Wednesday, May 7, 2008

مشايخ السلفية والقنوات الفضائية


ان يستضيف الاستاذ عاطف عبد الرشيد مدير قناة الناس الداعية الاسلامي عمرو خالد
فهذا حقه
ان يعود برنامج صباح الايمان الذي يقدمه الدكتور احمد عبده عوض بناء على طلبات جماهير قناة الناس
فهذا شأن اداري من حق القائمين على الادارة
انك - ايها الشيخ السلفي -ما يعجبكش اسلوب عمرو خالد ..ده حقك وافادكم الله فقد سمعنا انكم راسلتموه سرا وعلانية بالنصح والارشاد
لكن لما مدير القناة يستضيف شخصية دعوية مثل عمرو خالد ومن اجل الحديث عن حملة مكافحة الادمان وليس دفاعا عن اغنية يقدمها تامر حسني في تتر برنامجه
او يعيد برنامج صباح الايمان بناء على طلب الجماهير اللي بتستمع لكم رغم اعتراضكم على التوجه الصوفي والروحاني للدكتور احمد عبده عوض
كل هذا يجعلنا نسأل : هو فيه ايه يا شيخ محمد حسان انت والشيخ محمد حسين يعقوب وشيخنا المحدث ابو اسحاق؟؟
سبق وفرضتم رأيكم على القناة وتسببتم في طرد مذيعات القناة اللي كانوا بيقدموا برامج الاطفال
وعايزين تحددوا للقناة ايه اللى يعرض على الناس وايه اللى يتمنع ولا يعرض
انا بصراحة مش عارف المشايخ دول عايزين ايه
عايزين يفرضوا مذهبهم وفكرهم على الناس ويعملوا زي باباوات الكنائس القديمة لما كانوا بيفرضوا اقوالهعم الدينية على الجميع
ومن لا يؤمن بها يضطهدوه ويكفروه ..ويعاقبوه
اما باباوات السلفية في مصر فهو يقاطعون القناة ومن اجل ماذا؟
من اجل عدم احترامهم للرأي الاخر الديني
اعتقد كده المسألة بالنسبالي على الاقل بقت واضحة
دي مش غيره على الدين يا جماعة زي ما هم واتباعهم بيصورا للناس ..لللى حصل ده انهم عملوا رباطية وقالوا للراجل مدير القناة يا تمشي على مزاجنا وتكون زي الخاتم في صباعنا ..يأما هنسيبهالك تغرق ..وورينا هتعدلها ازاى..دي هي مش كان شعارها شاشة تاخد للجنه من وقت من انضمينا لها ..طب ادي احنا ماشيين وواخدين الجنه معانا
ورينا انت هتجيب جنة للناس منين
ده اسلوب الضغط الاستعلائي المتكبر الذي يمارسونه في قناة الناس
يمارسون ارهابا فكريا على مدير القناة ولما الراجل استضاف عمرو خالد علشان يتكلم عن مكافحة المخدرات ..اصبح عاطف عبد الرشيد راجل مهزء وبتاع فلوس وعدو للسلفية وراجل خاين مش له مبدأ دي هي الاوصاف اللى اتقالت على عاطف عبد الرشيد في منتديات السلفية واتباعها
طبعا الشيخ محمد حسين يعقوب رجع
وقيل تبريرا للرجوع انه حفظا على التيار السلفي للقناة
قصدهم يعني ما يعطيش فرصة للمذاهب التانية ويفضلوا خانقين في زمارة عاطف عبد الرشيد
الجماعة اللى هم بيسموهم مشايخ السلفية دول ..واللى مفيش فيهم واحد ازهري
وسبحان الله ائمة السلفية في مصر مفيش فيهم حد ازهري وده لان الازهر هو منارة العلم الذي يؤمن بالتعددية وعدم احتكار اي المذاهب للحق دون الاخرى
وهم كمذهب وكفر باطل وليس له حجه
لان عندنا التقليد في العقيدة باطل
التقليد في الامور الاجتهادية مذموم كما اثبته ابن القيم عن المذهب الحنبلي إلا للضرورة وهي عدم وجود المجتهد
وابن القيم قال فرق بين التقليد وبين الاتباع
حاضر يا عم الشيخ
اذا كان على الاتباع طيب هم كانوا بيجتهدوا
سلفييين الايام دي لا بيجتهدوا ولا بيعملوا حاجه غير النقل من كتب فقه عفا عليها الزمن وتحتاج جميعها الى مراجعه
لاننا جميعا قريناها غلط ..قريناها كأنها نصوص مقدسه بينما اصحابها كانوا اول الناس الذين يتركون رأيهم اذا علموا الحق عند غيرهم
هكذا فعل السلف الصالح
مش عايز اتشعب بيكم لكن عايز اقول
ان هؤلاء المشايخ استغلوا الرقائق والمواعظ عن حياة الصالحين في تمرير فكرهم الى الناس
واستغلوا توافر تقنيات الاعلام الحديثة في ذلك
بينما لا يوجد لهم اي اثر فكري او مذهبي يجعلهم قادرين على مواجهة طالب ازهري في اخر سنة كلية الطب
واظن الباشمهندس بتاع الهاردوير عسقول بعت للكتير منكم بحث ينتقد فيه مفهوم الوطنية عند الشيخ محمد اسماعيل المقدم
مهندس هاردوير يعمل كده امال لو كان زاكر في ثانوي ودخل حقوق زيى كان عمل ايه
هههههههه

ديك النهار ..حلوه ديك النهار دي

كان جماعة السلفيين طابعين فتوى الشيخ عطية صقر عن شم النسيم في كتيبات توزع على الناس مجانا

كان كتيب صغير شفته مع ابن حجر- مش كان مجاني برضه يا عسقول ولا ايه؟ .سبحان الله

طيب ادي جزء من فتوى الشيخ عطية صقر عن السلفية
المفتي
عطية صقر .
مايو 1997
المبادئ
القرآن والسنة
السؤال
توجد الآن جماعة تطلق على نفسها اسم السلفية ويقصدون بهذه التسمية الرجوع إلى الأيام الأولى للإسلام ، ويقاطعون كل شىء جديد بتهمة
أنه بدعة، لم تكن أيام السلف ، فما حكم الدين فى ذلك ؟
الجواب
والسلف الصالح ينبغى أن نحترمهم لأنهم خير القرون التى تلت قرن الصحابة واحترامهم يكون بالاقتداء بهم فى سلوكهم ، أما منهجهم الفكرى فلا يجب التزامه فى كل شىء، ونحن نعلم أن السلف والخلف مختلفان فى موقفهم من الآيات المشتبهات التى فيها إثبات اليد والعين لله ، فالسلف يؤمنون بها على ظاهرها مع اعتقاد أنه سبحانه ليس كمثله شىء، والخلف يؤولونها على معنى القدرة والعناية، أى بما يلزم هذه الأشياء وجاءت المقولة فى ذلك عند علماء الكلام : مذهب السلف أسلم ومذهب الخلف أحكم .
والإسلام لا يرضى التعصب لأى فكر ما دام هناك ما يخالفه ، وهذا ما ينبغى مراعاته فى الآراء الاجتهادية بوجه عام ، وإذا سلمت العقيدة فلا ضرر فى الأمور الفرعية أن يقتدى فيها بأى مذهب من المذاهب المعروفة

..........................
الموضوع ده جايز يفتح شهتى على الحديث عن السلفيين وده هيخلينا نفتح ملفات كبيره في فقه الصحابة وسننهم

واختم بفتوى للامام عمر بن الخطاب ذكرها ابن القيم في اعلام الموقعين وده بيؤكد ان محدش فيهم بيقرأ

قال
السنة ما سنه الله ورسوله صلى الله عليه وسلم ، لا تجعلوا خطأ الرأي سنة للأمة

يعني بيحذر انن نجعل المسائل الاجتهادية اللى افتى فيها الصحابه سنة للامه ..وذلك لاحتمال الخطأ فيها

ومحدش يقولي الصواب في اجتهادهم اقرب من الخطأ.. لان احتمال الخطأ او شبهة الخطأ وحدها كافيه لجعل الاجتهاد غير ملزم

37 comments:

la3lahakhier said...

الله الله ايه الحكاية
انت فاتح النار ليه كدا ياحاج
هو انت بتسمع قناة الناس ؟؟؟
بصراحة انا معنديش تلفزيووووووو


بجد
قد نختلف فى الاتجاهات والاراء لكن لازم مافرعش الامور وندى فرصة من خلال التهكم اننا نخليهم يسيبوا الموضوع الاساسى ويدخلوا فى اسلوب الكلام ويدعوا القضية

بص انا شخصيا لايعنينى اى من شيوخ القناة ولا شيوخ الازهر ولا حد ارى ان العز ابن عبد السلام ليس بيننا الان وان كنت احترم جدا واقدر كتير من شيوخ ومشايخ الازهر السابقين فمنهم عبد الحليم محمود رحمة الله عليه وهو من احب مشايخ الازهر الى قلبى وعقلى
لكن فى قصور فى منهجية الدين عندنا ومصر ماهياش ماشية على منهج واضح يحدد للناس حياتهم ولذلك تجد تهبيشا فى الفتاوى بدون مراعة التلفيق فى المذاهب
انا مع المذاهب ومع المنهجية ومع اننا بدون سبيل واضح الماعالم حنتوه
المذهب لى هو المنهج الذى لن يدع لنفسى المجال لتفلت والترخص والاستهبال حتى وان كان عفا على المذاهب الزمن لكن انا شايفة انها مازالت تحمل كتير من اللين ويمكن تعايشها مع واقعنا الحالى كما فعل الشيخ احمد المصرى مع الفقة الشافعى حين مرر منه مايناسب الزمن الحالى دون ان يخالف المنهج الاساسى لشيخى الامام الشافعى رحمة الله عليه

ان للعلم لنور وحلاوة تجدها ويراها كل ذى قلب حى

دعنا لانفتت فى كيان هذه الامة فلنحتلف لكن لانتفرق ابدا ااااااااا
كل التحية

الساحرة said...

انت محتل الصحيقه والاستراحه
انا تابعت قناة الناس

لفترة لفيتها

قناة ملاكي لبعض الشيوخ


اللي بيحاولوة يفرضوة ارائهم

في النهايه بطلت اتفرج

اريح هههههههه

عاشــــــ النقاب ـقــــة"نونو" said...

السلام عليكم
تعرف حضرتك ان هو دة الفرق بينا وبين اعدائنا احنا على طول اي خبر من هنا ولا هناك نطيح في بعض واعداء امتنا فورا فورا عارفين مبدا فرق تسد دة ويقعدوا يتفرجوا علينا
طيب انا كمان زعلت واتضايقت لما سمعت الخبر دة وقلت ان مافيش وقت لكدة بس برضه عقلتها شويتين هل الناس دي فاضية للعب العيال دة
اعتقثد لا لان الرسالة اهم
طيب هل هم ما ظهروش على قناة قبل قناة الناس كان بيجي فيها عمرو خالد قبل كدة
طبعا لا ظهر الشيخ حسان في برنامج على المحور ايام موضوع الدانمارك الاول والشيخ يعقوب كان له برنامج على المجد
ملاكي او غيره طب ما نقول لو هما عملوا كدة فعلا مكمكن يكونوا غلطوا وتراجع مثلا الشيخ يعقوب ورجع نقوم نقول شفتم بصوا اهو رجع قال ايه علشان خايف للمنهج يضيع
طب مش غريب دة طب حضرتك عاوز ايه طيب؟؟؟
ايه في كلامهم بيقول يخالف العقيدة
سلفي يعني ايه طيب في وجهة نظرك؟؟؟
مش مسلم يعني ؟؟؟
طب مين قال لحضرتك انهم غير دارسين ودراستهم هشة
طيب الازهر دلوقتي بيعجبك وبيعجبك اراءه وفتاويه اللي زي النار ؟؟؟
طيب هو الازهر دلوقتي بقى زي زمان ولا بقى حكومة على الاخر ؟؟؟
حضرتك بعد كل دة انا ليا عندك طلب اخير
المفروض في وجهة نظري الشخصي ان المسلمين نفسهم ما يكونوا سيف مسلط عليه
دول علماء ودارسين واتاكد بنفسك بيساعدونا على تلقي العلم لا ننكر ان فيه دخلاء على العلم الشرعي هذه الايام لكن الحمد لله القران والسنة موجودة وممكن التاكد من اي شيء بسهولة ومن المتخصصين فالحويني محدث وهناك غيره
يا اخي العلم بيقبض بقبض العلماء مش بنسيانه فالعللماء ورثة الانبياء وايه المانع اما يكون هناك من يحاول ردنا لزمن السلف الصالح
اعتذر على الاطالة لكن انا مش مع تدوينتك دي خالص من باب مش احنا اللي نطعن نفسنا بنفسنا
امال اعداء الدين يكبوا ايه بس
تقبل رايي بدون زعل
تحياتي

ابن حـجـر الـعـسـقـلانـى said...

ازيك يا باحث
كنت عايز أكلم الأخت
nonoymm


بس قبل ما أكلمها عايز أقول لـ"الساحرة" إنى اعتذر عن عدم ردى على تعليقها فى التدوينة اللى فاتت لأنى كنت مشغول و مازلت مشغول بس قلت آخد أجازة لمدة ربع ساعة

نيجى لأختنا عاشقة النقاب
كيف حالك يا أختنا العزيزة .. أرجو لك كل خير لك و لأسرتك

أستاذتنا الكريمة .. نحن كأمة فى أمس الحاجة إلى التلاحم و الاتفاق و نبذ الفرقة و التعاون فيما اتفقنا عليه و التماس العذر لبعضنا فيما اختلفنا فيه
و أنا أتفق معك تمام الاتفاق فى ذلك الأمر

و لكن علينا أن نحدد عدة أمور

فكر التيار السلفى المعاصر هو فكر قائم على التميز و البروز عما حوله من أفكار و تيارات و ليس قائما على الاندماج و الإضافة لما هو قائم من أفكار و تيارات

التيار السلفى المعاصر هو يدعى و يقول أنه امتداد لمدرسة أهل الحديث (المدرسة السلفية الإسلامية العظيمة) التى تزعمها الإمام أحمد بن حنبل (كل الدعاة السلفيين حنابلة تقريبا) و ظهر فيها بعده شيخ الإسلام بن تيمية .. فى حين أن هناك فارق ضخم بين طريقة التفكير عن هؤلاء العلماء الأجلاء و بين طريقة تفكير المعاصرين .. الإمام أحمد بن حنبل و شيخ الإسلام بن تيمية و تلميذه بن القيم كانوا من أكثر الناس استيعابا لآراء الآخرين المخالفين لهم .. أما هذا التيار السلفى المعاصر فهو يظهر فى صورة منغلقة على نفسها بشدة رافضة لكل ما هو مخالف

التيار السلفى المعاصر لا يعد امتدادا للمدرسة السلفية الإسلامية العظيمة .. بل هو حدث طارئ نتيجة ظروف كثيرة كان نتيجتها أن ظهرت حالة من التحزب و الاستقطاب بن أهل التيار السلفى و غيرهم

فإن كنا نتوجه بالنصيحة إلى أحدهم بأن يلم الشمل و يرأب الصدع فأحرى بنا أن نتوجه لأهل التيار السلفى فهم أولى بذلك

يتضح ذلك فى عدة أمور أذكر لك بعضها

ا- أهل التيار السلفى سواء كانوا من العلماء أم من المريدين هم ناس يتمسكون بمجموعة محددة من الآراء و الأحكام سواء فى أمور الأصول و العقائد أو فى أمور الفروع .. و هذه المجموعة من الآراء و الأحكام يطلقون عليها أنها هى الفهم الحقيقى للقرآن و السنة بفهم سلف الأمة .. و من خالفهم فيها فهو إما ضال أو مبتدع أو ما إلى ذلك من الصفات .. فى حين أن القرآن و السنة إن طبقنا عليهما القواعد الأصولية فى استنباط الأحكام نجد الكثير و الكثير منها ظنى الدلالة بحيث يحتمل الأمر الواحد عدة أحكام و كلها صواب .. أما هم فأخذوا بعضا من هذه الأحكام و تبنوها قائلين أنها هى الدين الصحيح و ما دونها مرفوض .. من هنا نجد أن الرأى الآخر دائما مرفوض لديهم .. و الأمثلة على ذلك كثيرة جدا يضيق المقام بها هنا

ب-الفقرة السابقة كانت فى أمور الدين .. أما أمور الدنيا و التى يحتمل الصواب فيها العديد و العديد من الأوجه فإنهم أيضا اتخذوا من آرائهم فيها مرجعا رافضين كل ما دون هذه الآراء متهمين المخالفين بنفس التهم بين الضلال و الابتداع و ما إلى ذلك .. فأيضا فى أمور الدنيا نجدهم يرفضون الآخر بشكل كبير .. و الأمثلة على ذلك أكثر من أن تحصى

ج- أستاذتنا العزيزة .. أنا متابع للكثير من الخطب و الكتابات لكبار دعاة السلفية .. و أستطيع أن أقول أن لهجة الاستخفاف بالآخر و الاستعلاء عليه متكررة بشكل كبير .. ففى إحدى الدروس لأحد الشيوخ ضحك الشيخ و تضاحك الحضور على الشيخ محمد الغزالى رحمه الله

د- الأزمة التى أحدثها التيار السلفى بفكره فى الحياة الإسلامية المعاصرة أزمة كبيرة تسببت فى الكثير من المشاكل و قد ألفت فيها الكثير من الكتب تتناولها من جوانب كثيرة .. و على رأى من ألفوا فى ذلك الأمر هو الشيخ الدكتور يوسف القرضاوى و الشيخ الدكتور محمد سعيد رمضان البوطى .. لو أردت أن أعطيك عناوين بعض هذه الكتب فأنا مستعد

هـ - لو تذكرتى ما قلته لكى حول "رفض الآخر" و "الاستعلاء" و "التمسك بقائمة محددة من الآراء" ستستطيعين أن تفسرى الموقف الآتى بشكل مناسب
أهل التيار السلفى خرجوا بشىء غريب ألا و هو أن الأشاعرة و الماتريدية ليسوا من أهل السنة و الجماعة .. و توالت اتهامات الضلال و الابتداع على كل الأشاعرة .. كل هذا لأن لهم آراء تخالف مدرسة أهل الحديث التى تزعمها الإمام أحمد بن حنبل و بعده بن تيمية و بن القيم .. و تم استدعاء صراع فكرى قديم كان يدور تحت مظلة الإسلام ليجعلوه قائما الآن و لكن جعلوا الإسلام يظلهم هم فقط و اتهموا غيرهم أنهم مبتدعة و أهل ضلال
هل تعرفين أن أغلب علما الأمة هم من الأشاعرة
الجوينى و الباقلانى و الغزالى و السيوطى و الرازى و النووى و بن حجر و العز بن عبد السلام و مئات العلماء هم أشاعرة
كل اهل الأزهر أشاعرة

إن كان هؤلاء أهل ضلال .. فمن يكون من أهل السنة و الجماعة؟؟

إن تعبير "أهل السنة و الجماعة" لم ينتشر إلا على أيدى الأشاعرة

أستاذتنا الكريمة .. إن "رفض الآخر" يعد خصيصة أساسية من خصائص التيار السلفى الحالى .. و قد تناولنا فى مدونة الصحيفة الكاشفة الكثير و الكثير من المواضيع التى تناولت ذلك الأمر .. و حادث قناة الناس يعد حادثا متناسقا مع أفكارهم .. و مناقشتنا لذك الأمر هى فى سياق مواضيع تناولناها و مازلنا نتناولها حينا بعد حين

أستاذتنا الكريمة .. أرجو ألا يعتبرنا أحد أننا من الذين يحبون الجنازات فيشبعون فيها لطما .. لأننا لنا وجهة نظرنا المستقلة و التى ناقشنا من خلالها الكثير من آراء التيار السلفى منذ زمن طويل و لم ننتظر مثل حادثة القناة الفضائية لنثير زوبعة أو لنزيد النار اشتعالا .. فنحن حاولنا أن نضع حادثة قناة الناس فى سياقها الطبيعى كما ظهر مما سبق أن شرحته لك

أستاذتنا الكريمة ..هناك الكثير من الآراء و الأحكام التى يتبناها التيار السلفى تعد من لآراء و الأحكام التى ألتزم أنا شخصيا بها .. و لكن المسألة فى رفض الآخر

الكثير من شيوخ التيار السلفى هم علماء أجلاء و غزيرو العلم و لا يدعى أحد غير ذلك و لكن المشكلة فى الاستبداد بالراى

التيار السلفى منتشر و مؤثر بشكل كبير و يشارك بشكل كبير فى الصحوة الإسلامية الحالية و لكن العبرة تكون باستيعاب الآخر و ليس نفيه و استنكاره

لا أدرى هل وصلك المقال الذى كتبته مناقشا فيه رأى الشيخ الطبيب محمد اسماعيل المقدم حول أمر الوطنية أم لا .. ففيه يتضح الكثير من خصائص منهج التفكير عند أهل التيار السلفى

معذرة أختنا على الإطالة

عاشــــــ النقاب ـقــــة"نونو" said...

جزاك الله خيرا اخي على ردك علي ومناقشتي
والله يا اخي انا رأيت خطب في جوامع على النت لخطباء للا اعرفهم لكن رأيت ما توصفه من رفض للاخر وتهكمه عليه من على موقع صوت المسيحي الحر
وهذا ما يحزنني ويجعلني اتاكد من وجهة نظري بان المستفيد هم اعداء هذا الدين وربما لنظرتي لعاللمي الاخضر ارى ان ما تذكره عن ااستبداد الراي وتسخيف الاخرين من بعض السلف من الممكن ان يكون من قلة منهم وليس الاغلبية فاكثرهم نحسبهم على خير ونراهم يستعملون الكمبيوتر والانترنت
ولا اعرف عن موضوع الاشاعرة الكثير لكني اصبحت بحق في امواج متلاطمة فانا ابسط مما تتتخيل وكنت اعتقج ان ديني هو الاسلام ورسولي هو محمد صلوات ربي وسلامه عليه ولزم علي اتباعه ولا اعرف ان هناك فئات وفرق وجماعات الا عندما دخلت الانترنت يعني من سنة وبس كانت الخطب والبرامج اللي بشوفها باعتبرها كلها دين ومافيش فيها خلاف لكن للاسف طلعت بحلم والامة عمالة تتشتت
اخي لعلمي ان حضرتك تحب دينك تقدمت لحضرتك بالنصح لاني خفت تقع في منطقة اللي بياخده كلام المسلمين عليهم ويقولوا اهم بيقولوا على نفسهم
فعذرا ان كنت زعلتك فهو حرص مني لاخي المسلم
والموضوع اللي حضرتك اشرت اليه هقراه باذن الله وابحث اكتر وموضوعي اللي اشرت حضرتك ايه بجملة جنازة ويشبعوا بيها لطم دي استعارتها من المدونة اللي كتبت في نفس ذاك الموضوع ولا اقصدك بها فانا اعلم حرصك يا اخي
نفعنا الله واياكم للخير ووحد صفنا وسدد خطانا يارب العالمين
تحياتي وتقديري

ابن حـجـر الـعـسـقـلانـى said...

أختنا العزيزة عاشقة النقاب

أنا آسف لم أكن أقصد أن أتسبب فى تعقيد للأمور

نعم .. إن ديننا بسيط و هو دين الفطرة

و ما دمنا نلتزم بأحكام الإسلام فنرجو من الله قبول العمل .. سواء أخذنا هذه الأحكام من أزهرى أو سلفى أو غير ذلك .. فكلهم يعمل لخدمة الدين

و طالما نحسن الظن بالآخرين و نستوعبهم و طالما نحمل فى قلوبنا الود لسائر المسلمين باختلاف مذاهبهم .. فالأمة ستتحرك إلى الأمام بإذن الله

عصفور المدينة said...

طيب لا تنسوا تحديد النية

الباحث عن الحقيقة said...

لعلها خير
ريحتى كويس انك مش عندك تلفزيون
معاكي حق بخصوص ان الناس ممكن تمسك في الاسلوب
بس انا لما بتخنق من حد بستخدم اسلوب التهكم بكل تلقائي غير محضر سابقا
لا علماء الازهر ناس افاضل جدا
واستاذه كبار جدا
ومش علشان فتوى طلعت من هنا ولا من هنا من واحد منهم يبقى المؤسسة كلها غلط
بالعكس انتى عندك ناس افاضل جدا بس للاسف الاعلام مش بيركز على حد فيهم إلا لما يقول فتوى شاذه
طبعا الشيخ عبد الحليم محمود العالم العلامة لا احد ينكر ذلك ..لكن كان هناك ايضا المرحوم محمود شلتوت ..يا سلام على المتعة الحقيقية وانتى بتقرى في الفتاوى او في التفسير للشيخ شلتوت
استاذ استاذ استاذ
والشيخ سيد سابق وكتابه الذي يعد مرجع كبير لجميع طلبة العلم على ما فيه من عدم دقه في تخريج الاحاديث ولكن هذا ليس بقادح في الكتاب
والشيخ الكبير جاد الحق والشيخ عطية صقر الله يرحمهم
وحاليا العلامة يوسف القرضاوي ..وعدم معرفتنا بالكثير من علماء الازهر هو الحقيقة بسبب غياب الاعلام عنهم
- بسم الله ما شاء الله بتتكلمي عن التلفيق
بصي هو التلفيق مذموم عند اكثر اهل العلم
لانه مثلا بيقول انه بيجعل من المسألة الواحده صحيحة في جزء منها عند مذهب وباطله في جزء اخر عند نفس المذهب ولا هي شرقية ولا هي غربية ولا لها اب من المذاهب
وهذا كان معيبا في زمن التمذهب
ولكن لو نظرنا لحقيقة التلفيق نجد انه صحيح شرعا
فالوضوء على المذهب المالكي مع مسح بعض الرأس عند الشافعية ان جعل الوضوء باطلا عند مالك او عند ابو حنيفه لكنه صحيح شرعا لانه استند الى الكتاب والسنه واجتهد في كل جزئية منه واخذ بسند صحيح
فصح وضوءه على شريعة الكتاب والسنه وبطل عند المذاهب
- الفقه القيدم نعم فيه ليونه
هي ليونه الاجتهاد
فقد خالف اصحاب ابي حنيفة شيخهم
وخالفهم عيسى بن أبان
وهكذا في كل مذهب نجد المتأخرين يخالفون المتقدمين في بعض المسائل
وهذه هي المرونه التى نطالب باستمراها اى استمرار الاجتهاد

الباحث عن الحقيقة said...

الاخت عاشقة النقاب
اهلا وسهلا بحضرتك
وسعيد برأيك وحوارك مع ابن حجر
المسألة مش اننا بنقطع فروة بعض او عايزين جنازه ونشبع فيها لطم
وليه احنا كمسلمين بنعمل كده طب اعدائنا يعملوا ايه؟
دي قراءة حول احد التيارات الدينية ووجهة نظر من حقنا نبحث وننتقد
والنقد بيقوي مش بيضعف
لان لو فيه خطأ بيكشفه
ولو فيه صواب بيوضحه ويبرزه ويقويه

********************

عسقول
هفضل لغاية امتى اقولك ان تعليقاتك اقوى من مواضيعك
مش قصدي طبعا اذم موضوعاتك
بس انا سبق وقلتلك قبل كده بحس انك بتاخد راحتك اكتر في التعليقات
رغم انك مش بتكون محضر لها غالبا
يكونش العيب في التحضير
هههههههههه

***************
استاذنا عصفور المدينة
الاختلاف في الرأي لا يفسد للود قضية
وبعدين هوصل رسالتك لابن حجر
جدد نيتك يا عسقول
ولا قصدك يحدد نيته
عموما هو هيتصرف
بالمناسبة الاسلوب التهكمي ده لاني رافض اللى حصل من المشايخ دول من مبدأ اخلاقي ومش من مبدأ اختلاف فكري
ده عمل لا اخلاقي في وجهة نظري
تخيل نفسك مكان الحاج عاطف
تخيل نفسك مسئول وفجأة تلاقي تمرد بيحاول يهزك قدام الناس لسبب انهم عايزين يكون لهم السيطره على كل شئ
يأما ..سمعنى احلى سلام اودعك
تحياتى للجميع

صيد الخاطر said...

" ان جاءكم فاسق بنبأ فتبينوا "

عارفين ياخوننا
لو اتبعنا منهج المحدثين في تتبع الاخبار والاستيقان من قائلها

هنرتاح في حاجات كتير

لكما خالص تحياتي

وخلونا نشوفكم
تقلانين علينا ليه

صاحب المضيفة said...

انت لوقعدت تناقس وتدور ورا كل واحد بالشكل ده هاتتعب


لكن فعلا انا مش مصدق ان الشيخ محمد حسان يعمل كده لأني باعتبره أنور عقل فيهم بصراحة


ربنا يهدي الجميع للخير والصواب

المشكلة يا أخي الكريم ان التيار ده بيحاول يحتكر الطريق لحاله ومنفرد بذاته مع وجود نقص واضح في الرؤية له كان من أثارها تغيير الفكر عندهم بدرجات كبيرة ظهرت بعد تواجدهم على الفضائيات وانصدانهم بمدى التغيير الحادث في المجتمع وما يجتاجه من اصلاح وتهذيب بطريقة الحسنى بعد أن كانوا يحصروا انفسهم في قوالب معينة ومغلقة على أنفسهم فقط


أسأل الله لنا ولهم الهداية


تحياتي

Unknown said...

السلام عليكم
اخواني الاحباء الباحث وابن حجر
انا معكم ان ما حدث كان موقف خاطيء ولكن اسلوب التعميم مرفوض حتي لو فعل الشيوخ الافاضل هذا الموقف لانعمم علي مهج بالكامل ولاحتي ننقص من حق هؤلاء الشيوخ لما لهم من فضل وعمل للدعوة الي الله وان حدث اختلاف
جاء رجل الي امير المؤمنين علي بن ابي طالب قال له انترك طلحة والزبير ونقاتل معك؟!!0
فقال سيدنا علي "ياهذا اعرف الحق تعرف رجاله ولاتقس الحق علي الرجال"
يعني بشكل عام مهما حدث خطأ لانعمم المسأله
-----
غير انه يا اخي الحبيب لانريد ان نعيد تلك الخلافات التي عذبت الامة سنين طويله اتعلم كان في الماضي خلاف المذاهب الاربعة ,علي الرغم من ان الائمة الاربعه كانوا من اكثر الناس تقبلا للخلاف والمناقشة ولكن العمليه فيما بعد اخذت شكل عنصري حتي وصل الامر الي الاقتتال بالسيوف احيانا ,وروي انه وصل الامر في بغداد احيانا ان تقام 4 جماعات في المسجد الواحد لكل مذهب جماعة
-----
ثم الخلاف بين علماء الازهر ودار العلوم في اوائل القرن الماضي وتبارزوا وبذلوا مجهودات في وقت كانت الامة احوج ماتكون الي صرف هذا الجهد في تعليم الناس وتفقيههم ,ثم ها هو الخلاف المستمر بين علماء الازهر وعلماء السلف
-------
وحتي لانتناسي هناك الكثير من اخواننا السلف ازهريين اصلا فعندك مثلا الدكتور خالد صاحب مدونة مصر المأروصة رجل سلفي وازهري ,فلا تناقض اذا من الاصل وهذا قياس من وجهة نظري خاطيء اذ كيف وضعنا او قمنا بقياس منهج مع مدرسة لتدريس العلوم!
ولاينكر احد فضل الازهر بل لعلي اراه منارة العلم بحق ومازال قائما يشع نور علي رغم مايتعرض له من مؤامرات شديدة
ثم ان مشايخنا السلفيين ينتمون الي المدرسة الوهابية ولاشك هي من اعظم المدارس علي الرغم مما تتعرض له من هجمات شرسة ,ولكن حسبها التصدي والوقوف ضد من يحرف العقيدة ,وكان هذا هو منهاجها وهدفها واهتماماتها بتلك الجزئية تفوق غيرها ,علشان كده يتفوقون تماما في مدارس تدريس العقيدة ,اما الازهر الشريف فكانت قوته الدائمة في مدارس الفقه وتدريسه لذا فيتفوق اهل الازهر تماما في المسائل الفقهيه ,وهنا اتكلم عن المدارس العلمية ,وان كانت المدرستين اهل فضل ,فلانقلل من الازهر ولامن الجامعة الاسلامية ولا اي منطقة يدرس فيها العلم الشرعي
--------
غير ذلك اخي الحبيب ان في الاسلوب الي حد ما طريقة للهجوم ولو عرضت رؤيتك بطريقة النصيحه والحب لكان افضل واعمق اثرا بكثير
لان الخلاف كله شر ,والاختلاف فيه الخير
-------
غير ذلك يا اخي ان الامة تحتاج الي من يدرس لها ويعلمها ,سواء الازهريين او السلفيين او الاخوان ,لانريد الان مناظرات علمية بينما الناس في جهل منقطع النظير فلا يعلمون اساسيات الدين اصلا حتي يتابعوا تلك الخلافات الدقيقة
اتعلم اخي كانت هناك دولة المرابطين في المغرب العربي وكانت من اعظم الدول ,غير ان علماؤها انشغلوا بالخلافات الفقهيه والمناظرات العلمية الدقيقة وتركوا الناس في جهلهم ,فما ان جاء محمد بن تومرت بعقيدته الفاسدة واضل الناس ,وظل الناس سنوات طويلة علي منهجه الفاسد حتي انقذهم الله فيما بعد ,وهذا هو الخوف ان تنتشر الناهج الباطله بينما اهل العلم والخير في معاركهم الجانبية
----
وهذه الرسالة ايضا لشيوخنا الافاضل واخواني السلفيين والاخوان والازهريين وكل من له حرص وحب لهذا الدين ,ان يتركوا الخلاف والمعارك والمناظرات ويعلموا الناس ويهذبوهم الي الخير ,وانا اعلم اخي الحبيب انك ربما اردت ان توصل هذا المعني ولكن كانت الطريقه بها شيءمن الحدة والعنصرية في التصنيفات
وكما قال رسول الله صلي الله عليه وسلم
"عليكم بأصلاح ذات البين فأنها الحالقه لااقول تحلق اللحي ولكن تحلق الدين"
او كما قال فداه ابي وامي
جزاكم الله كل خير وزادكم الله علما وفقها ونفعكم ونفع بكم واستخدمنا جميعا لنصرة هذا الدين

L.G. said...

قرأت الموضوع كاملا ولي مداخلة
سنتنا رسولنا الكريم صلى الله عليه وسلم
ومرجعنا القرآن وإن صفت نيتنا وصلحت القلوب نستفتيها ونور الله سيفتينا فيما غلق علينا فهمه

علق حكمك على الناس شيوخ أو غيرهم
لا ندخل في فتن ولكن نخرج الآخرين منها
لا نتدخل في مهاترات ولكن نوجه للرشاد

المعنى اجمالا لم تضيع وقتك في معرفة المنهج الصحيح ؟؟ منهج الرسول بين أيدينا ونستمع لكل الدعاة نأخذ ما ينفعنا ونرد الباقي لصاحبه
نحن مآخذون بأفعالنا نحن

مثل غريب لو اتنين اتشاكلوا ووقف كل الناس تتفرج أو تسلك بينهم حتبقى الشكلة أد ايه

طيب سيبهم يخبطوا في بعض لوحدهم وواحد حكيم بس يسلك ما بينهم أنهي شكلة تخلص أسرع

ماذا أفادني هذا الموضوع !!! لا شئ شيوخ بتتعارك ؟؟ كلنا بنتعارك ولا نزكي أحدا على الله

من يستفيد من الشيخ يعقوب ماشي
من يستفيد من عمر خالد برضه ماشي

المهم كل واحد يدور على طريق صلاحه

لا أعرف للمسلمين غير أنهم مسلمين لا سلف ولا خلف ولا إخوان
مسلمون كلنا مسلمون
أعتذر للتطويل عذرا
ولكني أتمنى أن ينتبه الناس للأفاضل من العلماء وكذلك لعظائم الأمور

افتقدت وجود موضوع يضيف لي شئ جديد يا باحث ويا عسقلاني

Unknown said...

ياخبر ابيض دا كلام كبير اوى عن الشيوخ والسلفية
وحتى عن تيار فكرى اصبح محل انتشار ودراسة حاليا من كثيرين
بس انا اقولك الشيوخ اللى هم حسان والحوينى وكمان يعقوب من افاضل الشيوخ ومن الصعب التصديق بأنهم قاطعوا لمجرد ظهور عمرو خالد فى القناة
كمان انا عارفة ان الشيخ محمد حسان كان فى الاردن الفترة الماضية والله اعلم
اما عن الفكر السلفى فما العيب فيه ؟؟
عارف المشكلة فى الفكر سواء سلفى اوغيره المشكلة فى طريقة فهمنا نحن للفكر وكمان طريقة تطبيقة هى دى المسألة طريقة تطبيق ؟
اقولك شئ احنا ناس سطحيين لابعد الحدود وناخد دائما قشور الاشياء ونفسرها على كيفنا وبالطريقة اللى تناسب اهوائناا لكن ان نتعمق وندرس ونفكر ونطبف صح للاسف انسى


كل الاحترام وبوست حلو فيه فكرك وداا جميل
بس انا منتظرة ما ستقول عن السلفية
كل الاحترام

اسكندراني اوي said...

احييك على كل ما كتبت
المشكله ان بعضنا لا يقبل الراي الاخر
انت اما معي او لا

وده للاسف واضح جدا في حاجات كتيير اوي
مش في قناه الناس وبس

تحياتي على البوست الصريح اوي ده

الباحث عن الحقيقة said...

صيد الخاطر
الموضوع معروف ومشهور اوى تناقلته جميع المنتديات السلفية
وانا اول ما قرأته كان على موقع جريدة المصريون الالكترونية
وده حاجه صارت مؤكده مش الخبر نفسه بس لكن كمان السبب
يكفي ان محدش فيهم نفى ذلك
وسعداء بزيارتك

الباحث عن الحقيقة said...

صاحب المضيفة
سبق لى في موضوع على الصحيفة اسمه مصر والعودة والايمان ذكرت فيه ان السلفيين في مصر مع احتكاكهم بغيرهم من التيارات الفكرية وكمان احتكاكهم بالناس هذا سيجعلهم اكثر مرونه في الفكر وقبول الاخر وضرورة التعامل مع متغيرات العصر بشكل يحقق المؤامة بين تراثهم وبين الواقع
لكن للاسف هم لازالوا منغلقين فكريا
لكنهم اصبحوا منفتحين اكثر على واقع الناس ومشكلاتهم وده لان اغلبهم خطباء مساجد

الباحث عن الحقيقة said...

الفاتح الجعفرى
انت عايز كراسة علشان الواحد يرد عليك
عموما انا موافقك ومتفهم لجميع ما ذكرته
بص عايز اقولك شئ هو اذا كانت المدرسة الوهابية دافعت عن العقيدة فهي دافعت عنها ضد البدع الظاهره
ولكن لا يقول احد ان فكرها العقائدي هو المتفق عليه خاصة مع معارضتهم للفكر الاشعري وهو الفكر التنزيهي التأويلي
بل بالعكس خطر الوهابيه على العقيدة قد يكون اكبر خاصة اذا كان في كتاب الايمان لابن عبد الوهاب كتب فصلا تحت عنوان : اثبات ان لله يمينا
يؤكد فيه ان لله يد يمين ويد شمال بالمعنى الحقيقي للفظ دون تأويل
وهذا تجسيم واضح يتنافي مع تنزيه الله عن المشابهة والمماثلة
وقصة ان الاخ خالد صاحب مدونة مصر المأروصة رجل ازهري وسلفي ..لكل ذلك هو سبب اعتداله الفكري وثانيا انا لا اعرف موقعه الفكري في السلفية هل هو احد ائمتها او علمائها الذين يأخذ عنهم ام لا؟
واخيرا الجدل الفكري بين التيارات الفكرية ظاهره صحية بهكذا تتلاقح الافكار ويستفدي الجميع من فكر الاخر ويجعله يطور فكره من اجل سد النقائص التى يراها فيه التيار الاخر
مع ضرورة عدم التغافل عن الناس وهذه مهمه تقوم بها وزارة الاوقاف من خلال تعيين خطباء المساجد
ما تقلقش حضرتك في المسأله دي
واشكرك جدا جدا لزيارتك وتعليقك الكريم
واسف اذا فاتتنى بعض النقاط فيه لكن في الغالب متفهم لوجهة نظرك ولا مانع عندى في موافقتك في جميع ما ذكرت حتى ما اختلفنا فيه لانى اراه يصب في النهاية الى احترام الاخر والتركيز على صالح الجماعة

الباحث عن الحقيقة said...

ال جي
ماذا افادني هذا الموضوع ؟
شيوخ بتتعارك
ايه يا ستى شيوخ بتتعارك وهم بشر ..بس ايه السبب؟
انا اعتراضي هنا على موقفهم ان ما فعلوه عمل غير مبرر
اما حديثك عن الاستفادة فحضرتك لو بتدخلى الصحيفة الكاشفة هتستفيدى من الموضوعات
وهتلاقي موضوعات تضيف لحضرتك إلا اذا كنتى بتشوفيها وشايفه انها مش بتضيف لحضرتك فتقصديها هي كمان بالتعليق ده
ثم الاستراحة غالبا للتعبير عن ارائنا الشخصة مش الغرض منها اننا نضيف لحد
غرضنا نعبر عن اللى بنفكر فيه وبنشوفه لا اكثر

الباحث عن الحقيقة said...

نهر الحب
حضرتك جبتي الفايده
المشكلة في طريقة التطبيق
ماهو ما ينفعش اجيب جلابيه بتاعة واحد قصير وألبسها لواحد طويل من غير ما افك التانية
التطبيق يا اختى الكريمة انى اراعي المتغيرات
ده القرآن كان بيتم فيه نسخ لاحكامه باحكام جديدة تتمشى مع متغيرات الواقع
فهل احنا نخلى الرأي ثابت وغير متغير على مدار 14 قرن
تحياتي

الباحث عن الحقيقة said...

اسكندراني اوى
بالظبط هي كده
ياما تكون معتنق لفكرتي يأما تكون كافر
يا مذهبي يا الكفر
لو مش معايا تبقى ضدي
احنا عايزين نعمل مذهب نسميه عدم الانحياز
اشكرك لمروك الكريم

ابن حـجـر الـعـسـقـلانـى said...

ازيك يا ابو البواحث

معلش أنا سايب المناقشات بس انت عارف إنى منفوخ .. قصدى مشغول

بص يا سيدى .. و ما سيدى إلا انت .. أنا مختلف معاك فى نقطة صغيرة جدا بس مهمة جدا

أنا أعتقد إن المشكلة مع التيار السلفى ماوصلتش إلى مرحلة تكفير الآخر .. هم بعيدون عن ذلك .. و إن كنت تسمع تلميحا و ربما تصريحات بالتكفير للشيعة على عمومهم بدون اعتبار طوائفهم و المغالين منهم

أنا معاك إن هناك مجموعات متشددة من المنتسبين للتيار السلفى و لكن لا يجب أن نعتبر أن رأى هؤلاء يعبر عن رأى غالبية التيار السلفى .. لأن لكل أمر غلاته

فى رأيى إن المشكلة مع التيار السلفى هى فى إن رفضه للآخر تجاوز دائرة ما بين "الصواب و الخطأ" و دخل دائرة ما بين "معنا أو ضال و مبتدع" .. و التعبير عن الضلال و الابتداع إما يكون بالتصريح بهذه الألفاظ أو بالتلميح إما بألفاظ أخرى أو بعبارات شديدة يفهم من دلالاتها أنها تعنى الضلال و الابتداع أو بمواقف تتسم بالحدة أو تتسم بالاستعلاء

إن الأوضاع فى مصر بل و العالم العربى عانت كثيرا من تجارب الجماعات الإسلامية التى ذهبت مذاهب التكفير .. و هذه كانت تجربة فى المجتمع المصرى أثرت فى كل التيارات و أكرر كل التيارات بشكل إيجابى بحيث أصبح خط التكفير خطا أحمرا لا يقترب أحد منه إلا على استحياء

و هذا أمر جيد جدا أن يستفيد الناس من التجارب فهذا ما يدفع بالفكر إلى النضج و التطور

دة رأيى .. و ربما انت شايف حاجات أنا مش شايفها

المهم يا برنس .. هاتيجى القاهرة إمتى .. عايزين نشوفك بقى .. عشان نقعد على القهوة مع التمنياوى و نسلم على صلاح

بالمناسبة صحيح .. أبو صلاح سافر الصين من يومين و راجع بإذن الله كمان أسبوعين .. ادعى له ربنا يرجعه بالسلامة و ينجيه من الزلازل اللى هناك

rego said...

الشيخ محمد حسان و محمد حسين يعقوب عايزين الحق مش بيفرضو رلأيهم أو فكرهم على حد

dodda said...

انا بجد مش فاهمه عمرو خالد بيتعاقب على ايه؟؟؟؟
الراجل ده غلطته ان ربنا اكرمه وقدره يوصل لجزء من مجتمع مخوف الكبار
لو قال ياللابينا حيلاقى وراه أمم

ربنا ياخد بيده ويقدره عليهم..

اما عن قناة الناس

فحسبى الله ونعم الوكيل

الدين ربنا جعله شريعه نعيش بيها فى الدنيا
مش وسيله تحكم ناس فى ناس!!!

مين عينهم اولياء على المسلمين؟؟؟
لا حول ولا قوة الا بالله
الدين جوانا
حياتنا اللى عيشينها

ليه مش فاهمين انهم بيتسببوا فى الصاق الارهاب بالاسلام لما يرهبوا المسلمين؟؟!!!

الفارس الملثم said...

بصراحه يا عمنا انت علي نفس الموجه الفكريه لتفكيري ..

لاني اري مثل الشيخ محمد حسان والشيخ محمد حسين يعقوب متاثريبن بالسلفيه السعوديه التي تتبع المذهب الوهابي لذا هم لا يرون في الازهر اي مرجعيه دينيه ..

وهم يعتمدون علي اسلوب اما الشئ حلال او حرام ابيض او اسود ..

ويرون من يخالفهم انه يتبع الهوي ويحيد عن الاسلام الصحيح ..

انقول ايه ...ربنا يهدينا جميعا للصواب

تحياتي وتقديري
محمد

دعاء مواجهات said...

عجبتنى مدونتك اوى لتميزها

وان ليها فكر وراى عاوز توصلة او ع الاقل تعرضة


تحيااتى لكتاباتك

انتظرك بمدونتى المواضعة

سلاااااااام

رئـــــيسـة حزب الأحلام said...
This comment has been removed by the author.
رئـــــيسـة حزب الأحلام said...

الصراحة انا مابتفرجشى على قناة الناس انا بحب اوى قناة المجد جميلة جدا وانا بحبها
وياريت يطوروا البرامج الدينية ويجيبوا شيوخ زى عمرو خالد يعطوا المعلومات بطرق مبسطه
وتحياتى

Hypatia said...

احييك استاذ باحث عن الحقيقه المقال واضح جدا واسلوبه سلس وغير ممل بالمره قرأته بمنتهى التركيز واستمتعت بيه جدا

تابعت قناة الناس لفتره فى الاول وبعدين قاطعتها لاسباب كتير مش مجال ذكرها دلوقتى

تحياتي لحضرتك وللاستاذ ابن حجر
حط اليانسون على الحساب بقي
:))

اميره الصعيد said...

يا جماعه ليه الهجوم ده علي السلفيه ومشايخها والله انا كنت باسمع لمشايخ قناه الناس محمد حسان ويعقوب وابواسحاق ناس محترمين فعلا وعرفونا حاجات كتيره خالص مكناش نعرفها عن الدين كفايه انهم وصلولنا ديننا لغايه عندنا
طاب ما الشيخ محمود المصري محسوب علي السلفيه راجل بسم الله ما شاء الله الابتسامه مش بتفارق وشه وبيوصل الدين بمنتهي السهوله واليسر
بلاش دا كله بخصوص انهم واخدين القناه لحسابهم هل هما راحوا لاداره القناه وفرضوا نفسهم عليهم ولا اداره القناه هي اللي سعت انها تجلبهم للظهور عندهم علي شاشه قناه الناس
وكمان ليه منفسرش غياب الشيخ حسان عن قناه الناس بأنه قام بانشاء القناه الخاصه به واسمها الرحمه
احنا ممكن نختلف مع الناس دول في فتوه او موقف بس منجرحش فيهم ونحاول نسمع هما بيقولوا ايه لانهم في الخر بيتكلموا في الدين

زيزو الشقى said...

انا مدون جديد

دى اول زيارة ليا


مدونتك حلوة اوى ودمها شربات

عز الدين


سلااااااااام

Empress appy said...

ههههههههه اولا انا وعسقول قعدنا اسبوعين نتناقش فى القصه دى ونجمع اراء وانا معاه ومعاك اساسا فى كلامك
بجد ولغايه دلوقتى مش لاقيه مبرر خالص للى حصل ولو ان فيه ناس قالت انه مفيش خلاف بس ده العادى يعنى
المهم مع تحفظى على عمرو خالد فى حاجات وعلى الشيوخ فى حاجات بس الاختلاف فى البتنجان لا يفسد للمسقعه صنيه
وعلى فكرة تم طرح فكرة رفع الاسعار فى المجلس الشعبى وانا ارفض واشجب ولا ارضى خالص بهذا ولا ذاك
وهقيم عليكم الحد والتلات والاربعاء لو مش عجبك هزود الخميس
همسه على جنب لعسقول ولا اقولك لما اقابله هقوله ابقى افهم اللى قدامك ومدى ثقافته وناقشه هبقى اقوله ويقولك يا ابن حجر طبعا مش اقصدك خالص انا اقصد حد تانى خالص جدااااااااااااا

. said...

يارييييييييييييت تفتح النقاش عن التطرف
من النحيتين
المعتقدين اتباعهم للسنة
والرافضين لكثير من احكام الشريعة
وعن التوسطية وكيفية تحقيقها
وياريت كل مرة تتناقش في نقطة معينة علنا فالاخر نصل الى ان نكون متوسطين متدينين بحق باستنادات وحقائق
يارييييييييييت
تريح مرارتي المفقوعة من المسلمين
واذا انتهينا
نتكلم بصفة عامة عن التوسطية بينا وبين الاديان الاخرى
ورفض التعصب
مش كقيمة اجتماعية لأ كقاعدة دينية
يارييييييييييت
تللللللللللحق مرارتي

مشتاق لله said...

اتمني ان ياتي يوم تلين فيه قلوب المسلمين لبعضهم

Unknown said...

السلام عليكم

ازيك اخبارك أيه ؟

انا بصراحة من الناس الى كانوا محتارين فى شيوخ قناة الناس دول شوية اضايق منهم و شوية اضايق عشانهم لما البيت بيتك يهاجمهم
بس بصراحة انا من متابعتى ليهم كام مرة كده و الاستماع لاراءهم و تفسرياتهم لايات الله لقيت بصراحة باه و بدون زعل كده بتوع البيت بيتك عندهم حق

و المشكلة ان فيه شباب كتير باوا يخدوا محمد حسان و يعقوب قدوة و مثل اعلى و الى يمسهم بكلمة يبقى يا ويله يا سواد ليله

تحياتى

همس الاحباب said...

انا جاى اسلم
واطمئن عليك
واقولك ربنا يوفقك
وسعيد بمعرفتك على حضرتك
تحياتى
خالد

مـ~ـاجدولين said...

انت بتفكر صح صح صح صح

تعرف انت لو استمريت على طريقتك هذه ولم تجامل أحد ولم تتأثر الا بما يمليه عليك ضميرك
ستكون فعلا مجدد ووسطي للفقه الاسلامي

مشكله الفقه الاسلامي الجمود وتقديس التراث الفقهي للاجداد
رغم ان الأصل القران وكل ماعداه
يسد ما سكت عنه القران
اما الاجتهاد والقياس بحاجه لتجديد
رائد التجديد في السعوديه الشيخ سلمان العوده وهو اكثر شخص منبوذ ويسمونه الدجال لانه حرك الفقه الاسلامي من جموده

خليك متحرر ولا تقع في فخ التبعيه