Wednesday, April 30, 2008

دعاة الإضراب .. دعاة الخراب

مبدأيا كدة سيبوكو من العنوان اللى فوق دلوقتى .. هانعرف دة إيه كمان شوية ..أولا أحب أرحب بالزميلة الفراشة زميلتنا الجديدة فى المدونتين و أرجو لها كل توفيق و سداد
ثانيا أنا أعتذر عن انقطاعى عنكم بس و الله مشغول بعنف ورجعت بالموضوع ده لما اخويا الباحث قاللى الناس منتظره عسقول في موضوع جديد
المهم



الجماعة اللى قاموا بالإضراب دول شوية مخربين مفسدين ..و بيعطلوا مصالح البلد .. و بيوقفوا المواصلات .. و بيكسروا المرافق .. و بيعتدوا على الممتلكات .. و بيوقفوا الإنتاج .. و بيحركهم حقد طبقى (لاحظوا إن الكثير من المشاركين فى الإضراب بجانب العمال هم مدرسون و موظفون و مهندسون و محامون و أطباء و طلبة جامعة و طلبة مدارس و ما إلى ذلك .. يعنى طبقة متوسطة .. ماعرفش الحقد الطبقى هاييجى منين) .. و دول (المضربين يعنى) يعدون طليعة ما يسمى بـ "الشيوعيين الجدد" .. و بينفذوا مخططات الغرب الليبرالى العلمانى الملحد الكافر .. و بيحاولوا يطبقوا الديموقراطية اللى هى بتعادى الإسلام (معلش يا جماعة اسمعوا منى للآخر).. إلى جانب إن اللى بيعملوه دة يعد "خروجا على الإمام" .. و كل دة ليه ؟؟؟؟؟ قال عشان عايزين شوية مطالب ثانوية زى إيقاف حالة الغلاء و كمان رفع الأجور .. مش معقول يعنى عشان شوية مطالب زى اللى فاتت دى اللى هى بتعد من الرفاهية فى الحياة (إن الواحد لما تتبعزق كرامته عشان يشترى رغيف عيش غاية فى السوء و بربع جنيه فيطلب إن الوضع دة يتوقف فدة يعد رفاهية) نقوم نعمل إضراب و نخرب البلاد و نبقى عملاء للغرب و نغضب ربنا .. مايصحش طبعا .. دة حتى أيام سيدنا عمر المجاعة استمرت لمدة تسعة أشهر و ماحدش فكر يعمل إضراب (ماعرفش إيه وجه الشبه بين المجاعة أيام سيدنا عمر و بين الأحداث الحالية .. شروط القياس غير متحققة) نقوم احنا نطلع نعمل إضراب ؟؟ لأ .. لازم نصبر .. دى الحالة اللى احنا فيها لسة ماوصلتش لمجاعة .. اصبروا .. تحملوا (مش عارف لحد إمتى هانصبر و هانتحمل .. يمكن لغاية ما تضيق بينا الدنيا و يبقى حلال لينا ناكل لحوم الميتة .. شراء هياكل الفراخ بعد ما كانت رائجة بين الفقرا بقت صعبة هى كمان)ا







الكلام اللى بالأحمر اللى فات دة مجرد مقتطفات بالمعنى من خطب لبعض الدعاة و الشيوخ عن موضوع الإضراب .. يا ريت يا جماعة تسمعوا الكام خطبة دول عشان ماحدش يظن إنى باتجنى على حد و عشان تكونوا على بينة من رأى كبار الدعاة حول أمور الإضرابات و الاعتصامات .. و الكلام السابق كان عينة من كلام كتير جدا .. العنوان اللى فات دة هو جملة قالها الشيخ رسلان بنفسه






الدرس الأول للشيخ محمد سعيد رسلان








الدرس الثانى للشيخ محمد سعيد رسلان









درس للشيخ مصطفى العدوى






درس للشيخ سعيد عبد العظيم






درس للشيخ ياسر برهامى








أنا سمعت الخطب دى بالكامل .. و كان نتيجتها إن أعصابى اتحرقت .. خلط .. خلط شديد شديد جدا بين المفاهيم و بعضها .. خصوصا موضوع "الشيوعيين الجدد" و "الحقد الطبقى" دة .. بصراحة حسسنى بالإهانة فضلا عن إنه كلام فى رأيى يعد ضربا من الوهم .. كل من لدغه الفقر أو عضه الجوع أو أهانه الفساد أو قهرته المحسوبية يعد شيوعيا يحركه الحقد الطبقى




هم مفترضين أصلا إن "إضراب" يعنى "اعتداء على ممتلكات" .. و مصرين إن "اعتصام" يعنى "تعطيل مصالح" .. فى حين إن الدعوة للإضراب اللى فات كانت بهدف لا الإضراب و لا الإعتصام .. الهدف منه كان الانقطاع عن نشاط الشراء بوجه عام .. و دة سلوك دعى إلى مثله سيدنا عمر فى فترة من فترات حكمه .. لكن هؤلاء الدعاة مش شايفين الكلام دة .. لا موقف سيدنا عمر و لا المعانى الحقيقية للمفاهيم




و أى حد متابع النشرات و الأخبار هايقدر يدرك إن لو كان هناك بعض أعمال عنف فإنها من عناصر مدسوسة من اللى عايزين يبوظوا الإضراب .. لو حد عنده قدر بسيط من الفطنة و الكياسة هايقدر يدرك دة و كما نعلم فإن المؤمن كيس فطن




و حتى لو الدعوة كانت إلى "إضراب" أو "اعتصام" .. كل دى وسائل سلمية يقوم بها الناس بهدف توصيل مجموعة مطالب لأولى الأمر .. يعنى مش بهدف لا خروج على حد .. و لا تكسير مرافق حد .. لكن كما هو معروف إن دى وسائل ديموقراطية .. و الديموقراطية فى رأى هؤلاء الدعاة حرام شرعا.. إذا كانت الوطنية حرام من وجهة نظرهم .. هاتيجى على الديموقراطية هى اللى هاتبقى حلال




ملاحظ إن هؤلاء الشيوخ و الدعاة قاموا بتعريف "الإضراب" و "الاعتصام" بتعريفات مالهاش علاقة بحقيقتها عند أهل التخصص (اللى هم الناس اللى عارفة يعنى إيه ديموقراطية) .. و من خلال هذا التعريف الجديد و الغريب و المرفوض أصلا من أى شخص عادى نلاقيهم هاجموا المفاهيم الأصلية .. فتضيع الحقيقة




نفس الطريقة دى تم التعامل بيها مع "الوطنية" و "المواطنة" و "الوطن" و "القومية" و "الهوية" و "علم الكلام" و "التصوف" و "الفلسفة" و "المنطق" و "التأويل" و "العقلانية" و "الفرقة الناجية" و طبعا معاهم "الديموقراطية" و ما يندرج تحتها من "إضراب" و "اعتصام" و "انتخابات" و "مجالس نيابية" .. المفاهيم دى بعضها وضحناه فى تدوينات سابقة عشان ماحدش يقول إننا بنتجنى على حد .. زى التدوينة دى و دى و دى و دى




أنا بجد مش عارف هذه الطريقة الجديدة فى التعامل مع شئون و قضايا الأمة هم بيتبعوها ليه ؟؟ يعنى إيه إنى أجيب المفاهيم دى و أطلق عليها معانى سيئة مالهاش علاقة بيها و ابتدى أهاجمها .. هل دة عن عمد ؟؟ و لا عن عدم علم ؟؟ لو كان عن عدم علم فكان يجب أن يسألوا أهل الذكر إن كانوا لا يعلمون .. أما إن كان عن عمد فلا تعليق




لو كان دة هو منهج هؤلاء الشيوخ و الدعاة فى التعامل مع قضايا الأمة و شئونها .. فأكاد أقسم أن ما هذه بسلفية ترضى الله و رسوله .. بل ما هذه بسلفية أصلا

أعتقد إنى لو أعطيت نفسى الحق إنى أستخدم نفس المنهج بتاعهم فى الحكم على الأشياء فهايبقى عادى جدا إنى أقول إن السلفية يعنى سلبية (يا جماعة أنا عارف يعنى إيه سلفية لكن الجملة اللى فاتت دى من قبيل توضيح تأثير المنهج الغريب)ا



هؤلاء الشيوخ و الدعاة ربما هم مهرة و متمكنون و لا يشق لهم غبار فى أمور العبادات و أمور العقائد و أصول الدين و علوم الحديث و ما إلى ذلك .. نعرف فضلهم فى ذلك و نقدرهم و نجلهم لأجله بل و نرجو لهم التوفيق و السداد .. أما قضايا الأمة الراهنة الكبرى فلها وسائلها فى التعامل معها و التى يجب إجادتها قبل أن نخرج برأى له وزن فضلا عن أن يكون رأيا مخالفا لجمهور أهل الفهم و الرأى و الخبرة




طب أنا هاحكيلكم حكاية .. أبو حامد الغزالى لما حب يواجه هجوم الزنادقة و الباطنية فى القرن الخامس الهجرى و كانوا متسلحين بسلاح الفلسفة و المنطق .. فضل سنوات و سنوات يدرس فلسفة و منطق لغاية ما امتلك زمامهما و كان فارسا من فرسانهما إلى أن تغلب على كل زنادقة و ملاحدة عصره فأطلق العلماء عليه "حجة الإسلام".. و قسم علوم الفلسفة تقسيم غاية فى الدقة .. يعنى قبل ما يحكم على الفلسفة درسها صح .. و لم يمنعه مانع فى سبيل طلب الحق .. و برغم كدة كان ضعيفا فى علوم الحديث و هو كان عارف كدة و كان بيقول على نفسه إن بضاعته فى علم الحديث مزجاة .. يعنى لم يدع المعرفة و لم يطلق على مصطلحات و مفاهيم علوم الحديث تعاريف جديدة .. لو جينا شوفنا هؤلاء الدعاة بيقولوا إيه .. بيقولوا إن الديموقراطية حرام .. طب درستوها بالتفصيل ؟؟ يقولوا إنها بتخالف الإسلام و ماينفعش نتعامل مع ما يخالف الإسلام !!!!!! فلم يتبق لهم إلا إطلاق معانى جديدة على المفاهيم لا عن علم و يقين .. و لكن إن هم إلا يظنون




فيه قاعدة منطقية بتقول "الحكم على الشىء فرع عن تخيله" .. طب إزاى هايتخيلوا الشىء من غير ما يعرفوا عنه حاجة .. دى أبسط قواعد المنطق .. لكن بما إن علم المنطق عند هؤلاء الدعاة هو علم محرم أو على أفضل تقدير علم لا طائل من وراءه .. فطبيعى إننا نجد هذا المنهج الغريب فى التفكير




يعلم الله أنى راجعت نفسى و نويت أن أتوقف عن مثل هذا النوع من الكتابات و كنت هاسيب الدعاة يقولوا اللى هم عايزينه .. و كنت سأهتم بمواضيع أخرى لما ارجع للتدوين تانى بإذن الله .. كنت هاتكلم عن أحداث تاريخية أو شخصيات إسلامية أو عن آرائى الخاصة فى شوية مواضيع .. و يشهد على ذلك دكتور حر فقد صارحته بما فى نفسى من مراجعة .. مراجعتى لنفسى (بجانب انشغالى) هى اللى خلتنى لا أنشر آخر حلقة من موضوع الوطنية اللى كنت باناقش فيها رأى الشيخ الطبيب محمد اسماعيل المقدم و اللى اكتفيت بإنى أبعته للناس على إيميلاتهم للى طلب منى أو علق على الموضوع أو اهتميت بإنهم يقرأوه (اللى عايزنى أبعته ليه يقول لى يا جماعة) .. لكن اللى سمعته فى الدروس دى أطار صوابى و فضلت أيام أحاول السيطرة على الكلمات لأتمكن من الكتابة بشكل هادئ و دة اللى خلانى أتأخر فى عرض الموضوع بعد أحداث الإضراب مباشرة بجانب إنى مشغول جدا




بصوا يا جماعة .. الله يخليكم .. كل واحد فينا ربنا رزقه بعقل .. بواسطته نقدر ناخد قراراتنا .. و على أساسه ربنا هايحاسبنا .. و المفروض إننا على قدر جيد من الوعى .. فإما أن نرضى أن نسلم عقولنا و إراداتنا و آذاننا لغيرنا لكى يختاروا لنا و إحنا اللى هانتحاسب فى الآخر .. يا إما نشغل عقلنا و إحنا اللى نقرر من غير سلطان حد علينا أو واسطة بينا و بين الدنيا .. و برضه إحنا إللى هانتحاسب فى الآخر .. فخد قرارك بنفسك و اتحاسب عليه بدل ما تخلى غيرك ياخد لك قرارك و برضه هاتتحاسب عليه

33 comments:

الباحث عن الحقيقة said...

هييييييه
اول تعليق
ههههه
وحشتني يا عم ..فينك يا راجل
واضح قوي ان الموضوع معصبك علشان كده انا كنت بقرا وحاسس انك بتزعق
جايز علشان انا سمعته منك قبل كده
هههههه
اول خطبة مدتها ساعة وعشر دقايق صوت بس يا باشا مش كفاية طالع عيني مع الفراشة في الصحيفة ..مش ترحب بالشريك الجديد ولا ايه ..دي اللى قاعده في أرابيزك لو انا حصلي حاجه
ههههههه
سلام وليا عودة ده بس ترحيب

بنت الصالحين said...

السلام عليكم
هدوووووووووووووووء



موضوع كبير كبير يعني
:))

طيب اولا انا مسمعتش لسه الدروس معلش والله مش هينفع اسمعها دلوقتي
علشان كده هتكلم عن رايي الشخصي ومش هتكلم عن حد من الشيوخ



اولا انا مع الاضراب او ضد
؟؟

انا معاه بس لو كان زي ماانت قولت كده


لان لو جينا علي ارض الواقع
هتلاقي ان ده محصلش


اه انا كنت من اللي قالو نعم للاضراب


بس بصراحه بعد اللي انا شوفته من حرق وقتل طبعا معجبنيش


بغض النظر عن مين

طيب تعرف الكلام ده حقيقي ان فيه كتير مكنش فاهم حقيقه الاضراب


لو رجعت لموضوع كاتبه الاستاذ عصفور
هتلاقيه كان بيتناقش معانا في كيفيه الاضراب

وفعلا اتفقنا كلنا ان المفروض اننا نضرب عن سلع غاليه مثلا علشان يفكروا الف مره قبل ماتغلي


وده طبعا اللي انت قولته هنا ان الاضراب اننا نضرب عن سلع شرائيه


وده كان هيبقي تمام لو حصل


وكان نفسي يحصل :((



المهم راي الشيوخ طبعا انا مسمعتش المحاضرات بس بدام ماسمعتهاش فانا مش هقول غير ان ممكن يكونوا قصدهم عن الحريق واللي حصل




علي فكره انا لو وافقت علي اضراب تاني هضرب علشان عدم العدل وعدم الشفافيه والابراج العاليه اللي هما فيه


يعني ازاي واحد ياخد فلوس بالملايين لمجرد انه وزير
ياسلام وزير ده يعني يشتغل اكتر يشوف الناس
مش ياكل الناس

مافيش شفافيه
سرقه ونصب وسجون ومعتقلات ع الفاضي ومن غير اي وجه حق


ممممممممممممممم

هو لسه في كلام كتير وردود كتيره بس والله ورايا حاجات كتير لازم اخلصها

هروح وابقي ارجع اشوف رد حضرتك ونتناقش فيه


السلام عليكم

the others said...

الحمد لله

أنا مريحي نفسي ومنفضه للشيوخ خالص كلهم واحد واحد علشان دمي ما يتحرقش ودماغي ماتلفش ..الواحد مش ناقص عبقريتهم الفذه..ومناخيرهم اللي حاشرينها في اللي ملهمش فيه

تقريبا هما بيعتمدوا على نظرية المحشي
تقعد قدامه يعملولك غسيل مخ ويحشوا دماغك بكلامهم
الله يرحم العز بن عبد السلام

صاحب المضيفة said...

مش ناقصة حرقة دم الله يخليك

كل الي الواحد بيقوله ساعة لما يشوف الكلام ده

الحمد لله الذي عافانا مما ابتلى به غيرنا وفضلنا على كثير ممن خلق تفضيلا


تحياتي

la3lahakhier said...

هى جات عليهم يعنى
بس انا مش مع ان الناس تدى فرصة للفوضى
تفتكر احنا بلد تفهم يعنى ايه نظام ولا ايه اخلاقيات خلاف عشان نبدأ فى ابداء ارائا وكمان اضرابنا ؟
لسه ادام شوية عبال مانتعلم ان كل شىء لازم يتم بعقل ومش مجرد شعارات وخلاص
انا مع حرية الراى بس مع الادب فيه اكتر
عود احمد سيد عسقول

دكتور حر said...

لا فض فوك يا ابن حجر

هو طبعا الموضوع ده كان يمشي مع الكاشفه اكتر من الاستراحه على ما اعتقد

ما يؤرقك هو ما يؤرق الكثير من المسلمين في هذا الزمن
وهو أن تجد ان خطابا من خطابات الدين يصطدم بالواقع وبالحياه

وقد تجد فيه في بعض الأحيان ان الدين قديم ولا يستطيع ان يتقدم ويتماشي مع المستحدثات في الحياه

او تحس يأن مستوى الدين ضعيف لدرجة انه لا يستطيع ان يستوعب ما يستجد في الزمن
وتكون الحلاصة ان يا دعان
الحياة حاجه
والمشيخه حاجه تانيه

وحاشا لدين الاسلام من ذلك

واضف لتلك الأزمة
أن يكون الدين في ذات الوقت مصطدما مع شيء غالبا قد اتفق الناس على كرهه وبغضه وهو الحكومة واعمالها

ليكون الشعور المتولد طبيعيا ازاء سياسات الدولة هو شيء ما
وياتي رأي الدين ليقول ان هذا شعور لا تستوعبونه انتم وهذا ضد الدين


فعلا فتنه عظيمه

لكن العزاء الوحيد بها

هو قلة انتشار هذه الصوتيات
وهذه الدعوات

هي تنتشر في أوساط أو في نفوس لن ينصلح حالها بغيرها على ما أعتقد
لذا فهون عليك
وانما الحق مع فطرة الله التي فطر الناس عليها
فطرة الدين مع فطرة بغض الظلم
وطلب العدل
وطلب الحق

والله غالب على أمره ولكن أكثر الناس لا يعلمون

وتحياتي لك يا صاحب البهاريز يا هندسه يا غالي

Anonymous said...

السلام عليكم ورحمه الله وبركاته

بالنسبه لموضوع الشيوخ والدعاه والمفتين فانا دمي مش بيتحرق بس منهم ...ممن تقول بيحصلي حاجه ما بقدرش اوصفها خاصه ان كانوا لا يستخدمون الا بعض الالفاظ والكلمات التي من الله بها عليهم ليبينوا قدرتهم الفظيعه ورجاحه عقوله وفهمهم لبواطن الامور

لذا لنترك امر الشيوخ علي جنب فلهم شيوخ اعلي منهم جديرون بالرد عليهم !!

الاهم بحق هو الاضراب
هل هو صواب فعلا ام خطأ؟

ماحقيقه مشاركه الاخوان فيه ؟

ما اهدافه ومانتائجه ؟

ماالخطوات التي تليه ؟

بصراحه اسئله كثيره دربكت مخي لدرجه الصداع

فياريت لو حضرتك تعرف تفهمني ايه الي بيحصل تشرحلي


في موضوع اسمه

وإضراب 4 مايوPain gate theory

علي مدونتي

http://kalame.maktoobblog.com/

اتمني ان حضرتك تشوفه وترد عليه لاني بجد في حاجه لمناقشه موضوع الاضراب مع اي شخص

dina seliman said...

الاضراب كنوع من انواع الاعتراض السلمى اراه مقبول
لكن ما حدث من تدمير وخراب هذا لايقبله عقل ولا دين

الباحث عن الحقيقة said...

هو انا داير ألف على كعوب رجليا لما ورمت
واتاري الناس بتيجي تركن هنا وانا قاعد مستنيكم في الصحيفة
طووووويب
سك ع المشاريب يا بن حجر لغاية ما كل واحد عليه حساب قديم يدفعه

الباحث عن الحقيقة said...

عاشقة الفردوس
كلنا ده التخريب ..وده امر متوقع لما تلاقي فيه عنف من الاجهزة الامنية الناس بترد وبترد بشكل تخريبي لانها معندهاش فكر منظم
لكن يكفي ع الاقل الاضراب بمعنى خليك بالبيت في هذا اليوم
بس كمان الاضراب يستمر اننا نضرب عن شراء بعض السلع الغالية لغاية ما ترخص
وهي فعلا هترخص بس مش علشان سواد عيونا ولكن دي نظرية اقتصاديه العرض هيزيد مع قلة الطلب السعر ينزل

................
الاخرون
مفيش احسن من التنفيض
بس بمناسبة غسيل المخ والحشو الجديد ممكن اعرف نوع المسحوق ايه؟

........
صاحب المضيفة
منور يا باشا نجيب واحد يتسحلب بالمكسرات هههه

.........
دكتور حر
انت قلت كلام كتير بصراحة وانا بهنج دلوقتي
انا هرحب بيك يا عم واقولك تشرب ايه وهسيب الرد لابن حجر

الباحث عن الحقيقة said...

لعلها خير
اه صحيح انتي قبل دكتور حر
طيب نتعلم
وعلشان نتعلم يبقى مش هنتعلم ماهومفيش فرصة نتعلمفين يا حسرة
وبعدين شوفي كيلو العلام بقى بكام

..........
قلمي
اهلا وسهلا ان شاء الله ارد الزيارة وابن حجر صاحب الموضوع هيرد عليك

.........
دينا سليمان
اه مقبول
اه التدمير والخراب مرفوض
بس هو مين اللى بدأ
ليه مش يسيبوا الناس تعمل اضراب سلمي
ونحن مع الاضراب السلمي
عايزين بس نقول اسمعونا ..حسوا بينا
اهلا وسهلا
ميتك ايه مية سادة ولا ع الريحة

ابن حـجـر الـعـسـقـلانـى said...

أبو البواحث عنترة ... ازيك يا راجل .. و الله المكان وحشنى جدا بس مجد مشغول فحت

خلاص يا عم ماتسمعش الخطب هم بجد طوال جدا إلى جانب انك لازم تاخد دوا ضغط الدم قبل ما تسمعهم

و يبدو كدة إن الزميلة العزيزة الفراشة داخلة عالم التدوين بمتهى الحماس ربنا يوفقها .. و هاروح أشوف المواضيع بتاعتها أول ما أخلص اللى فى إيدى بإذن الله

أخش بقى أسلم على الناس

----------------------

عاشقة الفردوس

و عليكم السلام و رحمة الله و بركاته

أنا معاكى إن كان فيه أحداث عنف حصلت فى الإضراب اللى فات .. لكن دى كانت إما من عناصر دخيلة .. أو كانت رد فعل على الأسلوب القمعى العنيف اللى تم استخدامه ضد المضربين

أنا بالفعل قرأت موضوع الأستاذ عصفور المدينة و كان لى تعليق طويل عليه و من الأفكار اللى عجبتنى إن الإضراب يبقى مركز فى سلعة معينة و لفترة طويلة شوية .. بس الإضراب اللى فات كان فترته قصيرة جدا (يوم واحد) إلى جانب إنه كان غير موجه لسلعة بعينها و بالرغم من دة الحكومة استجابت قبل الإضراب بأيام و بعد الإضراب برضه و أخدت شوية قرارات فى صالح الناس .. هى قرارات ضعيفة لكن أهى خطوة

الأهم من دة كله هو حالة الوعى اللى تولدت عند الناس و الحركة الجماعية اللى عملوها .. هو دة أهم حاجة فى رأيى و أهم من قرار حكومى عابر أو كذا كشك عيش اتبنوا فى الشوارع ... و مستنى تعليقاتك القادمة و ربنا يعينك على مشاغلك .. و يعيننى أنا كمان
------------------

the others

بجد عندك حق .. بس التنفيض دة بيبقى محتاج طاقة نفسية كبيرة و أنا فضولى بيمنعنى إنى أنفض بصراحة

و بمناسبة العز بن عبد السلام .. هذا العالم الجليل كان بيقول للظالم يا ظالم فى وشه .. مش زى دلوقتى بقوا مابيقولوش يا ظالم دى لا فى وش الظالم و لا فى ظهره .. بل بيأمروا الناس إنها تستجيب للظالم و تصبر لحد ما الناس يتطحنوا
----------------

صاحب المضيفة

و الله أنا اللى اعصابى اتحرقت و كنت باحس بغليان فى نافوخى من الكلام اللى سمعته

ربنا يهدينا جميعا و يوفقنا للصواب و يرزقنا العمل بيه

----------------

la3lahakhier

أنا معاكى طبعا فى إن الفوضى شىء مرفوض .. لكن مش معاكى إن الناس تتوقف عن العمل فى إنتظار إنهم يتعلموا .. طب هايتعلموا إزاى .. لازم الممارسة .. إلى جانب إننا كشعب مستوانا مش سىء جدا فى القيام بعمل جماعى

الإنسان الحر بيقدر يتصرف بمسئولية .. لكن فى أجواء القمع و القهر بنلاقى نماذج متشددة و بتتصرف بعنف لكن مش بتبقى الغالبية

و زى ما قلتى إن الناس لازم تتصرف بعقل .. و دة هو اللى حصل بالفعل من ناس كتيرة فى الإضراب الأخير

ابن حـجـر الـعـسـقـلانـى said...

دكتور حر

و الله يا دكتور انت كلامك مية مية .. بالفعل الواحد بيشعر كأن النصوص فى أيدى هؤلاء تأخذ تفسيرات تتعارض و الفطرة .. أو كأن الالتزام بتعاليم الدين معهم تجعلك فى جهاد دائم ضد نفسك بل ضد حاجات طبيعية و ملحة فى حياتك .. بل أحيانا يتم دفعك دفعا إلى اقتطاع و انتزاع جزء من فطرتك كى تسطيع أن تلتزم بما يقولون

بس انا أعتقد إن المريدين لهؤلاء الدعاة كتير .. و بيزيدوا كل يوم .. بل كلما أراد شخص أن يلتزم دينيا فإنه يبادر إلى مواقعهم ليستمع إلى خطبهم و دروسهم و تبدأ العجلة فى الدوران

و بالضبط زى ما انت قلت .. أو بعبارة أخرى .. إن حلول مشاكل الأمة عندهم تكون بنقل الأحداث الحالية و صبها فى قوالب الماضى

و أشكرك على تعليقك الجميل

---------------

قلمى

أنا معاكى بجد فى إن أعصابى بتبوظ من كلام كتير باسمعه منهم .. بس المشكلة إن حتى الشيوخ الكبار اللى المفروض يردوا عليهم مش بيلاقوا أى تقدير و لا معاملة حسنة

يعنى مرة استمعت لأحد هؤلاء الدعاة بيتكلم بشكل مستفز عن الشيخ محمد الغزالى و قعد يضحك بسخرية هو و الناس اللى فى الجامع اللى بيقول فيه الدرس

هذا التيار الذى يمثله هؤلاء الدعاة متسبب فى أزمة كبيرة جدا لأنهم شايفين إن آراءهم فقط هلى اللى صح و غيرهم يتراوح بين الخطأ و بين الضلال .. أى لا احتمال للصواب فيما يقوله غيرهم من العلماء الأجلاء

أما بخصوص تفاصيل الإضراب .. هاجى إن شاء الله عند فى المدونة لما أخلص كدة كام حاجة فى إيدى

و نورتنا زيارتك
---------------------

dina seliman

فعلا التدمير و التخريب لا يقبله عقل و لا دين .. لكن التدمير و الخراب ماكانش هو الصفة الغالبة على أحداث الإضراب اللى فات

و الأحداث العنيفة كانت إما من عناصر دخيلة أو كانت رد فعل على القمع و الشدة اللى تم التعامل بيهم مع المضربين

التدمير و التخريب كان فى دوائر ضيقة جدا بشكل لا يجعلنا نقول إن الإضراب بوجه عام كان مفسدا

و الناس بتتعلم من تجربتها

Unknown said...

للاسف لم اسمع المحاضرات دى
اما بالنسبة للاضراب
فهو حق للشعب فى التعبير عن ما يجول فى خاطرة دون الاضرار بمصالح الغير
يعنى حق مشروع ( طبعا دى وجهة نظرى انا )
يعنى من اهم شروط الديمقراطية
اننا نعبر عن راينا
اما الخطاب الدينى فليس كل الشيوخ لديهم القدرة على دمج الواقع المعاصر فى خطاب دينى
او التحدث عنه
لاسباب كتير

موضوع قوى جداا
بالتوفيق

ابو احمد said...

سعدت جدا بالمدونه
لا املك الا ان اقول لك بارك الله فيك

بنت الصالحين said...

هيييييييه

جيت تاني اهو


ها يلا بسرعه قدامي ربعايه- ربع ساعه يعني-

اولا

كلنا ده التخريب ..وده امر متوقع لما تلاقي فيه عنف من الاجهزة الامنية الناس بترد وبترد بشكل تخريبي لانها معندهاش فكر منظم
لكن يكفي ع الاقل الاضراب بمعنى خليك بالبيت في هذا اليوم
بس كمان الاضراب يستمر اننا نضرب عن شراء بعض السلع الغالية لغاية ما ترخص
وهي فعلا هترخص بس مش علشان سواد عيونا ولكن دي نظرية اقتصاديه العرض هيزيد مع قلة الطلب السعر ينزل




والله ده انت طلعت بتاع اقتصاد اهو خريج تجاره ولا ايه

فكرتني بـ
demand curve

:((


كلامك صح



:::::::::::::::::::::::::::


ابن حجر

انا موافقه علي كلامك جدا وصح اننا بقي عندنا ثقافه الجماعه والتحرك والمناداه بالحقوق

دي خطوه ايجابيه


بس اللي خوف الناس وضايقهم التخريب اللي حصل

وده لحد دلوقتي مضايقني بالذات اما شفت صور ناس واطفال بيموتو او مجروحين قدامي


والله لو الاضراب الجاي هيبقي بانك تقعد في بيتك وماتخرجش وكمان تمتنع عن شراء سلع بعينها يبقي تمام اوي


بس برده لسه مفتقدين الثقافه دي


وبرده لو هضرب يبقي هضرب علشان الظلم وعدم المساواه والناس اللي فوق ا وي وبيحتقروا الناس اللي اصلا هي اللي بتاكلهم

ربنا يرحمنا برحمته


ها استاذن انا بقي
سلام

مجداوية said...

السلام عليكم

تشرفت بعودتك اخى الكريم واقدم عظيم امتنانى لموقفك الذى ذكره الأخ الباحث لى عن دفاعك عنى رغم انى لم أتشرف بزيارتك لمدونتى من قبل

أخى الكريم لا يخفى عليك ومن التاريخ أن الحكومة بيكون لها أبواق ورجالات وواجهات تختارها من كل المجالات الصحفية والتلفزيونية والسينما والمسرح والكورة و رجال الاعمال وأيضا رجال الدين

فلماذا تتعصب وتزعل نفسك وحجتهم أهون من بيت العنكبوت لأن لا مجال ,,,لا مجـــــــــــــــال ,للمقارنة بين أيام الخلافة وهذه الأيام السوداء

فلا للرجال مثل الرجال ولا الضمير مثل الضمير ولا الشريعة مطبقة ولا حتى شرع الله مطبق فلا مجال للمقارنة وأنا لا اتهم أحدا منهم بأنهم أبواق للحكومة فالله أعلم طبعا لكن بما نعرفه فهو أمر مطروح وبديهى ولكن لا اتهم شخصا بعينه

الرفض حق مشروع لكل انسان واذا كثر الفساد فنحن مأمورون بالفرار بديننا والانعزال عن هذا الفساد
ولا تتصور ان دعواتهم يعقلها عاقل ولكنها تصل فقط لمن لديه مصلحة أو من مصلحته أن يستمر الفساد أو انه لا فرق عنده

لذل فأنا أقول لك أخى الكريم لا تتعصب ولا تلق بالا لما يقولون فهذا ليس رأى الأغلبية

وعودا أحمدا ان شاء الله

محمد فوزي said...

أولا : لا أنكر إعجابي بك أنت والباحث عن الحقيقه فكلاكما من الصفوه في عالم التدوين فعلا
ثانيا : إنسى أولا خالص لما تقرا تعليقي , يعني متخليش أولا يحرجك أو يمنعك تعترض أو تنتقد أو تمتعض لإني من مدرسه سياسيه مختلفه قليلا أو كثيرا مش عارف وانا شخصيا سأنتقدك بقدر ما أحترمك
ثالثا : نحن في مجتمع لا يستخدم العقل ويحركنا شيئان الدين والعاطفه
واحيانا تكون العاطفه مستمده من الدين ما علينا
مجتمع كهذا إذا أجمعت شيوخه على فساد الحاكم , سيصل المعنى للمتلقي على نحو أن الخروج عليه و التمرد على حكمه نوع من الجهاد ودرب من الفرائض الدينيه , وهذا من وجهة نظري خطير وخطير جدا , وسيؤدي إلى فتن وكوارث حقيقيه
صحيح أنهم ناقصي ثقافه , لكن اعتقد ان ما أغضبك من محاولتهم للتهدئه هو من وجهة نظري سليم جدا

رابعاً : أنا ضد الإضراب اللي فات واللي جاي ده مبدئيا , وكل تجربه ناجحه لها ما يعرف بالبيئه أو الوسط المناسب لإجراء التجربه
فمش معنى إن طريقة الإضرابات دي بتنجح في أمريكا أو أوروبا إنها لازم تنجح في مصر
انت بتقول ان اللي قام بالشغب وأعمال العنف عناصر مندسه , قصدك يعني إنهم من قبل الأمن
يا محترم تتضمن منين
يا محترم إحنا شعب بيكسر كراسي الإستاد اللي إندفع فيه ملايين عشان إنهزم والحكم مرضيش يحسبله ضربة جزاء
يا أستاذي لما تبقى أخلاقنا سيئه لدرجة إن مدرب شريف يتشتم ويتلعن لأهله عشان مرضيش يفوت ماتش , يبقى تقولي منستناش لما نتعلم لأ ده احنا لازم نتعلم الأول لازم نبدأ بأنفسنا نصلح بعض من خلال النظام لأن الخروج عن النظام ممكن يحولنا لعراق جديد

أخيرا , برغم الإختلاف أحب أشوفك انت و الباحث عندي لأن في مواضيع أتمنى لما أكتبها يعلق عليها ويفكر معايا فيها ناس زيكم

آسف ع الإطاله وشكرا

مجداوية said...

السلام عليكم

اسمح لى أخى الكريم أن أعلق على تعليق الأخ الكريم محمد فوزى
دون طبعا الدخول فى معارك كلامية بل انى أحترم رأيه كثيرا وفيه من الوجاهة والمنطق ما جعلنى أفكر فى امكانية صوابه
لكن
أخى الكريم انت تقول اننا لا نصلح للاضراب لنها ثقافة لم نتعود عليها ,,الأمر أخى الكريم لا يحتاج ثقافة بل يحتاج رفض وغضب على أوضاع لا نستطيع قبولها
وما البديل ؟؟؟؟؟؟؟
القنوات الشرعية كما أضحكونا بقولهم هذه الجملة
أى قنوات شرعية
هل تستطيع مقابلة ممثلك فى مجلس الشعب بسهولة وهل لو قدمت له استجوابك ستحصل على رد سريع لمطالبك ,,طيب وماذا تفعل المعارضة منذ 27 سنة أليست هى من تقدم يوميا صرخات الشعب التى لا تسمعها الحكومة على جرائدها ومن خلال ممثليها فى القنوات الشرعية ساوء مجلس الشعب أو مجلس الشورى
أخى الكريم هم فقط يسمحون بوجودهم حتى يقال انها دولة ديمقراطية تسمح للرأى الآخر فى التواجد لكنها فى الحقيقة تهمشه ولا تسمع له بل وتخرسه وتخرس كل من يعارضها أو يتجرأ ان يأخذ مكانه المشروع فى الحياة السياسية وأكبر مثال أيمن نور والاخوان وحتى الغلبانة اسراء عبد الفتاح لم تسلم من ارهابهم

فماذا يفعل الشعب ؟؟
أنا واحدة منهم أريد أن أفعل أى شىء لوقف نزيف الفساد والارهاب الفكرى وأكل حق وأموال الشعب فماذا أفعل ؟؟بقيت فى البيت وخصم من مرتبى يومان وكان فيه تهديد بخمسة أيام !!! ولكن لو كانوا خصموا الشهر كله لبقيت فى بيتى لأنى أريد أى شىء أى شىء أعبر به عن غضبى ولم أكسر ولم أخرب مجرد الرفض ليس من حقك !!!!
أخى الكريم لا تستغرب أبدا أن تكون الحكومة دفعت ببعض عناصرها للتخريب فى المحلة لتؤلب الناس على الاضراب فما تفعله الحكومة بنا يجعل هذا أقرب للمنطق وحتى بفرض أن هذه العناصر من الشعب فما حدث ليس حكرا علينا فقط فى كل البلاد الأوربية المتقدمة وفى أمريكا نفسها يقع مثل هذا التخريب والتكسير
وفى المباريات أيضا وخاصة مع جماهير انجلترا ,,
وان كان هذا مرفوضا طبعا لكن المقصود أنه ليس حكرا علينا
الغضب يفعل أكثر من ذلك
والأولى أن تحقق هذه الحكومة الفاسدة مصالح الشعب ولا تدفع شعبها الى الهجرة أو الصمت واللامبالاه أم الادمان أو التخريب أو اليأس والانتحار وكل هذا حدث

ربنا يزيح الغمة ويساعدنا على تغيير أنفسنا لكى يتغير هذا الحال المؤسف

وعذرا على الاطالة وجزاكم الله كل خير
أخى الكريم
محمد فوزى
والأخ الكريم
ابن حجر العسقلانى

Empress appy said...

ههههههههه عوده برفع الضغط يا عمنا ليه كده
ايوووون انتم قلله من قللى المندسه
يا حقودين يا وحشين
بص ده توجيهه اعلامى من الحكومه علشان عارفه اضربت ازاى فى المرة الاول ومقدرتش على الناس على الرغم انها كانت سبب فى الخراب ورغم اعتقالتها برضه هنعترض تانى
سيبك من كلام الناس اللى فوق قوى دول
بيأخدوا فلوس ايه الخروج على الحاكم سلميا دى ايه حرقه الدم دي
هما الناس دى مش شايفين ولا اتعموا كده برضه يا عسقول انا راجعه من الاجازة قولت اشرب بيبسى هنا ولا حاجه كده تقوم تشربنى جنزبيل حرام عليك
ن

بنت الصالحين said...
This comment has been removed by the author.
الساحرة said...

حمد الله علي السلامه يا ابو العساقيل

الناس اللي عامله الدروس دي

بيشتغلوة ترزيه عند الحكومه

بيفصلوة الفتاوي بالمقاس

خليهم يقولوة هوحد بيصدقهم

فمتنرفزش نفسك في منهم في البلد كتير

ابن حـجـر الـعـسـقـلانـى said...

نهر الحب

بصراحة انت قلتى جملة عجبتنى .. و هى:"اما الخطاب الدينى فليس كل الشيوخ لديهم القدرة على دمج الواقع المعاصر فى خطاب دينى او التحدث عنه" .. بالفعل باحس إن الكثير من الشيوخ عايشين فى عالم تانى غير الواقع بتاعنا .. أو بالأخص عايشين فى الماضى السحيق و متخيلين إن الحياة لازم تمشى زى ماكانت ماشية من اربعتاشر قرن

نورتينا بتعليقك الجميل

-----------------

أبو أحمد

أستاذى الذى أرجو أن أراه و أتكلم معه يوما

سعدت جدا بتعليقك يا أستاذى .. و عذرا لانقطاعى عن متابعة مدونتك .. فأنا فى غاية الانشغال
-----------------
عاشقة الفردوس

هيييييييية .. عاشقة الفردوس رجعت تانى

يا ستى و الله أنا ماليش فى مواضيع التجارة دى خالص و ماعرفش هو إيه "الديماند كيرف" دة

بصى .. أنا معاكى تماما فى كل اللى قلتيه .. لكن لازم نثق أكتر فى الإنسان المصرى .. الإنسان المصرى زيه زى أى إنسان .. لما تتاح ليه الفرصة إنه يتحرك بنظام هايتحرك بنظام .. خصوصا لما يلاقى نتيجة للى بيعمله هايحس بالمسئولية و يتصرف بشكل أكثر إيجابية

و ربنا يعينك على الحاجات اللى شاغلاكى

و يعيننى أنا كمان :)
-------------------

مجداوية

و الله أنا كنت سعيد جدا بتعليقك .. و معلش اتأخرت فى الرد

المشكلة فى هؤلاء الدعاة إنهم غير محسوبين على الحكومة و كمان ليهم مريدين و أتباع كتير .. فطبعا شىء غريب أن تصب فتاواهم فى صالح الحكومة ناهيكى عن التلميح فى الكثير من أجزاء الخطب إلى إن آراءهم هى الصح و أن المخالفين لآراءهم مخطئين و باسمع كلام منهم يخوف .. الرأى الآخر بالنسبة ليهم دايما مستنكر

و طبعا نرحب بيكى و بأى حد يحب يتكلم و يتناقش .. خصوصا إنى متفق معاكى فى ردك على الزميل المدون محمد فوزى

و حتى لو مش متفق مع اللى عايزين يتناقشوا يتفضلوا يقولوا اللى هم عايزينه بكل صراحة

و نورتينا يا أخت مجداوية
----------------------------

محمد فوزى

أشكرك بجد على كلامك الجميل فى حقى و حق أخى الباحث عن الحقيقة .. و عذرا إنى مش متابع مدونتك لأنى متوقف مؤقتا عن التدوين لأنى مشغول جدا

و يا عم براحتك .. قول اللى انت عايزه و اختلف زى مانت عايز طالما مافيش حد هايحدف بالطوب

المهم .. فى رأيى إننا لازم نتعامل مع الإنسان المصرى بثقة أكتر من كدة .. و حالة تكسير كراسى الاستاد انفعالا لهدف أو ما شابه ذلك دى مش حالة دائمة .. بل حالة عارضة و لا يمكن تعميمها أو أخذ قرار بناءا عليها

حاجة تانية مهمة .. ماحدش بيدعوا لخروج على حاكم أو ما شابه ذلك .. و الخوف من إن خطب الشيوخ تتحول للتحريض على الخروج على الحاكم فدة يعد خوف فى غير موضعه .. لأن الخروج على الحاكم أمر معقد جدا (و هو أمر لم يدع إليه أحد) و أكثر تعقيدا من مجرد اعتصام بهدف إعلان مطالب فى وجه ناس اتقفلت كل سبل إعلان مطالبها

أنا معاك إن محاولات التهدئة قد تكون مطلوبة فى بعض الأحيان .. لكن دة لما تكون هناك فوضى عارمة .. مش لما يكون الموضوع كله على بعضه بغرض مقاطعة أى نشاط تجارى لمدة يوم .. التهدئة فى هذه الحالة هاتكون بمثابة ربط حجر ثقيل فى رجلين واحد داخل سباق جرى .. المفروض إنه يجرى و يحقق هدف مهين و انت تيجى باسم الدين و مسلح بترسانة من الأحكام تبدأ بالتخطىء و تنتهى بالتبديع و الاتهام الضمنى بالخيانة و الانتماء للغير هذا فضلا عن عدم معقولية التناول الدينى للقضية و وضع الأشياء فى غير موضعها

إلى جانب أن عبارة "أن التحرك الجماعى يؤدى إلى كوارث" تكررت كثيرا .. و بالفعل لا أعرف ما هى الكوارث المترتبة على مثل هذا التحرك الجماعى .. كل ما حدث هو بعض أعمال عنف إما بسبب دخلاء أو بسبب القمع أما أغلب الناس فسلكت سلوك طبيعى

و إن كنا سننتظر حتى تتكون البيئة الملائمة للنشاطات الديموقراطية الجماعية .. فإلى متى ننتظر ؟؟؟ و من ننتظر ؟؟؟ و ماذا سنتعلم ؟؟ و من أى مصادر سنتعلم ؟؟ و كيف سنتعلم ؟؟ و هل يكون التطور الإنسانى إلا نتيجة خبرات تمر بها المجتمعات ؟؟ لندع الناس تتحرك بشكل سلمى و تتعلم من أخطائها لأننا لن ننتظر خبيرا فى الديموقراطية ليقيم لنا مستوانا أو ليعطينا نصائح فى كيفية التحرك الديموقراطى الصحيح

الشىء المهم هو إن كل هذه التحركات هى بهدف تحقيق مطالب للناس .. مش بهدف خروج على نظام أو عصيان حاكم

و معلش اتأخرت عليك فى الرد بس و الله مشغول جدا

و أهلا بيك دايما


------------------
Appy

كان نفسنا نشربك عصير قصب متلج بس معلش جات فى جنزبيل .. بس خدى بالك بعد كدة لاحسن يتقال عليكى شيوعية لو أضربتى تانى .. و هاقول عليكى من البروليتاريا الكادحة اللى بيحركها الحقد الطبقى و هابلغ عنك قلم مكافحة الشيوعية .. و كلمة كمان منك هاصادر القلل بتاعتك و هاتهمك بتهمة الخروج على الإمام

و قد بعجر من بنجر

و معلش يا آبى أنا مقصر معاكى فى زيارة المدونة بس و الله مشغول جدا
----------------

الساحرة

و الله عندك حق الحاجات اللى تنرفز كتير .. بس المشكلة إن الشيوخ دول ليهم مريدين كتير .. و كمان مش بيشتغلوا فى مواقع حكومية .. لكن خطابهم دة بيخدم الحكومة بشكل كبير .. هم عندهم الحاكم و حكومته لازم تبقى واجبة الطاعة فى كل شىء .. حتى و إن أمروا بما لا عدل فيه .. بيقولوا إننا مانطيعهمش إن أمروا بمعصية .. و كأن حالات الفساد المستشرية و اللى بتعتمد بشكل كبير على قرارات حكومية دى من وجهة نظرهم مش معصية .. ماعرفش إيه مفهومهم للمعصية بصراحة

بس على رأيك .. الحاجات اللى تنرفز كتير

و معلش يا ساحرة .. أنا مقصر فى الزيارات بس ورايا شغل كتير و الله

حزلووووقه said...

الاضراب حرام وغلط


طيب حلال وصح


حزلووووقه صغيره ع الاضراب لسه


اما حزلووووقه تكبر تبقي تضرب هي حاليا بتنضرب بس
:)))

محمد فوزي said...

ابن حجر
صحيح انك وغيرك من الواعيين لم تدعوا للخروج على الحاكم ولم تحرضوا على ذلك , لكن
في غيرك الحقيقه بيعمل كده إن لم يكن تصريحا فبطرق غير مباشره
وإلا إيه معنى انك تدخل مدونه تلاقي كلام من نوعية أبشروا يا أخوان إن الفجر قد لاح
وأن نهاية الظلم قد إقتربت
وأن مش عارف ايه حصله ايه

إزاي تقنعني مثلا إن حد عايز يصلح منضويا تحت لواء الحاكم(بغير الخروج عليه) ولما بتدخل مدونته تلاقيه حاطت صورة الرئيس والمتظاهرين تدوس عليها بالأقدام في المحله

أهما دول اللي من رأيي ممكن يولعوا الدنيا ويهيجوا اللي مش فاهم ومش كل الناس ابن حجر العسقلاني والباحث عن الحقيقه

نقطه أخيره بس أنا لما بقول إني ضد الإضراب فده معناه إني غير مقتنع بنجاحه أو أني مقتنع إن سلبياته هتكون أكبر من إيجابياته وبالتالي لو كنت في مصر فلن أشارك فيه
إنما ده مش معناه تسفيه المشاركين فيه والداعين إلى قيامه طالما إنهم إلتزموا بالأساليب الديموقراطيه

فده حق يكفله الدستور

تحياتي

حزلووووقه said...

ايه ده حزلووووقه لسه فاتحه المدونه من يومين

هكتبلكم اخرها يعني من اول موضوع طيب مااقفلها احسن
هههههههههههههههههههههههههههههههههه


شكرا علي تشجيعك مع اني جالي احباط ال رد قلبي ولا معرفش مين قال


لا احنا مش بتوع القصص دي انا قصصي اغبي
:P

حزلووووقه said...

عموما حزلوقه حطت موضوع جديد


مستنيه رايك المره دي بجد

ومن غير مجامله

انت شكلك صعب اوي

الـسـيـدة نـون said...

ايه يا عسقول ده
انت كاتب بوست مليئ بالبساتيت
بساتيت جمع بوست يعنى

يعنى اقرا الاقى نفسى دخلت جوة بوست تانى
ومعرفش اطلع منه
اربع بوستات يا مفترى جوة البوست
ده غير خمس دروس للشيوخ

انت بتلعب معانا الدنيئة ولا ايه
يعنى تغيب تغيب
ولما ترجع ترمى كل حمولك علينا كدة مرة واحدة

طب واحدة واحدة علينا
انت ناسى ان فيه معاك ناس خيخة هنا ولا ايه؟

اصبر بقى على بال ما اقرا كل الدروس والبوستات المحشية جو بعضها دى
وهابقى ارجعلك تانى

سلام
اختك خيخة

Soooo said...

تصدق يا عسقول
الموضوع ده اكتر موضوع استمخيت منه في الفتره الاخرانيه دي
اه والله
سيبك من ان دمي اتحرق لما سمعت الخطب .. بس بجد كلامك حلو قوي ومترتب قوي ومنطقي قوي

اما بقى مشايخ الفته .. ودول مالهمش عندي غير الاسم ده
لانهم باللي قالوه في خطبهم اثبتو انهم بيعومو في الفته .. ولا علمهم ومعرفتهم ولا اي حاجه من اللي عملوها زمان وكانت كويسه ليها لازمه بعد الهطل اللي قالوه ده
مشايخ الفته دول هقولهم
انتو اتبعتو الحاكم ونسيتو المحكومين
وانا كواحد من المحكومين
والله العظيم
والله العظيم
والله العظيم
مش مسامحكم ولا مسامح الحاكم في اي قرش اتسرق مني ومن حقوقي
وهاخده منكم ان شاء الله يوم القيامه لما نختصم قدام رب العباد
---
ده انتو هيطلع ترابنتنكم ساعتها


وماتختفيش عننا كده ياعم





سلامووووووووووز

ابن حـجـر الـعـسـقـلانـى said...

حزلووووقه

خلاص يا ستى بلاش تعملى إضراب .. و كمان ما تنضربيش

أنا جيت عندك و علقت على القصة بتاعتك .. و مستنيين الباقى

--------------------

محمد فوزى

أولا أنا اعتذر لو كنت فهمت من كلامى إنى باقول عليك إنك بتسفه الآخرين .. أنا ما كنتش أقصد دة عليك .. أنا كنت باقصده على بعض الدعاة

و بخصوص الخروج على الحاكم .. بصراحة اللى أنا شوفته و سمعته من ناس عادية من الجيران و الأصحاب و حتى فى المواصلات بعد الإضراب و قبله إنهم كان أكبر همهم هو إنهم يضغطوا على الحكومة عشان توقف الغلاء .. دة لا يمنع إن ناس كتير عملت حاجات غير كدة بس فى الغالب الهم الأعظم للناس اللى شاركوا فى الإضراب على حسب ما شوفت و سمعت كان زيادة الأجور و إيقاف الغلاء

و على العموم أهى تجربة خاضها الناس .. و هانشوف هايتعلموا منها إيه

و مستنيين متابعاتك لموضوعاتنا

-----------------------

بت خيخة و أى كلام

معلش يا خيخة البوست مليان لينكات و خطب بس دة عشان فيه ناس بتحاول تلتقط أى ثغرة و تتكلم فيها بعيدا عن الموضوع فتضيع النقاط الأصلية .. يعنى لو حد داخل و ناوى يقول إن الشيوخ دول ماقالوش كدة بالتأكيد هايسكت لما يشوف لينكات الخطب

و لما واحد يدخل و عايز يقول لى:"طب انت عامل نفسك علامة و فاهم كل حاجة ورينا حقيقة المصطلحات دى إيه" هايلاقى التدوينات السابقة اللى أنا حاطط لينكاتها

معلش يل خيخة أصلى كنت غاضب جدا و انا باكتب البوست
-----------------

سوووو

ماتعرفش أنا كنت سعيد قد إيه لما شوفت تعليقك .. أنا معلش مفشوخ فى الشغل و مش فاضى أهرش

المهم

الجملة اللى انت قلتها دى :"انتو اتبعتو الحاكم ونسيتو المحكومين" فى رأيى أصابت كبد الحقيقة

الكثير من الشيوخ و الدعاة هاتلاقيهم استفاضوا بل و بالغوا فى شرح و بيان حقوق الحاكم و واجبات المحكومين

أما حقوق المحكومين و واجبات الحاكم فمش موجودة فى قواميسهم أصلا

يا راجل دة أنا مرة قرأت واحد كاتب فى كتيب من اللى بيتوزعوا أمام المساجد إن طاعة الإمام من أصول العقائد ... معنى الجملة دى إن اللى يعصى الإمام يبقى خارج عن الملة سواء كانت المعصية صغيرة أو كبيرة .. يعنى لو طلع قرار جمهورى بإن الناس تلتزم بالمشى فوق الرصيف فقط و جيت أنا نزلت مشيت فى الشارع لأى سبب أبقى كدة خارج عن الإسلام

انت مش هاتسامح فى حقوقك .. و أنا كمان معاك مش هاسامح فى حقوقى .. و فى انتظار طلوع التربنتين بفارغ الصبر

و ياخى أوبجكشن
:-)

ابراهيم said...

اخي العزيز انا من سكان الاسكندرية وبعض من كتبت من الخطباء نقابلهم ونسمع ارائهم صباح مساء من اول حرمة الانتخابات الي انهم هم افضل ومطبقي السنة الوحيدين في الكرة الارضية هذا ليس ذما فهم ككل الناس لهم مالهم وعليهم ماعليهم لكنهم يون غير ذلك
اخي الكريم ادعوك لزيارة مدونتي واتمني التواصل الدائم بيننا

عاشــــــ النقاب ـقــــة"نونو" said...

السلام عليكم
مش عارفة اول مرة اسمع عن الفتاوى دي بس دة كدة خلط للامور واعتقد اننا بسكوتنا على اللي بقينا وهنبقىى فيه دة بئا اللي حرام دة منكر ونهب واستغفال لنا وسرقة وكل حاجة عيني عينك ايه يعني نتسرق ونقول كمان ولا ايه
اعتقد انه ممك يكون قصد اللي بيخرب
ودة انا ضده نضرب بطريقة منظمة ومن غير ما نخرب في البلد لاننا ببساطة بنأذي نفسنا برضه وهنرجع نصلح بفلوسنا برضه هو دة المرفوض
لكن انا بس عاوزة اعرف حاجة هو فيه سلف زعلوا حضرتك اوي كدة ؟؟؟
السلف اعرف منهم ناس الطمأنينة في اصواتهم حتى وياريتنا ننتجمع على حب الله ورسوله
دمت بود متألقا

Asmaa mahaba said...

عشان اقول شيوخ لهم العجب يقولولى نووو انا مش ححمل الخطبه هو جيجات النت بعزقه
كفايه اللى انت حكيته
تحياتى ليك سومه_87