Wednesday, November 14, 2007

ركوب الطريق السريع .. لتحقيق الفشل الذريع

أهلا بيكم يا جماعة فى أول موضوع لى على الاستراحة
معكم بن حجر العسقلانى
النجاح دة شىء جميل و تحقيق النجاح بيحتاج مجهود.. لكن اللى ناس كتير ما تعرفهوش هو إن الفشل برضه أحيانا بيبقى شىء جميل و كمان بيحتاج مجهود كبير لتحقيقه.. اللى مش مصدق إن الفشل دة شىء جميل.. يتفضل يشوف


أيام ما كنت فى تانية ثانوى.. كان عندنا امتحان رياضة شهرى .. فطبعا الواحد لازم ما يضيعش و لا درجة من امتحان سهل زى دة على أساس إنه تدريب ليك عشان ما تضيعش و لا درجة آخر السنة .. شديت حيلى و سهرت الأيام و الليالى و فتحت المراجع و أمهات الكتب و تحولت إلى موس لا يترك معلومة إلا و يقتلعها من الكتاب ليضعها فى الألباب.. و دخلت الامتحان و جاوبت و أنا ضامن إنى مش هاقل عن تسعين فى المية .. و جاء يوم إعلان النتيجة على مرأى و مسمع من الأشهاد
ابن حجر العسقلانى ....... أيوة .......... تمانية من تلاتين

استوعبت الصدمة بقلب من حديد و قلت أنا لازم أعوض الشهر الجاى
شديت حيلى و سهرت الأيام و الليالى و فتحت المراجع و أمهات الكتب و تحولت إلى موس لا يترك معلومة إلا و يقتلعها من الكتاب ليضعها فى الألباب.. و دخلت الامتحان التانى و جاوبت و أنا ضامن إنى مش هاقل عن تسعين فى المية المرة دى .. و جاء يوم إعلان النتيجة على مرأى و مسمع من الأشهاد
ابن حجر العسقلانى ....... أيوة .......... ستة من خمسين


أما صاحبى التمنياوى طه فكانت مشكلته مادة اللغة العربية.. كان عنده فيها امتحان شهر برضه و كان مش مذاكر .. و قاعد فى الامتحان ما كتبش حاجة غير إسمه.. و هو كان بيحب الميكانيكا جدا .. فراح كاتب مسألة ميكانيكا و قام بحلها .. و فى نهاية الحل أحب أن يعلن للجميع أنه متشبث بهويته الكروية لأبعد مدى فكتب "يا رب النصر للأهلى" .. و سلم الورقة .. ماعرفش ليه تانى يوم جاله استدعاء ولى أمر

موقف تانى حصل لصاحبى التمنياوى طه
فى مرة كان عنده امتحان سكشن فى الكلية و هو كان فى المادة دى ميييييييييييح (شكلها كدة بقت عادة).. فطبعا كان لازم يتجاوز هذا الامتحان اللعين بأى طريقة كانت.. فلم يجد إلا طريقة "المنقاش" و هى طريقة تعتمد على القيام "بنقش" ورقة الإجابة الخاصة بك بمحتوى ورقة الإجابة الخاصة بزميلك دون أن يشعر زميلك بذلك (ماحدش قال غش يا جماعة) و هى مهارة كان متميزا فيها بحيث لا يضارعه فيها إلا القليل .. بدأت أحداث الامتحان فى الجريان و بدأ فى "نقش" الإجابات من صاحبه المجاور له بدون أن يشعر صاحبه هذا بأى شىء.. و تمت عملية "المنقاش" بنجاح ساحق.. و خرج و هو مقفل الامتحان و متأكد إنه هايجيب عشرة من عشرة خصوصا إن صاحبه شكله كان مذاكر كويس
الأسبوع اللى بعده فى السكشن استلم ورقة إجاباته المتصححة و كله لهفة أن يرى رقم العشرة على العشرة.. بسرعة تصفح الورقة و عينه شافت الطامة الكبرى .. سالب اتنين من عشرة .. يا نهار مش معدى .. هو إيه اللى حصل يا جدعان؟؟ اتضح إن المعيد كان عامل أربعة نماذج للامتحان يعنى كل واحد بيحل امتحان مختلف عن اللى جنبه .. و كانت معلومة عرفها متأخر


أنا مش عارف هى الصدف و لا حاجة تانية اللى جمعتنى مع مجموعة زملاء أيام الدراسة بحيث تشاركنا جميعا فى حمل لواء الفشل و الرسوب .. و كانت مشكلتنا ليست فى الرسوب فى حد ذاته.. أدينا كلنا ستر و غطى على بعضنا .. لكن المشكلة كانت فى إن النتيجة كانت بتبقى متعلقة فى لوحة الإعلانات .. يعنى الأمة كلها شايفة درجاتك .. خصوصا لو كنت جايب صفر (أيوة صفر دة كان طبيعى جدا خصوصا مع احتمال وجود درجات بالسالب) و الصفر كان بيتكتب بوضوح بالحروف "صفر" عشان يبقى مختلف عن الأرقام اللى قبله و اللى بعده عشان نبقى عبرة لمن لا يعتبر .. و الانخراط فى هذه المجموعة من الزملاء يشعرنا دائما أننا مجموعة متميزة عن غالبية البشر.. خاصة عن مجموعة المتفوقين من الدفعة .. فكان الحل إيه عشان نشعر نفسنا بهذا التميز ؟؟ الحل كان إننا نستقل إداريا و نعمل لنا لوحة شرف خاصة بنا.. يتصدرها أكثرنا حملا للمواد.. يعنى الحامل لخمس مواد يتقدم فى لوحة الشرف عن الحامل لأربع مواد .. و طبعا ذيل القائمة بيبقى لغير الجديرين الحاملين لمادتين أو مادة .. و لا مكان فى القائمة لمن لا مادة لديه

أثناء أداء الامتحان .. عادة الوقت بيبقى ضيق جدا و مش بنلحق نحل كل الأسئلة اللى بنبقى عارفينها و ذلك إمعانا فى ذل الطالب و إشعاره بالحسرة.. لكن أحيانا بيفوت نصف ساعة مثلا من زمن الامتحان اللى هو ثلاث ساعات و بيكون الواحد جاب آخره .. جاب آخره مش معناها قفل الامتحان.. لأ طبعا .. كلا و حاشى .. لكن معناها إن خلاص مابقيناش عارفين نجاوب حاجة فى باقى الامتحان.. و تبتدى الهواجس تشتغل .. أنا كدة هاسقط .. تانى.. و يا ريت تيجى على السقوط فقط.. لكن كمان فضيحة لوحة الإعلانات .. دة غير إنى لو شيلت مادة تانية ممكن أعيد السنة.. و ادخل نفس الامتحان تانى وسط ناس ما اعرفهاش يعنى هايعرفوا انى بامتحن الإعادة و اتفضح وسط ناس تانية.. و احتمال المنهج يتغير .. أو الدكتور يتغير .. يبقى هاذاكر منهجين عشان خاطر مزاج الدكتور.. طب دة أنا ذاكرت كويس و ما استاهلش اسقط .. طب أحاول افكر فى الأسئلة تانى ..إيه الصعوبة دى.. مافيش أمل خالص فى الأسئلة .. الدكتور متوصى و مستقصدنى أنا بس و لا إيه؟؟ يبقى كدة خلاص .. كل سنة و أنا طيب يا راجل يا طيب.. إيه دة ؟؟ دة محمد صاحبى اللى جانبى شكله ما ضربش قلم فى ورقته هو كمان ..يعنى مش أنا لوحدى اللى ضايع .. هو سارح فى إيه ؟؟ شكله بيفكر فى اللى أنا كنت بافكر فيه بالضبط .. و فجأة يبص لى فى اللحظة اللى أنا باصص له فيها .. و كأن نظرة العين هذه تنقل بيننا سيلا من الهواجس و الأفكار المتشابهة .. و تبدأ ملامح وجهينا فى الإنفراج لنبدأ فى موجة ضحك هستيرى .. ضحك الذى يئس من النجاح .. و أسمع ضحكة مشابهة من الكرسى اللى ورايا .. و واحدة كمان من على شمالى .. و تتزايد الضحكات تزايدا مَرََضيا و لا نتوقف إلا بصعوبة لاقتراب المراقب

و طبعا يا جماعة ما يتفهمش إننا بندعو الناس لأنها تفشل .. أديكم شايفين نهايتى .. شغال قهوجى فى قهوة زباينها ما بتدفعش فلوس

و يا ريت يا جماعة ما تنسوش إننا قاعدين على قهوة .. يعنى بندردش و اللى عنده حكايات من دى تبين إنجازاته فى عالم "الفشل الذريع" يا ريت ما يبخلش علينا بيها لأن الحكايات دى كل ما تكتر .. كل ما هاشعر إنى مش فاشل قوى .. و أهو تدونا شوية ثقة بالنفس

ملاحظة.. المعلومات السابقة كلها معلومات صحيحة مية فى المية و مع ذلك أنا كنت الأول على "علمى رياضة" و كنت التالت على المدرسة كلها فى الثانوية العامة .. إلى جانب إنى اتخرجت فى الكلية بتقدير جيد.. و التمنياوى طه كان من أوائل مدرسته إلى جانب إنه من "أفقه" الناس فى عمله الحالى.. ذلك لئلا يقول أحد أننا نروج روح الاستسلام.. ولكننا نبتغى العبرة

و دمتم

29 comments:

دكتور حر said...

أضحك الله سنك

بس انت كده ضربت ابن حجر في سوق الكتب خالص

وبعدين مستواك حلو باين على الكتابه لأن خطك حلو وكويس يعني

دمتم بخير
والحمد لله ان الواحد قرا البوست ده بعد الدراسه

اسكندراني اوي said...

ايه الفضايح اللي على رؤس الاشهاد دي
طب ي الكليه كان كام واحد بيشوفها النهارده الويب كله ممكن يتفرج
هههههههههههههههههههههههه

عصفور المدينة said...

يا نهارك ابيض يا محمد الناس داخلة على امتحانات
وبعدين أنا ماعنديش حكايات من النوع ده عندي من النوع ده

الامتحان 8 أسئلة تختار 6 والناس طلبوا وقت واتصلت المدارس كلها بالقاهرة لطلب وقت زيادة والعبد الفقير خلص ال 8 أسئلة في نصف الوقت

وكانت النتيجة أن انتظرني مجموعة من رجالتكم بالمطاوي تاني يوم
ينفع النوع ده ولا امشي

عصفور المدينة said...

صحيح نسيت أقول إن ده كان في الثانوية العامة وإني جبت الدرجات النهائية في الرياضيات وكان وقتها مافيش الكلام ده أوي لأن كلية الهندسة كانت من مجموع 78.5 % في سنتي

Desert cat said...

ااااااااااااااااه
كاه كوم ومضوع النتيجة ده كوم تانى
الواحد لو عايز يخبى انه ساقط مبيعرفش
كنت شايله وصفيه وعمال افشر على صحابى واقولهم ناجحه فى كله
وجيابه امتياز فى الميزانية والانجليزى
طبعا موضوع الامتياز ده كان صح
انما ناجحه فى كله كان كدب
والاقى واحد زميلى الهى ......... ربنا يوفقه بقا جاى يقولى وصفييييييييييييه
الناس اللى ساقطه وصفية على جنب
منه لله اللى اخترع موضوع تعليق النتيجة وكانها اعلان عن مدينة ملاهى
الكلام ده كام من ظمااااااان علشان انا دلوقتى خلصت برضه من ظمان

عصفور المدينة said...

ممكن اعلق على تعليق الأخت ديزت كات
برضه أنا كنت جايب الدرجة النهائية في الوصفية في نص السنة فاكرها لسة كانت 30 من 30 وآخر السنة ودي كانت حالة نادرة برضه
يا اخوانا انا مش قاعد ع القهوة دي تاني أنا حاروح قهوة الناجحين
ولا اقولكم ممكن اقعد معاكم بس ادي كورسات هنا

فرنسا هانم said...

تمانيه من تلاتين
وسته من خمسين
يا مرحب بأمهات الكتب
على فكره
مدونتك فى منتهى الروعه
ورخيص كمان القعده فى الاستراحه بالمليم
مجيش اصيف واشتى عندكم

حبة حاجات (ايمان) said...

مدونتك حلوه فعلا

احييك
بس ياريت تطلبلى سحلب وحلال عليك ال 4 مليمات

تحياتى

التمنياوي طه said...

يخرب عقلك يا مجرم
فكرتني بالذي مضى و بالسنانير اللي كانت مالية النتيجة بس انا عاوز اصححلك كام معلومة
انا مجبتش ناقص اتنين من عشرة الحقيقة اني جبت نافص اربعة . الغش اصلا كان بينقص خمسة و انا كنت كاتب قانون صح و الدكتور اداني عليه درجة بس انا امتحنت بعد كدة ثلاث امتحانات و جبت فيهم 10 من 10 عشان تعرفوا اني كنت جامد بس هو اول امتحان دة مكنتش متأهب ليه و على فكرة كان ميكانيكا برضه
و اهم حاجة ان احنا كلنا كنا زي بعض --- انت عكيت , آه --- انت عكيت , آه .... يبقى انا في السليم
و ربنا يمسيك بالخير يا إيهاب يا سوستة

شباب روش طحن said...

فعلا النجاح حلو والفشل حلو بس المشكله بتبقي في القيمة نفسها أكيد النجاح أفضل من الفشل

ابن حـجـر الـعـسـقـلانـى said...

معلش يا جماعة .. أرد على التمنياوى طه الأول عشان أوضح كام نقطة

يخرب بيت دماغك يا تمنياوى.. إيهاب سوستة إيه بس .. انت كدة هاتودينا فى داهية
و الصنانير هنا المقصود بيها حرف اللام اللى بيبقى مكتوب فى النتيجة اللى معناه "مقبول" .. فلما واحد بيجيب كل تقديراته مقبول و لما تبص على نتيجته فى الكشف .. تلاقى لامات كتيرة جنب بعضها شبه الخطاف بتاع الصنارة .. فالتقدير العام بتاعه بيبقى .. صنانير
--------------------

دكتور حر

ربنا يزيدك ضحك فى الدنيا و الآخرة .. و شكرا على المدح الجميل دة

خد بالك فيه ناس تانية ممكن تقرا البوست و لسة بتمتحن .. ربنا يستر

و يبقى بن حجر الحقيقى يسامحنى بقى على اللى عملته فيه مع إنى باحبه جدا والله
--------------------

اسكندرانى أوى

يا عم أدينا خلصنا دراسة الحمد لله .. و يا رايح كتر من الفضايح .. و يا بختك يا عم السكندرى .. إنت عايش فى أجمل مدينة فى مصر .. ما تعرفش قهوة هناك أشتغل فيها بس يبقى عليهم السكن ؟؟ و لو لقيت قهوة كويسة.. ما تبقاش تقول للباحث عن الحقيقة صاحب الاستراحة دى عشان يبقى يدينى حقى
--------------------

أستاذنا الكبير عصفور المدينة

يبدو إنك مش هاتكتفى بلقب"شيخ المدونين" فقط ... لأ كمان هاتاخد لقب "شيخ المهندسين" .. بس الحمد لله .. أنا كنت ضايع آه لكن ماوصلتش للمطاوى

بس إحنا كان نفسنا فى قصص "فشل ذريع" معقولة مفيش حاجة كدة و لو صغيرة ؟؟

و متهيألى إن أول واحد هاياخد كورسات هو أنا و هابتدى بكورس "العتيد.. فى وسائل التفوق الأكيد" .. بس هاسدد الأجرة مشاريب
--------------------

فرنسا هانم

أهلا بأهل بورسعيد الجدعان
والله كانت تمانية من تلاتين و ستة من خمسين .. و خبيت على أهلى عشان دى كانت ثانوية عامة و لو عرفوا انى ابتديتها كدة كانوا هاطقطقونى .. لكن فى آخر السنة أنا جبت الدرجة النهائية فى الرياضة الحمد لله

الف شكر على إطرائك .. الحقيقة أنت اللى مدونتك شيقة جدا .. لكن الحقيقة إنى مجرد قهوجى فى المدونة دى .. و صاحبها هو عمى و عم عيالى "الباحث عن الحقيقة" اللى آوينى من بهدلة الشوارع و الشغلانات الإجرامية و مشغلنى فى الاستراحة بتاعته "استراحة الكاشفة".. و هو فى الجيش دلوقتى و جاى كمان شهر بإذن الله

لكن بجد أنا سعيد جدا إنك شرفتينا و يا ريت تشرفينا على طول .. و المشاريب على حسابى
--------------------

إيمان صاحبة حبة الحاجات

أهلا بيكى فى أول زيارة ليكى عندنا .. مش عايزين يا ستى الأربعة مليمات دول .. إحنا أول زيارة عندنا بننزل المشاريب مجانا

أنا شايف فى البروفايل بتاعك إنك بتحبى عمر خيرت .. طب مافيش فيروز و لا إيه ؟؟ خصوصا إنك حاطة أغنية "نحنا و القمر جيران" .. على العموم منورة المدونة
--------------------

شباب روش طحن

بالفعل النجاح دة شىء جميل جدا .. و الهدف من التدوينة هو إن الناس ما تيأسش .. و ما لا يدرك كله لا يترك كله

و منورينا يا شباب روش طحن

عصفور المدينة said...

إيه حكاية إيهاب سوستة دي بقى!!!!
عندي حكاية فشل صحيح بس من رابعة ابتدائي كنت بانام كثير جدا بشكل مرضي وبعدين كنت باكره الحساب تخيل؟؟
وبعدين بقيت امتحن امتحانات الشهر واسقط واقطع الورقة عشان ما امضيهاش من والدي وبعدين انضرب في الفصل وبعدين فقت لنفسي في آخر السنة وبعدين دخلت الامتحان مش عارف ازاي قابلني واحد صاحبي يوم النتيجة قال لي انت الأول على المدرسة هاهاها

ابن حـجـر الـعـسـقـلانـى said...

هريرة الصحراء .. أو قطة الصحراء عشان ما حدش يزعل

أنا كنت كاتب رد ليكى لكن يبدو إنه اتمسح منى و أنا بانقله هنا.. على العموم حصل خير

و الله انا كنت زيك كدة .. جربت كل الطرق ..إخفاء النتيجة أو التلوين فى الكلام .. لكن كنت باتكشف فى الآخر و شكلى بيطلع وحش .. فاتعلمت إنى أواجه مصيرى المحتوم بشجاعة مما دفعنا أن نبتكر أفكارا مثل لوحة الشرف مثلا

إيييييييييه كانت أيام ... دنيا
-------------------------

أستاذنا عصفور المدينة شيخ المهندسين

يعنى المرة اللى كنت خلاص هاتحقق مركز فى سباق الفشل الذريع .. تطلع منك أوت و تبقى الأول على المدرسة ؟؟ يبدو كدة إنك مش هاتستحق تتحط فى لوحة الشرف بتاعتنا خالص .. المواصفات لا تنطبق عليك

ftataljanna said...

بسم الله الرحمن الرحيم
نداء الى الاخ العزيز ابن حجر العسقلانى
الدواء فيه سم قاتل
زييييييييء
سوري الشريط سف اصلا كان محطوط غلط معلش

المهم

انا قريت الموضوع من كام يوم وعلقت عليه بس الظاهر ان النت عندى ماكانش مظبوط فالكومينت ما نزلش انا اتفاجئت دلوقتى حالا لانى من ساعتها مادخلتش على العموم

كلام جميييييييييييل وكلاااااام معقول كان نفسي اقول حاجة عنه
زييييييييييييييء
سوري الشريط سف تانى

الظاهر صوتى مش عاجبه :))))))))

على الله الكومينت هو كمان ما يسفش

انى واى على اى حال يعني

ان الموضوع ده مع انه فى وقت امتحانات وخلافه بس تقدر تقول تنويه حضرتك عما الت اليه احوالك فى اخر البوست كان الدواء الشافى

الدواء فيه سم قاتل الى ابن حاجر القاظن فى دير الناحس لا تشرب الدواء
زييييييييييييييييييء

مش عارفه ايه حكاية الشريط ده يا دي النية كل شوية يشتغل ويسف يشتغل ويسف مااااااا علينا

المهم ان الكلام ده حسسني انه مش مهم مهما فشلت فى يوم من لايام انى افضل عايشه فى الماضى وعلى ذكريات حزينة ايه المانع لما اتغير وابطل اعيش في المضى والمستقبل البيد اعمل الحاضر وبعدين افكر

جزاك الله خيرا وبشرك الله بالخير يااخى ابن حجر

واقرا اخر بوست عندى وبجد ده هزار فما تزعلش

3ala asm masr said...

تمانيه من تلاتين
وسته من خمسين
هو ده الكلام السليم

ammola said...

من حيث الفشل الدراسى فللاسف انا فاشلة فيه,يعنى مش حانفع معاكو فى لوحة الشرف
بس انا كنت متفوقة اوى فى التزويغ من الحصص..لازم كل سنة احط نفسى فى كام نشاط كده علشان اعرف ازوغ على حسهم من الحصص.فى ابتدائى جمباز وموسيقى تقولش أوبرا عايدة..فى اعدادى جماعة اللغة العربية وبرضة موسيقى..فى ثانوى لما ربنا هدانى الجماعة الدينية واديها محاضرات او خناقات مع الوكيلة اللى شايفة اننا متطرفين وحنخربها ونقعد على تلها..المهم اعمل اى حاجةتخلينى اهج من الفصل..وقبل الامتحانات ما تيجى ابقى اخر ادب والتزام لغاية ما العاصفة تعدى على خير.تفتكر ممكن تحطونى معاكو فى لوحة الشرف واهو كله فشل برضة

ارسم بالرصاص said...

ابن حجر .. السلام عليكم ورحمة الله وبركاته ..

ده اول مرور ليا على مدونتك وان شاء الله اكيد ح تكون الزيارات متكررة لانو القهوة عندك تبشر بالخير ..

عنوان البوست بتاعك تمام .. واللي يشوفو منو على امهات الكتب عدل ..

والله هو انا ماعنديش الحواديت دي .. سابقا لكن الله اعلم ح يكون حالي ايه حاليا مع الجامعة ااولك انا ح استنى شوية لعل وعسى .. يعملولنا اتوستراد

تحياتي ليك .. هايدي

بت خيخة وأى كلام said...

اول مرة ازورك
عجبنى اسلوبك اوى فى سرد الاحداث
دمك خفيف والله
يارب دايما من الناجحين فى اى مجال
اختك خيخة

ابن حـجـر الـعـسـقـلانـى said...

الأخت فتاة الجنة

يا أهلا يا أهلا .. إيه أخبارك؟؟ كان الله فى عونك و ربنا يوفقك فى امتحاناتك
معلش بقى حظك كدة إننا ننزل الموضوع دة فى وقت امتحاناتك.. و تماما زى مانت قلتى ..مش عشان وقعنا مرة تبقى نهاية العالم .. لأ .. لسة الجايات أكتر من الرايحات
و نورتينا

و بجد بجد انا ما توقعتش انك تتكلمى عن موضوعنا فى مدونتك الجميلة .. بجد شكرا جزيلا.. و معلش اتأخرت فى الرد علشان كانوا طاحنينا فى الشغل

و بمناسبة "الدواء فيه سم قاتل" ... الفيلم دة ما كانش ينفع يتعمل لو كان عندهم موبايلات وقتها
------------------------

على اسم مصر

أهلا بيكى ..ايوة والله كانوا تمانية من تلاتين و ستة من خمسين .. بس للأسف وقتها ماكناش لسة عملنا لوحة الشرف بتاعتنا.. دة أنا كنت هاخد المركز الأول بنجاح ساحق
------------------------

الأخت أمولة .. بتشديد الميم المضمومة

أهلا بيكى .. يا مراحب

بصراحة إمكانياتك الفشلية لا تؤهلك إن إسمك يتحط فى لوحة الشرف بتاعتنا .. إنت لسة محتاجة شوية مجهود زيادة.. لوحة الشرف دى فيها أسماء لناس فطاحل.. ساروا على درب الفشلية الإنسانية و بذلوا مجهود جبار .. و مش معقول نحط اسمك جنبهم و انت لسة ما شوفناش منك حاجة تليق بيهم

و يا رب ما نشوف اسمك وسطهم أبدا يا رب .. و نشوف اسمك فى لوحة الشرف الحقيقية
------------------------

الأخت أرسم بالرصاص .. أو هايدى
و عليكم السلام و رحمة الله و بركاته

معقولة ماعندكيش حكايات فشلية خالص ؟؟ ايه يا جماعة .. مابقاش فيه مهارات فى البلد و لا إيه .. أمال الفشل اللى انا كنت فيه دة كان ليه ؟؟
و على العموم المشروبات فى أول زيارة بتبقى من غير فلوس .. أما المرات اللى بعد كدة بتبقى مجانا

و يا رب نشوفك الأولى على الدفعة بجد
------------------------

االرائعة بنت خيخة و أى كلام
أهلا بيكى .. بجد منورانا .. حكايات شريف مش عايزة تروح من دماغى .. خصوصا إنى تقريبا مهووس زيك كدة بابن اختى .. إلى جانب إنى أنا برضه باحب النمل جدا

ربنا يخليه ليكى و يكون من أوائل مدرسته و كليته (بضم الكاف و تشديد اللام المكسورة) يا رب

و ألف شكر على إطرائك و على دعائك
منورانا دايما

Salwa said...

أحييك ع البوست
الجزء بتاع الأخ اللي استخدم طريقه المنقاش .. وطلعت الأسئله أصلا مختلفه
كان مفاجأه بالنسبه لي
مفاجأه مضحكه جدا جدا

وبجد بقى

أوقات كتير بيكون الفشل سبب في التفوق

أفتكر مرة في الجامعه
امتحان الإدارة كان مش صعب
لكن متعرفش هو إيه المطلوب بالضبط
الدكتور كان واثق من نفسه بحيث إنه وضع القوانين في ورقه الأسئله
وكده ملكش حجه
آدي الأسئله وآدي القوانين
حل بقى يا فالح
بصراحه كنت مذاكرة جامد ومتخيله إني هجيب الدرجه النهائيه
المهم
الأول ع الدفعه جاب 6 من عشره
أنا جبت 4
الحمد لله كان ده امتحان الترم الأول
وفي الترم التاني ظبط الماده
خسارة
كنت أود أن تضعني في لوحه الشرف

خالص تحياااااااتي

Salwa said...

أحييك ع البوست
الجزء بتاع الأخ اللي استخدم طريقه المنقاش .. وطلعت الأسئله أصلا مختلفه
كان مفاجأه بالنسبه لي
مفاجأه مضحكه جدا جدا

وبجد بقى

أوقات كتير بيكون الفشل سبب في التفوق

أفتكر مرة في الجامعه
امتحان الإدارة كان مش صعب
لكن متعرفش هو إيه المطلوب بالضبط
الدكتور كان واثق من نفسه بحيث إنه وضع القوانين في ورقه الأسئله
وكده ملكش حجه
آدي الأسئله وآدي القوانين
حل بقى يا فالح
بصراحه كنت مذاكرة جامد ومتخيله إني هجيب الدرجه النهائيه
المهم
الأول ع الدفعه جاب 6 من عشره
أنا جبت 4
الحمد لله كان ده امتحان الترم الأول
وفي الترم التاني ظبط الماده
خسارة
كنت أود أن تضعني في لوحه الشرف

خالص تحياااااااتي

ابن حـجـر الـعـسـقـلانـى said...

الأخت سلوى

و الله أنا كمان كل ما أفتكر الحكاية دى أفضل اضحك

و خلاص اسمك كان هايتحط فى لوحة الشرف .. لكن خلاص معلش




ربنا يكفينا كلنا شر لوحة الشرف دى

يوميات عيل مصري said...

ما شاء الله عليك
طيب تمانية من تلاتين وقلنا حلو
ستة من خمسين
الحمد لله انك طلعت الأول على علمي رياضة .. هو انت كنت أدبي؟
بن حجر
كملت حكاياتك دي تحفة
وابقى زروني
خلاص العزاء خلص

ابن حـجـر الـعـسـقـلانـى said...

أستاذنا أحمد صاحب يوميات العيل المصرى

بجد بجد .. سعيد بزيارتك لينا .. و أشكرك على إطرائك

انا ضحكت بجد على التعليق .. طبعا أنا لو أدبى يبقى بالتأكيد هابقى الأول على علمى و انا مستريح حتى لو كنت الأخير على أدبى

لكن أنا كنت علمى رياضة بجد .. حتى جبت الدرجة النهائية فى مادة الرياضيات .. و انتقمت لشرفى .. و على رأى الباشمهندس توفيق الدقن

أحلى من الشرف مافييييييييش

عاشقه الفردوس said...

ههههههههههههههههه
اضحك الله سنك اخى
انا مكنتش كده خالص
انا كنت دايما من الاوائل
للاسف طبعا
بس ماتخافوش فوقت لنفسى فى الكليه والحمد لله
وقلت فى عقلى فوقى بقى يابت علشان ماتضحكيش عليكى الناس
هههههههههههههههههه
وبرده للاسف جبت جيد جدا
ههههههههه
بوست رائع
وجزاك الله خيرا

ابن حـجـر الـعـسـقـلانـى said...

عاشقة الفردوس

منورانا والله .. لكن أنا كدة مش هلاقى حد فاشل خالص .. أمال الفشلة كانوا كتير حواليا ليه أيام الكلية ؟؟ أرزاق بقى

على العموم الحمد لله إنك ما كنتيش معانا و كنتى مع التانيين

و أهلا بيكى دايما عندنا

ابن همام said...

ايه يابن حجر مين قال مش هتلاقى فشله تانى الدنيا لسه بخير يا حبيبى
انا معاك فى اللوحة وانا الاول بالتأكيد تسع مواد ولا فخر ولا مجال للمنافسة وربنا يتوب علينا من الهم اللى اسمة الجامعة دى بقى

موضوع جميل

ابن حـجـر الـعـسـقـلانـى said...

ابن همام الهمام

انت طلعت أبو زمل أهو ... لأ ..و كمان و هاتشيل راية القيادة

تسع مواد يا راجل .. ما شاء الله .. حاجة عظمة

أنا معاك يا زعيم ..خد شيل اللواء ..و إلى الخلف ..قصدى إلى الأمام

ابن حـجـر الـعـسـقـلانـى said...

ابن همام .. انت مش شايف إن تسع مواد دى كتير شوية ؟؟ الله يكون فى عونك يابنى