Sunday, November 4, 2007

رحلتى ..فى عالم التدوين

اشوف وشكم بخير ان شاء الله وسامحونى لتقصيرى معكم فى الردود
التوقيع / اخوكم احمد الباحث
كان يا ما كان
كان ياما كان ..كان فيه عصفور
مش عصفور المدينة طبعا
معلش اصل بحب اغنية سارة
السلام عليكم يا اهل الاستراحة ..طبعا انتم اصحاب مكان دلوقتى مش ضيوف
سامع حد بيسأل: يعنى كده المشاريب مجانى
اقوله: ان كان حبيبك عسل ما تلحسوش كله ..وقال يعنى انت بتدفع اوى ..خلينا ساكتين وبلاش نتكلم وإلا ..هات النوته يابن حجر
حد فاكر اول مره جيت تعمل مدونة
انا اول مره عملت مدونة معرفتش ادخل ازاى ..كل ما اكتب الباسورد مش بيدخل
رجعت عملت واحده تانية اللى هى الصحيفة الكاشفة وعملت اول موضوع بتاع الافتتاح تانى يوم جيت ادخل برضه معرفتش
اتعقدت جدا ..بالصدفة احد الاخوه اسمه اسلام فى المنتدى اللى كنت بكتب فيه عمل موضوع ازاى تنشئ مدونة ولقيته جاوب على سؤال : احدى الاخوات انها مش عارفة تدخل المدونة كل ما تكتب اليوزر مش بيدخل ..فقالها ان اليوزر بتاع الدخول هو الايميل اللى سجلت بيه .."وانا اللى كنت فاكر المشكلة فى الباسورد" طيب يا عم متشكرين وتمام وتابعت معاه شوية لغاية ما مشى الحال ..ودى مدونتى الاولى القديمة : يا مسافر وحدك فيها موضوع حلو لسه كاتبه علشانكم اللى فاضى ممكن يقراه
طيب دلوقتى انا كتبت موضوع وعايز الناس تعرفنى بقى ..اخدتها كعب داير على المدونات .واتعلمت القراءة السريعة مانا برضه لازم اسيب كلمتين يحسوا انى انا قريت ..لفيت على مدونات كتير ..ان حد يزورنى ولا يطل عليا ..مفيش
هو السبب ان اول موضوع كان عايز دماغ شوية لانه كان بحث فقهى لابن حزم والتانى وراه كان عن رأى الالبانى فى النقاب
قلت يبقى انا لازم اختار الناس اللى اعلق عندهم ..وابحث عن المفكرين اللى دماغهم عاليه
من اول الناس اللى شرفونى فى مدونتى كانت العائشة فى الاحلام وفتاة الجنة ..والاخ بينو الذى اتى من فوره ليدافع عن النقاب متصديا لرأى الشيخ الالبانى
لازلت اشعر بامتنان وتقدير الى هؤلاء الثلاثة الذين اعتبرهم "الاوائل" ..نزل مشاريب هنا ببلاش ..بس خد بالك النهاردة بس
نيجى للاستاذ عصفور ..انا عرفته الحقيقة من خلال تعليقاته عند الاخرين وفهمت انه راجل بيقرأ التدوينات كويس وبيناقش وانه سلفى معتدل ..بس استغربت لانه مازارش مدونتى ..فرحت وجهتله دعوه فى مدونته وانا بقول فى نفسى تلاقيه جه بص وما عجبوش الحال
افتكرت هنا " مسلم" صاحب مدونة .......الذى اخذ يسخر منى ومن اسم مدونتى "ومسمى مدونته الكاشفة وكأنه يملك الحقيقة بمفرده دون غيره" والموضوع ده اكتشفته متأخر بس طبعا ولا كان يهمنى وما غيرش شئ من ناحيتى تجاهه واهلا به فى اى وقت
نرجع لعم عصفور المدينة ..من ساعة ما شرفنى "سامعين بقول شرفنى " بزيارته وقد مرت علاقتى به بمراحل الاول كان عايز يستكشف مين المدون الجديد ده وبعدين اصبحنا فى مرحلة "الصديق اللدود" والحقيقة انا تعلمت كثيرا منه ولم احمل له شئ فى الاول غير "هو الراجل ده مش مرتاحلى ليه" ومع طول العشرة الحمد لله اصبح يعاملنا انا وابن حجر كأننا اخوانه الاصغر وارى انه يحمل لنا كم كبير من الحب والاخوه والاحترام وكل حاجة حلوه ..وحقيقة انا اعتبره استاذى ..وكل شخص عنده معلومه مش عندى هو استاذى مهما اختلفنا فى منهجنا الفكرى ..وبعدين الاستاذ عصفور فاكر اننا واين حجر مش سلفيين ..بالعكس تقدر تعتبرنا سلفيين مجددين او يرفضون التقليد رغم ان السلفية قائمة على التقليد ..تيجى ازاى دى بقى معرفش
نيجى بقى لمرحلة ابن حجر
لقيت الاخت فتاة الجنه ذكرته فى احد التدوينات بشكل لم يرضينى وهى فى ذلك تأثرت برأى "المسلم" فيه من خلال اسئلته الكثيرة التى ألقاها عليه فاخذ هذا الاخ الكريم يسخر منه "هى دى عادته ولا ايه" ولم يجيب على ايا من اسئلته
ملحوظه هامة : والله لا احمل لهذا الاخ إلا كل تقدير واحترام ..وكنت قد ذكرته بالتفصيل ولكنى رجعت وعدلت حتى لا يظن احد انى اقتص منه لسخريته من مدونتى هو وعابر سبيل و"ستى فى الله" ودى احدى الاخوات هى عارفه نفسها وانا عارفها عموما انا اروى الوقائع من وجهة نظرى يعنى فيه احتمال 50% ان الحقيقة قد تكون مختلفة
نعود لابن حجر مكنتش لسه اعرف ايه اسئلته وكان عندى فضول فوجهت له دعوة انه يشرفنى ويكتب لى اسئلته وانا اجاوبه
ما علينا مش عايز اطول عليكم
اصبح ابن حجر شريكى فى المدونة ..وبعد طول معرفة به اقدر اقول انه اخلص انسان عرفته عن طريق النت
فعلا هو صديق مخلص جدا ..عمرنا ما اختلفنا ..عمرنا حتى ما حسينا اننا بنافس بعض ..بل بنكمل بعض
شخصية انا احترمها جدا وعلى فكره هواستحملنى كتير لانى انا شخص متقلب المزاج ..يعنى ممكن يكون بيكلمنى فى الماسنجر واسكت واطنش لانى ببقى فى مود مش عايز اتكلم
وابقى تانى مره عايز اعتذرله ألاقيه هو عادى جدا ..فبخاف اعتذر احسن افكره بتصرفى البايخ
كان فيه مره واحد علق فى الشات بوكس وطلب من محمد ابن حجر انه يعمل مدونة لوحده
انا اتضايقت جدا ..لانى خفت وقتها اخسر صديق ..لانى ما يهمنيش المدونة ..انا يهمنى الصديق اكتر
اقولكم سر حتى ابن حجر ما يعرفوش ..كنت مره بكتب بوست اجابة على سؤال جانى فى الشات بوكس ووسط مانا بكتبه ابن حجر قلى انه عايز ينزل موضوع ..قلتله ده وقت عيد والناس لسه فى اجازة رمضان وهترجع بعد العيد ..فقالى وجايز يكونوا رجعوا وكلهم عايزين يقرأو ومتشوقين للموضوعات ..قلتله ماشى وحذفت اللى كنت بكتبه وقلتله عيش
افاجئ بيه نزل تهنئة بعيد الفطر ..فين يابنى موضوعك ..يقولى اقتنعت بكلامك وهأجله لبعد العيد
فسكت طبعا خاصة ان كان حاطط طبق بسكويت ونواعم وبيتى فور فأتلهيت فى الاكل وسكت
على فكره فيه غياب تنسيق بينى وبينه ..يعنى الموضوعات بتنزل على حسب هوى اى واحد فينا اللى عايز يكتب موضوع بيكتبه ..يعنى مش ماشيين بالدور هو مره وانا مره ..بس الحقيقة هو فيه ميزه .. لما يكون عايز ينزل بوست بيقلى قبلها بوقت بايام مثلا .عكس انا لانى بكتب بدون تحضير فلما تجينى فكره اكتبها مباشرة لاول مره فى المدونة واراجعها بعد ما نزلت
محمد "ابن حجر" بيجهز لموضوعه كويس وبيتعب فيه فعلا لانه بيحب يوثق كلامه ويذكر مصادرة..الواد واخد التدوين جد ولا ايه
وخلال رحلتى فى عالم التدوين ..اكتشفت شئ مهم ..انى امام احسن شباب فى مصر ..بل وفى الوطن العربى
ناس بتفكر كويس ..ناس عندها كلمة عايزه تقولها ..علشان كده بتمنى يحصل تكتلات بين المدونين وكل عشرين يشتركوا فى مدونة واحده تكون هى الصوت الجماعى لهم ..وفى نفس الوقت لكل واحد مدونته الخاصة
افتكرت دلوقتى بعض المدونات ..زى عايزه اتجوزلانى اختلفت مع الاخت برايد وانتقدت ان المدونة كلها عن الجواز..لانى شفت ان عندها موهبة كويسه وجمهور كبير يبقى ليه ما تتكلمش عن موضوعات اجتماعية تانية باسلوبها الساخر الجميل ده
نيجى بقى للاخ ديفيد سانتوس..طبعا كلنا متأكدين ان الراجل ده مش بيقرأ انما بيرد ويكتب جمل اسطامبات ..وفى ذكرى رحيل عبد الناصر كان كاتب كلمتين بيذكرهم فى كل المدونات العربية ملهاش علاقة بالموضوع المطروح.كل ما افتكر لما رحت وضعت تعليق ورد فيه دعوة للتعرف على سيرة النبى محمد ووضعت لينك موقع اسلام واى صفحة سيرة محمد باللغات الاجنبية ..وطبعا ملهوش علاقة بالموضوع اللى كتبه لقيته زعل "على حسب ترجمة عصفور المدينة" ماشى يا سانتوس ..خليك فاكرها
احب اشكر اخوه واخوات كتير العائشة فى الاحلام , فتاة الجنة, بينو, عصفور المدينة,ابن حجر , اخ فى الله, همسة قلم, داعية المستقبل ,كراميلا, ابو مفراح , كرم مسلم ,اميرة اساطير الخريف, المؤرخ محمد إلهامى , سلوى طوق الحرية ,...........يظهر انى غلطت لما ذكرت اسماء لانى نسيت كتير ..اه وبنات افكارى وبنت ابوها ...اموله وال جى ....مين تانى ..اه طبعا استاذى ضياء النجار , عيون مصر ....حد يفكرنى يا جماعة ..سو يا سو ...
هم كتير بصراحة سامحونى والله بحترمكم كلكم
امام الجيل ..طال الليل ..الاخت الكريمة اصرار امل
اه والاخ راجى عين فى الجنة ..وقطة الصحراء ..ومين كماااااان.. الدكتور المحارب
وتحية خاصة لبلدياتى فارس عبد الفتاح ..انا اسعد انسان بمدونتك لانك بلدياتى .."عنصرية معلش" اصل معاه واسطه
اشوفكم بخير ودعواتكم ..راح اغيب عنكم لفترة زمنية يمكن شهر او اقل او اكتر
جانى استدعاء فى الجيش ..اعمل ايه يا جماعة اخوكم راجل مهم

19 comments:

Salwa said...

اسمي مكتوب
طيب الحمد لله

الحقيقه أن الصحيفه الكاشفه
مدونه أحترمها جدا
ويمكن هي كانت أول مدونه أضيفها
في مدونتي

كل التحيه للقائمين عليها

وإن شاء الله تعود من الجيش سالما أخي

خالص تحياتي

ابن حـجـر الـعـسـقـلانـى said...

يابنى انت قلت فيا كلام .. خلانى قاعد مبلول (من العرق طبعا)..يا عم الباحث .. انت "انسان" قوى .. و حساس جدا .. أنا أوقات كتير باشعر بالقلق عليك لحساسيتك الزايدة

الكلام اللى عايز أقوله كتير ... لكن الحاجة الكبيرة المهمة .. هى أنى أحمد الله أنه رزقنى بمعرفتك


يا زوار الاستراحة
أنا أحمد الله على أنى أشارككم كلكم التدوين.. هذا النشاط الانسانى المبتكر

أشكرك يا عم الباحث أن أعطيت لى هذه الفرصة .. فبدون دعوتك للمشاركة فى مدونتك .. لما أخذت قرارا بالتدوين يوما ما (أنا سامع ناس بتقول: يا ريته ما دعاك)ا

و ترجع لنا بالسلامة من "الجبهة" .. و عايزين حاجة كدة تذكار .. صباع جندى اسرائيلى مثلا .. أو جزء من سلاحه .. أو عجلة عربة مدرعة .. أو جنزير دبابة .. أو بطارية صواريخ .. أو طقم رادارات .. يعنى حاجة كدة تكون بسيطة زى سرب طيارات سوخوى مثلا


و مستنيين حكايات "الباحث".. المراسل الحربى للكاشفة على الجبهة

و ما تخافش .. انت سايب وراك "حجر" فى القهوة ..أقصد حجر يعنى "صلابة" طبعا .. مش حجر اللى هو بيستخدم فى "الشيشة"ا

ملاحظة: ماعرفش ليه أستاذ عصفور المدينة من ساعة ما فكرنى بالمثل بتاع "هانصطاد عصفورين بحجر واحد" و هو رجله خفت من عندنا .. يا ترى حد عارف ليه ؟؟

ammola said...

انت عارف انى باقعد استنى انكم تكتبوا حاجة ولما بازهق باقول خلاص والله حاستنى كمان
طريقتكم مع بعض والشد والجذب بينكم مميزة جدا ده غير طبعا لما كل واحد بيكتب على افتراس
كان نفسى اديلك شوية منين وقراقيش بالعجوة وانت رايح الجهادية
الا جوللى انتو ليه مادفعتوش البدلية؟

الباحث عن الحقيقة said...

اهلا بالاخت سلوى
ايوه يا ستى اسمك مكتوب
ومكتوب كمان فى النوته ..يعنى ادفعى اللى عليكى بدل ما اخليكى تغسلى كوبايات وتمسحى طربيذات
............
وياريت تنزلى طلبات لغاية ما ابن حجر ينشف من البلل
لغاية ماعرف بالظبط الواد ده مبلول من ايه
انا شاكك فى موضوع العرق ده

الباحث عن الحقيقة said...

يا قهلا يا قهلا بالاخت "قمولة" ده بالفصحى وبالصعيدى "جمولة" نورتينا ..وانا اقول ريحة الجاز دى منين اتارى اللمبه الفلاحى شرفتنا
يادى النور يادى النور
ادبح كتكوت يابن حجر للاخت "جموله"حاجه كده يا دوب تليق بالمقام
ومعلش يا ستى خلى المنين والقراقيش وهاتى حقهم وانا اشترى هامبوربر وهونتاكونتاكى
وبخصوص البدليه ..قلت لابويا بيع الجاموسة يابا وندفع البدلية
قلى امشى يا عاطل يابن الحكومة الجاموسة دلوقتى احسن من مية شاب متعلم
وراح زاعطنى بره البيت

ابن حـجـر الـعـسـقـلانـى said...

فيه ايه يا جماعة ... خلاص .. قلنا عرق .. الواحد لما بيبقى محرج .. بيعرق ... لكن لما بيخاف ... ممكن نشك فيه .. و أنا ما خفتش .. انا كنت محرج

و الله اروح اجيب جردل مية غسيل الكوبايات من جوة و اغرقكم كلكم عشان ماحدش يبقى أحسن من حد

ثم انت يا عم الباحث عايز تاخد حقك ناشف من أمولة و تروح تشترى بيه "هيروشيما و ناجازاكى" .. يا راجل عييب.. دول حتى بيقولوا إن "هيروشيما و ناجازاكى" اليومين دول ما بتبقاش متخزنة كويس و ممكن تبوظ فى المحلات ..بقولك ايه .. لما تجيبهم .. ابقى ادينى حتة عشان عايز ادوقها

L.G. said...

الحمد لله اسم في كشف الناجحين أحمدك يارب
المهم طلع اتنين ابن حجر غير الباحث كنت لسه حسأل هما اتنين ولا واحد كنت فاكراكم شخص واحد بجد المهم هو الجيش مفيهوش لاب توب متسرب يعني وشغال على الستالايت ؟ سؤال برئ
هي المدونة دي مواضيعها قليلة بس الزبد بصراحة ياريت تزودوا شوية
سلوى كمان معايا في الكشف الحمد لله المرة الجاية بالدرجات بس مستخبية عشان الاحراج .. دمتم وياريت مواضيع جديدة والموجود يسد ابن حجر أو الباحث

عصفور المدينة said...

السلام عليكم
كل رحلة وانت طيب يا بوحميد

هو ده له علاقة بالاحتفالية اللي انا كنت عاملها بمناسبة سنة تدوينية
على كل مرحبا بك في عالم التدوين
بس كان فيه فقرات في التدوينة مش لها لازمة وأنا أكدت لك كذا مرة قبل كدة إنك مش فهمت تعليق الأخت فتاة الجنة كويس وأحلتك لقراءته مرات بس انت مصمم على الانطباع الأول وبعدين مين قالك إني ما كنتش متابع المدونة من أول مرة انشئت
بس فعلا أنا لا أعلق عند المخالفين حلوالمخالفين دي
إلا إذا رأيت نافذة للنقاش وفيه مدونات أقرؤها لا تجد لي فيها تعليقا واحدا

حقيقة يا أحمد ينقص هذا المقال سؤال لم تجب عليه حتى الآن رغم أنك طرحته سابقا هنا وهو لماذا أنشأت مدونة ولماذا اخترت محمد للانضمام إليك رغم أنه كان أمامه منذ زمن أن ينشيء مدونة

كثير من المدونين طرحوا فكرة أنك وابن حجر شخص واحد لازم ترد على السؤال ده

أيضا أسأل سؤال سألته مرارارارارارا لماذا تركزون على السلفيين وانتقادهم ولماذا تدور المواضيع بشكل أو آخر وتلف وتدور وترجع للسلفيين وانا سألت السؤال ده كثير رغم إني مستمر معكما في الحوار والود لكن يؤسفني دائما أن تدور المواضيع في هذا الفلك إذا كانت أبحاثا فقهية فلك أن تذكر رأي المخالفين بدون تحديد أشخاص وإذا كان سمة فكرية يمكنكم صياغتها بتأصيلها حقيقة طرحت أسئلة من قبيل هل تريدون أتباع مشايخ السلفيين أن يقلعوا عن الاستماع لهم والاستماع لكم وقلت أن هذا لن يحدث
هل تريدون أن يمتنع من يفكر في الالتزام أن يسلك هذا الطريق أو يسمع هؤلاء المشايخ

هل هل إلى آخر الافتراضات نفسي أعرف قبل ما اموت يا احمد

ياريت نرجع لميثاق الشرف اللي احنا اتفقنا عليه دايما

ينبغي أن نقيس كل هذه العلوم والأقوال والمناظرات بمقياس القرب من الله والطاعة وإصلاح دين الناس وألا تفقد هذه الوصلة بين العلم والعمل أبدا وإلا لو نظرنا وأصّلنا لمصالح العباد والفتاوى والأحكام و كانت القلوب خاوية فيا قلة الحيلة


أنا ابتديت أزهق من كثرة المواضيع التي تفتح وباحس إني باتخنق في دوامة مقفلة :
السلفيين لاغيين عقلهم
السلفيين قافلين باب الاجتهاد
السلفيين مكشرين
السلفيين بيزعقوا
السلفيين أعداء الديموقراطية
السلفيين أعداء القومية
العقل مصدر التشريع والأصول والفروع
دان براون ابن حلال


وبخصوص رأي الألباني في النقاب أنا أعتقد بقوله والذي هو أن النقاب ليس واجب ولكنه سنة

لكن هل النقاب حرام

آخر تدوينة اللي موجودة في الكاشفة أنا متردد إني أعلق عليها ومأخر الرد حتى أستخير

رفقة عمر said...

انا اللى اشكر حضرتك
لانك اللى سبقت بالخير
ومدونتك مدونه قيمه
وتناقش امور فقهيه
مهمه مع انى احيانا باتلخبط وبكون مش عارفه تقصد ايه
يارب تروح وترجع بالسلامه ان شاء الله ويارب يكون اقل من شهر
نشوفك على خير ان شاء الله

احساس لسه حى said...

عزيزى
المدونه طريق ممكن يفتحلك حاجات كتير جواك وجوه غيرك المهم تحاول تحدد انتا عاوز ايه منها ومن الاخرين كمان
وكمان بعد اذنك ادعوك لمدونتى علشان فى خلاف بينى وبين ايمى وقولت اجيب اللى بيعلقوا عندها يشهدوا بينا ممكن
تحياتى
سلام

الباحث عن الحقيقة said...

الاخت ال جى اهلا وسهلا
الاستاذ عصفور المدينة اطال الله بقائك
احساس لسه حى شرفتنا بزيارتك
ويا استاذى الفاضل عصفور المدينة
احنا مش ضد السلفيين ولكن يوجد بهم النوذج البارز فى التفكير الذى نختلف معه
وانت يابن حجر خف شوية عن السلفيين
اخترت محمد لانى كنت متوقع ان اترك التدوين فى نهاية سبتمبر الماضى لكن الموضوع اتأجل
وكمان علشان محمد عند فكر عايز يعبر عنه لو حضرتك قريت اول موضوع فى الكاشفة انا قلت انى ارحب باى قلم يحب يكتب فيها ويشاركنى
وكمان ابن حجر كان ارسل لى تعليق على الايميل انا نشرته بالكامل مع تعليقى عليه
يعنى انا معنديش حساسية فى مين يشارك ويكتب فى المدونة
وانا اخترت محمد برضه لانه انسان مهذب جدا ومحترم جدا وحضرتك لو حكمت على شخصيته بعيدا عن افكاره هتتفق معايا
اما ليه انشأت مدونه؟
فانا انشأتها من اجل وجهة النظر الاخرى
كتبت موضوع عن رأى ابن حزم فى الغناء فى منتدى بصيت لقيت الموضوع اختفى
اتضايقت لان الامانه العلمية اننا نشوف ونقرا ونسمع كل الادلة علشان نختار رأى منهم على بينه
فانشأت هذه المدونة لعرض الرأى الاخر
واقول لأ يا جماعة مفيش رأى هو الرأى الاوحد اللى الجميع اجمع عليه
كما انى اردت الحديث عن الفساد والتعذيب وحقوق الناس بس لقيت ان فيه مدونات كتير احسن منى فى المجال ده فتركته لاصحابه
اشوف وشك بخير ودعواتك يا استاذ عصفور
وخد بالك من ابن حجر وياريت تشاركوترد احنا اتعدنا انكموجود وثانيا انت بتقدم ادلتك ومصادر كلامك وده بيساعد فى اكتشاف الحقائق وتوضيحها حتى لو فضلنا مختلفين فالقارئ "انكان فيه حد بيقرا " هو اللى راح يستفيد من هذا العرض الطيب
السلام عليكم جميعا وسامحونى على التقصير

الباحث عن الحقيقة said...

معلش نسيت رفقة عمر
اهلا وسهلا بحضرتك
وانا طبعا لمانساكى لانك اول واحده ان شكرتها فى مدونتى وانا فعلا اشكرك لانك كنت من اول من رحب بى فى عالم التدوين
دعواتك

اللهو الخفى said...

معلش علقت و انت مسافر في استدعاء الجيش كنت اتمنى اقابل مدونتك قديما ربما كان اسمي مذكور و بجد حزين اني فوت كتير من بحر علمك انت و محمد صديقك عجبني اسلوبك يا استاذ و اعتقد اني ربما اتعلمك منك الكثير خصوصا بعد عودتك الحميده من الجيش ان شاء الله
وفقك الله لما تحبه و ترضى

البنت الشلبية said...

تروح وتيجى بالسلامة ان شاء الله
وربنا يبارك فى صداقتك انت وابن حجر
ولو لقيت اى فرصة تفتح البلوج متتاخرش علينا
وربنا يوفقك

عاشقه الفردوس said...

ماشاء الله اخى
بجد عجبتنى مدونتك
وعجبنى اكتر الجمله دى

علشان كده بتمنى يحصل تكتلات بين المدونين وكل عشرين يشتركوا فى مدونة واحده تكون هى الصوت الجماعى لهم ..وفى نفس الوقت لكل واحد مدونته الخاصة

فعلا فكره حلوة واتمنى تنفيذها وتعميمها
واعتقد ان المدونات الان اصبحت لها قوه ورأى وحتى وان كان قليلا

جزاك الله الجنه اخى
وبالتوفيق ان شاء الله

همسة قلم said...

في امان الله تذهب وتعود اخونا الفاضل

يسر الله لكم امركم واعادكم بسلامته وحفظكم في حلكم وترحالكم

والحقيقة كنت سعيدة لاكتشافي مدونتكم الصحيفة الكاشفة ولازلت اتابعها باستمرار لما تحويه من درر الكلام
جعله في ميزان حسناتكم

يوميات عيل مصري said...

أكتر حاجة لفتت نظري في التدوينة هي كلامك عن عصفور المدينة، الظاهر إن مش انت بس اللي بتحب الراجل ده .. ده شخص رائع، وأنت مؤدب جدا .. شرفنا للتعليق على التدوينة الجديدة

ابن حـجـر الـعـسـقـلانـى said...

البنت الشلبية

ربنا يبارك فيكى .. و ربنا يرجع أخانا الباحث بالسلامة إن شاء الله
-----------------

عاشقة الفردوس

يقول الله تعالى:"و تعاونوا على البر و التقوى و لا تعاونوا على الإثم و العدوان" .. بالفعل كما ذكرتى و كما ذكر أخى الباحث.. فكرة التجمع للتدوين قد تكون فكرة جيدة و لكنها تحتاج إلى تنظيم و تعاون من جميع الأفراد
-----------------

همسة قلم

شكرا جدا على إطرائك على مدونة الصحيفة الكاشفة .. بل نحن الذين نزداد شرفا بزيارتك لنا

اللهم أرجع أخانا الباحث قريبا يا رب
-----------------

يوميات عيل مصرى

بالفعل ..إن الأستاذ عصفور المدينة ..نحن نشعر معه بأنه "سند" .. أى تستطيع أن تتكلم معه بحرية و أنت مدرك أنه معطاء و لن يبخل عليك بنصيحة

نورت المدونة... مدونتك رائعة

د. ضياء النجار said...

العزيز الباحث عن الحقيقة،

بالتوفيق دائما وعقبال ما تكمل مائة عام من التدوين الباحث عن الحقيقة.

عميق تحياتي

ضياء