Friday, December 14, 2007

عاملولك ايييه فى الجيش يا دفعة


س3 يسار س يد افد حول
بلغ عن قوة السمع ...اسمعك كروان
تمام وارسل
زوبعة الااااااااااااااااااان
ارتفاع 275 ..زاوية بصر30 ..اخر مربوطة 54_52
واحد صاروخ اضرب
اضرب ياحمد وارحم دين امى
تمام وضرب
الو عمليات ..النتيجة
س 3 امتياز
الله اكبر ..مبروك يا فندم



السلام عليكم ورحمة الله وبركاته اخوانى المدونين واخواتى المدونات واساتذتى الكرام يا اصحابى يا اهلى يا جيرانى انا عايز اخدكوا فى احضانى وراجعين راجعين رفعين رايات النصر " خلاص رحمتكم من الاغنية دى وحذفتها بنفسى" ومصر بخير يا رجاله واهدى سلامى للست فاطنه واقولها جوزك حراجى القط بخير والحمد لله انا شفته بالنضارة المعظمة وانا واقف على القنال وهو بيشتغل فى السد العالى ما تستغربيش يا فاطنه اصل انا ابن عمى الوسطانى اسمه ابو لمعة بتاع ساعة لقلبك
ما علينا ما علينا
وكمان ريحتكم من الميكروباص اللى كان واقف هنا وموضوع ابن حجر حجنجر عن الميكروباصات لانه كان واقف فى الممنوع
والحقيقة ده كان حقد منه لانه كان نفسه يشتغل تباع على ميكروباص لكن بما انه فاشل وبتاع امهات كتب مجموعه ما جابش غير كلية هندسة قسم فشل اتصالات
بالمناسبة وقبل ما ندخل فى الموضوع ..مش انا احمد اللى لو ما ضربش كان طلع فيها دين ام رئيس العمليات ..احمد ده كان ضابط الموقع
وعذرا لذكر لفظ غير لائق ولكن زى مانتم عارفين الجيش كمان مدرسة لتعليم الالفاظ الالفاظ يعنى
وده يفكرنى بالاغانى الشعبية اللى سمعناها فوق فى مربض النيران اثناء فترات الراحة وقبل النوم حيث كنا نجتمع ونتسامر ونغنى جميع اغانى الافراح الممنوعة من العرض من عينة : حرامى ياما وشفت البنت بتقول لامها ايه والبدوية البت تقول لابوها... وعاملولك ايييه فى الجيش يا دفعة وربنا يستر وما يطلعش حد عارف الاغانى دى وإلا هنتحبس فيها كلنا فى قضية اداب ..واعذرونى يا جماعة على الالفاظ انا مكنتش فى رحلة انا كان طالع ميتين ابو ميتين اللى جابوا اهلى .
افتكرت مره احدى الاخوات قالت لى فى منتدى : ازاى اهلك بعد ما ماتوا طلعوا تانى هو اللى بيموت بصحى تانى !! طبعا فطست على نفسى من الضحك وحسيت انى ...... الادب ..زى دلوقتى كده احم احم
لكن ييجى ايه ده جنب اغنية ايهاب جامده زى الكتاب ما قال ..انا مسمعتهاش لكن قالولى
ما علينا وإليكم طائفة من بعض الاقوال والاحداث بشكل غير مرتب
- ميدان الرماية : ارقد , عمّر, عندما تكون جاهز اشتبك
قاعدة التنشين : مرور شعاع البصر من فتحة الشيز بالناشنكاه الخلفى الى اعلى سن نملة الدبانة بالناشنكاه الامامى الى اسفل منتصف الهدف
- العنبر بالليل : ياخونا حد يربط عبد الاخر القناوى فى السرير علشان مايقومش زى كل يوم الساعة 3 يروح الحمام بيصحينا كلنا ومش بنعرف ننام تانى
- الو ..ايوه يابت انا وصلت الجيش خلاص ..هاقعد اد ايه؟..هوكله اسبوع ..طبعا العنبر كله انفجر من الضحك لاننا هنقعد شهر وهو بيفهم الجو بتاعه انه هيقعد اسبوع ..فصاح فينا ..بس يا ولاد ..دى مراتى التانية لازم اقولها كده احسن تتجوز عليا
- رايح فين يا صفروت .. الجيش لك سعودية
- واحد منوفى كل ما يجى يطلب من ابوه حاجه ابوه يقوله : صفا واسترح
- يقولك فى الجيش السعودى بيقولو فرطيحه وضوميره بدل صفا وانتباه
- ايه يا عم انت واقف فى الحمام بالسيليب فاكر نفسك كلب البحر..ده انا مكسوف ابصلك
- فوق فى الجبل - عسكرى استدعاء ماسك الطابة وبيقلب فيها باستهتار وبيسأل : ايه دى ياد يا علام ؟....علام ينظر اليه : يا لهوووووى ..ابوس ايدك سيبها بكانها بالراحة .الطابة هى الرأس المتفجره
- اركب يا عسكرى العربية دى ..تمام يا فندم ..يا عسكرى العربية واقفه ليه اطلع بيها يا غبى ..ما بعرفش اسوق يا فندم ..امال بتركب فى الكابينة وراء الدريكسيون ليه؟ ..انت قلتلى اركب ركبت لكن ما قلتليش انى هسوق
- عقولكم ايه اذا كان البرد يخلينا ننام جنب بعض علشان نتغطوا سوا يبقى كل واحد ينام يحفظ ادبه ... يااااد حوش دراعك من جنبى يا قليل الادب ...انا دراعاتى الاتنين اهم ...امال ايه اللى بيزغدنى فى جنبى ده ..خلاص خلاص نام دى البطاريه انا كنت حاططها فى جنبى وناسى
بعد شويه مره تانى ..ايه ده كمان ؟ ..ايه تانى ..انا عارف استنى كده لما اشوف ..خلاص ناموا دى المعلقة كنت حاططها فى جيب البنطلون ...بعد شوية ..وبعدين عقولك ايه ..ايه مالك ؟ الواد بيحرك صوابع رجليه ...وانت مالك بصوابع رجليه بعد انت رجليك عنه
الواد قال بقولك ايه انا قايم من جنبكم انتم الاتنين انتم هتجننونى

بس محدش يفتكر ان ايامنا كلها كانت كده ضحك وبس ..احنا كنا بنبات فى البرد وكنا نقضى معظم اليوم من غير اكل ولامية ..واهى الايام عدت والحمد لله
على فكرة انا رجعت من 5 ايام ومكنتش بهزر ولا بضحك زى دلوقت ..بالعكس كنت متعقد جدا ومتضايق من كل شئ
وانا فى الجيش واقف على الرمل ابص للاسفلت والعربيات رايحة جاية احس وكأننا كنا فى عالم تانى ..وان الدنيا اللى بتبرق بره دى وهم فى وهم ..كل شئ بيعدى ويروح
بس الاكيد انى لما كنت بفتكركم كنت بشتاق لكم جدا .وحسيت قد ايه انتم طيبين واحسن من ناس كتير
وحشتونى
وسمعنى احلى سلام صعيدى شحط محط ..ونزل مشاريب على خساب صاخب المخل
طبعا ابن حجر عمل خميرة فلوس حلوة اليومين اللى انا غبتهم وكان بيحط المليم على المليم ..مش بعيد يكون عملها واتجوز
استرها معانا يا رب

ملحوظة : طبعا فيه ناس هتلاحظ تغيير خاصة فى الالفاظ وانا بعتذر عن اى لفظ سئ ..معلش بقى يا جماعة اوعدكم اغسل فمى قبل الاكل وبعد الاكل خمس مرات فى اليوم

50 comments:

عصفور المدينة said...

حمدا لله على سلامتك يا أحمد
أنا افتقدتك كثيرا وكذلك بن حجر
وحشتنا
أعود لأقرأ بس اوعي يكون فيه إهانة للقوات المسلحة دي جريمة
يلا ارجع أقرا

رفقة عمر said...

حمدا لله على سلامتك
التدوين افتقد حضرتك كتتتتير جدا ويارب التدوين يرجعك لطبيعتك تانى وينسيك ايام الجيش وكلامه
كل سنه وحضرتك بالف خير

عصفور المدينة said...

لا لا الديش بوظ اخلائك ياحمد

انت تيجي تديني تمام وتنزل بوست مؤدب بدل ده شفت الأستاذة رفقة بتقولك بالمحسوس إيه التدوين يرجعك لطبيعتك يعني عايزة تقولك إن عيارك فلت

وعلى فكرة في الديش السعودي بيقولوا
استرح استعد بدل صفا وانتباه

الباحث عن الحقيقة said...

استاذي عصفور المدينة
الله يسلمك وحاضر يا فندم حراجعه واعمل تعديلات
بس اعمل ايه بقى غصب عنى وانا بعتذر يا جماعة

الباحث عن الحقيقة said...

الاخت الكريمة رفقة عمر
الله يسلمك يا فندم
وانا مكسوف اوى بصراحة وشكرا على زوقك الكريم

الباحث عن الحقيقة said...

عم عصفور المدينة مش بس درس السلفية فى السعودية ده كمان وقت الفراخ كان بيحضر عروض عسكرية هناك
وبخصوص عيارى اللى فلت فهو فلت جدا لدرجة انى جبت طلقة واحده بالبندقية الالى من 4 طلقات ..نفسى اعرف التلاته التانيين فلتوا فين ..معرفش

ابن حـجـر الـعـسـقـلانـى said...

بمناسبة الأغانى اللى فى الجيش .. أنا لما كنت فى الجيش كانوا مدلعينا حبتين .. بعد الطابور الرياضى الصباحى كانوا بيشغلوا لنا فى الإذاعة الداخلية شاكيرا


ثم أتجوز ايه يا عم الحاج .. هو واحد شغال فى قهوة .. كوباية الشاى فيها بملاليم يعرف يتجوز .. دة لو كان حد بيدفع أصلا

ثم موضوع المايكروباصات اللى انت شيلته عشان راكن فى الممنوع .. دة أنا فضلت مصدع يومين عشان عنيا وجعونى من كتر البص على العربيات و التكاتك و انا باجمع الجمل دى

لكن برضه ما يغلاش عليك يا دفعة .. فداك ميت موضوع .. نبقى نعرضه بعدين



و بصراحة العسكرى اللى ركب العربية و طلع مابيعرفش يسوق موتنى من الضحك .. فى الجيش الطاعة الأول بعد كدة أى حاجة تانية

و حمد الله على السلامة يا معلمى .. كفارة يا معلم

عصفور المدينة said...

يا دفعة انا دارس السلفية في الاسكندرية إنتاج محلي يعني صنع في مصر

الباحث عن الحقيقة said...

على فكره يا استاذ عصفور انا رجعت يوم الاحد الماضى ومكنش ليا نفس لاى شئ ولما ابن حجر نزل موضوعه لقيت ان اعلان ظهورى الرسمى هيتأخر كده اسبوع كمان ع الاقل فأستأذنت منه فى حذف الموضوع وقلت معلش عصفور المدينة نعشم فيه يعذرنا على الحذف المؤقت
وبخصوص سلفيتك اللى صنع فى مصر فده واضح حيث ان مناخها معتدل عكس السلفية السعودية ذات المناخ القارى الحار
بس شفت ابن حجر بيهاجم السلفيه كتير ليه
علشان اتربى فى الجيش على صوت شاكيرا
ايييييه فين ايام عبد الدايم البروجى احنا اتربينا على نوبة صحيان

L.G. said...

بسم الله الرحمن الرحيم
كفارة يا باحث
عندي مداخلة لو سمحتلي ولو إن الموضوع خلينا أبتسم وجميل بس فيه حاجة مهمة يمكن انت شايفها عادية بس بجد مهمة بلاش تذكر حاجات عن الجيش مش انت أو المصريين بس اللي بيتابع البلوجز لازم تكون حريص يعني مثلا نسبة التصويب عندك بالبندقية في الكلام ضحك لغيرك معلومة مهمة وبداية خيط والرموز في النداء خليك حريص على مصر خاصة فيما يخص المعلومات بجد
تاني حاجة الجيش فرصة قوية لبناء الشخص قال رسول الله صلى الله عليه وسلم " اخشوشنوا فإن النعمة لا تدوم " يمكن بتتعب في الجيش بس صدقني حتتعلم كتير وتجربة متعددة المناحي على المستوى الانساني والعملي والعلمي
وفي النهاية
عينان لا تمسهما النار عين بكت من خشية الله وعين باتت تحرس في سبيل الله

الباحث عن الحقيقة said...

اولا الشفره انا مغير فيها مش دى طريقة نطقها فى التدريب
ثانيا علاماتى فى الرماية والموضوع مكتوب بشكل اشبه بافلام اسماعين ياسين يعنى كوميدى ومفيش فيه اسرار ولا حاجه كل اللى مكتوب بدائيات حتى الصورة من على النت ومنشورة وعامة
وكفاية جوجل ايرث مصور كل حاجة عندنا يعنى مفيش حاجة تستخبى والكلام مفيهوش اى رموز ومحفوظ فى الافلام العربى قبل الاجنبى
انتى بس اللى خيالك واسع حبتين
واهلا بحضرتك منوره المدونة يا فندم وعلى فكره انا بتابع مدونتك وكان لى ملحوظة ..يا ريت يكون فيه موضوع مرتبط بالتصويت اللى بتعمليه علشان اللى بيصوتوا ويعيطوا ياخدوا راحتهم ويقولوا هم ليه اختار كذا
واحلى سلام سلاح لاجدع ناس شرفتنا
ولا سلام سلاح دى فيها حاجة برضه؟

L.G. said...

خيالي ليس متسع بل فكري ووجهة نظري لبعيد على العموم أردت لفت نظرك للفكرة فقط
منعا للتصادم اللفظي
بالنسبة لإستطلاع الرأي أعلق على كل استطلاع بعد الانتهاء منه وأفند الآراء وأعقب بوجهة نظري والحجج التي أعتمد عليها وأحاول اقناع الآخرين بها ولكن ذلك بعد التصويت لكي لا أؤثر على رأي الآخر لكي يبني كل شخص رأيه نتيجة عمل فكره وعقله وخبراته وبعد ذلك أسوق له الأدلة على رأيي
شكرا وأعتقد تلك نهاية الطريق وفقك الله

بنت الصالحين said...

ايه ده
ياسبحان الله ده كله من الجيش
لا وانا اللى كنت بعدى على اخواتى ويوميا فى القيام ادعى ربنا انهم يدخلو الجيش علشان يخشوشنوا شويه
لالالالالالالالالالالالالالالالالا
كده كويس
هو ايه اللى ناقصهم يعنى حبه نظام
مش مهم مش عايزاهم يبقى عندهم نظام



بس فيه حاجه
هما مش بيسموه الناشنكان
ولا الناشنكاه ؟؟؟؟؟


وايه الطابه والناشنكان بقى.؟


عودا احمدا


منتظرين تدويناتك الجديده

اسكندراني اوي said...

ههههههههههههههههههههههه
بالذمه دا اسمه كلام

يعني اللي بنعملوه فينا حيطلع علينا

ماشي حمدا لله على السلامه

الباحث عن الحقيقة said...

الاخت عاشقة الفردوس
اهو محدش جابنا ورا غير دعواتك دى
سيبوا كل حى ياخد نصيبة
وبعدين اسمه الناشنكاه ه ه بالبون يا فندم بالبون زى سرحان عبد البونصير كده
شكرا لزيارتك وان شاء الله انتظرى الجديد وكل سنه وانتى طيبة

الباحث عن الحقيقة said...

اسكندرانى اوى اوى
هو انت كنت بتعمل ايه بالظبط ؟
عموما كله طالع طالع ما تقلقش انت نسيت النشيد القومى الجديد ولا ايه اللى هو يبقى انت اكيد اكيد فى مصر
لها جزء تانى فى اسكندرية بس لما الشتاء تخلص
منورنا يا فندم
نزل هنا يا بن حجر واحد يتسحلب
قصدى واحد سحلب

فارس عبدالفتاح said...

اهاهاهاهاهاه

وأنا كل ماجي اسأل عنك محدش يقلى أنت فين أتريك كنت في الديش حمدله على السلامة يا زعيم .

بصراحة لما قريت الموضوع استغربت بل تفاجئت بالكلام اللي كتبته لكن لما عرفت السبب عرف الحكاية من أولها لأخرها .

بس المفروض عليك قبل متروح الديش كنت قلتلى كنت بعتك فرقه عندنا فى – مير - كنت خليتك تروح هناك أسد وسط العيال دول .. لكن الحق عليك انك ما قلتش .

المهم حمدله على السلامة يا بطل ،، القهوة نورت برجوعك يا معلم .
يا طارق !! يا طارق !! طارق ده ( الجرسون )

شوف للمعلم الباحث يشرب أيه على حسابي .

طارق : أخيراً الأستاذ فارس هنشوف فلوسوه كل مره يجي ويمشي من غير ميشرب حاجه عندنا منفع القهاوي اللى حولينا وإحنا لا .

أنا : يا طارق هتلى شيشة في الدور التاني بس متخليش حد يشوفك .

طارق : إحنا اللى هنعيدو هنزيدوا مقلنا ممنوع الشيش هنا يا أستاذ فارس .

أنا : يابني انت مسمعتش المعلم ابن حجر قال هنزلك شيشه بس دككيني .

طارق : أشوفه الأول وبعدين أنزلك الشيشة .

أنا : طيب أنا قاعد فوق ولما يخلص الباحث كلامه مع الناس اللى بتسلم عليه قله فارس مستنيك فوق . .. ماشي .

طارق : طيب هقلو ..

أنا : أنا طالع فوق ياد أه .

طارق : ماشي يا عم الحلو .

عصفور المدينة said...

طب انا قاعد لك يا فارس ع السلم اما تشوف حتفوت المنكر ازاي
:)

الباحث عن الحقيقة said...

المعلم فارس عبد الفتاح
اهلا ابو البلديات منور يابوعمو
معلش مش حسابى انك واسطة جامده كده ..المره الجاية بقى وعليك خير
بس يا ريت تودينى البوليس النسائى
ومين طارق ده يا عم الاستاذ
هو انت علشان واسطة يعنى تقوم تعين الناس كده من نفسك
قلى الواد ابن حجر اخد منك كام فلوس علشان تعينه ..اصل انا عارفه له جذور من القصير انما اهل مير بلد عم الحاج محمود ناس غلابه ..
وبما انك بتنفع القهاوى التانية وهنا لأ
وبما ان الاستاذ عصفور قاعدلك وماسك الجرنال المخروم وبيبوص منه
فانا هبعتلك الحجر االى يروق دماغك
هبعتلك ابو الاحجار كله ..اشربه براحتك او حتى احدفه من البلاكونه
علشان يعرف ان القهوة دى فيها معلم يعنى يستأذن الاول قبل ما يعين سى طارق ده
وشاكرين مهللين يابو الفوارس
بالمناسبة دى من ضمن الاغانى الممنوعة كانت اغنية انزل يا سى فارس فى الميدان
وكفاية كده احسن العصافير كتير ..واخد بالك انت

الباحث عن الحقيقة said...

عم عصفور المدينة
هات شاى للباشا يلا هنا وبسرعة
انا عايزابلغك حاجه مهمة ..فيه واحد فوق اسمه فارس بيشرب منكر"شيشة" يا ريت بقى يا باشا تظبطه
علشان كل ما يشوفك يقولك : يا مظبطنى ..زى الاعلان بتاع الضرايب

دكتور حر said...

يخرم جيب الجمال ده يبني

الواحد ضحك عالتعليقات أكتر من التدوينه نفسها

ربنا يكرمك ويتم ديشك على خير

انا طبعا مخدش الا التربيه العسكريه ومليش جيش ان شااااااااء الله لأني مش عاوز

وكا الرائد بيعملنا في يوم تدريبات
والله كنا كلنا شغالين

بورورم بورورم

والعيال بتقول حاجه كده احنا مش فاهمينها
كنا بنزعق وخلاص

موفق ان شاء الله

فارس عبدالفتاح said...

بصو بالعربي أنا رجل كييف دخان

هتشربوني معسل عندكم اوكيه مشهتشربوني بصو القهاوي على أفا من يشيل .

الأخ عصفور أعدلي على السلم وواحد خرملي الجرنال ..

دانا بخاف اشرب قهوه تقولو - ده - كيف وتحرموه على الناس .

يا طارق !! يا طارق !!

انت يابني

طارق : ايوه يا أستاذ فارس .

أنا : بص يبني أنا هأعد بره تحت الشماسي عشان اسمع النشره هتلنا الجزيرة على التليفزيون اللى بره .

طارق : التليفزيون اللي بره مبنشغلش عليه الجزيرة يا أستاذ فارس عاوز تسمع النشرة أعد جوه . وبعدين الرموت مع الأستاذ ابن حجر هو اللي بيألب القنوات .

أنا : ياد النيله يبني أهوتكم دي كلها بؤس . أمال لو الواحد ألكم هتنا قناة أوروبية كنت أقمتو علينا الحد . يعني ديه حاجه تجنن واللى لا . أمال يبني انتو فتحين الأهوه دي ليه .

طارق : انا عارف فتحينها ليه عشان يزهأونا ،، الله يخرب بيت الرأسمالية بتاعت الاخوة الإسلاميين .

أنا : رأسمالية إسلامية أيه ، بس يبني هتودينا فى ديه أحسن حد يسمعك ، الله يخرب بيتك .

طارق : أمال فتحين الأهوه دي ليه يعني منظره كل عشان يكسبو ملمين عشان المنشورات والمطبوعات اللي بيعملوها ويوزعوها يوم الجمعة والناس خارجة من صلاة الجمعة يا عم .. أمال أنت فاكر أيه ،، دول معاهم فلوس متخلصش .

إنا : يا طارق .

طارق : إيه يا عم .

أنا : بص ميكنش الأستاذ عصفور بيشارك معاهم في مشاريع ديه يعني بيبنيلهم مثلا مستوصف خيري ،، عشان يكسبوا من وراه ملايين في الأخر يقلونا انو خيري وبأسعار رمزية ،، الجماعة دول بيكسبو بالهبل ،، الله يسهلهم احنا مش بنحسد ولا حاجه بس احنا فهمين كل حاجه ياد .

طارق : والله مش عارف الأستاذ عصفور معاهم وللى لا .. الله اعلم ..

أنا : طيب متشمشملنا على الموضوع ده ياد خلينا نعرف الدنيا مشيا اذاي والعالم دول بيعملوا أيه ـ خليك صاحي ياد .

طارق : يعم الله يخليك ملناش دعوه بدول ممكن يعلنوا علينا الجهاد أو يقولوا أننا بنتجسس لصالح الغرب أو جهة أخره وسعتها نبئى دخلنا في حسبة حيص بيص ..

أنا : خلاص خلاص عندك حق أنا ماشي من الأهوه دي ومش دخلها تاني لغاية ميعترفوا بحق الجماعة كييفة المعسل وبعدين ابئى اجي .

طارق : مش حيحصل مجيش أحسن .

أنا : عندك حق سلام عليكم .

الـسـيـدة نـون said...

حمدالله على السلامة هلا هلا
اشتقنا ليكم يا ماااااااااا
يا فرحنا يا هنانااااااااااا
مش كان فيه اغنية بتقول كدة برضه

ما علينا حمدالله على السلامة يا باحث عن الحقيقة
انا هاتكلم عن نفسى
اولا انا مازعلتش من اى الفاظ وردت فى البوست
اذا كان فيه حد زعل فانا مش منهم
ثانيا
انا سمعت فعلا ان ابن حجر عملها واتجوز
روح بقى الحق حقك وحاسبه وشوف كسب كام من وراك

انا عن نفسى كنت بادخل الكام يوم اللى فاتوا دول اكتر من ست سبع مرات وكنت بشرب حاجات يجى بخمسة جنيه كدة
انا قلت اوعيك لحسن يقولك انه كان بيعزمنا ولا حاجة واننا ماكناش بندفع ملين احمر
وبعدين فى الاخر انا جاية اهدى النفوس
واسمعك احلى سلام صعيدى شحط محط

اختك خيخة

ابن حـجـر الـعـسـقـلانـى said...

آه يا خيخة .. أما انت طلعتى خيخة بجد .. أنا مش لسة منزل لك طلبات مجانا المرة اللى فاتت .. هو آه أنا كنت طمعان فى الربعميت جنيه اللى كنتى هاتاخديهم من الشغلانة بتاعتك .. لكن لما الموضوع ما كملش صعبتى عليا و نزلت لك طلبات مجانا .. تقومى تروحى تقولى للمعلم بتاعى إنك بتظرفينى خمساية كل ما تيجى ؟؟ لأ .. مش انت خيخة اللى أنا اعرفها

ثم أنا لو عندى فلوس أتجوز .. ماحدش كان هايشوف وشى يا جدعان ..و كنت روحت عملت لى قهوة لوحدى و مش هانزل فيها غير شيشة.. عشان ماتزعلش يا ابو الفوارس .. و لاحد يقعد بجرنان مخروم يراقبنى .. و لا معلم يقول لى بلاش شيشة و تلوث البيئة و الكلام دة

و دمتم

Desert cat said...

حمد الله على سلامتك يا احمد
شدة وعدت
الجيش للجدعان
نورت النت من تانى ياباشا
كل سنة وانت طيب

عصفور المدينة said...

بص يا فارس انت كدة بتتنصل من تهمة غسيل الأموال والغسالة اللي بنغسل بيها أصلا وارد برة وانت اللي شحنتها

قناة الجزيرة ماشي قنوات تانية انت حر
ممكن نسمح لك بسبيس تون كمان

تقول لي أوربي أخطفك

قهوة ماشي كيف حلال شيشة لا طلعت فوق من ورايا حاكتم عليك المكان واسيبك تدخن لحد ما انت عارف

الواد طارق ده الطابور الخامس ومعروف خلي بالك بص بقى كمان الطاولة ممنوع والدومينو ممنوع والماتش مسموح لك بالأهداف بس هو ده نظام القهوة بتاعة سيدي بن حجر العسقلاني طيب الله مقهاه

الـسـيـدة نـون said...

ابو العساقيل
اهلا يا معلمى
اهه ده عيبه بقى البلوج ابو اتنين يكتبه فيه
يعنى الواحد ميعرفش يتفك بكلمة كدة ولا كدة
امال اوقع بينك وبين معلمك ازاى
قصدى اهدى النفوس ازاى
وبعدين هو انت من الناس اللى بتختفى بعد الجواز
لأ يبقى بلاش جواز احسن وخليك هنا فى ريحنا
احنا منستغناش عنك يا بو العساقيل
امال مين اللى هيغيرلى حجر الشيشة بتاعى
ومين اللى هيعمل صيانة لعجلة المعلمة فرنسا

يلا فوتك بعافية انت ومعلمك الباحث

اختك خيخة

الباحث عن الحقيقة said...

دكتور حر
والله من ناحية بوررم فانا جيشى كله بوررم فى بوررم اخوك مدفعجى بوررم بدرجة قدير
بوررم على حق
منور يا باشا

الباحث عن الحقيقة said...

اختى " مش " خيخة
اشمعنى خيخة يعنى دى
ده علشان محدش يستنجد بيكى فى اى خناقة يعنى ولا ده تمويه ولا ايه بالظبط
وشكرا لتقديمك الدفاتر السرية واظهار التقارير المستخبية
ايه يا بن حجر
لما خيخة كانت بتشرب بخمسة جنية امال عصفور كان بيشرب بكام وده لو قعد على قهوة وقال يا مشاريب مش بنسد معاه
ولا الحاجات الدكاكينى اللى كانت بتطلع لفارس بيه افندى باشا
هات السكينة يا بت يا خيخة
خلاص انا عرفت هنضحى بمين على العيد الكبير

الباحث عن الحقيقة said...

اختى قطة الصحراء
يعنى ..يعنى
احلى احلى
قطة اطة
فيكى ايكى ايكى
يا مصر اصر اصر
وسلام على طول السلام ومداااااااد يا شيخ العرب
بس خلاص ..اصل عصفور المدينة مانع الرقص وإلا كنت قلت رقصنى يا جدع
شكرا لتشريفك وسؤال عنى فى غيابى

صانعة الحرية said...

السلام عليكمورحمة الله وبركاته
عودا حميدا استاذنا
وفى انتظار البوستات القادمه

فارس عبدالفتاح said...

سلام عليكم يا رجاله


كل سنة وانتم في احسن حال والله يعيد علينا هذه الايام لما يحبه ويرضاه

عفواً والسيدات والآنسات

سلام عليكم

الـسـيـدة نـون said...

انا جيت ومعايا السكينة يا معلم باحث
اهى حامية وسنها يدبح رقبة كتكوت

بس يعنى سماح المرة دى
ده ابو العساقيل برضه
واحنا منستغناش عنه
هو تلاقيه بس كان واقع فى ورطة وكان محتاج الجرشينات
فخليها عليا المرةدى
واى نقص قى الحسابات ايدها على النوتة
والحساب يجمع يا معلمى

يلا سلام
وكل سنة وانت راس يا معلمى
اختك خيخة

3ala asm masr said...

كفاره يا جيش
حمد الله عالسلامه ياعم
كل سنه وحضرتك طيب

ابن حـجـر الـعـسـقـلانـى said...

يا لطيف اللطف يا رب

هو الموضوع فيه دبح ؟؟

هو كلكم عليا و لا إيه ؟؟ خيخة و الباحث و عصفور ... لأ .. انتم ماتعرفونيش .. أنا لو قلبت لكم على الوش الحجر التانى .. مش هارحم أى حد

حتى روحوا اسألوا عن قبيلة "آل حجر" اللى فى عسقلان .. والله اروح اجيب الرجالة بتاعتى من القبيلة و آجى أقفل المنطقة .. و هاتبقى عركة صباحى .. عشان أخليه عيد غير سعيد على الجميع

سلام بقى عشان أجيب الرجالة

Soooo said...

يااااد حوش دراعك من جنبى يا قليل الادب ...انا دراعاتى الاتنين اهم ...امال ايه اللى بيزغدنى فى جنبى ده ..خلاص خلاص نام دى البطاريه انا كنت حاططها فى جنبى وناسى

هههههههههههههههههههههههههه
هههههههههههههههههههههههههه
هههههههههههههههههههههههههه
هههههههههههههههههههههههههه


ربنا يهنيك ويسعدك ويهون عليك الباقي من ايامك في الجيش

وكل سنه وانت طيب


سلامووووووووز

ammola said...

برضة احنا بنقول نسأل يعنى مش انتو بس اللى بتقوموا بالواجب
ايه بس اللى جرالك...لا حول ولا قوة الا بالله...معلش يا جماعة بس شوية هوا كده عشان يعرف ياخد نفسه وهو حيبقى كويس...ايه المصطلحات العلمية الفظيعة دى كلها ..تصدق انا ما عرفتكش خالص؟والله انا شايفة ان الجيش ده تجربة جديدة ولذيذة يعنى من باب التغيير مش كل حاجة بأه مارينا والريفييرا. يا عينى علينا كل حاجة بتاخدوها مننا يا رجالة حتى الجيش

ammola said...

معلش عندى سؤال...هو مش حضرتك برضة خلصت الجيش بتاعك لما كنت مع حتشبسوت؟؟
(:

الباحث عن الحقيقة said...

الاخت صانعة الحرية
منوره والله يا فندم وشكرا على زيارتك الجميلة وكل سنة وانتى طيبة

.............

بت "مش خيخة "ولا " اى كلام
طب يا ريت تكون سخنة اوى علشان تدبح رقبة حجر مش كتكوت
وكل خيخة وانتى كلام يا واد يا بلية

الباحث عن الحقيقة said...

على اسم مصر
كفاره يا يا ريس حنتيرة
متشكرين يا زوق
وكل سنة وانتى وجميع اهالى ولاية طنطا العظمى بخير

.............

سووووووووو

يخرب عقلك يا راجل يعنى مالقيتش غير المشهد اللى الرقابة عاملة مشاكل عليه وتقتبسه
منور يا فاضحنا

الباحث عن الحقيقة said...

الاخت حتشبسوت الشهيره بأمولة
معرفتنيش ليه بقى؟
شايفانى راجع لابس برنيطة
ولا علشان ما انا اسمريت شوية "كتيييير" من الشمس
ومتخافيش يا ستى مش كل حاجة ياخدوها الرجالة
انا اديت اسمك هناك علشان يبعتولك ..اصل عندهم نقص فى سلاح المظلات
بس خدى بالكاحسن ينسوا يدوكى الباراشوت
يعنى ايه بارشوت؟
لا ده بسكوت جديد اوعى تاخدية انتى نطى من الطيارة وانا هبقى افرقه على روحك
ملحوظة : ونعرفك يا ست فاطنة ان جيش تحتمس بخير لان العدو اول ما شاف حتشبسوت مات لوحده تقوليش شاف فليت العسكرى
وكل عاموانتم بخير
يابن حجر البنت دى ما ترجش قبل ما تغسل الكوبايات

Unknown said...

بن حجر كل سنة وانت بالف خير

ابن حـجـر الـعـسـقـلانـى said...

يوميات عيل مصرى

كل سنة و انت بألف صحة و سلامة .. و كل مشاريبك على حسابى .. ما تقلقش .. أنا هاظبط الموضوع مع معلمى الباحث عن الحقيقة صاحب القهوة

فرنسا هانم said...

كل سنه وانت طيب يا احمد
انا مكنتش اعرف ان المدونه دى شركه انت وابن حجر العسقلانى
لكن هى فكره كويسه
ان اتنين يشتركوا فى مدونه
وعلشان انا مدخلتش الجيش
معرفش ان فيه الفاظ زى كده
ربنا يعدى ايامك على خير
وتطلع من الجيش
تاخد كورس تهذيب الفاظ
وترجع لعالمك تانى
كل سنه وانت طيب يا باحث عن الحقيقه
كل سنه وانت طيب يا ابن حجر العسقلانى
يلا
اتنين فى مدونه واحده
توفير
اختكم فرنسا هانم

الـسـيـدة نـون said...

كل سنة وانت طيب يا ابو العساقيل وكل سنة وانت طيب يا باحث عن الحقيقة
ومعلش جاية متاخرة شوية بس التوك توك بتاعى كان عطلان ماكنتش عارفة الف على صحابى البلوجرية
كل سنة وانتوا بالف خير
اختكم خيخة

ابن حـجـر الـعـسـقـلانـى said...

فرنسا هانم

منورانا يا أختاه ..و الله أنا و الباحث عشان نختار اسم المدونة دى اختارنا الاسم من حوالى 50 اسم قعدنا نقترحهم سوا

و بخصوص التوفير.. الواحد برضه يدفع نص الإيجار و لا يدفع الإيجار كله .. خصوصا إن القهوة على ناصية و مكانها مكلف جدا

منورانا يا أخت فرنسا .. و ماتنسيش تزودى العجلة الأمامية قبل ماتمشى عشان مهوية حبتين .. عندنا منفاخ جوة .. خدى لك كوباية شاى على ما أجيبه

ابن حـجـر الـعـسـقـلانـى said...

بنت خيخة و أى كلام

كل سنة و انتى طيبة ... لا متأخرة و لا حاجة .. تلاقيكى شغالة زيارات عائلية لغاية ما تعبتى .. كان الله فى عونك

ثم احنا فتحنا قسم فى الاستراحة لصيانة العجل عشان اختنا فرنسا .. شكلنا كدة هانفتح قسم تانى لصيانة التكاتك

القلم السكندري said...

والله العظيم انت مشكلة

دي اول زيارة ليا بس خلاص المدونة بقيت في الفيفوريت

حمد لله ع السلامة

ورغم البوست بتاع السواقين اللي انتم حطينه بعد ده بس لازم اعلق هنا الاول

تحياتي

Unknown said...

احجز الان مع مؤسسة السبيعي احداث الاشكال المتميزه جدا منخيام شعر رائعه باشكال متميزه ايضا .
للتواصل معنا :
http://www.alsobaee.com/2013/12/Canvas-Tent.html

0501401148

Unknown said...

يمتعكم باستقبال الخدمات علي مدار ال 24 في السبيعي مظلات الرياض الان في تالمؤسسة وينفذ الطلبات فورا .
للتواصل معنا :
http://www.mazallat.com/Umbrellas-Cars-Mosques-Riyadh.html


0500296699