عاملولك ايييه فى الجيش يا دفعة

س3 يسار س يد افد حول
بلغ عن قوة السمع ...اسمعك كروان
تمام وارسل
زوبعة الااااااااااااااااااان
ارتفاع 275 ..زاوية بصر30 ..اخر مربوطة 54_52
واحد صاروخ اضرب
اضرب ياحمد وارحم دين امى
تمام وضرب
الو عمليات ..النتيجة
س 3 امتياز
الله اكبر ..مبروك يا فندم

السلام عليكم ورحمة الله وبركاته اخوانى المدونين واخواتى المدونات واساتذتى الكرام يا اصحابى يا اهلى يا جيرانى انا عايز اخدكوا فى احضانى وراجعين راجعين رفعين رايات النصر " خلاص رحمتكم من الاغنية دى وحذفتها بنفسى" ومصر بخير يا رجاله واهدى سلامى للست فاطنه واقولها جوزك حراجى القط بخير والحمد لله انا شفته بالنضارة المعظمة وانا واقف على القنال وهو بيشتغل فى السد العالى ما تستغربيش يا فاطنه اصل انا ابن عمى الوسطانى اسمه ابو لمعة بتاع ساعة لقلبك
ما علينا ما علينا
وكمان ريحتكم من الميكروباص اللى كان واقف هنا وموضوع ابن حجر حجنجر عن الميكروباصات لانه كان واقف فى الممنوع
والحقيقة ده كان حقد منه لانه كان نفسه يشتغل تباع على ميكروباص لكن بما انه فاشل وبتاع امهات كتب مجموعه ما جابش غير كلية هندسة قسم فشل اتصالات
بالمناسبة وقبل ما ندخل فى الموضوع ..مش انا احمد اللى لو ما ضربش كان طلع فيها دين ام رئيس العمليات ..احمد ده كان ضابط الموقع
وعذرا لذكر لفظ غير لائق ولكن زى مانتم عارفين الجيش كمان مدرسة لتعليم الالفاظ الالفاظ يعنى
وده يفكرنى بالاغانى الشعبية اللى سمعناها فوق فى مربض النيران اثناء فترات الراحة وقبل النوم حيث كنا نجتمع ونتسامر ونغنى جميع اغانى الافراح الممنوعة من العرض من عينة : حرامى ياما وشفت البنت بتقول لامها ايه والبدوية البت تقول لابوها... وعاملولك ايييه فى الجيش يا دفعة وربنا يستر وما يطلعش حد عارف الاغانى دى وإلا هنتحبس فيها كلنا فى قضية اداب ..واعذرونى يا جماعة على الالفاظ انا مكنتش فى رحلة انا كان طالع ميتين ابو ميتين اللى جابوا اهلى .
افتكرت مره احدى الاخوات قالت لى فى منتدى : ازاى اهلك بعد ما ماتوا طلعوا تانى هو اللى بيموت بصحى تانى !! طبعا فطست على نفسى من الضحك وحسيت انى ...... الادب ..زى دلوقتى كده احم احم
لكن ييجى ايه ده جنب اغنية ايهاب جامده زى الكتاب ما قال ..انا مسمعتهاش لكن قالولى
ما علينا وإليكم طائفة من بعض الاقوال والاحداث بشكل غير مرتب
- ميدان الرماية : ارقد , عمّر, عندما تكون جاهز اشتبك
قاعدة التنشين : مرور شعاع البصر من فتحة الشيز بالناشنكاه الخلفى الى اعلى سن نملة الدبانة بالناشنكاه الامامى الى اسفل منتصف الهدف
- العنبر بالليل : ياخونا حد يربط عبد الاخر القناوى فى السرير علشان مايقومش زى كل يوم الساعة 3 يروح الحمام بيصحينا كلنا ومش بنعرف ننام تانى
- الو ..ايوه يابت انا وصلت الجيش خلاص ..هاقعد اد ايه؟..هوكله اسبوع ..طبعا العنبر كله انفجر من الضحك لاننا هنقعد شهر وهو بيفهم الجو بتاعه انه هيقعد اسبوع ..فصاح فينا ..بس يا ولاد ..دى مراتى التانية لازم اقولها كده احسن تتجوز عليا
- رايح فين يا صفروت .. الجيش لك سعودية
- واحد منوفى كل ما يجى يطلب من ابوه حاجه ابوه يقوله : صفا واسترح
- يقولك فى الجيش السعودى بيقولو فرطيحه وضوميره بدل صفا وانتباه
- ايه يا عم انت واقف فى الحمام بالسيليب فاكر نفسك كلب البحر..ده انا مكسوف ابصلك
- فوق فى الجبل - عسكرى استدعاء ماسك الطابة وبيقلب فيها باستهتار وبيسأل : ايه دى ياد يا علام ؟....علام ينظر اليه : يا لهوووووى ..ابوس ايدك سيبها بكانها بالراحة .الطابة هى الرأس المتفجره
- اركب يا عسكرى العربية دى ..تمام يا فندم ..يا عسكرى العربية واقفه ليه اطلع بيها يا غبى ..ما بعرفش اسوق يا فندم ..امال بتركب فى الكابينة وراء الدريكسيون ليه؟ ..انت قلتلى اركب ركبت لكن ما قلتليش انى هسوق
- عقولكم ايه اذا كان البرد يخلينا ننام جنب بعض علشان نتغطوا سوا يبقى كل واحد ينام يحفظ ادبه ... يااااد حوش دراعك من جنبى يا قليل الادب ...انا دراعاتى الاتنين اهم ...امال ايه اللى بيزغدنى فى جنبى ده ..خلاص خلاص نام دى البطاريه انا كنت حاططها فى جنبى وناسى
بعد شويه مره تانى ..ايه ده كمان ؟ ..ايه تانى ..انا عارف استنى كده لما اشوف ..خلاص ناموا دى المعلقة كنت حاططها فى جيب البنطلون ...بعد شوية ..وبعدين عقولك ايه ..ايه مالك ؟ الواد بيحرك صوابع رجليه ...وانت مالك بصوابع رجليه بعد انت رجليك عنه
الواد قال بقولك ايه انا قايم من جنبكم انتم الاتنين انتم هتجننونى

بس محدش يفتكر ان ايامنا كلها كانت كده ضحك وبس ..احنا كنا بنبات فى البرد وكنا نقضى معظم اليوم من غير اكل ولامية ..واهى الايام عدت والحمد لله
على فكرة انا رجعت من 5 ايام ومكنتش بهزر ولا بضحك زى دلوقت ..بالعكس كنت متعقد جدا ومتضايق من كل شئ
وانا فى الجيش واقف على الرمل ابص للاسفلت والعربيات رايحة جاية احس وكأننا كنا فى عالم تانى ..وان الدنيا اللى بتبرق بره دى وهم فى وهم ..كل شئ بيعدى ويروح
بس الاكيد انى لما كنت بفتكركم كنت بشتاق لكم جدا .وحسيت قد ايه انتم طيبين واحسن من ناس كتير
وحشتونى
وسمعنى احلى سلام صعيدى شحط محط ..ونزل مشاريب على خساب صاخب المخل
طبعا ابن حجر عمل خميرة فلوس حلوة اليومين اللى انا غبتهم وكان بيحط المليم على المليم ..مش بعيد يكون عملها واتجوز
استرها معانا يا رب

ملحوظة : طبعا فيه ناس هتلاحظ تغيير خاصة فى الالفاظ وانا بعتذر عن اى لفظ سئ ..معلش بقى يا جماعة اوعدكم اغسل فمى قبل الاكل وبعد الاكل خمس مرات فى اليوم