Friday, June 13, 2008

بنت مزه ..ولد كول.. للكبار فقط

تحذير : هذا الموضوع ممنوع لاقل من 9 سنوات

لان من بعد تسع سنين كله بيفكر في الموضوع ده

احم احم

هل الجنس هو ما يشغل تفكيرنا في مصر والعالم العربي ؟

سؤال قد يراه البعض جريئا ..وذلك لاني قررت اليوم أن اتحدث في الموضوع الغائب الحاضر

الغائب عن أقلامنا الحاضر في افكارنا

وأعلم مسبقا ان هذا الموضوع قد لا يجد ما تعودناه من عدد التعليقات ..لكن لا بأس

سأقبل بذلك في مقابل ..كشف الحقائق النفسية الكامنة في تفكيرنا واخلاقياتنا المزدوجة

لان هذا الموضوع اصبح شئ ملفت ومقزز ويحتاج الى وقفة


سأطرح عليكم الان اسئلة واريد ان تشعروا انتم بحقيقة اجابتها

كم مرة في اليوم يفكر الشاب او الفتاة في الجنس؟

شاب ينظر الى فتاة - فتاة تنظر الى شاب - ترى كم نسبة الفكرة الجنسية في هذه النظرة؟

حين تقترب من بائع الصحف والمجلات - هل تلاحظ الى اي نوع من الصحف والمجلات ينظر الواقفون؟

حين يسير الشاب في الشارع أليس شئ يبعث على سعادته ان يرى فتاة جميلة القوام؟

ويتأملها في حسرة قائلا : يابخته اللى راح يتجوزها

فيرد عليه صاحبه (واحد كده زي التمنياوي طه) بحسرة اكبر : اكيد واحد ابن محظوظه


مره واحد صاحبي قالى : انه لما ييجي يركب ميكروباص لو مالقيش فيه بنت مش بيركب

مش مهم تكون قاعده جنبه المهم الميكروباص يكون فيه بنت على الاقل وخلاص



طبعا مش كل الشباب او البنات كده

لكن ومن غير ما اعمل بحث في جوجل عن ارقام الاحصائيات اكيد كلنا سمعنا الاحصائية اللى بتقول ان الشعوب العربية هي اكثر الشعوب دخولا على المواقع الاباحية ..وخاصة في مصر


حتى الافلام السينمائية ..بعد ان كانت الموضة هي الافلام الكوميدية ..اصبحت الموضه هي الافلام الساخنة

بنات وموتسيكلات , الريس عمر حرب , كبارية , حين ميسرة


وبمناسبة الموضه

كنت واقف انا وواحد صاحبي بنتكلم في الشارع وعدتت جنبنا واحده قصيرة ولابسه من غير اكتاف

فبيقولى ايه ده ؟

فرحت شايطها برجلي (طبعا ما لمستهاش) وقلت : انا عارف .البنت زمان كانت لما تحب تخرج بتلبس ..دلوقتى لما تحب تخرج بتقلع

السؤال بقى : ليييييييه؟

علشان تعجب

س: يعني نازلة علشان تقول للناس انا جسمي حلو ..ولا غايرة تقضي مشوارها وترجع؟؟


زمان برضه كنت تبص للبنت تلاقيها بتتكسف وتودي وشها بعيد

دلوقتي تبص للبنت تلاقيها انها هي اللى كانت بتبوصلك الاول وياريت بتنزل عنيها لما تشوفك انك شوفتها

ايه البجاحة دي!!!!؟


نيجي بقى للازدواجية الاخلاقية

اخوكم مشرف في منتدى ..ومعنا عضو بالمنتدى ملحد

وطبعا بيكتب موضوعات جريئة

فتلاقي الشباب والبنات داخلين يدافعوا عن الاسلام ويلعنوا سلسفين اللى جابوه

وابص في توقيعاتهم ألاقي صور لتامر حسني وأليسا وما ادراك ما أليسا والكينج شاروخان

وطبعا محدش يقولى مين شاروخان ده ..لاني اكتشفت انه معبود الجماهير في الخليج

للجاهل اللى زي حالاتي ومايعرفش مين شاروخان ده ..اتاريه ياخويا ممثل هندي


يعني احنا بنعيش حياة مزدوجه في رأيي

نبقى معلقين صور أليسا على الحيطان او عاملينها خلفية على الجهاز وييجي وقت الصلاة نقوم نصلي


كنت مره ماشي مع زميل لي بالقاهرة ..وانا صعيدي بقى وقاعد اتفرج وابحلق

هي الناس دي ابهاتها فين؟

جاوبني وقال : محدش فاضي علشان يربي

وبعدين الاب هيعمل ايه ..هيلاقيها من الدش ولا النت ولا السينما ولا الكورنيش ولا هييجي يمشى مع ابنه او بنته وهم ماشيين مع اصحابهم

ماهو يا يربي..ياما يموت من الجوع


وتلاقي البنت محجبة ولابسه الجينز الضيق طبعا وماشيه مع شاب في الشارع او واقفين على الكورنيش وهو حاطط ايده على كتفها وحوالين رقبتها ومميل راسه بيعملوا ايه او بيقولوا ايه ..ما علينا مش مهم

نفسي بس اعرف متحجبة ليه؟

انا بس عايز الزميل ياخد راحته يعني احنا رجالة زي بعض ولازمن نفكر في بعض


فيه ملحوظة كمان

زمان كان التعبير عن البنت الجميلة تعبير جمالي راقي شويه

يعني مثلا حلوه , جميلة , اموره

دلوقتي التعبير عن الفتاة الجميلة بقى بألفاظ تحمل معاني جسدية

البنت دي مزه

الشاب ده كوول روش طحن

ولما تدور عن المعنى الاجمالى لمصطلحات كول روش طحن هتلاقيها ذات دلالات جسدية في الغالب اضافة الى فساد اخلاقي بمعني انه مقطع السمكة وديلها



وطبعا حاجات كتيره في حياتنا تحس ان تفكيرنا الحقيقي تفكير جنسي


يعنى مثلا عمرك ما تلاقي اعلان : مطلوب سكرتيرة حسنة الثقافة


اصحاب المحلات بيفضلوا غالبا يشغلوا بنات


تدخل الموظفة على المدير تقوله بعد اذنك انا هروح بدري ساعة او ساعتين النهاردة يقولها ماشي وما يتكلمش

انما يقدر موظف يروح بدري نص ساعة
!!!

لا و الغريب تلاقيهم بياخدوا علاوات اكتر من الموظفين

الكلام ده على لسان موظف متغاظ اوي في شركة بترول
فيه تعليق من المفقوعة مرارتها فكرني بالجامعات
اه ده تحديث للتدوينة
طبعا كلنا عارفين ان فيه شباب وبنات بيروحوا الجامعة مش علشان يتعلموا
خاصة بتوع الاداب والتجارة والحقوق
تروح كلية الاداب تلاقي طلبة من تجارة
تروح كلية التجارة تلاقي طلبة من حقوق
تروح كلية الحقوق تلاقي طلبة من دبلوم زراعة دخلوا الكلية والمدرجات ازاي الله اعلم
للاسف فيه نسبة من الشباب ملحوظة (لان مبقاش فيه حياء خالص) فاكرين ان الجامعة دي يعنى انطلاق لرغباتهم الجنسية المكبوته
وكله يتجه بحثا عن اقامة العلاقات تحت شعار ادينا بنتسلى
وتشجيعا من الدولة لهذه العلاقات وعلشان الشاب مش يروح الجامعة يفرغ طاقته المكبوته
عملوا حفلات تخرج لطلبة الثانوي وجابوا فيها دينا الرقاصة
اسكتوا لقيت صورة من الحفلة على النت..بس لا ياعم انا اتكسف احطها في المدونة
انا هتفرج عليها لوحدىىىىىىى
وكفاية عليكم كده النهارده


40 comments:

بنت الصالحين said...

لاحول ولاقوه الا بالله

اغيب اغيب ارجع الاقي موضوع كده


ايه بس اللي جرالكو

طيب خير
عموما موضوعك ده للاسف بقي ملحوظ جدا

وللاسف هي دي المشكله ان الاهالي مش عندهم وقت يربوا

فين الاهل اللي بتحاسب بس طبعا في وجود ثقه بينها وبين اولادها

نرجع للبنات والشباب ليه تفكيرهم بقي كده للاسف هنرجع تاااااااااني لصعوبه الزواج وبرده نقص الدين والاخلاق


وبعدين اهو التليفزيون ده للاسف مصيبه
انت بتقول افلام زفت وخليعه

ماهو ده احنا السبب فيه

اللي عارف دينه واخلاقه كويس عمره ماهيدخل افلام زي دي

Mostafa Abdelmoneam Badr said...

أولا أنا نسيت أقرا السطر اللى بالاحمر
مممممموش مشكلة
ثانيا: الموضوع جرييييء يا صاحبى
وده بيحصل من ناس كتيير وفيه نسبة وتناسب.
حاجة كدة زى دود المش منه فيه. او البيضة الأول ولا الفرخة. الخلاصة إن الفوضى الاخلاقية هى سبب السلوك السيء. والسلوك السيء سببه الفوضى الأخلاقية.ولما السلوك السيء بيزداد سوء لا مؤاخذة بيكررر. يعنى بيجيب فى رجليه اللى كان لسة محافظ شوية. وهكذا تذوب المبادئ الهشة فى اناء المجتمع المنقوع فيه فوضى أخلاقية.
إوعى تفتكر إنى بأغسل. ده مثال بس.وعلى فكرة من غير ماطول عليك قول طول كل حاجة ليها حل قدييييم فى السنة النبوية. يعنى جميل اننا نشخص علشان نصرف العلاج. وجزاك الله خير يا دكتور

رئيس جمهوريه نفسى said...

الموضوع ده بقى منتشر قوى والكلام الى انت بتقول عليه غزا الصعيد وبقى كورنيش محافظه قنا ولا كورنيش ماسبيرو والقيم ذابت او انتهت والكمبيوتر والدش والانترنت صدرو لينا زبالة الغرب بس للاسف وهما بياخدو مننا الصح بتعنا فى واقع معكوس
موضوع احصائيه جوجل صح على فكرة اول الدول على مستوى العالم فى استخدام الكلمة ومرادفتها هى مصر
ملحوظه انا سايب صورة البطاقه على باب البلوجعلشان ااقدر ادخل ااقرى الموضوع

المـــفـــــــقــــــــوعـــــة مــرارتـهــا said...

برضه مش هانعمم
لان فيه ناس لسة محافظة علي تقاليدهم
يعني مش كل البنات قلعت
ولا كل الولاد باظت
بس للأسف البايظين كتروا أوي اليومين دول
ــــــــــــــــــــــــــــــــــ
تعرف احنا لو ناس محترمين نقاطع الأفلام بتاعة الكبار فقط دي لحد مالهوجة تعدي وتعدي بسرعة
ـــــــــــــــــــــــــــــــ
أما عن الشغل فعندك حق تلاقي البنت من دول مش بتاعة شغل وهي اللي بتترقي اكتر من الشاب عشان الشاب دمه تقيل علي قلب المدير
وفي الجامعات تلاقي البنات الحلوة هي اللي واخدة حقها في الدرجات تالت ومتلت عشان بتعرف تضحك للدكتور
ــــــــــــــــــــــــــــ
ربنا يعينكم ياشباب مصر

الباحث عن الحقيقة said...

عاشقة الفردوس
حمد لله على سلامتك
وانا كمان زيك بقول فين الاهل
بس هل ضاعت التربية بسبب الانشغال وراء لقمة العيش؟
والافلام اللى زي الزفت دي اعلانتها في الشوارع بشكل مقرف
دي تكون صورة ميادين القاهره
ملصقات لافلام للكبار فقط

***************

مع اصراري
نسيت تقرا السطر اللى بالاحمر كده يبقى انا مضطر اشوف بطاقتك
جميل اوى كلمة الفوضى الاخلاقية
فعلا فوضى
والاسف لا الوالدين بيعاقبوا
ولا المجتمع بقى بيستنكر
شئ غريب فعلا
والوحش بياخد الحلو في الرجلين
فعلا العلاج في السنة النبوية
بس مين هيقرا ويتبع
بنسبة كام؟
انما برضه نعمل اللى علينا

الباحث عن الحقيقة said...

رئيس جمهورية نفسي
مرحب يا زميل
وصورة البطاقة ليه امال فين كارنيهك
فعلا الموضوع انتشر جدا في كل ارجاء مصر
وطبعا في اسيوط اللى انا فيها
ومش عايز احكيلك حكايات قديمة عن اسوان ايام ماكان واحد صاحبي بيدرس هناك من عشر سنين
فعلا معاك حق الغرب لانهم ناس عمليين ومجتهدين علميا اخترعوا اخترعات تزيد من تقدمهم العلمي
احنا اخدنا الاختراعات دي زي لعبه او للحصول على المتعة
ومرحب يا عرب

****************

المفقوعة مرارتها
والله من ساعة ما فكرتينى بالجامعة وانا مرارتى هتنفقع
ثواني اروح اعمل تعديل واضافة على حكاية الجامعة دي
واعلانات الافلام اللى للكبار فقط
ماهو الكبار دول هم القدوة
يعني المفروض يقاطعوها كمان
او يقطعهوها الافيشات دي

صاحب المضيفة said...

لا حول ولا قوة الا بالله العلي العظيم

ده من الغزو الفكري المريع اللي بنواجهه كلنا في ايامنا دي بمنتهى الجرأةوالوضوح


لا نمكل الا الدعاء لوقف تلك المهزلة وعودة الناس لدين ربنا بشكل عملي بدون شعاراات جوفاء لا تسمن ولا تغني من جوع



شكرا لموضوعك القيم

nigro said...

يا سلام يا أبو حميد
قول يا سيدي قول
دي بقت حاجة تفوّر الدم
بس على فكرة يا أحمد التسيب ده وصل للناس اللي تحت كمان و مش مقتصر بس على فئة بعينها
يعني دلوقت تلاقي بعض الأمهات هي اللي بتلبس بناتها بالشكل ده .. قال إيه علشان تمشّي سوقها و تتجوز بدل ما تقعد جنبها
طيب يا ست هانم اللي هييجي يتجوز بنتك علشان كده .. هيبقى برده حد تآمنيه على بنتك؟!! .
و البنت بقت هي اللي بتجيب عريسها
و الأمهات -بعض الأمهات- بقى بيسكتوا عادي إن بنتهم تعرف واحد و بتمشي معاه -و ده بدون علم الآباء- و على فكرة النماذج دي انا أعرفها شخصياً
و الله يا أحمد الواحد دلوقت بقى خايف من الجزيئة دي في الجواز
إزاي تتضمن اللي هتتجوزها ماحدش طبطب عليها قبل كده؟

بس برده العيب مش وحده بيقع على عاتق الأهالي
البنت نفسها كمان مشتركة في ده .. يعني ممكن تلاقي البنت هي اللي بتعترض على طلب امها بلبس كذا و إنها تعمل كذا
بيبقى برده استعداد نفسي من البنت

و أنا عمال أتكلم على البنت على البنت .. اصل الواحد لو شايف واحدة محترمة في لبسها و تصرفاتها و مشيتها .. هيبصلها لييييييه؟ .. طفاسة يعني؟

و مسألة كمان المغالاة في طلبات الجواز دي بتخلي بعض الشباب يكبّر دماغه عن الجواز و يشغل وقته برده و أهو لو مش بالبث الحي يبقى بالأفلام المسجلة
بس بصراحة جزئية المغالاة في طلبات الجواز دي بدأت تقل شوية

تسعميت حاجة راكبة على بعضها هي اللي عملت فينا كده
بس لو كل واحد فينا راعى ربنا في تصرفاته؟!!

و يجعله عامر

يلا سلام

son's egypt said...

السلام عليكم
انا معاك في اللي انت قولته
الزدواجية الافكار
وعدم و\مراعاة الاخلاق والقيم والدين
هي اللي وصلتنا للحالة الي احنا فقيها دلوقتي
يعني اصبحت الاباححية والكلام عن الجنس اصبح شئ عادي جدا واصبح مفيش منه اي حرج
ازاي مش فاهم
ربنا يستر علينا

الباحث عن الحقيقة said...

صاحب المضيفة
الحقيقة الغزو الفكري ده احنا اللى بنروحله برجلينا
وبندور عليه بجوجل
او على الاقل بنسيبه يغزونا دون قيد او شرط
ماهي بقت سايبه يا عم الحج

***********

نيجرو
ايه الجمال ده يا مان
والله يابني ردك ينفع بوست بجد
عن البنات اللى بتتعمد الخروج بشكل مغري قال ايه ..كده ممكن تتجوز اسرع
ومع السعار الجنسي اللى ماشي اليومين دول
معاك حق
ازاى تضمن ان اللى هتتجوزها محدش طبطب عليها قبلك
ههههه بس هي تجي على الطبطبه مش اكتر

الباحث عن الحقيقة said...

ابن مصر
عارف الواحد مش ضد انك تتكلم عن الجنس من غير حرج
انا ضد اكتر الازدواجية يعنى ندعي ونقول عكس اللى نفعله
زي ما قلتلك في المنتدى مثلا
واحده كاتبة موضوع لماذا يهاجمهون الاسلام؟
وزعلانه اوى
والتوقيع بتاعها في المنتدى عبارة عن صورة لتامر حسني
دخلت على ملفها الشخصي لقيت صورة لأليسا
منين بنغير على الاسلام وزعلانين
ومنين اخلاقنا وافعالنا بقت اباحة وقباحه
؟؟؟؟؟
منور الاستراحة

Unknown said...

الشعوب العربيه من اكتر الشعوب تفكيرآ في الجنس و الاباحيه

حتي علي غرف الدردشه اي عربي يلقي بنت لازم يقل ادبه و بحاول يفتح معاها موضوع جنسي

في الشارع المعاكسات بالأيد و الألفاظ بقت شبه عاديه من تكرار حدوثها

ايه السبب انا مش عارفا لان هي مشكله مشتركه من الاتنين يعني البنت بتعاكس و الولد بيعاكس مبقاش الولاد بس الي بيعاكسوا

انا لسه من يومين شايفه بنت محجبه و واقفه مع ولد عن الكليه و تقريبا في حضنه و بيتكلموا بقت المناظر دي في كل مكان

تحياتي

ابن حـجـر الـعـسـقـلانـى said...

يخرب بيت دماغك يا باحث

إيه يا بنى دة


أنا مت من الضحك


لما أرجع لك هابقى اعلق براحتى ... أصلى خارج رايح أقابل التمنياوى طه عشان النهاردة عيد ميلاده .. عقبالك كدة

النهاردة كنت فى التحرير .. يبدو كدة إن أولاد المحاظيظ كتير

اهو ده عيبه said...

كل ده بيحصل واكتر للاسف
الناس وخصوصا الشباب الصغير بقى تفكيره منصب فى الجزئية دى وبس
لان مفيش فى حياته قضية اكبر واقوى يهتم بيها ويدافع عنها زى الاجيال اللى قبل كده
اقول ايه بس ربنا يهدى
ويرحمنا برحمته

الباحث عن الحقيقة said...

إيمي
اه على الشات وسنين الشات وايام الشات
تدخلى سيبر تلاقي عيال قد كده قاعدين يشيته
بنيله يقوله ايه دول ما يغوروا يذاكروا
وفعلا موضوع البنات بقت بتعاكس دلوقتي الوضع بقى غريب
الناس عندها كبت وبتفرغ الكبت ده
وللاسف معدش فيه حد بيهتم بالعيب
يعنى ممكن نشوف العيب ونسكت مش زي الاول

*************

ابن حجر
يا راجل يا ندل طب مش تقولي ان عيد ميلاد التمنياوي كنت سلمت عليه
معلش يا تمنياوي اللى عملها الواد الندل اللى قاعد ياكل في التورته ده
اوعى تخليه يدوق حاجه
كل سنة وانت طيب يا تمن
السنة الجاية تبقى نص كده او ربنا يفتحها عليه وتبقى تلات ارباع مثلا

الباحث عن الحقيقة said...

أهو ده عيبه
هو جايز بيشغل تفكير قطاع كبير من الشباب صغار السن
بس برضه كبار السن
ده مالوش سن يا عيبو ياختى
بس جايز الاكبر بيفكر فيه شوية جنس على عاطفه
يعنى الحاجه العاطفية والميل لاستقرار خاصة لو كبير ومش متجوز هو اكتر شئ بيشغله بيجمع بين الغرزية الجنسية والحاجه العاطفية
تشربي شاي ولا سحلب؟

جنّي said...

السلام عليكم

أنا جاي على ملاوشي علشان أشوف الإباحية اللي انت عاملها في الاستراحة ..ألاقي خالتي فرنسا ..فين الموزز ؟
تتصور انا طلعت أبو خالو .. أزاي ما جيتش الاستراحة قبل كده .. بس اللوم عليك لم تدعوني لمشروباتك وسندوشتاتك ..
بصراحة بها موضوعات قيمة قرأت بعض منها على عجالة لأني جاي من نصف ساعة كان لدينا عزاء لزميل من المغرب حتى الحادية عشر ..وقبل العزاء يا دوب مخلص المدرسة والامتحانات والكنترول بعد العصر .. وبعدين بصراحة أنا ما بحبش الشحططة من الصحيفة للاستراحة والعكس .. لكن خلاص هاتلاقيني لابد لك في الاستراحة من غير دعوات ..
نشوف بوست الاباحية .. لقد أصيب المجتمع بنوع من الفصام العصابي ( مرض نفسي ) فهناك عدم توافق فيما نقول ونؤمن به وفيما نفعله فلم نحصل المجتمع الإسلامي بضوابطه .. ولا المجتمع الغربي بكل انحلاله .. وأصبحنا كالراقص على السلم .. فالماسك على دينه كالماسك على الجمر .. والمنحل يتبجح بانحلاله ..
وبين هؤلاء تجد مجموعة ثالثة كالتي ترتدي حجاب من وجهة نظرها وترتدي الجينز أو تضع مساحيق أو تساير فتى في وضع مشين فهؤلاء لسن بمحجبات فعلا ..

في الخليج كل الظواهرمتواجدة خاصة في بعض البلدان كدبي والكويت ولكني لم أسمع عن الهندي اللي ذكرته
والخلاصة إذا الإيمان ضاع فلا أمان

mo'men mohamed said...

كل نعمة أعطاها الله سبحانه و تعالى للإنسان يستطيع انه يستخدمها فى الخير وفى الشر
الرغبة الجنسية و الميل للجنس الآخر حقيقة لا ينكرها أحد
ولا ينكر أحد أيضا ان هناك فترة فى حياة كل شاب مهما بلغ من الإلتزام يشهر بها بازدياد شهوته بشكل ملحوظ
ومن الطبيعى انه يفكر
ولكن الفرق بين هذا و ذاك
السيطرة على النفس بتوفيق الله سبحانهو تعالى

انا قبل كده اتكلمت فى الموضوع ده
انا بأنزل محاضرات عندى فى الكلية
واحد صاحبى قالى على اللى حضرتك ذكرته من نقص الحياء عند البنات
وانا اسلوبى بطبعه حاد للغاية
فقررت انى اتناول الموضوع بطريقة مختلفة لم يعهدها الشباب عنى
انا دايما بأكتب كلمات ايمانية و كلمات فكرية فى ظهر المحاضرات

ولكن فى النهاية محدش عجبه الكلام و لقيت إتعراض رهيب عليه و نقد شديد
وبكل بساطة لأنى اتكلمت فى الموضوع بصراحة
السلام عليكم

عصفور المدينة said...

للكبار أقل من سن 40
:)

الباحث عن الحقيقة said...

جني
لهو انت اول مره تيجي الاستراحة؟؟؟؟
يا وقعتك اللى مش فايته
يا خبر ابيض يا جدعااان
ليه بس كده ..انت غاوي تعور نفسك يعني
اقفل الباب يابن حجر
وهات عطيات مرزبة من على الحيطه آن الاوان يا ريس
فالح بس تشرب كريمر

بس جديده حكاية الفصام العصابي
شكلك فاهم يا نصه
فعلا احنا لا حصلنا الغربيين بوضوحهم وصراحتهم
ولا المتدينين بضوابطهم وألتزامهم
وضاع هويتنا يا ولدي بين روتانا والميلودي

الباحث عن الحقيقة said...

مؤمن محمد
اهلا بيك يا دكتور في مدونة الاستراحة كنا نتمنى نشوفك في الصحيفة كمان
ماشي ماهي كل الناس عندها غريزيه وربنا قالنا نعمل ايه
انما اللى بنعمله ده ..فجور علني
وليهم حق يزعلوا من صراحتك
كلمة في سرك احدى الاخوات اللى علقوا هنا كاتبه في البروفايل بتاعها بتحب فيلم حين ميسره
لا متفهماش غلط
هي معجبه بالقصة

الباحث عن الحقيقة said...

استاذ عصفور
اناكمان بقراه وانا مغطي وشي
:)
:(
مين فيهم يعني ابتسامه

ahmed saker said...

السلام عليكم
الموضوع بالرغم من جرأته الا انه لا بد منه و لكن بما انك اثرت تلك النقطة في هذا الموضوع فيجب عليك رصد بعض الحلول لهذا الموضوع
و كمان الموضوع كان محتاج صورة لدينا عشان يبقي نظري و صور
و يا سلام بقي لو فيه فيديو كمان عشان يبقي عملي
هههههههههههههههه

الفقير الى الله said...

موضوع جامد جدا ومنتشر بوضوح
روح مدارس الثانوي بتاعة البنات واتفرج على الفضايح
تحياتي

الفارس الملثم said...

علي فكره الازواجيه دي بقت في كل حاجه ,اقلك مثلا حد اعرفه جت مره سيرة الاغاني فقلي ربنا يتوب عليك منها ,مع اني مش بسمع اوي , وبعد كده بفتره لقيته بيسالني عن اغنيه معينه طيب اقوله ايه

يمكن اكتر حاجه تضايقني واحد يعمل فيها مفتي يقعد يحلل ويحرم وهو قاعد وتلاقي سلوكياته مع الناس لا ترقي لمرتبة؟؟؟؟

بس تعرف ضحكني صاحبك اللي ما بيركبش الميكروباص الا لو في بنت حلوه ,مش فاهم ايه الحكمه ؟؟؟؟؟؟؟

موضوع قيم للغايه يا باشا

تسلم ايدك

تحياتي

مـ~ـاجدولين said...

مرحبا الباحث

البوست غريب ويناقض افكارك
قرات لك تعليق في مدونه ما
انك ضد الحجاب
هذا رايك انا مش ضدك

لكن ادخل مدونتك اجدك كاتب اسلامي :)

وهنا تنتقد البنات وتعمدهم الثاره الجنسيه

حددوا مواقفكم عشان نلتقي لا نختلف

ولا هذا ازدواجيه ؟؟؟

الطائر الحزين said...

بما انى لسه مجبتش سن الاربعين يبقى مش هعلق

خليك متخلف زى حالاتنا

Empress appy said...

طيب ما احنا قولنا ان الناس عندها هلع جنسى ايه الجديد ايه العلاج
يا راجل حتى اللى بيتجوزوا من الرجاله طبعا برضه مفيش فايده وبيخونوا مش كلهم بس الاغلبيه وبيفضل عنده نفس الهلع على فكرة مش المصريين او العرب بس كمان الاجانب صدقنى مش كدب ولا هو كلام اعتباطا لااااااااا بتاتا البطه
دى حكيكه بس مش عاريه لاننا فاكرين انهم معندهمش لا والله عندهم
يبقى المشكله فى الامخاخ يا خويا بقى اللى مسنترة دماغها ليل ونهار فى الموضوع ده طيب نعمل ايه وجهه لحاجه تانيه هتقولى البنات السبب واللبس
طيب اقسم لك بالله فيه ولاد بيجروا فى الشارع ورا بنات محجبه وولد زميل ليه ربنا يوقعه من على حرف سجاده يقولى كل ما البنت بقى لبسها متغطى كل ما تبقى اثارة للراجل طيب اقوله ايه اقولك عملت فيه ايه رميت الميه على دماغه علشان يفوق
يبقى الحل فين مفيش حل ومش عارف سلام بقى علشان رايحه شرم الشيخ هههههههههههههه

Jana said...

الأهل ثم الأهل ثم الأهل
مافيش حاجة اسمها الاب مش فاضى يقعد مع اولاده
ده لو نص ساعة فى اليوم..ممكن يغرس فيها اللى مقدرش عليه اباء تانين بيقعدوا 10 ساعات فى البيت
دور الأم فين ؟؟
ولاهى كمان بتشتغل نهار وليل؟
لو كده يبقوا يموتوا من الجوع احسن
ثم ده مش حال الشباب بشكل عام
وبعدين مانتو شباب اهو ماشاء الله لكن عقلكم مش فارغ ..بل على العكس باشوفكم اكبر احيانا من سنكم
مع انى معرفش عمركم اصلا
لكن نحسبكم شباب نقى تقى يعرف الله

تربية زمان مبقتش تنفع
زمان غير دلوقت
ولكل فعل رد فعل مساوى له فى المقدار مضاد له فى الاتجاه
فين رد الفعل ده ؟؟
ده احنا اساساالمفروض نكون اصحاب فعل مش اصحاب رد فعل

فعلا انت عندك حق لما قلت
دول مالهمش ابهات
ولا حول ولا قوة الا بالله العلى العظيم

هو اسمه كده!!؟؟
شاروخان!!!؟؟
طيب....

الباحث عن الحقيقة said...

أحمد سكر

صور وفيديو
ليه بس يابني كده خلينا ساكتين
وبعدين عندك الشارع ولا أقف في البلكونه وانت تشوف كل حاجه

*************

الفقير الى الله

وليه اروحمدارس الثانوي مانا جنب المحكمة مدرسة ثانوي وبنات برضه
بس ماتقولش لحد

بس يا خسارة ثانوي ازهر
هههههههه

**************

الفارس الملثم
يا هلا بالشاعر الكبير

معلش اصلنا صعايده
واكتر مكان ممكن تقابل فيه بنت وتقعد جنبها الميكروباص
ههههههههه
منور يا فارس

***************

ماجدولين

منتظر ردك على مدونتك او هنا
هاتي الدليل قبل ما تتكلمي

الباحث عن الحقيقة said...

الطائر الحزين
هتقعد تقولى سن اربعين ومش اربعين وفي الاخر تقراها في السر
ايوه الحركات دي انا عارفها
فكرتني بواحد كان بيقول انه كان بيسرق مجلات طبيبك الخاص من الامكان اللى والده شايلها فيه علشان يقراها ويرجعها
هههههههه
اقرا قدامنا احسن ما تروح تقرا من ورانا حاجات تانية

*******************

آبي
هي فعلا غريزية مسيطرة جوه الدماغ وبعدين الناس فنون وألوان
زي مانتي قلتى فيه واحد يقولك انا بحب البنت تكون محترمه في لبسها ومش باين من جسمها حاجه غير وشها او عنيها
فانتي تقولى ده راجل محترم
انما هو قصده ان كده اكثر اثارة جنسية بالنسباله
وبعدين انتى رايحة شرم الشيخ
خدينى معااااااااااكي

*************

جنى الجنتين
فعلا مفيش حل غير الاهل
لان محدش هيقدر يربي غير الاهل
لا مدرسة بتنفع
ولا جامع لانهم مش بيدخلوا جامع اصلا
مش كلهم يعني

وبعدين بلاش تجيبي سيرتنا انا وابن حجر خليها حلوه كده مستوره

اه اسمه شاروخ خان
ادخلى اي منتدى خليجي وخشي قسم الصور هتلاقي صور كتيره له

Hoda said...

بما انى اقل من تسع سنوات يبقى مش هعلق على البوست دا انا جايه اصبح وامسى والقى التحيه للناس الكوووووووول دى

تحياتى

مـ~ـاجدولين said...

مرحبا اخ الباحث عن الحقيقه
اولا ارجو ان لا اكون ازعجتك حضرتك
ثانيا شوف حقيقه أنا اعتقد اني قرأت ردك في اح دالمدونات من شهور عديده
وبحثت للامانه عشان قدرت موقفك ولومت نفسي لكن المدونات كثيره جدا جدا والصراحه لا اذكر اين كان ردك

شوف اخي أنا مش ضدك وحقك ولا ادخل في نيتك
لكن أذكر تماما اني انصدمت من التعليق ومن صورتك وانت ساجد
ربما فهمتك غلط وكنت فقط تميع موقفك لكسب رضا احد

لكن صدقني انت ما دمت وضعت صوره اعظم ما يربط العبد بربه الخضوع
كن جاد ومحدد في موقفك لاني انا كقارئه فهمتك غلط وفعلااحجمت عن دخول
مدونتك لفتره

تقريبا أذكر تعليقك أنك قلت الحجاب او عدمه مش هو الموضوع المهم الصلاح والاخلاق

شئ من هذاا لقبيل

واعتذر لك لو جرحتك دون قصد

لكن نصيحه مني لو غضبوا منك حدد مواقفك مادمت ارتضيت بشعارك السجود

وارجو ان لا تغضب مني

وفعلا ضروفي صعبه
ومضطره اوقف تدوين

Unknown said...

السلام عليكم ورحمة الله وبركاته
(انا هتفرج عليها لوحدىىىىىىى)
مش حاقولك غير
ياأنانى....ياأنانى.......ياأنانى
مع تحياتى
ياأنانى

Unknown said...

السلام عليكم ورحمة الله وبركاته
معلش كان لازم اعمل لىّ منظر وانا داخله كده التعليق ال35!!!! بسم الله ما شاء الله, الله اكبر ,وعين الحسود فيها عود
المهم القضيه او الرأى بتاع حضرتك
من تغير العادات والسلوك الى (الاسفل وللاسف)فى رأىّ ما هو الا تطور لابد منه عارف ليه؟ لان رسول الله صلى الله عليه وسلم قال كده .انا لاأذكر الحديث نصآ ولكن ما معنا أن فى اخر الزمان القابض على دينه(اى المحافظ لدينه وعهد ربه معه) ماله بقى يارسول الله حيكون كالقابض على جمرة من النار
وبالتالى انك تحفظ نفسك وعينك وجوارحك (لست انت وحدك المقصود بهذا الكلام ولكن كل انسان ذكر كان ام انثى)
كونك تحفظ هذا كله وسط المحيط المتلاطم من...و.... و....(انت فاهم طبعآ ) عندها تكون بطلا وتكون حقآ قد قبضت على جمرة من نار لن يخذلك ربك فى ثوابها ابدآآآآآآآآآآآآآآآآآآآآآآآآآآآآآ
وشكرآ لزيارتك
وحمد لله على سلامتك
وتحياتىىىىىىىىىى

الباحث عن الحقيقة said...

حنين

مرحب بحضرتك وزيارتك بقالنا مدة طويلة يا فندم مش بنشوفك عندنا
طيب لما تكملى 9 سنين ابقي تعالى

*********

ماجدولين
طول عمري بقول ان الحجاب مش علامة على التقوى والصلاح
واظن ان قولي هذا لا يكون تمييعا لمواقفي وارائي وليس معناه اني ضد الحجاب
اول مره اقول لاحد وجودك في مدونتي ازعجني
مش لاني ضد الرأي المخالف لكن حضرتك جاية تحملي لي اتهامات اخلاقية وتتهمينى بالنفاق وتمييع ارائي
اسمحيلى ...
مش عايز انطق كلام بايخ
سوري
بس حقيقي انتى ظلمتينى جدا
واتمنى ظروفك تنتهي على خير
السجود هو أقرب الطرق للفلاح
لان ربنا بيقول اسجد واقترب
واقترب دي لها معاني كتيره
بس تعرفيها من حد غيري مايكونش بيميع مواقفه

الباحث عن الحقيقة said...

norahaty
اناني اناني برضه هتفرج عليها لوحدي

ههههه

معاكي حق ان الزمن بينتقل بينا من سئ الى اسؤ دي حقيقه
في حديث بيقول خير القرون قرني ثم الذين يلونهم ثم الذين يلونم
شوفي احنا بنلونهم باربعتاشر قرن
ولسه
بس ده ما يمنعش اننا نشير الى مواطن التغيير خاصة لما يكون شئ غير اخلاقي في سلوكياتنا وادميتنا وتعاملنا
لما يكون تعاملاتنا ونظراتنا لبعض كجنسين مختلفين نظرلاه وتعامل يغلب عليه الفكرة الجنسية
ونتحول الى اشخاص اباحيين في سلوكياتنا العامة اللى بتظهر على الكورنيش مثلا
ولا الكرنيش ده مش طريق عام
ومنورة جدا يا فندم بزيارتك دي لمدونتنا المتواضعة انا وزميلى عسقول

الطائر الحزين said...

طبعا بقرأها فى السر انت عاوزنى اتقفش ولا ايه

الله يسامحك يا عم

Mafrousa said...

الدنيا اتشقلب حالها
وربك يسترها على الولاد و البنات
كلها اجات مدفوسه فى العقول لتدمير الشباب و الرجاله و الستات
انت مستهون بكمية الهرمونات اللي يحطوها فى الفواكهه و الخضروات و الفراخ؟
كل دول عوامل مساعده
بص هيه منظومه مدروسه و متخططه كويس و الشباب بيعمل على انجاحها و محدش بيفكر... و لعلمك النسب ديه زادت بعد ما فيه جامعات مفتوحه للدول العربيه كلها

Unknown said...

السلام عليكم ورحمة الله وبركاته
انت جبت اللى فيها

(لا الكرنيش ده مش طريق عام
الكرنش الحين سار طريق سياحى وبدال سياحى ولاجل السياحة كل شىء يهون يا دولارررررررات
اهو ده بكره اللى يحصل
يافطة اددددددددددد كده تتحط ومكتوب عليها ممنوع المشى للمؤدبين والمؤدبات والمتربين كويس والمتربيات
ولو جم هنا حنكسر رجلهم(انشلله هم يارب)
وتقبل تحياتى