Saturday, November 24, 2007

الحمار ... و القطار




و الله يا جدعان حكومتنا دى ظريفة جدا .. و عليها شوية ابتكارات يا جماعة إنما إيه .. حاجة عالية مووووووز.. و موزة من ضمن الموز بتاع الحكومة دة هو حملة إعلامية بعنوان "اوعى تكون حمار.. و الحق اركب القطار".. فى مرة باتفرج على التليفزيون فى أمان الله .. ألاقيلك خير اللهم اجعله خير إعلان كدة غريب الأطوار فيه واحد قاعد عاطل مش لاقى شغل .. و جايبين قطر بيتحرك من المحطة و صاحبنا العاطل ما لحقش القطر و علامات البؤس على وشه .. و جايبين واحد تانى راح اتعلم له صنعه .. و بقى فى منتهى السعادة و كل أبواب الخير اتفتحت فى وش عيلته الكريمة.. و مش محتاجة عقلية أينيشتاينية (نسبة إلى الباشمهندس أينيشتاين يعنى) عشان تفهم إن الحملة دى تهدف إلى إن الشاب اللى قعد أربع سنين (على الأقل) فى دراسته الجامعية مطلوب منه إنه يضرب طبنجة على كل اللى تعلمه فى هذه السنوات العجاف (
بحلوها و مرها .. بنجاحها و فشلها) و يروح يتعلم صنعة أو حرفة يدوية عشان يشتغل و يبقى راجل و لا مؤاخذة كسيب و دة لأن البلد مافيهاش شغل .. فنلاقى بقدرة قادر كدة إن مشكلة البطالة تحولت من مشكلة "إهمال" من الحكومة إلى مشكلة "دلع" من الشباب

من كام سنة كدة برضه الحكومة عملت حملة ضخمة لتوظيف الشباب (و نقدر نقول توظيف الأموال برضه) بشكل يعتمد على مؤهلات كل شاب .. فعملت وثيقة تشتريها من مكاتب البريد و تملا البيانات اللى فيها و اللى من خلالها المفروض إن الحكومة هاتقيمك و تصنفك و تبعتلك جواب بالوظيفة التى تتلاءم تماما مع امكانيات جناب سعادة فخامة حضرتك.. لو إن الوثيقة دى كانت بخمسة جنيه مثلا .. و حوالى5 مليون شاب اشتروا هذه الوثيقة .. يعنى الحكومة ضربت ما يقرب من خمسة و عشرين مليون لحلوح فى ضربة واحدة .. فما هو المقابل الذى قدمته الحكومة فى مقابل هذه الملايين من اللحاليح ؟؟؟؟

واحد صاحبى اشترى الوثيقة دى .. و مؤهلاته كانت إنه معاه معهد سنتين سياحة و فنادق .. و خبرة أربع سنين فى مجال السياحة و الفنادق .. إلى جانب إنه فى فترة شغله فى الفنادق انتسب لإحدى الجامعات المصرية بكلية الآداب قسم الفلسفة و تخرج فيها بتقدير جيد .. و أخذ تمهيدى الماجستير .. و كان وقتها فى منتصف إعداده لرسالة الماجستير..إلى جانب خبرة إدارية لعدة سنوات مدعومة بشهادات خبرة... صاحبى كتب كل دة فى الوثيقة و انتظر إنهم يبعتوا له الجواب اللى فيه الخبر اليقين.. يوم .. يومين .. أسبوع .. اتنين ... و بعد يأس الجواب جاله .. و بلهفة يفتح الجواب.. و متوقع لو ما عينوهوش بليسانس آداب الفلسفة اللى معاه (و بلاش موضوع الماجستير اللى لسة بيكمله) .. هايعينوه بخبرته فى مجال الفندقة.. لقى الهيئة المنظمة لحملة التوظيف العبقرية هذه إن بعد دراسة حالة صاحبى و إمكانياته وجدت إن أنسب وظيفة تلائم مؤهلاته هى وظيفة


:


:


:


:


:


:


:


سباك فى إحدى المصالح الحكومية


سؤال ليكم بقى يا جماعة ... لو كل واحد فيكم اختار مهنة عشان يشتغلها ... يحب يشتغل إيه ؟؟

و كل قطار و انتم طيبين

70 comments:

دكتور حر said...

ما أكثر الحمير في بلادنا
ليس لأنهم كما قالت الحكومه

بل لأنهم ما زالوا يصدقونها ويثقون فيها ويهثون ورائها
*********
قالوا قديما إن لم تعمل ما تحب فأحب ما تعمل
*********
ربنا يستر وما يلغوش التكليف من علينا مع انه زي قلته والله

بس برضه 80% من طلاب طب دخلوا طب لأنهم جابوا مجموع كبير
و98% من طلاب علوم اللي ملحقوش طب او هندسه او صيدله
فقالوا علوم أحسن من الباقي

هو ده النظام في التعليم
فازاي هيكون في الشغل
وازاي هيكون شكل البلد اساسا

ربنا يتولانا
أشكركم على البوست الجميل

فارس عبدالفتاح said...

بصراحة انا ما بجيش الاستراحة

عشان مفهاش معسل وانا راجل كييف معسل ..

فشفولكم حل فى الموضوع ده

المهم خلينا نقول

اذا وافق صديقك على منهة سباك فهل اذا ذهب اليهم سوف يجد هذه المهنة


انا اشك فى ذلك

Desert cat said...

تصدق انى كنت من ضمن المغفلين اللى راوا اشتروا الاستمارة دى بخمسة جنيه والحسابه بتحسب
اه والله
ومليتها وكتبت فيها مؤهلى النادر جدا
بس برضه محدش عبرنى
يعنى صاحب جاله جواب يشتغل سباك انا حتى ولا قالوا لى تعالى اشتغلى فرشه فى دار حضانه
فين الشاى المظبوط ياباشا
وقول لصاحبك مش يسمع كلامهم تانى

ابن حـجـر الـعـسـقـلانـى said...

دكتور الأحرار
انت من الأحرار يا دكتور

آه والله .. ربنا يتولانا برحمته
والله الواحد ماعندوش مانع إنه يحب ما يعمل لو ماقدرش يعمل ما يحب .. لكن تشتغل سباك و انت تقريبا أستاذ فى جامعة .. واسعة دى شوية

بس يا راجل ماشى على طول ليه ؟؟ ماشربتش حاجة يعنى

ابن حـجـر الـعـسـقـلانـى said...

الصديق فارس القومى العربى

فيييينك يا راجل ؟؟ شكلك كدة كنت مشغول .. كان الله فى عونك

معلش .. ماعندناش معسل .. فيه تفاح ..ينفع ؟؟

تفاح عصير .. مش حاجة تانية .. إوعى بالك يروح بعيد

تقريبا زى ماانت قلت.. لو كان راح ماكانش هايلاقى الوظيفة

و ربنا يتولانا برحمته زى ما قال دكتور حر

ابن حـجـر الـعـسـقـلانـى said...

الهريرة الصحراوية

يا ستى أنا نزلت الشاى ليبتون خرز سكر برة .. و معاه نسكافيه من أبو رغاوى .. لكن انتم اتأخرتوا

على العموم .. ننزل شاى تانى "إيرل جراى" لو عايزة

و الخمسة جنيه اللى دفعتيها فى الورقة كنا ممكن ننزلك بيها طلبات لمدة عشر سنين قدام.. لكن هى دى الحكومة .. تعرف تجيب الفلوس ازاى مننا .. و بإرادتنا

و معلش يا أختاه .. هى دى الحياه.. ضحكتين و آه .. ضحكتينك عيشهم .. دمعتينك حوشهم (ألحان عمر خيرت .. غناء بن حجر العسقلانى) ....... الشاى هايبرد

عصفور المدينة said...

محمد اجري بسرعة هات لي قهوة سكر برة
عارف مش ينفع بس اعمل اللي بقولك عليه

قابلت واحد من الشباب دول وظفوه في موقف سيارات
وبعدين انا مش عارف انت حاطط صورة وبعدين بتقول غريب الأطوار مش عارف بتشاور ليه

ابن حـجـر الـعـسـقـلانـى said...

أقسم بالله يا أستاذ عصفور إن موضوع القهوة سكر برة دة حصل من كام شهر كدة مع صاحبى التمنياوى طه ..و هو تلاقيه بيقرا اللى احنا كاتبينه دلوقتى و بيضحك.. كنا قاعدين على قهوة "المنظر الجميل" فى باب اللوق .. و أنا طلبت شاى سكر برة .. و هو طلب قهوة زيادة ... القهوجى نزل الشاى بتاعى من غير سكر و نزل القهوة بتاعة التمنياوى طه سادة .. و بعد كدة حط السكرية

أنا مش عارف توارد الخواطر و الأفكار زاد بينا بقاله كام يوم .. ربنا يزيدنا تواصل يا رب

بس بصراحة .. أنا كل ما ادخل المدونة و أشوف صورة الحمار .. أفضل أضحك .. صورة الحمار مش معقولة .. معبرة جدا .. أنا ماعرفش أنا جبتها ازاى

و الله تعليقك ضحكنى كتير يا أستاذ عصفور .. أضحك الله سنك فى الدنيا و الآخرة

عصفور المدينة said...

ههههههههه
بس برضه ماتشاورش
:)

ابن حـجـر الـعـسـقـلانـى said...

يا أستاذ عصفور .. حضرتك على عينا و على راسنا من فوق

و أحلى قهوة ليك أهى ... لكن مش السكر هو اللى برة .......... البن هو اللى برة

يوميات عيل مصري said...

اقولك على حاجة من غير ما تشاور، اصلي كالعادة سهران في الشغل، أصل أخوك في حكاية الشغل دي حصاوي أوي
يعني المفروض شغلي يخلص الساعة 3 أوم أنا أروح أنام،
طيب ايه رأيك بعد ما نخلص البوست ده وأفوق شوية نقعد انا وانت وعمنا عصفور وأي حد ينور، ونعمل دورة لكل الناس في الاحتراف
على فكرة مش عاوز اعمل اعلان، بس أنا لي كتاب في موضوع الاحتراف للشباب، يخليهم يستغنوا عن الاستمارة ام خمسة جنيه
اسمه انت السبب، صادر عن سندباد
والله ليس لي في الموضوع ناقة ولا جمل
ولا أأخذ أي مليم من هذه الكتب، فقط إذا أراد أحد من الشباب يجيبها
أخي بلا حرج ممكن تشيل التعليق ده لو هو إعلان
هو ايه سر العلاقة بين الحمار اللي عندك والبرسيم اللي عندي النهاردة
تاني حاجة
برضه ايه سر العلاقة بين حبك لفيلم أغنية على الممر وحبي ليه، ويمكن تطبع بتحب مححمود مرسي كمان
آخر حاجة طبعا أغنية رايحين في ايدنا سلاح كانت قبل اكتوبر ومن مبشرات النصر وأول ما اتعرضت اتعرضت في فيلم العصفور اللي اتعمل قبل اكتوبر واتعرض بعد اكتوبر
وكان فيه اغنية مصر يا مة يا بهية للشيخ امام
تحياتي لثقافتك الجميلة

Desert cat said...

انا جيت علشان اشرب الشاى يا محمد بس لاقياه من غير اى حاجه جنبه
حجرين شيشة تفاح والحاسب من الاستمارة ام خمسة جنيه

عاشقه الفردوس said...

حسبنا الله ونعم الوكيل

كلامك على اد ماهو طلع عفوى منك على اد ماوجع اوى
هو ده اللى احنا عايشينه

وبعدين اللى ينرفزك انهم بيقولو للشباب ان انتو الغلط وان انتو لازم تشتغلو شغله تانيه
ياسلام طب اشمعنى وكمان اشمعنى

اشمعنى ابن فلان الفلانى وابن فلان العلانى
طب اشمعنى دول ماااشتغلوش شغله تانيه

ولا بتيجى علينا بس وبيبقى ناس الليطه وناس متكبره

وياسلام بقى على الاعلانات الحمضانه اللى يبينلك ان الشاب معندهوش دم وبيخلى ابوه يصرف عليه كل ده علشان الشاب دكتور او مهندس مثلا ومش راضى يشتغل جزمجى


اه صح احنا اللى غلطانين
بس مش علشان مش بنريحهم

بس علشان احنا اللى جايبينو لنفسنا


ربنا يتولانا ويرحمنا برحمته

ahmed said...

اول مرة اعللق فى مدونتك ولازم اعلق لان الاعلان دة بالذات لمما شوفته فضلت اضحك اوووووى بجد والله ضحكت كتير اوى الحكومة مش بقى يهمها اى حاجة عرفت خلاص ان شعبها متعلميين وغير متعلمين مش هيعمللها حاجة وقولت زى منت قولت بالظبط واحد اتعلم وكفر وثانوية عامية والتمثيل اللى بيحصل فى البيوت وبعد دة كله مش مهم تشغل بشهادتك روح اتعلملك صنعة هو عيب؟علشان تكون راجل وبدل متقعد على القهوة زى ال......... يكون ليك دور ................اى البجاحة اللى تعدت حدودها دى بجد الناس دى خلاص بقو يقولو اللى همما عاوزينه ويعملو اللى همما عاوزينه الله ياخدهم طيب انا لسة فى تانية كلية من غير ضحك تجارة مش قولت من غير ضحك اعمل اى؟لمما اشوف ان مستقبلى اللى حكومتى الحبيبة اللى انا بحبها ومختارها تكون حكومتى بترسملى مستقبلى وتقولى ابشر هتكون صنايعى يا خرااااااااابى طيب واحد زيى اى اللى يخليه يكمل طيب مانا اخرج من دلوقتى واتعلم صنعة دانا غبى اوى ممكن الحكومة تقولى كدة بكرة تقولى مخرجتش لى من التعليم واتعلمت صنعة جاى دلوقتى وتقول عاوز اتعلم صنعة وانت كبير واهبل كدة ههههههههههههههههههههههههههههههههههههههههههههههههههههههههههههه كفاية بقى

حبة حاجات (ايمان) said...

هههههههههههه

الظاهر ان الحمير بقت هى العامل الرئيسي فى حياتنا وشوارعنا حتى فى مواصلاتنا

بوست حلو تحياتى

ابن حـجـر الـعـسـقـلانـى said...

أستاذ أحمد .. أو يوميات عيل مصرى

أعتذر بشدة عن تأخرى فى الرد .. و لكن جهازى فى البيت حصلت له مشكلة و مش عارف أدخل النت .. و أنا دلوقتى باتكلم من الشغل

يا سلام يا أستاذ أحمد .. لو موضوع الدورة دة بجد .. هابقى أول واحد مشارك .. بس يا ترى هاتبقى مجانية و لا بخمسة جنيه برضه ؟؟ .. بجد والله .. الفكرة أعتقد هاتلاقى رواج عند ناس كتير .. و أنا أولهم طبعا .. بأمارة الحلم .. الحلم اللى أنا حلمته النهاردة

أنا بعد ما قرأت تعليقك .. و ما كنتش عارف أعلق لضيق الوقت .. كنت متضايق و منفعل .. و روحت البيت و نمت زى باقى البشر .. حلمت إنى بادخل على مدونة جديدة .. بتاعتك و بيشاركك فيها عصفور المدينة .. و كنت أنا أول واحد يدخلها و كنت لسة رايح أعلق أول تعليق (و طبعا كان هايبقى أول تعليق فى المدونة كلها.. مش فى الموضوع المكتوب بس) كنت لسة هاعلق .. لقيت حد صحانى من النوم ... بصراحة قمت و أنا متغاظ .. يعنى أمنية أول تعليق دى مش هاتحصل حتى و لا فى الأحلام ؟؟ معلش

و الله دى تفاصيل الحلم بالضبط

و معقولة أشيل التعليق برضه !! دة أنا هابروز التعليق و أعلقه فى ميدان التحرير .. يا نااااااااس .. دة تعليق "يوميات عيل مصرى" و كمان بيقول إن عنده كتب موجودة فى شركة سندبااااااااد

إعلان ببلاش أهو

و كتب حضرتك .. إن شاء الله هاجيبهم .. أنا اشتريت قبل كدة من شركة سندباد دى كتب كتير .. و أحسن حاجة إنهم بيوصلوا الحاجات لغاية البيت

و فيلم أغنية على الممر من أجمل الأفلام العربية اللى شوفتها .. و هاموت على الأغنية بتاعته .. مش لاقيها و لا لاقيه

أبكى .. أنزف .. أموت .. و تعيشى يا ضحكة مصر

و محمود مرسى لما كان رايح الجيش ... كان بيقتلع نفسه من الأرض .. الفنان دة رائع .. بحبه جدا

تعليقك سرنى جدا يا أستاذ أحمد

و معلش الحمار اللى فى الصورة أكل البرسيم اللى انت جبته

ابن حـجـر الـعـسـقـلانـى said...

هريرة الصحراء

يا مراحب .. هو احنا عندنا تفاح أيوة .. لكن مش حجارة ... دة عصير

و الله انا اتحايلت على الباحث عن الحقيقة إنه ينزل شيشة للزباين .. بس هو رفض .. نعمل إيه .. حكم القوى

و مافيش مشاكل .. مع إننا ما أخدناش منك لا الاستمارة و لا الخمسة جنيه .. لكن يالا .. كله على صاحب المحل

ابن حـجـر الـعـسـقـلانـى said...

عاشقة الفردوس

بجد والله ... ربنا يتولانا برحمته

المشكلة إن الحكومة فاهمة إنها بتتعامل مع ناس ماعندهاش عقل .. يعنى المفروض إنى أول ما أشوف الإعلان دة ضميرى هايأنبنى و أقوم أفز أجرى على أول ميكانيكى و أبوس جزمته و أقوله إن استاهل الشنق إنى غلطت و دخلت الكلية .. و آدينى باتراجع عن أفكارى و معتقداتى و جاى أقدم فروض الولاء و الطاعة لجزمة سيادتك و أخد سلم الميكانيكية من أوله

بجد ربنا يتولانا برحمته

ابن حـجـر الـعـسـقـلانـى said...

أحمد باشا

و الله ضحكتنى كتير .. و أهلا بيك فى أول مرة ليك عندنا .. كدة ليك عندنا مشروب مجانى

يا عم فيها إيه بس لما تشتغل صنايعى كدة و انت معاك شهادة جامعية .. دى حتى موضة يا راجل .. و بتحصل فى أحسن العائلات


بص .. هو أنا مش معترض إن واحد جامعى يشتغل صنايعى ..لكن اللى يغيظ بصراحة هو إن دى تبقى خطة الدولة .. هى دى الكارثة

و مافيش غير إننا نضحك شوية

سلام يا ريس

ابن حـجـر الـعـسـقـلانـى said...

إيمان اللى عندها حبة حاجات

عجبتنى بجد نظرتك للحياة دى ... بجد الحمير بقت عامل مشترك فى حاجات كتير من حياتنا .. طب والله نظرتك دى تنفع تدوينة .. و عنوانها مثلا "الحميرية فى حياتنا" .. أو لو اختارنا عنوان فيه سجع يبقى "تقديم النظرة النقدية .. لتفاصيل حياتنا الحميرية" .. طب والله موضوع حلو .. إيه رأيك تكتبى عنه ؟؟

أنا باقترح فقط طبعا .. و انت براحتك تكتبيه أو لأ

و شكرا لك على الزيارة

Ahmed Al-Sabbagh said...

بصراحة هو كلامك صح بس مش بنسبة ميه فى المية

ده لانى لاحظت فعلا ان الشباب عندهم نسبة دلع

واظن لو اجتهدنا فى تنمية مهارتنا ... كمبيوتر .. ولغة .. وعمليا .. اثناء وبعد الدراسة

بالاضافة للبحث المنظم عن عمل وعمل علاقات كويسة وعدم التكبر على اى شغل خاصة فى مرحلة ما بعد الدراسة على طول

اظن نسبة البطالة ممكن تقل بنسبة عشرين فى الميه

يعنى انت كلامك صح تمانين فى المية وكلام الحملة صح بنسبة عشرين فى المية

بس اسلوبك جميل اوى

وياريت تقبلنى صديق لمدونتك الجميلة

تحياتى

osama said...

كنت ببتسم فشر البلية ما يضحك لكن بصدق في نهاية الموضوع حزنت حزن من نوع مختلف ليس حزن الثائر او حزن المكتئب .. بل حزن انساني مطلق مبرء من كل لون .. حزنت على ذاك الشاب وكأنه اصبح كل الشباب ...

ولنا الله

خالص تحياتي

الفاتح الجعفري said...

انا هقول بيت شعر سمعته من الشيخ كشك
يابلادنا ياعجيبه :::فيكي حاجه محيراني
نزرع القمح في سنين:::يطلع القرع في ثواني
ربنا يكرمك يااستاذنا

عمر محمود said...

والله ظلموا الحمار
على الأقل الحمار عنده وظيفة ثابته
وتأميناته موجودة
ويمكن يكون عالدرجة التانية كمان
يا ترى 6مليون عاطل يقدروا يفصلوا الحمار ويحلوا محله؟؟؟؟
مستحيييييييييييييييل
يا اخوانا الحمار له واسطة
ما تحاولوش
سلامى للجميع

NIDAAL PAL said...

تك تك تك
ده مش تك تك الى احنا عارفينه
ده انا بسقف علشان حد يعبرنى فى الاستراحة دى و يجبلى كوباية شاى
اولاً : ياريت تقبلنى ضيف فى استراحتك
الكول دى و تنزلى واحد شاى ظبط علشان نعرف نظبط الكلام
ثانياً : انا كان نفسى من زمان ان حد يكتب او يعلق على الاعلان ده
الاعلان فى حد ذاته مش مشكلة لانه بيحفز الشباب الى حد ما
لكن اسلوب التناول و قوم اشتغل و ابوك بيصرف عليك و..و...و..و...
طبعاً بيحسس الشباب انهم غلطانين و انهم هما الى مقصريين و مش عايزيين يتعبوا
فيه كتير من النوعية دى و كنت واحد منهم بس الحمد لله ربنا تاب عليا
بس صدقنى لو لقوا الحافز و الوظيفة المناسبة لازم هيحاولوا يجتهدوا علشان يوصلوا
و عايز اسألك سؤال واحد و للجميع
ممكن حد يقولى الى قاعدين دلوقتى فى المصالح الحكومية الى عندهم خمسين و خمسة و خمسين بيعملوا ايه
مش لو شاب اتعين مكانهم هينتج اكتر
ليه ما يخلوش سن المعاش من 45 او 50 مثلاً
علشان يفضوا مكان للمساكين الى زيينا
و ادينى خلصت كلامى و لسة كوباية الشاى موصلتش
هى جاية من على طريق معبر رفح ولا ايه يا عمنا
دمت بالف خير

3ala asm masr said...

أنا حاسه أنه بقى مستقبل أسود مخطط بأسود منقط بأسود
يعنى هما الشباب اللى مش عايزين يشتغلوا؟؟؟؟ ده مفغيش فى بوقهم غير كلمتين معندكوش شغل ؟؟؟؟
وبعدين مصانع أيه اللى هيروحوا يشتغلوا فيها
ده المصانع أساسا عامله اضراب واعتصام

ابن حـجـر الـعـسـقـلانـى said...

أحمد الصباغ

أهلا بيك جدا جدا فى المدونة .. و طبعا انت مش بس ضيف .. لأ انت صاحب مكان .. و مشاريبك مجانا يا عم (لكن لغاية ما الباحث عن الحقيقة يرجع) ..منورنا

و الله عندك حق .. بالفعل هناك الكثير من الشباب متكاسل .. لكن لما الواحد من دول يتزنق بعد كام سنة فى مسئوليات الحياة .. هايعرف إن الله حق .. و يحاول يلحق القطار .. الله أعلم بقى هايلحقه و لا لأ

ابن حـجـر الـعـسـقـلانـى said...

أسامة

و الله إنت لو تعرف إمكانيات الراجل دة .. هاتزعل عليه جدا .. لأنه حتى هذه اللحظة لا يعمل .. يادوبك من أسبوع كدة بدأ يدى درس انجليزى لولد فى أولى ابتدائى و بنت فى رابعة ابتدائى

و لا حول و لا قوة إلا بالله

ابن حـجـر الـعـسـقـلانـى said...

الفاتح الجعفرى

منورنا يا عم الحاج

بيتين شعر جامدين بصراحة

هو الشيخ كشك كدة .. كانت سخريته لاذعة

يعنى لما نزرع قمح يطلع قرع ..طب لو زرعنا قرع هايطلع إيه ؟؟

ابن حـجـر الـعـسـقـلانـى said...

عمر محمود

تعرف إنى دايما بالفعل باحسد الحمار على الحالة اللى هو فيها .. مش حبا فيه زى شعبولا .. لأ .. ماتفهمنيش غلط .. لكن الحمار دايما مش حامل هم حاجة .. و مطيع جدا .. و مش بتاع مشاكل

يا ترى حياة زى حياة الحمار .. ممكن الإنسان يعرف يعيشها ؟؟

ابن حـجـر الـعـسـقـلانـى said...

نيدال بال

أيوووووووة جاااااى

معلش اتأخرت على سعادتك

أجدع كوباية شاى بالنعناع

يالا يا عم .. أدينا حققنا أمنيتك و علقنا على الإعلان .. عشان بس مايبقاش نفسك فى حاجة

لعلمك .. إحنا هنا بنحقق أول أمنية لكل واحد ييجى عندنا .. يعنى لو كنت طلبت مليون جنيه .. كنا دفعناهم لك .. لكن انت للأسف ضيعت الفرصة و طلبت شاى

و اقتراحك بتاع جعل سن المعاش 45 سنة .. أنا هابقى أناقشه إن شاء الله فى أول اجتماع وزارى قادم .. انت ماتعرفنيش .. أنا واصل جدا

ابن حـجـر الـعـسـقـلانـى said...

أختنا على اسم مصر

تصدقى تشكيلة ألوان تجنن .. انت مبدعة على ما يبدو .. إلى جانب إن كلامك بينقط تفاؤل .. يااااااااااه

الدنيا كانت مضلمة فى وشى و انتى نورتيها ... أشكرك بصراحة

إيه دة!!! ؟؟؟ مين طفى النور ؟؟

عمر محمود said...

وعندى لكم رحلة لرفح
http://yalaya3mlak.blogspot.com/2007/12/blog-post.html

Esmat said...

تحياتى لك
الإعلان ده اد إيه بيغظنى لما بشوفهواغلى غليان ، يعنى إيه ناس تتعب وتعلم ولادها
وفى الاخر يشغلوهم عمال فى مصانع ، منتهى التخلف، طيب الناس المهنيين اللى المفروض دى
شغلتهم حيشتغلوا إيه؟
ماهو حسب عبقرية الحكومة الجبارة
أعطت فرص عمل المفروض إنها بتاعت المؤهلات
الفنية للجامعيين !
هوه دى بالضبط أفكار مين؟
وهو مين اللى بيسير احوال البلد
المحاسب جيمى بيمشى بلد بحالهاهو ومامته
طيب بأمارة إيه، خبرته إيه
زهقت وزودتنى غيظ على غيظ الله يسامحك
أنا محاسبة شايفة نفسى انفع اشتغل
حارس مرمى فى نادى الإتحاد
وتحياتى لك

ammola said...

ايه ده انتو بقالكو كتير قاعدين هنا وهاتك يا مشاريب وانا ولا هنا
معلش ولا مؤاخذة يعنى ايه شباب ؟ وايه هى الوظيفة؟وتقصد ايه بالجامعة والشهادة وكده؟الحقيقة انتو عليكو كلام غريب اوى
ياللا...الله يخليك واحد فلافل وواحد شاى بلبن الواحد يتسلى على بال ما ييجى القطر
اقعد بالعافية

بت خيخة وأى كلام said...

ياااااااااااااااااه
انت فكرتنى بالوثيقة بتاعة التوظيف
انا فاكرة ان انا كمان دفعت خمسة جنيه فعلا علشان مهرجان التوظيف اللى كانت عملاه الحكومة
طب احمد ربنا ان صاحبك الحكومة عبرته وبعتتله جواب
انا لحد دلوقتى مابعتتليش حاجة
ولا حتى كلمة شكر على الخمسة جنيه


موضوعك فكرنى بموقف حصل معايا
كنت ناوية احكيهولك على اساس انه تعليق

بس غيرت رأى وقلت لأ مش هاحكيه لانه ممكن ينفع بوست عندى فى المدونة

المهم انا جيت اهه
ومالقيتش اى استضافة من اى نوع
يعنى ولا كوباية شاى ولا حتى صاندوتش لحمة

ملحوظة
ايوة كدة اهى البوستات دى اللى يسهل على امثالى فهمها

سلام اختك خيخة

ابن حـجـر الـعـسـقـلانـى said...

عمر محمود

يا أهلا بيك

لا أدرى إلى متى سنظل نعامل الفلسطينيين على أنهم بشر من الدرجة الثانية .. و هم من أشرف الناس

جزاكم الله كل خير على مجهودكم .. و ربنا يجعله فى ميزان حسناتكم

ابن حـجـر الـعـسـقـلانـى said...

الأخت عصمت

اللى يغيظ أكتر إن الإعلان دة جاى فى وقت الحكومة وعدت فيه الناس بتوفير فرص عمل بالآلاف كل سنة.. مصانع بقى و حاجات من دى.. يعنى المفروض طبقا للبرنامج الانتخابى إننا نلاقى آلاف الوظائف للجامعيين و المهنيين

فياترى يا هل ترى .. إيه اللى حصل و خلى الدولة تعلن فشلها عن توفير فرص العمل اللى قالت عليها ؟؟

و الله يخليكى .. لو بقيتى حارس مرمى فى نادى الاتحاد .. ابقى قوليلهم عنى .. أصل أنا كمان حارس مرمى .. لكن مش لاقى نادى يقبلنى .. مش عارف ليه .. يمكن عشان أنا زملكاوى ؟؟

ابن حـجـر الـعـسـقـلانـى said...

الأخت أمولة

يا قهلا يا قهلا

انت بتسألى أسئلة عن حاجات غريبة بصراحة .. يعنى ايه شباب ؟ وايه هى الوظيفة؟وتقصد ايه بالجامعة والشهادة وكده؟؟؟

يا ستى أنا لو اعرف.. أقول على طول

ثم انت طلبتى واحد فلافل وواحد شاى بلبن على بال ما ييجى القطر

طب هو يعنى إيه "فلافل" .. و يعنى إيه "شاى بلبن" .. و يعنى إيه "قطر" ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

و إيه دة ؟؟ انتى مين ؟؟ و أنا إيه اللى جابنى هنا ؟؟؟

ابن حـجـر الـعـسـقـلانـى said...

الضيفة العزيزة بت خيخة و أى كلام

لأ .. ضيفة إيه .. انتى صاحبة مكان .. و صاحبة زمان كمان .. مش مكان و بس

احمدى ربنا إنهم ما بعتوش ليكى جواب .. الله أعلم كانوا هايعينوكى إيه و فين ..قضا أخف من قضا

بس بصراحة كانت هاتبقى نكتة لو صاحبى دة اشتغل سباك بدرجة ماجيستير فى فلسفة التأويل .. هو بصراحة يستاهل أكتر من كدة على التخصص الضلمة اللى هو اختاره .. اختيار عكر بصراحة

و الموقف اللى انتى ماحكيتيهوش دة موقف جميل جدا و عجبنى موت .. لأ .. دماغك عبقرية بصراحة

و آدى يا ستى ساندويتش لحمة و معاه كوباية شاى فتلة سكر برة .. و الطلب دة ما بينزلش إلا للزباين المهمين .. و عندنا شاى "تيك أواى" بشاليموه كمان لو عايزة كوباية تشربيها و انت مروحة

و منورة المدونة يا أختنا

أخوكى أبو العساقيل

محمد عبد القوى said...

بص ياعم.. صاحبة مدونة حلم الحرية علقت عندى فدخلت أعلق عندها..قريت تعليق عجبنى لـ عمر محمود هناك قمت معلق فى مدونته..قريت أسم مستعار عنده شدنى قمت داخل مدونة صاحبته..بنت خيخة وأى كلام..قريت كلامها عنك بأنك صاحب بوستات عسيرة الفهم فجيت لحضرتك...يعنى جى لك من سفر..وأجى الاقيك بتتريق على شعارات الحكومة وحلها العبقرى لمشكلة البطالة..دا انا سمعت ان موضوع الأستمارة ده جاب نتايج هايله وخفف المشكلة لدرجة أنهم هيعيدوا التجربة بس بشكل مطور ،هيبقى بدل الأستمارة كشكول بحالة وتمنه بدل 5 جنيه 75 جنيه
وهيبقى شعار المرحلة دى (ماتبقاش من العجول..و روح أشترى الكشكول )
ودمتم

ابن حـجـر الـعـسـقـلانـى said...

محمد عبد القوى باشا
حمد الله على سلامة الوصول من السفر الطويل

بصراحة تعليقك دماغه عالية فحت

و عجبنى اسم الحملة الإعلامية بتاعة "الكشكول" .. يا كشاكيلك يا عبد القوى

أهم حاجة إنك ما تشتركش فى الحملة دى و اتعلم من سابقيك .. و لو الخمسة و سبعين جنيه دول مضايقينك قوى و عايز تدفعهم .. هاتهم يا سيدى و تعالى اشتغل معايا قهوجى فى الاستراحة دى .. دة حتى الشغل عليا بقى كتير .. أهو تساعدنى

و لو ليك فى المواضيع المكلكعة .. هاتلاقيها على مدونتنا التانية

الكاشفة

بس هى مش مكلكعة قوى يا راجل .. دى حاجات مهمة برضه

و سلم لى على القطر .. قصدى على الكشكول

فارس عبدالفتاح said...

سلام عليكم


يا طارق !! يا طارق !!

طارق ده الجرسون

يا طارق .....

هو المعلمين مجوش لغايت دلوأتي المعلمين طبعاً الباحث وابن حجر .

انا : الباحث عمل ايه ؟

طارق : والله مش عارف اصلوا ما بيجيش اديلة حوالى شهر ..

انا : هو فين .

طارق : محدش عارف غير المعلم ابن حجر .

انا : طيب هو ابن حجر فين .

طارق : كان هنا من شوية بس باين وصل لغاية البيت يجيب حاجة وجاي ..

طارق : اجبلك ايه .

انا : هتلي واحد لمون ساقع .. وبعت هتلى علبة سجاير مارلبورو احمر بكس .

طارق : ممنوع التخين هنا يا استاذ فارس منت عارف الادارة منعاً التدخين ..

انا : أه أه الاخوة بتوع قال الله وقال الرسول ..

طارق : هنعمل ايه اكل العيش دول خنوقونا ومش عارف حتى اشرب سيجارة بروح اشربها ورى القهوة .

أنا : بقول ايه يله يا طارق .

طارق : نعم .

انا : انا هروح اقعد على القوة اللي جنبكم اشرب حجر معسل واجي . اول ما يجي اي حد من الادارة يعني ابن حجر او الباحث قله فارس سأل عليك ..

طارق : حاضر .

انا : بقلك ايه يله الاستاذ عصفور بيجي هناك ..

طارق : ايوه بيجي يطلب وحد قهوة سكر بره ويشربها ويمشي .


انا : بس لما يجي بلغوا انى سألت عليه .. ماشي .

طارق : خلاس يا استاذ فارس .

انا : يله سلام عليكم ما تنساش ياد.

طارق : خلاص ياعم خنقتنا انت التاني هي نقصاك .

MKSARAT SAYED SAAD said...

اول ازور مدونتك فعلا جميلة
واحلي حاجة عجبتنى في كتابتك انك بتتكلم بعقلانية اسلوبك في النقد جميل
تحياتي

عصفور المدينة said...

انت عسل يا فارس
تحياتي ووحشتنا

فرنسا هانم said...

ابن حجر عامل ايه وحشنى كتيييييير قوى
ادخل عندك وانا عيانه
الاقى صوره الحمار دى وهو فاتح بقه
انت عارف انا جايه بالعافيه
علشان انت تهمنى جدا
سلام مؤقتا

ابن حـجـر الـعـسـقـلانـى said...

يخرب بيت دماغك يا فارس

و الله خسارة انك تحط الحوار دة تعليق.. دة كان عايز تدوينة .. لكن يالا.. انت راجل صعيدى و كلك كرم

دماغك عالية والله .. و عشان كدة أنا هانزل لك شيشة بس دكاكينى كدة .. ماتقولش لحد

إلا قول لى صح .. هو مين طارق دة ؟؟

ابن حـجـر الـعـسـقـلانـى said...

مكسرات سيد سعد

يا أهلا يا أهلا

دى أول زيارة ليك .. و أنا كنت باقول المدونة نورت فجأة ليه

الله يخليك .. إطراءك علينا.. وسام لينا على صدرنا

و أهلا بيك دايما

ابن حـجـر الـعـسـقـلانـى said...

أستاذنا عصفور المدينة .. أهلا بيك

فارس دايما بيسأل عليك و بيسلم عليك

فارس بيعزك قوى والله يا أستاذ عصفور

ابن حـجـر الـعـسـقـلانـى said...

فرنسا هانم

الله أكبر .. مش معقول أنا مش مصدق نفسى يا جدعان .. أنا لو اعرف انك جاية أنا كنت مليت المدونة صور رمل (كناية عن اننا نفرش الأرض رمل) .. و الله أنا مقدر مجيتك دى عشان أنا عارف إنك مقلة فى الزيارات

ربنا يهون عليكى ابتلائك .. و يجعله فى ميزان حسناتك

و معلش بقى اعذرينا على صورة الحمار .. لكن صورة معبرة بصراحة .. والله أنا حاسس إن الحمار هاينطق خلاص

نورتينا يا فرانسواز .. و يا رب ما تغيبى عننا تانى

Mask said...

بنسورا يا اكسلانس
انا مش عارف انتو ظالمين الحكومه ليه
ياعالم اتقوا الله بقه
الناس دي تعبوا عشانا ياما
وخططوا وقرروا ودرسوا وحللوا واجتمعوا ثم وضعوا الميزانيات واقاموا المشاريع وسفلتوا الطرق وحفروا المجاري وشقوا الترع
يعملوا ايه يعني يصرفوا من جيبهم على البلد . دا اللي ناقص
وبعدين انتو شعب بيخلف وياكل ويتمص انتاج الدوله
واحمدوا ربنا ان بقالكم بتاع 25 سنه من غير حرب.. هتنهبوا
مش يمكن لو جت حكومه تانيه مثلا تسلخنا او تجوعنا او تخلينا تمشي من غير هدوم..
قولوا ورايا مصر مصر مصر هيه امي ...
واللي مش هايشرب من النيل هاتجيله البلهارسيا من الحنفيه..
عضو مجلس ادارة الحزب الوطني الديمواقراطي عن دايرة مدونين بلا حدود منتدب للدفاع عن دور مصر التاريخي ونضالها ضد الشعب اللي مش مقدر النعمه اللي هوه فيها..

ابن حـجـر الـعـسـقـلانـى said...

Mask

بون سوار جلانس

تصدق إن انت اديتنى كلمتين فى جنابى فوقونى ... و أنا اللى كنت فاكر إن الحكومة دى مبهدلانا و مطلعة ..... عينينا

ياااه يا جدع... قد إيه الشعب دة شعب جاحد .. و الحقد ملا قلوب الناس ... قال عشان خمسة و عشرين مليون جنيه مش عارفين مصيرهم راحوا فين ..نروح نتهم عشانهم الحكومة بأنها بتضحك علينا و ملبسانا السلطانية .. يا سيدى دة حتى السلطانية بقت بالشىء الفلانى اليومين دول ..و كفاية إن الحكومة كلفت السلطانية شىء و شويات عشان تظبطها على مقاسنا

معلش .. الإنسان دة مايملاش عينه غير التراب


المهم ... سيبك بقى من الحكومة و الكلام الفارغ بتاعها .. و نيجى للمهم

أنا شوفت فى البروفايل بتاعك انك بتفضل كتاب "السنة النبوية بين أهل الفقه و أهل الحديث" للشيخ محمد الغزالى .. اشمعنى الكتاب دة انت بتحبه؟؟ و إيه اللى عجبك فيه؟؟

أنا باسأل بجد والله .. لأن الكتاب دة عجبنى جدا

ارسم بالرصاص said...

ممممممممم هو انا قبل ماارد عليك .. نفسي اشتغل ايه .. ح اسألك هو ممكن يعني متلا يعني .. في سباكات ف الحكومة .. ولا دي مهن قاصرة على الذكور ؟؟

شوف ياسيدي انا طبعا ناوية ازاحمكم ف اشغالكم زي حال كل البنات .. ساعات تلقاها راكبة عربية وبتشتغل عشان تحقق ذاتها .. وانا ناوية اخلي بابا يجيبلي عربية .. وبعدين اشتغل عشان احقق ذاتي ...

ماهي الحدوتة متشابكة ياابن حجر .. ليها عدة محاور .. لا لا مش المحور بتاع المعادي .. ده محور تاني خالص ..

البطالة المقنعة .. الواسطة .. الرشاوي للشغل .. تشغيل الاناث واحيانا تفضيلهم عن الذكور في مهن كتير ... ممممممممم كترة الحرامية والهليبة ..

يعني حاجات كتير اوي .. ماتخليش فتافيت لل.. ( حمير ) أكرمكم الله

ف يعني ياابن حجر .. هي جت على ماتبقاش حمار والحق القطار ..

ماهو يعني لما يجيبلك فلاح وفلاحة ف الغيط ... والا مافيش جواز الا بملتو

اوعى تقولي ايه هو ملتو ... ده شرحو يطول ...

انا ببساطة كده عايشين ببركة دعا الولدين .. ويلا اهي ايام .. وربنا يعين الشباب .

تحياتي ليك .. هايدي

Mask said...



بص ياابن حجر
الكتاب دا اعاد ليه نوع من التوازن النفسي ... بمعنى
لما كنت بفكر في كتير من القضايا الموجوده في الكتاب دا قبل ما اقراه
وكنت بوصل لرأي ان مش معقول يكون كل حاجه حرام كده .. مينفعش التحريم يبقه على الاطلاق .. مفيش تعميم في التحريم.. كنت ببقه مقتنع بالراي دا
لكن مع منقشاتي مع اصدقاء ليه "سلفيين" كانوا بيواجهوني ان مفيش معايا دليل واني بعمل عقلي واني بتبع هوايا واني بالف دين على مزاجي..
كل دا كان بيصدمني وبيزعزع تفكيري لان بتعرض لهجوموم ومش لاقي دفاع عن نفسي غير تفكيري وفهمي المتواضع لديني..
لما قريت الكتاب حصلي اطمئنان نفسي
حسيت اني مش لوحدي
اني مش خارج عن القاعده
مش لازم اكون صح بنسبة ميه في الميه
لكن على الاقل حسيت اني مش خطا بنسبه ميه في الميه...
عرفت ليه بقا الكتاب دا مؤثر بالنسبه ليه..

بت خيخة وأى كلام said...

انا جيت بس علشان اخد ساندوتش اللحمة وكوباية الشاى ام شاليموه
وقلت بالمرة ادحرج السلام
بس ايه رايك بجد فى الموقف اللى ماحكتهوش
مش موقف جامد بذمتك

تحياتى ليك ياابن حجر
ملحوظة
اللحمة عايزة سوا زودلها شوية مية
سلام
اختك خيخة

سها said...

يعني جوابات القوى العامله رجعت تاني
بس في صورة مقنعه
بروجكت وحملة لتوظيف الشباب
هيا بغباوتها
تحياتي

ابن حـجـر الـعـسـقـلانـى said...

أرسم بالرصاص

لأ للأسف مافيش سباكات فى الحكومة .. لأن طبقا للائحة رقم 9806457896 لسنة 787 قبل الميلاد فإنه لا يمكن و لا يجوز قطعا تعيين سباكات نساء فى المصالح الحكومية

و والله عندك حق .. الحكاية بالفعل متشابكة ..يعنى لما كذا واحد يروحوا يقدموا فى شغل .. مابقاش فيه حاجة واضحة نقدر بيها نعرف إيه اللى بيميز واحد عن التانى .. لكن الواسطة بالتأكيد بيكون ليها العامل الحاسم فى المواضيع اللى زى دى

و إيه حكاية العربية اللى انت ناوية تجيبيها دى ؟؟ ناوية تشتغلى سواقة ؟؟.. و على رأى مارى منيب .. انت جاية إشتغلى إيه ؟؟

ألا هو إيه "الملتو" دة ؟؟ يكونش المولتو اللى هو ألذ أكلة بين أكلة و أكلة ؟؟

ابن حـجـر الـعـسـقـلانـى said...

MASK

الله بعد ردك دة .. أعتقد إنك لو قرأت كتاب "دراسة فى فقه مقاصد الشريعة" للشيخ الدكتور يوسف القرضاوى .. هاتلاقى الكثير و الكثير مما يدهشك .. خاصة مع من يسيهم القرضاوى بـ "الظاهرية الجدد" .. بالفعل كتاب يكشف الكثير و الكثير

أنا برضه كنت حاسس إن فيه حاجة غلط أو مش مظبوطة فى كتير من اللى باسمعه لكن ما كنتش قادر أحط ايدى عليه .. الكتاب دة (كتاب القرضاوى) و معاه كتاب الغزالى حطوا النقط على الحروف .. بس نقط و حروف بجد مش زى النقط و الحروف بتاعة بوسى سمير

ابن حـجـر الـعـسـقـلانـى said...

بنت خيخة و أى كلام

و احنا بنلقف التماسى اللى اتدحرجت علينا

أنا بصراحة ماكنتش عايز أكتر من "الشاليموه" على الشاى عشان بيقولوا بيبوظ طعمه .. لكن يالا .. احنا عندنا كام خيخة .. اتوصيت و حطيت كل الشاليموه اللى لسة جايبينه من عند العطار

و لو اللحمة نية .. اعملى بنصيحة أمى .. لما بتقول لى: "كلها.. تستوى فى بطنك" .. و بالهنا و الشفا


و فين يا أختنا الموقف العجيب اللى شكلنا كدة هانحلف بيه قبل ما نشوفه


أخوكى
أبو العساقيل

ابن حـجـر الـعـسـقـلانـى said...

الأخت سها

و الله أفضل اسم يتقال على حملة توظيف الشباب دى هو اسم "حملة توظيف الأموال" .. ألا صحيح .. هى الفلوس اللى لموها من الناس تبقى حرام و لا حلال ؟؟

Mask said...

طب ياريت تدلني على وصله لتحميل الكتاب
لان البحث مش جايب نتيجه حتى الان

ابن حـجـر الـعـسـقـلانـى said...

MASK

للأسف الكتاب دة مافيش منه نسخة على النت .. الكتاب طبعة دار الشروق .. أنا كنت شاريه بخمسة و عشرين جنيه .. هو ما يقرب من 280 صفحة .. لكن كتاب يستاهل بصراحة

و اللينك دى بتاعة مكتبة فيها كتب قيمة جدا للقرضاوى و غيره .. لكن مافيهاش كتاب فقه المقاصد

http://www.al-mostafa.com/

أبوشنب said...

بص يا غالي صاحبك ده لازم يشتغل سباك

يعني حتما ولا بد يشتغل سباك

يعني هو ماجستير الفلسفة ده البلد هتعمل بيه ايه ان شاء الله

وعايزك تعرف برضه

ان كلام الحكومة ما بيخرش المية

وصاحبك في الاخر برضه هيشتغل سباك

ابن حـجـر الـعـسـقـلانـى said...

أبو شنب

و الله عندك حق .. هو هايشتغل سباك يعنى هايشتغل سباك

لكن هايشتغل سباك ازاى و مافيش مية بتخر من كلامهم ؟؟ انت مش بتقول إن كلامهم ما بيخرش المية ؟؟

أعتقد إن الناس دى عايزة تغير مواسير كلامها .. مش مواسير المية

منورنا يا أبا شنب

و بخصوص مقال جمال حمدان ... أنا هاجيلك كمان شوية بإذن الله

يوميات عيل مصري said...

بن حجر
هو فيه كامواحد غيري وغيرك في مصر شافوا فيلم
اغنية على الممر

ابن حـجـر الـعـسـقـلانـى said...

يبدو يا أستاذنا إنهم مش كتير .. من كل المدونين اللى على "بلوجر" فيه خمسة فقط هم اللى كاتبينه فى البروفايل بتاعهم من ضمنهم أنا .. إلى جانب إن مافيش حد معايا فى الشغل تقريبا يعرفه أو شافه .. هم اخواتى و أصحابى المقربين فقط اللى شافوه و عاجبهم

أستاذنا .. هو ليه الفيلم دة جميل؟؟ و ليه مافيش ناس كتير شافته أو حبته أو اتأثرت بيه ؟؟

ابو احمد said...

الابن العزيز ابن حجر
كلما دخلت على مدونات الشباب مثلك مش عارف ليه بفتكرقصيده نجم
وطول مامصر ولاده
وفيها الطلق والعاده
هتفضل شمسها طالعه
برغم القلعه والزنازين
شكرا لسؤالك عنى فى محنتى
ودمت بخير

MAKSOFA said...

والله ما أنا عارفه
حا اقول ايه؟
هم يبكي
وهم يضحك

ابن حـجـر الـعـسـقـلانـى said...

أبو أحمد

أخجلتم تواضعنا و الله يا أستاذنا .. انت كدة بتدينا أكتر من حقنا

بارك الله فيك و رعاك و فرج عنك همك و جعله فى ميزان حسناتك

زيارتك لينا بتبقى مبهجة لينا .. نرجو أن تكون المشاعر متبادلة

ابن حـجـر الـعـسـقـلانـى said...

مكسوفة

بالفعل هم يضحك و هم يبكى

و الحمد لله إننا لازلنا نمتلك القدرة على الضحك وسط الهموم الكتير دى