Wednesday, March 19, 2008

تاج من الصباغ

التاج دة جانى من الزميل المتألق أحمد الصباغ .. بس قبل ما أجاوبه عايز أقول إن فيه لقاء للمدونين يوم السبت 22 مارس فى ساقية الصاوى الساعة حداشر الصبح .. التفاصيل هناك عند الصباغ .. و الدعوة عامة و هاتبقى لمة
معلش يا صباغ .. هاستأذنك آخد الصورة اللى على مدونتك و اللى اتصورتها فى الساقية .. عشان عاجبانى




نخش فى التاج




هل توافق على حذف خانة الديانة من البطاقة الشخصية ؟

لا أوافق على حذف خانة الديانة من البطاقة الشخصية .. البطاقة الشخصية هى وسيلة لإثبات البيانات الأساسية للفرد فطبيعى أن تتضمن البطاقة الشخصية معلومة عن ديانة الفرد .. إلى جانب أنه إن كان البعض يرى أن فى ذلك تفرقة بين أبناء الوطن الواحد من حيث كونهم مسلمين و غير مسلمين .. فذلك التفريق يعد سلوك اجتماعى خاطئ و مرفوض .. و وسائل علاجه ليست فى حذف خانة الديانة حتى نلغى التمييز بين المسلم و غيره (وسائل التمييز قد تكون كثيرة غير خانة الديانة) و إنما وسائل العلاج تكون بتدعيم الأخلاقيات السليمة التى تعتمد على أن التعامل بين أفراد المجتمع قائم على أساس أن كل واحد منهم "إنسان" له عقل و قلب و روح و مشاعر و حقوق و واجبات بغض النظر عن ديانته



ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين؟

و الله أنا معلوماتى عن الموضوع دة قليلة جدا .. و ماليش أصدقاء مثليين .. لكن فيه مرتين حصل لى فيهم مواقف مع مثليين فى الشارع (ماحدش دماغه تروح بعيد .. أنا ماحدش لمسنى .. و ماحدش يقدر لا مؤاخذة .. دة أنا كنت أقطعه .. الكلام كان من بعيد لبعيد) .. و بصراحة حالتهم كانت مزرية

و على حسب ما سمعت أن منهم من هم مرضى و أعتقد أن هؤلاء قد يصلح معهم العلاج و هم الذين يجب أن ينظر لهم المجتمع نظرة تخلو من الاستنكار و الاستعلاء حتى يستطيع الفرد منهم أن يعاود حياته الطبيعية مرة أخرى .. و منهم ناس مش مرضى .. يعنى واخدين الموضوع مزاج .. و دول يجب إن المجتمع يتعامل معاهم بحزم

بس تعالوا نناقش الموضوع بهدوءإن أكبر قضية مصيرية فى حياة الإنسان و هى قضية الكفر و الإيمان هى فى النهاية أمر شخصى .. الإنسان حر فيما يعتنق .. و أيضا فيما يفعل .. و بالفعل ذلك السلوك (أعنى الشذوذ) قد يعد "حرية شخصية" مثله مثل أى فعل يستطيع أن يأتيه الإنسان .. لكن ذلك الفعل (أعنى الشذوذ) هو معصية كبرى من المنظور الشرعى .. و هو جريمة كبرى من المنظور الاجتماعى .. فكل فرد يستطيع أن يسرق و يقتل (و قدرته هذه نابعة من كونه شخصيا حر فى الفعل) .. فلا نستطيع أن نقول أنه ما دام حرا فى هذا السرقة أو القتل فإنه لا يعاقب حتى لو كان المسروق راض بما حدث له .. و حتى لو كان المقتول كان راغبا فى الانتحار على يد القاتل

إن عبارة "حرية شخصية" تستدعى إلى الذهن أن هذا السلوك يجب أن يكون مقبولا اجتماعيا ما دام أصحابه قادرون عليه و راضون به و هذا فى رأيى أمر مرفوض تماما .. فأعتقد أن إطلاق عبارة "حرية شخصية" على سلوك الشذوذ هذا تعد كلمة حق يراد بها باطل



هل تعتقد بوجود إضطهاد للمسيحين فى مصر ؟



نعم للأسف .. فى الأفلام التى أنتجت فى النصف الأول من القرن العشرين .. و فى الروايات التى تتناول أحداث هذه الفترة و ما قبلها كنا نلاحظ أن العلاقة بين المسلم و المسيحى علاقة متناغمة جدا و لا تشوبها شائبة .. بل كنا نسمع عن أنه الشيخ الفلانى و القسيس العلانى يتجمعان فى دكان صديقهما الثالث و يأتى الرابع و الخامس ليقضون سهرة جميلة يتسامرون فيها

أما مؤخرا .. و ربما حدث ذلك بعد النكسة و أثناء ما تلى ذلك فى فترة السبعينات .. الكثير من المفاهيم تغيرت .. و أصبح – للأسف - الكثير من المسلمين يرون أن من مظاهر تدينهم هو إظهار البغض لغير المسلمين .. و للأسف أيضا ساهم فى ذلك الكثير من الدعاة و خطباء المساجد و بعض الفتاوى الانتقائية التى تم أخذها من عصور الجمود الإسلامية أو من أحداث خاصة جدا و تم تعميمها على الحاضر بلا فهم و لا روية .. فلا عجب أن نسمع من يدعوا بأننا يجب أن نعاملهم على أنهم مواطنون من الدرجة الثانية .. و لا حول و لا قوة إلا بالله




من هو الشخص الذى تختارة لرئاسة مصر ؟

على الرغم إنه شخص عسكرى النشأة إلا إنى أرشح سعد الدين الشاذلى .. بس المشكلة إن سنه بقى كبير




إذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟

لن أدعو أحدا بعينه .. و لكن برنامج الحزب سيكون معلنا و واضحا لأى مشارك يود أن يلتحق بالحزب

و بخصوص مشاركة الطوائف المختلفة .. أنا أوافق على أن كل من له كفاءة يجب أن يساهم فى الحكم بغض النظر عن قبطيته أو إخوانيته أو علمانيته .. و لكن يوضع كل شخص فى مكانه الصحيح .. أود أن أقول شيئا مهما ... أن هناك عبارة شائعة بكثرة على ألسنة المؤرخين الذين كتبوا فى التاريخ الإسلامى .. تلك العبارة تقول: "إن بلاد المسلمين كان يحكمها دائما غير المسلمين" .. و إن نظرنا إلى الكثير من الوزراء و أصحاب المناصب و أهل الإدارة و التنفيذ من غير المسلمين على مدار تاريخنا الإسلامى نجدهم عدد هائل لا يحصى و لا يعد .. فقضية مشاركة الأقباط فى الحكم هو أمر تقريبا محسوم شرعا و تاريخا طالما كانوا مواطنين أكفاء صالحين يرجون الخير للبلاد و أهلها




فى رأيك الشخصى .. ما هى أفضل مدونة على بلوجر قمت بزيارتها ؟

دة سؤال محرج يا عم .. بس ممكن أعمل حبة حركات كدة و أقول مدونة الصباغ .. شوية نفاق يعنى ... بس بجد مدونتك جميلة جدا يا صباغ و من أفضل المدونات اللى دخلتها .. إلى جانب أن هناك قدر كبير من المدونات الرائعة و اللى باتابعها دايما و تعليقاتى بتبقى عندهم




للذكور فقط : أيهما تفضل كزوجة .. إمراءه عاملة ، أم ربة منزل ؟

فى بداية الحياة الزوجية أفضل إنها تكون إمرأة عاملة .. دة لو هى عايزة تشتغل .. أما لو عايزة تقعد فى البيت فبراحتها .. أما بقى لما يبقى فيه أولاد و المسئوليات تكتر أعتقد إن وجودها فى البيت بيبقى أفضل لكن لازم فى نفس الوقت تكون هى مقتنعة بضرورة وجودها فى البيت




اذا تزوجت وأنجبت ولدين وبنتين .. أى الأسماء تحب أن تسمى ؟



الولدين : على و أدهم
البنتين: خديجة و فيروز




هل تعتقد أن توريث الحكم فى مصر . . سيتم فعلا أم لا ؟




هايحاولوا يتمموه .. لكن هاتبقى فيه مشكلة مراكز قوى



فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟



أفضل إنجاز ... الكام كوبرى اللى اتعملوا و معاهم مترو الأنفاق
أسوأ إنجاز ... بصراحة مش لاقى حاجة ينفع أقولها علنا بس الحاجات كتير .. يا خوفى من "التونجر" .. أصل التونجر دة هو الجهاز اللى بيشحنوا بيه بطاريات العربيات .. و بيطلع تيار كهربى كبير .. بس لدواعى معينة .. ممكن يستخدم فى شحن الناس نفسها .. و يا جماعة أنا مهندس كهربا و عارف يعنى إيه كهربا




و كل سنة و انتم طيبين بمناسبة العيد الكبير




أخ .. أآآ .. قصدى بمناسبة المولد النبوى الشريف

30 comments:

فرنسا هانم said...

ابن حجر استأذنك انى جاوبت التاج النبوى قبل التاج العسقلانى بتاعك
انا استأذنتك
وعموما
الحمد لله انها عدت على خير مع الموقفين بتوع المثليين
ومتبقاش تمشى تانى لوحدك
انا مش معاك فى رأيك بوجود اضطهاد دينى فى مصر

بنت الصالحين said...

وانا كمان جاوبت التاج النبوي الاول


شكلنا هننضرب
:)

اجابات دبلوماسيه ع الاخر

وحلو انه عجبك المترو زيي
بس انا اللي عاجبني في المترو السلالم المتحركه

:))


بس حته وجود اضطهاد مسيحي دي

مااعتقدش انها موجوده بالعكس
ولو فيه اضطهاد فبيبقي من الاشخاص الجهله نفسهم ودول قله وبيبقي من الناحيتين مش المسلمين بس


وسلام

جمعاوى said...

أبو العساقيل

فييينك من زمان يا مولانا

واحشنا

ايه يا عم الإجابات الجامدة دى ؟

عصفور المدينة said...

يابخت اللي بيتعامل مواطن من الدرجة التانية أفضل من كثيرين في هذا الوطن مؤمنون وموحدون لله يعاملون معاملة بلاش أقول بل ربما يعاملون معاملة أسرى الحرب وأقول أيضا :
ولا حول ولاقوة إلا بالله

د/اجدع بنوته said...

هههههههههههه

وانت طيب ياابو العساقيل

عجبنى جدااااااااا

رايك ف المثليين

وكل التاج الصراحه

الا الضطهاد برده

تحياتى

ويارب اعرف اجى ميتنج المدونين ده

سندباد said...

كل سنة وانت طيب
اجوبة جميلة تحياتي الخالصة

la3lahakhier said...

ماعرفش ليه محسسنى ان التاج ده زى سلطانية الجزيرة بتاعة الحكاية القديمة
على العموم الاجوبة تعلن عن صاحبها بكل وضوح
كل التحية

التمنياوي طه said...

يا بيه الحاجات اللي انت عاوزها دي عيييب و حرام يا بيه

و انت ايه حكاية الجزيرة معاك اسامي البنات اللي عاوز تخلفهم كلها مزيعات في الجزيرة


و خذ بالك من التونجر للكهربة تلسعك
كلماتك لو سليمة مفيش حاجة هتوجهك
:D
اشوفك كمان شوية و حضر المتين جنيه

ابن حـجـر الـعـسـقـلانـى said...

جمعاوى روش طحن

يا باشا و الله الدنيا مشاغل ... و بالعافية بالاقى وقت أرد على تعليقات الناس ..بس حلو لقب "مولانا" دة .. بيفكرنى بعصر المماليك و بعصر العثمانيين

بجد و الله زيارتك بتسعدنى مع إنى مقصر معاك ... بس بجد مشغول
---------------

sendbad

و انت بالصحة و السلامة ... و أشكرك على كلامك الجميل
----------------------

la3lahakhier

زيارتك منورانا .. و يا رب تكون الإجابات سابت أثر كويس

و على رأى المثل ... تاج و داير على الجميع
--------------------

يا تمنياوى يا طه أنا هانتقم منك .. و لما تقع تحت ضرسى لن أرحمك

بس تصدق بإيه .. أنا كنت عارف إنك هاتقول على موضوع مذيعات الجزيرة دة .. فاقسنى انت دايما

و الميتين جنيه دول عايزين نروح نديهم لـ"عون" بالطريقة المتفق عليها

و يا خوفى من التونجر .. أصل التونجر دة
current source
مش
voltage source
يعنى العشرين أمبير كلهم بتمامهم و كمالهم هايمروا فى الشخص المشحون

ابن حـجـر الـعـسـقـلانـى said...

فرنسا هانم
عاشقة الفردوس
أستاذ عصفور المدينة
دكتورة أجدع بنوتة


من ساعة ما قرأت تعليقاتكم و أنا باقلب موضوع اضطهاد المسيحيين فى مصر فى دماغى يمين و شمال ... و مش عارف أركز فى حاجة تانية .. و يبدو إنى تجاوزت

لكن أنا هاقول لكم على اللى فى دماغى و نحاول نوصف الوضع بشكل شامل

و بجد أرجو من كل المهتمين إنهم يناقشوا الموضوع معايا فأنا بجد عايز أسمع وجهة نظركم إلى جانب إنى بالفعل هاتناقش معاكم و أنا متخلى مؤقتا عن أى رأى قلته عن الموضوع دة ... يمكن توضحوا لى مواقف أو اعتبارات أنا مش شايفها

أنا كان فى دماغى شوية اعتبارات هى

ا- المسيحيين دايما عايشين فى مصر بشكل متناغم و ما كانش فيه لا تفرقة و لا فتن طائفية .. إلا مؤخرا .. ربما بعض حرب أكتوبر
ب- وضع المسيحيين فى المجتمع المصرى بقى ليه شكل غريب .. بقوا موجودين فى تجمعات تقريبا مستقلة.. الوضع دة ماكانش موجود قبل كدة .. الشركات اللى أصحابها مسيحيين .. تقريبا مش بيعينوا إلا مسيحيين .. إلى جانب إن الكنائس بقت مجمع اجتماعى تقريبا متكامل .. ملاعب كرة .. رحلات .. لقاءات دورية .. تكافل اجتماعى .. توظيف شباب .. كل دة للمسيحيين .. فبدأوا يتبلوروا فى تجمعات بعيدة عن المشاركة الاجتماعية مع باقى أبناء الوطن .. و دة فى رأيى مش نتيجة إن المسيحيين فجأة أرادوا هذا القدر من الاستقلال أو العزلة .. لكن دة سلوك هم دفعوا إليه دفعا نتيجة أمور كتير .. و اللى يلاحظ الكنائس اللى بتتبنى مؤخرا هايلاقيها مبنية بكم هائل من الخرسانة المسلحة .. لأنهم عايزين الكنيسة تكون تقريبا حصن ليهم من أى تهديد .. ذلك الهاجس الأمنى لم ينشأ من فراغ .. إنهم يشعرون داخل وطنهم بأنهم مهددون
ج- الاضطهاد اللى أقصده مش اضطهاد من الدولة للمسيحيين .. الدولة فى الغالب موفرة مساحة حرية ليهم بشكل كبير بدليل الكلام اللى مكتوب فى النقطة (ب) السابقة .. الاضطهاد اللى كنت أقصده (هانسميه مجازا اضطهاد ) متمثل فى هذا التنافر بين أبناء المجتمع نفسه من المسلمين و بين المسيحيين .. أنا سمعت كلام كتير من جيرانى و اصحابى .. كبار و صغيرين .. و ناس ما اتعاملوش مع مسيحيين أصلا .. بس عندهم أفكار سيئة عن المسيحيين حصلوا عليها بالنقل و التلقين مش بالممارسة و التجربة .. فطبعا لما واحد منهم ييجى يتعامل مع واحد مسيحى بالتأكيد هايعامله على أساس الفكرة السيئة المسبقة اللى فى دماغه
د- باسمع برضه من زمايلى إللى شغالين فى شركات مختلفة إن بعض هذه الشركات بترفض تعيين مسيحيين .. طبعا مابتبقاش سياسة معلنة لكن بيبقى شبه اتفاق ضمنى إنهم يرفضوا المسيحى أو يخلوه فى أولوية متدنية
هـ- بالتأكيد هناك سلوكيات من المسيحيين بيتبقى غير منضبطة و غير مسئولة .. لكن هنا يأتى دور ثقافة و أخلاق المجتمع .. دور تقافة و أخلاق الأغلبية
و- المشكلة إن أحيانا يتم التعامل مع موضوع الفتنة الطائفية بشكل يتعمد إلهابها و إشعالها من قبل بعض أفراد الأمن .. ربما لخدمة هدف معين أو تحقيق مصلحة يقولون أنها سياسة عليا .. و هذا أيضا يعد كارثة
ز- أثناء ما كنت فى الكلية كان فيه واحد زميلى مسيحى .. بس ماكنتش أعرف إنه مسيحى .. و كان قاعد ورايا فى المحاضرة و فجأة عطس .. فقلت له يرحمكم الله .. فقال لى يهديكم الله و يصلح بالكم ..أيوة .. رد عليا و مارضيش يحرجنى .. هل شخص بهذا الذوق و الأخلاق و الأدب ينفع أقول له انت كافر ابعد عنى ؟؟ أو أضيق عليه فى طرقات الكلية ؟؟ هل لما ييجى يقول لى صباح الخير ما أردش عليه لأنه ماقالش تحية الإسلام ؟؟

يا جماعة ... كل النقاط اللى فاتت دى هى اللى جعلتنى أقول إن هناك اضطهاد لغير المسلمين .. لكن على ما يبدو إنه مش اضطهاد .. ربما تكون الحالة الآن بعيدة بشكل كبير عن حالة السلام و الاتزان و الوئام التى كان عليها المجتمع المصرى فى فترة من الفترات .. لكن ممكن نقول إنه ما وصلش للاضطهاد .. بس أعتقد إن الوضع دلوقتى محتقن بين المسلمين و غير المسلمين .. بل و يزداد استقطابا

بجد و الله يا جماعة .. لو حد فيكم عنده رأى تانى ياريت يقوله بالتفصيل .. و بجد هابقى سعيد جدا لو وضحتوا لى جوانب غايبة عنى .. و أنا كلى استعداد أن أعدل من وجهة نظرى لأنى بالتأكيد مش عارف إلا جزء محدود من الحقايق .. و الموضوع كبير و متشعب .. فياريت تقولوا رأيكم و أنا هابقى سعيد جدا بيه

----------

الأخت فرنسا هانم

يا أخت فرنسا و الله من غير استئذان .. أنا بجد محرج منك ..لأنى ما استأذنتش أجاوب تاج الصباغ قبل التاج بتاعك ... أنا شكلى بقى وحش فى المجتمع الدولى

ammola said...

السلام عليكم
انا معاك فى النقطة بتاعت النصارى بس مش على اساس انه اضطهاد لأ على اساس ان على ما يبدو انه كان فيه ولايزال مخطط ما للايقاع بيننا وكلمة من هنا وكلمة من هناك على مر السنين بدات الازمة تزيد.جيرانى النصارى بيعتبرونى افضل جارة ليهم برغم انى منتقبة وفى نظر بعض المسلمين متشددة..صاحب المكتبة النصرانى كان يعرف ابى رحمه الله والى الان لايزال مراعيا للعشرة بمعنى الكلمة اخد له فترة كاشش منى اول ما انتقبت وبعدين لما لقى ان التعامل عادى رجع كما كان وهو رجل كبير فى السن ودايما يبادر هو بتهنئتنا باعيادنا.ومنهم النصارى المتشددين اللى لو شافونى فى اول الشارع ممكن ينتحروا علشان ما يسلموش عليا.الخلاصة عايزة اقولك انى معاك فى اننا بنساهم بجهل شديد وبقلة وعى دينى اننا نعمق الحفرة اللى بتتحفر لنا كلنا مع اننا لو ركزنا حنلاقى ان النبى (ص)اوصى باهل الذمة خيرا.بيزيد من حدة الموضوع ان بعض النصارى امثال مايكل منير و عدلى ابادير وهما ناس عايشة برة مصر اصلا بس عايزين يولعوها فينا كلنا دايما بيحرضوا النصارى على المسلمين وبيطالبوا بالغاء كل ما له علاقة بالاسلام من نظام الدولة وطبعا كرد فعل من المسلمين اللى مش طايلين الناس دى انهم يفشوا غلهم فى النصارى اللى فى مصر..يعنى الموضوع اغلبه عصبية وغباء
آسفة للاطالة بس النقطة دى مهمة اوى وعجبنى ردك فيها وان كنت اختلف معاك فى لفظ اضطهاد

الباحث عن الحقيقة said...

هههههههههههه
ههههههههههههه
هههههههههههههه
مش على التونجر
على مذيعات الجزيره
هههههههههههه
هههههههههههه

Maryama Qandil said...

salam alikom...

بصرااحة اجاابات ارفع لها القبعة...
اولا كل سنة وحضرتك بخير عشان المولد النبوي الشريف..ز

بصرااحة عجبني ااوي اجاابة المثلين...واعتبار الشذوذ حرية شخصية وطبعا مفيش حد بيتوافق مع المقولة دي الا اصحاابها...زي ما تقول لاي حد كده غلط ...كده حراام...يقولك انت مالك انا حر...دي حرية شخصية ملكش دعوة...

مجدر رد لدفااع عن موقفه وعدم تقبل الراي والشرع...
والله لسه طالعة طازة من الموضوع ده في البلوجة عندي وعجبني الرد بتاعك...بس خلاص كويس اني قريته دلوقتي واكتفيت بقدر اللباقة في ردك...

ليا تعليق على اجاابة السؤال...اعتبار المسيحين مضطهدين في مصر...الاختلاف في الراي لا يفسد الود قضية...لكن الي اعرفه من وجهة نظري انهم وااخدين من حقوقهم ما يكفيهم لدينهم المحرف...والله مش تعصب لدين الاسلام الدين الحنيف...لكن من كتر ما الواحد بيسمع ويقرء ويعرف...
اخر حااجة بتحصل في جاامعة القااهرة...منشوراات علني...وتنصير مسلمين ارتدوا عن دينااا...
وتنصير منااطق سكنية...واضهااد المسيحين الذين اسلموا...والكثير والكثير...
ده غير اثبات دينهم وتشكيك المسلمين الضعااف الايماان و الي مش خااضوا معرفة عن دينهم كثير...و و و
زي ما قولت التميز بالدياانة سلوك اجتمااعي خااطئ...واحنا كشعب في دولة وااحدة مفيش فرق بين مسلم من مسيحي...واعتقد الحقوق وااحدة لجميع...ده ان مكنناش احناا المسلمين منعوتين باهل الارهااب ومضهدين من السياسات و و ...
وبرده في الاخر...كلنا شعب وااحد وفي ارض وااحد...وربنا يعينااا

وبرده ما شاء الله اجابات دبولماااسية وراائعة بجد...
كييب اوون...:)

nigro said...

والله يا ابن حجيجير انت دماغك حلوة و بتعجبني
برافو عليك اجاباتك واقعية جدن و عاجباني
جدع
طالعلي
(:

Ahmed Al-Sabbagh said...

تسلم يا حبيبى

الاجابات فى غاية الروعة والموضوعية وان اختلفت الاراء فى بعض النقاط

لكن اجابات جميلة خصوصا ردك على سؤال اضطهاد المسيحين

تسلم يا حبيبى

احمد

Empress appy said...

ههههههههههههههه حلو اجاباتك
وكل سنه وانت طيب اخر حاجه

الساحرة said...

اجابتك حلوة وخصوصا في الردعلي المثليين
بس انا مش معاك في اضطهاد المسيحين

طبعا زي ما انت بتقول الاضطهاد مش من الدوله
الاضطهاد من فئه قليله من الناس
ناس لو يعرفوة دينهم الحق ميتعاملوش معاهم كدة والمسيحين
عملوة مجتمعات مغلقه
علشان

دة مخطط علشان بيسمعوة عن حقوق
الانسان وانهم مش واخدين حقهم
فبيخافوة وبيحاولوة يبقوة مجتمعات علشان طبعا في الاتحاد قوة
احب اقولك انا متربيه في حي شبرا اغلبه مسيحين

واعز اصدقائي مسيحين
ودلوقتي جارتي اللي جنبي مسيحيه

محستش في يوم انهم بيختلفوة عنا وبنتكلم مع بعض بكل حريه في كل المواضيع

الدين لله والوطن للجميع

اللي مضطهدين بجد هما المسلمين

تحياتي

Desert cat said...

كل سنة وانت طيب
بمناسبة عيد اللحمة هات حتة من الخروف بقى

Unknown said...

اخي الحبيب
ابن حجر
نجم كبير طول عمرك
بااتفق واختلف معاك كالعاده
بس اجاباتك جميله جدا فعلا
الا في حكاية الاضطهاد
طبعا اضطهاد النصاري
هو الاضطهاد له معاني ومفاهيم متعدده
يعني مثلا ان اقول ان الناس بتظهد النصاري بتعبيرهم عن الدين بأنهم يمقتوهم او يسيئوا معاملتهم
ودي حالات فرديه قليله
وان نقول ان هناك اضطهاد لهم في مصر اي انهم بسبب انهم نصاري حرموا احد الحقوق المدنيه او الاجتماعيه او كذا او كذا وده مبيحصلش بالعكس قد يحدث للكثير من المسلمين بل واعتقد ان معاملة المسلمين بشكل عام اسوء من معاملة النصاري واقول بشكل عام يعني مثلا لو واحد مسلم دخل اسم ممكن يترزع كام علقه ويتبهدل بعكس النصراني تجد الكنيسه تتدخل لتنقذه وده مش عيب
بس كلمة اضطهاد لااظنها تنطبق علي النصاري بل قد تنطبق علي الاسلاميين في مصر ,والمسلمين في اندونسيا والاسلاميين في تركيا والمسلمين في الفلبين والاسلاميين في فلسطين والمسلمين في نيجيريا .وهكذا
--------
وكان نفسي اقابلك النهارده بس كان عندي ظروف اشوفك مره تانيه ان شاء الله
وجزاكم الله كل خير

الـسـيـدة نـون said...

هههههههههههههههههههههه
يا جماعة انا مهندس كهربا
وعارف يعنى ايه كهربا
ههههههههههههههههههههههههه
ومالك بتقولها كدة وانت بتترعش يا عسقول

المهم
اجابتك على موضوع الحرية الشخصية
عند المثليين عجبتنى اوى

يلا سلام
اختك خيخة

حبة حاجات (ايمان) said...

السلام عليكم
اانا جايه بس اصبح
واقلك معلش انا مشوغله شويتيتن
بس اكيد هكلم بقية المدونه بتعاتك والجديد عندك

ان شاء الله
واتمنى تزورنى وتشوف الجديد

تحياتى

Anonymous said...

لو سمحت يا ابن حجر
عرفت من مدونة الصباغ انكم شفتم المدعوة خيخة
ممكن اعرف اوصافها
يعنى هل هى انسانة زينا كدة ولا هى عبارة عن ايه
وممكن اعرف هى خيخة ازاى بالظبط

Jana said...

طبعا اجاباتك كلها رائعة
وبخصوص موضوع الاضطهاد ..كان نفسى تنقل ما كتبته فى التعليقات الى التدوينة نفسها ..عشان تتضح الامور . وتظهر وجهة نظرك كما ينبغى..لأنى فعلا اختلفت معاك اولا ...ثم اتفقت ثانيا بعد ما قريت الكومنت ...

ولكن لا يزال اختلافى معك قائما فى اختيار لفظة"اضطهاد" ..قد تكون صحيحة اعتقد اذا كان السؤال ...بالعكس
:)

كل تاج وانت طيب
وخلى بالك عشان دايما ادهم بيطلع شقى ..اوى
:)

ابن حـجـر الـعـسـقـلانـى said...

Ammola

بجد بجد بجد يا أمولة ... الله ينور عليكى

أنا بعد ما قرأت تعليق الأخت فرنسا و عاشقة الفردوس و أستاذنا عصفور المدينة و دكتورة أجدع بنوتة فضلت أفكر كتير فى اللى أنا قلته .. و راجعت نفسى كذا مرة لقيت إننا المفروض ما نقولش "اضطهاد" لكن فى نفس الوقت الحالة بين المسلمين و غيرهم ما نقدرش نقول إنها بحالة جيدة

لكن انت بصراحة قلتى كام كلمة و عرضتى كام موقف بصراحة معبرين جدا .. و أنا متفق معاكى تماما
------------------
الباحث عن الحقيقة

اضحك اضحك براحتك ... مش انت ناوى تيجى القاهرة ؟؟ ... بس لما تيجى بس ... هاتلاقينى مجهز لك التونجر

و هاكهرب التمنياوى طه معاك عشان يحرم يخرج أسرارى
------------------
~rooma~

أشكرك على كلامك الجميل .. و الحمد لله إننا متفقين بقدر ما

و بالفعل .. أظن إنى تجاوزت لما قلت "اضطهاد" .. بس أنا وضحت دة فى تعليقى على الأخت فرنسا و عاشقة الفردوس و أستاذنا عصفور المدينة و دكتورة أجدع بنوتة .. لكن الوضع إلى حد ما يعتبر شائك بين المسلمين و بين غير المسلمين .. ما بقاش بنفس الصفاء و التسامح اللى كان قبل كدة .. بقى فيه شد و جذب من الجانبين .. و أى موقف بين مسلم و مسيحى بقى عرضة للانفجار بسهولة .. عشان كدة أنا قلت إن العلاقة مش سليمة بينا و بينهم .. أما موضوع التنصير .. فدة صراحة موضوع مزعج جدا .. و داخل فيه عوامل كتير جدا .. عوامل من خارج البلاد .. و من داخل البلاد .. و بيتم استغلال الظروف الصعبى لبعض الأفراد بغرض تغيير دينهم .. مع إنهم لو عندهم قدر من العقل كانوا أدركوا إن هذا الشخص الساذج الضعيف اللى هم عايزينه يغير دينه و يبقى مسيحى مش هاينفع المسيحية بمثقال ذرة و لا هايضر الإسلام بمقدار ذرة لأن الإيمان الحق بيكون دافعه القلب .. مش مدفوع تحت وطأة الاحتياج

و بخصوص المثليين .. بالفعل .. هناك الكثير يحاولون استغلال عبارة "حرية شخصية" لإعطاء الشذوذ بعض الشرعية فى المجتمع .. و يبدو إن مثل هذه العبارات بتلاقى رواج للأسف

و أشكرك على إطرائك .. و أرجو لك و لنا من الله كل توفيق
------------------
nigro

و الله يا بن نجيجير انت كلامك جميل .. و يا عم دة شىء يشرفى إنى أكون طالع لك .. و الله انت راجل زى العسل

بس خد بالك .. انت قلت إن دماغى حلوة .. بس ماعرفش انت تعرف إن دماغى قرعة و لا لأ .. أيوة قرعة .. أصل أنا باحلقها بالمكنة على طول و ماباسيبش شعرى يطول خالص .. دماغ متكلفة بقى ... تعمل إيه ... طالع لك

و ياللا .. أشوفك أمس
------------------

أحمد الصباغ

الزميل الجميل .. بصراحة التاج بتاعك تاج جامد

بس تقريبا انت الوحيد اللى متفق معايا فى موضوع اضطهاد المسيحيين .. لكن أعتقد إن الموضوع كبير و محتاج المزيد من البحث

ربنا يعيننا يابنى

بس يوم الساقية كان يوم جميل ... ربنا يديم علينا اللحظات الحلوة
------------------
appy

و انت بالصحة و السلامة .. و الف الف شكر على ذوقك و على الكلام الجميل
------------------

الساحرة

بصراحة يا ساحرة كلامك عجبنى جدا .. تماما زى كلام أمولة .. بجد و الله لما باشوف روح التسامح دى بين المسلم و المسيحى بابقى سعيد جدا .. و أنا كنت قلت فى الكام تعليق اللى فاتوا إنه يبدو إنى تجاوزت لما قلت إن فيه "اضطهاد" .. لكن الوضع يعتبر لا هو اضطهاد و لا هو تسامح تام .. هو الوضع محتقن و محفز إنه يتطور بشكل سلبى

أمر طبيعى إن فى غياب الحريات .. و وجود هذا القهر العام .. و ضيق الحياة و تكاثر المسئوليات .. و الغلاء .. و الفساد .. طبيعى إن طاقة المجتمع بدل ما توجه للتنمية .. توجه فى اتجاه آخر يجعل بأسنا بيننا شديدا

ربنا يتولانا برحمته

سعدت جدا برأيك يا ساحرة
------------------
desert cat

و انت بالصحة و السلامة يا قطة الصحراء .. بس أنا لو اعرف إن الموضوع هايتطور و يبقى مطلوب منى إنى أجيب لكم لحمة أنا كنت باركت لكم بمناسبة رمضان .. أهو كان هايبقى صيام

منورانا يا هريرة ... بس صورة القطة الجديدة دى ظريفة .. هى مش دى القطة بتاعتك ؟؟
------------------

الفاتح الجعفرى

أخى الكريم ... و الله انت اللى شخص غاية فى الاحترام .. و أنا كمان كان نفسى أشوفك لكن معلش .. فرصة تانية بإذن الله

و بخصوص النصارى .. على ما يبدو إنى تجاوزت لما قلت إن فيه اضطهاد .. و دة أنا وضحته فى تعليقاتى السابقة خصوصا ردى على الأخت فرنسا و عاشقة الفردوس و أستاذنا عصفور المدينة و دكتورة أجدع بنوتة .. أنا معاك إن فيه تكتلات مسيحية فى المجتمع .. و دة شىء غير صحى فى مجتمع كان بيضرب بيه المثل فى يوم من الأيام فى التسامح و الوحدة الوطنية .. خصوصا إن التكتل دة بينشأ فى أقلية عددية نتيجة تقلص شعورها بالأمن و الأمان

فأنا أعتقد إن الوضع محتقن بين المسلمين و المسيحيين لكن ماوصلش لدرجة الاضطهاد زى ماهو حاصل مع امسلمين فى البلاد اللى انت ذكرتها فى تعليقك
إلى جانب إنى ماكنتش أقصد بالاضطهاد إنه من الحكومة للمسيحيين .. أنا كنت أقصد إنه بين أبناء المجتمع من المسلمين و المسيحيين لأنه بيبقى أعمق و أشد تأثيرا من الاضطهاد الحكومى لأنه بيعبر عن السلوك التلقائى لغالبية الشعب ... مش مجرد سلوك من قلة حاكمة

و لما نتقابل بإذن الله نبقى نكمل كلامنا .. و سلم لى على اليعقوبى و قول له يديك الميل اللى أنا بعته ليك عن طريقه .. لأنى ما لاقيتش عنوانك البريدى على مدونتك
------------------

بت خيخة و أى كلام

هو أنا عارف يعنى إيه كهربا نظريا و عمليا .. نظريا لأنى درستها .. و عمليا لأنى فى مرة اتكهربت من كهربا تلاتة فاز .. و صباحه رعش يا سيدى

------------------

إيمان .. حبة حاجات

يا ستى مافيش زعل و لا حاجة ... دة أنا اللى مش عايزك تزعلى منى عشان مشغول جدا مؤخرا و مش متابع المدونات إلا بصعوبة بالغة

و على العموم آدينى جاى عندك أهو

------------------

Anonymous

و الله الأخت خيخة من أكثر الناس إنسانية .. و أبعد ما تكون عن الخيخة و أقرب ما تكون للمجدعة .. و لو جيت اللقاء الجاى بإن الله هاتشوف كل المدونين اللى تعرفهم و اللى ماتعرفهمش
------------------

jana

منورانا يا أخت جنى

و الله أنا كنت ناوى أعدل رأيى فى التدوينة نفسها بس لما الناس تناقشنى فى التفاصيل لأنى كنت أود إن كل الناس توضح وجهة نظرها أكتر و يوضحوا النقاط المهمة اللى كونوا على أساسها رأيهم .. و على العموم أنا مستنى .. إلى جانب إن الموضوع متشعب و محتاج إنى أدور وراه أكتر عشان أستقر استقرار نهائى على رأى

بس و الله انتى أول حد يعلق على أسامى الولاد .. أنا قلت خلاص الناس مش عاجبها الأسماء اللى أنا اخترتها

و كويس إن أدهم يطلع شقى ... عشان يبقى يغلب أبوه ... اللى هو أنا

Anonymous said...

السلام عليكم
انا متفقة في كله الا الاضطهاد دي
انا جاوب التا ج دة
وقريب هجاوب التاج بتاعكوا معلش بقى
كل عام وحضرتك بخير

Empress appy said...

عسقول نداء من l.g
عاوزاك كاتبه رساله فى مدونتها والنبى ابقى روح لها

البنت الشلبية said...

حلو التاج وانا جيت ماتخرة كالعادة
وعشان كده هاخد على حسابك
سنكوتشين كبدة وحلبة حصى
وشيشة حمى كمان
:)
دمت بخير

Asmaa mahaba said...

هههههههههه هل تعتقد ان مصر لبست الطاقيه وبقيت ارض الملوخيه
تحياتى ليك سومه_87

رئيس جمهوريه نفسى said...

عسقول
يبققى امشى بحراسه يا رئيس وانت رئيس وزراء دوله عسقلنيا الكبرى
المهم عجبتنى قوى اجابتك على التاج وخصوصا فى موضوع الحزب والمشاركه فى الحكم بتبين انك انسان معتدل جدا فى تفكيره

بنوته مصرية said...

شغااااااال هههههههههههههه

ردك علي المثليين ضحكني اووي فكرني بالموقف بتاع شغال ده

اجاباتك حلوة اووي

وكل سنه وانت طيب يا باشا

نشوفك علي خير ان شاء الله

رودي