلا او فى القهوة بتاعتك وعند تمر حنة وعند انا جعان وغيرهم من المبدعين ، المشكلة هى مادة الكتابة لما تيجى الفكرة واقعد ادور على حاجات على الانترنت اعتقد انها لازم تكون موجودة وسهلة مثلا كنت بادور على كاريكاتير صلاح جاهين وطلع عينى وموش لاقى الا عدد قليل جدا
انا ماطلبتش حاجة يعنى قاعد تزويغ لكن اوعدك المرة الجاية اشرب قهوة زيادة
لك التحية

رحــــيـل said...

ايه ده الكومنت بتاعى مظهرش
هرغى تانى كل الرغى اللى كتبته
طيب شاى تانى بقى لو سمحت
المهم
كنت بقول انى بكتب عشان افضفض بكتب احساس جوايا مع ان ليه اصحاب كتير بس فى المدونه بحس انى بحكى معايا
بكون على راحتى
وبالنسبه للعنوان جه فى بالى وانا بعمل المدونه
غالبا بيعبر عن حاله انا عايشه فيها الايامدى وكمان هو هدفى من المدونه
اما بالنسبه للتعليقات فانا ميهمنيش الكم قد ما يهمنى كيفيه التعليقات نفسها وبتساعدنى فعلا انى الاقى نفسى ولا لاء
وبالنسبه لاختيار المواضيع مش بحتار كتير
لانى بكتب اللى بحسه واللى جوايا ومشاعرى فى وقت معين
وبالنسبه لتعليقاتى
فالمواضيع بالنسبالى منقسمه لنوعين بوست اقراه بستفيد منه جدا او بوست اقراه احس المشاعر اللى فيه والاقينى بين سطوره
نادرا لما بعلق على موضوع من باب المجامله بس اكيد بيحصل اوقات
ومش بحب حد يعلق عندى من باب المجاملة
وبالنسبه لرضايا عن مستوى كتابتى فانا مش راضيه عنه
بحاول جاهده انى احسنه عشان اقدر اوصل احساسى صح للناس ومتفهمش غلط
هو الشاى ده مين هيحاسب عليه
اول مره اجى بقى وكده
وهتوجب معايا
على حسابك يعنى
مرسى جدا على زوقك
هبقى اجى كل يوم بس ده لو الشاى على حسابك
سلام

كرم مسلم said...

السلام عليكم

لازم تشدنى كده لغايت ما أقرأ الموضوع كله على العموم موضوع هام ما هو الهدف من التدوين
بالنسبة لى العناصر اللى براعيها فى كتابة موضوع جديد هو عنصر واحد وهو الاستفادةلى ولمن يقرأ
وليس همى زيادة المواضيع (وخلاص )لكن المهم الاستفادة
جزاك الله خيرا

كرم مسلم said...

فين ياعم كباية الشاى للى طلبتها وبعين الواد حمادة زهق طلبله سحلب من بدرى بسرعة ولا اروح اقعد فى بيتنا

L.G. said...

سلامو عليكم أنا قلت المدونة دي عصماء موضوع واحد بس الحمد لله .. ياريت لو سمحتم واحد شاي سكر زيادة وبعد
وما هى الاشياء او العناصر التى اختار على اساسها اسم مدونته
اسم مدونتي الواحة الزمردية لأني بحب الزمرد ولأن الواحة دائما مكان للراحة والاستجمام ويتناسب معها اللون الأخضر وهذا لأني وجدت أغلب المدونات غاضبين وبيزعقوا لذا أتمنى أن تكون مدونتي اسم على مسمى يرتاح فيها الناس ولا يحزنوا
وما العناصر التى يراعيها فى كتابة اى موضوع جديد ؟
الصدق - التأثير الايجابي - زرع الأمل -التجديد وفتح آفاق جديدة - المعاصرة
وهل انت راضى عن مستواك فى الكتابة
لا أعتقد لأني اضطر أحيانا لاستخدام العامية
التسويق مهم جدا ايه النتيجة لو فكرك لم ينفع أحد
دائماً وأبدا تثير تساؤل لدى القارئ
تعليق صغير على رأي عصفور المدينة لو كان يقصد موضوعي هدية مدونة لي رد مطول بعض الشئ وليس هنا مجاله
المدونات ليس جريدة وليس المدون صحفي المدون يكتب أفكاره هو وتوجهاته هو ورؤيته هو لذا عن نفسي مدونتي أفكاري التي أحب أن أعرضها على الآخرين ولكنها في النهاية بيتي عقلي مسطورا في كلمات فالمدونة رسم لشخصية المدون ذاته

عصفور المدينة said...

بوست هدية
للأخت ماعلينا هو بوست رائع تحكي فيه يوميات فتاة ملتزمة في المواصلات والتدخي ومعاناتها من انعدام الحياء لدى بعض الرجال

MiraMar said...

السلام عليكم
أولا
اسم المدونه
زي ما قال الأستاذ عصفور
لا نتدبر اسم الشارع ولكن نتأمل ملامح البيوت
ولكن أحيانا ما يكون اسم الشارع مصدر للجذب
ولكن بمجرد أن تقصده تصاب بالملل وتشعر بالتعاسه

اسم مدونتي فتافيت السكر
اخترته ليه ؟
:)
أولا جذاب
فيه حس كوميدي
ثالثاوالأهم
فتافيت السكر هيه كل الحاجات الحلوه اللي جوانا وفضلت من الطفوله وبنكبر بتدوب وبتختفي ويمكن نقضي عمرنا كله بنحاول ندور عليها
"رأي شخصي"
:)

ثانيا
أنا مش صحفيه ومش دارسه صحافه ولا أدب
أن بكتب لنفسي أولا
وللأخرين ثانيا
مش أنانيه

بالنسبه ليه الكتابه متعه شخصيه

لأني عاوزه أكتب
في الوقت اللي أنا أحبه والكيفيه اللي أشوفها صح من وجهة نظري وطبعا بدون الخروج عن النص "الدين والأخلاقيات"
ثالثا
أن مش راضيه عن نفسي الحمد لله
:)
لكن أملي ربنا يرضى عني:)
أتمنى طبعا اني اكتب أحسن من كده
الله المستعان

طولت عليكم
ممكن شاي بالنعناع:)

رفقة عمر said...

ايه دة
افتتاح مدونه شوب جديدة
من غير دعوة ليا كدة ولا حاجه
وجيت بعد حفله الافتتاح
طيب هااعديها المره دى
شوف بالنسبه لاسم مدونتى انا احترت كتير قوى فى اختياره بس انا فعلا واحده بحب الاحلام جدا وبحب اخرج من احزانى انى احلم احلام تسعدنى لاقيت الاسم جالى على طول
بالنسبه لرفقه عمر اللى بعلق بيه لانى بحب الناس جد وبحب اى علاقه بين اتنين تستمر وتكون رفقه عمر
بالنسبه لجذب القراء دة مش كان هدفى خالص انا كانت عندى افكار عايزة اوصلها غيرى ومش باعرف اكتب الا بموضوع انفعلت له قوى واثر فيا فبكتبه بقلبى وبيطلع زى ما يطلع سواء حلو او وحش
المهم خرجت اللى جوايا
وبجد احيانا باكون مش شايفه انى كاتبه حاجه مهمه قوى او حلوة وبتفاجأ لما حد يقولى انه عجبه كلامى وبجد ممكن اقرا البوست اكتر من عشر مرات واقول ايه لحلو فيه دة فيه ناس بتكتب احسن منى بكتير
بجد انا كمان نفسى اعرف اقبال الناس على بعض مدونات
ومدونات تانيه لا يشعر بها احد
انا هاقولك حاجه بصراحه عن نفسى انا احب المدون المتواضع اللى بيكتب علشان عنده هدف ورساله فعلا وكمان احب ادخل المدونات المجهوله احب اشجع اصحابها
اسفه طولت عليك
بس ياريت تظل هذه المدونه بنفس الاسلوب لانها عجبتنى قوى
وعجبنى العفويه والصدق اللى فيها

الباحث عن الحقيقة said...

بشكر جدا كل اللى شرفونا فى الاستراحة
قريت كل كلامكم بحب واعجاب
فعلا عجبنى تفكيرهم فى اختيار مدوناتكم وان محدش فيكم عامل مدونة علشان الفذلكة والمنظره..كله عايز يعبر عن اللى جواه ويوصل احساسه للناس
علشان كدهوانا زرت مجوناتكم لقيتكم فعلا بتمتازوا بالبساطة واعتقد ده سر النجاح وجذب القراء
اشكركم من كل قلبى
والمشاريب البوست ده كله على حسابى الخاص
وراح اخصمة من مرتب ابن حجر ههههه

ابن حـجـر الـعـسـقـلانـى said...

حلوة حكاية "تخصمه من رصيد بن حجر" .. ما أنا قلت فى الأول .. إحنا نفتحها سبيل .. انت رفضت و قعدت تقول مصاريف التدوين غليت .. و نقلب رزقنا .. إحنا كدة هانقلب نفسنا .. و انت كدة بتشيل نفسك من الموضوع .. و هاتقلبنى أنا

بقول لك ايه .. أنا مش عايز مرتب منك ... أنا هاخد مرتبى بقشيش من الزباين الكرام اللى بييجوا عندنا .. عشان دول شكلهم كدة ناس فلوسهم كتيرة.. و انت عارفنى مادى قوى.. بس المشكلة إن مافيش و لا واحد دفع فلوس لغايو دلوقتى عشان آخد منه بقشيش .. كله معزوم

شكلى كدة هارجع لوظيفتى الأولى ... لسة مكانى موجود ..تانى مكان يمين .. أمام باب مسجد السيدة زينب

اسامة يس said...

لو حذفت اقرا الحادثة اقرا الحادثة اقرا الحادثة..
لكان اكثر تشويقا واثارة ...

جميل البوست...
وتحليلك جيد
دمت بكل ود...

Shaimaa Zaher said...

أنا الحقيقية حاعلق على حاجة خارج التدوينة...أنا بس كنت متابعة ردودك في تدوينة سلوي ، وكنت عايزة أحييك على ردك الأخير، وحتى لو سلوى مسحت التدوينة، حيفضل بالنسبة لي موقفك ده موقف شجاع ويدعو للإعجاب

كل التحية

Anonymous said...

السلام عليكم ورحمة الله وبركاته
انا مش هتكلم الا عن حاجه واحده
حالة ابن حجرالعسقلاني يرثي لها مفيش مرتب ولا بقشيش كده هيرجع شغلته القديمه وطبعا هيهات انه يلاقي مكانه القديم
وعشان كده انا بقول باعلي صوتي لاااااااااااااااااااااااااااا لن يسقط بن حجر العسقلاني من فوق الهاويه
وسادفع اول بقشيش وقدره 17.5 جنيه مصري
ويا ريت اخونا الباحث عن الحقيقه يتعاطف مع الحاله ويزود لابن الحجر المصروف حبتين
تحياتي يا اخوه

الباحث عن الحقيقة said...

بحبكم جدا جدا
وشكرا لكل من علق على هذا الموضوع واهتم بالرد على اسئلتى
اشكركم جدا